شـقّ الـغَـمـام

..(١٤)..

..(١٤)..
استغفر الله العظيم واتوب اليه
-
ناصر جلس قبال عزيز وخلفه وداد
ظاهر ناظر ناصر عن طرف وشال عينه بملامح الكره
عزيز ناظر ظاهر وبابتسامة هادية/ياابن الحلال اجلس ومايصير الا اللي يرضيك اجلس بس
ظاهر جلس بالزواية مبتعد عنهم
وداد عضت شفتها بقهر من تصرفه
ناصر اتسعت عيونه ثم ناظر عزيز/ياشيخ ترضيك سواته بحضورك!!
ظاهر ناظره باستصغار/ماني من اللي يقيّم بحضور احد وجودي يفرض وجوب احترامه
سهم ناظره بحدة
ناصر احتدت نظرته/وشو!!
عزيز زفر بابتسامة من شوفته لنفسه
وداد بغبنة/ياشيخ
عزيز رفع يده بوجهها يسكتها
وداد احتدت نظرتها من فعله
ناصر التفت لها بحدة
عزيز/ياظاهر اخذك لولدك بالقوة مايرضي الله ولا هو بحق
ظاهر بحدة/اي قوة!!من دهر والولد يربى عند ابوه
عزيز/هذاك اول ذالحين تغير الاول
ظاهر ناظر ناصر باشمئزاز/ماتغير شي لا صاروا اهله هالاشكال
ناصر وقف واتجه له بانفجار/انا ولد ابوي
عزيز رفع صوته/ناصر
ناصر وقف قباله شاد على قبضته يناظره بغبنة
ظاهر ناظره بابتسامة رضا
عزيز/ناصر
ناصر التفت له
عزيز/ابشر باللي يرضيك ياابو منور ارتاح وانا اخوك ارتاح
ظاهر احتدت نظرته
عزيز ناظر ظاهر/ياابو ضاري الامور ماتنحل بهاللون زينة الامور التفاهم
ظاهر/وثم؟
عزيز/كان بغيتها قوة فهي بالمحكمة وتاليته مع امه
وداد ابتسمت برضا
ظاهر ناظره بغبنة
عزيز/اخر ابليس وقل لااله الا الله
ظاهر/الف من ذكره
عزيز/الولد يخيّر
ظاهر ابتسم
وداد باعتراض/لا مايخير وابوه متزوج ذالحين!!
ظاهر/وزواجي ماهو بعذروب ابد
وداد/لو هو لحالك ماعليه اقول عند عمتي مير وليدي واذل عليه من القهر والظليمة
عزيز ميل فمه بابتسامة سخرية/ليت الظلايم كلها من بنت خالتي يا ماابرد ظلايمها ويا ماازينها!!
وداد شدت على قبضتها بقهر متناسية صلة قرابتهم
ظاهر ابتسم برضا
عزيز تنهد/مير نقطع السالفة ثلاث ايام عند كل واحدٍ منكم
ظاهر التفت له بوسع عيونه
عزيز/واليوم الاخير اسبوع عند امه واسبوع عند ابوه
ظاهر بحدة/تـ
عزيز قاطعه بنظرات جادة/اي اعتراض انا بنفسي ارفع السالفة للمحكمة واسعى بها
وداد ابتسمت برضا المهم كدرت صفوة باله
ظاهر وقف وخرج بخطوات سريعة
ناصر بابتسامة/يكثر خيرك ياشيخ عساك بالحق ساعي ومقبول
عزيز بتحذير/مير ياناصر كلن يعرف مقامه ماهو بزين مناطحة عيال الشيوخ
وداد احتدت نظرتها بقهر من تهديده وقفت وخرجت
.........................................
<<بيت بـيّـن>>
بـيّـن المغيّر لمكانه عن ليلة البارح بعد صلاة الفجر متمدد على مسافة امتار معدودة عن بيته عبس بوجهه منزعج من حسّ واخيرا بحرارة اشعة الشمس جلس يحاول يصحصح من نومته المليانة بكابوس هروب يـقـيـن فرك عيونه باطراف اصابعه واحتواه الضيق من ذكر اليوم اول ايام رجوعه للرعي كانت اجازة زواجه اسبوع فقط تنهد والتفت ناظر طرق يدور حول الصحون القريبة منه اتسعت عيونه وفز جاري وراه مبعده وبحدة/طرق يامال المطارق اي والله
طرق ابتعد
بـيّـن انحنى شبه جالس قبال الصحون يفتحها ميل فمه باستغراب من ناظر صحن الفتة وصحن التمر ناظر الترامس وتفقدها ترمس شاهي وترمس قهوة وارتفعت حواجبه من ناظر ترمس موية حارة
يـقـيـن الواقفة على باب البيت من داخله مازارها النوم طول ليلتها بوسط افكار ومشاعر متناقضة احتوتها فكرة كونها على حق تضاءلت بهالليلة وكثير داهمها شعور الذنب لتصرفها الوحيد الخاطئ بعينها(الهروب بالمحطة)ومن جهة ثانية ترفض كونها صاحبة خطأ مية بالمية وهالشي مايعطيه الحق ينسبها لمبروكة ويتجاهل ابوها تماما غضت النظر والتمست له العذر كون تصرفها قوي بالحيل عليه وكمبادرة اعتذار جهزت له الفطور وظلت تراقبه من بعيد محتفظة ببقايا كرامتها لنفسها
بـيّـن التفت يناظر بيته
يـقـيـن خرجت راسها تناظره للمرة الالف على امل يصحى قبل يغدر فيها طرق ويحوس النعمة وتضيع مبادرتها اتسعت عيونها من ناظرته يوقف
بـيّـن ميل فمه بابتسامة من لمح طرف السواد على باب بيته اعتدل بجلسته ووقف
يـقـيـن دخلت نفسها بسرعة لداخل تدعي بينها وبين نفسها/يارب ماشافني يارب ماانتبه يارب
بـيّـن صفر/طرق
يـقـيـن عبست بوجهها من سمعته ينادي خرجت راسها بفضول
بـيّـن يمشي وبيده ترمس القهوة وترمس الشاهي وفرغّها تحت نظرها عالارض
يـقـيـن اتسعت عيونها من تصرفه وشهقت من ناظرت طرق ياكل من صحن الفتة اجتمعت غصّة بحلقها من كبر احساسها بالاهانة بهاللحظة
بـيّـن انحنى شبه راكع ينزل الترامس عالارض يناظر طرق/لاتشبع ياولد كبّ الباقي للحمير يحسنن النعمة
يـقـيـن عضت طرف شفتها بقهر من كلامه وندم على فعلها له خرجت جوالها تكتب بسرعة
بـيّـن مشى لطرق حتى يبعده/ياهيه لاتشبع ورانا شيل وحط اليوم لاتشبع/خرج جواله من حس به يهتز وفتح رسالتها(ابي اروح اليوم لسطام) تنهد وارسل رده ومشى وسط همهمته بالحانه المعتادة
يـقـيـن امتلت غبنة فوق غبنتها من قرت رده(الزيارة تبدا الـعـصـر اقضبي ارضك لاقضيت اشغالي اشوف)اتجهت للسرير وارتمت فوقه مغطية لنفسها من كثر الشعور الكريه اللي احتواه بهاللحظة كيف اهانها ورفض اعتذارها لامت نفسها كيف تنازلت له بهالسهولة وهي اللي ماتتنازل حق احد ابد ضمت نفسها تكافح عبرتها لاتخونها وتنزل واعدة نفسها ماعاد تعتذر له ابد وهو مايقدر الاعتذار ويحترم صاحبه
.........................................
