شـقّ الـغَـمـام

..(١٦)..

..(١٦)..
سبحان الله والحمدلله لاإله الا الله الله اكبر لاحول ولاقوة الا بالله اللهم صل وسلم على نبينا محمد
.
........................................
<<شقة مُحارب>>
ولاء تذاكر بغرفة الضيوف الخالية من الاثاث مجرد سجادة جالسة فوقها على كتابها تذاكر رفعت جوالها بابتسامة من اعتلى رنينه/هلا
مُحارب يسوق سيارته/وش اجيب ماعرفت
ولاء تنهدت/يوه يامحارب واحنا كل مرة نفس الحكاية
مُحارب/نفسك بسندويشات
ولاء/اي شي عادي انت بس لاتتاخر
مُحارب/زين/قفل/
ولاء رجعت لكتابها قطبت جبينها من وصلها الصوت وهالمرة ماكان مثل العادة داخل حدود جدرانهم هالمرة تجاوز البيت واصبح خارجه وقفت ومشت باتجاه الباب بفضول قربت عينها من العين السحرية تناظر وش اللي يصير
ظافر بملابسه الداخلية بجنونه/انا انا تكذبين علي يابنت### تستغفليني عيني عينك
رؤيا بكدمات تجاوزت جسمها هالمرة وارتسمت على وجهها
ظافر كسر عادته من اخفاءه لعنفه بحقها واكتفاءه بجسمها واتجه لوجهها بقهر منها/مايكفيك تركتك تدرسين بكيفك تكذبين عليّ وتدرسين تمريض ليه ليه!!
رؤيا برجفة خوف ووجع ويأس/ماهو بكيفك سكت على كل شي تبيه ماهو بكيفك
ام ظافر على باب الشقة على كرسيها المتحرك بدموعها/حرام عليك ياظافر ذبحتها اتركها
ظافر التفت لامه اتجه لها بخطواته السريعة انحنى قبالها ودفها بكرسيها لورا
ام ظافر غمضت عيونها برعب
رؤيا جرت لعندهم صرخت/لا امي امي تكفى لا
ولاء اتسعت عيونها برعب خرجت جوالها تتصل وبانفاس سريعة من خوفها/مُحارب
مُحارب قطب جبينه بشك من صوتها/علامك
ولاء/تعال بسرعة المجنون اللي قدامنا عثى بأهله/غرقت عيونها دموع اهتز صوتها/حتى أمه مارحمها تكفى تعال محارب اعجل
مُحارب اخذ اليوتيرن مغير طريقه باتجاه البيت/لاتفتحين الباب ولا تسوين شي سمعتي
ولاء/طيب
مُحارب/ولاء لاتسوين شي
ولاء/ماني مسوية شي اعجل انت بسرعة بسرعة تعال
ظافر مد يده لشعرها شدها ودفها لورا تاركها
رؤيا تراجعت مجبرة وسط دموعها
ظافر انحنى ساحب الكرسي لعنده مثبت يديه فوق يدين الكرسي المتحرك ووجهه بوجه امه
ام ظافر شدت على يديها بقلة حيلة وسط رجفتها منه
ظافر بغضب/كله منك انتي،انتي تاركتها تسوي اللي تبيه بكيفها بدون احد يوقف لها!!
رؤيا بصراخ/وشو اللي اسويه وانت واقف بحلقي كل شي على هواك وبكيفك حتى النفس لو بيدك حرمتني منه
ظافر اختنق من كثر الغضب وبرزت عروق رقبته واكتسى وجهه السواد
رؤيا زاد رعبها رعب من ناظرت وجهه وتراجعت بخطواتها لورا وسط انفاسها السريعة وبصوت مخنوق/ظـ.ـافـ.ـر
ظافر اسرع بخطواته لها
ولاء ماتحملت تكتفي بالمراقبة فتحت الباب ومدت يدها لرؤيا وسحبتها لداخل شقتها وقفلت الباب
ظافر جن جنونه من اللي صار وضرب الباب بكل قوته/رؤيا اخرجي اخرجي الحين احسن لك/صرخ من اعماق قلبه/رؤيا
رؤيا غمضت عيونها وغطت اذانيها بيديها برعب من صرخته
ولاء فتحت جوالها وضغطت(٩٩٩) برجفة صوتها/ابي ابلغ
رؤيا اتسعت عيونها فزت واقفة وسحبت الجوال من يد ولاء ورمته عالارض بقوة
ولاء انتفضت بفزع من حركتها المفاجئِة وناظرتها بوسع عيونها
رؤيا برعب/تبينه يذبحني!!
