شـقّ الـغَـمـام

(٣٤)

(٣٤)
استغفر الله العظيم واتوب اليه..
سبحان الله ويحمده سبحان الله العظيم..
-
رؤيا صرخت بدموعها/محارب وعدني بالزواج ياظافر وعدني
ظافر شدها من شعرها يحركها بكل مافيه وبصراخه/باقي باقي تكذبين!!
رؤيا بصراخها/ارجع للكاميرا وتأكد
ظافر قطب جبينه ودفها بقهر
رؤيا ضرب راسها بالارض
ظافر/انطقي
رؤيا برجفة جسمها وصوتها من كثر ألمها/بتشوفني وانا ارجع له هديته
ظافر بغبنة/غبية انتي تصدقينه!!ذا يلعب عليك يبي سلامة زوجته ذا كل همه
رؤيا صرخت/هديته بعشر الاف وش يلعب علي به هاه وش/فزت واقفة وجرت للغرفة/
ظافر جرى وراها
رؤيا سحبت جوالها وفتحت عالايصال بصراخ/شوف كان بيعطيني اياها كاش شوف
ظافر سحب الجوال احتدت ملامحه من قرأ الايصال باسم محارب
ولاء/ويوم رفضته شرا الهدية ووصلها لي بالجامعة شوف الكاميرا وبتشوفني وانا ارجع له هديته رح شوف
ظافر جرى لغرفته فتحها وجلس ورا الشاشة يرجع الوقت يهز برجله على أعصابه اتسعت عيونه من ناظر رؤيا تخرج من البيت وتنزل الشنطة عند باب شقة محارب وترجع بسرعة فز مثل المجنون يجري خارج من البيت
رؤيا ابتسمت رغم المها من سمعت صوت خطواته/نشوف وحدتك الحلوة كيف تصير الحين
............................................................
<<بيت بـيّـن>>
بـيّـن واقف قبال المراية المثبتة بالجدار يعصب غترته البيضا حول راسه يهمهم بلحن
يـقـيـن واقفة جنبه تتكحل غنت مع لحنه/يوم واحد والله اني مااخبره ذاقها عايشٍ مابين همٍ شديد/قطعت غناها بعبوس وجهها/استغفر الله يالله صباح خير وش ذا النكد
بـيّـن ضحك/الا احسن مااصبح به
يقين التفتت تناظره بعبوسها بانتظار جوابها
بـيّـن بضحكته/ماهو حالي حال اللي رايح يمهم
يقين/الشهر ذا ماقصرت الراتب وخليتهم يدبلونه والشعير وقطعته عن حلالهم وغديت تاجر على روسهم
بـيّـن يهز راسه باستمتاع وهي تعدد فعوله
يقين/وحتى الماء عزيز يرتب اموره  معك قبل يتروى صاروا يداحرونك مداحر ويخافون على خاطرك بعد
بـيّـن بابتسامة/وتراني باقي راعي/ضحك برضا/
يقين ميلت خصرها وضربت جسمها بجسم بـيّـن مبعدته
بـيّـن ابتعد والتفت لها بوسع عيونه/علامك!!
يقين تمرر المسكرة على رموشها/ترا اخوي الشيخ
بـيّـن عقد حواجبه/وبعدين؟
يـقـيـن بدون تناظره/لاتورط اخوي معك
بـيّـن/وسطام وش دخله بي!!
يقين/يشوشون الجن عليه بعد قليبي هو
بـيّـن ضيق عيونه/شكلك ماتعرفين الشيخ سطام
يـقـيـن التفتت كلها تناظره وتحرك قلم الحواجب بتهديد/المرة ذي ابعد عن المجلس وطلايبك اللي ماتخلص خلّه يتنفس توه عريس
بـيّـن ميل فمه بابتسامة/انتظرها تطلع من ورا الباب
يـقـيـن تكتفت بتفكير/الصحيح الجو صافي مااحسني مرتاحة
بـيّـن/خليه يصفى لنا شوي قد شبعنا سنين خيّم علينا الغمام
يـقـيـن تنهدت وناظرت المراية تحط روجها
بـيّـن/على وين؟
يقين/علمتك البارح نور عازمتني
بـيّـن عبس بوجهه/يقين تكفين فكينا
يقين التفتت له/بسم الله وش سويت؟
بـيّـن ناظرها بصمت
يقين/تخبرني مااغلط على احد!!
