العوض الجميل

الجزء 33

#العوض_الجميل
#ليلى_كريم
#بقلم_فريال
الجزء 33
انا ركبت مع نوفل ونادية وعمتي وبنت هالتي ومرت خالي وخالي راحو مع عيسى والباقي كل واحد في طوموبيلتو رحنا في 4 طوموبيلات ماطولناش وصلنا البلدية كانت قريبة لينا لقيناهم يستناو فينا حتى هوما جاو في جيش كريم يماه خواتاتو خاوتو ليندة وراجلها عمو لكبير وخالو وولاد عمو بزاف تقول عرس، دخلنا ماطولناش اصلا يعرفونا مليح ياك يقولو جماعة لمعريفة ليه ليه يفريو شغالاتهم هكاك حنا، سنيت وزاد سنيا هو والشهود  الفرحة باينة من وجهو يضحك عاجبو الحال خرجنا برا جاو ولاد عمو ضربو البارود والنسا يزغرتو وزاد مدولو ضرب هو وقدم شدلي يدي وضربنا مع بعض صورنا معاهم كامل كي جينا مروحين يماه عرضت علينا نروحو نتغداو مبغاش عيسى قالها كثر خيرك مرة اخرى راما خلينا الضياف داخل، مدولي كادوات يماه جابتلي ڨورمات تاع ذهب وهو جابلي خاتم وسنسلة باسمي وباطة فيها حوايج بزاف ساعة وبارفا ومكياج ومعاهم بوكي تاع ورد وباطة تاع شيكولا متنوعة. اليوم ضحكت بزاف وفرحت ماعلباليش علاه ديما نخاف من فرحتي ونحسها ديما بلي مؤقتة وفي اي لحظة تخلاص ويجي في بلاصتها الحزن، روحنا لدار لقيناهم مدايرين عرس وحدهم تحسب عقد تاع طفل مش طفلة فرحولي كامل من غيرها هي اصلا ماتهمنيش تروح تقود عليا برك تخطيني برك. فليل بعد ماتفرق الغاشي عيطلي كريم حكينا عادي من بعد قالي ياك لمرة الي فاتت سقسيتيني وانا مجاوبتكش _ ايه تفكرت _ غدوا نتلاڨاو وسقسي براحتك وانا نجاوب ذوك راكي مرتي شرعا وقانونا نخرجو ونحكيو براحتنا _ ايه معليش انا ثاني عندي مانحكيلك المرة الي فاتت ماخليتنيش نحكي بصح غدوا لازم تسمعني _ ايه نسمعك مكانش مشكل بصح انا ثاني عندي مانقولك نوضحو كلش باش نبداو حياتنا بدون غموض ومشاكل والي راح نقولهولك يخصك انت ويخص نهار خطبتنا مكنتش حاب نحكيلك ونقلقك لانو حاجة تافهة بالسنبة ليا ومتأثرش فيا بصح مدامك مصرة تحكي كلش هكا خير هيا ذوك نخليك راني خدام باي _ باي اتهلا في روحك _ خايفة عليا _ ايه لازم لانو خدمتكم تخوف _ خايفة عليا كعاد خدمتي تخوف برك ولا كاينة حاجة خلاف _ وش من حاجة راح تكون مثلا _ منعرف انا قولت قلبك بدا يميل ليا وطيحي فيا كيما طحت فيك، جيت نقولو ياو طحت وكملت من زمان بصح حشمت سكت مابغيت نقولو والو _ باين راح نعاني من حشمتك هذي بزاف هيا نخليك باي عمري، كوبا عليا وانا بقيت نخمم منعرف علاه خفت من الشي الي راح يقولهولي وحسيت بلي عندو علاقة بنهار خطبتي وبراجل الي يظل يتبع فيا المهم عندي غدوا لازم نحكي كلش لكريم باش مانلقاش مشكل من بعد ويحاسبني ويشك فيا كي محكيتلوش وخبيت وراح يدخل الشك بيناتنا والشك اذا دخل على اي علاقة راح يهدمها ويدمرها.
#فريال