ولاء/أنا ما/فزت برعب من سمعت الصوت قربت من الباب بخوف اتسعت عيونها بذهول من جنونه/
ظافر واقف عند الباب بثوبه المتلون بالاحمر من اعلى اكتافه ملامس جرح راسه بكفه الايسر وجواله على اذنه وبصراخ/ابي ابلغ تعدي وتضليل
مُحارب وقف قباله بوسط انفاسه السريعة من جريه قطب جبينه باستغراب من ناظر منظر ظافر والقزاز المتكسر حوله
ظافر ناظره ميل فمه بابتسامة جانبية/اهل جاري
مُحارب انخطف وجهه بذهول من اللي سمعه
........................................
.
يـقـيـن متربعة بينها وبين كفر السيارة خطوة متكتفة تناظره بملل
بـيّـن يحفر حول كفر السيارة حتى يخرجها بملامح كاسيها الارهاق وعبوس اتضح من حجاجه المعقود
يـقـيـن زفرت بصوت فكت تكتيفتها ميلت راسها مستندة على كفها تناظره
بـيّـن التفت يناظره بعبوسه/علامك
يـقـيـن/مابي شي
بـيّـن كمل يحفر والتفت لها يكتم غيظه
يـقـيـن كررت زفرتها مجبرته يناظرها واول ماناظرها/ترا اعرف اسوق
بـيّـن ناظرها بمعنى وش اسوي والتزم صمته
يـقـيـن/يعني اذا تبيني اساعدك بدل هالجلسة
بـيّـن/ايه بالله ابي مساعدة
يـقـيـن ابتسمت وبحماس/وشو
بـيّـن يحفر بدون يناظرها/تسكتين عني وتفكيني شرك
يـقـيـن اختفت ابتسامتها تناظره بغيظ ناظرت ملامحه اللي ماهدت حتى اللحظة رفعت نفسها بخفة شبه جالسة ومدت رجلها لرجله ودفته
بـيّـن جلس عالارض من دفتها والتفت يناظرها بحدة
يـقـيـن ناظرته ساكتة للحظة/كيف اقولك اني زلقت وانت تقول اسكتي!!
بـيّـن زفر وصد عنها يكمل بغيظه
يـقـيـن مدت رجلها مبعثرة التراب اللي تطاير غباره بوجهه
بـيّـن كح رفع نظره لها بغيظ
يـقـيـن/انت قلت اسكتي ماقلت لاتحركين رجولك
بـيّـن فز واقف
يـقـيـن جرت عنه مبتعدة بكل مافيها/يـمـه امزح معك امزح
بـيّـن جرى وراها
يـقـيـن تجري بكل مافيها من قوة مبتسمة من انعادت الذكرى
،
،
يـقـيـن تناظر الرسمة اللي الارض قدامها عبارة عن مربع يتوسطه اكس ويمر من منتصف المربع خط يقطع نقطة منتصف الاكس تنهدت بتفكير
بـيّـن متكتف يناظرها بابتسامة انتصار
يقين مررت نظرها على حجاره المحتلة مواقع منتهية بفوزه رفعت عينها له تناظره بغيظ/غش والله انك غشاش
بـيّـن اتسعت عيونه/اهبي لاتحلفين ياويلك من الله
يـقـيـن بغيظ/اجل وشلون كلها حصاك
بـيّـن بابتسامة/ماهو بذنبي انك غشيمة
يـقـيـن ناظرته بصمت
بـيّـن بابتسامة/العبي بس يالله
يـقـيـن التفتت وراها رافعة صوتها/هاه طيب
بـيّـن ناظرها بشك
يـقـيـن ناظرته بنفس وقت وقوفها محركة رجلها للرسمة ومبعثرة الرسمة والحصى بابتسامة خبث
بـيّـن رفع يديه يغطي عيونه من التراب المتطاير عليه
يقين تتصنع البراءة/نور تناديني
بـيّـن نفض نفسه بعبوس ملامحه ناظرها بغيظه/نور نادتك اجل
يـقـيـن لفت عنه وجرت مبتعدة بضحكة/اجل اخسر لك واسكت
بـيّـن بابتسامة يجري وراها/هجّي هجّي لامسكتك مايفكك احد
يـقـيـن دخلت لبيت طاهر بصراخ وسط ابتسامتها/نووووورررر
نور خرجت من بيت جدها بفزع/وش فيه
يـقـيـن وقفت وراها بضحكة وسط مراوغتها/يوك عليك ماعينت شي غير الغبينة
بـيّـن يمد يديه يحاول يمسكها/الغبينة تذوقينها لامسكتك
نور بينهم/خلاص خلاص ماتمر جلستكم بدون مناقر
يقين تغيظه بضحكتها/هه هاااه امسكني يالله يالله امسكني كان فيك خير
،
،
