شـقّ الـغَـمـام

..(٢٦)..

..(٢٦)..
لاحول ولاقوة الا بالله العلي العظيم
-
بـيّـن مسك يد عسّاف ثناها ورا ظهره دفه لقدام بكل قوته وبحدة/طسّ عن وجهي لاأحطك مكانه ذالحين
عسّاف تقدم بخطواته من دفعة بـيّـن التفت له بعد اتزانه يناظره بحدة تقدم له ومن بين اسنانه همس/ماكفاك سواتك ناوي تزفتها علي الحين بعد!!
بـيّـن تجاوزه بدون اهتمام تفكيره محصور بشخص واحد يبيه بحياة وموت يبي يوصله وبس اتسعت عيونه من حس بنفسه يتراجع بخطواته لورا لااراديا من السحبة الخلفية له
عسّاف سحبه من قفاه مرجعه لورا وثبته ع جدار المجلس وبغبنة منه/تعقب تضيع صبري تعقب
بـيّـن الملاصق للجدار بألم/طيب فكني خلاص بأسوي اللي تبيه فكني
عساف ابعده عن الجدار لازال مثبته ودفعه بعيد عن مدخل المجلس يناظره بحدة/اذلف وهد الجن اللي براسك وقابلني عند جدك
بـيّـن واقف بمكانه يناظره بقهر
عسّاف تقدم بخطواته له
بـيّـن مشى مبتعد
عسّاف مشى وراه يناظره يتأكد من ابتعاده
بـيّـن ركب سيارته وحرك
عسّاف زفر براحة ثم احتدت نظرته من ناظر سيارة بـيّـن يلتف بسيارته باتجاه مغاير لطريق الديرة المسفلت اسرع بخطواته بنفس الطريق ثم جرى من تزايدت شكوكه وقف على مسافة قبال مدخل مجلس الديرة يناظره بشكه
بـيّـن التف بسيارته بين البيوت عالطريق الترابي بمسافة ماتبعد عن المجلس الشي الكثير ثم عدّل وجهة السيارة بحيث تكون مقدمتها مواجهة للمجلس اللي بنهاية هالطريق نزل تلتفت حوله من خلو المكان ثم تمدد تحت سيارته
عسّاف قطب جبينه بتفكير
بـيّـن سحب نفسه من تحت السيارة وقف ونفض يديه ونفسه بهدوء تلتف حوله من جديد يتأكد بنظراته
عسّاف المراقب له ارتفع حاجبه من فعله التقت نظراتهم ببعض
بـيّـن زفر بابتسامة للحظة ثم بددها وركب سيارته
عسّاف احتدت نظرته بعدم راحة من هالابتسامة اتسعت عيونه بذهول من ناظر بـيّـن وفهم فعله وفكرته المجنونة التف وراه وجرى بكل مافيه وبنفسه/مجنون مو بصاحي
بـيّـن ناظر المجلس بغبنته دعس على البنزين بكل سرعته
عسّاف دخل للمجلس بصرخة فزع/اطلعوا من المجلس بسرعة
بـيّـن اقتحم بوابة المجلس الخارجية العريضة مصدر صوت لتحطيم بوابته
//دب الرعب بين المتواجدين منهم من تحرك ومنهم من تجمد من هول الصدمة//
عزيز وقف بابتسامة واتجه لمقدمة المجلس خرج وثبت مكانه على بداية المجلس تكتف يناظره بتحدي وهالابتسامة مافارقته محياه لحظة
عسّاف الواقف داخل المجلس بتقطيبة حواجبه يناظر المجنون الثاني المنتظر لموته بلع ريقه من ناظر سيارة بـيّـن
بـيّـن شد عالدريكسون من توسط المدخل الخالي قبل المجلس طاحت عينه على عزيز الواقف بثقة مع هالابتسامة المعتلية وجهه عض شفته السفلية احتدت نظرته وتزايد قهره فوق القهر وصل بالسيارة للمجلس وعينه على عزيز
عسّاف جرى لعزيز وسحبه مبعدة عن طريق السيارة/يامجنون
عزيز تحرك مبتعد من سحبة عسّاف
بـيّـن باخر لحظة قرر يتراجع لف الدريكسون مغير وجهته وضرب بالسيارة بطرف احد خزانات الموية الملاصقة للمجلس مصدرة صوت تعالى بالديرة مسبب فزع لاهلها
عزيز دف يدين عسّاف عنه بغيظ واعتدل بوقفته
عسّاف كتم غيظه ورسم ملامح القلق على وجهه/عساك بخير ياشيخ علمني عساك بخير
عزيز ناظره باستغراب من اهتمامه/الحمدلله بخير
عسّاف تنهد براحة/الحمدلله
بـيّـن كمل طريقه بالسيارة بعدم سيطرة عليها ورجع لبوابات المدخل اخذ نفس باستعداد ولفها للنخل المجاور للبوابة وضربت السيارة بالنخل معلنة الاصطدام بصوت لايقل رعب عن صوت الاصطدام الاول
عسّاف اتسعت عيونه/راعي الجميلة
عزيز ناظره بتقطيبة حواجبه
عساف جرى خارج من المجلس متجه للسيارة
