العوض الجميل

الجزء 64

#العوض_الجميل
#ليلى_كريم
#بقلم_فريال
الجزء 64
ليوم هذاك اسوء يوم فات علينا بعد يوم وفاة بابا ناس كامل تبكي نادية ندبت عيطت خبطت وهكاك مابردش قلبها حضنت بنتها وتطلب في سماح وتقولها اسمحيلي مسمعتكش ومكنتش نحضنك وقت كنتي تبكي وتشكي وكي تبغي تطلقي نقولك عيب ووش يقولو الناس علينا انا ديت هم ناس ونسيت هم بنتي هاكي ذوك روحتي وخليتيني واحد ماينفعني لا ناس لا هدرتهم ابنتي اسمحيلي رجعتك لجهنامة بيديا مديتك لشواطن وقولتلك اقعدي عندهم كلاوك وغبنوك الله ياخذ فيهم الحق كيما حرقولي قلبي عليك ان شاء الله يتحرق قلبهم ربي يجيبهالهم حسبي الله ونعم الوكيل فيهم واحد واحد كيما راح ندفنك ليوم ان شاء الله يدفنو لعزاز عليهم كيما حڨروك وضربوك تخرج فيهم ان شاء الله، بقات تدعي وتسب فيهم وحاكمة بنتها تبوس فيها بالسيف ماطلقتها هوما خرجوها وهي طاحت تغاشات تعاونا هزيناها لشومبرتها لمزية كانت صاحبة بنتها لثم دارتلها برا رقدت عشية كامل مافاقتش. تعاونا كامل نسا خاوتي خواتاتي سلافات ختي كامل يد بيد وجدنا لعشا لناس انا نخدم شوي ونروح نتقيا ريحة اللحم عفتها كي شافوني هكاك قالولي روحي تقعدي تباني مش مليحة ارتاحي وجهك صفر ويديك راهم يرجفو (وصح انا كي تكون وفاة ونروحلها نبقى نرجف وحدي من صغري). كريم عيطلي عزاني وقالي راني جاي مع يما ودارنا كامل قولتلو اسمحلي ماعيطتلكش جيت بلا شورك قالي عادي مكانش مشكل الوفاة مايلوموش الناس فيها ربي يرحمها ويغفرلها _ امين يارب العالمين غاضني وليدها تيتم وهو صغير، غلبوني دموعي ولدها صغير بزاف عشية كامل يدور ويبكي يحوس على يماه كل مرة شكون يرفدو ويسكتو من بعد داه خويا عيسى معاه لبرا باش ينسى شوي بصح شكون فينا يقدر ينسى يماه حتى وتكون قبيحة بصح تبقى مك وتحبها ويصرا وش يصرا متقدرش تكرها صح تزعف منها بصح تبقى بلاصتها في قلبك هي نفسها ولوكان كشما يصرالها انت اول واحد تبكي عليها ( ربي يحفظ جميع الامهات ويطول في عمرهم). اهل كريم كامل جاو عزاو وروحو بصح لعزوج قعدت باتت، فليل بدينا نعشيو فالغاشي تعاونا نص يوجد ونص يسربي لناس كعاد في بزاف ليه ليه كملنا نصهم روحو لديارهم كعاد يسكنو قريب بقاو غير لقراب باتو، ناضت نادية جات للكوزينة لقاتهم مجموعين قالتلهم انا بنتي دفنتها تحت تراب ونتوما سبابها انت ايما كل ماكنت نجي ليك ونحكيلك تقوليلي خليها برك عادي مكانش زواج بلا مشاكل ومش مليح تطلق ووش يقولو عليها ناس هاني تبعتك وش ربحت ربحت شعر بنتي وراحت وانا الي تكويت كنت نضحك على ليلى كي ماقبلتش تتزوج ودير رايك بصح عندها الحق الي رفضت لوكان راهي تتمرمد كيف بنتي هاي قرات وتخرجت وخدمت وتزوجت بسيد رجال وانت اقعدي في الجهل تاعك حتى تلقاي روحك وحدك، انت سبابي لوكان ماتبعتكش مايصرا الشي هذا لوكان تبعت راي ليلى مايصرا شي هذا بصح نستاهل انا الكلبة الي تبعتكم، يابنتي وين رحتي وخليتني كويتيلي قلبي عليك يا لوردة تاعي عذبوك في دنيا ومرمدوك ويماك ماوقفتش معاك اسمحيلي، بقات تبكي وتندب حتى زادولها برا وحدة اخرى تعاونو داوها رقدوها ولباقي فرشو لناس ورقدو.
#فريال