بـيّـن يجري وراها/هجّي هجّي لامسكتك مايفكك احد/ابطأ بسرعته من استحضرالموقف ابتسم واسرع لها مد يديه لخصرها محتضنها ورفعها لفوق وسط التفافه بنفس الوقت/
يـقـيـن صرخت من حست بنفسها تطير بالهوا بين يديه وبضحكة/اسفة بـيّـن اسفة
بـيّـن مشى بها بابتسامة/وذالحين مين يفكك
يقين بابتسامة وسط بحة صوتها بعد صرختها/توبة توبة والله توبة
بـيّـن/وليه تسوين شي ماانتي بقدّه من الأول
يقين باستعباط/غرتني الدنيا غرتني
بـيّـن/وعساك بتعيدينها لاغررت بك مرة ثانية
يقين/استغفر الله مااعيدها والله مااعيدها
بـيّـن نزلها بهدوء مشى راجع للسيارة تاركها وراه
يقين ناظرت قفاه المبتعد كل مافيه ينطق بضيقه وحزنه حتى لو اعتلت محياه البسمة اسرعت بخطواته وراه ومدت كفها لكفه ضمته مثبتة نظراتها لقدامها بجمود
بـيّـن التفتت باستغراب يناظرها من حس بكفها
يـقـيـن تمشي معه متجاهلة نظراته
بـيّـن ناظر كفها المحتوي كفه رجف بداخله بخوف من كل هالقرب سحب كفه من كفها
يقين وقفت تناظره بذهول
بـيّـن التفت وراه بدون يناظرها عبس بوجهه من ناظر سيارته/روحي السيارة
يـقـيـن التفتت وراها تناظر اللي يناظره تكتفت/وش بتسوي بتبذبح غصنة
بـيّـن التفت يناظرها بحدة/روحي ولاتطولينها
يـقـيـن فكت تكتيفتها بغيظ اسرعت بخطواتها للسيارة دخلت وقفلت الباب بقوة
نواف وقف بالسيارة على مسافة من سيارة جده ونزل بابتسامة/السـ/اختفت ابتسامته من ناظر ملامحه/ـلام عليكم
بـيّـن بنرفزة/وعليكم السلام والرحمة/ناظر السيارة/علامك جاي لحالك
نواف/جيت ارجع ددسنك واخذ الونيت
بـيّـن ناظره بصمت
نواف داهمه شعور الضغط من نظراته نطق معترف/البنات البارح قامت بينهم هوشة بحياتي ماشفت مثلها نتفن شعور بعضهن
بـيّـن تكتف بملامحه العابسة يناظره
نواف/ايه وغيمة وافقت على رازي
بـيّـن امتلى صدره غبنة واكتسى وجهه السواد
نواف/هذا اللي سمعت
بـيّـن مد يده وبغضب/جب المفتاح
نواف حطه بيده بسرعة/سم
بـيّـن مشى باتجاه سيارته
نواف ناظره/والسيارة كيف
بـيّـن ركب سيارته بدون يناظره/خل خواتك يطلعنها
نواف/هاه!!
بـيّـن حرك بالسيارة ووقف قريب من سيارة جده/بنت
يـقـيـن نزلت من السيارة وركبت معه
بـيّـن مشى وتركه وراه 
نواف يناظره بذهول/ذا من جده كبني/دخل يده بجيب جواله يناظره/مابه ارسال/التفت حوله يناظر البر الخالي بورطة/ياليل ماطولك يانواف
بـيّـن متجه بسيارته للبيت شاد على دريكسونه بيديه بقهر
يـقـيـن تسرق له نظرات جانبية وسط صمتها
بـيّـن وقف عند البيت
يـقـيـن التفتت للبيت ميلت فمها بعدم اعجاب
بـيّـن بغضب يكبحه/انزلي
يـقـيـن/أخاف لـ
بـيّـن التفت لها وصرخ/يـقـيـن
يـقـيـن سحبت حزام الامان وقفلته بعناد بدون تنطق
بـيّـن حرك بسرعة جنونية/خلي عنادك ينفعك
يقين بعناد/انا معك ،وين ماتروح معك
........................................
<<الـقـسـم>>
ولاء محتفظة بهدوءها/مالمسته والله يكذب
المحقق/وبخصوص تضليل اخته وسوالفك معها
ولاء بصدمة/انا مااعرفها حتى اليوم اول مرة اشوفها
المحقق/بس هي قالت غير ذا الكلام
ولاء باستغراب/كيف يعني
المحقق/حرضتيها ضد اخوها وفوقها اقنعتيها تحاول الانتحار
ولاء رجفت بخوف من كبر الكلام وقوة ظلمه بحقها ناظرته بغصة/وشلون اقنعها تنتحر وانا بحياتي ماشفتها اصلا الشقة ماصار لنا حتى شهر ساكنينها وشلون اقنعها تنتحر وهاذي حدود علاقتنا
المحقق بنبرة حادة/حدود علاقتك التلاعب بالعقول!!