<<مجلس الشعر>>
عايض جالس قباله بغيظ تارك فنجاله على حاله بدون مايلمسه ووصلت قهوته لحد البرودة
طاهر يتقهوى ببرود
عايض ناظره من طال الصمت بينهم/ياابو عياش
طاهر ابتسم بعد ماكان يلاحقه ياعم ياعم اصبح الان ابو عياش/خير ياابو خالد
عايض/بنتك راكبة راسها وهاملة العيال
طاهر بتشره/الله يالدنيا عقب هالسنين عودّت بنتك ياطاهر
عايض ميل فمه بعدم اعجاب بطريقته
طاهر نزل فنجاله وبجدية/وشو له لافي يمي ياعايض؟
عايض بغيظ/والله ياابو عياش خابرن وشو له جاي
ظاهر/مير اللي اشوفه ملامة!!
عايض بنرفزة/غالية مخطية ياعم
طاهر/بنتي ماتخطي ابد
عايض ناظره بغبنة/الا اخطت وبالحيل ظنيت مثلك الى ماسمعت وشفت بنفسي
طاهر/مير جرّ الهروج طبوعكم يابني سمّار
عايض بحدة/وشو
طاهر/اعلمك العلم غالية مااخطت ابدن ابد هاذي هي صابرة سنين عليك وعلى خواتك مانطقت حرف ولا عدا عتبة باب بيتها علم
عايض يناظره بغيظه
طاهر/واذا تلوم عشان العيال كثر الله خيرها هاذي هي سنين قايمتن بهم ماقصرت يومك تزعلها دورك تقوم بعيالها وانا بنيتي تعود يمي لحالها مثل مااخذتها لحالها
عايض بغبنة/المفروض تسعون بيننا
طاهر/كانك لافي يمي تبي التشره حنا اهله وأحق به وكانك لافي تبي المودة علومك بهاللون ماتنفع معنا ابد/انحنى للدلة وصب له فنجال/
عايض/هذا اخر علومك!!
طاهر يتقهوى  بدون رد
عايض بغبنة/غالية تدري؟
طاهر ناظره بحدة/ماورا كلمتي كلمة ياولد
عايض وقف واسرع بخطواته خارج بغيظ
.........................................
<<بيت ظاهر>>
نور واقفة قبال مراية التسريحة حانية نفسها باتجاه المراية تتفحص بنظراتها الاثر على رقبتها رفعت يدها تلامس باطراف انامل كفها هالاثر غمضت عيونها من حست بوجع خفيف ناظرت نفسها واعتدلت بوقفتها بفزع من استرجعت احداث البارح فزت من سمعت صوت دق الباب اسرعت بخطواتها مبتعدة عن المراية متجهة لدولابها فتحته من وقفت عنده سحبت سكارف من الداخل ولفته حول رقبتها مخفية الاثر ثم اتجهت من اعتلى صوت الباب/طيب طيب/فتحت الباب بدون تردد بمعرفة للي خلفه بابتسامة/ياهلا ومية مليون مرحبا هلا بغصنٍ وقف عليه الطير مهلي
غصنة ضمت نفسها وبذوبان وسط ابتسامتها/قلبي والتراحيب
نور ابتسمت لردة فعلها/وفاحت وروده بريح المسك مرحبة هلا بغصيّن حلوة المبسم طيبة القلب صافية النية ياهلا ومرحبا
غصنة ضمت نور/عساني ارحب بضيوفك يوم عرسك
نور قطبت جبينها باستيعاب لكلامها
ظاهر الواقف وراها مسك اعلى قميصها الروز وسحبها لورا مبعدها عن نور/عساك رحبتي بعرسنا؟
نور تركت غصنة وبلعت ريقها من ناظرته
غصنة اختنقت/ايه ايه رحبت زين
ظاهر رفع قميصها اكثر لفوق
غصنة وقفت على اطراف اصابع قدمها/ترا خطا مطبعي وانا اختك ماقصدي شي
ظاهر تركها بغيظ ثم رفع نظره عنها والتفت نظراته بنظرات نور
نور توترت من نظراته وبابتسامة/غصنة مشينا جدتي تحترينا
غصنة ناظرتها باستغراب ثم ناظرت ظاهر هزت راسها/ايه صح جدتي تحترينا
ظاهر ميل فمه بفهم لتصريفتها/علامكم واقفات يالله على جدتي لاتبطن
نور شتت نظراتها عنه متجنبة لنظراته احتضنت ذراع غصنة واسرعت بخطواتها ساحبة لها معها
ظاهر دخل للبيت وضرب الباب بكل قوته وراه
نور فزت والتفتت وراها تناظره زفرت براحة
غصنة بدون تناظرها وعينها لقدام/نور ترا ظاهر اخوي
نور ناظرتها
غصنة/لايغرك اسلوبه ذا ترا قلبه حنيّن وبالحيل/احتدت ملامحها بكره/مير كله من/سكتت/
نور تنهدت بحيرة هل فعلا ظاهر الرسمي او الجاف بالاصح ممكن يكون حنون تحركت بخطواتها مع غصنة من حست بسحبتها
غصنة اسرعت بخطواتها/امشي امشي نشوف جدتي وش عندها من علوم
.........................................
<<بيت مضاوي>>
غيمة خرجت من المطبخ بين يديها صينية الفناجيل
غيمة الصغيرة وقفت عندها محاوطه رجولها بيديها الصغيرة/عيمة
غيمة وقفت وبابتسامة/يالسمية كبيني
غيمة الصغيرة تعلقت بها بعناد
غيمة غيرت صوتها/انا الوحش جيت اكل العناديين
غيمة الصغيرة صرخت وجرت مبتعدة
غيمة نزلت الصينية وجرت وراها بالحوش تخوفها وسط اصوات صرخات غيمة الصغيرة احيانا وضحكاتها احيان ثانية
مضاوي تناظرهم بابتسامة وبحضنها الكيس المرسول لها من حمدة
غيمة الصغيرة ارتمت بحضن جدتها
غيمة جلست قبالها وبيدها الصينية وسط انفاسها بابتسامة فتحت الترمس المتواجد قبال مضاوي ومدت لها الفنجال/سمي ياجدة
مضاوي اخذت الفنجال ونزلته وقلبت بالكيس/ماعلمتك وش تبيني اسوي به
غيمة/لا ماعلمتني بس تقول انك فطينة بتعرفين وش تبي به
مضاوي ميلت فمها بعدم رضا وسط افكارها/علميها تتصل بي ولا تسير علي
غيمة/حتى جدة سرور ماعلمتها تقول خوياتي فطينات
مضاوي/الله والكذب وين الفطنة وحنا نناظر الكيس ماندري وش تبي
غيمة بابتسامة/السالفة ماهي بفاطنة السالفة ماتبيني اعرف شي
مضاوي بضحكة خفيفة/بذي صحيح
غيمة/برد فنجالك ياجدة
مضاوي كبته عالارض/صحيح برد/مدته لها/جدديه
غيمة بحضنها غيمة الصغيرة تلعب معها بهدوء/ابشري/اخذت الفنجال صبت لها /
مضاوي/يوم انتي والفطانة اخويا علميني
غيمة رفعت نظرها عن الفنجال لمضاوي بتوتر/عسى ماشر ياجدة
غيمة مدت لها الفنجال
مضاوي رفعت يدها بتمنع/يحرم اشرب من يدك فنجال يشهد الله
غيمة اتسعت عيونها/ليه طيب!!
مضاوي/هاه وين فطانتك ذالحين
غيمة نزلت فنجالها وسط تنهيدة بدون تناظرها/مابه نصيب
مضاوي/وش ان هي عذاريبك وهو مابه العذروب
غيمة ناظرتها بضيق
مضاوي/استغفر الله به عذروب صغيّر مير هاذي هي بين يدينك تلاعبينها
غيمة/ياجدة
مضاوي قاطعتها/ياغيمة كان بوجهه النور وانطفى
غيمة التزمت الصمت
مضاوي تنهدت/كان سمعتي شي منا ولا منا هو بوجهي وانتي بوجهي منه انا معك كان شفتي من وراه ذرة
غيمة التمعت عيونها بطيف من دمعها وبينها وبين نفسها/خذي حقي منه ضيع سعادتنا بافعاله/بلعت غصتها/ياجدة رايته بيضا ماسمعت عنه الا كل خير
مضاوي/علامك رديتيه
غيمة/مالي بالعرس انا مااصلح للجيزة
مضاوي اتسعت ابتسامتها/اجل ابشري
غيمة بذهول/هاه!!
