شـقّ الـغَـمـام

..(٣)..

..(٣)..
استغفر الله العظيم واتوب اليه
-
بـيّـن احتدت ملامحه وسحب سكين من بين اغراض الطبخ ورفع نفسه مغير وضعية جلوسه الى شبه جالس وعينه عالظلام ينتظر الجاي صاحب الخطوات اللي كل مااقترب واضح صوتها اكثر شد على سكينته باستعداد للدفاع عن نفسه ارتخت ملامحه الحادة ونزل سكينه ولازال شاد عليها بقبضته احتياط واعتلت وجهه ملامح الاستغراب بعد الحدة
بارود مشى باتجاهه ورفع يده/سلام يابـيّـن
بـيّـن ارتفع حاجبه وزاد استغرابه من ناداه باسمه على غير العادة
طرق نبح ورا بعض وتحرك بخطواته لبارود
بارود تراجع لورا بخوف منه/عوذا من بلواك يابـيّـن عوذا
بـيّـن وقف واتجه لطرق وانحنى ومسح بيده على طرق يهديه/وعليكم السلام والرحمة خير يابارود وش عندك بهالليل جاي يمي؟
بارود بربكة يحاول يخفيها/مامرّك زول منّا ولا منّا؟
بـيّـن/عسى ماشر ياولد ترانا نعين ونعاون كان مسروقين ابشر بي
بارود بابتسامة/عساك سالم مير اني احتري ضيف والظاهر مضيع الطريق وهذاني ادور عليه
بـيّـن/لا بالله ماعيّنت أحد وابشر لا لفاني اكرمته ودليته لبابك ابشر
بارود/سلمت سلمت يالله عاد استأذنك انا/مشى/
بـيّـن يناظره باستغراب الى ان اختفى بالظلام والتفت يناظر طرق/ولد ياطرق الظاهر بكرة بنسمع علومٍ تجمد على الشارب
................
...<<يـوم جـديـد>>....
،،الـمـسـتـشـفـى،،
على كراسي الانتظار جالس بثوبه الممتلي دم وشماغه على كتفه الايمن حاني ظهره ومشبك يديه ببعض ساندها على ركبه ومتكي بدقنه عليه ويهز برجله اليمين وسط انتظار يمر عليه ببطئ
بارود وقف عنده بعد هرولته السريعة وبوسط انفاسه/ماعينّتها دورت بكل شبر ماعينتها
سهم رفع عينه يناظره وفك يديه وسند ظهره عالكرسي زفر/اسبقني وخذ العيال معك
بارود/مير انه بهاللون
سهم بنظرة حادة/اسبقني يابارود اسبقني
بارود مشى
سهم وقف يناظر باب الغرفة خرج جواله يتصل/أنا لازم أمشي ياسحاب..ايه ابشري..ابشري/قفل جواله متجه لسيارته وصلها ثم ركب وناظر السكين الغرقانة بالدم على كرسي الراكب أخذها وحطها بالدرج وقفله وحرك/
.
صحراء قاحلة خالية من معالم الحياة شجر مترامي متباعد المسافات، غرفة صغيرة متصدعة الجدران ،حبل يمتد من زوايا احد الجدران الى الزاوية المقابلة لنفس الجدار يتدلى من هالحبل ملابسه اللي ماتتعدى قطع معدودة وبالجدار المقابل مثبت رف طويل ترتص عليه كتب مختلفة المجالات، وفراش باحد زوايا الغرفة ملفوف ومرمي ببعثرة واعلاه اللحاف يشابه ببعثرته للفراش تتربع فوقهم المخدة ساند راسه فوقها ومغطي عيونه بيمينه لعله يرتاح بنومته المتقطعة من البارح تعرق بغزارة يعيش نفس الموقف اللي عاشه من سنين لكن هالمرة بأحلامه همس بصوته المخنوق من كثر عبرته(ايه شفته..والله شفته..مير إنه هو مايسوي شي عبث تكفون تكفون)فز من نومته برجفة اجتاحته كله بعد هالكابوس المرعب له زفر بضيقة وهو يتعوذ من ابليس مسح وجهه بكفينه ثم وقف وسحب غترته البيضاء اللي راميها جنبه ونسفها على كتفه الايمن اتجه لباب الغرفة الحديد المهترئ بلونه الاخضر اللي غزاه الصدأ ودفه بطرف رجله بخفة وانفتح وهالباب لايسمن ولايغني من جوع بأبسط لمسة ينفتح،دورة مياه خارجية ملاصقة لهالغرفة اصغر منها بالمساحة خرج بملامح مغتاظة عقد حواجبه بانزعاج من تسللت خيوط اشعة الشمس اللي لتوها تشرق وتلامس وجهه ،بثوبه الكحلي اللي زاد سماره سمار سحب غترته من على كتفه بغيظه ورفعها فوق راسه بشعره اللي غالب عليه الشيب عصبها بكل قوته وهو يستغفر بصوت هامس غمض عيونه وزفر بنرفزة وهو يسترجع ماحصل لأول مرة تفوته صلاة الفجر من سنين طويلة ماتحمل هالغيظ ضرب عالارض برجله اليمنى/قطعةٍ تقطعكم كل ابوكم لابوكم ولا ابو من جمعكم يابني سمّار لاابوكم لاابو ديرتكم الجربا ذي/صرخ بغيظه/طرق(اسم كلبه)/التفت يمين ويسار مالمحه بالمكان وبغبنة/هين يالسلوقي عليم الله يحرم عليك العشا الليلة هين/تبدد غيظه بلحظة وارتسمت اعذب ابتسامة على شفاته من طاحت عينه على الشبك قدامه بداخله ثلاث نعجات وناقة وحيدة التمعت عيونه بفرح للحين مااستوعب كل احلامه واعظمها قدامه متحققة كم مرت عليه سنين وهو يجمع مبلغها اللي استصعب عليه كل ماتوفر يمره ظرف ويجبره يتخلى عن هالحلم زفر بكل مافيه براحة وهو يناظر هالحلم تحقق بعد عنا قطب جبينه للحظة اقل من ثواني معدودة بددها ورجع