العوض الجميل

الجزء 06

#العوض_الجميل
#ليلى
#بقلم_فريال
الجزء 06
نشفى اليوم هذاك جاز روعة بصح كيف العادة فرحتي جامي تكمل جات يما ومعاها خويا وناضت تندب وتبكي وخليتيني وروحتي وانا مريضة وراح نموت وهكا هنت عليك وخسارة 9شهر الي هزيتك فيهم وخسارة تربيتي فيك هربتي وخليتيني نطايش في السبيطارات وحدي مكانش شكون يمدلي كاس ما نشربو، قعدت تندب وتدعي عليا الله لا تربحك ومكيش متربية وتفرعنتي وخليتيني وحدي مبغاتش تسكت حتى عيط عليها خالي صغير قالها بعد وش درتي كامل ومزالك تدعي على الطفلة روحي حاسبي بناتك الي مقلشتيهم هوما يرفدوك اما ليلى خليها بعيدة عليك مكفاش وش درتي فيها وكملتي ذوك بدعاويك وين رايحة بالشر هذا كامل تعياي تبقاي وحدك واشفاي على كلامي تولي تبكي عليها وتندمي ولثم تعيطي وتقولي ياندامتي وتستاهلي الشي الي يصرا فيك. سكت ضربة وحدة مازادتش كلمة تخاف منو وتعرفو مليح تغلط وتزيد كلمة يحطلها سعدها في يدها. باتت ليلة هذيك معانا وغدوا منو رجعنا لدار تحت توصيات جداتي ويما طبعا تقولها منزيدش نعاود خلاص وربي يسمحلي وندمت، تلعبها ندمت وتابت وكي وصلنا لدار رجعت لعوايدها وزادت تغاطت كثر وكثر.
ليلى مزالك برك مع الماضي منسيتيش _ وكيفاش ننسى وانا مزال عايشة نفس الشي ماتبدل والو بالعكس كلش يمشي للأسوء _ خليها على ربي وتعيا وتفرج عليك وتتهناي من كلش _ ان شاء الله واسمحيلي صدعتلك راسك نظل نحكيلك همومي ومشاكلي _ سماح مابيناتناش عادي وقت ماتحسي روحك مضغوطة احكيلي عادي راني هنا نسمعلك _ تعيشي حبيبتي لوكان مجيتيش معايا راني هبلت _ سلامة راسك متخميش بزاف بصح عجبني خالك الصغير فحل وقاوي _ عيب عليك راهو متزوج ومام انت متزوجة يشمع راجلك يشويك _ ياو مش بمعنى عجبني وحبيتو لا عجبتني شخصيتو وكي قدر يسكت يماك من اليوم كي تغلط معاك عيطيلو يربيها _ مسكين مام هو كره منها وليت نسكت وحتى كي يسقسيني نقولو لباس ومدارت والو تبقى ماما مهما دارتلي _ ايه صح ربي يهديها وتتحسن العلاقة بيناتكم _ آمين يارب. روحت لدار لقيتها مقلبة كلش محطوط ومطايش القش الصبابط الماكلة مرمية فلرض الكواغط الصاشيات تقول كوري مش دار بغيت نندب نهار هذاك علبالي يديروها مكرة فيا وذوك نلم كلش ويروحو يعاودو يحطو لحوايح وانا نبقى نلم من وراهم. طلعت لشومبرتي بدلت قشي وحطيت الصاشيات تاع حوايجي قولت من بعد ونرجع نحطهم فخزانة. صليت و هبطت لميت الكوزينة الي تقول كوري تاع دجاج يبانو حيوانات الي كلاو فيها مش عباد ماجيت نكملها ظهري تقسم ضربت معاها ساعة نحط فالبوطاجي واللرض كلش لاصق، حطيت لعشا يطيب وفت لباقي الشنابر سيقتهم ورتبت كلش وهزيت القش الخامج لحتو في الماشينة يتغسل كملت مع المغرب قدقد صليت وهبطت طفيت على العشا لقتيو وجد وهذوك جاو زي العسكر واحد ورا واحد جابهم خويا في الكار الي شراتو ماما على جال خواتاتي وولادهم لانو الطوموبيل ماتكفيهمش لازم على الاقل 5 طوموبيلات باش يخرجو كامل مع بعض ومكانش شكون يسوق بيهم كامل معندهمش بارمي محبوش يديروه قالك عيب لمرا تسوق وبلاصتها ديما جنب راجلها مش وحدها، كي شفتهم هبطو من الكار طرطقت بالضحك زي هذوك الي يديوهم رحلة ويبقاو ملمومين وميبعدوش على بعض والقائد تاعهم يما.
#فريال