شـقّ الـغَـمـام

..(٤)..

..(٤)..
لاحول ولاقوة الا بالله
-
،،،الـمـسـتـشـفـى،،،،
يـقـيـن عالسرير الابيض بنوم عميق من التخدير ملتف حول رقبتها الشاش الابيض بوجه شاحب من التعب
ام سطام تناظرها بدموعها منحنية بجسمها تمسح على راس يقين/ياروحي انتي ياروحي
الجدة مبروكة واقفة عند باب الغرفة مستندة على عكازها بملامح محتدة/زينة
ام سطام ماردت وعينها على بنتها
الجدة مبروكة/تعرفين وش معنى متوسطة ذرعانه ولى أعلمك؟
ام سطام ثبتت يدها على راس يقين برجفة سرت بجسمها وهي تناست الموضوع بالوقت اللي مرّ
ام سطام اكتفت بالصمت
الجدة مبروكة/وش موديها تالي الليل يمّه وشو؟
ام سطام اعتدلت بوقفتها وعينها على يـقـيـن ماردت
الجدة مبروكة شدت بيدها على عكازها/حتى لو انه ماعمل بها شي يازينة تراه
ام سطام عضت على شفتها ثم نطقت/اعرف يمه اعرف
الجدة مبروكة بحدة/هالبنت طغت يازينة طغت بالحيل
ام سطام قبضت يدها وشدت عليها/عشانها
الجدة مبروكة قاطعتها/تخبريني محد يزايد على عيالكم بالغلا عندي لكن تسوي هاللون بعزيز تعقب الا ولد زايد يازينة الا ولد زايد
ام سطام التفتت لها/يمه
الجدة مبروكة قاطعتها وبحدة/كل شي الا عزيز،الا عزيز يازينة
ام سطام شدت على يدها بغبنة فهمت المقصد من كلام أمها
الجدة مبروكة خرجت راجعة لعند عزيز
........
،،،،،،<<خلف بيت الشيخ>>،،،،،،،،
،،غرفة بشباك صغير مرتفع يقارب للسقف بداخلها دورة مياه تستخدم للحبس،،
بـيّـن واقف متكتف ومتكي بظهره عالجدار اعتدل بوقفته من سمع صوت الباب ابتسم من التقت عيونهم ببعض
سهم ابتسم لابتسامته/توقعت كل شي الا انك تسوي هالسواة!!
بـيّـن ارتفع حاجبه الايمن وزفر بضحكة وسخرية/الله ياخيبة هقوتك!!
سهم/الظاهر انك حنيت لذيك الايام
بـيّـن بنفس ابتسامته/ورا ماجت الدوريات ولا رحتوا بي للشرطة المفروض هالفرصة ماتضيع عليكم ابد ياكم تمنيتوها جت لكم باردة مبردة
سهم احتدت نظرته
بـيّـن/علامكم هادين
سهم زفر/يجيك العلم مـ
بـيّـن/وين معزبتكم ردتكم عني؟/قطب جبينه بتفكير ثم ضحك/يااااوك ياكبر العلم بين العربان!!الراعي وبنت الشيخ/ضحك/هالمرة ماظنتي معزبتك تقواها
سطام دخل وهجم على بـيّـن
بـيّـن ارتمى عالارض ويديه على راسه يدافع عن نفسه
سطام يضربه مثل المجنون بدون توقف
سهم تكتف يناظرهم بابتسامة
مُحارب دخل للغرفة ورفع عجرته ونزلها بكل قوته حتى يضرب سطام
سهم وقف بينه وبين سطام وضربته العجرة على يده اليمنى
بـيّـن رمى سطام بكل قوته عنه لبعيد
ظاهر وقف عندهم بأنفاسه السريعة اتسعت عيونه وهو يناظرهم
مُحارب تحرك بدون اهتمام لسهم وقف عند بـيّـن يناظره بخوف عليه/انت طيب بك شي
بـيّـن مسح فمه وأنفه بكمه بنفس الوقت/مابي شي
سهم مسك سطام وسط الامه/تعوذ من ابليس ياسطام
سطام بغبنة وهو يدف سهم يبي يوصل لبين/هاذي تاليتها يابـيّـن هاذي تاليتها!!
مُحارب التفت له بحدة/حنّا اللي نقوله ماهو بأنت
بـيّـن ناظر سطام وبحدة/الخسّة اللي براسك ماتمر من طرف خشمي خل عاد عنك اني اسويها ياولد منصور!!
سطام فك نفسه من سهم ومسك بـيّـن من ياقة ثوبه من ورا محارب وشده له/اقطع واخس يالخسيس اقطع واخس
ظاهر وقف بينهم وفك يد سطام ودفع ثم مرر نظره بين سطام وسهم بحدة/دام حطيتوه بهالغرفة بأي حق تتهجمون عليه وانتم اثنين وهو لحاله
الجد طاهر وقف عالباب وبحدة/كلكم تطلعون
//الكل التفت يطالعه//
بـيّـن احتدت ملامحه وهو يناظره
الجد طاهر/هالغرفة تحت حكم سحاب من انتم حتى تدخلونها؟
بـيّـن زفر بضحكة خفيفة بقهر
الجد طاهر/ان ماطلعتوا كلكم بتظلون معه تحت الحكم!!
