العوض الجميل

الجزء 03

#العوض_الجميل
#ليلى
#بقلم_فريال
الجزء 03
طول طريق وهي تحكي وتحاول تضحكني وتنسيني همومي وانا غير جامدة مانحكي ماوالو قاعدة نخمم في حياتي وكيفاه راح نكملها مع الظالمين هذو الي كل يوم يزيدو يطغاو وذوك العطلة تاع الصيف راح يفوتوها كامل عندنا ولازم انا نهز كونجي ونبقى مقابلة ولادهم وهوما يروحو يحوسو مع رجالهم ولوكان نقول لا ولا منيش قاعدة تنوض نبع العذاب تندب وتسلخ وجها وتدعي عليا وانا مش ناقصني همها ثاني الي فيا يكفيني ياربي مالتيت بحياتي تزيد تمرضلي هي ثاني تخلى عليا الضياف ولافامي ثاني يتلمو ويبقاو يطلقو فالسم تاعهم عليا _وكتاه تتزوجي نتاجاتك راهم بولادهم والقراية متفيدش شوفي انت قريتي وذوك راكي تخدمي بصح بلا فايدة من غدوا تكبري شكون يرفدك ويقوم بيك ومتعوليش على يماك من غدوا تغمض عينها شكون بيك وياك يجيوك خطابة علاه ماتقبليش واقبلي برك وحنا عاداتنا هكا وغير انت الي خالفتينا وخرجتيلنا بخرجة جديدة وبلاصة لمرا في دار راجلها مش تبقى تطلع وتهبط وتبكر الصباح وترجع فنصاص ليالي وهذيك ماهي خدمة واصلا علاه تخدمي رزق باباك يكفيك ويعيشك ملكة _معلبالهمش بلي الرزق هذاك منشوفش منو فرنك واحد يديو كلش ويفوتو لشهريتي واذا على يما في حياتها وملقيتهاش نلقاها بعد موتها بالعكس نتهنى من مشاكلهم شوي، لافامي تاعنا قد ماهم متفتحين قد ماهم معقدين عندهم الطفلة تقرا وتعيش وتلبس وتخرج بصح تلحق ل18 تتزوج والي تفوت العشرين وهي بلا زواج يعيطولها بايرة وصاي طفرت فيها وفاتها قطار الزواج كيف مايقولو هوما ومعندهاش مستقبل، بصح يبقاو اهون من ماما وخواتاتي لانو لافامي تاع بابا يحبوني وديما واقفين معايا حتى من خالاتي وجداتي يحبوني وديما يبهدلو ماما على معاملتها القاسية ليا وحتى انو مرة وصلت وين جداتي عادات ماما على جالي عام كامل كي دخلت ولقات خواتاتي يضربو فيا وهي واقفة تتفرج وتحرش فيهم وداولي دراهمي كنت مخبيتهم باش نشري الطوموبيل، اليوم هذاك الدار رحلتها سبتهم وبهدلتهم وزادت رخست ماما وداتني معاها قعدت شهرين ورجعت لدار كي عيطولي وقالولي يماك اي فالسبسطار طلعتلها لاطونسيو وهي كانت غير كذبة باش نرجع لدار ويديرو رايهم فيا لانو كي تغيب ليلى يعني غابت الخدامة والبونكا تاعهم انا بالنسبة ليهم ماشينة تاع دراهم وخدامة نطبخ نغسل نسيق نوكل نشرب نبدل لولادهم نعسهم نرقدهم نديرلهم كلش، كي يزيدو خواتاتي انا نرفدهم يجيو لدرانا يبقاو شهرين حتى يرتاحو ويرجعو لديارهم وضياف كامل يفوتو عليا ويتلمو كامل فدار عندي. ليلى _ انعم وش كان _ ياو من صباح وانا نحكي وانت ساهية وين رحتي الي يشوفك تخممي هكا يقول عندك 10 ولاد ومخليتهم في دار وراك _ لوكان غير جاو عندي ولاد ونخمم عليهم يستاهلو معليش بصح الي شاغل بالي وراني نخمم فيه راكي تعرفيه من سنين _ متخميش بزاف خليها على ربي وهو يجيبلك حقك منهم _ ان شاء الله راني نستنى فنهار الي نتهنى فيه منهم بفارغ الصبر لانو تاع الصح بدا صبري ينفذ وفي أي لحظة نطرطق _ وانا راني نستنى فيك تطرطقي باش ترتاحي. هيا انزلي رانا وصلنا.
#فريال