عزيز مشى وراه بتفكير وشلون يرمي الاتهام بهالفرصة اللي لولا تدخل هالغريب كانت من اروع الفرص له وافضلها لازم هالمرة يستغلها على اكمل وجه
عسّاف شقّ طريقه بين المتجمهرين بالمكان ثم وقف يناظره
بـيّـن نازل من سيارته واقف يناظرها بذهول
عسّاف تقدم له/سلامات سلامات
عزيز وقف بمقدمة المتجمهرين من اهل الديرة بابتسامة شماتة يخالطها شي من الرضا ماقدر يكبحها بالكامل رغم محاولاته تفلت منه طيوفها غصب عنه
بـيّـن النازف من جبهته بغزارة واحتل هالنزيف منتصف وجهه الأيسر وسط رجفة احتوته من اختلاط ألمه وغبنته من اللي يمر فيه هالرجفة كانت واضحة لعيون الكل التفت وراه بهالرجفة وملامح الالم سيطرت عليه يدوره بعيونه واستقرت عليه
عزيز رمش للحظات باستغراب
بـيّـن/ياشيخ شردّت حلال العرب ورضيت وذبحت السلق ونويت تلحقني به ورضيت
عزيز انخطف وجهه يناظره بذهول
//التفت العيون باتجاهه بصدمة//
عسّاف قطب جبينه من اللي يسمعه
بـيّـن جر خطواته الثقيلة والبطيئة جدا باتجاه عزيز الواقف على مسافة قريبة منه لكنها بعيدك مثير عليه بوضعه الحالي وبصوت مهتز/انت الشيخ وانا اقصاي راعي وين اقوى اطلع عنك وعن شورك بالاول الحريق وقلت ياولد ماعليه أخطا ثم اليوم الحلال والسلق والسيارة بهاللون!!
عزيز شد على قبضته وبملامح محتدة/ياهيه لايكبر راسك!!
بـيّـن صرخ بقهر وضح للكل/ابشر
عزيز ناظره بغبنة
بـيّـن بصوته المهتز/كل ماتبي مني ابشر وسم على امرك مير حدك مرتي لاتعرضّها لو دونها موتي رحبت به ياشيخ
عزيز رجف قلبه من اللي يسمعه بفهم لقصد بـيّـن الخسيس بعينه تقدم بملامحه الحادة رفع صوته/تـعـ/سكت بذهوله من ناظره/
بـيّـن تهاوى عالارض فاقد وعيه
عسّاف جلس عنده صرخ باللي حوله/مافيكم خير ساعدوني!!
//فزعوا كم رجل من اهل الديرة يساعدون عساف//
عزيز المثبتة انظاره على بـيّـن بغبنة سرت قشعريرة بجسمه من حس بالانظار عليه التفت يناظر اهل الديرة اللي حوله اتسعت عيونه من قرا اللوم والشك بعيونهم وبنرفزة/علامكم لايكون صدقتوا الراعي بشيخكم!!
//اكتفوا بالنظرات وسط صمت//
عزيز بعصبية رفع صوته/يعقب وتعقبون كل ابوكم معه مابقى الا هي تتهموني ببلاويكم!!
//ابتعدوا اهل الديرة من حوله//
عزيز بعصبيته/ايه اذلفوا اذلفوا كلكم لابارك الله فيكم من خياب اذلفوا
............................................................
سهم ماسك الدريكسون بيمينه يسوق السيارة بصمت متكي براسه على قزاز السيارة
ديوان ناظره باستغراب من الطريق الجديد عليه/سهم
سهم ضرب راسه بالقزاز بخفة مرات متتالية وسط كلامه/اسكت خلني اشوف لنا صرفة بدون نتورط
ديوان قطب جبينه/وش اللي نتورط به
سهم/شاهر
ديوان احتدت نظرته/اي شاهر!!لايكون ذاك الشاهر
سهم رفع يساره يلامس بطرف اصبعه شفته بوسط تفكيره/ايه ذاك النجس اللي ماتفوته الفايتة
ديوان بتوتر منه/وذا وش دخله معنا
سهم حك جبينه/سالفة طويلة مالك بها ذالحين علمني وش الدبرة
ديوان سكت ابتسم من طرت له الفكرة على طبق من ذهب التفت لسهم/ورا مانحطها معه ونقلعه عنّا
سهم/ذا نجس يبيعينا بريال
ديوان هز راسه/لاااا بيوافق ويمشي على رجوله لهم بعد
سهم قطب جبينه/وش اللي بيخليه يسوي هالسواة
ديوان/شريك مع سحاب وابو مظفر
سهم تغير وجهه/وشو!!
ديوان/ياولد بيرضى على طول
سهم/طيب وش الغرض من دخوله
ديوان/علمه عن واحد شريك لنا بالسجن ونبي منه يوصل علومنا له بدون شك وقضينا
سهم هز راسه/مابتمشي عليه
ديوان بحماس يخفيه/جرب وش انت خسران
سهم سكت بتفكير
ديوان يناظره بانتظار لموافقته
سهم زفر/وش سويت لقيت رجال ثقة
ديوان تنهد بضيق من عدم رده على اقتراحه/ايه لقيت ومالهم علاقة بابو مظفر
سهم التفت له وتأكيد/ثقة ياديوان؟
ديوان بابتسامة/قابلهم وتعرف بنفسك
سهم/كيف عرفتهم!!