سهم مسك سطام من يده وسحبه معه خارج
ظاهر خرج
مُحارب يناظرهم بقهر
بـيّـن سحب مُحارب وهمي بأذنه/الجرابيع لاتاكل العلف
مُحارب قطب جبينه باستغراب
الجد طاهر دف الباب حتى يقفل
بـيّـن دف محارب للباب
محارب خرج
بـيّـن زفر ناظر الباب اللي انقفل عليه جلس ثم تمدد واخذ نفس همس لنفسه/الوعد الليلة ياسمّار/ابتسم امتلى صدره حماس وغمض عيونه حتى ينام/يااااوك ياسمّار يوك عليكم
............
<<بيت الشيخ>>
نور دخلت للبيت نزلت نقابها وطرحتها كاشفة عن وجهها اللي تلون بالاحمر من الحر والمشي اللي مشته وهي تدور عن اختها بقلة حيلة وقفت وهي تناظرها
ريوف خارجة من المطبخ وبيدها كوب قهوتها التفتت تناظرها/رجعتي اخيرا!!
نور مشت ومرت من جنبها بدون رد
ريوف/ترا لقوها
نور وقفت والتفتت لها بشك
ريوف/قلت أعلمك يعني
نور اسرعت بخطواتها لريوف
ريوف تراجعت لورا
نور وقفت قبالها وبعجلة/وينها لا لا كيفها هي بخير فيها شي وش صار الـ
ريوف رفعت صوتها تسكتها/انا مدري عن شي ولا ابي ادري زين/كملت طريقها/
نور تناظرها بصدمة منها وبتفكير بينها وبين نفسها/ذي وش من مخلوق وش قلبها!!/التفتت من سمعت الباب جرت وهي تناظره وبقلق/ها سطام بشّر وينها وش صار معها
سطام دخل بوجهه الاسود من الهم ثقلت رجوله ماشالته وهوى عالارض
نور مسكته بفجعة/سطام
سطام بهمس وهو دايخ/سكر يانور سكر 
.........
<<بيت الجد طاهر>>
وداد دخلت بخطوات سريعة متجهة لبيتها ماتحملت وغيرت طريقها وقفت قبال باب البيت ودقته بقوة وبسرعة ورا بعض
غيمة بعبايتها فتحت الباب باستغراب من اللي يدق بهالطريقة تبدد استغرابها من شافتها/نعم
وداد ميلت فمها ماعجبها انه غيمة فتحت/وين امك؟
غيمة/انا عن امي وش تبين قولي وش وراك
وداد رفعت صوتها/عمة ياعمة
غيمة كشرت بوجهها من الاسلوب
منيرة خرجت من دورة المياه واسرعت بخطواتها بخوف/وش فيه وش فيه/وقفت قبالها وبخوفها/ظاهر فيه شي؟
وداد بغيظها/انا اللي فيني انا مو بولدك انا جاية اطلبك الحق
منيرة تنهدت/ادخلي وابشري باللي تبين
وداد/لا ماني بداخلة يعني يرضيك ياعمة موعدي انتظره من زمان يقوم ولدك يقوم الدنيا علي ويرجعني البيت
منيرة زفرت/ابشري بالعوض بس ظاهر
وداد قاطعتها/مايكفي اني صابرة عليه ويهني بعد!!
غيمة بتكذيب/الله يهينك وواقفة قدامي للحين!!
وداد كشرت بوجهها/وش قصدك اكذب يعني!!
غيمة بابتسامة/ماهي غريبة عليكم يابنات منور
وداد اتسعت عيونها/نعم!!
منيرة مسكت غيمة من يدها ورجعتها لورا/ماتقصد ياوداد ماتقصد
وداد/يعني فوقاني شارية ولدك وجاية عندك ياعمة ألقى فوق الاهانة اهانة!!
منيرة/امسحيها بوجهي يابنتي تعرفين غيمة لسانها متبري منها
وداد/دام ذا كلامكم والله مااقعد بهالبيت دقيق وحدة/مشت/
منيرة ضربت غيمة على كتفها بقوة/الحقيها وحبي راسها
غيمة بوسع عيونها/والله اللي ماطرت!!
منيرة بحدة/عشان ظاهر وضاري يامال اللي مانيب قايلة/دفتها لقدام/امشي/مشت/
غيمة مشت ورا امها وهي تغلي
وداد وقفت عند بيتها وهي تفتح الباب بيد ترجف بقهر
منيرة مسكت يد وداد بيمينها وبيساره مسحت على وجه وداد وباست يدها/انا في وجهك امسحيها بوجهي ماتقصد غيمة
غيمة متكتفة واقف ورا امها بمسافة/معليش طلعت بالغلط مضغوطة شوي اسفة
وداد/يومك مضغوطة تطلعينها علي ليش وش علي منك انا!!
