شـقّ الـغَـمـام

..(٢٢)..

..(٢٢)..
.
السلام عليكم
عذرا عالغياب كنت تعبانة وبعدها كل مامسكت الجوال داهمني الصداع فتركت الجوال فترة حتى ترتاح عيوني ورجعت الحين وفل حماس للاحداث الجاية قراءة ممتعة❤️❤️
.
سبحان الله وبحمده سبحان الله العظيم
-
ريوف دخلت/سلام
يـقـيـن ناظرتها باستغراب من تواجدها/وعليكم السلام والرحمة
ريوف تجر خطواتها للداخل رفعت نقابها ونزلته ووسط فتحها لطرحتها نطقت/أكيد اللي من شوي زوجك صح
يقين قفلت الباب عاقدة حواجبها/وش دراني من شفتي!!
ريوف وقفت والتفتت لها/وين غرفة ضيوفك طيب
يقين اتجهت قبلها للصالة الصغيرة وانحنت تجمع فروتها ومخدتها ولحافها اعتدلت تناظرها/حياك الله/مشت/
ريوف ميلت فمها وتكتفت تناظرها/مسرع متهاوشين!!
يقين ماابتعدت عنها إلا خطوات معدودة التفت تناظرها بحدة/متهاوشين متراضين مالك شغل ياريوف ماطلبت معونة انشغلي بنفسك
ريوف شدت على نقابها بين يديها وسط نظرتها المحتدة/هين يجيك يوم واشوف وشلون بتقدرين/اشرت بيدها لوراها قاصدة بيت بني طاهر/على كل ذولا الملتمين لحالك
يقين/كبيك مني ذالحين وعلميني وراك جاية وأنتي خابرتني بأجي
ريوف ميلت فمها من سؤالها زفرت بملل/يعني ماأجي الا لسبب!!
يقين ناظرتها بنظرات تاكيد لكلامها
ريوف فكت تكتيفتها وبنرفزة/سطام جلس يسأل عنك ووين رحتوا خفت أزل طلعت
يقين بتكذيب/اجل خوف من الزلة يطلعك من البيت كله!!
ريوف بزعل/شكلك صدق ماتبيني اجيك!!
يقين/إلا حياك الله مير ماطرا لي تمرين بعد ذيك الليلة
ريوف/حتى لو تهاوشنا ترانا خوات وشو له القطيعة
يقين بوسع عيونها/سطام لايكون لحاله
ريوف/اكيد لا امي عنده نسيتي ان ساكنين معه
يقين ميلت فمها بابتسامة رضا/وهذا الصح اخيرا مابغيتوا
ريوف بضيقة/وين الحمام اخلصي علي
يقين بابتسامة اشرت بتحريك راسها واقفة بمكانها/هناك
ريوف اسرعت بخطواتها بضيق
يقين تنهدت بابتسامة متجهة للمطبخ تهمهم
.......................................................
<<بيت سطام>>
سطام بملامح وجهه المحتفظة بآثار تعبه خارج من غرفته بملل احتواه من كثر جلوسه فيها وقف من وصله صوت صحون تتكسر واتجه للمطبخ بابتسامة/ريوف وش تصارعين داخل؟!!/اختفت ابتسامته من ناظرها/
ام سطام شبه جالسة تجمع القزاز من الأرض رفعت نظرها له من لمحت ظله بابتسامة/صحيت؟
سطام بجمود/مانمت أصلا
أم سطام اعتدلت بوقفتها متجهة لمغسلة المطبخ/رح ارتاح بالصالة/التفتت تناظره بابتسامة/من امس وانت  على شربة نور تاكل منها تارك باقي الاكل قلت اسوي لك شربة دا
سطام قاطعها/لاتتعبين نفسك
أم سطام اختفت ابتسامتها تناظره باستغراب
سطام/وصيت نور باللي أبيه ارتاحي/التفّ عنها/
أم سطام بحدة/أنت علامك!!
سطام وقف بدون يناظرها
أم سطام/شايفتك وعارفة مير إني أقول مايقصد يازينة اثاريك قاصد وبالحيل!!
سطام لازال معطيها قفاه/ابي لك الراحة وشو له توجعين قلبك تجهزين أكل لمن شوفته تمرضك
أم سطام ناظرته بغيظ
سطام زفر بابتسامة ثم التفّ لها/ماانتي بملزومة بواحد مردّه ولدك من الرضاعة!!
أم سطام رجفت عظامها وشحب وجهها
سطام ابتسم من ناظر وجهها/الصدق تمنيت علمتيني وأنا صغيّر اقلها عرفت سواياك بي ليش ولا صابتني علتي من كثر هالسوايا وكبرها بقلبي قبل عيني
،
،
~~قبل١٦سنة~~
سطام(٩سنوات)تراجع بخطواته لورا برعب بعيونه الغرقانة دموع وعينه عليها وبغصته/يمه مادريت والله مادريت
ام سطام بين يديها الصينية ناظرت اكواب الحليب المنسكب عالارض بوسع عيونها رفعت عيونها له
سطام/يمه شلتهن حتى ريوف مايحرقها الحار
ام سطام تقدمت له بخطواتها وبغضب/انا الله يوم عطاني ولد اعطاني نار تكويني كوي/رفعت الصينية ومررتها على جسد هالصغير بكل قوتها بدون رحمة/
سطام رافع يديه يحمي نفسه منها/يمه يمه مادريت يمه
ابو سطام وقف عندهم ساحب سطام من تحتها لوراه وبصوته العالي/صاحية انتي ذبحتي الولد!!
سطام تعلق بظهر ابوه بدموعه يناظرها عن طرف
ام سطام بصراخها/خله يموت وارتاح خله
ابو سطام ضربها كف
ام سطام ناظرته بوسع عيونها من فعله لها
ابو سطام بحدة/كان ماتبينه انا ابيه ولدي انا سطام ولدي
ام سطام ناظرت سطام بلوم/عساك مستانس ابوك يضربني عشانك افرح وارقص من الفرح
ابو سطام رفع صوته/زينة
ام سطام بصراخ وسط دموعها/اشبع فيه هالولد اشبع اللي بكل مرة توقف بوجهي عشانه
ابو سطام بعصبية/هذا انا اصبح وامسّي بهالضعيف اللي احرقتي قلبه وانا اعلمه امك صايبتها نفس عليك اصبر وانا ابوك اصبر مردها تعود امك الاي انت خابرها مير لا عز الله ماهي بنفس يازينة هالسوايا ماهي بنفس ابد
ام سطام ضحكت بقهر/نفس!!لا ماهي بنفس استريح/ناظرته بكره واضح/انا اكرهه مااطيقه ماابي له شوف ليه انت من بين الخلق ولدي ليه
سطام رجف قلبه من كلامها تأمل نظراتها اللي تنطق بمكنون صدرها بحق وحقيق شحب وجهه وكل اماله المنتظرة برجوع امه الحبيبة اللطيفة له تحطمت وتبددت بعد هالكلام أمانه وملاذه الاول ينبذه من احضانه بوضوح وش يرتجي من هالدنيا بهاللحظة
ابو سطام صرخ/ام انتي ام!!
