شـقّ الـغَـمـام

..(٢٨)..

..(٢٨)..
-
لااله الا الله-اللهم صل وسلم على نبينا محمد
-
بارت على غير موعده قراءة ممتعة وتفاعل لطفًا❤️❤️
............................................................
<<مجلس الديرة>>
سهم جالس متوسط صدر المجلس بكل ثقة/حي الله قومي حي الله بني سمّار ياحيهم
ابو عايد/الله يسلمك ياسهم مير دام الشيخ ماهو بفيه ناد يمّنا سحاب مثل ماعلمناك
سحاب ورا الباب باستغراب من طلبهم بمقابلتها دون علم عزيز/ياهلا ومرحبا ببني سمّار حي عزي وذكري وسط العرب ياحيهم
ابو عايد/الله يسلمك ياسحاب
سحاب/علمني سهم البارح تبون بعلم خاص دون علم الشيخ امروني وابشروا به كان اقدر عليه ابشروا وانا سحاب ابشووا ياقومي
ابو عايد شد على قبضته وباستجماع لشجاعته/ياسحاب القوم كل ابوهم مايبون عزيز شيخٍ علينا،بني سمّار مايبون هالشيخ شيخٍ عليهم
سهم ناظرهم بذهول وسط طيف ابتسامة ارتسم بدون شعور واحتل ملامحه رغم محاولاته يكبح هالابتسامة تراقص قلبه من زود الفرح باللي يسمعه
سحاب احتدت نظرتها بكره للي تسمعه
ابو عايد/ماهو قصورٍ بك وبرايك ياسحاب مير عقب اللي صار امس واجب نرتب الامور من جد وجديد
سهم بحدة مصطنعة/وش هالكلام ياابو عايد الله يهديك!!
سحاب/سهم كبّ ابو عايد يقول ماعنده مانطق من راسه كل ابوهم معه وابو عايد مسموعٍ له من ابو زايد الله يرحمه وشلون لاصار يتكلم عن بني سمّار جميع!!كمّل ياابو عايد كمّل نسمعك
ابو عايد/اللي صار امس كبير بالحيل ياسحاب لازم نسبق بني طاهر قبل يتعنون يمّنا ويطلبون الحقّ والصحيح الحق كل ابوه معهم من متى الشيخ يتعرض لاهل ديرته وليته متعرض واحدٍ يسوى تالي القوم راعي على الحلال
سهم بدفاع عن عزيز/مير ماهو بأي راعي كانك نسيت ياابو عايد
ابو عايد/هي لو انها ظلت على الراعي وسلقه هين مير انها طالت حلالنا و/سكت/
سحاب/ووش ياابو عايد
ابو عايد/وسواد وجه بني سمّار جميع ومايترقع ابد متعرض لعرض الرجل وش هالفعول اللي ماترضي الله قبل خلقه اخيه صحيح اخيه
سهم بحدة/علامك صدقت الراعي وانت خابر اللي بيننا وبين بني طاهر!!
ابو عايد/قهر الرجل مايكذب كلنا جميع شفنا القهر بعيونه قبل ينطق به لسانه وثم كانه سلم من بني طاهر هالمرة زينٍ على زين
سهم بحدة/ياابو عايد شورك بالشيخة رضينا نسمعه مير تهايمك يم عزيز ولد الشيخ زايد كانك نسيت مارضينا ابد!!
ابو عايد طنش سهم وركز نظره عالباب الكتواجدة خلفه سحاب/ياام زايد يشهد الله لفيت ناصح مالفيت ناطح مايصيب قومي يصيبني وشلون ارضى المهانة لهم
سحاب/محشوم ياابو عايد محشوم رايتك بيضا ماعرفنا ولا شفنا منك الا كل خير
ابو عايد/سلمتي ياام زايد سلمتي
سحاب/ابشروا يابني سمار رايكم عالراس من فوق ابشروا مايصير الا مايسر خاطركم ابشروا
ابو عايد/اعذريني ياام زايد على كثر هروجي اليوم مير الشيخة توسمّناها بواحدٍ ثاني من مبطي
سهم ميل فمه بطرف ابتسامة
سحاب قطبت جبينها بكره لهالاوامر اللي تنصب فوق راسها اليوم بكثافة وثقل/اسلم ياابو عايد من هو اللي توسمون به الشيخة؟
............................................................