ديوان/ماهو بأنت لحالك اللي تسوي لك علاقات بهذيك الايام
سهم سكت
ديوان ناظره وبتردد/هاه وش قلت باللي علمتك؟
سهم ناظره/مابتمشي عليه ذا رغم انه نجس مير انه داهية يعرف يخارج عمره
ديوان تبدد حماسه زفر بضيق
سهم وقف قباله
ديوان التفت يناظر السيارة ضيق عيونه يحاول يعرف اللي قبالهم
سهم/خلك هنيا لاتطلع ابد
شاهر جالس بسيارته ينتظرهم يطقطق بجواله بابتسامة رضا/هاكم قطرة من الغيث ياعيال منصور/رفع نظره للسيارة اللي وقفت قباله تبددت ابتسامته وظل يناظره/
سهم نزل من سيارته ووقف قبالها مال بجسمه مستند عليها
شاهر نزل من سيارته ووقف يناظره/خير وش بغيت
سهم/سحاب تقول سو مابدا لك
شاهر اتسعت عيونه/وشو!!
سهم رفع اكتافه بلامبالاة/تاليتها من بني طاهر ماتمسّنا لا من قريب ولا من بعيد طير بيديك ورجولك قواك الله/اعتدل بوقفته واتجه لسيارته حتى يركب فتح الباب شي بسيط والتفت يناظره/ايه رزقتك دورها عند غيرنا
شاهر مشى له بملامح محتدة وبغبنته/تدري ان محد بيصرفها لك مثلي ويدبرها كثري
سهم/صحيح محد مثلك مير انك نسيت انك تعلمت تحت سحاب واللي طلعتك تطلع عشر مثلك/فتح الباب اكثر باستعداد للركوب/
شاهر قفل الباب بقوة صرخ/سهم!!
سهم ناظره بحدة/سالفتك بنور اللي فازع بها ذالحين يمّنا هي من فتحت لك بيبان خير كانك نسيت
شاهر بحدة/وانا رديت عنكم ابواب شر كانك نسيت
سهم/وانت توطيت هالخير وشته بعيد برجولك محد اجبرك وطغى عليك ياشاهر
شاهر شد على قبضته بقوة وسط غيظه
سهم نتظره بابتسامة/الله يستر عليك/ركب السيارة/
شاهر نطق بقهره/وش يرضيكم ياسهم
سهم ناظره بابتسامة/يرضيني ولا يرضي سحاب؟
شاهر ناظره بتقطيبة جبينه
سهم بابتسامة/خلك بعيد ياشاهر وانا اوصلك وبيرضيني ويرضيك ويرضي سحاب بعد
ديوان ناظره بملامح كاسيها الحزن من سمعه كلامه بحزن على حاله وعلى اماله اللي بلا مرسى ولا أمان
............................................................
<<بيت سطام>>
نور بالمطبخ بفستان رسمي باللون البيج وياقة مثلثة واسعة باللون الابيض وبالجانب الايمن ثلاث ازارير باللون الذهبي تحت بعض بمسافة متساوية ماسك على جسمها بظفيرة فرنسية وحلق دائري ناعم باللون الابيض محدد جوانبه باللون الذهبي بكحل ومسكرا وقلوس تجهز الفطور بتوتر واضح على ملامحها
ام سطام واقفة بالمطبخ تتظاهر بانشغالها وعينها على نور تنهدت بعد ماقدرت تلتزم الصمت/وشو له لابسة وكل ريحة الطبخ تعلقت بك كان طبختي وبعده لبستي
نور ناظرت نفسها ابتسمت بضياع/ايه صح اصلا نسيت اني لبست
ام سطام ناظرتها مميلة فمها
نور سحبت الملح ومدت يدها للتاوة
ام سطام/ملحتيه خلاص
نور بابتسامة وسط ربكتها/ايه صح/سحبت السكر/
ام سطام/لاتحلين الشاهي عشان سطام
نور الناسية لهالموضوع المهم تنهدت بضيق من توترها الواضح وهي تحرك الشاهي بالمعلقة بلا داعي/ايه صحيح/فز قلبها واتسعت عيونها التفتت للجوال المتوسط رخامة المطبخ عن يمينها معتلي صوت رنينه المكان تقدمت له بتوقع لهوية المتصل مدت يديها له وتزايدت نبضات قلبها من ناظرت اسمه على شاشة الجوال بلعت ريقها بتوتر
ام سطام سحبت من يدها الملعقة/روحي افتحي اكيد زوجك
نور تجاهلت جوالها غسلت يديها ثم اتجهت للباب وقفت من ناظرته
سطام منتصف الحوش ناظرها بابتسامة/جيبي القهوة انا افتح له
نور لفت مبتعدة بتهرب من هاللقاء الثقيل عليها وشلون بتقابله كيف بتفاتحه كيف توضح له موقفها وبراءتها من كل اللي يصير حولها وقفت قبال باب المطبخ بلوم لنفسها كيف تهرب من المواجهة وهي اللي عاهدت نفسها ماتهرب ابدا تستقبل كل مابطريقها برحابة صدر ورضا حتى لو كان اشد مرار من طعم المُرة المكروهة لها لفت مسرعة بخطواتها واجب عليها تستقبله بابتسامة واجب تستقبله بحفاوة وحب موازي لحماسه ومجاوب لسؤاله حتى يعرف ويفهم مكانتها بقلبه هالمرة بوضوح ناظرت قفاه/سطام
سطام الواقف عند الباب التفت لها باستغراب
نور/كبني افتح له
سطام ناظرها بتفكير
نور/تكفى سطام
سطام تنهد/زين/رجع طريقه/
نور وقفت قبال الباب اخذت نفس بعمق ووقف نفسها بوسع عيونها من سمعته
ظاهر/ترا الجواب وصلك قبلي وشو له كل ذا التغلي يانور!!