ام سطام/ايه ام انا ام ،ام لنور وليقين ولريوف/اشرت بطرف اصبع يمينها على سطام/مير هو ماني بأمه لو تنطبق السماء عالارض ماني بأمه
سطام شهق بفجعة لقلبه الصغير كبير الكلام عليه وقوي بحقه وهو اللي يسعى بكل مافيه يرضيها رغم صغر سنه تعب وهو يحاول يفهمها يحاول يرضيها يحاول ترجع له أمه صاحبة اجمل ابتسامة واحن قلب عليه لكن هالاعتراف بحقه كسر قلبه المتماسك فترة طويلة من قساوتها عليه ارتمى عالارض باغماء من ضرب سكره من قوة صدمته وهو اللي مايعرف لمرض السكر طريق قبل هاللحظة
ابو سطام انحنى رافعه بين احضانه صرخ بفجعة/سطام ولد سطام
،
،
ام سطام بلعت ريقها بتوتر
سطام/اللي حيرني هو ابوي يدري او لا
ام سطام شدت على قبضتها برعب من سؤاله حاولت تخفيه
سطام/مير يوم انه ابوي حنيّن عليّ ويبعدني عنك عرفت انه مايدري
ام سطام عيونها معلقة عليه بخوف من اللي ناوي يسويه
سطام ابتسم/وش تتوقعين اسوي بعد مادريت
ام سطام ناظرته بترقب
سطام بابتسامة/امشي وسط العرب وأعلمهم العلم
ام سطام نشف الدم بعروقها من كلامه
سطام بابتسامة شر/أو أني اهجد واحتري هاك الوقت اللي تقولون ليه هالوجع ياسطام/ضحك يتخيل الموضوع وتأثيره/
ام سطام استجمعت شجاعتها وناظرته/تهددني يالبزر!!
سطام تنهد بعد ضحكه وبجدية/البزر رجع من الموت مايردّه خوف من أمور الدنيا!!
ام سطام بلعت ريقها من رده
سطام بابتسامة/خليك مستعدة ورانا عرسي ولّا يايمه؟
ام سطام ناظرته بغيظ
سطام لف عنها زفر نفس من آخر اعماق صدره براحة من صحى من غيبوبته يحس بجبل احتل صدره وزاد هالثقل من كانت جنبه وحوله ارتخت أكتافه المشدودة براحة بعد بوحه بهالسر الخطير لأمه يحس بخفة وراحة فظيعة فارقته من سنين جر خطواته بهدوء وسط ابتسامة راحة ارتسمت على ملامحه الهادية عكس من تركها وراه
ام سطام انحنت شبه جالسة ضمت نفسها وسط رجفة اتضحت عليها بعد مااخفتها بخوف احتواها/السر طلع!!السر طلع عن اثنين/شحب وجهها/ولازاد عن اثنين ماهو بسر/غمضت عيونها/ماهو بسر يازينة ماهو بسر
.......................................................
<<بيت سرور>>
سهم جالس يتغدا بابتسامة عريضة احتلت مشاعر وحدته وضيقته وبددتها مقابل هاللحظة
اعتدال دخلت وبيديها كوب وجيك اللبن انحنت نزلتها عنده اعتدلت بوقفتها
سهم عينه على اكله/اقعدي
اعتدال عقدت حواجبها باستغراب/وش تبي؟!
سهم رفع نظره لها/تراني عمك!!
اعتدال/وخير!!
سهم مرر لسانه على شفته السفلية مبللها يهدي غيظه اللي تولع بلحظة ابتسم/اقعدي سولفي علي
اعتدال/جدتي لحالها مااقدر اكبّها/لفت بتمشي/
سهم/اعتدال
اعتدال تنهدت والتفتت له/قول وش تبي وفكني
سهم/كان قلت لك إتسيدين قومك ترضين؟
اعتدال قطبت جبينها/أتسيد من؟!
سهم/بني سمّار تسيدينهم يابنت ضاحي؟
اعتدال ضحكت/مير اللي ماله خير وش ابي من وراه
سهم عض شفته بقهر يكتمه من ردها
اعتدال لفت عنه مشت
سهم رفع صوته بإصرار/على يديك يصير بهم خير
اعتدال وقفت التفتت له بمجاراة/عاد مالقوا غيري أنا يالله ادبر عمري باقي ابلش بغيري
سهم/أنا معك أشور عليك وأنتي تسددين
اعتدال مميلة شفايفها تسمع له/ايه وكيف هالتسيد ان شاء الله؟!
سهم/عزيز
اعتدال اتسعت عيونها بذهول
سهم بابتسامة/كان ملكتيه القوم كلهم بين يديك
اعتدال قشعر جسمها من ابتسامته
سهم/وكل ظلم مرّ ترفعينه بكلمة منك
اعتدال بلعت ريقها بخوف منه ومن اللي وراه/كان تغديت تيسر الله يستر عليك/لفت عنه مبتعدة بخطوات سريعة وسط نبضات قلبها السريعة/
سهم/اعتدال بنت/رفع صوته/اعتدال/جلس وسط زفرته بضيق/والدبرة ذالحين والدبرة
.......................................................
<<بيت الشعر>>
طاهر مرر نظره بينهم بصمت وسط أفكاره
بـيّـن ناظر جده الساكت/ايه سويتها وعن قناعة ورضا محد منكم يلحقه شي أنا الـ
طاهر قاطعه بحدة/اسكت أنت لاأسمع لك حسّ
بـيّـن ناظره بعدم توقع لهالرد
طاهر/ماصار اللي صار لولا خبالك يالمهبول
ظاهر/هاه ياجد ماانت بمليمنا في ذا لحالنا حتى تتقهوى مـ
طاهر قاطعه بحدة/وليه نافخ ريشك أنت!!