<<بيت طاهر>>
غالية جالسة بكامل حشمتها عبايتها ونقابها بطرف الصالة وبينها وبينهم مسافة بعيدة
عايض جالس عن يمينه حمدة ويساره اخواته ناظر غالية صحيح فز قلبه من الشوق لها ولزولها وكلها لكن من ناظر طريقة حجابها وصمتها المطبق احتواه غيظ عرف هالسالفة مابتمر مرور هيّن هي ماجابته هينا ودخلته الا و وراه شي كبير وبالحيل التفت يناظر حمدة بابتسامة/وينه عمي طاهر ياعمة
حمدة نزلت فنجالها/عنده مشوار وثم مااسد انا!!
عايض اللي ماكان على وفاق مع حمدة ابد بالاصح هي كانت تتجنب مقابلته بعد مامنع عياله عنهم بعد سالفة خلف وزينة بطريقة غير مباشرة/محشومة ياعمة محشومة
حمدة دفت الصينية بطرف عكازها مرر نظرها عليهم/تقهووا ياعيال ضيف الله عيب تقهويكم عجيزكم
غالية ميلت فمها بابتسامة رضا
سعاد عضت طرف شفتها بغيظ
سالمة مدت يدها بقهر للفناجيل لولا امهم وتدخلها بهالطريقة ماعشوا هالموقف المهين لهم رفعت الفناجيل تصب لهم قهوة
عايض/اسلمي ياعمة اهل بيت لاتتعبين روحك
حمدة بنفسها/امحق من اهل وهاذي سواياكم باهلكم!!
عايض ناظر غالية/علامك ياغالية ماودك تقربين انتي حتى السلام ماسلمتي علي
غالية ناظرته/السلام للمسلمين
عايض/افا وحنا وش!!
غالية ناظرتهم/المسلم اللي يسلم المسلمين من لسانه ويده وانت وخواتك ماقصرتوا بي
عايض كتم غيظه/لحظة غضب والشيطان ماقصر بيننا لا انتي ولا انا
غالية/الغضب توسط صدري سنين مااشوف مرتني هاللحظة اللي تقول عنها وانت مرتك هاللحظة وقواك الشيطان!!ياسبحان الله!!
عايض/ماقواني الا عقب قولك ياغالية
غالية/مير مااخطيت وانت تدري بالخطأ وبداياته مير حيلتك علي ياعايض هذا انت من اخذتك تكبر راسي وتكسره يومك تسمع لغيري وليته صحيح وامك تشهد
سعاد احتدت نظرتها
عايض/عقلي براسي ياغالية محد يمشيني برايه
غالية/هذا هن خواتك جنبك علمني من طلعت من بيتك نشدتهن عن ذاك اليوم من المخطي بعد سواتك
عايض شد على قبضته وسكت
غالية ضحكت بخفة بغبنة/ماكلفت عمرك تنشد وجاي يمي تبي تردني يمك!!
عايض التفت لسعاد وبنرفزة/انطقي ياسعاد
سعاد سكتت
غالية/وش تبيها تقول!!امنعتني عن زواج عيال اخوي طناخة باسمك من راسها ذا اللي تبي تسمعه منها؟
عايض اتسعت عيونه
غالية/ولّا تبيها تقول انها غلطت على اهلي ويوم رديت تفرعنت انت على راسي وصدقت منطوقها
عايض ناظر سعاد وبحدة/صحيح؟
سعاد رغم انها اخطت لكن خطأ غالية بذاك اليوم تستاهل ردة فعل عايض ضدها بنظرها وبنرفزة/ايه صحيح تقول عنا نشحد واسكت لها!!
غالية زفرت بسخرية
حمدة رفعت صوتها/تحاسبوا ببيتكم ياعيال ضيف الله انتم جايين تدورون الصلح
غالية/اسمع ياعايض كان تبيني صدق أعود يم البيت الباب اللي بين بيتي وبيت امك تسدّه
عايض بوسع عيونه/وشو!!