بـيّـن تنهد/اعجلي لاتبطين عليّ
يقين/خلاص جاهزة انا
بـيّـن مرر نظرها على لبسها اللي كان فستان مخمل باللون العودي بكتف واحد وكم طويل ومكشوف الكتف الثاني وكم مفصول يغطي يدها حتى كوعها/بتروحين كذا!!بهالصبح؟!!
يقين/الوضع محتاج زيادة اناقة/سحبت طرحتها المعلقة جنب المراية بمسمار وناظرت المراية تعدل شعرها وهي تلق طرحتها بابتسامة/حتى يصير زيادة تسكيت وخذ كعبي معك
بـيّـن بخوف من استخدام الكعب لاغراض ثانية/تعوذي من ابليس والبسي جزمتك البيضا
يـقـيـن ناظرته وفهمت تفكيره/والله مايمر الا على غلطان وعد
بـيّـن/حتى الغلطان لايمره يمره لسانك ويدك تسد!!
يقين/ابشر
بـيّـن تنهد/صاملة تلبسينه؟
يقين/كشختي مهمة
بـيّـن جر خطواته للدولاب ورفع يده لفوق المتواجد اعلاه كعبين باللون الاسود والذهبي وجزمة سبورت بيضا وشنطتين عودي و اسودا اخذ الكعب الذهبي
يقين تلبس نقابها/لا الاسود
بـيّـن ناظر طوله وتعوذ من ابليس بينه وبين نفسه التفت وناظرها وهي لابسة عبايتها ابتسم غنى بنشازه/يالله انك ترحم الحال ياخلاقها
يقين مشت له تتبختر تحت انظاره بغرور واضح ومقصود
بـيّـن/جادل ٍسبحان رب ٍ خلقها من عدم مع حلاوتها حلو خلقها واخلاقها
يـقـيـن وقفت قباله الفاصل بينهم خطوة رفعت راسها تناظره واشرت بيدها بمعنى كمّل
بـيّـن ضحك بخفة ورضا يحبها كلها وكل مافيها يحبها لااغترت واستلذت بغرورها وسايرها يحب ذيك النظرة بعيونها اللي تنطق(ادري كاملة زيد المدح تراني استاهل)وفعلا تستاهل من دخلت حياته واموره يوم عن يوم تزين وجه الخير لحياته ورجعت نبضه لقلبه وأنعشته تحمس بالغنا ورفع صوته/احسب إن القلب يسلم لكن ماسلم صابته واستبدلـ
يقين مدت اصبعها ولامست شفايفه تسكته بكره لباقي كلام الاغنية(استبدلت وصلها بفراقها)وبغرور/صح ان المدح قليل بحقي ومعذور
بـيّـن ارتفعت حواجبه بابتسامة
يقين/بس نشازك يجبرني اوقفك/مشت قبله وبأمر/يالله تراك اخرتني/خرجت من البيت والتفتت له/وبعدين امش خلصني
بـيّـن بذهول يناظرها وبيده كعبها اللي رفع فردته بتهديد/بنت
يقين بابتسامة غنت تستعطفه من حست بنفسها تمادت بحقه رفعت يديها وتمايلت بجسمها ترقص عالخفيف وهي تتراجع على ورا باتجاه بالسيارة/قلبي اللي مابعد ذاق للراحه طعم
بـيّـن  ضحك وعذرها مايقدر على خصمها وهي تتراجع اول ماتحس بغلطها قدامه جر خطواته لها يتمايل تحت انغام صوتها
يـقـيـن ابتسمت ومشت له/يوم واحد والله اني ماخبره ذاقها
بـيّـن رقص جنبها متجهين للسيارة/عاشت يقيني
يقين/عايش مابين هم ٍ شديد وبين الم يالله انك ترحم الحال ياخلاقها ياويلهم ويلاه
بـيّـن مسك يدها وجرى للسيارة بضحكته/اركضي تاخرت صدق
............................................................