ظاهر ناظره بوسع عيونه/جدي!!
طاهر/تحسب انك طالع منها!!
نواف كتم ضحكته يناظر تهزيء اخوانه الكبار باستمتاع
طاهر بحدته/أنت مثله طال لسانك على قلّ سنع
ظاهر كشر بوجهه بغيظ
طاهر/وفوقكم يالاثنين كملتها مرت اخوك تقل ناقصين حنّا
حامد احتدت نظرته بكره لزينة وكل ماارتبط فيها
بـيّـن قطب جبينه بعدم فهم لفعل يقين حتى اللحظة
ظاهر/الا كفو تنطح كفو اقدت بهم ذيبة بنت ذيب
بـيّـن غرق بأفكاره وسط صمته ومحاولاته استرجاع لاحداث  ليلة البارح كل اللي يذكره الى لحظة ورطته بالباب اللي انقفل عليه كل اللي طلع به معرفته للريحة تنهد بضيق من تقفلت بوجهه
طاهر صرخ/ظاهر
ظاهر ناظره برفعة حاجب والتزم الصمت
طاهر/زين جت على مسكة ليدها ولّا
بـيّـن قاطعه بتقطيبة جبينه/وش مسكته؟!!
ظاهر ناظر جده بلوم
طاهر اخد نفس وبتهوين للامر/عدت على خير
بـيّـن فز واقف ومشى
طاهر/ولد عود بـيّـن ولد
بـيّـن اسرع بخطواته متجه للخارج
ظاهر/خله ياجد مردّه يعود
حامد ابتسم/خلّه يبه خلّه يعلمها الحريم مايتدخلن بشي مالهن به
ظاهر قطب جبينه باستغراب من كلامه
طاهر رفع صوته/حااامد
حامد ناظر ابوه باستغراب من نبرته/سم
طاهر/لولا سواتها كان به علوم غير هالعلم ذالحين
حامد بغيظ/مير يبه
طاهر قاطعه/عليك بعيالك اصلح امورك واترك الناس عنك
حامد/يبه!!
طاهر/سمعتني اترك الناس عنك
ظاهر/جد ماعلمتني وشو له مليمنا
طاهر بنرفزة/الله واشغالك اللي من كثرها ماتدري وش تلحق عليه مغير متبطح عند مرتك
ظاهر كشر بوجهه بزعل/جد!!
طاهر/احتري اخوك ذا يعود وثم يصير خير
بـيّـن دخل لبيت الجد قاطع الحوش متجه لبيته دخل لبيته وقفل الباب بصوت مسموع يدل على كمية الغضب بصدره
يـقـيـن بغرفة النوم بعبايتها وطرحتها على اكتافها/هاه شفتيها
ريوف تتمشى بالغرفة/اصبري علامك علي!!
يـقـيـن قطبت جبينها من وصلها صوت قفلة الباب اللي ماتبشر بخير ناظرت ريوف/يعني ماتشوفين الا ذالحين وينك من بدري
ريوف واقفة عند تسريحة يقين تحوس بالاغراض/وش ذا ماعندك شي
يـقـيـن ببال مشغول/خليك هينا الظاهر بـيّـن رجع
ريوف وعينها عالاغراض بالتسريحة/من قفلة الباب واضح صاير شي/رفعت عينها ليقين/ترا مااضمن نفسي اذا سمعت شي مايعجبني
يقين بنظرات حادة/خليك هينا لو ايش ماتسمعين فهمتي
ريوف هزت راسها/احاول
يـقـيـن خرجت
ريوف ابتسمت/ايه زين انتظريني اسكت
يـقـيـن وقفت قباله على مسافة بسيطة منه بمنتصف البيت وباستغراب/خير!!
بـيّـن مد يمينه ليمينها وسحبها له يقربها منه
يقين تقدمت له من سحبته وناظرته باستغراب/علامك
بـيّـن ميل راسه يتفحص عنقها يدور هالاثر
يـقـيـن انكمشت على نفسها من نظراته/علامك
بـيّـن المحتفظ بيمينها بيمينه لفها وصار قفاها لوجهه مد يساره ورفع شعرها يناظر رقبتها من ورا
يـقـيـن سحبت يمينها من يمينه والتفت تناظره ووجهها بوجهه/علامك علمني وش فيك وش صاير
بـيّـن سحب يسارها بيمينه ورفع كم عبايتها وبلوزتها بنفس الوقت بيساره يدور هالاثر بعيونه
يـقـيـن سحبت يدها ارتفع صوتها بنرفزة/بـيّـن
بـيّـن سحب يمينها واتسعت عيونه من لقى هالاثر اللي يسمع به رفع عينه يناظرها/ذا وش؟
يـقـيـن ناظرت وجهه المكتسي سواد من غيظه المكتوم بتردد مابين تقول له الحقيقة مباشرة وهالشي مابيصير من وراه خير او انها تكذب وهالكذبة بتنفضح بالنهاية اخذت نفس حتى تمهد له الموضوع
بـيّـن رفع صوته بتشديد على كلامه/يـقـيـن وش ذا؟
يـقـيـن ناظرته بحدة/ماهو بس انت اللي تبي تاخذ حقك
بـيّـن قطب جبينه باستغراب
يـقـيـن/من يتعدى على حقوقي بيجيه حقه/رفعت يدها المحتضنها بـيّـن بين يديه/وهذا شين بسيط صابني وانا ارد  حقوقي
بـيّـن ناظرها مميل فمه/اسمعك
يـقـيـن شتت نظرها بالمكان بعيد عنه /ناوينها شر يمّك وانا رديت هالشر عنّا
بـيّـن لانت نظراته المحتدة من سمع شموليتها له بكلمة(عنّا)/يعني ذا جواب لسؤالي؟
يـقـيـن رجعت نظراتها له والتقت عيونها بعيونه تردد على مسامعها سؤاله وكأنه يسألها بهاللحظة من جديد(انا ناوين بني سمّار من مبروكة لعزيز لاخر راس منهم اخذ حقي اخذه واللي سويته البارح اول حقوقي واهونه كان مايسرك فعولي بهم وودك الفرقى الله يستر عليك وكان قلبك يقوى فعولي ويسترها حياك الله معززة مكرمة بنت شيخ راعية حق وواجب بهالبيت)هي فاهمة وعارفة عمق كرهه لبني سمّار تصريحه لها بهالموضوع ماكان تصريح عابر هو يبلغها بتتوجعين بأهلك وناسك وبيطول حتى اقرب قريب لك ترددت للحظة من كون الموضوع يطول اخوانها اما بالنسبة لجدتها وعزيز تقفلت ملفات المعزة والاحترام بينهم من ليلة علمها بسواة عزيز وعلم جدتها وسكوتها،هي اعلنت ليلة البارح بوضوح موالاتها لبني طاهر تخلت عن بني سمّار وانتهى الموضوع لكن مع تصريحه صحت كون سطام من بني سمّار وش بيلحقه وش بيصير له اذا اعلنت الحرب عليهم سطام وش مصيره بينهم يكفي فجعتها بتعبه كيف تجر له الأذية باختيارها تنهدت بضيق
بـيّـن ميل فمه بغيظ من طول صمتها وترددها الواضح لعيونه سحبها له
يـقـيـن تحركت من سحبته بوسع عيونها وضرب راسها بصدره رفعت راسها له بزعل
بـيّـن/وش جوابك؟
يـقـيـن بلعت ريقها
بـيّـن ترك يدها بابتسامة
يـقـيـن عبست بوجهها من ناظرت ابتسامته
بـيّـن/حقوقي،ارد الشر عنّا هاه وضح الجواب لك مثل مااتضح لي؟!