ولاء ناظرته بعيون التمعت/لو اتلاعب بالعقول كان تلاعبت بك الحين
المحقق رفع صوته/احفظي لسانك وتراها واصلة للمحكمة واصلة فوق التحريض معتدية
ولاء هلت دموعها بعد كبحها لفترة/خلّها توصل وحقي باخذه منهم هناك
.........................................
<<بيت ظاهر>>
نور جالسة بالصالة بيدها جوالها تراسلها ورا بعض بدون انتظار لردها/بتروحين اليوم..يعني نتقابل هناك..طيب بتطولين..ونتركه لوحده او كيف؟/مشت للباب البيت من سمعت صوته عبست بوجهها من قرت ردها(مااقدر اليوم ابدا)ارسلت بضيق/وش اقوله اذا سأل عنك؟/قفلت الجوال بدون تنتظر ردها وفتحت الباب ابتسمت من ناظرته وهي قابلته مرات معدودة/ياهلا ومرحبا
ضاري بلع ريقه بتوتر مقدم على هالخطوة لوحده ماقابلها طول هالفترة الا مرتين وسلم عليها وخرج مد يده لها
نور صافحته وسلمت عليه خد بخد/هلا بسيّد بني طاهر هلا بشيخ قومه
ضاري خف توتره وارتسمت ابتسامة على محياه/الله يسلمك ياعمة
نور عبست بوجهها للحظة من حست بهالكلمة كبرتها لكن طنشتها بسرعة/حياك تفضل
ضاري/قبل كل شي انا جيت وابوي برا بقصد ياعمة
نور باهتمام/تفضل واطلب على راحتك
ضاري باصرار/لا ياعمة لا
نور/امرني ياضاري تفضل
ضاري بملامح محتويها الكره لوضعه/الصراحة ياعمة انا ابي غرفتي تعبت عند جدتي انام عالارض وملابسي وكتبي بالشنطة
نور ناظرته بصدمة من كلامه توقعت صاير شي كبير بعد كل هالرفض
ضاري/جدتي احبها وتحبني
نور تكتفت تناظره منصتة له وسط ابتسامتها
ضاري توتر من ابتسامتها/بس انا ابي بيتنا ابي غرفتي ابي
نور مدت يدها ليده مسكته وسحبته وراها داخله به للبيت مقاطعه كلامه بابتسامة/البيت بيتك حياك انت راعي البيت ياضاري
ضاري بفرحة/صدق
نور انتصفت البيت لضاري وقبالهم غرفته بخطوات معدودة/لو ماابيك كان شلت غرفتك كلها
ضاري سحب يده بابتسامته العريضة
نور التفتت له تناظره باستغراب من حركته ثم تبدد الاستغراب من ناظرت ابتسامته
ضاري/اجيب شنطتي واجي/جرى خارج من البيت/
نور زفرت بضحكة خفيفة اختفت ابتسامتها من ناظرته قبالها
ظاهر واقف على باب المطبخ قبالها يديه بجيوب بنطلون بجامته الاسود مبتسم
نور ابتسمت لابتسامته/علامك
ظاهر خرج يديه من جيوبه ومشى لها وقف عندها/عن طيب خاطر يانور؟
نور ناظرته بزعل/استغفر الله وش هالهرجة!!
ظاهر فرد يديه واحتضنها مقبل جبينها وبابتسامة/بيض الله وجهك يابنت العم
نور بدلع/بنت العم؟
ظاهر ضحك بخفة/يانور بيض الله وجهك يانور ظاهر
نور ابتسمت برضا من دمجه لاسمه واسمها اختفت ابتسامتها واتسعت عيونها ودفته عنها اول ماسمعت صوت خطواته قريبة
ظاهر ابتعد يناظرها باستغراب
ضاري دخل ناظره ابوه بابتسامة/سلام يبه
ظاهر ارتفع حاجبه/سلام يبه!!
نور رمشت تناظر اسلوبه
ضاري اختفت ابتسامته وتقدم سلم على راسه/صباح الخير يبه
ظاهر بابتسامة خفيفة/صباح/ناظر نور/النور
نور تجنبت نظراته وناظرت ضاري بابتسامة/يالله يالله ننظف غرفتك سوا
ضاري اسرع بخطواته لغرفته وبيده شنطته/انا بأنظفها لحالي مايحتاج اهم شي رجعت لها
نور ناظرت قفاه بابتسامة
ظاهر مشى ورا ضاري/انا بأجيك اصبر ياولد
نور تنهدت وبنفسها/الله يعين شكلها طبيعته مو اسلوب بس!!