<<بيت شاهر>>
سهم بيده مبلغ مالي يعده غير الحزم اللي قباله عالطاولة مرتسمة على وجهه اعرض ابتسامة
شاهر جالس قباله ورجل فوق رجل يسحب نفس من سيجارته باعلى روقانه ثم نفث دخانه/هاه بشر طار خوفك
سهم اختفت ابتسامته وضرب بالفلوس عالطاولة قباله وبملامح محتدة/الخوف لك ولامثالك
شاهر احتدت ملامحه
سهم بحدة/انا طردت الخوف من يوم حطيت يدي بيد سحاب وبعت كل ماعندي ومشيت بهالطريق عكس اللي طاح فيه بدون شوره
ديوان الجالس بدفتره يحسب البضاعة المباعة والمبالغ الموجودة ويقارنها بالاسبوع الماضي/هدوء شباب هدوء تدرون الشيطان شاطر واي غلطة بتصير نهايتنا
سهم تكتف وصد عن شاهر يتفادى يناظره لاينفجر فيه
شاهر ناظر ديوان/هيه يااعقلنا
ديوان/خير
شاهر/لو اني مو معكم من بيصرفها بهاللون؟
سهم ناظر ديوان/الشاطرين واجد ماوقفت على احد
شاهر/بس الخبرة مهمة ولّا
ديوان ضرب دفتره بالأرض بنرفزة ناظر شاهر/اسمع انت/ناظر سهم/وانت تجالدوا ذالحين وتصافوا لان الجاي صعب وبالحيل
سهم قطب جبينه
شاهر ناظره باستغراب
ديوان/العين صارت علينا كان ماتدرون
سهم/ليه ان شاء الله!!
ديوان رفع دفتره/زيادة الخير عندنا معناه مصيبة عند غيرنا
سهم اتسعت عيونه
شاهر بربكة/ياولد بعيدة خل عنك بس
ديوان بجدية/سحاب وابو مظفر اكيد دروا ان به تجار غيرهم ذالحين
............................................................
<<شقة محارب>>
محارب مستند على مدخل المطبخ بظهره ومتكتف يناظرها/وشو له تطبخين اليوم عرس نتغدا ونتعشى برا
ولاء تحمس البصل وسط انهمار دموعها/لا بهالمناسبة يبي لها غدوة تبرد القلب
محارب/غدا بطعم الدموع
ولاء تسحب هوا/قلت لك البصل دخل بعيوني
محارب ابتسم/طيب اعطيني كوب باسوي لي شاهي
ولاء التفتت تناظره بوجهها الباكي/وليه ماتاخذ بنفسك!!
محارب/ابي الكوب الجديد من الدرج اللي عندك اليوم مل شي جديد احتفال بالبداية الجديدة
ولاء رضت بعد كلامه وانحنت تفتح الدرج اللي تحت الفرن مباشرة اتسعت عيونها من ناظرت كرتون بعلامة ديور انحنت شبه جالسة وخرجت الكرتون المعفوس اللي واضح عانى صاحبه حتى دخله بالدرج خرجته وفتحت الكرتون اتسعت عيونها من ناظرت الشنطة السودا اللي كانت تبيها وخايفة تشتريها وتعصب عليها جدتها اللي بيعلمها رازي اكيد تربعت  غطت وجهها بكفوفها تبكي
محارب ابتسم من ردة فعلها واسرع بخطواته وقفل النار من تصاعد دخان احتراق البصل/علامك تصيحين ذالحين؟باقي من البصل
ولاء مسحت دموعها بكفوفها تحاول تهدي نفسها/لا من الثوم مااحبه
محارب مد يديه واحتضن وجهها ومسح دموعها باطراف اصابعه عبس بوجهه/ياشينك وانتي تصيحين
ولاء/خلني اصيح اليوم طلعت انا الصادقة وهي الكذابة
محارب/سويدة وجه ماعليها ملامة
ولاء/واخوها
محارب/الـ**
ولاء بدموعها/هو اللي وقع عدم تعرض ماهو بانا
محارب قبّل جبينها/رايتك من اول بيضا صاحبة القلب الطاهر يعقبون يدنسونه بسواد فعولهم
ولاء احتضنته/مشكور يامحارب مشكور
محارب ابتسم ومسح على ظهرها/وش هالكلام/وبتقليد لندا جدتها/ياولى
ولاء تركته بغيظ/ليه طيب
محارب ناظرها بابتسامة/لاني احب كل شي فيك الا الدموع مااحب اشوفها
ولاء اخذت نفس ورفعت يديها تهف على عيونها/خلاص مابها دموع/اخذت الشنطة ورفعتها لفوق تناظرها بابتسامة/هلا حبيبة قلبي حياك الله بين احضاني/ضمتها بفرحة/
محارب/هاه ياولى هدا الخاطر
ولاء ناظرته بغيظها/يهدا صدق اذا نقلنا من هالشقة محارب
محارب اختفت ابتسامته وبحدة/والله مااطلع ان يصبح ويمسي بوجهي هو اللي يطلع ماهو انا
ولاء مدت كفه لكفها/تكفى محارب خلنا ننقل من هالمكان
محارب/والله مااخليه يتهنى بحياته اخليه كل ماشافني يحتويه الخزى من شين فعوله هالخسيس
ولاء/والله مافرقت معه خلنا ننقل ونفتك من شره
محارب مسك شاربه بطرف يمينه/ماهو بعلى رجال كان تركت هالشقة وكبيته!!