يـقـيـن ناظرته بغيظ من ابتسامته/وش الجواب الواضح لك انا لذالحين ماعرفت 
بـيّـن ضحك بخفة دخل يديه بجيب بنطلونه ولفّ عنها
يـقـيـن مشت وراه/لحظة لحظة ماقلت جوابي لذالحين اصبر
بـيّـن وقف
يـقـيـن وقفت وتراجعت خطوات لورا
بـيّـن التفت يناظرها بابتسامة/هاه اسمع؟
يـقـيـن/وش فهمت
بـيّـن بابتسامة/صدي كلك/خرج يديه من بنطلونه ورجعها ورا ظهره وانحنى لها وجهه بوجهها وعيونه بعيونها
يقين ثبتت عيونها بعيونه وثبتت رغم توترها من قربه
بـيّـن بابتسامة/مير الجواب واضح لي وضوح الشمس
يقين باستغباء/اللي هو؟
بـيّـن اعتدل بوقفته بابتسامة/المهم ذالحين علميني
يقين قطبت جبينها
بـيّـن اختفت ابتسامته اشر بنظراته ليدها/من هو اللي سوا بك ذا اللون
يقين بخوف من فعله اذا عرف/تراني حستهم عنك
بـيّـن رفع صوته/يقين
ريوف خرجت من غرفة النوم/يقين
بـيّـن انصدم من تواجدها صد
يقين التفتت لها بوسع عيونها
ريوف رجعت لغرفة النوم وقفلت الباب
يقين باحراج/ اختي مادرت انك هينا
بـيّـن الصاد/بعدين نكمل سالفتنا/خرج/
يقين اسرعت بخطواتها وفتحت الباب بقوة/ريوف
ريوف الجالسة عالسرير ببرود/نعم
يقين/ماتفهمين انتي ماتفهمين!!
ريوف بنرفزة/رفعت الصوت لها حدود كيف تسكتين له!!
يقين بقهر منها/اطلعي برا
ريوف اتسعت عيونها/تطرديني!!
يقين/برا ياريوف برا
ريوف/تدرين عاد احسن عساك من هالحال واردى وش علي منك لو يكسر راسك وش علي/مشت بخطوات سريعة/
يقين زفرت بغيظ جرت خطواتها متجهة للخارج
.......................................................
<<بيت مضاوي>>
محارب وقف بالسيارة قبال الباب
ولاء فتحت الباب باستعجال ونزلت رجل ورجل داخل السيارة ناظرته/مايحتاج تنزل شنطتي انا انزلها معي/نزلت وقفلت الباب بدون تترك له فرصة يتكلم فتحت الباب الخلفي واخذت شنطتها/سلام/قفلت الباب/
محارب تنهد بابتسامة المهم عنده بهالوقت راحتها حرك السيارة لبيتهم بشوق لامه واهله
ولاء دخلت للبيت بخطوات سريعة وقفت عالباب الفاصل بين الحوش ومجلس الرجال والمقلط ناظرت جدتها الجالسة بمكانها المعتاد تتقهوى وبين يديها سبحتها وصوت الراديو غطى المكان وغيمة متمددة جنبها تلون بكراستها بهدوء
مضاوي رفعت عينها جفلت للحظة من السواد المحتل المدخل قبالها تنهدت/بسم الاه علينا روعتيني يابنية
ولاء غرقت عيونها دموع همست/جدة
مضاوي بابتسامة/ياهلا ومرحبا حياك الله ياهلا ياولى
ولاء جرت لجدتها بدموعها وبصوت ارتفع/جدة
مضاوي انصدمت من ناظرت دموعها/علامك يابنت
ولاء ارتمت بحضنها تبكي
مضاوي ضمتها ولامست بيمينها راسها/بسم الله عليك بسم الله/بدت تقرأ الفاتحة وقصار السور عليها وتنفث/
ولاء بعد ماهدت اعتدلت تاركة حضن جدتها ناظرت غيمة المذهولة من الاي يصير تناظرهم بصمت فتحت يديها لها بابتسامة/حبيبة عمة تعالي لي بسرعة بسرعة
غيمة وقفت بهدوء وجرت خطواتها الهادية وجلست بنفس الهدوء باستغراب من اللي يصير
ولاء ضمت غيمة لها/ياروحي غيمتي اشتقت لك ياروح روحي
مضاوي ناظرتها بشك/بنت
ولاء اشغلت نفسها بغيمة عمد تتجنب جدتها
مضاوي/علامك يابنت
ولاء بابتسامة وعينها لغيمة/مافيني شي ياجدة 
مضاوي/واللي من شوي
ولاء ناظرتها/الشوق ياجدة
مضاوي ضيقت عيونها/مسرع توك من اسبوع عندي وش هالشوق
ولاء/اشتاق لك كل دقيقة ماهو اسبوع ياجدة
مضاوي/اصدقيني يابنت متهاوشة مع محارب
ولاء بوسع عيونها/اعوذ بالله الله لايجيب الزعل
مضاوي ميلت فمها بشك
ولاء ضمت غيمة لحضنها تنهدت/والله مو صاير شي بيني وبينه ياجدة والله
مضاوي اتسعت عيونها ثم ارتسمت ابتسامة/بنت
ولاء ميلت شفايفها من ناظرت ابتسامة جدتها باستغراب/نعم
مضاوي بابتسامتها/هالصياح من متى؟
ولاء بتفكير/اليوم بس الاه لايجيب الصياح الا بفرح
مضاوي نطقت اسمها صح وبابتسامة/ولاء
ولاء فهمت قصد جدتها اتسعت عيونها/جدة لا لا والف لا اصلا بدري
مضاوي عبست بوجهها/خلف الله عليك وش بدري انا يوم اني بعمرك معي ابوك
ولاء/الله يطول بعمرك بس ياجدة ماحولنا شي قريب وانا ماابي اصلا
مضاوي ضحكت بخفة/مير اللي مايبي هو اللي ينساق يمّه
ولاء عبست بوجهها/ارزاق الله كلها خير مير هالرزق محد مستعجل عليه
مضاوي تنهدت/يعني هالصياح ماوراه شي
ولاء/علمتم وراه شوقٍ كبير
مضاوي ميلت فمها للحظة ثم ابتسمت/بنت عساك جيتي ويديك مليانة؟
ولاء قطبت جبينها باستغراب/ابشري ياجدة باللي تبين مير وشو له هالسؤال!!