لغرفته بهدوء ثم خرج منها ويديه ورا ظهره تقدم يتفحص بنظره نعجاته المنزويات بطرف الشبك بغرابة وناقته اللي تماثلهن بالغرابة مبتعدة لعند بوابة الشبك فتح الباب بيمينه ويساره لازالت ورا ظهره خرجت ناقته وتبعتها نعجاته رجع الباب يقفله ولازال برا الشبك وماسك هالباب بيده ماقفله بالقفل وبحدة وهو يناظر الخزان اللي يتوسط الشبك يتخلله فتحات من كل مكان غير الصدا اللي يخالطه داخله شعير حلاله وبنبرة حادة عالية/اطلع بروحك دون أذية نبي السلامة انا وانت اطلع ازين لك/ميل فمه بعدم رضا وترك الباب اللي انفتح من نفسه اول ماتركه كالعادة ورفع يساره اللي شايل بها سيكتونه لقدامه وسنده بيمينه ميل راسه وثبته على السيكتون متخذ وضعية التصويب ناحية الخزان/نواف كانك هاج من جدي اطلع لك الامان/قطب جبينه بشك ماوصله رد/سلمان؟/رمى وصوب الخزان/
يـقـيـن فّزت برعب من نومتها على الصوت اللي هز المكان حولها غطت فمها بيديها تكتم انفاسها اللي يتهيأ لها انه وصلت له وكشفت عن تواجدها غرقت عيونها دموع وغاب عن عينها ان الشمس اشرقت وانجلى ليلها الطويل المرعب
بـيّـن زفر بضيق ورفع سيكتونه وسند اعلاه على كتفه الايسر وثاني يمينه حول وسطه/ورب البيت ان ماطلعت يانواف لاأتلك وأجلدك ثم اسلمك جدي يكملها عليك تراها اليوم قايلتن بي هه
يـقـيـن مررت عيونها بالمكان حولها بضياع حاولت تجمع افكارها وتخرج من هالمصيبة بأقل الاضرار 
بـيّـن زفر وصوب بسيكتونه/كانك نواف ولا عزيز تستاهل ماجاك/رمى الخزان/
يـقـيـن فزت برعب وهي موقنة بالهلاك هالمرة بتموت موتة مخزية جنت على نفسها بيديها
بـيّـن غنى باستمتاع وسط ابتسامة طردت كل غيظ احتواه من شوي وبباله شكل نواف المرعوب داخل الخزان رمى الخزان من جديد/كنت أتمنى ليتني ماتمنيت ماجات يامهنا علـ/رجف صوته بفجعة/ااااااا
يـقـيـن بعبايتها المبعثرة الممتلية باثار التراب والطرحة الملتفة اي كلام حول راسها شدت على شالها العريض اللي اتخذ رقبتها مقّر له تارك وساعته وانحصر عليها غمضت عيونها وفزت واقفة وخرجت بجسمها من فتحة الخزان بعد ماحسمت امرها واستجمعت شجاعتها صرخت/تكفى أنا بوجهك تكفى
بـيّـن رفع سيكتونه لفوق وبذات اللحظة رمى من صدمته بوجودها بدون شعور وكان رفع السيكتون لفوق اخر حلوله حتى يتفادى اصابتها
يـقـيـن اتسعت عيونها من حست بألم فظيع احتوى رقبتها وصرخت للحظة ثم انقطع صوت هالصرخة
بـيّـن قشعرت كل خلية بجسمه من سمع صرختها وارتسمت ملامح الذعر على وجهه وهو يناظرها/ياهيه أنتي إنسيّة منّا ولا منهم؟!!
يـقـيـن اسودت الدنيا بعينها وانهمرت عيونها بدموع وحاوطت جرحها بيديها بقلة حيلة
بـيّـن تقدم لها بخطوات سريعة بعد مااستوعب بهاللحظة المصيبة اللي طاح فيها رمى سيكتونه لوراه وحط يديه عالخزان ونط وانحنى شبه راكع وعيونه بعيونها وبمحاولة منه يطمنها/خابرن انه مايذبح مير(لكن)مايقصر بالوجع!!
يـقـيـن جحظت عيونها بفجعة من كلامه
بـيّـن مد يمينه حتى يساعدها واتسعت عيونه بصدمة من لمح اطراف الشال المميز شال باللون الاسود مزينه اطرافه بجنيهات الفضة مايخفى اصحابه على اي احد بهالقرية
يـقـيـن رفعت عينها له واخيرا انتبهت له اخيرا عرفت من يكون استحقرت نفسها كيف طلبته كيف رمت نفسها له دون تتنبه بالاول احتدت نظرتها من تصرفه المباغت لها
بـيّـن رمى بنفسه لورا بدون اي اهتمام لطريقة نزوله المهم عنده بهاللحظة يبتعد عن هالكائن وكل ماينتمي لفصيلته
يـقـيـن اخذتها العزة لنفسها كيف رمى نفسه والأولى هي من ترمي نفسها بعيد عنه تحاملت على نفسها وخرجت من الخزان وسط ألمها المتزايد بكل لحظة تمر
بـيّـن استعدل بوقفته وهو ينفض يديه وثوبه ومعطيها قفاه مشى مبتعد عنها متجاهل وجودها حوله
يـقـيـن بملامحها المحتدة وبهمس وسط بحة صوتها المتقطع من الالم/تعقب يدينٍ تمرغت بالثرى تطول الثريا اقصى احلامك ياالراعي
بـيّـن وقف ومـيّـل شفايفه من أثر لويه للسانه داخل فمه ويعضه بين أسنانه من قهره من كلامها نفس الاسلوب ونفس التعالي ماهو بغريب عليه ابد التفت عليها يناظرها
يـقـيـن رمت شيلتها على وجهها تغطيه وبوسط تجاهل الامها نطقت بغرور/عيونٍ تطاولت على أسيادها نعميها نزل عيونك عساها الفقع!!
بـيّـن صد وهو يزفر وبابتسامة سخرية/امدى يابني سمّار امدى!!
يـقـيـن برجفة احتوتها من الألم وماقدرت تخفيها/يكرمون بني سمار عنك يكرمون!!