مضاوي/دام ماتبين طاري العرس هينة هاذي
غيمة/لا لا ياجدة
مضاوي امتلت فرح وبابتسامة/الله يصلحك بس ركبتيني هم فوق الهموم
غيمة بانفعال/رازي مااخذه مااخذه اد
مضاوي اختفت فرحتها وناظرتها بصدمة
غيمة/انا ورازي مابيننا شي ولا بيصير بيننا شي/دفت غيمة من حضنها ووقفت/وصلت غرض جدتي يمك فمان الله ياجدة/مشت/
مضاوي ناظرتها بصدمة يخالطها الاستغراب من ردة فعلها
غيمة متجهة لباب بيتهم بتخرج وهي تربط حبال نقابها حول راسها بانفعال تسارعت نبضات قلبها من ناظرته خارج من المجلس اللي بطريقها
رازي ناظرها وارتجفت كل خلية بجسمه من التقت نظراته بنظراتها همس بكل مافيه من شوق وحنين ولوم وندم/غيمة
غيمة عضت طرف شفتها بقهر وسط محاجر امتلت دموع تجدد شعور الوجع اللي ظنت نسته من اول ماشافته اسرعت بخطواتها مكملة طريقها
رازي وقف بطريقها
غيمة وقفت مجبرة من وقوفه قبالها وسط اتساع عيونها لفت يمينها عنه حتى تتجاوزه
رازي لف بنفس طريقها بقصد/اسمعيني
غيمة ناظرته وبحدة/بتبعد ولا يعلى صوتي
رازي ناظرها بوجع احتواه من حدة نظراتها له وكان هالعيون ماعرفته بيوم ولا تغنت به شد على قبضته وابتعد عن طريقها
غيمة اسرعت بخطواتها مبتعدة عن هالمكان بكل مافيها
.........................................
<<بيت سطام>>
ام سطام واقفة بوسط البيت وكومة اغراضهم تتوسط هالحوش شدت على يدها بقهر
ريوف تلف البيت بعدم تصديق لتواجدها بهالمكان مرة ثانية انتهت خطواتها بوقفتها قبال امها بغبنة/ وش اللي صاير يمه
ام سطام ناظرتها بحدة وسط صمتها
ريوف/مستحيل جدتي تطردنا كذا اكيد فيه شي
ام سطام/وش قصدك
ريوف/يمه كان زعلتي جدتي تسمحي منها ترا خاطرها طيب ترضى على طول
ام سطام ناظرتها تكبح نفسها لاتخرج مابداخلها عليها/شيلي الاغراض وانتي ساكتة شيلي يالله
ريوف التفتت للباب بابتسامة من سمعت صوته بهروب عن الشغل/انا افتح
ام سطام/اصبري اصبري
ريوف كملت طريقها بدون اهتمام لامر امها وفتحت الباب احتدت نظرتها من ناظرتها
غصنة محتضنة القدر على جنبها الايمن/وينها راعية البيت
ريوف بحدة/وش تبين؟
غصنة رفعت صوتها/راعية البيت!
ريوف عبست بوجهها من صوتها
غصنة خفضت صوتها للطبيعي/ماتسمعين؟
ام سطام وقفت عندها/خير وش تبين
غصنة/جدتي تسلم عليك
ام سطام ارتفع حاجبها باستغراب
غصنة مدت القدر/وتقول الحمدلله على سلامة سطام وهالعصيدة لوليدنا
ريوف ناظرت امها
ام سطام اشرت لها بلا
غصنة مدت القدر اكثر لريوف ولامستها
ريوف بحدة/هيه انتي!!
غصنة/هالعصيدة لوليدنا ماهي بلكم لاتحدى نقيطة منها مع هالبلاعيم
ام سطام/يابنت انتي ماربوك اهلك!!ماتعرفين العيب!!
ريوف/وين التربية واللي مرسلينها هم
غصنة انحنت نزلت القدر عالارض واعتدلت/ترا جدتي ماتسلم عليك ولا قالته
ام سطام احتدت نظرتها
غصنة/مير امي مربيتني اجبر خواطر حتى لو انهم مايستاهلون
ريوف مدت يدها حتى تمسكها
غصنة ضربت يدها مبعدتها
ام سطام مدت يدها مسكت ريوف توقفها
ريوف بقهر/يمه
غصنة/مثل ماامي ربتني جدتي ربتني والله لاأغطس ذا الوجه بوسط هالقدر
ام سطام ناظرتها بحدة
غصنة/مير حرام عصيدة وليدنا تنجس!!/مشت/
ريوف تحركت وراها/هيه ماالنجس غيرك تعالي تعالي يالله
غصنة التفتت لها واشرت بيدها يمه السلامة كملت طريقة مهمهمة بصوت عالي
ام سطام شدت على يدها بقوة توقفها
ريوف تسحب يدها/يمه فكني
ام سطام/كبيها اللي يبي له تأديب ماهو هي اللي ارسلها كبيها تروح
.........................................
<<بيت طاهر>>
حمدة تناظرها وبحدة/وراها الصبر لين ماوقع الفاس بالراس هاه وراه
غالية الجالسة بطرف الصالة على مسافة بعيدة عنها/يمه عايض من اول مابه عيب البلا خواته
حمدة/عشر يامال العافية ياغالية عشر
نور الحاضرة ضمت يديها بصمت واحراج
غالية صدت بصمت
حمدة/علميني ذالحين وش ذنبهم الضعوف هاه والله ان القاعد بها امه الضعيفة وبنيتك ولا هن ماحولهن شقى ولا عنا
غالية/احسن خليه يشوف بعينه ويعرف ان الله حق
حمدة مسكت راسها/واشيب عيني لكم الله ياعويلة غالية لكم الله/ناظرتها/خافي الله ضعوف اكبرهم عشر واصغرهم اربع شهور خافي الله
غالية بعناد/اكبرهم ١٨ وعلى راسهم ابوهم يقومون بهم
حمدة/ياويلك من الله ياشينة ورا ماكبيتيه قبل كل هالهويش وراه
غالية تكتفت بعناد
حمدة التفتت لنور/وانتي
نور ناظرتها/نعم ياجدة
حمدة بحدة/لاتعملين مثلها سمعتيني
نور ناظرتها/ابشري
حمدة بغبنة/ماهو بترصين الجيش ثم تقولين ماابيه سمعتي ولا لا
نور/ان شاء الله
حمدة مايرد قلبها للحين/كان هاللي عندك شراة اللي عندها اياني واياك تقعدين على ذمته دقيقة سمعتي
غالية بوسع عيونها/يمه!!
نور هزت راسها بايه/ابشري ياجدة
حمدة/كبيه ماهو باخر الرجال واللي خلقه خلق ازين منه واجد
ظاهر دخل/ليه التجني ياجدة ليه بس
نور بلعت ريقها بتوتر كونها مادافعت عنه
غالية وقفت حتى تسلم عليه بابتسامة/ليت الرجال مثل ظاهر يمه بار بامه زين لاخوانه وخواته رضي بعماته شايل جدانه فوق راسه
ظاهر حاوطها بيديه محتضنها وسط ابتسامة
غالية/الا ياحظ نور وياحظها فيه
ظاهر بابتسامته/كفو ياام خالد كفو اقديتي به اقديتي
غالية بابتسامة/كفوك الطيب ياولد خلف
ظاهر/علميه يابنت جدي علميه من انتي
حمدة بغبنة/ايه ايه اجتمعوا راعين الاولة اجتمعوا
ظاهر ترك غالية وبزعل/ياجدة علامك علي وش سويت
حمدة/اسمع ياظاهر كان ناويها سمهدة ببنت عمك تسريح بمعروف وفكنا
ظاهر اتجه لنور انحنى شبه راكع مد يده لها
نور ناظرته بتردد
ظاهر انحنى اكثر ومسكها يوقفها له شاد على كفها بكفه/اعوذ بالله علامك ياجدة شغالة تخبيب اليوم!!