غالية/عمتي على عيني وراسي احبها واغليها مير هالباب جر وراه حزن وقهر سنين وسدّه امر واجب كان ودك ترجع الحياة بيننا
عايض زفر/وغيره
غالية/ودامك سديت هالباب لازم تفتح باب لبيتي سنين باب امك هو باب بيتي بأي حق ذا الكلام يصير!!
عايض عض شفته السفلية بقهر/وثم
غالية/المفتاح باب بيتي يعني مايطب بد احد بدون شوري
عايض ناظره بصمت من احتوى صدره غيظ من كثر اوامرها
غالية/ورضاوة ارتاح ماودي ابد
عايض قطب جبينه باستغراب
غالية/ماودي غير بعشاء تلم به كل اهل الديرة وترز الراية عالبيت وتهز الارض من كثر اللجة والصجة
عايض ميل فمه بابتسامة سخرية وبنفسه/ذا عن الرضاوة كلها/تنهد/كل ذا مقدورٍ عليه ابشري ياام خالد تم كل ماتبينه  تم
غالية/واخر شي وهو اهم شي كان ماسويته الله يستر علي وعليك
عايض احتدت نظرته/عساه خير
غالية/خواتك
عايض ناظرها باستغراب/علامهن!!
//سالمة وسعاد ناظروها بشك//
غالية/مانتقابل انا واياهم ابد
عايض اتسعت عيونه/وش هالكلام!!
غالية/تبي تقابلهم بكيفك مارديتك لا انت ولا عيالك عنهن مير انا ماتغصبني عليهن ابد لا بفرح ولا بحزن ولا حتى مرض
عايض ناظرها برفعة حاجب
غالية/هذا كل اللي عندي
عايض/ماودك تعرفين ماعندي
غالية/لا
حمدة كتمت ضحكتها
عايض احتدت نظرته
غالية/ماخبرت المخطي يتشرط ذي جديدة!!
عايض/امي ما
غالية قاطعته/هي امك وماني بملزومة بها لا بشرع ولا بعرف
عايض احتدت نظرته وبرفعة صوته/وشو!!
حمدة ضربت الصينية بعكازها بكل قوتها مكسرة الفناحيل بالصينية من سمعت صوته ارتفع على بنتها
عايض التفت يناظرها بحدة
//سالمة وسعاد يناظرونها بوسع عيونهم//
حمدة/ادوشتني(ازعجتني)هالجرادة ترن باذني الله يخسّها
غالية رفعت صوتها/مير ماني بقليلة اصل قمت بعمتي من تزوجت بدون طلب منك مايحق لك تطلبني ذالحين وانا راعية الواجب والسنع من اول وتالي محد يعلمني وش اسوي ووش اخلي
عايض عض شفته ماتركت له منفذ عليها
غالية وقفت/هاذي شروطي كان قمت بها عود يمي وقتها ان شاء الله يصير خير/دخلت لغرفة النوم
حمدة تتقهوى بدون تناظر عايض/الصحيح وانا عمتك ماطلبت صعيب ظنيت تطلب بيت لحالها
عايض انخطف وجهه
حمدة/يوك على بنيتي ماتعرف تاخذ حقها/ناظرت عايض بحدة/ليتها مشاورتني بس
عايض بلع ريقه
حمدة نزلت فنجالها/ووه ياوجع راسي مارقدت البارح زين/تمددت/لاقضيتوا من قهوتكم تخبرون دربكم
//عايض واخواته التفتوا ببعض بصدمة من فعلها//
حمدة غطت وجهها بطرحتها/اهل بيت اهل بيت تراكم
عايض وقف وخرج ووراه اخواته
حمدة جلست بملامح احتدت/قطع لذا الوجه يرفع صوته عليها قدامي وجعاه حلالاه من مطرقك اي والله بنت غالية ووجع
غالية وقفت عندها/سمي يمه 
حمدة بعصبية/عساه يصبح ويمسي بذا اللون
غالية سكتت
حمدة ارتفع صوتها/بنت
غالية/الصحيح لا يمه مير لا صار معهن ايه
حمدة بقهر/وراه ماعلمتيني ياسويدة الوجه ابرد قليبك وقليبي بهن قبل القطعة
غالية/عاد خلاص يمه يكفي جت كذيا
حمدة تمددت بغبنة مغطية وجهها بطرحتها/طسي عن وجهي مابك خير طسي عني
غالية/يمه
حمدة/طسي عني ياغالية طسي
............................................................
