العوض الجميل

الجزء 26

#العوض_الجميل
#ليلى_كريم
#بقلم_فريال
الجزء 26
سكت مابغيت نقول والو حشمت منو من جيهة فرحانة وراح نطير واخيرا ضحكت الدنيا في وجهي والي عجبني وكنت نخمم فيه جا خطبني ومن جيهة خايفة لا يديرولي كيف المرة الي فاتت ويخربو عليا فرحتي بقيت في تخمامي نطلع ونهبط مافقتش حتى وقف قدامي حطلي دراهم في حجري وخرج. رجعت لصالو لعند يماه قالتلي وش عجبك وليدي سكت مابغيتش نجاوبها حشمت وش نقولها وليدك دالي عقلي وتفكيري وحتى من قلبي قريب يديه، كي شافتني ساكتة قالتلي منكثرش عليك باين حشمانة وش هو قرارك قابلة، شفت جيهة ماما نطقت وقالتي انا من جيهتي قابلة وحتى خاوتك قابلين بقيتي انت قولتلها ايه قابلة ناضو خواتاتو يزغرتو والي صدمني هوما خواتاتي ثاني يزغرتو اول مرة يديروها منعرف حشمو من ناس ولا فرحولي صح وكعاد مكانتش سمية زغرتولي لانو نهار تكون تبقى تعمرلهم في رسانهم وهوما ريح الي يجي يديهم. ركبلتي لعجوز خاتم تاع شوفة وسلمت عليا وباركتلي هي وخواتاتو وعمتو وخالتو، زادو شوي وروحو نضنا انا ولبنات فرزنا لحالة كعاد تعاونا ليه ليه خلصنا ونصبنا لعشا حطيناه يطيب واحد الهدوء روعة وهوما تقول ملائكة عاقلين يحكيو ويقصرو وبداو يخططو وش يلبسو لعرسي وفارحين خلاص قولت في قلبي ذوك عرفت شكون الي موالف ينكش فيكم ونتوما تبعو فيه تقول ولاد صغار ماتعرفو والو. حطينا تعشينا خاوتي ثاني قعدو معانا تلمينا كامل مع بعض روعة نحكيو ونقصرو ونضحكو ماما غير تخزر معانا حتى دمعو عينيها قالتلنا الله يدوم لمتكم ونشوفكم ديما قدامي ودايرين بيا قالها نوفل ابقاي عاقلة كيما ذوك نقعدو ندورو عليك تتحولي وترجعي شريرة نهربو منك ضحكنا كامل ضرباتو بالبشماق قالتلو متحشمش تقول ليماك شريرة _ مغلطش انت ديفوا تتحولي لابشع شريرة واحد مايحملك _ امشي الله يمسخك جحش، ليلة هذيك فوتناها ضحك وتمسخير وزيد تفاهمنا على الخطبة وكتاه قالولي مزروبين سمانة الجاية يديرو خطبة ويدفعو شرط والي بعدها العقد وممكن يطول شوي كعاد خادم في دولة بصح قالنا بمعارفي نزرب ليه ليه نعقد ساهلة خلاص ومن بعد لعرس منا على شهرين وين كملتي قشك قالك ماتجيبي والو راجل دارو كاملة مكملة من غير قشك ماتدي والو نطقت ماما قالتلهم بنتي متخرجش بلا جهاز لازم يكون بالطبع وشان منخلي حتى حاجة تنقصها وحتى وقالولكم متجيب والو بصح انا نديرلها قالها عيسى هذيك حاجة باينة منخليو حتى حاجة تنقص عليها اخر لعنقود لازم نقلشوه. ليلة هذيك جبناها ل3 تاع صباح خاوتي باتو عندنا اجمل ليلة فاتت علينا وحنا مجموعين ماصرا حتى مشكل فرحتي ماني عاطيتها لحتى واحد بصح لازم ديما تصرا حاجة وتخرب عليا فرحتي يقولو الي مكتوب عليه الحزن جامي يفرح وانا الحزن والمشاكل ديما لاصقين فيا بصح يجي نهار ونتهنى فيه ولازم نحط النقاط على الحروف باش كل واحد يلزم حدو وميبقاش يديرلي مشاكل.
#فريال