العوض الجميل

الجزء 20

#العوض_الجميل
#ليلى_كريم
#بقلم_فريال
الجزء 20
فاتو يامات وانا عايشة عادي ماما تبدلت بزاف ولات تعاملني مليح مانعرف تبدلت ولا راهي غير تلعبها وخافت من خاوتي وجداتي كي تحلفو فيها اذا زادت قاستني يديوني عندهم ويخلوها وحدها، انا رجعت لخدمتي نخدم كيما موالفة انا وليندة حكيتلها وش صرا معايا كامل قالتلي خليهم وكيلهم ربي يجي نهار ويبان الحق وشكون حاول يشوهلك سمعتك ان شاء الله تجي فيه ويتحرق قلبو ان شاء الله تجي في بنتو ( ماخلات مادعات وكأنها ساهة استجابة وكل دعاويها خرجو فالشخص الي شوهلي سمعتي وفزد عليا). كنت قاعدة فالبيرو تاعي الليلة نبات نخدم هي كانت دالت ليندة بصح كعاد راجلها روح مقدرتش تخدم قولتلها انا نخدم في بلاصتك معندي ماندير لا راجل لا ولاد يستناوني على عكسك انت جا راجلك وعندو مدة بعيد عليك عيب تخليه تباتي في الكلينيك ( راجلها يخدم في فرقة التدخل السريع منعرف كيفاه اسمها بالضبط المهم من جماعة الكومبا وهذوك الي يغطيو وجوهم ويتدخلو كي تكون فوضى وسرقة ومشاكل و...  ميهمش خدمتهم صعيبة بزاف هي كي تحكيلي عليها نبدل الموضوع من عند ربي نخاف جماعة هذو حسب ماقالولي واعرين والمعيشة معاهم صعيبة بزاف). كانت 1تاع ليل قاعدة عيت وش ندير مكانش خدمة خلاص انا هكاك وتجيني لفرملية باين من وجها بلي خايفة تقول شافت ملك الموت نجري وتتخبط وحدها خلعتني انا قولت ضرب كاش زلزال ولا منعرف شكون مات جات تتلعثم بالسيف مانطقت قالتلي بلي كاينة مرا جات راح تولد وجابها راجلها وراهو قلب الكلينيك عندو ساعة وهو يستنى وطبيبة **** قالتلو استنى منيش قاعدة وهي كانت راقدة كي عرف قلب لكلينيك عليها وحتى من المدير جا يرجف باين بلي راجل واصل وعندو معارف لانو المدير كي سمع باسمو جا يجري وراهو يعيطلك قالك انت تهتمي بمرتو الطبيبة لوخرا مبغاهاش تقرب منها وناوي يحاوزها كعاد رقدت ( انا وليندة نخدمو في كلينيك بريفي هو والسبيطار كيف كيف لزوج كبار يعني نقول سبيطار خير عزرينهم واحد). رحت لشومبرة الي فيها لمرا كي دخلت لقيت مرا باينة صغيرة وتهبل بوبية عليها راجلها هابل عليها وخايف تنضر عندو الحق اذا انا مرا وعجبتني وينك يا راجلها، فحصتها وشفت حالتها متبشرش بالخير ومستحيل تقدر تولد ولادة طبيعية لازم نفوتها سيزاغيان قولت لفرملية توجدها وانا نخرج نحكي مع راجلها الي راهو خالعكم اكره حاجة عندي هي راجل متكبر وشايف روحو بدراهمو ويبقى يسب ويعيط على ناس تقول يخدمو عند باباه. خرجت حوست عليه ملقيتوش سقسيت لفرملية على اسمو قالتلي كريم ايه يا سي كريم المتكبر المتعجرف خلي نشوفك تراه وش راح دير مدام المدير المغرور وخاف منك معناها انت حاجة كبيرة بصح حتى ويخافو منك كامل انا مستحيل نخاف، رحت نحوس عليه قابلني راجل وش نقول عليه عملاق خير طويل زي البوطو تاع تريسيتي ( مفهمتش اذا انل الي قصيرة ولا هو الي طويل مع العلم انا 1,60 وهو يجي هكاك 1,90) عيطت باسمو دار ليا ميخلعش خلاص ملامحو هادية بزاف على عكس وش حكاتلي الفرملية بلي يخلع ويخوف هذا باين بلي عاقل بقيت نثبت مع عينيه زورق يهبلو اول مرة نشوف لراجل بنظرة اعجاب منعرف وش المميز فيه حتى قدر يجذب نظري ويعجبني يبان في الاربعين هكاك، بقيت نبثت نشوف معاه حتى قالي وش تحتاجي _ مرتك راح نفوتوها سيزاغيان وحالتها صعيبة بزاف باين بلي عندها فترة طويلة وهي تتوجع كان لازم تجيبوها قبل مش تخليوها للوقت هذا حتى ينشف الما تاع البيبي _ مرتي؟_ ايه مرتك قالولي انت الي جبتها مدام سلسبيل مذابيك تروح توجد الدوصي تاعها وتسني على واحد لوراقي باش نبداو العملية _ اوك راني رايح اتهلاي فيها برك هذيك راهي عينيا منقدرش نتخيل روحي عايش بلا بيها _ حنا نديرو الي نقدرولو والباقي على ربي. هو راح وانا بقيت نتفرج فيه عجبني بزاف وخصوصا اهتمامو وخوفو عليها تمنيت لوكان حيت بلاصتها فقت من تخيولاتي وتفاهتي ورحت نوجد روحي للعملية الراجل متزوج وانا نخممف يه عيب عليا والله اول مرة تصرالي منيش موالفة نخزر في الرجال بصح هذا مميز حاولت ننساه ومنفركش فيه بصح مقدرتش. انت تتمنى وتحب دير صوالح بزاف بصح المكتوب ديما يوقف في وجه مخططاتك.
#فريال