.
بـيّـن يجر خطواته بهدوء متجه لبوابة المستشفى بعد ماكتبوا له خروج
يقين شايلة بين يديها كيس فيه ملابسه واثباتاته تمشي ملاصقة له وقفت من ناظرتها
بـيّـن ناظرها واقفة على باب المستشفى تروح وتجي تقاوم رغبتها بالدخول جرى بخطواته رافع صوته/يمه
منيرة فز قلبها من سمعت صوته التفتت له وجرت له
بـيّـن فتح يديه واستقبل هالحضن الدافي الحنون اللي انحرم منه سنين مجبر
منيرة احتضنته بكل مافيها وسط دموعها/خاف الله يالشين خافه علامك على روحك وعليّ علامك
بـيّـن ابتسم من عتابها/هذاني يمه طيب الحمدلله
منيرة ضمته لها اكثر/وين طيب وانت من البارح في ذا مااقول الا حسيبهم الله حسبي اللع ونعم الوكيل
بـيّـن/ياأميمتي دموعك غالية لاتنزل على كل من هب ودب
منيرة/اعقب ماانت من كل من هب ودب ياولد
بـيّـن ابتسم/ابشري ياام ظاهر اعقب
منيرة تركته التفتت تناظر يقين الواقفة عندهم تقدمت لها
يقين تقدمت حتى تسلم عليها
منيرة ضمتها لحضنها بامتنان
يقين اتسعت عيونها بذهول من فعلها
منيرة/مايوفيك كثر الكلام حقك يابنتي مايوفيك والله
يقين بابتسامة/مايبي له كثر كلام ياعمة حق و واجب كان ماقمت بزوجي من يقوم به
بـيّـن ابتسم وابتعد عنهم يتركهم ياخذون راحتهم
منيرة/تركتها وشدت على يديها/عسى الله يرضى عليك مثل ماارضيتي قلبي وريحتيني يايقين
يقين شدت على يدها وباحراج/عمة تكفين ماله داعي
منيرة/يقين
يـقـيـن/سمي
منيرة/لاتزعلين علينا من زعلك على عمتي
يقين بابتسامة/وانتي ياعمة وش لك بفعول غيرك
منيرة ناظرتها براحة
يقين بمواساة لمنيرة/ياعمة ماتحملت كثر ماتحملتي
منيرة اجتاحتها غصة من كلامها
يقين/من دخلت بيته دريت وش بيلحقني وانا راضية ياعمة لايجي بخاطرك شك انا معه ياعمة لاتخافين عليه
منيرة ضمتها بكل مافيها
يقين ابتسمت
منيرة/عسى الله يقر عيونك باللي تمنينه قولي امين
يقين بابتسامة/امين امين
نواف تقدم لبـيـن سلم عليه/الحمدلله عالسلامة يابـيّـن
بـيّـن بابتسامة/الله يسلمك
نواف/مادرينا الا تو يوم وقفنا
بـيّـن ضحك بخفة/ماوصلك عمر اجل
نواف بحدة/وهو يقدر يطلع بوجهي عقب سواتهم محد نطق حرف ابد ولاطلع خبر الحادث ابد مادرينا غير من جدي اللي درا من خويك
بـيّـن عقد حواجبه/تقوله صادق ياولد؟!!
نواف/اي والله
بـيّـن ميل فمه بابتسامة رضا
محارب وقف عندهم برفعة حاجب/هيه راديو وش قايل له حتى الضحكة تشق وجهه
نواف بوسع عيونه/ماقلت شي اعوذ بالله!!