غيمة اخذت نفس وهي تناظر امها
منيرة مدت يدها ومسكت غيمة من يدها وسحبتها لعندهم/ماتقصد تعرفين غيمة وغصنة قلوبهم بيض يرمون الكلمة بس مايقصدون بها شي ابد
وداد سحبت يدها من عمتها وفتحت الباب/تدرين ياعمة ماارحم بهالبيت الا انتي ربي ابتلاك بعيال كل واحد منهم اردى من الثاني
غيمة اتسعت عيونها
منيرة كتمتها بقلبها
وداد/عشان كذا ماني بزايدتك وبأسامح وعسى الله يعينك على ماابتلاك به ولايبلانا/دخلت للبيت وقفلت الباب بكل قوتها/
غيمة ضربت عالباب بكل قوة وعصبية/هيه اطلعي كان فيك خير
منيرة مسكتها وغطت فم غيمة بيدها/اوص اوص اسكتي
غيمة دفت يد امها بصراخ/اطلعي اطلعي اخليك تشوفين البلاوي كيف يتصرفون معك اطلعي
منيرة دفت غيمة وبصوت عالي/طسي يم ولاء ماانتي بمسيرة عليها!!
غيمة/لا والله ابي أسيّر عاللي بداخل البيت ابيها اليوم
منيرة وقفت قبال بيت ظاهر وظهرها للباب/هاه شوفيني قدامك وش تبين تسوين؟
غيمة عضت شفتها وعيونها غرقانة دموع/يمه ليش تسكتين ليش!!
منيرة/مالك شغل بيني وبينها مالك شغل
غيمة نزلت دموعها/دامك رضيتي الغلط علينا وش علي انا!!/مشت وهي تلف طرحتها مبتعدة/
منيرة بلعت عبرتها وهي تصبّر نفسها
غيمة خرجت من باب البيت الرئيسي التفتت ووقفت تناظره
ظاهر واقف وساند ظهره عالباب شاد على قبضتيه منزل راسه بصمت رفع عينه لها من حس فيها والتفت عينه بعينها
غيمة ناظرته بلوم على صمته/الى متى ياظاهر الى متى؟
ظاهر كسرته نظرتها وزاده العتاب كسر نزل راسه بدون رد
غيمة مشت بيأس منه متجهة لولاء متنفسها الوحيد بهالقرية
الجد طاهر وقف عنده وتظاهر ماسمع شي/ولد ياظاهر
ظاهر/سم ياجد
الجد طاهر/رح جب اخوانك قبل ياصلهم العلم رح
ظاهر/ابشر
.........
،،،الـمـسـتـشـفـى،،،
الجدة مبروكة واقف قباله تناظر يده المجبسة/ماجور ماجور ياولدي
سهم/جزاك الله خير ياجدة بسيطة بسيطة
الجدة مبروكة/وش العلم
سهم/الشيبة ردّنا عن بعضنا
الجدة مبروكة قطبت جبينها بشك/طاهر؟!!
سهم/ايه طاهر
الجدة مبروكة تنهدت/وينه ولد عمك من لفى الديرة ماشفناه؟
سهم تنهدت بضيق منه/والله ان نيته يجي معي بس قلت له يجلس هناك تخبرين مابه احد
الجدة مبروكة هزت راسها رغم عدم قناعتها/زين زين اعزم الرجال الليلة وتعال مرني
سهم/ابشري ابشري على امرك
............
<<بيت الجدة سرور>>
سرور بابتسامة عليها نقابها مدت له الفنجال/هلا بوليدي ياهلا
ديوان بتوتر تأتأ للحظة/ا..ا..الله يسلمك ياعمة
سرور/افا افا ياديوان من تالي صاير اقشر مير ماالومك الوم اللي انت مخاويه ولا انت وش حليلك ياوليدي
ديوان/ردتني الديار ياعمة قلبي هنيّا والجسد معهم هنا
سرور/واشيب عيني عينك وش سويت وانا امك هنا عسى محد تعرض لك
ديوان/مين يتعرض لي وانا معي سهم
سرور كشرت بوجهها من طاريه/لولا اني خابرة مايكب ولد عمه ولا كان قلت تكذب
ديوان/ياعمة ماودك تسلمين عليه والله ياانه
سرور قاطعته/ديوان كان ودك نسولف ونضحك مع بعضنا ياحيك وكان ودك تكدّر جلستنا بطاري محدن يبيه توكل الله يسمح دربك
ديوان/افا ياعمة تطرديني
سرور سكتت
ديوان وقف/انا جيت اسلم عليك وكبيّت اشغالي وراي
سرور/والغدا ياديوان!!
ديوان/ماهي بمشكلة اجي بالليل واتعشى عليه مااوفره ياعمة مااوفره
...................