نور لامست بيديها مقبض الباب وبابتسامة/قليل بحقي التغلي ولّا معترض ياظاهر؟
ظاهر/اخسى اعترض
نور فتحت بسرعة وسط ضحكتها الخفيفة/محشوم ياعيني محشوم
ظاهر دخل بابتسامة من ناظر ابتسامتها/السلام عليكم
نور قفلت الباب وراه بابتسامة/وعليكم السلام والرحمة
ظاهر انحنى ماد يده مصافحها سلم عليها خد بخد همس لها/يوه يالبيت مظلم بالحيل ناقصه نوره يظهر ويضويه
نور بابتسامة همست/ايه وهالنور هي نور ظاهر ولا غيرها؟
ظاهر/دامك صرتي لظاهر منارة توسطته وملته نور وشو له هالسؤال يانوره
نور ابتعدت بابتسامتها
ظاهر شد عليها مثبت خده بخده/اصبري شوي خلي قلبي يرتوي ويهدا قدامي اخوك
نور بانزعاج/ترا دقنك اوجعني بوخزاته
ظاهر بابتسامة/انا اقول بما ان سلامنا على بداياته ومطول كان ودك نروح بيتنا ونكمله عن نفسي موافق
نور اتسعت عيونها تراجعت بخطواتها عنه تناظره
ظاهر شد على يدها بابتسامة/علامك ماقلت الا الصحيح اشتقت لسوالفك علي
نور ميلت فمها بابتسامة ثم نطقت بمجاراة/اكيد انها سوالف؟
ظاهر/اي والله يشهد الله سوالف عاد الباقي الله اعلم فيه
نور اعتلى صوت ضحكتها
ظاهر بضحكة خفيفة/قلت لك امشي نكمل سوالفنا ببيتنا ازين
نور سحبت يمينها من يمينه واحتضنت ذراعه ومشت/واخوي الضعيف نكبه بلا فطور
ظاهر/ياهالاخو اللي ماشبع مجاور وانتي معه طول عمركم وذالحين انا توني باول الطريق وهو حاسدني!!
نور وقفت والتفتت له بوسع عيونها/حرام عليك ظاهر!!
سطام واقف على باب الصالة/اي والله حرام عليك ياظاهر ياكبرها بحقي
نور ناظرت سطام باحراج وتركت يد ظاهر بابتسامة
ظاهر تقدم لسطام بابتسامة/المعذرة يالنسيب زلات طغت بدون شعور/مد يده يصافحه/
سطام سلم عليه بابتسامة/ياهلا ومرحبا حياك الله اقلط حياك
نور مشت بخطوات واسعة وسريعة باتجاه المطبخ وسط نظرات ظاهر اللي مافارقتها
ظاهر دخل من ابتعدت عن عيونه والتقت عيونه بعيون سطام/الله يسلمك ويبقيك
ريوف المراقبة خلف باب غرفتها هي وامها بصمت قفلت الباب وجلست بتفكير بينها وبين نفسها مراجعة لتصرفات بـيّـن وظاهر ميلت فمها/الراعي والمجنون كل واحد منهم مابه خلاف علامهم يهولون الامور يمّهم/قطبت جبينها بلوم لنفسها وبنرفزة/يعقبون بني طاهر والله لو يملون الارض خير وطيب فعول يظلون بني طاهر سويدين الوجه/ارتمت على سريرها المشترك مع امها المتواضع وبضيق على نفسها/ياربي متى امي تاخذنا لبيت جدتي متى؟
نور دخلت للمطبخ بابتسامة سحبت صينية الفناجيل
ام سطام ناظرتها/اصبري على رزقتك ونشوف هالضحكات تبقى ولّا يتبدل حالها لاعرف ولد خلف بالعلم
نور اختفت ابتسامتها وناظرت امها بحدة/وش يضرك يمه لا هديتي خاطري بكلمة
ام سطام/اأبهدي خاطرك واطيبه لا شفتي فعول بني طاهر بعيونك وعرفتي ليه ماابيك تقربينهم/مشت وتركتها/
نور شدت عالصينية بين يديها تطرد كل توتر وخوف وضيق يحتويها ومشت متجهة لهم
//بعد القهوة والفطور//
سطام التفت لنور/روحي جهزي برادي الشاهي
ظاهر قطب جبينه/هذا هو ياابو منصور/مد يده/ابشر بكا
سطام قاطعه بابتسامة/تسلم مير ذا به شوي حلا مرريه يانور خلي مراره زايد بالحيل
ظاهر ناظره باستغراب اعتلى ملامحه
نور مدت يدها واخذت ابريق الشاهي وقفت/ابشر/جرت خطواتها للخارج دخلت للمطبخ وانحنت شبه جالسة وسط نبضات قلبها السريعة/
ظاهر ناظر ملامح سطام/عسى ماشر يالنسيب
سطام/اسمع ياولد العم والوجه من الوجه ابيض
ظاهر عقد حواجبه باستغراب يتزايد كل مانطق سطام/رايتك بيضا عسى ماخلاف!!