بـيّـن بابتسامة/ليه مستكثر علي الضحكة
محارب/والله انا صرت اخاف من ضحكاتك الهادية
بـيّـن ضحك بصوت عالي
طاهر وقف عندهم/هاه وشلونك ذالحين
بـيّـن هز راسه/الحمدلله بخير
//يقين ومنيرة وقفوا عندهم ونواف ومحارب ابتعدوا من قربت يقين//
يقين وقفت جنب بـيّـن
طاهر مد المفتاح لبـيّـن/خذ دبر امورك بها
بـيّـن ناظر المفتاح بتفكير
منيرة/خذه يمه الى ماتتيسر امورك
طاهر/بكرة بني سمّار ماهم براحمينك لا ابطيت عن حلالهم خذ بس
يقين مدت يدها ورا ظهره تلامسه بموافقة لكلامهم
بـيّـن مد يده اخذ المفتاح بعد لمستها متخذ قرار الموافقة من موافقتها/كثر خيرك ياجد ماتقصر
منيرة بابتسامة/انا رايحة للسيارة/مشت/
بـيّـن مد المفتاح ليقين
طاهر اتسعت عيونه
يقين ناظرته
بـيّـن/قربي الددسن لي
يقين بابتسامة سحبت المفتاح من يده وجرت للسيارة بحماس
طاهر ناظر بـيّـن بملامح محتدة/من جدك ناوي تدخل الديرة ومرتك تسوق!!
بـيّـن/وليه ان شاء الله ماتسوق!!
طاهر/ناوين على روحك فوق اللي شفته!!
بـيّـن بعدم اهتمام/لا صاروا ملوك وعيّوا علينا نشوف ان شاء الله
طاهر/بـيّـن
بـيّـن/هذاني شفت الموت مايردني عنهم شي ياجد/مشى/
طاهر/ولد بـيّـن/جر خطواته السريعة للسيارة بغيظ ركب مكان الراكب قفل الباب بقوة/
محارب حرك السيارة
نواف ورا/علامك ياجد
منيرة التفتت له بنظرات تسكته
طاهر ماصدق سمع السوال انفجر/هالبـيّـن ماتاب من خباله بيدخل الديرة على عيونهم ومرته تسوق
محارب زم شفايفه وشد عالدريكسون وهو اللي يعلم ولاء عالسواقة وبربكة/وليه ياجد خلها تسوق هو مريض مامن خلاف
طاهر بحدة/اسكت عني ماعييت عن السواقة بني سمار مايرحمونه يسوقون بالخلا عند بيتهم ماعييت مير يدخل على عيونهم مايكبونه
محارب/مابيتكلمون هالمرة ياجد تريح
نواف بموافقة له/صدق عقب سواة شيخهم عني مايحطون عيونهم بعيوننا
طاهر/امحق عيون ذولا جنّ مايردهم شي والبلا معهم
منيرة تنهدت بضيق
طاهر التفت لمحارب وبنرفزة/علامك تمشي بالهون اسرع ورانا اشغال
محارب زاد سرعته/ابشر ابشر ياجد
بـيّـن وقف يناظرها باستغراب/علامك ماجبتي الددسن يمي
يقين واقفة عند الباب من جهة السايق/الباب عيّا يفتح مدري علامه
بـيّـن عقد حواجبه باستغراب واتجه لها دخل المفتاح وفتحه بسهولة
يقين قبل يلتفت لها بـيّـن ركبت بابتسامة/مشكور/قفلت الباب/
بـيّـن رمش من استوعب فعلها عض على لسانه داخل فمه بغيظ من حركتها
يقين فتحت القزاز شي بسيط حتى يوصله صوتها/علامك واقف اعجل علي اخرتني
بـيّـن جر خطواته بهدوء مر من مقدمة السيارة
يـقـيـن ضربت بوري
بـيّـن فز والتفت يناظرها بصدمة
يقين نزلت القزاز كامل/حركة حركة الله يرضى عليك لاتأخرنا حركة استعجل شوي
بـيّـن اسرع بخطواته وركب السيارة قافل الباب بقوة التفت يناظرها وبنرفزة/علامك علي ناوية ترديني المستشفى من قريّب
يقين مدت يديها له محتضنة وجهه بين كفوفها/واسيدي الزعلان يازينه
بـيّـن تجمدت ملامحه من حركتها يناظرها بصمت
يقين/بسم الله على ذا الوجه ماهو معود المستشفى من غير شر/تركت وجهه تربط حزامها وتشغل السيارة/اربط حزامك/التفتت له/ولا تبيني اربطه لك
بـيّـن ربطه بهدوء/مايحتاج
يقين حركت السيارة/لاتاخذ راحتك وتنام
بـيّـن التفت لها يناظرها باستغراب
يقين/تراني على صحية امس مااشوف من النوم
بين اتسعت عيونه/تكفين اوقفي انا اسوق
يقين دعست عالبنزين بعناد/والله مايتلها غيري
بـيّـن بقزع/ردينا المستشفى ردينا من قريب يابنت
يقين التفتت تناظر ملامح فزعه الجديدة عليها/افا انت في ايدٍ امينة
بـيّـن شد عالحزام بيده/امينة عند اهلها سالمة يالله تسلمنا مثلها يارب
............................................................