ولاء فز قلبها من سمعت الضرب عالباب وصراخه
محارب احتدت نظرته من عرف صوته وفز واقف
ولاء وقفت معه ومسكت يده بكل مافيها وبرعب/لاتطلع له محارب تكفى
محارب سحب يده منها بقوة/وخياب كان تهجم علينا وانا مندس عندك/جرى للباب/
ولاء جرت للغرفة وسحبت جوالها اتصلت عالشرطة بدموعها/تكفون الحقوهم تكفون
...........................................................
.
عزيز بوجه اكتسى السواد واتخذ السواد وجهه مقر بالفترة الاخيرة وقف عند البركة ونزل وركب اللي بالبركة جلس عند الرايت يناظره يتأمل حاله ونهايته الذليلة بهالديرة الاي تنازلوا عنه بعد واسطة جدته وماكان الحكم هين بدل الشهرين صارت ست شهور واللي حكم هالحكم الجاير بعينه من كان من لحمه ودمه ولد عمه اللي غرته الشيخة ورضى باهانة ولد عمه بهالطريقة طاح نظره على يديه اللي اتضح عليها الخشونة بعد شهر فقط من معاناته الظالمة احتدت نظرته واتجه لداخل الوايت وسحب الفاس من ورا المقعدة واتجه للبركة يضربها بكل مافيه بغبنة وسط صدى صرخاته اللي ترددت بالمكان الخالي حوله/سـطـاااااام سـطـاااااام
...........................................................
<<بيت عسّاف>>
محمد متربع قبال الشبة يجهز الدلة
بـيّـن يناظره بابتسامة/خلاص صرت بدوي رسمي يامحمد
محمد ناظره بعقدة حواجبه/كم مرة علمتك ساطي ساطي ماني بمحمد
بـيّـن تلتفت حوله/مابه غيرنا!!
محمد فز ومسك بـيّـن من يده وثبته عالارض وجلس فوقه بتهديد/حتى الجدران تسمع
بـيّـن/ساطي ساطي فهمت فهمت
محمد تركه
بـيّـن جلس يحرك كتفه بوجع وبسخرية/وين عمك ياساطي
محمد ناظره بغيظ/بيجي وينفضك معه لاتستعجل على رزقك
بـيّـن بلع ريقه بتوتر من ردة فعله وهو كسر كلامه وتواصل مع الموزع من وراه لكن انكشف/خير خير ان شاء الله
محمد ابتسم وبسخرية ردد بلهجة بـيّـن/اي والله يامقسوم خير
بـيّـن تغاضى عن هالتقليد وكتم ضحكته من ناظر الداخل
عسّاف دخل للبيت وعلى كتفه كيس شعير وثوبه المصفر من كثر الشغل رمى الكيس بنرفزة بزاوية الحوش بملامحه المغتاظة
بـيّـن بضحكة/هلا ياهلا بالراعي الصحيح
عسّاف ناظره بغيظ
بـيّـن صد عنه بضحكة
عسّاف بغيظه/تضحك!!تضحك بوجهي؟
بـيّـن زم شفايفه وقف وجلس جنب محمد سحب الدلة من يده/عنك عنك
عسّاف/وش قايل لك انا/صرخ/الموزع ماتقربه بدون اذن!!
محمد/صوتك مقدم!!