<<بيت الشيخ>>
،،عند الباب،،
نور جالسة عنده بوجه ينطق خوف ماهدا للحين وبين يديها كوب الموية وصحن التمر اللي شادة عليه بكل قوتها
سطام ساند ظهره ومتكي براسه عالباب وراه رفع نظره وابتسم/الحمدلله هذاني قدامك مثل الذيب
نور بخوف/الذيب بغى يروح فيها
سطام زفر بضحكة خفيفة
نور/وثم ياسطام وثم؟ناوي على عمرك انت ناويها؟متى اخر مرة اكلت؟
سطام اعتدل بجلسته وناظرها/ساعديني ابي اروح يم يـقـيـن
نور اتسعت عيونها وهي نيتها وانشغلت بوضع سطام مسكته من يده تساعده حتى يوقف
سطام وقف
نور شدت عليه حتى تتاكد من وقوفه
سطام لامس كفها بكفه بتطمين لها/قلت لك ذيب ارتاحي
نور ناظرته بشك/ابي اروح معك
سطام سكت لحظة بتفكير
نور/ماعليك انا راضية باللي يصير خلني اروح
سطام/ومن قال بيصير شي وانا موجود ابشري/خرج مفتاحه من جيبه ومده لها/وانتي اللي تسوقين بعد
نور اتسعت عيونها بصدمة/بس
سطام يتصنع الدوخة
نور شدت عليه
سطام/تراني دايخ للحين
نور ابتسمت واخذت المفتاح/والدايخ للحين ماد يده
ريوف وقفت عندهم بعبايتها سحبت المفتاح من يد نور رمشت/انتظركم بالسيارة
سطام زفر يكتم غيظه
نور مشت وهي ساندته/يالله مشينا
.................
<<بيت بـيّـن>>
مُحارب واقف قبال الزريبة يناظرها متكتف عن يمينه نواف ويساره سلمان 
//سلمان ونواف يناظرونها مثله متكتفين//
سلمان/ذالحين مطلعنا من المدرسة عشان نشوف زريبة بـيّـن!!
نواف فك تكتيفته وبزعل/وانا اللي استانست قلت ورانا كشتة دام طلعنا بدري
سلمان ميل راسه يناظره بابتسامة/حتى انا!!
مُحارب فك تكتيفته ورجع يديه من ورا رقبة نواف وسلمان وضمهم له وبابتسامة وراها تهديد/وربي لاأكشت بكم بوسط هالزريبة انت وياه
نواف شد على يد محارب/سم طال عمرك امرني
مُحارب مد يده اليمين اللي محاوط بها نواف/تشوفون جرابيع عيني مالمحت شي!!
سلمان باستغراب/من متى وبيّن يخلّي شي يفتّ(يتحرك)بزريبته!!
نواف انحنى شبه جالس يمسح على طرق اللي واقف جنبه/وين راعيك ياطرق؟
مُحارب/بغرفة الغمّة
سلمان اتسعت عيونه
نواف فز واقف وجرى
مُحارب ترك سلمان وجرى وراه مسكه/نواف
نواف دف يده وبعصبية/وراه واقفين هنيا تاركه يمهم ليه!!
مُحارب ناظره/انت ذالحين مثل حالتي الصبح وسويت كل ماطرا في بالك يانواف
نواف بملامح الغضب/وثم؟
مُحارب مد يده وسحبه معه ووقف قبال الزريبة يناظرها/الجرابيع لاتاكل العلف يامحارب
نواف قطب جبينه
سلمان ميل فمه بتفكير
محارب/هاذي كلمته يالله على ايديكم عجزت وانا افتش بذا الزريبة ماعينّت شي يم العلف
نواف يناظر لقدامه بتفكير
سلمان التفت وراه واتسعت عيونه/محارب
مُحارب التفت يناظره
نواف حرك نظره للي يناظره سلمان
سلمان وعينه على بيت بـيّـن/الجرابيع ماهي بالجرابيع اللي انت خابر
محارب اتسعت عيونه
نواف ارتسمت الصدمة ثم التفت يناظر سلمان/يمه بسم الله علي سلمان هذا انت صدق!!وشلون طرت في بالك!!
..........
<<بيت الجدة مضاوي>>
غيمة بوجه مرتسم عليه الانزعاج تتتقهوى بصمت
ولاء تنهدت وعدلت جلستها/وبعدين يعني وبعدين
غيمة ناظرتها/بسم الله وش فيه!!