مضاوي/السنعة اللي ماتنسى اهل رجلها
ولاء بعدم تصديق/السنع ماوقف على عطايا ياجدة
مضاوي/تزبرقي تزبرقي الليلة مسيرين على بني طاهر
ولاء ميلت فمها بتفكير/جدة انا تعبانة ودي ارتاح
مضاوي/الليل كله بترتاحين لاتخافين قومي قومي سوي شعرك خليه على طوله
ولاء ناظرتها بشك/بدري ياجدة بدري
مضاوي وقفت وبابتسامة/ايه البسي ذهبك كل ابوه
ولاء/والله ياجدة ماانتي بخالية/وقفت/علميني وش وراك
مضاوي مشت/سوي اللي اقوله وانتي ساكتة
............................................................
.
بـيّـن خارج من بيت جده بطيف ابتسامة يرتسم لحظة ويختفي ثانية يجر خطواته متجه لبيت الشعر وقف بملامح احتدت من طاحت عينه عليه
رازي تقدم له بخطوات بطيئة واضح عليها التردد بوجه ارتسم عليه السواد بمشاعر اختلط فيها هالتردد بالندم والخجل واهمها الفقد فقد شخص كان بالنسبة له ركيزة بحياته مايقوى الحياة بدونها كيف مرت هالايام عليه مايدري كل اللي يعرفه انها من اثقل الايام تشابه بثقلها لايام وفاة ابوه يدري من بداية هالعلاقة بينه وبين غيمة بتتاثر علاقته ببـيّـن لكن ماترقع توصل لدرجة الغربة بينهم رفع نظره بثقة بعد التشتت اللي يتردد مابين خطواته ونظراته وقف بثبات/بـيّـن
بـيّـن بابتسامة/ياسبحان الله ياسبحانه
رازي بلع ريقه من حسّ بغصة توسطت حلقه هالنبرة جديدة عليه هالنبرة ماكانت ابد تتوجه له هالنبرة كانت فقط موجهة لاعداءه هالنبرة عرفته مقامه ومن يكون بالنسبة لبـيّـن بهاللحظة
بـيّـن/بعد ماكان هالزول من أحب وأقرب الازوال لقلبي/اختفت ابتسامته/صار ذالحين ابغضها واثقلها عليّ
رازي أوجعه الكلام وبالحيل يدري بيزعل ويعصب عليه وعد نفسه يتحمل كل مايجي منه اهم شي يرجع له حتى لو ماكان مثل قبل الايام كفيلة تداوي هالجرح لازم يوقف بوجهه كل مرة ويتحمل ويسكت واجب عليه يكفر عن هالذنب بحقهم ويكفر بصمت وقبول لكل مايجيه لكن ماتوقع هالكلام يوجعه هالوجع اخذ نفس يذكّر نفسه هالوجع مايساوي شي بكفة الميزان لوجع بـيّـن
بـيّـن ضحك بسخرية من ناظر وجهه/اخيه وهالوجه اثاريه يحس!!
رازي ناظره بصمت
بـيّـن بجمود/تعقب وتخسى ماتعرف للوجع طريق وانت هاذي سواياك
رازي/بـ
بـيّـن بحدة قاطعه/لاتجيب اسمي على لسانك النجس وانت خابر ان الكلاب اطهر منك!!
رازي تفادى يناديه/اسمعـ
بـيّـن قاطعه/سكوتي مايعني اني راضي باللي يصير ولا يعني اني راضي بشوفتك لا ابد يشهد الله
رازي بصمت وشلون يجادله اذا ماكان عنده نية يسمع له تنهد يستقبل كل مكنونات صدره بهدوء
بـيّـن/ابي اشوف نهاية اللي عشتوه هو صدق بتصملون لنهايته ولا سراب تطاردونه بالحرام ويوم صار صحيح تبخّر
رازي رجف قلبه قبوله لزواجهم ماكان ابد حفظ سمعة وخوف على اخته قبوله مجرد مراهنة ينتظر نهايتها حتى يرفع صوته بانتصاره وفشلهم ناظره بملامح ذهول وقت قطع علاقتهم ماكان مجرد لحظة غضب لا ابدا هو كان قاصدها بكل ماتعنيه الكلمة ينتظر الزلة حتى يقسى عليهم اثنينهم ويذوقهم من نفس الكأس لكن هالمرة بالعلن على عيون الجميع مو مثله تحمّل هالوجع بالخفى لحاله همس/بـيّـن
بـيّـن ميل فمه بابتسامة من وصلت افكاره لرازي وبتهديد/هالمركب تمشون فيه لو كان البحر تحتكم نار/اختفت ابتسامته/نارهم أرحم لكم من ناري/مشى خطوات ثم وقف وبغيظ/لاترز وجهك قدامي تراني يالله يالله اجالد عمري عنكم/مشى بخطوات سريعة/
رازي ناظره يتبعد احتدت نظرته/صدق ماانت بصاحي حتى بزعلك/ابتسم ورفع صوته/محد يفوز علي بالعناد
بـيّـن وقف وناظره بغبنة
رازي بابتسامة/نشوف يابـيّـن جنونك ولاّ عنادي
بـيّـن بغبنته/تبي موتك!!