بـيّـن ناظره بلوم/هاه ذالحين انت فضحتنا
عسّاف تقدم له بغبنة
بـيّـن فز واقف وتراجع لورا
عسّاف بعصبية/من خبالك مايكفيك فعلك قبل ناوي تعيد بنا من جديد!!
بـيّـن/توبة توبة يشهد الله توبة
عسّاف/احمد ربك وافق وقبل ولا كان ماهو بس اطردك من العملية انفيك من الوجود
بـيّـن/سم طال عمرك
عسّاف التفت للباب وصرخ/وانت وش فيك مادخلت تنتظر عزيمة!!
رازي دخل/السلام عليكم
بـيّـن احتدت نظرته/انا مالي شغل مع هالادمي
عسّاف/انثبر واسمعني
بـيّـن بغضب/عساف!!
عساف بحدة/مقدم عساف!!وكلامي يمشي عالكل بهالعملية وماراح يضيع تعب شهور وسنين عشان خاطر كم واحد انت ملزوم بها وغصبا عليك
بـيّـن شد على يده الراجفة وصد بوجهه عن رازي
رازي ناظر بـيّـن بشي من الندم شد على قبضته بعزم يصلح الامور بينهم هالمرك
عسّاف دخل يده بجيبه وخرج مفتاح ورماه لرازي
رازي مسكه بين يديه
عساف/اللي يستلم البضاعة رازي/ناظر بـيّـن/وانت معه
رازي ارتسمت ابتسامة على وجهه
بـيّـن بغبنة/مير
عساف قاطعه/ومرّ عسى تخلص هالعملية وانا بخير من سواياك اذلف بدون كلمة تقعد بالسيارة واللي يستلمها رازي وحاول ماتكون واضح مفهوم؟
بـيّـن جر خطواته السريعة
عساف رفع صوته/مفهوم؟
بـيّـن بغضبه/ابو المفهومية فهمت/مر من جنب رازي بدون يناظره/
رازي مشى وراه بخطوات سريعة/نروح بسيارتي
بـيّـن خرج من بيت عساف مارد عليه
رازي/اصبر احترني
بـيّـن ركب سيارته
رازي ركب بسيارة بين بسرعة وبين انفاسه/ترضى أخليك لحالك
بـيّـن بملامحه الغاضبة بدون يناظره/لاصار البشر مثل نوعيتك ايه ارضى 
...........................................................
<<بيت سرور>>
مبروكة جالسة قبالها تتقهوى بهدوء
سرور/عسى ماشر ياام زايد لايكون بك بلا
مبروكة نزلت فنجالها بابتسامة/عوذا ماعاد به خويات كلهن راحن مابقى غير وحدة بالديرة قلت اتعوذ من ابليس ويعود الوصل بيننا
سرور ضحكت/ياشين الواحد لاتخلوا عنه وعرف انه وحيد من تالي
مبروكة احتفظت بملامحها الهادية ارتشفت من فنجالها ونزلته وبشوفة نفس/يازين الواحد لاعرف مقامه وانثبر وهو يدري وش صيته بين العربان
،
،
~قبل سـنـيـن~
سارة متمددة على فراشها بتعب
سرور جلست عندها بضيق وسحبت منيرة بحضنها/سارة
سارة ناظرتها بابتسامة شاحبة/حيك ياسرور المعذرة وانا خيتك
سرور/كبي عنك هالهرج/مدت يدها للقربة جنبها المحتوية على الشي اليسير من اللبن وصبت منها ومدته لها/قومي شدي عودك قومي
سارة بتعبها/لا ماابيه اليوم يتعب بطني اللبن اغسلي مواعين مبروكة ورديهن يمها هي والصميل
سرور/ابشري ابشري/وقفت واتجهت لزاوية البيت تكب اللبن بدلو يوضع فيه بقايا الاكل اتسعت عيونها من لاحظت اللون الازرق بنهاية اللبن رجف قلبها من استعادة الاحداث العشبة وتعب سارة السريع بهالطريقة واللبن اللي توصله بنفسها طول هالفترة شحب وجهها من فهمت نية هالخبيثة المتوشحة الطيبة تحت انظار الجميع وقفت وبيدها الصميل واسرعت بخطواتها خارجة من بيت الشيخ ابو طاهر متجهة لها بغضب من استغفالها ورعب من نهاية اللي يصير معهم
..