ولاء/ماتبين تنطقين قولي وش فيك
غيمة تنهدت/مافيني شي
ولاء/غيّوم محد يعرفك كثري
غيمة بهم/مدري متى بيتغير الحال ياولاء
ولاء/حال مين بالضبط؟
غيمة سكتت بتفكير
ولاء ميلت فمها باستغراب/ماعرفتك ياغيمة الصراحة
غيمة ناظرتها باستغراب
ولاء/العادة مايهمك شي
غيمة تنهدت/حتى عدم الاهتمام له حد ياولاء
ولاء ابتسمت/استبشر خير؟
غيمة قطبت جبينها
ولاء بابتسامة/اقدر اقول الحين غيمة اللي قبل اربع سنين بدت ترجع؟
غيمة احتدت نظرتها ووقفت
ولاء فزت واقفة/وش فيك؟
غيمة مشت وهي تعدل طرحتها/تاخرت قلت لامي نص ساعة حق القهوة وجاية
ولاء تمشي وراها/طيب اشربي قهوتك ماخلصتيها؟
غيمة/يكثر خيرك المرة الجاية ان شاء الله
ولاء مسكت يدها وقفتها/غيمة
غيمة وقفت وناظرتها/الله لايجعلها ترجع بيوم ياولاء وانتي ملزومة تأمنين
ولاء تركت يدها بصمت
غيمة/وقبل الكل أمنّي ياولاء أمنّي
ولاء تناظرها بصمتها
غيمة خرجت بخطوات سريعة
.........
،،،السيارة،،،،
ظاهر يسوق ساكت
ضاري جالس مكان الراكب/يبه
ظاهر مارد وسط تفكيره
غصنة جالسة ورا ضاري تناظر ظاهر بشك/ظاهر حبيبي
ظاهر انتبه ابتسم/هلا يازين من ينادي
غصنة تحركت وتكت بيدها بين ظاهر وضاري ولفت لظاهر/انا ولّى ولدك؟
ظاهر/اكيد وليدي وش ابي فيك!!
سلام زمت شفايفها بضحكة خفيفة تكتمها
غصنة بزعل/الله ياأيام محد ياخذ مكانك الله يرحم الحال
ضاري/لاتزعلين غصنة انتي احسن وحدة بس احيانا مدري وش يجيك
سلام زمت شفايفها بكل قوتها تكتم ضحكتها تستحي من ظاهر اكثر من اخوانه عاشت من عيال عمها مثل اخوانها لكن ظاهر كان دايم فيه حد لمزحها وضحكها وكل شي قدامه
غصنة ناظرته/والله وانا عمتك مدري انت تمدحني ولا تعيب فيني بس ماعليه مقبولة منك كل شي منك يهبل/رجعت نظرها لظاهر/ظاهر وش صاير جاي تاخذنا اليوم
ظاهر بابتسامة/مافيه شي
غصنة/مستأذن لنا ياظاهر وذي من النوادر
ظاهر/هو انا رايح لنواف وسلمان لكن محارب سبقني
غصنة بقلق/سألتك بالله ياظاهر لاتكذب علي فيه شي صاير شي
ظاهر/ماهو بصاير الا كل خير وش فيك!!
غصنة رجعت مكانها جلست بعدم راحة وتصديق لكلام ظاهر
.................
،،،الـمـسـتـشـفـى،،،،
نور وقفت بالسيارة
ريوف فتحت الباب/سطام اي غرفة عزيز؟
نور اتسعت عيونها والتفتت لها تناظرها بحدة
سطام/وانتي وش عليك من عزيز عليك باختك!!
ريوف بعدم اهتمام لنظرات نور/بأسلم على جدتي ماشفتها من البارح وش فيك عصبت علي!!
سطام بعصبية/مدري ولا ابي ادري وياريت ان رحتي يمّه قصيت رجولك
ريوف/مو بكيفك تتحكم فيني امي موجودة للحين/نزلت وقفلت الباب بكل قوتها/
سطام بلع تعصيبته وسكت
نور/ماعليه للحين صغيرة ماتثمن الكلام لاتاخذ بخاطرك ياسطام
سطام فتح الباب/لا يانور ماهي بصغيرة مير انها تعودت اللي تبيه تسويه وذا البلى/نزل/
نور نزلت وقفلت السيارة اسرعت بخطواتها ومشت جنب سطام
//قبال غرفة يـقـيـن//
نور وقفت وشدت على يدها بتوتر
سطام فتح الباب ثم التفت وراه يناظرها/انتي معي مايجيك شي/مسك يدها وسحبها/
نور دخلت زاد توترها من وصلها صوت امها مااهتمت لهالتوتر وكل تفكيرها بأختها
ام سطام/وينه شالك هاه وينه؟
ريوف/يووه يمه نسيت نسيته
ام سطام رفعت اطراف شالها الاسود المزينة اطرافه بجنيهات الفضة المميزة بيديها/هذا انا لابسته حتى جدتك لابسته وش ينسيك لاشافوه يعرفون من انتي ويحطونك فوق روسهم
ريوف/خلاص يمه هذا انا قدامك وصلت للغرفة
ام سطام التفتت من سمعت الصوت
نور/السلام عليكم
ام سطام/وعليكم السلام والرحمة/مررت نظرها بينهم ثم ناظرت نور/ماشاء الله ماشاء الله مين سمح لك تطلعين من البيت هاه!!
نور/يمه جيت اشوف يـقـيـن ماسويت شي غلط
ام سطام ضحكت/ليه تبين ننتظر الغلط من جديد ماهو انتي لك سوابق
نور احتدت نظرتها وبجرأة/تعلمت منك يمه
ام سطام اسرعت بخطواتها ورفعت يدها موجهة لها كف
سطام سحب نور وراه واستقبل الكف عن نور
نور اتسعت عيونها
ام سطام/والله وكبرتوا وصرتوا ترفعون الصوت بوجهي!!