حمدة/عشتوا يابني طاهر ذالحين انا تخبيب!!/ناظرت نور/بنت هالهيس مسوي بك شي علميني
غالية/يمه!!امداه يسوي شي بسم الله عليهم الله يصلح بينهم ويسخرهم لبعض
حمدة/انثبري يابنت طاهر ولا طسّي عني برا
غالية اتسعت عيونها/يمه
حمدة ناظرت نور بحدة/علميني ماعليك من هالاشهب
نور ابتسمت بضحكة
ظاهر ناظرها وابتسم لضحكتها/يازين الاشهب ولا يانور
نور انصدمت من سؤاله لها
ظاهر بتاكيد على سؤاله/هاه وشلون الاشهب بعينك
حمدة بطفش منهم/اقول اطلعوا كلكم عني صدعتوا براسي اطلعوا عني يالله
غالية اتجهت لها وجلست جنبها/ماني بطالعة ولا رايحة لاحد بجلس عندك يمه خليني اشبع منك زين
حمدة دفتها/امشي عني يالعوبا لسانك وش طوله علي والخياب
نور تناظرهم بابتسامة لهالمنظر المفقود ببيت امها وكثير  رمشت من حست بنفسها تنسحب التفتت تناظره تجر خطواتها معه
ظاهر المحتضن كفها بكفه خرج معها من بيت جدهم متجه للبيت/اشوف اعجبتك سوالف جدتي تسفل بي وانتي مبسوطة
نور هزت راسها بنفي/استغفر الله لا والله بس ماقدرت اقول شي وجدتي معصبة بالحيل
ظاهر فتح الباب بيد والتفت يناظرها وهو بنفس وضعه/كانه جازت لك الاشهب
نور هزت راسها بكذب/ابد ماجازت لي
ظاهر دخل لبيته ودخلها معه وكفه بكفها قافل الباب وراهم والتفت يناظرها
نور ثبتت بمكانها وتغير وجهها بتوتر
ظاهر بابتسامة/والضحكة كانها ضحكة موافقة عاللي انقال
نور سحبت كفها منه وباسترسال/استغفر الله مابه أشهب غير الغنـ/سكتت/
ظاهر اتسعت عيونه/اها اشوف كبر الضحكة ذا نهايتها!!
نور/مااقصد والله
ظاهر هز راسه بايه لف عنها متجه للغرفة
نور/تعرف كيف جدتي ترمي الكلام
ظاهر التفت لها/جدتي ذا طبعها مير انتي وش طبعك وانتي تسمعين هالكلام عني
نور/هي جدتك وجدتي بنفس الوقت وش ابرر ووش أكب لها وش ابرر لك انت بعد ووش بأكب
ظاهر/يعني؟
نور/يعني جدتي لاتاخذ منها كلمة وقت زعلها وانت ادرى بها مني!!
ظاهر زفر بصوت وهو ينزل جواله عالطاولة جنب الباب خارج الغرفة/يصير خير/فتح الباب حتى يدخل/
نور/ظاهر
ظاهر التفت لها عن جنب يناظرها
نور/لا صار المتكلم غير تأكد بيختلف الوضع
ظاهر هز راسه/الايام جاية والله يقويك تصبرين واصبر معك مثل غالية/دخل وضرب الباب وراه بقوة/
نور جلست وسط خوفها اللي تكتمه من لحظة دخولهم للبيت همت لنفسها بنفسها/عادي الوضع عادي طبيعي حتى مامر بباله شي/اخذت نفس تهدي رجفتها/
.........................................
<<بيت سلام وسلمان>>
سلام بغرفتها قافلة الباب قبالها الكتاب تقرأه بصعوبة تنهدت بضيق لها ساعة وهي بصفحة وحدة اتجهت للباب فتحته بابتسامة/ياهلا ومليون مرحبا حياك
سلمان دخل مرر نظره على حوسة الكتب/هاه بشري كيف الامور
سلام بابتسامة/الحمدلله زينة الامور
سلمان جلس سحب دفترها يناظر حلولها/لا ماشاء الله صح عليك
سلام بضحكة/ماتدري كيف حلها صح
سلمان مسك راسه/صدعت
سلام ضحكت/وش تبي
سلمان ناظرها بتردد/عادي يعني بدون زعل
سلام/انت وصلت الى هنيا قول
سلمان/سالفة البارح
سلام/مثل ماسمعت
سلمان/مير ياس
سلام قاطعته/سلمان ماوافقت على عماي فكرت به مليون مرة قبل
سلمان ناظرها بشي من عدم التصديق
سلام تكتفت/هيا انت قول لي كيفه هالسطام
سلمان/ماعليه زين يعني ماعليه شي ملاحظ
سلام/جدي يقول يخاف الله وذا اهم شي
سلمان/مير ياسلام ابوي صادق
سلام بحدة/وانت مااسرعك تسمع له!!
سلمان تنهد/يظل الاب له نظرة ياسلام
سلام/وانا لي نظرتي وابيه انتهينا ياسلمان قفل الموضوع
سلمان ناظرها/سلام فكري زين لاتندمين بعدين
سلام/الله لايجيب الندم وخلاص سلمان خلاص قفله طلبتك
.........................................
<<بيت ام عايض>>
،،غرفة ام عايض،،
سعاد بعبايتها قبالها بفجعة/علامك يمه وش يوجعك
سالمة جالسة جنبها بدموعها/يمه وش فيك وش صايبك ذالحين نوديك يالله/مسكت يدها حتى تقومها/
ام عايض متمددة على فراشها بصمت ماتحركت تناظرهم  بملامح هادية بدون اي تعبير
سالمة انفجرت تبكي ناظرت سعاد/يمه الليلة ياسعاد امي علامها
خلود دخلت ومدت المفتاح لجدتها/هاه ياجدة
ام عايض مدت يدها واخذتها وجلست بهدوء/قفلتيه زين
خلود/ايه ياجدة
سالمة تناظرهم باستغراب
سعاد تمرر نظرها بينهم بحيرة/العلم وشو
ام عايض/خالد غيره زين
خلود بابتسامة/حتى ابوي مايقدر يدخل
سالمة/علامك يمه
ام عايض سحبت عكازها احتضنته وبتهديد/عاد العلم انتي وياها رجالكن والعلم بياصلهم مالهم حريم عندي
سعاد اتسعت عيونها بصدمة
سالمة بفجعة/يمه!!
ام عايض/وعيال اخوكن اللي احرمتوهم من امهم محد بيقوم بهم غيركن وحتى خدمتي اللي ماهي مكلفة بها غالية تقومين بها على حقها وهذا واجب عليكن غصبن عنكم يالثنتين
سعاد بنرفزة/يمه
ام عايض/وصمة كلمة تطرينها ورب الخلق انش ماتعودين يم رجلك وانا بنت ابوي
سعاد انصدمت من جدية امها
ام عايض/يامال الذهاب يابنات عليان يامقواكن مير انا اربيكن من جديد محد يطبخ وينفخ وينظف ويراعي الورعان غيركن يالثنتين
سالمة/وبيوتنا يمه
ام عايض/مابه بيوت الى ماتعدلن اللي افسدتنه يامال المفسدة ياذا الروس
سعاد/يمه
ام عايض ضربتها بعكازها
سعاد توجعت/اه
ام عايض/وهواه تهوي بكن يالله برا كل وحدة تشف لها شين تسويه يالله
.........................................
