العوض الجميل

الجزء 60

العوض_الجميل
#ليلى_كريم
#بقلم_فريال
الجزء 60
روحت لدارنا في نهار وروحت مابغيتش نبات مزالني متغششة، عرضتنا ماما انا وعجوزتي نسا سلافي حتى من سلافاتي عيطتلهم رحبت بينا وقامت بيهم ماخلات ماتحط كلش بالطبع والشان (ماما هكا مدايرة تحب تضيف ناس وتبين روحها قدامهم تقولنا الضيف كي يدخل لازم نقيموه وكلش يتحط كي يخرج من عندنا يكون راضي وفرحان). قعدنا عندهم نهار كامل وكي جينا مروحين ردتلهم كامل كادوات ماخلات حتى واحد بالصغير بالكبير ردتلو. يومين بعدها عيطتلي مرت عيسى وعرضتني كريم كان خدام قالي روحي وانا نلحقك فليل عجوزتي مكانتش راحت لدار خوها مريض رحت وحدي مع دخلت لقيت عيسى سلمت عليه وتجي مرتو من لور تعيط قالتلي خير ماجابك عندنا وش بغيتي _ جيت لدار خويا عندك مشكل _ هيه عندي مشكل وش راح ديريلي _ ماعندي مانديرلك تعرفيني منحبش نعاند ناس الي طاير عقلهم _ ااا ياحلوفة ذوك رجعت بلا عقل وطاير، نطق عيسى قالنا احشمو وش بيكم ودار لمرتو قالها هكا تستقبليها وهي جات ضيفة _ مهيش ضيفة راهي جات لدار خوووها _ ايه دار خويا ومرت خويا اللفعى _ تقرصك ان شاء الله كلبة عيط علينا عيسى قالنا احشمو كبار وجايحين قال لمرتو عيب تعاملي ختي هكا _ ااا ذوك جيت مع ختك ضدي بهاذ البساطة _ ماشي جيت معاها ضدك بصح مع دخلت ديراكت بديتي مسلمتيش عليها حتى _عادي موالفة بيا  الحلوفة ملي تزوجت نساتني ضربة وحدة ماتعيط ماتسقسي ماتجي ماطل ماتقول مرت خويا ميتة ولا حية حتى نعيطلها انا _ ياك نحكي معاك كل يوم _ وعلاه ماتجيش عندي _ اسمحيلي والله ماقعدت حقك عليا، جات حضنتني وتبوس وتقولي ياعمري ياحبوبتي توحشتك ودار صامطة بلا بيك خزر فيها عيسى قالها خليها تنفعك من بعد هي ترجع لراجلها وانت اقعدي وحدك _ يا غرت هي حبوبتي وانت حبيبي الغالي بلا بيك منقدرش نعيش تخطيني نموت بصح انت ديما معايا وختك عندها بزاف ماجاتش عليها راني ندلل فيها _ ايه معليش هاني خليتك اشبعي منها. خرج خلاني معاها نقصرو ونحكيو ماحسيناش بالوقت حتى لقينا المغرب آذن صلينا جا كريم هو وعيسى ولولاد كلاو مع بعض وانا ومرت خويا وبنتو مع بعض كي كملنا تلمينا في صالة كامل كريم لام سلام على مرت خويا وهبط راسو حتى هي تحشم راحت للكوزينة وخلاتنا ولاد خويا حطوني في وسطهم ويحضنو فيا لكبير قالي شوفيلي عروس راني حاب نتزوج وملقيتش الي توالمني انت تعرفي تخيري _ ان  شاء الله تلقى الي بغيتها علاش لا ونديرولك عرس مطرطق _ ان شاء الله عمتي والله ماما كرهت منا وراهي تظل تحاوز فينا مابغاتناش _ ايه عندها الحق كبرتو ذوك وراكم واجدين.
#فريال