سطام/طليق نور
ظاهر احتدت نظرته/علامه
سطام شد على قبضته وبثقة نطق/النذل الخسيس مصورها صور وهي على ذمته/ناظره بحدة/كل مايجي ببالك سواه هالخسيس
ظاهر شحب وجهه من ذكر شرطها واصرارها بتنفيذه كل مرة وزعلها المخترق لاعلى سما لاكسر شرطها
سطام/كان نويت الصد ماعليك ملامة حقك وبرايك سو ماتريد
ظاهر سرت رجفة بعظامه من تخيل كمية الابتزاز والضغط والصمت اللي تعيشه لوحدها اخذ نفس يستجمع شتات افكاره شد على قبضته ناظر سطام بتماسك/علمني من متى هالعلم
سطام زفر/حول الاربع سنين
ظاهر يحس هوى قلبه للقاع من كثر فجعته عايشة هالمشاعر البشعة كل هالفترة وملتزمة الصمت بدون تذمر كل هالفترة
سطام ناظر صمته/الموضوع من بداياته محتاج رجال يوقفون بوجه هالخسيس مير انه تغطى بين يديها سنين وعود هالنذل البارح/بغبنة/البارح اللي دريت ووالله ماترسي على بر وانا ولد ابوي
ظاهر احتدت ملامحه والتفت يناظره/وينك راقد كل هالسنين
سطام ناظره بحدة
ظاهر/يسرح ويمرح لامنه عتب باب بيتك يدري بردى فعوله ويدري محدن يقواه ويوقفه عند حده
سطام/هذاني دريت وذالحين علمتك لاني مارضى على اختي تعيش الوجع مرتين!!
ظاهر ناظره بغبنة وقف واعتلى صوت صراخه/نـوووررر بنت يانور
نور بالمطبخ فزت برعب من سمعت صراخه باسمها تسارعت نبضات قلبها بجنون شد على قبضتها بعدم قدرة منها تتحرك له
سطام وقف واحتدت نظرته/كبّ نور عنك وعلمني تخاف الله ولا تسريح باحسان ياولد خلف
ظاهر ناظره بغبنة منه خرج من الصالة قاطع الحوش بصراخه/نوووور بنت يانوووررر
سطام اسرع بخطواته ووقف قباله بغبنة منه صرخ/احشم عمرك انت في بيتي
ظاهر ناظره بغيظ
نور وقفت قباله بهدوءها/نعم ياظاهر
ظاهر ناظر هدوءها المعتاد انشحن صدره غبن اكثر من هالهدوء اللي بغير وقته وبغبنته صرخ بوجهها/ليه ماقلتي لي!!ليه ماعلمتيني باللي يصير معك ليه
نور ناظرته بغصة توسطت حلقها كيف تفاتحه بالموضوع وهي تخاف من ردة فعله هو قوي بكل شي مايتحمل الاهانة كيف اذا صارت الاهانة من هالنوع الكبير وبعرضه
ظاهر صرخ/لاتسكتين انطقي تكلمي قولي ليه ماعلمتيني ليه
نور صرخت/لانك بتكون كذا
ظاهر ناظرها بحدة
نور بانفعال وسط دموعها/بتنجن علي وتفرغ كل قهرك وتلومني على ثقتي فيه بوقت كان هو مكانك وشلون تبيني اقولها لك وشلون
ظاهر شد على قبضته بغبنة تقدم لها
سطام وقف بينهم
ظاهر ناظره بحدة
سطام ماتحرك
نور مدت يدها مبعدة سطام عن طريقه
سطام ابتعد خطوة فقط ماقدر يبتعد اكثر بخوف عليها
ظاهر ناظرها بملامحه المحتدة/تسأليني وشلون
نور تناظره بدموعها
ظاهر بصراخه/بنفس طريقتك يوم اخذتيني مجنون ورجعتي يمي عقلي
نور أتسعت عيونها بذهول
ظاهر مد يديه مثبتها عاى اكتافها ويضغط عليها بقهر/ذالحين دوري يانور ارجع لقلبك ودنياك ذاك الامان اللي راح من يديك
نور انهمرت دموعها بغزارة
ظاهر حاوطها بيديه وضمها لحضنه بكل مافيه الود وده ييخبيها بين ضلوعه ويرجع لها ذيك الثقة المسلوبة منها
نور انفجرت تبكي بين يديه اخيرا حررت نفسها من هالسر الثقيل اللي ماتركها تتعامل مع ظاهر بكل اريحية كانت تحط حد يفصل بينهم بخوف تنلدغ من نفس الجحر مرتين رمت نفسها عليه تدور اللي فقدته من سنين وبوسط بكاها/والله ياظاهر يكذب اني شريفة عفيفة صاينة نفسي لاتصدقه ياظاهر لاتصدقه
ظاهر مسح على راسها وبهدوء رغم البراكين المحتلة صدره بهاللحظة/انتي ميزان الشرف يانور يعقب يدنس طرف تراب وطيتيه يعقب
نور وصلت للي تدور عليه اخيرا من سمعت جوابه اخيرا تقدر تعطي كل ثقتها لظاهر وتسلمه مشاعرها ونفسها بأمان وبدون خوف وتردد ضمته لها بكل قوتها وكأنها تستنجد فيه ويحل موضوعها حتى ترتاح
ظاهر بادلها هالحضن العميق الممتلي مشاعر ودموع/ابشري ماهو بشنب على رجال كان ماحبّ رجولك يطلبك الحل ابشري يابنت عمي ابشري
............................................................