          الـلـيـل
............................................................
<<بيت تجمع الشلة>>
بارود الجالس عن يشاره وبينهم مسافة بلع ريقه بتوتر وسط نبضات قلبه السريعة بانتظار لانفجاره
عزيز الجالس قبال شبة النار يناظر بارود بذهول بعدم تصديق من اللي سمعه وبلعثمة/كـ.كـيف يعني
بارود/بني سمار يبون شيخ عليهم من رايهم
عزيز رمى فنجاله بوسط الشبة بغضب/ومن متى ينوخذ رايهم بالشيخ!!
بارود احتفظ بالرد لنفسه
عزيز بغبنة/يعقبون ويخسون مابقي الا هم يتخيرون من طيب الانساب على هواهم يعقبون لاصارت انسابهم توازي نسبنا يتخيرون نعنبوهم من خمة ياديرة الجرب 
بارود سكت
عزيز التفت له/لايكون سهم معهم بعد
بارود هز راسه بلا/سهم وقف بوجيههم عنك
عزيز قطب جبينه بشك/وجدتي وش قالت؟
بارود سكت
عزيز اتسعت عيونه بذهول/رضت!!
بارود/حتى لو انها ماتبي هذا رايهم جميع وشلون ترد راي رجال لحالها
عزيز وقف وسحب بارود من ياقته يخنقه/تعقب وتخسى جدتي ماتكبني على هواهم تعقب
بارود يضرب عزيز على يديه/عزيز مالي شغل فكني
عزيز بصراخ/تعقبون وتخسون الشيخة لابوي ثم لي بعيدة عن خشومكم بعيدة
............................................................
<<بيت ظاهر>>
نور نزلت صينية القهوة لابسة عبايتها وطرحتها على اكتافها
ظاهر ناظرها باستغراب/رايحة لاحد
نور ابتسمت/جدتي تقول مبطية عنها
ظاهر رفع يمينه يناظر ساعة يده/مابقي وقت على نومتها
نور باحراج/عشان كذا احترت كيف اعلمك
ظاهر ابتسم/الله لايحيرك هاه امريني
نور/ودي ابات عندها الليلة
ظاهر/وانا
نور بربكة/علامك انت!!
ظاهر/ليلتين لحالي ياشين النومة وانتي ماانتي بحولي
نور بابتسامة/الايام المقبلة واجد عسى الله لايحرمني منك
ظاهر تنهد/عاد الشكوى لله كان منعتك تجي جزتي وتلني من اذني قدامك
نور ضحكت من تخيلت شكله
ظاهر بابتسامة/اعجبك شكلي وانا اتمردغ
نور بابتسامة/لا لا محشوم
ظاهر تكتف وغمض عيونه
نور عقدت حواجبها باستغراب/علامك
ظاهر/اسرعي اسرعي روحي قبل اغير رايي
نور لفت تجري
ظاهر اتسعت عيونه وقف ولحقها/ماصدقتي!!تكبيني وراك!!
نور بضحكة/انت تقول اسرعي!!
ظاهر بزعل/وتكبيني كذا
نور/وش تبي طيب
ظاهر/اجبري خاطري المسكين
نور ناظرته بتفكير
ظاهر بخيبة ارتسمت على ملامحه/ابد قضى جبر الخواطر من عندك
نور مدت يمينها لتيشيرته وسحبته مقربته لها
ظاهر انحنى طواعية من سحبتها بابتسامة احتلت وجهه
نور قبلت خده بهدوء ثم تركته مبتعدة
ظاهر اعتدل بابتسامة وصل تأثيرها لقلبه وملته رضا وسرور/والله الورطة ذالحين كيف اخليك تروحين!!