بـيّـن عـض شفته وهو يشد على قبضته زفر انفاسه وهو يمنع نفسه عنها وباستهزاء وسط ابتسامته/روحي يمّهم علامك متوسطة زريبتي(شبك الغنم)!!والله لو تتعزوين بهم ليوم الدين مردك
يـقـيـن قاطعته بغيظها/تعقب وتخسى
بـيّـن ابتسم بانتصار من وصله كمية الغيظ اللي احتواها زفر براحة/زين ياكود هاللي صابك يرد عقلك بمكانه 
يـقـيـن سكتت مُجبرة من قوة الالم ماعاد فيها اي طاقة للجدال وكلمته كسرتها ورجعتها للواقع واللي حصل لها البارحة  هلت عيونها دموع حسرة على حالها ومن ألم إصابتها وجثت على ركبها وهي تتنفس بصعوبة
بـيّـن ناظرها وبنبرة حادة/مافاد ابليس شوفة النفس اخزيه وخليني افزع بك يم المستشفى
يـقـيـن تـهـاوت واسـتـقـرت عـالارض بـدون وعـي
بـيّـن اتسعت عيونه بصدمة اسرع بخطواته وانحنى لسيكتونه اللي عالارض ورفعه بيمينه وهو مستمر بخطواته لناحيتها وقف عندها ومد السيكتون يلمسها بطرفه بخفة يتطمن/ياهيه/تسارعت نبضاته اللي هدت لفترة بسيطة من ماوصله ردها رمى سيكتونه وجثى على ركبه ورفعها لحضنه بفجعة اجتاحته داخليا عكس ملامحه الثابتة/يارب سترك يارب استر وش هالبلا
بارود وقف على باب الشبك وبيده سلاحه واتسعت عيونه وهو يشوف منظر بيّن وبيده السيكتون وذاك الجسد الملتف بالسواد اللي مابات ليله بسببه يتوسط حضنه اعتلى صوته/ياسمّااااااررررر راعيكم ذبح بنت شيخكم 
بـيّـن اتسعت عيونه والتفت يناظره
بارود وجّه سلاحه لبـيّـن وسط رجفة احتوته
بـيّـن احتدت نظرته
بارود بيده الراجفة وبتردد من الافكار اللي تعصف به وكيف يتصرف وبكل مافيه/يابني سمّـا
طرق بدون أي مقدمات هجم وعض يد بارود
بارود ترك سلاحه مجبر وسط صرخة اعتلت من عضة هالكلب
بـيّـن زفر براحة وميل فمه بابتسامة رضا ووقف وهو يرفعها بين يديه
طرق لازال متمسك بيد بارود بدفاع مستميت عن صاحبه
بـيّـن مشى وبين يديه يـقـيـن المغيبة عن وعيها/اطرد الشر وخلني اتلاحقها
بارود يتصبب عرق بغزارة حرك يده بكل مافيه باتجاه الشبك بمحاولة منه يضرب طرق
بـيّـن اتسعت عيونه وبحدة/طرق فكّه
طرق تركه
سهم وقف بملامح محتدة وحرك رجله باتجاه طرق قبل يوصل الارض وسدد له ركلة بكل مافيه من قوة
طرق طار بالهواء وسط نباح بسيط اعتلى منه للحظة ثم اختفى الصوت تماما
بـيّـن بفجعة شد يـقـيـن لحضنه بدون وعي وعينه على طرق صديقه و ونيسه بهالحياة وبصرخة/طرق
طرق ارتمى عالارض بدون حركة
سهم وجّه سلاحه المزود بكاتم صوت لطرق وعينه على بـيّـن وبابتسامة/ياهيه وراك بايعٍ روحك!!
بـيّـن بحدة اتضحت على ملامحه رغم ابتسامته المرتسمة على ثغره/هلا والله ومية هلا صدق من قال من طول الغيبات جاب الغنايم واعقب غنيمة من وراك!!
..........
(بـيّـن ٢٨سنة)،،(يـقـيـن ٢٦سنة)،،(سهم٣٠سنة)
.......
<<بيت ظاهر>>
وداد جالسة على كرسي التسريحة تسرح شعرها طاحت عينها على انعكاسه بالمراية تغيرت ملامحها لنزفزة وقفت واسرعت بخطواتها متجهة له ناظرت دواه عالكومدينة جنبه عضت شفتها السفلية بقهر من وضعه
ظاهر متمدد عالسرير بنومه الثقيل بعد ماأخذ منومه اللي صار ملازم له هالفترة
وداد بطفش من حالته تكتفت/ظاهر
ظاهر نايم مارد
وداد فكت تكتيفتها وضربته على ظهره بقوة وبقهر/ظاهر و وجع قوم
ظاهر تافف بوسط نومته وحرك راسه للجهة الثانية معلن استكمال نومته
وداد امتلت عيونها بطيف دموع سحبت علبة الدوا ورمتها عالارض بكل قوتها بقهر انغبنت وهي تناظرها بنفس الوضع ماانكسرت ولا انفتحت وكأنها تعاندها مثبتة وجودها بحياتهم انحنت لها واخذتها من الارض ورمتها عالجدار بكل ماتبقى من قوتها وتطايرت هالمرة الحبوب من داخل العلبة متبعثرة بكل أرجاء الغرفة وكأنها تثبت وجودها بحياتها وترفض المغادرة هلت دموعها وهي تناظرها متناثرة/ياربي وش انا مسوية يارب وش سويت عشان ابتلي بذا الادمي وش مسوية يارب/خرجت من غرفتها وهي تمسح دموعها متجهة لباب البيت من سمعت صوت الدق عليه فتحته بقوة وبحدة/خير!!
غصنة واقفة قبالها بعبايتها المفتوحة ومريولها الكحلي الظاهر وشنطتها على ظهرها بملامح لازالت تنطق بحاجتها للنوم متكتفة وبرفعة حواجبها/وين الخير وانا اتصبح بذا الوجه الاقشر
وداد بضيق/الله عاد والوجه السمح تكفين فكيني مالي خلق مناقرك على ذا الصبح
غصنة/عاد انا اللي ميتة على مناقرتي معك ذالحين!!
سلام اللي تماثل غصنة بالمنظر عباية وشنطة ومريول مدت يدها وسحبت شنطة غصنة من ورا وتبعدها وبابتسامة هادية/تكلمين ظاهر يودينا للمدرسة تأخرنا بالحيل
وداد احتدت نظرتها/لاتجيبين طاريه على لسانك وجعوه وثم علامك مفرّعة(كاشفة)صدق مابك حيا وجع!!
غصنة اتسعت عيونها وتبخر كل النوم اللي كانت ناوية تكمله بالسيارة بدت ترفع اكمامها وبصوت عالي معلن بداية هوشة كالعادة بين هالثنتين/هيييييههههه انتي هييييهههه احشمي عمرك مين حضرتك تغلطين عليها مين تكونين!!
وداد تكتفت وهي تزفر بملل
سلام بملامح اكتساها القلق والضيق تكره كونها سبب لاي مشكلة مدت يدها مسكت يد غصنة/غصنة خلاص ورانا مدرسة اقصري الشر
غيمة مرت من قبال بيت ظاهر ناظرتهم ببرود وكملت طريقها
وداد/وش بتسوين يعني!!اللي مافيه خير على اسمه مافيه خير!!
سلام اتسعت عيونها وضمت غصنة من خصرها بقوة
غصنة انتفضت من وصل لمسامعها هالتحدي وصرخت/انا بنت ابوي الصحيح تعقبين يابنت ناجي تعقبين
وداد ببرود/انتظروا ضاري بيروح معكم/دخلت وقفلت الباب وراها/
غصنة تتفلت من يد سلام وهي تضرب الباب اللي يادوب تلحقه باطراف رجولها من إبعاد سلام لها/فكيني والله لااربيها هالسلقة(الكلبة)والله
سلام ماسكتها بكل قوتها/غصنة تعوذي من ابليس تعوذي
غيمة واقفة على باب المطبخ البعيد عنهم بمسافة وبهدوء/ترا محارب موجود
سلام بضيقة/الحين تتكلمين الله يهديك الحين!!
غيمة بنرفزة/وحريقة تحرقكم كلكم وش علي منكم انا!!/دخلت للمطبخ وبدت تجهز قهوتها الصباحية كالعادة/
بالجهة المقابلة خرجت من الغرفة وهي تستند على عكازها وبحدة/يالله صباح خير وش ذا الوحيّه(الازعاج)على ذا الصبح هاه وش!!