رازي مشى له بخطوات سريعة وضرب كتفه بكتف بـيّـن مكمل طريقه بدون يلتفت له/اذبحني وش رادك
بـيّـن اسرع بخطواته وراه ومد يديه دفعه بكل قوته
رازي طاح عالارض
بـيّـن كمل طريقه ينفض يديه وباشمئزاز/عوذا يديني تنجست عوذا حتى التراب سبع مرات ماينظفها
رازي ابتسم بسخرية وقف ينفض نفسه بصمت
بـيّـن دخل لمجلس الشعر بملامح مغتاظة
نواف همس/درا؟
ظاهر ناظره بحدة
نواف سكت
طاهر/عود دربك وناد خويك
بـيّـن بحدة/مالي خويّ انا عشت بهالديرة وحيد وبموت وحيد
طاهر قطب جبينه بشك
ظاهر ناظره باستغراب
نواف/يعني رازي ماهو بخويك
رازي وقف ورا بـيّـن/السلام عليكم
طاهر/وعليكم السلام والرحمة حياك الله
رازي دخل وسلم عليهم
بـيّـن واقف عالباب/ياجد وش تبي مني انا مشغول ماني بفاضي
طاهر مرر نظره بينهم وقف وبحدة/الليلة انتم اخويا غصبن عليكم وبعدها عساكم بحريقة وش علي منكم يامال الخبال ياعيال خلف ومثنى/مشى وقف ناظر بـيّـن الواقف على باب بيت الشعر
بـيّـن يناظره بغيظ
طاهر بنفس الحدة/البارح انتم كاشتين سوا انثبر عنده ودبروا علم كشتتكم يامال اللي/سكت وجر خطواته بغيظ/وتوحدوا عقبها عساكم ماانتم بأخويا اهبوا من عيال اهبوا
بـيّـن المثبتة نظراته على جده رفعها موجهها للي داخل المجلس احتدت نظراته من ناظر ابتسامته
رازي بابتسامة على وجهه/وين مكشتنا فيه البارح؟
............................................................
<<بيت ام عايض>>
سالمة جالسة جنب امها شادة على يدها برجى وسط دموعها/يمه عامر يبي ياخذ على راسي وحدة كان ماعودت يمه تكفين خليني اروح بيتي تكفين
ام عايض الصادة بعناد/ايه ذالحين تصيحين واول هان عليك صياح عيال اخوك تستاهلين خله ياخذ الثانية والثالثة بعد
سالمة/يمه تكفين
سعاد متكتفة تناظر امها بغيظ زفرت/وش اللي يرضيك يمه؟
ام عايض ابتسمت والتفتت تناظرها/ايه ذالحين تسمعن لي!!
سالمة/الشري يمه ابشري ياللي تبين
ام عايض/شفتن وش قلتن لي
سعاد احتدت نظرتها
ام عايض/تروحن يم مرت اخوكن وتنشدنها وعاد حل اموركن بين يديها
سالمة بعصبية/يمه هي تبي خراب بيوتنا ذالحين
ام عايض/ذنبكن على جنبكن محد ضربكن على يديكن يوم تسون هالسوايا
سعاد شدت على قبضتها/ابشري يمه ابشري
ام عايض/بالاول روحن يم اخوكن وبعدها قولن لي ابشري وهاه انا مالي كلمة عليه مثل مالعبتن براسه ردنه يم بيته يابنات ضيف الله ويالله اطلعن عني ماابي لاحد شوف برا عني برا
............................................................
<<بيت سطام>>
عزيز جالس قباله بصالة البيت نزل فنجاله بابتسامة/الحمدلله عالسلامة ياسطام طالع من الشر
سطام بجمود/الله يسلمك
عزيز مرر نظره بالمكان/ماودك تدحر الشر وتعود يم البيت
سطام ابتسم/وعلامه بيتي لايكون ماهو قد المقام
عزيز/استغفر الله الله يعز مقامك عمره المكان ماكان يعز اللي تعز الفعول
سطام ابتسم بسخرية من كلامه/صدقت
عزيز ناظره/علمتك عمتي
سطام قطب جبينه باستغراب/وشو؟
عزيز/عن ورثك انت وخواتك
سطام ناظره/اي ورث وابوي باقي حي
عزيز ابتسم/والله انك حظيظ عندك ام تلت حقك من عيوننا
سطام ارتفعت حواجبه بتكذيب/امي!!امي انا!!
عزيز بابتسامة استغراب/ايه امك علامك
سطام سكت بتفكير وش ورا فعلتها هالمرة
عزيز وقف/عاد استئذنك تخبر ورانا اشغال لله امرها
سطام وقف ببطئ/الله يستر عليك
عزيز خرج متجه لباب البيت وقف من ناظرها
ريوف ابتسمت من ناظرته جرت خطواتها واقفة قباله ومدت له الكيس اللي ماسكة طرف نهايته بيدها/تفضل
عزيز مد يده مسك طرف الكيس من ناحيته وسط ابتسامة  رضا/سلمتي يابنت عمي عساك عالقوة سلمتي
ريوف همست/الله يسلمك
يقين دخلت للبيت احتدت نظرتها من المنظر/ريوف ادخلي
عزيز تلاشت ابتسامته من سمع صوتها ثم رفع نظره لها بملامح هادية
ريوف جرت خطواتها بغيظ وسط همسات حلطمتها/باقي تتامرين على راسي وانتي طاردتني عجيب والله
يقين جرت خطواتها لداخل البيت متجاهلته
عزيز تجاوزته يقين رفع صوته/احفظي اخر الود بيننا يابنت العم وفكينا منك الليلة
يقين وقفت والتفتت له/وهو بقو بيننا ودّ!!