.........................................
بـيّـن يسوق السيارة بسرعة بينفجر من غبنته من استرجع ماحصل البارح بينهم كيف اقنعوا الكل بزواجهم وهم من بدايتهم خاينين،خاينين الثقة واللي اكبر منها ماراعوا حرمة اللي يسوونه بالعكس يتناقشون ويعاتبون بعض وكانه هالشي لهم مباح فعله
يـقـيـن ناظرت الطريق اللي عارفة نهايته نطقت ببحة صوتها/وبعدين؟
بـيّـن شد عالدريكسون
يـقـيـن/وش بتستفيد؟
بـيّـن مارد عليها متجاهلها كليا
يـقـيـن شدت على يديها بمعرفتها انها تتدخل بشي مايخصها ابد وحتى لو طلبها السكوت فهذا حقه وواجب عليها الامتثال لطلبه اخذت نفس ونطقت/يعني الواضح اثنينهم ناوين الزواج بغض النظر اذا حصل شي بينهم او لا
بـيّـن صرخ/مالك شغل اسكتي مالك شغل
يـقـيـن رفعت صوتها متجاهلة وجعها/اذا قلت عنهم كلمة انت ماضريتهم لحالهم انت كسرت كل فرحة اجتاحت اهلك واهله وفضـ
بـيّـن وقف عند بيت سطام التفت يناظرها قاطعها بصوته العالي/اسكتي اسكتي اسكتي
يـقـيـن سكتت
بـيّـن بحدة/انزلي
يـقـيـن صدت رافضة لطلبه بصمت
بـيّـن/انزلي وخلصيني
يـقـيـن ماناظرته متجاهلته
بـيّـن بتعب منها ومن عنادها/تدرين عاد انا اللي بأنزل
يـقـيـن اتسعت عيونها والتفتت تناظره
بـيّـن فتح الباب ونزل تارك لها السيارة باغراضه بخطوات سريعة متجه للمكان اللي تحاول تمنعه من الوصول له
يـقـيـن وقفت تحركت من مكانها وجلست مكانه محركة السيارة وراه بهدوء
.........................................
رازي يسوق سيارته بوجهه المكتسي سواد متجه له برفض لنهاية علاقتهم بهالطريقة عمره ماكان مجرد شخص مثله مثل غيره يجمعهم انتظار ولا هو بأي انتظار،انتظار طويل للحقيقة اللي بيكشفونها سوا هو الصديق والاخ والاب احيانا كيف يقبل نهاية علاقتهم مستحيل يقبلها كيف يمر يوم بدون يرمي عليه كلمة ويرميه بسيل دعاويه ماانقطع عنه وهو بعيد ولاربع سنين كيف يقطعه وهو بهالقرب راضي بكل مايسوي فيه كل شي بيتقبله منه ولا الجفا والقطيعة عض شفته بقهر من نفسه كيف انسحب البارح تارك فعلته تأكد ظنون بـيّـن فيهم لام نفسه على كل شي من بدايته مع غيمة الى انتهاء وضعهم باللي حصل البارح اتجه له بيوقف بوجهه مثل ماوقف بوجيه اهل الديرة بذاك اليوم المشؤوم وليلة البارح كانت مشؤومة بكل تفاصيلها جرت عليه مشاعر الخيبة والخذلان والحسرة والحزن واهمها الفقد
،
،
~~قـبـل١٥سـنـة~~
رازي(١٣سنة)واقف بمجلس بيتهم الخالي من المعزين ماعدا الجد طاهر وعياله واحفاده فوق قهره من هوية القاتل المجهولة ارتسم قهر جديد وسخط على اهل الديرة اللي ماقاموا بواجب المسلم عالمسلم نزل نظره للارض بحرقة صدره والظلم الواقع بحقهم ويعني اذا كان ابوه معارض لهم بامور كثيرة كلها كانت لمصلحتهم عمره ماطلب منهم حق على فعوله ولا حتى على قرارته اللي يعارضونها بها وتثبت صحتها بعد مدة وقف مشى بخطوات سريعة خارج من بيتهم وسط دموعه المنسابة بغزارة ابوه مات مقتول مات غدر صاحب القلب الطيب الابتسامة الهادية راعي المعروف بأهله وغير أهله فوق مصابهم يعزلونهم بهالطريقة المؤذية اللي يصير مايرضي الخالق قبل الخلق رفع نظره من حس بيده تنسحب
بين(١٣سنة)مسكه من يده يسحبه وراه جرى به
رازي جرى معه بدون تفكير