سطام ناظرها/محشومة يمه محشومة
ام سطام/غصبن عليك لي الحشيمة ماهي لاشكالك ياللي مافيك خير حق اختك ماقدرت تاخذه هاه على طول انصرعت مثل عوايدك ماهي بجديدة عليك
نور لفت تناظر ريوف بقهر
ريوف تكتفت وصدت بوجهها عنهم
سطام/يمه حنا جايين نتطمن على يـقـيـن
ام سطام/بخير دامه بعيدة عن ذا الوجيه يالله برا انقلعوا للبيت
نور سحبت يدها من سطام بعدم اهتمام لامر امها
ام سطام اتسعت عيونها
نور وقفت عند يـقـيـن تناظرها انحنت وباست راسها
يـقـيـن للحين ماصحت
نور ناظرتها بصمت للحظات ثم اعتدلت ونزلت نقابها على وجهها ومشت خارجة
سطام نفس فعل نور  انحنى سلم على راسها وتحمد لها بالسلامة وخرج بدون لايكلم امه
ام سطام تناظرهم بصدمة من فعلهم/انهبلوا يستقوون علي!!علي انا!!
ريوف/ماماتي حبيبتي انتي اتركيهم هالمرة بعذرهم خايفين على يقين
ام سطام التفتت ليقين ناظرتها وامتلى صدرها ضيق على وضعها
ريوف/ماما عزيز اي غرفة؟
ام سطام ناظرتها بتقطيبة جبينها
ريوف بجدية/يمه اتحمد له بالسلامة واسلم على جدتي
ام سطام/٢.٦
ريوف اسرعت بخطواتها بوناسة/شويات وراجعة يمه
ام سطام تنهدت/الله يصلحك بس
ريوف بعد ماوصلت للغرفة دقت الباب ودخلت/السلام عليكم
الجدة مبروكة التفتت للصوت وقفت بابتسامة/ياهلا ومرحبا ياهلا ومرحبا حي ذا الصوت وراعيته ياحيها
عزيز جالس عالسرير كشر بوجهه من سمع صوتها وصد بوجهه
ريوف اسرعت بخطواتها وقفت عند جدتها وسلمت على راسها
الجدة مبروكة/ياعساك تسلمين ياعيني
ريوف/الحمدلله على سلامتك عزيز طالع من الشر
عزيز/الله يسلمك
ريوف/اجر وعافية
عزيز زفر وسكت
ريوف/بعد ماشفت يـقـيـن جيت على طول اتحمد لعزيز بالسلامة واسلم عليك ياجدة
عزيز رجف قلبه من سمع اسمها والتفت يناظر ريوف
الجدة مبروكة مسحت على راسها/يسلم قلبك راعية واجب من مبطي عساك عالقوة
عزيز بلهفة لمعرفة اي شي عنها/كيفها يـقـيـن وشلونها
ريوف شدت على يدها بغيظ
الجدة مبروكة بحدة/طيبة علمتك طيبة وش تبي تعرف عن حالها بعد ياعزيز
عزيز سكت وكتم بصدره الكلام
الجدة مبروكة/ريوف علمي امك تجي عنده انا رايحة يم البيت ومعودة ان شاء الله
عزيز/الحمدلله طيب ياجدة بيجي بارود شوي ماله داعي تتعبين عمتي
الجدة مبروكة/بارود ابيه وثم تعبك مثل العسل على عمتك
ريوف/ابشري ياجدة ابشري/مشت خارجة ثم ابتسمت وهي تسرع بخطواتها/
..................
،،،،،الـلـيـل،،،،،،
...............
<<بيت الجد طاهر>>
غيمة لابسة عبايتها تمشي بخطوات سريعة باتجاه الباب
الجدة حمدة وقفت على مسافة بسيطة منها وبحدة/انثبري ناقصين مصايب حنّا!!
غيمة/ليه هو بقى فيها مصايب!!تمادوا تمادوا بالحيل ولا عينوا من يوقفهم!!
الجدة حمدة بقلق/ادري ادري انهم شر منزل على روسنا مير انتي اقضبي ارضك ولاتزيدين الهم هم
منيرة اللي وقفت قبالها وبهدوء عكس داخلها المرتجف حرفيا من كثر الخوف على بـيّـن/جدك واخوانك كلهم معه
غيمة ضحكت/مين!!جدي!!