<<بيت مشرف>>
مبروكة تجر خطواتها بهدوء للباب/طيب طيب/فتحت الباب وباستغراب/علامك شايشة
سرور دفتها ودخلت للبيت التفتت تناظرها مدت لها الصميل بوسط انفاسها السريعة وبغبنة/هاك اشربي
مبروكة قطبت جبينها/وش اشرب!!
سرور صرخت/اشربي اللبن اللي ترسليني به كل يوم هاك اشربيه
مبروكة دفت يدها/شبعانة الحمدلله مامن وزم
سرور/مامن وزم!!ولا نويتي عالمسكينة من حرّ غلا الرجال بقلبك ياللي ماتستحين
مبروكة احتدت نظرتها/وشو!!
سرور بصراخ/فعول يديك لاتركبينها غيرك ياسويدة الوجه الله ينتقم منك يوم انك ضريتي المسكينة
مبروكة ضربتها كف/احشمي عمرك واعرفي من تكلمين!!
سرور مدت يدها وشدت شعرها/والله ان اذبحك ويومك قبل يومها يالخسيسة
مبروكة دفتها بكل مافيها بصراخ/سرور افتحي عقلك المذوي واسمعيني
سرور ناظرتها بغيظها/وش اسمع من هالخبث هاه وش
مبروكة/يزين حالكم وتغتنون بدل المجاعة اللي متكوفنتكم
سرور/وتف عليك الا تف اموت جوع ولا امشي وراك ياوجه ابليس وتف عليك ياالي ماتخافين الله مير يشهد الله اني لااعلم الديرة كل ابوها بسواتك وانا بنت ابوي هين/مشت وانحنت للصميل اخذته معها/
مبروكة بتهديد/سرور والله اني لااقلب دنياكم فوق قلبتها قلايب كان نطقتي حرف
سرور التفتت تناظرها بتحدي/وش بتسوين اقصاها تكذبين
مبروكة بتهديد/والله ان اقطع الحياة كل ابوها عن بيتك وتمنون الموت ولاتعينونه والله
سرور دخل قلبها الخوف تعرف مبروكة زين وتعرف مقدار قوتها وتلاعبها بالكلام شدت عالصميل بيدها/تعقبين وتخسين ياوجه ابليس/مشت بخطوات سريعة متجهة لبيتها بانتظار زوجها حتى تفاتحه بالموضوع وتستشيره/
..
الـلـيـل
..
<<مجلس الشيخ>>
//مجموعة رجال من الديرة يسحبون عليان(زوج سرور)بين يديهم ورموه بمنتصف المجلس//
عليان ارتمى عالارض بثوبه المشقوق وبوجهه المخطوف والمغطى بالكدمات يتلفت حوله بضياع
الشيخ ابو طاهر/عسى ماشر
احد الرجال رمى قطعة قماش مربوطة عند الشيخ بداخلها اغراض ثمنية/ياشيخ هذا هو السروق قضبناه عقب سنين
عليان شحب وجهه/لا والله ماهو بانا مالي شغل والله ماهو بانا
مفلح بغبنة/اسكت يالسروق وعيباه من بني سمّار وتعمل هاللون/بصق عليه/اطلب ومانقصر ياسويد الوجه تف عليك تف
ابو طاهر ناظر الرجال بحدة/خلصتوا؟/ناظر عليان/قل وش وراك
عليان بلعثمة/معود يم البيت عينت لي رجل يصيح يستفزع ابوه مريض يبي يشيله يم المداوي وفزعت معه قلطني ببيت مفلح ظنيته ضيف عندهم واعطاني هالبقشة مادريت انها بتغدي بهاللون والله مالي شغل والله
مفلح/اقطع واخس يالسروق قال من يشهد لك ياابا الحصين قال ذنبي اقطع واخس
ابو طاهر بحدة/بس/ناظر عليان/به احد يشهد لك؟
عليان سكت للحظة باستذكار وسط رجفته ناظر حمود صاحب الثمان سنوات ولد مفلح/ايه حمود حمود شاف الرجل وهو يقلطني
مفلح اخفى ربكته/مابقى الا الورعان يشهدون لك استح على وجهك
ابو طاهر/مفلح اطلع برا
مفلح اتسعت عيونه/ياشيخ
ابو طاهر/برا يامفلح لامني ازهمك برا
مفلح خرج بخطواته الغاضبة
ابو طاهر/ولد ياحمود
حمود بلع ريقه بخوف/سم ياشيخ
ابو طاهر/انت شفت عليان
حمود/اي بالله
ابو طاهر/وثم
حمود/متلثم ويفتش بالغرضان
عليان بردت عظامه من ثبات التهمة الباطلة بحقه
مشرف ابتسم/ياشيخ الحق يقال يقطع السروق من البيع والشرا
ابو طاهر/معصي مالك كلمة
مشرف احتدت نظرته
ابو طاهر/ياعرب من يشهد لعليان ويرفع الظليمة كان مظلوم
//محد رد//
ابو طاهر/ياعرب من يشهد لعليان ويرفع الظليمة كان مظلوم وهو بوجهي من الردى
//محد رد//
عليان امتلى حزن وقهر من الظلم/والله ماسويتها يشهد الله ماسويتها
مشرف/ياشيخ ظهر الحق وثم وشلون نستامنه وهو سروق!!