بـيّـن وقف عند المسجد وانحنى رافع البلاطة اخذ المفتاح من تحتها فتح الباب وسحب رازي دخله معه ثم قفل الباب وراهم بالمفتاح واتجه لمحراب المسجد واخذ المايك
رازي يناظره بدموعه بدون اي كلمة
بـيّـن فتح المايك/آ آ آ
رازي غمض عيونه بانزعاج من تردد صوت صدى ازعج الكل داخل المسجد وخارجه
بـيّـن/هيه ياديرة السخط حتى السلام بعد فعلكم ماتستاهلونه
خلف ببيت مثنّى فز واقف وسط التفاتات اخوانه ببعض
طاهر المستند براسه على عكازه مغمض عيونه بقهر من اللي يصير نطق بحدة/اقعد ياخلف
خلف/يبه مير انه
طاهر/خلّه يبرد صدرونا ماقوينا حنّا خله يقواهم عساهم مايكثرون
خلف ناظر ابوه بتردد
طاهر ناظره بحدة
خلف جلس تنفيذ لامر ابوه
رازي ناظره بعيونه الغارقة بدموعه من نطق باللي بخاطره
بـيّـن/قطعة تقطعكم يااللي ماتعرفون حقوق المسلم وين الله يوفقكم وهاذي سواياكم
رازي التفت للباب يناظره من سمع اصواتهم وراه
بـيّـن/وفوقها يافضحكم وسط العرب لادروا بفعولكم يالرديين
//اعتلى صوت ضرب عالباب ومطالبات بفتحه وتتخلله تهديدات للي داخل المسجد//
بـيّـن/مير مقيولة الا ليت بعض اللحى والاشناب علف لبهايمنا
طاهر زفر بضحكة خفيفة
خلف جالس على اعصابه ايقن بمصيبة قريبة بعد هالكلام من بـيّـن
رازي يناظره بدموعه
بـيّـن/تف عليكم ياعديمين الدين والمروة/رمى المايك بالارض مسبب تردد صدى مزعج لاهل الديرة/
رازي غطى اذانيه من تردد الصوت القوي
بـيّـن بغيظه/عساها تشق اذانيكم/مشى لرازي ناظره/انا خويك
رازي يناظره بصمت وسط دموع حزنه
بـيّـن/واخوك واليوم صرت ابوك
رازي بدموعه/تعقب ابوي الله يرحمه ماله مثيل
بـيّـن برجفة صوته/محد يجي مثل مثنى/بلع عبرته/مير اني ابوك وقضينا يارازي
رازي جلس منهار يبكي/ماانت ابوي ابوي مات يابـيّـن مات
بـيّـن واقف يناظره وسط دموعه
//كسروا بعض رجال الديرة باب المسجد ووقفوا يناظرون هالاثنين//
رازي بشهقاته/ليته ماراح يجيب خبز يابـيّـن مانبي الخبز نبيه هو والله نبيه
بـيّـن جلس جنبه بعيونه المحتدة المبتلة بدموعه تناظر اللي دخلوا قبالهم بصمت
رازي بكى حرقة على فقد ابوه بهالعمر للحين ماشبع منه للحين توه ببداية العمر اختفى وجوده من الشباب وحتى المشيب كان واثق بتواجد ابوه بكل لحظة لدرجة ماغرق نفسه بلحظات ولمسات الحب بينه وبين ابوه كم ضيّع احضان كم ضيّع قُبل كم ضيّع ابتسامات كم ضيّع كلمات تحيي مسامعه بكى يندب حظه لو درى الفراق بهالسرعة احتضن ابوه طول هالسنين ولا ضيع لحظة كان حاول يشبع رغم قصر المدة لكن عالاقل هاللحظات القصيرة تهدي شوقه الفايض اعتلت شهقاته من اجتاحه شعور السلب ابوه انسلبت حياته وانحرم منه بهالعمر بكى بقهر على الغدر وعلى حق ابوه الضايع بقلة حيلته بشهقات عجزه/يابـيّـن ذبحوا ابوي ذبحوه
بـيّـن بحدة/والله لاخذ حقك يارازي والله
،
،
رازي بنبضات قلبه السريعة من هالذكرى الموجعة يرفض يفقده يكفيه فقده لابوه كيف يفقد بـيّـن بهالسهولة بيتحمل كل اهاناته بيتحمل بدون اي كلمة ولايفقد صعبة عليه وكثير فقده لبين عبس بوجهه من ناظر السيارة وقف ونزل
نواف اتسعت ابتسامته من ناظر سيارة رازي وارتسمت له بوادر الفرج رفع يديه يأشر له بابتسامة
رازي نزل من سيارته بملامحه الكارهة لكل شي حوله بوضوح وابتسم بضغط على نفسه مجاملة/عسى ماشر