سلام تركت غيمة واسرعت بخطواتها بوسط ابتسامة رفعت نفسها وسلمت على راسها ويدها/صباح الخير ياجدة
الجدة حمدة بابتسامة/صباح النور ياصباحه/قطبت جبينها وهي تناظرها تجر خطواتها باتجاهها/انا قايلتن هالوحيّه ماوراها غير العوبا
غصنة وقفت قبالها وسلمت تسليمة سريعة عالراس/ايه كل شي براسي والجنية هذيك ضعيفة ماتسوي شي!!
الجدة حمدة قرصتها
غصنة فزت بألم وهي تبتعد/ااااه ياجدة اااه!!
الجدة حمدة بحدة/هذاك تقولينه جنية اتركيها وفكينا مابك طب انتي!!
غصنة/والله وبالله مااتركها نافخة نفسها علينا ليش لايكون بنت الملك وانا مدري!!
الجدة حمدة/ليه هو انتي بس اللي ودك تذبحينها!!كلنا ودنا مير الشكوى لله وش حدك على المر
سلام زفرت/اللي أمر منه
غصنة/والله لااصير علقم بحلقها واخليها تتمنى المر ولا العلقم وانا بنت خلف
الجدة حمدة رفعت عكازها/والله لااهبدك بذا العصا كان قربتيها فكينا منها ومن اهلها الجنون مثلها حنا بنا حيل لمصايب ثانية طسّي(انقلعي)يم مُحارب حتى تذلفون للمدرسة طسي
غيمة مرت وبيدها صينية القهوة
غصنة شدت على حبال شنطتها بغيظ وهي تمشي وسط حلطمتها/هين والله مااخليها هين
الجدة حمدة زفرت وهي تناظرها تبتعد/هب ياذا الراس انا مدري من وين جاي ذا العناد مدري/ناظرت غيمة/وانتي تعالي
غيمة وقفت وكتمت اللي تبي تقوله بخاطرها رغم ملامحها الفاضحة للي بتقوله
الجدة حمدة ناظرت سلام الواقفة/وانتي الثانية علامك متسمرة محلك وتتضحكين!
سلام تناظرها بابتسامة
الجدة حمدة ناظرتها بشك/وش وراك؟
سلام رفعت يديها لفوق/ابد ماقلت شي انا!!
الجدة حمدة/ايه ايه عيونك تقوله بس اقربي افرشي الزولية(فرشة)اقربي
سلام انحنت تفرش الفرشة وتعدلها جنب جدار الغرفة/سمي ياجدة
الجدة حمدة ناظرت غيمة بوسع عيونها/هاتي الدلة!!
غيمة شدت عالصينية بين يديها وتلوم نفسها كيف أخذت بالوقت هالمرة وبكّرت بترويقتها ومن هينا أيقنت كيف بيكون مزاجها لبقية اليوم
ضاري خارج من البيت بثوبه الابيض وشنطته بيده يسحبها عالارض وبابتسامة واسعة وسط يديه المفتوحة وعينه على سلام/عمممةةةة
سلام فتحت يديها له وهي تضمه/ياروح عمة وقلبها ياصباح الخير واحلى الصباحات بحسّك ياضروي قلبي
غيمة شدت عالصينية بين يديها تراجع نفسها للي تبي تقوله
الجدة حمدة اعتدلت بجلستها عالفرشة والتفتت تناظر غيمة باستغراب/يابنت!!
غيمة انحنت ونزلت الصينية بغيظ قبال جدتها واعتدلت بوقفتها
الجدة حمدة/وراك مشيتي تقهوي معي
غيمة بتنفيسة/كفتني الريحة بالعافية ماابي/مشت/
الجدة حمدة/عساك ماشربتي ولّ على ذا النفس ولّ
ضاري ترك سلام بسرعة واتجه لغيمة اللي مرت من جنبه وضم رجولها/عمة
غيمة ابتسمت وهي تمسح على راسه بيدها بهدوء/صباح الخير حبيبي
ضاري تركها بابتسامته اللي ماغابت عن وجهه وارتمى بحضن الجدة/جدة
غيمة كملت طريقها للبيت
الجدة حمدة ضمته لحضنها تبوسه/يازين هالندا من هالفم عساني مااعدمه يازين هالصباح اي والله
وداد على باب بيتها متكتفة وبحدة/ضاري تعال بسرعة
ضاري فز من حضن الجدة واتجه لها
الجدة حمدة بحدة/هيه انتي طالعة مفرّعة!!تراك ماانتي بلحالك يامرة استحي على وجهك وتستري عجزت وانا علمك
وداد/دامك عجزتي وراك ماتفهمين هاه وعلموا عيالكم اتركوا الناس عنكم/مسكت ضاري اللي وصلها من يده ودخلت وقفلت الباب/
الجدة حمدة طيرت عيونها/اهبي يالمقوية ماتنلام غصنة اهبي هين هين وانا ام خلف هين يابنت منور هين
سلام بتردد/جدة
الجدة حمدة بنرفزة/خير
سلام/انا وسلمان بنروح لامي الليلة ونبات عندها
الجدة عيدة/هماك عندها الاسبوع اللي راح!!
سلام سكتت
الجدة عيدة/على راحتكم مير لاتبطون انتي واخوك عندها
........
<<بيت الشيخ>>
نور واقفة على باب غرفتها تناظرها بصدمة من تصرفاتها
ريوف قبال مراية تسريحتها تلف طرحتها وهي تعلك بخفة باعلى مستويات الروقان
نور بقهر/من جدك بتداومين؟!!
ريوف تخفي وناستها/ايه حبيبتي لايكون حياتي بتوقف على موضوع مايخصني!!
نور رمشت من كثر صدمتها/مايخصك!!
ريوف زفرت وسط تغير ملامحها لشي من الضيقة والتفتت لها/طبعا اي اعتراض؟!!
نور/على ذا الكلام احسبك تحضرين ماجستير ترا كلها ثانوية وليتك فالحة!!
ريوف مشت لها ووقفت قبالها بغيظ/مستقبلي حبيبتي سواء ثانوية او تحضير ماجستير على قولتك
نور صرخت بقهر/أختك!!
ريوف احتدت ملامحها
نور/كيف قلبك يطاوعك كيف!!
ريوف بعناد/والله كلن عقله معه مو من حقك تعاقبيني بذنب غيري!!/دفتها عن طريقها ومشت/اوف وش ذا الناس!!