بـيّـن منتصف الجبل العالي رابط ثوبه حول وسطه وثاني يديه يناظره بوجهه العابس/يامال الذهاب قل امين
رازي الجالس على بعد مسافة بسيطة اسفل منه ماسك رجله رافعها بألم مرتسم على ملامحه/يذهبك معي يالاقشر
بـيّـن نزل باتجاهه/انت من مسلطك علي اليوم هاه
رازي/كب الهروج واسرع شف علامها رجلي
بـيّـن انحنى شبه جالس عنده/الله لايسلطك على مسلم ياشيخ
رازي/داري اني شيخ بس اعجل علي
بـيّـن عض شفته بقهر منه وناظر رجله وضربه بيده/وين
رازي فز بألم/وجعاه يابـيّـن وجعاه
بـيّـن/وين اللي يوجعك مااشوفه
رازي/شي دخل بها مااقدر اطى توجعني
بـيّـن ضيق عيونه يناظر بتمعن/شويكة وش صغرها
رازي ميل راسه يناظر رجله اتسعت عيونه من ناظر الشوكة الواضحة/شويكة!!كان ذي كلها شويكة بعينك ياعلها بـ***
بـيّـن بطفش منه/يوم انك ماانت من اهل الرحيل ودروبه وشو له تغثني
رازي نزل رجله وناظره/انت من اعرست متغير علي
بـيّـن ناظره يكتم بداخله ماوده ينطقه تنهد/ترا كلها اسبوع من اعرست وشلون عرفت اني تغيرت
رازي ناظره من فوق لتحت وصد/هه لو اهمك عرفت
بـيّـن بغيظ/انت خاطرك وسيع/وقف/وانا وراي درب رحيل مثل ماجيت توكل الله يستر عليك/مشى/
رازي/تطردني!!
بـيّـن مكمل طريقه لفوق/واطرد عشر معك
رازي وقف/احترني طيب لاتكبني وراك
بـيّـن وقف والتفت له/بتغثني انزل من قريب
رازي اسرع له يعرج/اهب مابقلبك رحمة/وقف عنده/
بـيّـن ناظره بشك/علامك
رازي يطلع الجبل/مابي شي
بـيّـن اسرع وراه ومسكه من ياقته رجعه لورا
رازي اتسعت عيونه بفجعة راجع لورا/ولد ولد ولد
بـيّـن ماسكه زين ناظره/ياكبر شوكتك وشلون تمشي
رازي ابتسم/حلفت عليك ماتشيلني
بـيّـن/رح يم سيارتك/لف رازي لجهة اسفل الجبل ودفه بخفة/
رازي اسرع بخطواته للاسفل مجبر من ميلان الجبل وقف بعد مسافة والتفت يناظره بغيظ/بـيّـن!!
بـيّـن بابتسامة/موعدنا الليلة على ابريق يحبه قلبك
رازي ناظره بغيظ
بـيّـن/رح ولا بأزهم طرق
رازي بغيظ/طيب طيب رايح خلاص/مشى/
بـيّـن ابتسم وكمل طريقه لاعلى الجبل
.........................................
            الـلـيـل
.........................................
.
حامد راجع من صلاة العشا بخطوات هادية بوسط فكره المشغول بموضوع سلام ورفضها لاي رأي له
سلمان الواقف على مسافة من بيت الشعر ينتظر ابوه اسرع بخطواته له ومشى معه
حامد ناظره بابتسامة/هاه عود ابوي
سلمان/لا لذالحين جدي يوتر ثمن يجي
حامد باستغراب/ماشفته بالمسجد
سلمان/عاد جدي ماعليه باي مكان يوتر مايشغله المكان
حامد/زين
سلمان/يبه
حامد وقف والتفت له/خير عسى ماشر
سلمان/يبه سالفة سلام
حامد تغير وجهه/علمني ياسلمان هي عنادية دايم
سلمان ناظره بصمت
حامد ابتسم/يعني عشاني
سلمان/يبه كبّها على راحتها
حامد ناظره بنرفزة/هذا بدل انك تعاوني!!
سلمان/يبه كان لزّيت على رايك تراني معها
حامد قطب جبينه/وشو!!
سلمان/رايها يبه وهي تبيه واللي تبيه يتنفذ ماورا رايها راي
حامد ناظره بقهر/اجل خلك انت واختك على عماكم/اسرع بخطواته مبتعد/
سلمان تنهد بضيق يناظره ماوده يزعل ابوه وهم ببداية تعارفهم لكن اخته ألزم عنده بالحق لف للجهة المعاكسة مبتعد
.........................................
<<بيت ظاهر>>
ظاهر جالس بالصالة بملل مد يديه لسلة اغراضها قطب جبينه من ناظر قبعة جاهزة اسفل كرات الصرف رجعها بمكانها بسرعة واعتدل بجلسته من سمع صوت خطواتها
نور نزلت صينية القهوة بهدوء
ظاهر ناظر سكارفها اللي مافارق رقبتها من الصباح باستغراب
نور جلست على مسافة بينهم صبت له فنجال ومدته/تفضل
ظاهر اخذ الفنجال منها/سلمتي
نور/الله يسلمك/ناظرته/ظاهر
ظاهر رفع عينه لها
نور/بكرة ان شاء الله ابي اروح لسطام
ظاهر/ابشري ماطلبتي عسير
نور ابتسمت/مشكور
ظاهر/مير يانور
نور ناظرته
ظاهر/لاهنتي بغيت موية
نور بعبوس/اخدم نفسك!!
ظاهر باحراج/والله ودي مير رجولي متخدرة والعطش ذبحني
نور ميلت فمها واحتفظت بالكلام اللي بتقوله لنفسها وقفت واتجهت للمطبخ
ظاهر انحنى لسلة الصوف واخذ القبعة وقف واتجه لها
نور وقفت وبيدها علبة الموية تناظره باستغراب
ظاهر حرك القبعة بيده متقدم لخطواته لها/هاذي لمين لسطام ولّا/ابتسم/لي؟/سحب العلبة من يدها ورماها/
نور تراجعت بخطواتها لورا/كيف شفتها!!
ظاهر/ذالحين من اللي سؤاله اهم انا او انتي برايك؟
نور/كنت بأعطيك إياها بس انت سبقتني ولقيتها/وقفت من ضربت بالجدار وراها/
ظاهر ابتسم ووقف قبالها انحنى لمستواها يناظرها
نور صدت بوجهها تتجنب نظراته بهالقرب
ظاهر مد القبعة بوجهها/يالله قيسيها يمكن تطلع صغيرة
نور التفتت تناظره باعتراض/انا ماتخطي قياساتي
ظاهر مد لها القبعة باصرار/جربي يمكن اخطيتي هالمرة!!