نواف/هلا يالنسيب حياك الله
رازي عبس بوجهه من الندا مافيه حيل للتفكير ولا حتى للسؤال/الله يحييك ويسلمك/نزل نظره يناظر السيارة/عسى ماشر
نواف/ابد غرزوا الاهل بالسيارة البارح وجيت اطلعها/بضحكة خفيفة/ايه صح ماعاد اهلي بلحالي اهلنا سوا
رازي ناظره باستغراب
نواف بتوتر اتضح على ملامحه/لايكون سبقت جدي وعلمتك
رازي تنهد/قل يانواف قل
نواف بورطة/مادريت بالعلم لذالحين
رازي ناظره بصمت
نواف قفلت معه من اخلاق رازي الشينة على غير العادة/غيمة وافقت تعرس عليها علمت جدتي من شوي وتقول يعجل بالعرس
رازي تهلل صدره من هالخبر وارتسمت ابتسامة على وجهه بفرح من الخبر ماطولت هالفرحة بصدره واختفت بلحظة واحتل الضيق صدره مشى راجع لسيارته
نواف اتسعت عيونه/هيه يالنسيب
رازي متجه لسيارته بباله المشغول ماانتبه لنواف ونداه
نواف/رازي!!
رازي ركب سيارته وقف عنده نزل قراره/باروح لبين واجيبه نطلعها
نواف/بـيّـن ماهو ببيته
رازي قطب جبينه/وينه
نواف بتفكير/الظاهر انه رايح لبيتنا
رازي اتسعت عيونه وحرك بسرعة
نواف جرى ورا سيارة رازي/هيه رازي هيييه طيب خذني معك خذني
.........................................
<<بيت منيرة>>
منيرة تناظرهم بحدة/وش اللي يصير من وراي يابنات خلف
غصنة/ترانا بناتك يمه بعد
منيرة ناظرتها بحدتها
غصنة سكتت
منيرة ناظرت غيمة/بتقولين ولا اختك تقول عنك!!
غيمة بملامح وجهها اليائسة/انا و رازي بنعرس مثل ماسمعتي
منيرة بغبنة منها/على كيفك هو تردين وترضين من راسك!!لعبة هي وبعدين كيف تتخطيني وتروحين لجدك!!عمري رديتك عن شي أنا!!
غيمة/انا كلي لعبة تودوني يمين ويسار وكله اقول على ماتحبون ماعمري رديت احد الشي الوحيد اللي رديته/بغصة/رجعت به عن ردي حتى ارضيه 
منيرة ضربتها كف على وجهها
غصنة تناظرهم بصمت بخوف تأخذ مااخذت غيمة
غيمة ناظرت أمها بحدة
منيرة/نزلي عيونك عني لاافقعهن تناظريني بهاللون بعد!!
غيمة مستمرة بنظراتها
منيرة/يوك عليك يامنيرة ماربيتي ماعرفتي تربين
غصنة اتجهت لامها واحتضنت ذراعها/يمه والله انك احسن من يربي ياام ظاهر/ناظرت غيمة بنظرات تبيها تنزل نظرها/
غيمة صدت بقهر
منيرة سحبت يدها من غصنة/اسمعي عاد دامك من رأسك رضيتي ورميتي روحك على الرجال بعد ماقنع تحملي مايجيك/اشرت على باب بيتها/ لو دخلتي من هالباب يوم تشتكين رديتك دربك مع نفس الباب
غيمة ناظرتها نظرة يأس من امرها
منيرة عبست بوجهها بعدم فهم لهالنظرة/علامك مااعجبك قولي!!
غيمة وقفت متجهة للمطبخ/أنا كلي مااعجبت نفسي ليه انتظر من هالحياة شي يعجبني/خرجت من الغرفة/
منيرة ناظرت غصنة وباستجواب/وش علمكن البارح
غصنة/عشاني فحطت بها وانفجعت
منيرة ناظرتها بتكذيب/وغيره
غصنة/وغرزت بها بهالليل ماحولنا احد وأبطى بـيّـن ماجانا
منيرة ناظرتها بتكذيب لكلامها بدون تنطق حرف
غصنة توترت من نظراتها/يمه تبين اكنس البيت
منيرة انقطع شكها باليقين من قالت هالكلام تنهدت/مير مرد المستور ينكشف كانه مايرضي الله
غصنة بلعت ريقها
منيرة/روحي اكنسي وش تحترين
غصنة/بس الصالة الباقي مو علي/خرجت تجري/
منيرة زفرت بشكها قفلت الباب ورا غصنة بالمفتاح مدت يدها لجوال غيمة بنبضات قلبها السريعة لأول مرة بحياتها تفتح جوال احد من عيالها
.........................................