نور ناظرته برجى
ظاهر صد/ويل قليي امشي يابنت قبل اهون صدق امشي
نور خرجت بسرعة تجري بابتسامة اعتلت محياها
ظاهر واقف عالباب/نور هيه تغطي بنت تغطي
نور رمت الطرحة على وجهها بضحكة من امره التفتت له/تغطيت خلاص
ظاهر ناظرها/روحي يالله
نور لفت منجهة لبيت جدها اللي قبالهم مباشرة اختفت ضحكتها وابتسامتها واحتلت ملامحها الضيقة والنكد رغم محاولاتها تطرد هالموضوع من بالها الا انها تفشل بكل مرة
............................................................
<<بيت بـيّـن>>
بـيّـن خارج من بيته  بكشاف جواله المضوي طريقه يجر خطواته بالمكان بضيق احتل صدره وارتسم على ملامحه كل ماطاحت عينه على جزء بهالمكان ذكر طرق وايامه وقف عند الشجرة بحزن يناظر اخر لحظات جمعته مع طرق وكانت لحظات سيئة لابعد مدى زفر يتلفت حوله من بلغه محارب انه تكفل بطرق وابعده وابعد كل شي يخصه عن عينه لكنه واثق انه نسي عصا طرق المحببة له من صغره ابتسم من حصلها وانحنى لها زفر بغصة من ذكر رفضه لطلبات طرق يلعب معه تمنى يرجع الوقت ويلعب معه لو هي حتى مرة وحدة يرميها له ويسمع نباحه راضي صحى من حزنه وضيقه على صوتها والتفت يناظرها
يقين واقفة على مسافة بعيدة منه تصرخ باسمه ويتردد صدى صوتها بهالمكان الخالي الا منهم/بـيّـن بـيّـن
بـيّـن وقف يناظر زولها من بعيد ابتسم من ناظرها استحلت الشجرة المعتاد يقضي اموره وهواجسه تحتها جر خطواته لها رافع صوته/اوص يابنت اوص لاتجمعين علينا خلق ماحنا بحاجتهم اوص
يقين قشعر جسمها من فهمت كلامه وبعناد رفعت صوتها/لاتحاول ماانت مخوفني قارية اذكاري الحمدلله/جلست تجهز قهوتهم/
بـيّـن وقف على مسافة منها يتأملها
يقين ببنطلون جينز وبلوزة صوف باللون البني بياقة مثلثة واسعة على اكتافها فروة ابوها وشماغ بـيّـن عاصبته حول راسها وضفيرتها منسدلة من تحته بحلق دائري باللون الذهبي بكحلتها وقلوس على شفايفها التفتت تناظره بابتسامة/مسيت بالخير حياك/رجعت نظرها عالشبة تكمل شغلها/
بـيّـن بابتسامة هادية ارتسمت على ثغره رافقتها لمعة  نطقت بها عيونه المرتسم فيها رضا خاطره بوضوح تواجدها حوله واهتمامها الفايض اللي احتواه وسهى به عن حزنه شوي وبصوته انبح للحظة من حس ببرد دخله/انا والله اللي ودي أمسي
يقين التفتت تناظره بابتسامة
بـيّـن/انا الليلة أحب أمسّي على حظي الشحيح اللي ياما ندبته(لمته)احب اشكره على تالية هالشّح!!تجمل اي والله انا اشهد انه تجمّل وياكبر جميله وياكثره
يقين احمرت خجل من كلامه و وجهت نظرها للنار اخذت الملقط تحرك الجمر وزاد احمرار خدودها من لهيب النار فوق خجلها 
بـيّـن ابتسم من لاحظ خجلها جلس جنبها ماد يده ليدها ولامسها وشد عليها يحرك الجمر بالملقط اللي بين يديها
بدون يناظرها
يقين التفت تناظره هالمرة صدق هو قريب قريب منها بكل شي قريب بجسد قريب بمشاعر قريب بفعل باقي قرب الكلام تنتظر بس اعترافه الصريح وترمي حقيقة مشاعرها الواضحة له بين يديه تنتظر مبادرته فقط