نور اخذتها من يده
ظاهر تكتف يناظرها بابتسامة
نور رفعت يديها تلبسها له ابتسمت وهي توازنها على راسه مشغولة فيها بابتسامة من دقة شغلها/شفت قلت لك/نزلت نظرها واختفت ابتسامتها من ناظرت نظراته وابتسامته بلعت ريقها بتوتر من نظراته الجديدة لها نزلت يديها/
ظاهر رفع كفه الايمن ومسك يمينها مثبتها على راسه
نور ناظرته بتوتر
ظاهر بابتسامة/تسلم هاليد/نزل كفها من على راسه وضمه بكفه بقوة/وراعيتها 
نور همست/الله يسلمك
ظاهر مد يساره لسكارفها ولامسه باطراف اصابعه
نور رفعت رفعت يسارها توقفه وسط نظراتها المفضوحة له
ظاهر ناظرها/صاير شي البارح؟
نور هزت راسها بلا
ظاهر تنهد/يانور صاير شي البارح
نور/لا ماصار شي ابد
،
،
~~لـيـلـة الـبـارح~~
نور تنهدت ونزلت سنارات الصوف بالسلة وقفت ناظرته باستغراب من خروجه
ظاهر خرج من غرفة النوم ناظرها/رايح لبيت امي اشوف ضاري اعود الاقيك قبلي بالغرفة/مشى/
نور اسرعت بخطواتها للغرفة وارتمت عالسرير مرددة اذكرها بسرعة بمحاولة للنوم قبل رجوعه تسارعت نبضات قلبها من سمعت صوت باب البيت تغطت كلها متظاهرة بالنوم
ظاهر ماتأخر أبد اتجه لبيت امه وانتهى مشواره بكون ضاري نايم ورجع لبيته وقف على باب الغرفة حتى ينزل جواله قطب جبينه من ناظر رسايل من رقم غريب احتدت نظرته من عرف صاحبة الرسايل
وداد/جهز عمرك ضاري بآخذه غصبن عنك ياولد خلف
ظاهر احتدت نظرته/تعقبين وتخسين
وداد/لايطق بك عرق بكرة عند الشيخ نشوف من اللي كلمته تمشي ياظاهر
ظاهر/لا انتي ولا شيخك تمشي كلمتكم علي!!
وداد/هههههههه كان ماجابه شيخ الديرة يجيبه شيخ المحكمة وانا بنت ابوي/حظرته/
ظاهر ارسل ردود بدون اي فايدة وعرف انها حظرته رمى جواله عالطاولة ودخل للغرفة بخطوات ثقيلة واضح فيها الغضب وقف عند التسريحة سحب الدرج ناظر دواه لثواني وقفل الدرج بكل مافيه من قهر قفل النور واتجه للسرير ارتمى فوقه معطيها قفاه بدون اهتمام  لتواجدها
نور رفعت اللحاف عنها بخفة وابتسمت براحة من ماسمعت اي كلمة منه اعطته قفاها هي بعد واستسلمت للنوم بعد ماهدا عقلها وافكاره اللي اشغلته صحت من النوم بفزع من حست بضغط مهول على جسمها مدت يدها للابجورة بجانبها وفتحت النور انرعبت من ثبتها بيديه مانع حركتها
ظاهر الجالس فوق نور بدون وعيه داهمته نوبته المعتادة سحب يدها اول مافتحت النور وثبتها وبنظرات حارقة من حدتها نطق/رجعهم لي ذالحين رجعهم
نور ناظرته بملامحها المخطوفة من كثر رعبها/ظاهر انت تحلم
ظاهر وجه يديه لرقبتها وبدا يخنقها
نور مدت يديها ليديه تضربه حتى يتركها وسط حركة رجولها اسفله بدون فايدة وسط همساتها/ظاهر ظاهر
ظاهر انحنى بجسمه لها ووجهه قبال وجهها صرخ/رجعهم  ذالحين رجعهم
نور بعيون امتلت دموع استغلت انحناءته لها ضمت رجولها وثنتها ووجهتها بكل ماتبقى فيها من قوة لظهره ضاربته 
ظاهر فز من ضربتها لقدامه وضرب راسه فوقها بحافة ديكور السرير الحادة وارتمى فوقها بدون حركة
نور اعتلى صوت سحبها لانفاسها الثقيلة رفعت يديها ودفته عنها لجنبها تناظره
ظاهر مرتمي على ظهره جنبها بدون اي حركة
نور بدموعها وسط نظراتها المرعوبة كيف صاحب الملامح والتصرفات الهادية تحول لوحش ماتعرفه بثواني رفعت نفسها وجلست وعينها عليه مدت يدها له برجفة تلامسه بخفة بخوفها وبصوت هامس/ظاهر
ظاهر مارد عليها
نور حركته بقوة/ظاهر
ظاهر غيّر وضعيته لتمدده على جنبه مستغرق بنومه بدون اي شعور باللي حصل
نور ضمت رجولها لصدرها وانهارت ببكى من الرعب اللي مرت فيه
،
،
ظاهر/يعني ماحصل شي البارح ابد ابد
نور هزت راسها بايه
ظاهر/علامك تمنعني عن هاللي يتوشح رقبتك!!
نور/كشختي ومااحب احد يخربها لي
ظاهر/بس انا مو اي احد يانور
نور ناظرته بعبوس ملامحها المستغربة
ظاهر سحب يده من يدها ومدها للسكارف وفتحه تغير وجهه من ناظر الاحمرار الملتف حول رقبتها ابتسم لثواني بسخرية من نفسه لصحة توقعه واختفت هالابتسامة رفع نظره لها كيف احتفظت بسر نوبته البارح كيف تصرفت وانقذت نفسها من يديه كيف تحملت وصبرت ولانطقت حرف حتى له وهو اذنب بحقها وهي توها عروس لو كانت وداد كان ابعد من سكن بالديرة سمع صوتها وصوت صراخ زعلها وشرهاتها نزل نظره للاثر مرر اصابعه عليه بحزن واضح ارتسم على ملامحه همس/اوجعتك؟
نور غرقت عيونها دموع وتوسطت عبرتها حنجرتها هالسؤال منه طبطب على قلبها وهون مامرت به البارح وكثير/شوي يعني مو بالحيل
ظاهر انحنى وقبّل هالاثر
نور غصت بعبرتها من كثر صدمتها
ظاهر اعتدل بوقفته وناظرها/سامحي هالمجنون ولاتشيلين بقلبك عليه يانور
نور انخرست تناظره بوسع عيونها
ظاهر اتجه للغرفة يجر خطواته بحزن وضيق على نفسه قبل الكل توقفت كل امور حياته بعد هالصدمة وعجز يتخطاها ليومه
نور اخذت نفس تهدي نبضات قلبها واسرعت بخطواتها له
ظاهر دخل للغرفة
نور وقفت وراه انحنت ومسكت كفه
ظاهر التفت لها
نور/ماانت بمجنون ياظاهر ماانت بمجنون
ظاهر رجف قلبه من سمعها
نور/انت مريض وكل مرض يبي له علاج
ظاهر بملامح تنطق بيأسه/الا الجنون ماله علاج يانور
نور/لا اللي فيك ماهو بجنون هذا انت تكلمني بكامل عقلك كامل مكمله الله ولا طيوف الجنون تدل دربك
ظاهر زفر نفسه بوضوح 
نور شدت على كفه وسحبته معها بابتسامتها/تعال نكمل قهوتنا ومال الشر حولنا طاري
.........................................
<<الـمـسـتـشـفـى>>
يـقـيـن خرجت من قسم العناية بعد مااخرجتها حارسة الامن بقوة انتظرت سطام حتى يصحى وكان كل اللي بدر منه يفتح عيونه للحظات ويرجع يكمل نومته وهالساعات اللي كانت معه حاولت فيه حتى اسمع كلمة منه وتريح قلبها لكن بالنهاية خرجت بدون اي فايدة جرت خطواتها الخايبة للمواقف بعد ماقرأت رسالته(انا تحت احتريك بالسيارة متى ماخلصتي اطلعي..مير لاتبطين علي)وقفت عند سيارته مدت يدها للباب حتى تفتحه عبست بوجهها من ناظرته
بـيّـن ساند راسه عالدريكسون مستغرق بنومته من كثر تعبه
يـقـيـن اتجهت لعنده ناظرته من ورا قزاز السيارة تتأمله تنهدت بضيق من ناظرت وجهه الواضح عليه علامات التعب والارهاق رجعت لمكانها واسندت ظهرها على باب السيارة رفعت جوالها تقلب فيه بملل بانتظاره يصحى من غفوته
بـيّـن بعد ساعة رفع راسه بألم مدد جسمه وفز من ناظر عيونها المسلطة نظراتها عليه
يقين المنتظرة تعبت من كثر تبديلها بين الوقوف وانحناءها شبه جالسة بجانب السيارة وسط نظرات المارة واحيانا سؤالها واضطرارها ترد كتابة بوضعها وتبريرات كاذبة مستمرة حتى مايصحى كل ذا بسبيل راحته سلطت نظراتها عليه بلوم تلومه لانه ماصحى وحلت بعينه النومة وتلوم نفسها لانها رحمته وحن قلبها عليه ولو هو مكانها اكيد مارحمها
بـيّـن انحنى بجسمه داخل السيارة للباب جهتها وفتحه لها باستغراب/ادخلي علامك برا!!