نور مشت وراها بقهر وسحبتها من شنطتها
ريوف تراجعت بخطواتها لورا بوسع عيونها
نور ضربتها كف على وجهها
ريوف مااعطت نفسها مجال للذهول وردت الضربة بدفاع عن نفسها
نور دفت يدها بدون تترك لها مجال تضربها
ريوف صرخت بقهر وبمحاولة منها تتهجم على نور
نور تقاومها
ريوف بصراخ/يامريضة ياعقد نفسية متحركة ماألومه يوم طلقك يامختلة
نور دفتها بكل قوتها وضربتها كف
ريوف مسكت خدها بوجع تعرف قوة نور الهادية اللي ماتتدخل بأحد وعيونها غرقانة دموع
نور/محد مختل غيرك لاتظنين غايب عني سواتك ابد ذي اختك اختك اللي يمسها يمسك يالمريضة
ريوف بعيون مليانة بدموع/مابقي الا اشكالك تعطيني محاضرة بالاخلاق!!
نور قطبت جبينها تناظرها
ريوف/لولا يقين كان فضحتك من زمان وارتحت
نور ضحكت بتحدي/وش تنتظرين؟افضحي يالله الحمدلله ماعندي شي أخسره
ريوف عضت شفتها بقهر
نور بتهديد/وربي ياريوف لو احس احس بس لك طرف اصبع مو بيد اصبع باللي يصير اني لا أزلزل الارض من تحتك/اتجهت لغرفتها لبست عبايتها واتجهت للباب بتخرج/
ريوف بقهر وقفت قبالها/ماتخرجين تعرفين جدتي وش قالت
نور دفتها/على شحم انتي وهي/خرجت/
ريوف صرخت بغبنة ثم قطبت جبينها بتفكير تبددت غبنتها واتجهت لغرفتها مبتسمة
.......
،،الـسـيـارة،،
أم سطام تبكي بشهقات ورعب على بنتها
سطام يسوق بسرعة جنونية وشاد بيديه عالدريكسون وسط فوضى من التوتر والتفكير والقلق اللي يوديه ويجيبه
أم سطام بدموعها/أنا قايلته عمره مايجي من وراك خير عمره
سطام عض شفته يلتزم الصمت
أم سطام/هذا انت أخذتني عمري وشف وش صار بيقين وعزيز ياويل حالي ويلاه ياويلي
سطام مارد
ام سطام التفتت عليه وبقهر وسط دموعها/وقف ونزلني وقف
سطام اتسعت عيونه
ام سطام مسكته من يده تشده/اقولك وقف وقف انت ماوراك الا المصايب وقف ونزلني وقف
سطام بعصبية/انزلك وين يمه بالهالخلا صاحية!!
ام سطام بصراخ/اصحى منك ومن عشر من امثالك نزلني نزلني
سطام وقف على جنب
ام سطام نزلت
سطام بغبنة منها/يمه تكفين اركبي خل ألحق عالمصيبة اللي بنا تكفين يمه
أم سطام/والله مااركب معك لو بها موتي والله
سطام حرك وتركها
........
غصنة لافة الطرحة حول راسها وبدون تقفل عبايتها بخطوات واسعة وسريعة خارجة من البيت متجهة لمجلس الشعر اللي يبعد عن البيت بأمتار معدودة وكلها غيظ اتسعت عيونها وشدت على اسنانها من حست بأحد يسحبها وبخوف/يمه والله ماسويت شي مالي شغل بشي/تبدلت ملامحها الخايفة من ناظرته ورفعت يديها وهي تشد على حبال شنطتها/ووجعوه نفضت قلبي!!
مُحارب ميل شفايفه بغيظ من كلمتها/من كثر بلاويك تحلفين قبل نقول شي وثم ماتستحين تقولين للي اكبر منك وجعوه/رفع يمينه ودفها من راسها بخفة/وربي لاتوطأ ببطنك عاد!!
غصنة بثقة وهي تكتف يديها وترمش بعيونها/كنت خايفة اصلا ماعلى الخواف ملامة
مُحارب مرر نظره عليها من فوق لتحت/هيه انتي ناوية تنقبرين ولا وش سالفتك؟
غصنة تنحنحت وانحنت تقفل عبايتها وتضيع جواب سؤاله/والله هالاثنين لو تنفجر قنبلة ماصحوا
مُحارب عض لسانه وهو ياخذ نفس يكتم غيظه/ليه الديرة مابها خلق غير هالاثنين!!
غصنة التفتت يمين ويسار تناظر المكان الخالي حولهم/يااااااوووك ياكثر الخليقة كثرااااه/تكتفت/ترانا بأقصى الديرة محد درا عنّا ماغير الحمير حولنا
مُحارب زم شفايفه ومو من عادته يصبر على مرادد
غصنة رمت الطرحة على وجهها بخوف/هاه تغطيت ارتحت ذالحين
مُحارب زفر وبابتسامة/وش صار باللي قلت لك عنه؟
غصنة حكت أذنها بيمينها/وش؟وش تقول؟
مُحارب كتم غيظه وهو يدخل يده بجيبه وخرج خمسين ريال ومدها لها
غصنة اتسعت ابتسامتها ومدت يدها حتى تاخذها
مُحارب رفع يده لفوق/اسمع بالاول
غصنة ارتفعت حواجبها/بكيفك انت حر/مشت/
مُحارب مسك شنطتها وسحبها
غصنة تراجعت لورا من سحبته/لحظة لحظة
مُحارب/اخلصي علي
غصنة/أرسلت البارح انها موافقة
مُحارب اتسعت عيونه وبنرفزة/وليش ماعلمتيني؟
غصنة/اصبر اصبر امسك عمرك
مُحارب تكتف
غصنة/قالت عندي شروط أعلمك اياها بكرة وبعدين تراها ارسلت وانا عالمخدة وين اجيك بتالي الليل وانت راقد
مُحارب عض شفته يمسك اعصابه/وبعده ارسلت شروطها؟
غصنة زفرت/شف انا اغليها والله مير انك طيعني وخذ اعتدال احسن لك تراك ماتقواها
مُحارب بتمالك نفس/غصيّن
غصنة مدت يدها
مُحارب حط الفلوس بيدها وبنظرات حادة/اعجلي علي
غصنة/تقول تبي ورقة القبول لاشافتها هاك الوقت تعال
مُحارب اتسعت ابتسامته واخيرا لاح قباله طيف الامل اخيرا بيتحقق حلمه احتضنها وسلم على راسها
غصنة تجمدت بحضنه ماتعودت على ظهور مشاعر منه
مُحارب بوسع ابتسامته خرج من جيبه خمسين ثانية وحطها بيدها/على ذا الخبر الزين ودي احط الف مير تخبرين اخوك وحالته لاجا العوض ابشري بها/مشى/
غصنة تناظره بصدمة مانطقت حرف
مُحارب وقف والتفت لها/ازهمي بنت عمك ويالله اوديكم المدرسة تراكم متوخرين بالحيل وهالخبول اللي داخل دقيقتين وهم جاهزين وايه علميها ماعاد به اوراق ذالحين رسايل تجي بالجوال/مشى/لاتبطون احتريكم
غصنة مشت وسط افكارها متجهة للبيت/ذالحين مرسلني انا دام تبيها كان علمت امي والله ياهالمحارب عجزت اعرفه من بدّ اخواني اكيد وراك بلا اكيد/ابتسمت ورفعت يديها لفوق وكل يد فيها ورق من فئة الخمسين وهي تتمايل بوناسة متجاهلة اي سبب يكدر هالفرحة بهالمبلغ/وسعت صدري يامحارب الدار من سمع صوتك جر له ضحكة من سمع صوتك جر له ضحكة/ناظرت سلام اللي واقفة قبالها خارجة من البيت ووراها ضاري/وبنفس اللحن وهي ترجع طريقها للسيارة تهز رقبتها/ويابنت ياسلاام يالله تاخرنا عالمدرسة يالله
سلمان داخل لبيت الشعر لاف جزء جسمه السفلي بمنشفته وقف عند فراشه مقطب جبينه يتلفت يمين ويسار
نواف واقف بسرواله الداخلي وبيده فانيلة يعدلها حتى يلبسها ناظره باستغراب/وش تدور؟
سلمان ناظره بشك مشى له وحنى نفسه يناظر السروال اتسعت عيونه/يالسروق!!/سحب الفانيلة بيد ومسك السروال بيده الثانية وسحبه/افصخ ملابسي يالسروق
نواف شد عالسروال بوسع عيونه/استح يارجل!!