عزيز/اقول اخره اخره احفظيه
يقين ابتسمت تحت نقابها وبسخرية/مشكلتكم يابني سمّار تظنون باقي الخلق نفس طهارة قلوبكم
عزيز احتدت نظرته
يقين بسخرية/لاتعامل بني طاهر مثل قومك ارفع مقامك حتى تقدر تناطح الهامات
عزيز هز راسه بقبول وسط ابتسامته
يقين عبست بوجهها بشك من هدوءه
عزيز باصرار/اخر الود اكرمينا بغيابك عن الامور الليلة
يقين بعناد/وان مااكرمتكم يابني سمّار؟
عزيز بابتسامة/ابشري ماطلبتي شي الليلة يجيك اكرام بني سمار/اشر عالباب/لحد ذا الباب ابشري
يقين توترت من ثقته للحظة/نشوف وش وراك ياولد سحاب
عزيز مشى خارج بابتسامة/صحيح بتشوفين/خرج/
يقين اسرعت بخطواتها وقفلت الباب بكل قوتها
عزيز ابتسم من قفلة الباب يلف الكيس بين يديه برضا
يقين جرت خطواتها لداخل البيت بخطوات سريعة يخالطها شي من الغضب وقفت على مدخل الصالة تبددت ملامحها الغاضبة ناظرته جالس بملامح هادية يخالطها شي من الشحوب من تعبه غرقت عيونها دموع ابتسمت برضا وحمد وشكر اللي رجع للحياة بعد ماكان بذاك الوضع الميؤوس منه بعينها تقدمت بخطواتها له
سطام التفت من حس بوجود شخص اتسعت ابتسامته من التقت عينه بعينها وقف/ياهلا ومرحبا ياهلا بمطولة الغيبات ياهلا ومرحبا
يقين جرت له فاردة يديها واحتضنته اول ماوقفت عنده وببكى/سطام
سطام احتضنها بابتسامة/الكبيرة تبكي وش خلت للصغار
يقين شدت عليه بين احضانها تبي تحس بحرارة جسمه تكره البرودة وكثير عمرها ماكانت البرودة احساس خير بنظرها بالاول برودة ابوها اللي يأست معها من شفاءه وتجددت بسطام وكانت على شفا حفرة من الانهيار هالبرودة لازمت اوجاعهم واثبتت لها عجزها بكل الاحوال بدموعها/الحمدلله اللي رجعت ياسطام الحمدلله
سطام تضايق من ضمتها/تراني لذالحين تعبان يايقين
يقين تركته بسرعة/اسفة اسفة نسيت
............................................................
         الـلـيـل
............................................................
<<مجلس الشيخ>>
//المجلس مزدحم بأهل الديرة بحضور بني طاهر//
الشيخ عزيز/اجتمعنا الليلة على عيون الكل نبي الحق ونرد الظلم الكل يسمع والحكم على عيونهم يقيمونه نسمع مثل مايسمعون نرفع الظلم كان به ظلم
بـيّـن زفر بسخرية من الموقف المنعاد باختلاف الاشخاص
الشيخ عزيز مرر نظره عالمتواجدين/سحاب تطلبكم الحق/ناظر بـيّـن بحدة/أحرق بيت حدادها وباقي طواري اهلها بلا رحمة ولا خوف من الله!!
بارود بابتسامة/ماهي غريبة عنه سواها قبل
طاهر احتدت نظرته من سمع كلامه
بـيّـن ابتسم ممرر نظره عليهم ميل راسه واسنده على كف يساره المستند كوعه على ركبته اليسرى يناظر بارود بابتسامة
بارود احتدت نظرته
سهم قطب جبينه من ناظر ابتسامة بـيّـن
عزيز بعدم إهتمام لبيّن/احرق كل شي مابقى لو ذرة من بيتها كل شي صار رماد كل شي تساوى بالبلاط
طاهر/تقول ياشيخ اللي احرقه بـيّـن؟
عزيز/اي بالله
طاهر/اللي اخبره بيت سحاب بوادي سرّاي ووادي سراي يحرم على اهل الديرة يخطون به عقب اللي صار من سنين
عزيز/صدقت وادي سراي منعتنا سحاب نخطي به خوف نعود جنايز مثل ذيك السنين
طاهر اشر على بـيّـن/مير هذا هو قدامي مااشوفه جنازة
ظاهر ميل فمه بابتسامة
عزيز احتدت ملامحه
طاهر/لو انه غدا يم ذاك الوادي عودّ جنازة وذا اللي نخبره عن هالوادي الاقشر
ظاهر/هالوادي محد يدخله غير نفر واحد ويطلع منه طيب
عزيز بحدة/وش قصدك!!
ظاهر رفع يديه/ماقلت شي بس دام مر بالك احد علمنا بدل رمي التهايم على غير سنع
سهم بثقة/كان قصدك سحاب هاذي تروح يمّه نهار وتعود نهار من سنين وتروح تحتد ماراحت لعب وخراب مثل غيرها
طاهر/مير علمتك البارح بـيّـن كاشت مع خويه انت اللي ماتسمع هذا هم انشدهم ويعلمونك وكان على سيارته راح مع خويه ولا حتى ذي تبونه يستأذنكم بها!!
رازي/كان عندكم شك مرينا البارح محطة***وحنا معودين بها كاميرات تقدرون تشوفون السيارة
بارود شد على قبضته بغبنة
عزيز/كان طلعت صورة سيارتك بالكاميرا ماهو معناه انه معك!!
طاهر هز راسه/صحيح اللي تقوله مير ماقلتوا انه بـيّـن الا ومعكم طرف علم
عزيز ابتسم مدخل يده بجيبه خرج المحفظة ورماها قبالهم
بـيّـن عقد حواجبه باستغراب من تواجدها معهم رفع ناظره يناظرهم بابتسامة
بارود/محفظته وكل اثباتاته نساها وراه بعد فعلته الشينة
طاهر ناظر بـيّـن
بـيّـن ناظرهم بهدوء/تقولون أنا؟!
بارود/الا انت ماهو بنقوله!!
بـيّـن ميل فمه بصمت
عزيز بابتسامة ثقة/علامك سكت ولا ماعاد به اكذاب تغطي سواد وجهك
بـيّـن/لا والله مالحقني سواد وجه مثل مابيلحقكم ذالحين
عزيز احتدت نظرته
بارود/تخسى وتعقب سواد الوجه معروف وينه ووين مرتعه!!