<<بيت طاهر>>
حمدة جالسة مشغلة الراديو تسمع له بابتسامة وراحة بال ورضا وسط ابتسامتها قبالها دلتها اللي تتقهوى منها نزلت فنجالها بابتسامة من ناظرتها/ياهلا ومرحبا هلا بغصين ياهلا
غصنة وقفت عندها وانحنت مقبلة راسها ويدها
حمدة بابتسامتها/الله يرضى عليك ياغصين الله يرضى عليك ياوليدي
غصنة جلست قبالها وبجدية/جدة
حمدة/هاه تبين اغصب نواف يوديك البقالة
غصنة ناظرتها/وانا ياجدة علامك مازعلتي علي
حمدة عقدت حواجبها باستغراب/خير علامك تدورين الهواش
غصنة/عنيت البارح ياجدة كانك نسيتي
حمدة ناظرتها بغيظ/علامه البارح قضى بشينه وزينه
غصنة شدت على قبضتها/لا ياجدة باقي من الشين هرجي يمك ولا زعلك يروح لناس وناس لا
حمدة بحدة/اقصري الشر ياغصنة
غصنة برجفة صوتها/لو ماضيقت صدرك بهروجي ماشبت بينك وبين يقين حرام ياجدة والله حرام خذي حقك مني وكبي بـيّـن يعود
حمدة بحدة/اسمعي عاد يابنت خلف هي قايمة من الاول بك ولا بلياك مسر ادحري ابليس وعودي يم البيت
غصنة/ياجدة لاتقهرين بـيّـن فوق قهره
حمدة بحدة/غصنة
غصنة ناظرتها بطيف دموع
حمدة بنرفزة منها/قومي فكي الباب ذا اللي ازعجنا وطسي عن وجهي
غصنة/ليه ياجدة لذالحين شايشة عليه ليه
حمدة بحدة/قومي دام النفس طيبة قومي عني
............................................................
<<بيت مضاوي>>
ولاء بعبايتها رافعة شنطتها بين يديها تجر خطواتها بهدوء متجهة للباب فتحت باب البيت وخرجت
محارب جالس بالسيارة منحني بجسمه ومستند عالدريكسون ينتظرها وسط تثاوبه التفت يناظرها باستغراب من طريقة خروجها
ولاء جلست بالسيارة وزفرت براحة/السلام عليكم
محارب ناظرها بتعقيدة حواجبه/وعليكم السلام والرحمة/اعتدل بجسمه ساند ظهره للمقعدة/علامك تتسحبين تقل سروق
ولاء ناظرته بغيظ/ماني بسروق لكن هالمرة لازم اروح بهالطريقة
محارب تكتف يناظرها ينتظر السبب
ولاء تربعت والتفتت له تناظره/انا مالي شغل بهالحروب كله من تحت راس جدتي وجدتك احسن واسلم لي أهج
محارب قطب جبينه يدري بسالفة يقين وجدته وباستغراب/وانتي وش عليك منهم!!
ولاء بضيق/لولا برمتي ذيك قدامها ماقدحت بنت منصور وجلست تتحدى جدتك وكبرت الى ماصارت حريقة أكلت ناس مالهم ذنب
محارب/تقولين ناس مالهم ذنب!!وبتهجين!!
ولاء عبست بوجهها/ايه اهج انا مااحب سوالف فلانة ازين وفلانة اكشخ وفلانة اسنع مااحبها سوالف السلفات ذي مااطيقها
محارب/دام ماتحبينها خليك واضحة خابرك تقولين الصدق مايهزك ريح
ولاء بتردد مختلط بخوف/قلت الصدق ورحت السجن يامحارب
محارب تنهد/ولاء اللي سويتيه هو الصح لو يوردك غوانتانامو!!