سلمان/تعلمني الحيا!!/شده/افصخ بس
نواف/لقيتهن عند فراشي
سلمان/تعقب وتخسى جهزتهن سلام واعطتني وانت تشوف!!
نواف سحب الفانيلة من يده/الطايح ملقوط/هرب/
سلمان ركض وراه/ولد
مُحارب عند المشب انحنى اخذ مفاتيحه/دقيقتين وانتوا بالسيارة/مشى/
سلمان عض شفته وجرى لبيتهم/حسبي عليك يانواف حسبي الله
..........
،،،،،الـمـسـتـشـفـى،،،،،
سطام جالس قباله بملامح متجهمة يناظره زفر بمحاولة منه يضبط اعصابه اكثر وهو للحين مكذب ماسمع كيف اخته اختفت بدون اسباب وبدون علم احد/وين يـقـيـن وينها انطق
عزيز متمدد عالسرير بلباس المستشفى بوجه شاحب بعد ليلته العصيبة تحت ايادي الدكتور وتوه اللي افاق للحين مااستعاد وعيه الكامل بوضوح
مبروكة جالسة جنب سريره محتضنه كف عزيز والود ودها تخبيه كله بين ضلوعها التفتت لمصدر صوته وبحدة/فكنا ياولد منصور فكنا من التنشد الولد توه رجعت روحه فكنا!!
سطام بحدة/اختي ياجدة اختي مايندرا ارضها من سماها!!
مبروكة بحدة/اقطع سيرة سويدة الوجه اقطعها!!
سطام وقف وبنظراته المحتدة اللي اخترقت ذاك الجسد المنهك قباله من الادوية/عزيز تمشي عليهم كلهم لكن علي ماتمر وينها يـقـيـن وش سويت بها؟انطق!!
مبروكة وقفت بغبنة وسحبت عكازها اللي مثبتته على طرف السرير ورفعته وحركته بالهواء ناحية مصدر الصوت بمحاولة منها تصيبه وهي ماتشوفه وبثوران اعصابها/اعقب ياسطام اعقب مستقوي على ولد خالك أمانك مستقوي!!
سطام احتدت نظرته ومد يده ومسك عصاتها/اتركيني ياجدة محد عنده العلم غيره محد
عزيز تحامل على نفسه ومد يده لامس يد جدته يوقفها همس/ياجدة
مبروكة التفتت له بفزع تلمس الاشياء حولها
عزيز مد يده بضعف ومسك يدها
مبروكة شدت على يده بكل قوتها/ياروح جدته سم سم ياعيني سم
عزيز ناظر سطام/انت ظلمتني فوق ظلم اختك ظلم عظيم
سطام بتكذيب/ظلمتك!!
عزيز/انت ظلمتني أني سويت بها شي وهي ظلمتني بطعنها لي لكن يشهد الله عفيت عنها
سطام هجم عليه وشده من لبسه وبصراخه/تعقب وتخسى يـقـيـن ماسوتها الا وانت تستاهلها
مبروكة مدت يديها تحاول تمسكه
عزيز بصوت تغير من ألمه/لاتحدّني على شيٍ ماني من اهله!!
سطام بحدته/اعقب ياعزيز اعقب!!
عزيز من بين اسنانه بغيظ/هاجت عليّ وطعنتني وانا مدري وش صابها
سطام شد عليه اكثر/تـعـقـب ياولد زايد ماهاجت من فراغ اعقب!!
مبروكة بحدة بعد مامسكته وتضربه/اعقب انت ياولد منصور اعقب محشوم ولدي عن سويدة الوجه اختك!!/دفته بكل قوتها عنه/
سطام بغبنة/ذي يـقـيـن ياجدة يـقـيـن!!
مبروكة بلعت حرقت قلبها وبشدة/تخسي يـقـيـن وطواريها جنب ولدي وعياله من تكون هي حتى توصل لزايد ومواصيله!!
سطام سحب الشرشف اللي يغطي عزيز بقهر ورماه بوجهه بكل قوته
عزيز غمض عيونه بلحظة ضرب الشرشف بوجهه ثم ناظر سطام بحقد
سطام بحدته/مهما تسوي يـقـيـن ماتوصل لرداك يالردي
عزيز ناظره ذات النظرات ذات الحِدة ذات التحدي يشابهها بقوتها وعنادها كثير وكأنه يذكره بذيك النظرات اللي تخترق قلبه وعجز يسيطر عليها بكل مرة تفرض قوتها عليه بدون أي اهتمام لرأيه او حتى وجوده
مبروكة اخذت نفس بهدوء/هاذي الثانية ياسطام
عزيز التفت لجدته بغبنة يبي يكسره انفجر/ياجدة يـقـيـن تجبّرت وطغت مايـ
سطام لكمه على وجهه بكل قوته مقاطعه وصرخ وهو يخنقه/اعقب!!
مبروكة التفت لمصدر الصوت وهي ترفع عكازها وتضرب به سطام بكل قوتها
سطام ماحس بضربتها من قهره وشد على رقبة عزيز بين يديه/قص لسانك يالخسيس لاترمي بلاويك على اختي!!