يـقـيـن ركبت السيارة بألم من عظامها وسط حركة هادية واضحة تدل على وجعها
بـيّـن/علامك!!
يقين ناظرته بصمتها وبنفسه بقهر/انت بلاي
بـيّـن يناظرها باستغراب من نظراته/سطام به شي/اتسعت عيونه/ابوك به شي!!
يـقـيـن هزت راسها بلا وبنفسها/فالك ماقبلناه اعوذ بالله
بـيّـن تنهد براحة/الحمدلله/حرك السيارة/
يقين كتبت بجوالها وارسلت له
بـيّـن ناظر رسالتها(جوعانة)/بالبيت
يـقـيـن تكتفت وشدت على نفسها بقهر
بـيّـن ميل فمه بابتسامة من لاحظ زعلها
يـقـيـن التفتت له من وقف عند كباين البنزين
بـيّـن/اعبي ماني بشاري شي
يـقـيـن عبست بوجهها وبنفسها/من طلبك!!
بـيّـن حرك بعد ماعبى سيارته ثم وقف وبنرفزة/ياليل
يـقـيـن تناظره باستغراب
بـيّـن نزل بخطوات سريعة دخل للبقالة ورجع/رمى كيس به صابون بينهم وركب/
يـقـيـن اخذت لمحة سريعة للي بداخل الكيس وعبست بوجهها بزعل
بـيّـن/يوووه نسيت/نزل/
يـقـيـن زفرت بطفش من تأخيره
بـيّـن رجع ورمى بنفس المكان كيس داخله صحون بلاستيك
يـقـيـن تنهدت بضيق ممررة نظرها عليه من فوق لتحت/يالبخيل بيذبحك عصير وتصبيرة
بـيّـن ركب وشغل السيارة/هاه بسم الله/حرك ووقف بقوة/
يـقـيـن تحركت لقدام من وقفته وناظرته بوسع عيونها ودها تصرخ فيه
بـيّـن/يوه نسيت/نزل من السيارة يجري/
يـقـيـن تناظره بقهر منه
بـيّـن رجع وركب السيارة واحتفظ بالكيس بحضنه وحرك
يـقـيـن ماناظرته هالمرة بعدم اهتمام وتجنبا لاي مشكلة وهي جوعانة
بـيّـن مد لها الكيس وعينه عالطريق/يابنت
يـقـيـن التفتت له واتسعت عيونها من لمحت داخله
بـيّـن/ترا يدي تعبت
يـقـيـن اخذته بسرعة ناظرت داخله عصير ليمون وعصير فراولة مع كوب بلاستيك وتصبيرة وبعض المفرحات المعدودة ثم ناظرته بصدمة/للحين يذكر!
،
،
~بالماضي~
بـيّـن متربع قبالها بوجه عابس يناظرها/حامض على حامض!!اشتري لك مشكل وقضينا
يـقـيـن جالسة قباله بوسط حوش بيت طاهر وبينهم كاساتهم وعصير ليمون وعصير فراولة ناظرته بغيظ/هيه انت لاتخليني اهون عاد والله مااخليك تذوقه
بـيّـن/مير اني ماابي اذوقه
يـقـيـن بوسع عيونها/معصي والله تذوقه جلدتني امي حتى اجيبه معي واجيك وتعيي ماهو بكيفك
بـيّـن زفر/ماهو بكل شي يعجبك يعجبني!!
يـقـيـن بدت تجهز خلطتها البسيطة/بيعجبك بيعجبك وتشوف
بـيّـن تنهد باستسلام لها من ناظر حماسها
يقين مدت له كاسة بابتسامة وحماس/هاك ذوق وعلمني
بـيّـن اخذ الكاسة يناظرها بتردد
يقين اختفت ابتسامتها/علامك
بـيّـن/ماابي شي هذاني باشرب/شرب منه وتغيرت ملامحه/واقطع الكبد قطعاااه ووه
يـقـيـن ناظرته بغيظ سحبت الكاسة من يده بقوة
بـيّـن انصدم منها يناظرها
يـقـيـن كبتها عالارض/لاتشرب يامال الصكاك اللي يصكك
بـيّـن/ليه كان خليتيه للبهايم تحسنه
يـقـيـن اتسعت عيونها وناظرته بحدة/مير انا الغلطانة اللي اعلمك الزين ولا انت ماانت بوجه زين يااليهودي/وقفت/
بـيّـن اتسعت عيونه ووقف/انا يهودي!!
يـقـيـن التفتت له/امحق اليهود اهون منك/ومدت لسانها له/
بـيّـن ركض باتجاهها
يـقـيـن اتسعت عيونها وجرت مبتعدة/امزح امزح ماانت بيهودي امزح
،
،
بـيّـن/خابرك ماتحبين المخلط مير ذا تغلينه/ابتسم/عاد جبت معه حليب كان ماعادك تحبينه
يقين ناظرت مابداخل الكيس بحنين لذيك الايام كم مر على خلطها لذا العصير بعد مامنعتها امها من خلطه تركته للابد ماعدا المرات اللي كان يجيبه لها ابوها وتشربه معه بالسيارة بدون علم امها اجتاحتها العبرة من ذكرت ابوها وحنانه اخذت نفس تبدد العبرة التفتت تناظره وشلون للحين يذكر اصغر تفاصيلها ابتسمت ناظرت لقدامها كيف مايذكر وهي بنفسها للحين تذكر تفاصيلهم سوا وتكابر خرجت العصير وبدت تخلطه وبلعت العبرة بهدوء
بـيّـن حرك من لمح محاجرها بدت تلتمع ثبت نظره عالطريق قدامه حتى ماتنتبه انه انتبه لدموعها ميل فمه بابتسامة وبنفسه/هذا انتي ماتغيرتي وشو له العناد وشو له
.........................................
<<شقة مُحارب>>
ولاء جالسة بالمقلط بيمينها كوب قهوتها وبيسارها جوالها
مُحارب دخل للبيت وبيمينه حلى ويساره ورا ظهره
ولاء وقفت من سمعت صوته واتجهت لداخل البيت
مُحارب اسرع بخطواته قافل الباب وراه من سمع صوت خلخالها المعتاد وناظر نور المقلط مفتوح دخل للمقلط وخرج منه ناظر قفاها تمشي قباله/جهزتي القهوة
ولاء استوقفها كلامه وكانها ملزمة تجهزها له رغم حاجز الزعل بينهم التفتت له/نعم/غمضت عيونها متراجعة خطوة لورا بفزع/بسم الله/فتحت عيونها بشويش عبست بوجهها من ناظرت اللون الابيض قدامها تمعنت النظر واستوعبت اللي قدامها كبحت ابتسامتها وميلت نفسها تناظره تنتظر اعتذاره/
مُحارب الواقف قبالها بالضبط الفاصل بينهم خطوة ماد الباقة بالورد الاحمر وتغليفها الابيض بوجهها صاد بوجهه عنها باحراجه/هاذي لك
ولاء اخذتها بهدوء/شكرا بس وش المناسبة
مُحارب/نطرد الشيطان هذا هو متربع بيننا من امس
ولاء احتضنت الباقة بابتسامة ماحبت تضغط عليه اكثر وتزيد احراجه/الله يلعنه هالشيطان دمار البيوت
مُحارب تنحنح/انا واحد صعب بدوي مالي بامور الحضارة مااحب محارمي يتصورون بذا الجوالات ومااحب زوجتي تتصور ولاتطلب احد غيري ولا تسوي شي تعرف انه يزعلني تراني صعب وبالحيل وادري مير انتي علميني الشي اللي مايزعلك ولايزعلني كود نوصل مع بعضنا لحل يرضيني ويرضيك
ولاء/يعني عندك استعداد تتنازل
مُحارب سكت
ولاء ناظرته انتظر جوابه
مُحارب/على حسب ماهو بأكيد
ولاء بابتسامة/زين يالبدوي حقي وش رايك نتقهوى اشوف بيدك حلى والظاهر انه برد
مُحارب ابتسم/يالله اعجلي بالقهوة مير هاه نبيها قهوتنا ماهي قهوتك
ولاء/حاضر/كملت طريقها بابتسامة وقفت من اختفت ابتسامتها والتفتت له/لحظة محارب
مُحارب المتجه لمقلطهم مكان جلستهم المعتاد/التفت يناظرها
ولاء بذهول/قهوتي ماتعجبك!!