بـيّـن/كانك صادق عينت محفظتي وسط هالبيت المحترق اللي تساوى به كل شي بالبلاط عقب ماصار رماد علامها محفظتي مالحقها لو هو طرف شرارة
عزيز انخطف وجهه
بـيّـن وقف وانحنى اخذ محفظته واتجه لمشب النار بطرف المجلس/وشلون ماذاب منها شي وهي حتى لو حست حرارة/ثبت المحفظة بالملقط ومدها فوق النار معرضها للحرارة/خرب جلدها وصارت ماتسوى/ثواني ورفع الملقط المنتهي بالمحفظة اللي تجعد جلدها بوضوح/
بارود بغبنته/عينّاها بزاوية الحوش
بـيّـن ناظره/حتى لو انها بزواية الحوش بياصلها اللهب والحرارة وثم وشلون دخلتوا وادي سراي وطلعتوا سالمين والاهم وشلون دريتوا ان الحوش شب ومحد يقرب هالوادي مثل ماندري جميع
عزيز بحدة/لاترمي تهايمك علينا عبث تحاول تهج عن فعلتك
بـيّـن/ماسويت شي حتى اهج!!كنت كاشت وانتم ترمون تهايمكم يمي بغير حق
بارود/ايه صحيح المحفظة ماكانت بزاوية الحوش كانت برا
بين بابتسامة من تغييره لكلامه اخذ محفظته ورمى الملقط جنب النار ناظرهم بابتسامة/عاد الصحيح اني فاقد محفظتي لي ثلاث ايام واليوم رابعهن
عزيز شد على قبضته بغبنة
سهم احتدت نظرته
بـيّـن/تخبرون الرعيان دايم يجيبون محفظتي للمجلس من كثر ماانساها هالمرة مادورت عنها توقعت القاها/ابتسم/والحمدلله وصلتني!!
عزيز مرر نظره عالمتواجدين اعتلت وجيههم ملامح التشكيك توتر عجز يحدد هل الشك فيه او باتهامه
فالح دخل للمجلس/ياشيخ ضيوف
عزيز احتدت نظرته/ما
سهم قاطع عزيز/قلط ضيوف الشيخ حياهم الله ياحيهم
دخل للمجلس صاحب المنكبين العريضة والطول الفارع يمينه مصابة ملفوفة بشاش اسندها لصدره تقدم بخطوات ثابتة متزنة وخلفه شخصين/السلام عليكم
عزيز وقف بابتسامة/ياهلا ومرحبا حياكم الله حي الله ضيوف بني سمار
بابتسامة مجاملة/الله يسلمك ويحييك جينا ندور عن
بـيّـن المعطيه قفاه من لحظة دخوله التفت يناظره
اتسعت ابتسامته من ناظره تقدم له بخطواته واحتضنه
بـيّـن انصدم من هالغريب وفعله دفه عنه
شد عليه بكل قوته والتف به معطي عزيز قفاه وهمس له/عسّاف/رفع صوته وتركه محتضن يمينه بيساره/ياوجه الخير وراعي الجميلة وين نطلع من جزاك
بـيّـن ناظره بربكة يحاول يخفيها/الله يسلمك
عساف/وين خويك مااقول الا جمل الله حالكم وبيض وجيهكم يوم انكم فزعتوا لنا
بـيّـن بابتسامة/افا ياعساف مابيننا وانا اخوك مابيننا
عساف خرج شماغ متلون بالاحمر من جيبه ومده لبـيّـن/عاد حلفت يمين ماتوفيه كفارة شماغك اللي لفيت به يدي البارح ان اعصب راسي به على عينك وقت لقاك
بـيّـن مسك يد عساف اللي بها الشماغ/استغفر الله يارجال
عساف دف يده/والله ان يعتلي راسي طيب فعلك على عيون جماعتك والله/لف الشماغ على راسه بصعوبة من جرح يده/
طاهر ناظر عزيز/ياشيخ عزيز
عزيز بوجه احتقن باللون الاحمر من غبنته
سهم لمس طرف عزيز الملاصق له
عزيز ناظر طاهر/سم ياابو عياش
طاهر/حنا بني طاهر متكفلين بحوش وادي سراي ولايتكدر خاطر سحاب الديرة
سهم عض شفته السفلية بغبنة متاكد كل هالاي يصير من تحت راس طاهر
عزيز/خيرك سابق وواصل مامن حاجة
طاهر باصرار/والله وبالله وان ماحلفتني مايتحمله غيرنا وين نطلع من جمايل سحاب علينا
عزيز التزم الصمت بغبنة يحس بينفجر باي لحظة
طاهر وقف بابتسامة/عاد ياشيخ هالضيف ضيفنا اعذرنا ودنا نقوم بالواجب بمجلسنا بمجلس بني طاهر
عزيز ناظره بغيظ
طاهر التفت للمتواجدين بالمجلس/حياكم الله جميع على العشا تفضلوا حياكم الله/مشى/
............................................................
<<بيت سطام>>
نور بالمطبخ تجهز اكل لسطام
يقين وقفت جنبها تساعدها/اقولك لاحظتي؟
نور/أمي؟
يقين نضربت كتفها بكتف نور بخفة ناظرتها بابتسامة/اوووه نويّر
نور ابتسمت/تراك طالعة علي لاتغترين بس
يقين بتفكير/حتى سطام فيه شي مدري هو التعب ولا شي ثاني
نور/بسم الله عليه مافيه شي اكيد تعب يقين بالله تكفين لاتفاولين
يقين/طيب وامي
نور عينها عالاكل/ظنك يعني بعد فعولنا بتقول لنا شي/ناظرت يقين/تراك صرتي في نفس فئتي
يقين بسخرية/المهمشين
نور بضحكة خفيفة/الجاحدين بعد
يقين سحبت الصينية بابتسامة/اودي له اكله تلاقينه ميت جوع صابر ويكابر/مشت/
نور سندت ظهرها على دولاب المطبخ وراها فتحت جوالها بقلق تنتظر رسايله مثل ماوعدها يراسلها ويطمنها بالوضع تنهدت بضيق من ماحصلت اي رسالة منه قفلت جوالها واعتدلت بوقفتها بتمشي عبست بوجهها من اعتلى صوت اشعار رسالة فتحته بلهفة قطبت جبينها بشك من الرقم الغريب اللي يراسلها دخلت عليه وحملت الصورة بجهازها بفضول تراجعت بخطواتها لورا رامية الجوال من بين يديها وسط  صوت صرخة لاارادية اعتلى منها انحنت شبه جالسة مغمضة عيونها وسط رجفة احتوتها
يقين وقفت عندها بانفاسها السريعة/وش فيك وش صاير
نور فتحت عيونها تناظرها بوسط دموع هلت مبللة خدودها اشرت بيدها الراجفة عالجوال
يقين انحنت للجوال احتدت نظراتها عضت شفتها بقهر من فهمت تهديد عزيز بهاللحظة ناظرت رسالته(افتحي الباب لاتبطين علي)
❣️❣️❣️❣️
#شقّ_الغَمام