مبروكة تتخبط بعصاها بالمكان بمحاولة منها تساعد حفيدها وبصراخ/اذلف عن ولدي ياسطام عساك بالذهاب اذلف
سطام بقهر/ادري كله منك ماهجّت الا من وراك وينها انطق وينها
عزيز اختنق بين يديه وهو يدفه عنه
سطام بصراخ مثل المجنون/وين اختي وينها تكلم
مبروكة تمد عصاتها وتحاول تضربه بقلة حيلتها مرة تصيب ومرة تخطي بسبب عماها وببكى/الله لايربحك ياسطام الله لايربحك/تحركت من مكانها وهي تلامس السرير باطراف يديها تحاول توصل له/الله لايربحك كانك ذبحته الله لايربحك
ام سطام دخلت الغرفة اتسعت عيونه وجرت له وسحبت العصا من يد امها وضربته على راسه بكل قوتها وبصراخ/ابعد عنه ذبحته ياقليل الخاتمة
بارود دخل وراه جرى وسحب سطام بكل قوته ورماه بعيد
سطام ارتمى عالارض ومرر نظراته بينهم بقهر
عزيز ميل فمه بابتسامة للحظة
سطام ماغابت عن عينه هالابتسامة فز مثل المجنون وهجم باتجاه/وينها يا###
بارود مسكه بكل قوته
ام سطام بصراخ/اختك بالعمليات
سطام هدا والتفت لها بصدمة
ام سطام بصراخها/تذبح هالمسكين ليه!!
سطام قطب جبينه وهو يناظرها
ام سطام بدموع وقهر/الله لايوفقه ذبحها اللي مايخاف الله ذبحها
عزيز رجف قلبه وناظرها وبلعثمة للحظة/و.وش فيها وش صار لها
بارود برجفة يديه اللي شدها حتى يخفي الرجفة/عينتها بين يدين الراعي يذبحها
سطام جلس عالارض بصدمة ماتحمل يوقف
عزيز شحب وجهه وهو يناظره
بارود/وانا مدري وش مسوي بها غيره
مبروكة احتدت ملامحها وشدت على عكازها بغبنة
عزيز ارتخى كل جسمه بصدمة من اللي سمعه وظل يناظرها بعدم استيعاب
سطام فز واقف وجرى مثل المجنون خارج من الغرفة
بارود جرى وراه
ام سطام بحدة/بارود
بارود وقف
مبروكة بحدة/كبّه يقوم بواجبه كبّه
ام سطام جلست عالارض وبدت تنتحب/حسيبك الله ياولد النجس حسيبك الله
عزيز نزل راسه وشد عالشرشف وبلع عبرته وهو يشوف الحال وصل بشي ماطرا بباله ابد
...........
مُحارب وقف عند المحطة يعبي بنزين بعد ماوصل الكل لمدارسهم التفت وراه باستغراب من سمع اسمه
عمر/ولد يامحارب وراك هنيّا والدنيا قايمة بالديرة
مُحارب قطب جبينه وبكره/وش علي منهم عساها بحريقة كل ابوها!!
عمر/ياولد الراعي الراعي
مُحارب اتسعت عيونه
عمر/قايمين عليه يقولون غدر ببنت الشيخ
مُحارب ركب السيارة وحرك بسرعة جنونية راجع للديرة
.....
الجد طاهر وقف بالسيارة(ددسن)قبال باب البيت
منيرة/يايبه لو ابطينا شوي ازين
الجد طاهر/والله ان عمتك تبلشني
منيرة ضحكت بخفة/تذّل(تخاف)منها يبه؟
الجد طاهر نزل من السيارة/لا ماأذل مير ان خويطرها(خاطرها)زين هالايام وانا ماودي أثوره
منيرة بابتسامة نزلت وهي ترجع لحوض السيارة تاخذ العزبة/ايه يالله ياللي رزقتها ترزقنا
الجد طاهر/صدق ابن ادم طمّاع عندك ست الله يخليهم لك
منيرة ابتسمت/ان شاء الله بس انهم روحوا يم المدرسة
الجد طاهر فتح الباب ودخل/معليك به مُحارب والله ان يصلي بهم شرق/ابتسم يناظرها جالسة/
منيرة دخلت وراه
الجدة حمدة تتقهوى لحالها ارتفعت عينها من سمعت صوت الباب تنحنحت وتصنعت عدم الاهتمام برجعته انحنت للراديو وهي تقلب فيه نطقت من وصلها صوت الاغاني بكذا اذاعة/ياعساكم ماتربحون وينه القران وذكر الله وينه
منيرة دخلت بابتسامة/السلام عليكم
الجد طاهر دخل وراها
الجدة حمدة صدت وهي ترد/وعليكم السلام والرحمة لولا ان بها ذنب ولا تراني مارديتها
الجد طاهر وقف عندها/مير الخصيمة لا ابطت ذنبها اشد
الجدة حمدة سكتت ماردت
منيرة/وينها غيمة
الجدة حمدة/خابرتن وليدي وسيع صدر وخاطر مدري هالبنية من طالعتن له
منيرة اخذت نفس من الدق اللي تعودت عليه وماعاد يأثر بها
الجد طاهر بدفاع عن بنته/والله وبنيتي اوسع من خاطرها ماخلق ابد
الجدة حمدة بعصبية وزعل/وش قصدك ياطاهر هاه ولدي به شي هاه وش قصدك
الجد طاهر زفر/استغفر الله العظيم
منيرة/ياعمة ابوي مايقصد شي الله يهديك يشهد الله مابه فقيدة مثله يشهد الله
الجدة حمدة بقهر وحزن/اي بالله مابه فقيدة مثله يامنيرة لا انتي ولا عيالك تسوون شعرة من راسه مير عساك بجنات النعيم ياوليدي يالله ياعساك
الجد طاهر ضاقت فيه من هالموضوع اللي مخيم عليهم من سنين ولا انتهى تبددت الضيقة اللحظية من التف يناظرها
وداد خارجة من بيتها بعبايتها الكتف ونقابها مرت من قدامهم
الجدة حمدة بملامح محتدة/حتى الجن يسلمون
وداد زفرت بسخرية تحت نقابها/ابشري لاشفتهم بوصيهم يسلمون عليك/مشت خارجة من البيت/
الجدة حمدة اتسعت عيونها/اهبي الله اكبر عليك اهبي
الجد طاهر/كبيها ياحمدة عنك كبيها
الجدة حمدة/ايه انشوت كبودنا وحنا نسكت عنها الى متى ياطاهر الى متى
الجد طاهر/لاتلومينها من حرّ ماصابها
الجدة حمدة بحدة/إلا كبر راسها من كثر مانداريها ثم وراه يوم ماتريد تعاون تكف شرها عسى الشر ينطحها من وين ماوجهت
منيرة التزمت الصمت رغم احقيتها بهالجدال
ظاهر خرج من بيته وابتسم من ناظرهم واسرع بخطواته متجه لهم سلم عليهم
منيرة احتضنت يده/هاه يمه كيف أصبحت اليوم
ظاهر باس كفها/الحمدلله بخير ياتاج راسي بخير
منيرة مررت يدها ومسحت على راسه ووجهه/عساك بخير دايم ياعيني دايم
وداد عالباب بحدة/ظاهر!!
الجدة حمدة اتسعت عيونها/انا بنت ابوي الصحيح!!
