العوض الجميل

الجزء 08

#العوض_الجميل
#ليلى
#بقلم_فريال
الجزء 08
طلعت لشومبرتي لقيت الصاشيات الي شرتهم مرمين فلرض والروبات مقطعين وليبرودوي مطايشين فلرض وسيحوهم، عرفتها خدمة سمية ديما ديرلي هك تدخل لشومبرتي وتفزدلي كلش اي حاجة نشريها جديدة تديها ولا تفزدها واذا لقات ذهب ولا دراهم ترفدهم ننطق ونقولها رديهم تقولي ماما خلي ختك ضيفة وش فيها اذا مديتيلها متكونيش مشتاقة هكا لثم نسكت انا ومنزيد حتى حرف اصلا منقدرلهاش ديما تسكتني بدراما تاعها تستاهل تمثل ندابة في المسلسلات تتقن الدور وتخليهم يصدقوها ودموعها ديما يهبطو تقول عين. لميت القش ورميتو وسيقت الشومبرا وهبطت غسلت لماعن عاودت طلعت صليت وحطيت راسي رقدت اصلا وش راح ندير تعبت عظم ماهو راكب في خوه وغدوا نصبح خدامة ولازم نوض على الفجر نطبخلهم ياكلو لا ياكلوني. فقت مع الفجر صليت وبديت فلغدا نوجد فيه هذاك هو ياربي مانكمل والجيش ينوض بكري باش يخرج يحوس ويدور ولوكان مايلقاوش الفطور واجد يطرطقو نهار كامل وهوما يرهجو اللخرة فيهم توزن80كيلو البقرة عند ختها كعاد ولدو سمانو وعراضو، عندي 5 خاوتي ذكورة و 3 خواتاتي وانا الرابعة، خويا لكبير عيسى عندو 55 سنة (عندو 3 ذكورة وطفلة وحدة لكبير فيهم عندو 30 سنة ومن بعد يجي واحد عندو 28 سنة والي بعدو 22 سنة والطفلة الصغيرة عندها 18سنة يظلو يندبو عليه باش يزوجها رفض وقالهم دبرو على بناتكم حاجة تخصني واصلا مايجيش بزاف كره منهم)، بعدها تجي ختي لكبيرة اسمها نادية عندها 51 سنة (عندها زوج بنات وزوج ولاد لكبيرة فيهم 26 سنة زوجتها كي لحقت ل17 وذوك راهي تتمرمد مع راجلها وعجوزتها شربولها لمرار وتظل تشكي ليما وهي تقولها عادي تهنيتي منها، بنتها الصغيرة عندها 8سنين والذكورة واحد 17 سنة وواحد 10سنين) هي جاية عاقلة شوي بصح الريح الي يجي يديها توقف معاهم ديما او بالاحرى تخافهم مدايرين حلف ضدي واي واحد يوقف معايا يكرهوه ويكرهولو حياتو، بعدها يجي خويا ايوب عندو 50 سنة عاقل بزاف وجابد روحو ميدخل في والو (عندو 3 ذكورة فرات لكبير فيهم 25سنة والصغير 15 سنة) بعدها تجي ختي هديل 49 سنة هذي تلعبها عاقلة وهي ديرهم لتحت لتحت ملي كانت وهي هكا بصح متقيسنيش بزاف تاع روحها ولاتية بدارها وعجوزتها وسلافاتها ياربي ماتحاربهم هوما ( عندها 3 بنات وطفل هو لكبير عندو 23 سنة واحد وبناتها كامل مزالهم بلا زواج لانو عجوزتها هي الي تتحكم فيهم وقالتلها يكملو قرايتهم الجهل هذاك تاع تزوجيهم وهوما صغار خليه عند يماك متجيبيهش لبنات ولدي، بعدها خاوتي التوأم سليم وسمير عندهم 47 سنة مزوجين ولزوج عندهم طفل وطفلة برك، وبعدها تجي سمية عندها 45 سنة (زوج بنات لكبيرة فيهم عندها 18سنة وعندها 4 ذكورة) تكرهني بزاف لانو هي كان حلمها تكمل قرايتها وتخدم ويما مقبلتش وزوجتها ومن ثم وهي هازتلي الحقد وكارهتني وهي سباب معاناتي تظل تحرش في ماما عليا، بعدها يجي خويا نوفل الي ضربني في سبيطار هذا جاي خفيف بزاف ومتسرع بصح حنين وانا وياه نتفاهمو بزاف عندو 40 سنة ومتزوج (عندو زوج ذكورة لكبير فيهم 15سنة والصغير 12 سنة) وبعدها نجي انا آخر العنقود ليلى عندي 35 سنة بلا زواج قريت وتعبت وحاربت ماما وخواتاتي وكملت قرايتي ومنيش ندمانة عليها واذا على الزواج آخر اهتماماتي لانو الزواج بالمكتوب.
#فريال