العوض الجميل

الجزء 42

#العوض_الجميل
#ليلى_كريم
#بقلم_فريال
الجزء 42
كملنا سهرة اهل كريم روحو وبقاو لافامي تاعي دخلو كامل يشطحو خلطناها رجال نسا اصلا مكانش لبراني بيناتنا ولاد عمومي وعماتي خوالي وخالاتي والاحفاد تاع ماما كامل، شطحنا بدرنا قلبنا ليلة هذيك خويا نوفل خفيف بزاف يشطح ويبرح هذي في خاطر ختي هذي في خاطر ماما ولادي خاوتي في خاطر مرتي وحبيبتي ورفيقة دربي ماحشمش خلاص يحكي ويحضن فيها مايعرفش لحشمة خلاص ههههه ومرتو ثاني معاه في الخط تعاند فيه ناضو لباقي كل واحد يقول مرتي مرتي حتى نطق عيسى قالهم انا ماكلاه نحكي ونعيط مرتي تعرف مكانتها عندي معروفة هي تعرف وانا نعرف لباقي مكلاه يعرف ههههه، ليلة هذيك كل واحد وش يهدر ويتمهبل ماكملنا حتى ل3روحنا لدار مهلوكين رقدنا كامل حتى ل9 باش نضنا نتجاراو راح علينا لحال مرت عسيى تعيط وتوقلي ازربي راح لحال وانا نتكسل نسيت اصلا بلي ليوم عرسي تفكيرو كامل كيفاه نزيد نرقد يالوكان نص ساعة نرتاح برك. رحت دوشت فحفحت اصلا انا قبل ليلة لحنة رحت للحمام ولبنات ماخلاو حتى ماسك وبرودوي ماداروتوليش تبريمات هذو رجعوني نشعل ( ننصحكم بالتبريمات الصحراوية روعة روعة والله يرجعوك تشعلي شعيل ملاح)، جات الحفافة ماطولتش معايا بزاف ياربي ساعتين خيرت مشطة ساهلة خلاص درت شعري اوندولي من لتحت ومن لفوق رفعتو شوي ودرت تاج سامبل خلاص ومكياج سامبل خلاص خلاص مانحبش لمبالغة وتزواق هذاك وندير طابلو في وجهي من بعد نحصل مانجي نحيه حتى يروح جهدي كامل واصلا علاه نكثر ياك هو شافني وعجبتو بلا مكياج صاي ندير سامبل خير وخر عليا جيت شابة لعروسة يشكرها فمها ولا مها وانا راهم شكروني لبنات كامل (انا ثاني شفتها جات شابة تهبل وباين من وجها لعقالة)، كملت سواسوا قعدت شوي جابولي تغديت وبقيت نفيريفي حوايجي كشما نسيت، دخلو خاوتي تصورت معاهم سلمت عليهم عيسى قالي ذوك الحمدلله تهنيت عليك وامانة بابا تهليت فيها ذوك دالت كريم يتهلا فيك واذا غلط معاك ولا قاسك عيطيلنا نجيو لعندك مع اني عارف مستحيل يقيسك ولا يغلط معاك انسان ما شاء الله صبرتي ونلتي سيد الرجال، حشمت منو بزاف كي بقا يحكي على كريم انا ضحكة مرسومة من الوذن لوذن حتى قالي نوفل اغلقي فمك لا تدخلك ذبانة في فمك وتحصلي فيها ههههههه.  كي وصلت 15لبست لاغوب بلونش وبقيت نستنى فيهم ديجا كان عيطلي كريم قالي قريب نلحقو هذاك هو نوجد روحي باش منطولوش بزاف.
#فريال