ولاء بوسع عيونها بخوف/اعوذ بالله فالك ماقبلته
محارب ابتسم من فزة خوفها/علميني ياولاء
ولاء ناظرته بتردد
محارب/الثنتين نفس بعض؟
ولاء سكتت تقارن بين رؤيا ويقين رؤيا كانت مرعوبة بذاك الوضع عكس يقين اللي تصرفت واخذت حقها رغم خطأها البسيط/لا فيه فرق وكثير
محارب/الامور تصنيف ماهي بهجّة ولا هي بطناخة وقدحة من هي اللي لازم تحسنين وضعك وتتعايشين معها لان مردك تقابلينها وواجد بعد
ولاء سكتت من وضوح الاجابة
محارب ميل فمه وبسخرية/ماااش ماعادك ذيك الاولة اللي اخبرها
ولاء تكتفت بغيظ/اللي شفته مو هين
محارب/انا اشهد ماهو بهين مير ماني خابرك حصني تهجين خابرك ذيبة تقبلين
ولاء سكتت بشي من الندم وتأنيب الضمير
محارب/هاه حصني ولا ذيب؟
ولاء التفتت تناظره وبغيظها/علامك واقف امش
محارب بابتسامة/نهجّ مثل الحصانية ولا نقبل مثل الذيابة
............................................................
<<بيت طاهر>>
غالية متكتفة تناظرهم بغيظ
سالمة جالسة جنب سعاد ملتزمة الصمت
سعاد تتقهوى بابتسامة/الله يجمل حالك ياام خلف
حمدة تتقهوى/اللي سوتها ام خالد مالي بها يد
سعاد ضحكت بخفة اخفت خلفه قهرها من هالعجوز/انعم بام خالد واصلها
غالية إرتفع حاجبها باستغراب/هاه!!
سعاد/ياام خالد مااشتقتي لبيتك وعيالك
غالية/البيت اللي وراه مهانة اعقب اشتاق له واشتاق لاهله
سالمة ناظرتها بقهر
سعاد برجى/يابنت الحلال اعذري واصفحي حق الايام الخوالي وثمرهن
غالية بوسع عيونها/الله اكبر اعذر واصفح!!
سالمة/والله ياغالية عايض بدونك ضايع مايعرف يدبر عمره كيف اجل تبينه يدبر ورعانه!!
غالية/وانتن وينكن عنه والمرة اللي تحلفن بها علامها ابطت/ضحكت بسخرية/لايكون هجت يوم درت وراه جيش!!
سعاد/مير انتي الاولة والاخيرة ياغالية
غالية/خابرة من ترضى باخوكن غيري هذاني انعميت واخذته وفوقه معه خوات قشر مثلكن
سالمة بنرفزة/وشو له الخطا ياغالية وحنا جينا نبي الصلح
غالية/هاذي الحقيقة ماهي الخطأ ابد ياسالمة مير اني باذن اللي ماتنام عينه ماجورة على سواياكم فيني
سعاد/هذا اخر الهرج ياغالية
غالية/اخر الهرج واخوكن معكن ماهو بتلفني لحالكن وثم تفزعن تبكبكن على عينه عني وينتفخ راسه مثل سواياكن دايم
سعاد وقفت/قومي ياسالمة قومي
غالية/اسمعن عاد رجعة من راسي كذيا مافيه ارتاحن تجني ومعكن اخوكن وتسمعون لي وقتها يصير خير
سعاد ناظرت حمدة
حمدة/مالي شغل هي صاحبة الامر
سعاد/فمان الله يابني طاهر/مشت بخطوات سريعة
سالمة مشت وراها
غالية رفعت صوتها/اي والله فمانه الله يديمه ويكفينا شر خلقه
حمدة/خلاص ياغالية يسدك ماقلتي
غالية بحرقة قلبها/مابعد برد يمه كبيني عنك
حمدة تنهدت/الله يصلح حالك وانا امك الله يصلحه
............................................................