منيرة ناظرت الجدة حمدة بنظرات تنهرها بوضوح
ظاهر زفر بضيق/احتريني(انتظريني)الحين جايك
وداد/لاتتاخر علي/مشت/
ظاهر ابتسم وشد على يد امه/لاتلومينها يمه عندها موعد والمستشفى بعيد وانا متاخر عليها/سلم على راس امه وخرج/
الجدة حمدة وقفت وبغبنة/ايه ايه انفخوا راسها بالحيل لاتقصرون/دخلت لبيتها/
الجد طاهر لف بيخرج
منيرة/على وين يبه
الجد طاهر/بروح يم قليل الدّبِرة اشوف وش عَمْل اليوم
منيرة ابتسمت بفرحة وهي من يومين ماشافته/بروح معك يبه
الجد طاهر/لا ماتروحين ثم انا بأجيبه معي هالغضيب له يومين مامر يسلم على أمه
غيمة الخارجة من غرفتها من فترة متجهة للمطبخ وبعدم رضا عالكلام اللي سمعته وبتنفيستها نطقت/والله مدري مين الغضيب لكن عسى الله ينصره
منيرة هزت راسها وهي تأمن بينها وبين نفسها ناظرت ابوها/عسى الله يزينها يبه الله يزينها/قطبت جبينها وهي تناظرهم/
//التفتوا للباب اللي يندق بطريقة غير طبيعية//
نادر من ورا الباب وباستعجال/ياابو منيرة ياابو منيرة إلحق على محارب ارتكب مجلس الشيخ وعثى به إلحقه
الجد طاهر اسرع بخطواته/يالله عساه خير يالله عساه خير
..........
ظاهر يسوق السيارة
وداد صادقة بوجهها ومتكتفة
ظاهر/ياعيني انتي اللي كاتبه الله بيصير لاتضيقين خاطرك وتسبقين الامور
وداد التفتت له بنرفزة/تكفى تكفى أكرمني بسكوتك اللي يدينه بالنار مو مثل اللي بالما
ظاهر شد عالدريكسون يكتم أعصابه ابتسم بدون لايناظرها/أفا ذالحين أنا صرت نار ياوداد!!
وداد ناظرته بحدة وسط صمت يأكد كلامه
ظاهر زفر/الله يرحم يوم اني كنت مطر للقلب
وداد شبكت يديها ببعض وشدت عليها وبحدة/قلتها الله يرحمها من أيام يوم كان الواحد يستاهل القلب ونفداه به!!
ظاهر عض شفته يتمالك نفسه لايتكلم
وداد تناظره تنتظر انفجاره اللي تعبت وهي تراكمه بنفسها ولكن لاحياة لمن تنادي امتلت عيونها دموع وهي تشوف السكوت منه على كلامها كالعادة ناظرت لقدام وهي تكتم عبرتها وبنفسها/ياربي مايفهم معقول مايفهم تعبت يارب تعبت
ظاهر سحب جواله اللي قطع جوهم المشحون برنينه من عالطبلون ورد/يامرحبا/تغيّر وجهه ولف الدريكسون راجع طريقه/
وداد اتسعت عيونها
ظاهر/جاي الحين جايكم/قفل/
وداد/وين!!
ظاهر/محارب انهبل محد بيقدر عليه غيري
وداد بحدة/اخوك الثاني بيقدر عليه مو هو نفسه يحبون المشاكل
ظاهر بلعها ولا رد
وداد/ظاهر انا ابي اروح موعدي؟
ظاهر/بكرة ان شاء الله
وداد صرخت/ظاهر
ظاهر بحدة/لاترفعين صوتك
وداد اتسعت عيونها من رده
ظاهر/اخواني اهم من موعدك يابنت منور
وداد بصدمة من رده/نعم!!
ظاهر/موعدك هين تلحقينه مير اخواني وين القالهم بديل
............
(ظاهر٣١سنة)،،،(وداد٢٧سنة)
............
،،،،،المدرسة،،،،،،
غصنة تفطر وماعاد عن عينها النظرات
سلام جالسة قابلها تفطر بهدوء وعينها على اكلها كعادتها حتى تتجنب النظرات اللي توترها
غصنة/بنت سلام
سلام/همممم
غصنة/ماتحسين النظر علينا
سلام/وش الجديد؟
غصنة/زايدة اليوم
سلام رفعت عيونها ومررتها عالبنات بالساحة
غصنة نزلت فطيرتها من يدها وتكت بطرف فكها على يدها بتفكير/عنّي صاير شي
سلام/اعوذ بالله من فمك مو صاير الا كل خير ان شاء الله
غصنة وقفت واتجهت لنورة اللي على مسافة منهم وقفت عندها/نورة
نورة الجالسة رفعت راسها تناظرها/خير
غصنة انحنت شبه جالسة جنبها/اقول نوير وش صاير علميني
نورة صدت بوجهها/مدري
غصنة/تكفين نوير محد يعرف العلوم غيرك بهالمدرسة علميني
نورة بحدة/فكيني شرك يابنت خلف انا مااعرف شي ولاادري عن شي
غصنة ميلت فمها ووقفت/زين لاتعلميني مردي اعرف/مشت راجعة لعند سلام وجلست/
سلام عينها بأكلها/هاه عرفتي شي
غصنة/اي والله عرفت
سلام رفعت عيونها تناظرها تنتظر الجواب
غصنة بقلق/فيه شي صاير ببيتنا الله يستر بس الله يستر
..........
,,,,,,<<<<مـجـلـس الـقـريـة>>>>,,,,,,,
محارب بيده العجرة بعثر فيها المجلس وبصراخه/وينه يافالح وينه؟
فالح يبتعد عنه وبين يديه ملقط المشب/والله مدري يامحارب انا مالي دخل بشي مالي دخل بشي تكفى فكني شرك فكني
محارب يمشي بخطوات ثابتة باتجاهه/انتم ناوينها شر من مبطي اخلص وعلمني
فالح رفع الملقط بوجه محارب/فكني شرك يامحارب
مُحارب مد راسه لفالح/هه هه قدامك سو اللي تبي بس علمني وينه؟
فالح حرك الملقط لمحارب بيضربه
مُحارب ضرب طرف الملقط بعجرته
فالح طار الملقط من يده
مُحارب ضرب فالح بالعجرة بجنبه
فالح صرخ بألم
محارب انحنى شبه جالس وضغط براس العجرة على كتف فالح وبحدة/وينه؟
فالح بألم/بهذيك الغرفة حاطينه بها
محارب فز يجري
الجد طاهر وقف على باب مجلس القرية بلهاث اتسعت عيونه وهو يناظره
محارب مر من جنبه بسرعته ماوقف
الجد طاهر /ولد يامحارب ولد
محارب يجري بدون تفكير رجله تاخذه لطريق واحد فقط طريق اخوه بـيّـن
...............
#شقّ_الغَمام