الجدة حمدة/ايه جدك هالمرة ماهو بساكت
غيمة/الله اكبر ياكبر الفزعة عساها نفس الفزعة اللي فزع بها يوم خلوه راعي
منيرة ضربتها كف بكل قوتها
غيمة احمر خدها وناظرت امها وبصوت راجف/صح اني اسكت ومالي صوت ولا دخل بأي شي مير هالمرة والله اني لاأكلهم بسنوني دونه/مشت للباب بتجاهل للكل/
الجدة حمدة/بنت عودّي
غصنة وقفت قبالها بينها وبين الباب تحديدا
غيمة/ابعدي عني ياغصنة
غصنة هزت راسها بلا وبعيون غرقانة دموع/كلنا مثلك مير هالامور بين الرجال مالنا فيها
غيمة ضحكت بسخرية/اجل انا عن رجال هالبيت كلهم ياغصنة/دفتها/
غصنة جلست وضمت رجولها بكل قوتها
غيمة بصراخ/فكيني فكيني
غصنة/ظاهر يقول لاتتركين احد يطلع من البيت وظاهر لاقال شي نسويه كلنا ياغيمة ولانسيتي
غيمة صرخت بقهر/ااااااه
غصنة تركتها وسط دموع انسابت
الجدة حمدة بلعت عبرتها
منيرة هلت دموعها
غيمة انحنت شبه جالسة وضمت ركبها لصدرها/ويل حالي والقهر ويلي ويل قلبي اااه/وقفت واتجهت لبيتهم وسط دموعها/
..................................
،،،الـمـسـتـشـفـى،،،،
يـقـيـن صحت حركت عيونها حولها تستوعب مكان وجودها التفتت ناظرت ريوف
ريوف جالسة عالكرسي وساندك راسها على طرف السرير نايمة
يـقـيـن حركت راسها عن يمينها غمضت عيونها من حست بألم اجتاحها حركت شفايفها تنادي ريوف شحب وجهها برعب وسط اتساع عيونها بصدمة وهي ماتسمع صوتها رفعت نفسها بخوفها اللي بكل لحظة يتزايد مدت يدها وسحبت يد ريوف تهزها
ريوف رفعت نفسها تناظرها
يـقـيـن بعيون غرقانة دموع تتكلم بدون اي صوت مسموع وتأشر على فمها بيدها
ريوف بفجعة/بروح انادي أمي/جرت خارجة من الغرفة/
.......
،،،مـجـلـس القرية،،،،
بـيّـن يتوسط المجلس بجلسته متربع بثوبه الكحلي اللي قسى من اعلى صدره من دم يـقـيـن وغترته اللي مبعثرة على راسه جالس بشموخ بدون اي اهتمام لنظرات اللوم والاتهام المتسلطة عليه
سطام جالس قباله ترجف يديه من كثر الغبنة يبي يذبحه وياخذ بحقه
سهم جالس جنب سطام بيده المجبسة همس لسطام/إهد إهد
بـيّـن ميل فمه بابتسامة برضا
سهم ارتفع حاجبه/اشوفك مبسوط
بـيّـن/الحمدلله الله يديمها نعمة
سهم احتدت ملامحه
الجد طاهر/ولد ياسهم الشيخ ماهو بموجود وعذره معه
سهم قاطعه حرك يده بخفة فوق وتحت/استريح ياعم طاهر استريح سحاب على وصول
الجد طاهر احتدت ملامحه من اسلوبه
مُحارب امتلى قلبه غيظ وشد على قبضتيه وهو ممتلي حقد وده يقوم ويذبحه
ظاهر مد يمينه وشد على قبضة مُحارب الراجفة بوضوح يهديه
بارود وقف/السلام عليكم
سهم ناظره
بارود ميل فمه بابتسامة خفيفة
//في صدر المجلس بمكان جلوس الشيخ وخلف المساند تحديدا باب يربط مجلس الشيخ ببيته//
بـيّـن احتدت ملامحه من سمع صوتها شد على قبضته بقهر
سحاب واقفة ورا الباب/حيا الله اهلي وربعي وتاج راسي حيالله من اسمي ارتبط باسمهم حيالله حياالله عزوتي حيالله السحاب الابيض المكتنفني حيالله من سحاب بدونهم ماتسوى ذرّة
//اعتلت اصوات المتواجدين بـ الله يسلمك الله يبقيك محشومة ياسحاب.....//
سحاب/تجمعنا الليلة بخصوص الموضوع اللي ماغاب طرياه عن الديرة كل ابوها ومثل ماسمعتوه جميع لازم تحضرون جميع نرفع الظلم ونرد الحقوق لاصحابها
بـيّـن ميل فمه بابتسامة
سهم قطب جبينه بشك من ابتسامة بـيّـن
سحاب/وش قولك ياولد خلف؟
بـيّـن/ياام زايد
بارود قاطعه بحدة/بالمجلس تناديها بسحاب فهمت!!
بـيّـن بتحدي لكل الموجودين/سحاب على روسكم ماهي بعلي!!
