العوض الجميل

الجزء 23

#العوض_الجميل
#ليلى_كريم
#بقلم_فريال
الجزء 23
هوما خرجو وانا وليندة لحقنا من وراهم روحنا لدار في طريق قولت لليندة وش بيها لعجوز علاه قالتلي هكاك _ منعرف بلاك راح تجيبلك كاش راجل_ هذا ماخصني الزواج نحيتو من راسي صاي_ متقوليش هكا كلش بالمكتوب وبلاك هي تكون عجوزتك _ علاه هي عندها ولاد مش متزوجين _ هيه عندها زوج ولاد بلا زواج كيما عيات معاهم باش يتزوجو مبغاوش خلاتهم على راحتهم الحاجة لمليحة فيها متفرضش قراراتها على ولادها تخليهم يديرو وش يحبو المهم عندها يبقاو معاها وتحت جناحها _ باين عليها بلي عاقلة وحنينة على عكس يما _ ماتقوليش هكا يماك خواتاتك هوما الي يحرشو فيها تالي مترجعش هكا ولوكان تتزوجي راح ترجع تعاملك مليح _ انا بغيتها تعاملني مليح وانا عندها ماشي كي نتزوج ودير روحها تحبني وتهتم بيا لثم طفرت صاي وفض كلش اذا فت خرجت من دارها تنساني انا كرهت من كلش علبالك هي مستحيل تتغير راح تبقى طول حياتها تبع كلام خواتاتي حتى تموت لوكان يقولوها موتي تموت _ خلاص انساي متقلقيش روحك كلش يفوت ويفرج ربي _ ان شاء الله الي فيها خير ربي يكتبها. وصلت ليندة لدارها وانا فت لدارنا مع دخلت بعد نلقى خاوتي كامل مجموعين ويما في نصهم تبان فرحانة وعاجبها الحال، سلمت عليهم وقعدت معاهم حكينا شوي لباس لباس كشما خصك شكون قاسك علاه متجيش لعندنا وكيفاه حوالك مع الخدمة ياك مكانش مشاكل، حكينا عادي شوي هكا نضت درتلهم قهوة شربو من بعد نطق خويا عيسى قالي كاين راجل عندو يومين ملي جا لعندي وخطبك مني انا مبغيتش نقولو ارواح حتى نسقسيك ومقعدتش باش نقولك واليوم زاد جا لعندي والصراحة الراجل ماعندي مانقول عليه كامل مكمل خدام وبدارو وبرزقو وناس ملاح سقسيت عليه كامل يشكرو فيه وحتى من راجل صاحبتك يعرفو شوفي انا من جيهتي قابل بيه متلقايش واحد مليح كيفو ويبقى القرار قرارك انا منسيفش عليك بغيتي تقبلي رانا معاك مبغيتش رانا واقفين معاك تبقاي ختنا كيما بكري كيما ذوك ودار باباك راهي مفتوحة ليك واحد مايخرجك منها واحد مايتمزا ولا يعيشك رزق باباك يكفيك تعيشي معززة مكرمة، يما مع سمعت رزقو قالتلو هيه قابلين معندها ما تخير اذا عندو دراهم بزايد يناسبنا ويناسب مقامنا العالي وهذا مايلقلنا وانا راني قابلة قولهم يجيو في اسرع وقت خلي نحرحر مرت عمكم ونسكتها ضربة وحدة قالها نوفل مزالك برك في عوايدك يهموك الناس ومتهمكش بنتك ماعندي مانقولك من غير ربي يهديك والقرار يبقى قرار ليلى تحب تقبل ولا ترفض واحد مايسيف عليها واذا موش عاجبك الحال نرفد ختي تسكن عندي ماتقلقيها مادوري بيها _ وش دانا لكلام هذا اوليدي انا بيا مصلحتها راهي كبرت خلي تتزوج تتهنى واحد مايدوملها من غير راجلها وولادها _ يما سكتينا بزايد الراي راي ليلى نقطة انتهى، قالي عيسى وش هو قرارك _ قابلة كعاد عجبك انت راني قابلة علبالي تحوسلي على الخير ومستحيل تخمم تضرني _ خلاص تفاهمنا انا ذوك نعيط لراجل ونقولو رانا قابلين ارواحو ديرو شوفة شرعية ومن بعد ساهلة الي فيها الخير ربي يقدمها والي فيها شر ربي يبعدها عليك.
#فريال