مُحارب ابتسم/لاجل عين تكرم مدينة/كمل طريقه/
ولاء غمضت عيونها باحراج طول هالفترة كانت تجبره على شي مايحبه وهو متحمل لفت مكملة للمطبخ تنهدت/وانطفى حلم مشاركة القهوة ياولاء انطفى
مُحارب ابتسم من سمع كلامها/ماينطفي وانا ولد ابوي
.........................................
<<بيت بـيّـن>>
غصنة المرتسمة اعرض ابتسامة على وجهها من كثر الفرح كونها تسوق بعد السماح لها من كثر محاولاتها وازعاجها وقفت بالسيارة عند باب بيت بـيّـن بابتسامة/وصلنا
غيمة الجالسة جنبها والاكل بالاسفل عند رجولها بسخرية/الحمدلله عالسلامة سلمنا
غصنة/خلي عنك بس والله وش زينها سواقتي/مررت نظرها عالبيت/مابعد رجعوا!!
غيمة/قال نص ساعة وبيته عنا ربع ساعة اكيد سبقناهم
غصنة/والحل
غيمة فتحت الباب ونزلت وبدت تنزل الاكل/نحتريهم اكيد
غصنة ناظرتها حتى انتهت/قفلي الباب
غيمة باستغراب/ليش؟
غصنة/قفلي انتي واعلمك
غيمة قفلت
غصنة بابتسامة وحماس/باخذ لفة وراجعة لك
غيمة اتسعت عيونها/اصبري اصبـ
غصنة دعست بالسيارة محركة بسرعة
غيمة لحقتها بخطوات معدودة وبصرخة/غصنة!!
غصنة ابتعدت
غيمة تنهدت بقهر تناظرها مبتعدة
رازي الواصل قبلهم بدقايق يتمشى بالمكان ينتظر بـيّـن المتصل عليه ومبلغه ينتظره لحتى وصوله وقف بعيد يراقبهم من عرف السيارة باستغراب لكون اللي داخلها حريم اتسعت عيونه من عرفها وعرف صوتها اخذ نفس يكبح نفسه وافكاره وقف يناظرها بهدوء
غيمة التفتت وراها تناظر المكان اللي يلفه الظلام وهدوءه المخيف ضربت الارض بغبنة منها/هين هين ياغصين هين/قشعر جسمها بخوف من حست بصوت خطوات وراها التفت برعب وش اللي يكون وراها من مخلوق تنهدت براحة من ناظرته ثم احتدت نظرتها/ملاحقني بعد!!
رازي ابتسم بخفة بسخرية/ماني بردي ياغيمة حتى اسوي هاللون!!
غيمة بحدة/وش تسوي هنيا اجل!!
رازي/ترا بـيّـن خويي ولا اذكرك!!
غيمة/انت علامك اليوم ماانت بصاحي تهرجني بكل مكان وكأنك محرمي
رازي/وهذا اللي بيصير
غيمة بحدة/بعيدة عن خشمك
رازي بانفعال/لا ماهي بعيدة وبتصيرين حلالي ياغيمة
غيمة/تعقب والله ماتلمس طرف شعرة من راسي
رازي بغبنة/وين راح الحب ليه كل ذا الجفا ليه!!
غيمة بسخرية/تنشدني انا!!
رازي شد على قبضته
غيمة/الخوان يعاتب غريبة الدنيا!!
رازي/علمتك لي اسبابي مير ماتسمعين!!
غيمة/اسباب!!اسباب!!بعت الحب باطرف شي وتقول اسباب
رازي صرخ/ظنيتك اعرستي
غيمة عبست بوجهها باستغراب
رازي بصراخه/اعرستي وبعتيني!!
غيمة تناظره بعدم فهم
رازي/بعتي رازي وغيمة وحبهم
غيمة عبست بوجهها باعتراض على كلامه هي ماباعت ابد هو من تخلى بدون وجه حق
رازي بحرقة/اظلمت الدنيا بعيوني يوم قلتي ليلة عرسك
غيمة اتسعت عيونها من ذكرت جملتها له بعناد(لو سمحت لاتتصل فيني مرة ثانية الليلة ليلتي وأبي أعيشها بدون ماضي)
رازي/انا ماعدت رازي واصبحت سماي بدون غيمها اجتاحني الجفاف جفت عروق قلبي ووصلت لحد الذبول
غيمة بهمس/بس انا
رازي قاطعها/دريت ودبت الحياة فيني من جديد امطرت سماي وانتعشت عروق قلبي وحييت مير انتي عودتي وذبحتيني ياغيمة
غيمة ناظرته بصمت
رازي/تكفين ياغيمة تكفين لاتسوين سواتي
غيمة ناظرته بحيرة
رازي/ لاتسوينها ياغيمة وماتسمعين لي كلمة
غيمة تناظره بتفكير وتردد
رازي/جمعنا الوصل والمحبة وفرقتنا شين الظنون ياغيمة ارتسمت سنين الجفا بيننا بغيمة(بنته)عودّي ياغيمة لسماي وامطري ارضي تكفين
غيمة بقهر منه/وشلون اعود يمك وانت بعت سنيننا باردى الاثمان بعته بشين ظنونك يارازي وشلون!!
رازي بندم/هذاني راجع لك وكلي ندم تكفين اعفي واصفحي واقبليني هذاني ارمي نفسي بين يديك ياغيمة عودّي لرازي عودّي لسماه واحيي مامضى وعزّي الجاي واول خطواته القبول
غيمة ناظرته بصمت بقهر منه ومن تسرعه المعتاد هذا هو ماتغير على نفس عادته يتصرف بسرعة حسب هواه بدون اي مراعاة لمشاعر اللي حوله
رازي/للحين احبك ياغيمة وابيك شاريك وشاري قربك وحتى ذكراك
غيمة نزلت نظرها للارض ساكتة بحيرة مابين تعذره للي كان بينهم ومابين تهجره من قسوته وألم خيانته
رازي برجى/لو اني نسيت وقسيت رميت ابسط الذكرى
غيمة ناظرته بوسط افكارها
رازي/الجوال اللي ياما جمعنا ليالي ضحكنا وغنينا وحتى بكينا معه سوا للحين باقي باسمي للحين معك للحين اتصل ويرن عندك للحين يتوسط ثيابك للحين باقي اثر يجمعنا و/انخطف وجهه من التقت عينه بعينه/
غيمة ناظرته قطبت جبينها من ملامحه التفتت وراها رجف قلبها ودب الرعب بداخلها من تواجده بهاللحظة
.
#شقّ_الغَمام