الجد طاهر زفر بغيظ منه
//اعتلت اصوات المتواجدين ينهرونه ويتلفظون عليه ويعددون أخطائه بعيونهم//
سحاب/يشهد الله ان ام زايد احب على قلبي من سحاب وهالندا اللي اطريته يلين قلبي عليك اكثر من قولك سحاب
سهم ابتسم
بـيّـن ابتسم بسخرية ثم نطق/انا بأمان الله اقوم مثل كل يوم ماادري الا بهالبنت تتوسط زريبتي
سطام وقف وتحرك له/تعقب وتخسي
بارود وسهم فزوا له ومسكوه
بـيّـن رفع صوته/تستفزع بي
//سكتوا اللي بالمجلس باستغراب//
بـيّـن/البنت استفزعت بي قالت تكفى ودخلت بوجهي وهي بوجهي واللي ينطق كلمة عنها قصيت لسانه
سطام ارتسمت الصدمة على ملامحه
سحاب احتدت ملامحها
بارود بلع ريقه
بـيّـن /كل ذا وانا مدري من هي ومن تكون
سهم اتسعت عيونه من كذبه
بـيّـن اشر بيده على سهم وبارود/مادريت غير هالاثنين مرتكبين روسهم تعدوا عليّ
سحاب كشرت بوجهها من كلامه
سطام التفت لسهم وبارود بصدمة
بـيّـن/ضربوا طرق اللي دافع عني وعن هالمخلوقة
سهم شد على قبضته بغبنة
بارود بصراخ/اقطع واحس يالكذوب!!
بـيّـن رفع صوته وبنظراته الحادة/واخذوها مني بالقوة وهي محتمية ورا ظهري وفوقها جدعوني(رموني)بهالغرفة متهميني ظلم ثم دريت انها بنت الشيخ/ناظر بارود وسهم/انشدوهم وش عندهم بالليلة اللي قبلها يحومون/اشر على بارود/ومن هو ضيفه اللي يحتريه ولا درينا عنه
//اعتلت صوت همسات المتواجدين لبعض//
مُحارب تنهد بصوت براحة
بارود بصراخ/تكذب ماعدّيت الصحيح!!
سحاب بهدوء/يابـيّـن خلك على اسمك وقول الصحيح!!
بـيّـن بوسع عيونه/وش هو الصحيح؟!!
سحاب شدت على يديها بندم للي بتقوله/هم اثنين ومنطوقهم واحد عينوك ذابح البنية ومتوسطة يديك
سطام رجف قلبه من قوة الكلام اتجهت انظاره الباب لاشعوريا كيف كيف قدرت تنطق هالكلام على الملأ الكل يسمع وشلون رمت هالاتهام اللي يضر يـقـيـن اكثر من بـيّـن ضاقت انفاسه واكتسى السواد وجهه
بـيّـن/خافي الله ياام زايد لاترمين الناس بذنوب هم بريين منها!!
سطام رفع عينه لبـيّـن
سحاب/مارميت أحد مير
بـيّـن قاطعها/صحيح متوسطة يـديـنـي مير اني فازع بها يم المستشفى لاتموت وهاذي ضرورة والضرورة تبيح المحظور
سطام اخذ نفس وهو يسمع حجج بين قبالها وكأنه انعكست صلة القرابة بينهم هو القريب وهالسحاب هي الغريبة
بـيّـن/واللي قلتيه مايجوز وماهو بحق تقولينه من اساسه
سهم احتدت نظرته
بارود/ماهو بأنت اللي تعلمنا الحقوق
بـيّـن بحدته/ولا هو انت اللي تتعدّا علي واسكت لك
سحاب شد على قبضتها/هالاثنين
بـيّـن قاطعها/وعشان اقطع هالألسنة اللي ترمي بالباطل معي الدليل ان هالاثنين تعدّوا وهي ماستفزعت بي الا من مصيبة 
مُحارب وقف ومد جواله لبيّن
بـيّـن اخذ الجوال اثناء وقوفه ومد الجوال بوجه سطام وشغل فيديو كاميرا بيته(الظاهر فيه فقط بداية الزريبة دخول يـقـيـن من قفاها وواضح عليها البعثرة وبعد فترة ظهر بـيّـن وبعد فترة ظهور بارود و عضة طرق وضربة سهم لطرق وبين ويقين باخر الزريبة مو طالعين بالفيديو)
سطام ناظر سهم بعدم استيعاب
سحاب باستدراك للوضع ماتدري وش يصير عندهم/وشلون عرفت انهم هم المصيبة!!
بـيّـن شد الجوال ثم رفع عينه للباب اللي هي وراه وسط احتدت ملامحه من سمع مراوغتها
مُحارب ارتسمت ملامح الغيظ على وجهه
الجد طاهر الهادي طول هالفترة شد على قبضته بغضب رغم ملامحه الهادية
سحاب شدت على يدها بقهر/الظاهر الكل فاهم الثاني خطأ
ظاهر ارتفع حاجبه بسخرية
سطام قطب جبينه وهو يسمعها
سحاب/بنيتنا ودّت العشا لولد عمها وحصل شي خلها تستفزع بك وانت ماقصرت وبارود وسهم اللي طول ليلهم ماامرحوا(ناموا)فهموا انك انت المعتدي وصار اللي صار
بـيّـن ضحك بصدمته
الجد طاهر/عين العقل ياسحاب
،
،
#شقّ_الغَمام