<<بيت طاهر>>
رازي وقف بسيارته قبال بيت الشعر بنبضات قلبه السريعة وكأنه قطع المسافة على رجوله مو بسيارته نزل بوجهه المخطوف من سيارته واتجه لبيت الشعر بخطوات سريعة دخله عبس بوجهه من ناظره خالي من اي زول التف لوراه راجع لسيارته
طاهر خارج من بيته متجه لبيت الشعر ابتسم من ناظره على مسافة وبابتسامة/رازي ياولد يارازي
رازي التفت وراه يناظر الصوت ابتسم اسرع بخطواته له وقف قباله مقبل راسه
طاهر بابتسامة/عساك سالم وانا جدك عساك سالم/مد يساره المتاحة عكس يمينه المشغولة باستناده على عكازه واحتضنها بابتسامة مكمل طريقه باتجاه بيت الشعر/
رازي مشى معه
طاهر/هاه يارازي كان قلت حصل ماتمنيت وش تعطيني؟
رازي بابتسامة شاحبة من معرفته/وافقت غيم سماي؟
طاهر وقف والتفت يناظره/ياولد عني العلم سابقني يمك من معلمّك؟
رازي/هالوجه ماوراه الا كل خير من اقبلت علي دريت
طاهر ناظره بشك للحظة وبابتسامة/مير عساه مبروك وانا جدك عساه مبروك
رازي كل ماحوله يتراقص فرح بتحقق ماتمناه لكن ذاك الشعور السيء محتل اوسط قلبه رغم الفرح ماقدر يتجاهل هالشعور فرحته ناقصة بكل ماتعنيه الكلمة/الله يبارك فيك ويخليك لنا ياجد
طاهر دخل لبيت الشعر/امين امين
رازي وقف على بيت الشعر وانحنى ينزل جزمته اعتدل بوقفته رفع عينه وطاحت على ذاك البعيد الجالس على السيارة ومتكتف رجف قلبه من ناظره
يـقـيـن جالسة داخل السيارة متكية عالدريكسون وعينها عليه له فترة بهالهدوء جالس وعينه عالبيت بدون اي حركة منه
بـيّـن الجالس على كبوت سيارته متكتف صار له فترة ماقدر يتجرأ ويدخل البيت حامل معه هالاخبار الثقيلة الهادمة لثقتهم باخواته كيف يقيس الثنتين بنفس المقياس وهذا ظلم وعظيم جدا وهو ذاق الظلم وعرفه يكفي انه تحطم ليلة البارح وانتهى اكتفى بجلوسه فوق سيارته يراقب البيت بحيرة ،عسى يستجمع شجاعته ويصارح الكل او يلقى حل لهالمشكلة الثقيلة المكروهة لقلبه احتدت ملامحه من عرف السيارة شد على قبضته بغبنة من ناظره ينزل من سيارته بالامس كانت هالهيئة من احب واقرب الهيئات لقلبه واليوم من ابغض ماشافته عينه وأثقلها عليه فك تكتيفته ونزل من فوق الكبوت
يـقـيـن اعتزلت بجلسته من ناظرته يتحرك همست لنفسها/نزل نزل/رددت/اللهم اكفنيه بما شئت وكيفما شئت
بـيّـن ركب مكان الركب وقفل الباب بقوة بدون يناظرها/مشينا للبيت
يـقـيـن ناظرته للحظات بذهول من قراراته المتقلبة/ابشر/شغلت السيارة/
بـيّـن فك غترته وتلثم وقرب بجلسته منها
يـقـيـن التفتت تناظره باستغراب من قربه
بـيّـن انحنى بجسمه وسند راسه على رجولها وتمدد باقي جسمه عالمقعد
يـقـيـن اتسعت عيونها من حركته
بـيّـن تكتف مغمض عيونه/سوقي زين ترا الددسن دوبه دوبه
يـقـيـن اشتد جسمها بتوتر منه وسط اخذها لانفاسها ببطئ حتى ماتزعجه
بـيّـن بصوت خافت/علامك مامشيتي
يـقـيـن حركت القير ومشت بالسيارة/بسم الله
رازي تقدم بخطواته وعينه على سيارة بـيّـن اللي بدت تتحرك
طاهر/علامك ياولد ابطيت
رازي وعينه عالسيارة المبتعدة بضيق/ابشر ياجد ابشر
.........................................
#شقّ_الغَمام