بـيّـن التفت لها يناظرها ابتسم من التقت عيونه بعيونها وصلت له كمية المشاعر من هالنظرات اللي سرح فيها يتأملها مشاعرهم لازالت على ذيك الايام وطواريها بالعكس اصبحت اكثر وانقى واصفى بعد كل مامروا فيه سوا/يقين
//فزوا اثنينهم من صوت فوران القهوة من الدلة عالنار والتفتوا لشبتهم//
يقين فزت ساحبة يدها من يده ورفعت نفسها على ركبها
بـيّـن رجع يده بهدوء وعينه عليها
يقين بربكة/راحت قهوتنا وطفت نارنا يوك علينا
بـيّـن ناظر الدلة اعتدل بجلسته
يقين التفت له وثبتت يديها على اكتافه تجلسه/الليلة انت ضيفي اجلس جهزت كل شي وبأسوي جمرية يحبها قلبك انت بس عيش لحظات السعادة تراها ماتتكرر وماهو كلن يذوقها من يديني هاه علمتك
بـيّـن ابتسم وبنفسه/وجودك بكبره سعادة كان ماتدرين/ابشري ان شاء الله
يقين تركته ومدت يدها للدلة ترفعها
بـيّـن بوسع عيونه/لا اصبري مو كذا
يقين سحبتها غلط وانتثرت فوق النار اتسعت عيونها وهي تناظر الدخان
بـيّـن ناظرها/جمرية اجل
يقين/والله دايم اسويه ويضبط
بـيّـن بتكذيب/ايه ايه
يقين بغيظ/والله
بـيّـن/ماكذبتي بأحلامك تسوينه
يقين بزعل/بـيّـن
بـيّـن مسك يدها وجلسها/انا باذوقك جمريتي حتى اليهود ماذواقوا مثلها
يقين ناظرته بضحكه/الله يكفيني شرها
بـيّـن وقف/صحيح والله وش تبين بعيشة اليهود ماهم بذايقين عيشتنا
يقين جلست/اجل تفضل ياليهودي ذوقني جمريتك
بـيّـن/اوووه وبعدها حليب خلفات يحبه قلبك
يقين/لا تكفى مااحبه
بـيّـن بابتسامة شر/ورا ماعلمتيني ماتحبينه
يقين قطبت جبينها بشك/ليه
بـيّـن بضحكة خفيفة/اربطي الكيس حول يدي وراي جمرية
يقين مدت يدها له وسحبته حتى يجلس/اجلس بس اجلس لا جمرية ولا قهوة بسوي مكرونة اجلس بس وفكنا لايذوب الكيس بيدك ونبلش تالي هالليل اجلس
............................................................
<<بيت سطام>>
سطام جالس قباله بملامح استغراب من تواجدها وهي اللي مامرته ابد من تعب واحد هاللحظة ماتحمدت له بالسلامة حتى
ام سطام نزلت صينية الفناجيل بابتسامة/ياهلا ومرحبا ياهلا ياعمة حياك الله
مبروكة جالسة بصمت
ام سطام ناظرتها باستغراب من صمتها مدت لها الفنجال/سمي ياعمة
مبروكة مااخذت الفنجال لازالت محتفظة بصمتها متجهمة بملامح وجهها
سطام بسخرية/لايكون قهوتنا ماهي من مواخيذك ياجدة!!
ام سطام ناظرته بحدة
سطام تقهوى بعدم اهتمام لنظراتها
مبروكة مدت يدها لام سطام
ام سطام حطت الفنجال بيدها
مبروكة ارتشفت من الفنجال ثم نزلته وبجدية/ولد ياسطام
سطام/خير
مبروكة/بني سمّار يبونك شيخٍ عليهم
ام سطام اتسعت عيونها بذهول
سطام عقد حواجبه باستغراب
مبروكة/وش قولك؟
سطام تكتف بتفكير/يبوني شيخٍ عليهم اجل!!
مبروكة عقدت حواجبها بعدم رضا من نبرته
سطام/علميني ياجدة وشلون بني سمار اصحاب المقام يتسيدهم واحد مثلي مايندرى ابوه من اي لحية؟
ام سطام شحب وجهها وناظرته
مبروكة احتدت ملامحها
ريوف ورا الباب تجمد الدم بعروقها من سمعت الكلام الخطير
#شقّ_الغَمام