ابو طاهر بحدة/رزقته محد له منه عليه كل صاحب حق ياخذ حقه وهو يحلف يمين مايكررها دامها الاولة وباذن الله الاخيرة وماتكرر
..
//رغم حكم ابو طاهر العادل الا ان بني سمار عاملوه بحكم مشرف وقطعوا كل اتصال بهم بعليان وانقطعت الحياة عن بيت سرور مثل ماوعدتها مبروكة//
،
،
سرور بابتسامتها/مير الظلم مرده ينكشف لو عقب السنين هذا هو بدا عقب البطى بطريف
مبروكة/الا ابتلاء من ربي وبنصبر وبنجازى خير عليه
سرور تنهدت/عجيب حنا نشوفه عقوبة من سواياهم وهم يشوفونه ابتلى!!
مبروكة/كلن يشوف روحه مظلوم وهو راعي الظلايم
سرور/وش جابك عقب هالسنين يامبروكة انا اخبر وانتي خابرة سالفة الخويات كذبة ياكبرها
مبروكة/ماغلطت يوم عديتك خوية مير حسبي على الظروف صالت بيني وبينك
سرور/لا عز الله الظروف برية من فعول يديك يامبروكة
مبروكة احتدت نظرتها
سرور/مير عجلي علي وش تبين وراي ضحيوية مع خوياتي
مبروكة اخذت نفس تكبح غيظها/لفيت ابي بنيتكم لوليدي
سرور باستغراب/من بنيته؟!!
مبروكة/بنيتكم اعتدال لوليدي عزيز
سرور ضحكت باعلى صوتها وبشماتة/تاخذين بنيتي لصبي الماء!!
مبروكة بغضب/احشمي لسانك ياسرور صبي الماء نسل الشيوخ اللي مايطولونه نسل السروق!!
سرور/وعلامه نسل الشيخ يقرب من السروقين الا كانه خابر ان هالسرقة كل ابوها ظليمة
مبروكة احتدت ملامحها بصمت
سرور بابتسامة/حنا مانناسب نسل وجه ابليس ابد
مبروكة/وشو
سرور/علمي الصبي لايطمع ويرفع راسه فوقه علميه يعرف مقامه/وقفت/وتراني ماني بفاضية ابد تخبرين الباب/مشت وتركتها/
مبروكة شدت على عكازها بغضب ولفت خارجة من البيت
...........................................................
<<بيت طاهر>>
غصنة جالسة قبال جدتها تقهويها
حمدة تتقهوى/بنت من لفى يومني اصلي الضحى
غصنة بربكة/هاه
حمدة ناظرتها بشك/مَن علميني ولاتكذبين
وداد خرجت من بيتها ببطنها البارز بقميص شفاف كاشف عن اكتافها ولتحت ركبتها بين يديها سلة الملابس
حمدة طارت عيونها/وعمى الا يامال العمى ياللي ماتستحين!!
وداد/لعدويني واللي يكرهوني ان شاء الله
حمدة بغبنة/استحي على وجهك البيت به رجال
وداد/مااقدر اتحمل الحر تخبرين الحمل وسوالفه
حمدة/عساك تنشوين بنار جهنم حتى تخبرين وشلون الحرارة ياقليلة الحياء
#شقّ_الغَمام