<<بيت بـيّـن>>
يقين متربعة عالسرير على اعصابها من هالاصوات اللي برا البيت ماوقفت من صحت صوت رجال مختلط بصوت سياراتهم كل ذا وسط غياب الصرت الرئيسي اللي تنتظره خرجت جوالها تتصل فيه للمرة اللي ماتدري كم من كثر اتصالها ويستقبلها جواله المغلق تنهدت بقلق/عساك بس ماسويت شي بهم يارب سلمها معنا يارب
محارب وقف بسيارته باستغراب من وجود هالسيارات تكلم وعينه على ولاء/احتريني لاتنزلين/نزل ومشى/
ولاء ناظرته يتجه للسيارات واختفى عن نظرها مرت دقايق وهي تنتظره على اعصابها
محارب رجع بوجهه المخطوف وبنرفزة/انزلي عند مرة بـيّـن
ولاء ناظرته بشك/وش فيك محارب
محارب ارتفع صوته/انزلي وفكينا
ولاء بعناد/ماني بنازلة وش فيه تكلم ماني تاركتك وانت كذا
محارب/واللي يرحم والديك انزلي وريحيني
//انصدموا من حسوا بالباب الخلفي ينفتح//
يقين اللي ماتحملت تصبر اكثر وتنتظر داخل بيتها لبست عبايتها وخرجت وعرفت سيارة محارب رغم انها ماتعرف شكله لكن معرفتها للسيارة فقط وبليلة وحدة هي ليلة البارح المشوومة وقت ناظرها بـيّـن ونطق(وصلنا سيارة محارب سيارتنا وراها)بوقتها ناظرت اللوحة وحفظتها ركبت بشجاعة مراهنة على هالسيارة وحتى لو كان مختلف صاحبها بتلقى حل اكيد هذا اللي كانت تصبر نفسها فيه رغم شي من الخوف محتويها جلست/السلام عليكم
ولاء التفتت وراها بوسع عيونها/وعليكم السلام والرحمة
محارب صد بوجهه/وعليكم السلام
ولاء ميلت نفسها لها/يقين؟
يقين تنهدت براحة من تاكدت من السيارة واصحابها نطقت/من الصبح وهالرجال حول البيت وبـيّـن مدري وينه
محارب بحدة/كان ماطلعتي ظليتي ببيتك
ولاء ناظرته همست/محارب
يقين/ابشر يابو خلف مير انه راعي البيت موصيني لا سمعت لجاجة حولي مااقعد دقيقة بالبيت علمني من الواجب طاعته
محارب حرك بسرعة متفادي نقاشها وبنرفزة وصل اقصاها من جرأتها بعينه وبنفسه/وش هالبلوى اللي تورط بها بـيّـن
يقين/ياابو خلف وينه بـيّـن ماجاكم؟
ولاء شدت على يدها بغيظ من كثر أسئلتها بعينها
محارب/ذالحين رايحين يمّه/شد عالدريكسون بخوف وسط افكار توديه وتجيبه رفع جواله متصل بجده وبعد رنينه نطق بصوت اهتز للحظة/ياجد ضيفك اتصل به ياجد اعجل علي تكفى
............................................................
<<الـمـسـتـشـفـى>>
عسّاف واقف متكتف يناظره بقهر
بـيّـن متمدد عالسرير براسه المخيظ بغرز انلف فوقها شاش يغطيها ووجهه المغطى بجروح معقمة فقط بدون لزقات ويده المشابه لراسه بعدد الغرز والتف حولها الشاش الابيض
عسّاف انحنى مثبت يديه عالسرير يناظره وبقهره همس/لو لي سلطة عليك طردتك من الديرة ياوجه النكبة
بـيّـن المستغرق بنومه من التعب مارد
عسّاف اعتدل بوقفته واتجه للريسبشن البسيط/وينه دكتور الطوارئ
موظف الاستقبال/تلقى مكتبه نهاية الممر يمين
عسّاف جر خطواته بضيق مرتسم على ملامحه وقف يناظر اللي يصير بنهاية الممر بعدم تصديق
الدكتور جسّار منزل لابكوته مثبت ياقته خلف راسه ورابط اكمامه على مقدمة راسه منزل جواله على كراسي الانتظار ومعتلي صوته بشيلة غطت هالممر يرقص يميل راسه وكان هاللابكوت شعره وقباله بنت بعمر الست سنين ترقص معه
عسّاف يناظره/يارب بليتني بهالمنبطح داخل لاتبتليني بهالدكتور اللي يبي له دكتور يارب انه ماهو هو يارب
ممرض بيده عينات الدم مر من جنب عساف
عسّاف وقفه/لو سمحت وينه دكتور جسّار
الممرض التفت يناظره بابتسامة ثم ناظر وجه عساف المفزوع/ماعليك تراه شاطر بس عشان هالبنت امها مريضة داخل وينتظر ولي امرها معها يهديها شوي
عساف/يهديها كذا!!
الممرض ضحك بخفة/ماشفت اخوه اجل!!
عساف بقلق واضح على ملامحه/له اخو مثله
الممرض ضحك/لاتخاف كلهم الاثنين شاطرين كثير روح واسأله مايقصر معك/مشى/
عسّاف ناظر جسار
جسار ثاني يساره حول وسطه ويلوح بيمينه يرقص بمجاراة لهالصغيرة وسط تحريكه لراسه وقف وصفر ثم صفق وبصوته العالي/عاشوا عاشت تماضر عاشت
عسّاف/امحق شطارة لو هو شاطر ماتعين في ذا!!
جسار انتبه لعساف الواقف من مسافة وناظر الصغيرة بابتسامة بوسط انفاسه السريعة/تماضر كملي رقص شوي وراجع اعلمك رقصة ماتنسينها ابدا/جرى لعساف بكل مافيه/
عساف اتعست عيونه تراجع خطوة لورا من حس بقربه
جسار وقف عنذه بوسط انفاسه/معليش معليش بس نداء الواجب يتطلب هالسرعة امرني اي مريض/ضحك باحراج من ذكر ربطه للابكوت على راسه وفتحه ماسكه بيده/
عساف بنفسه/من كثر المرضى!!/نطق/بـيّـن خـ
جسار قاطعه بجدية/بـيّـن خلف طاهر ايه ايه عرفته اموره مبدئيا سليمة لكن يحتاج اشعة مقطعية نتأكد بما ان مكان الضربة بالراس
عسّاف زفر براحة/يعني الحين اموره بخير الحمدلله
جسار بابتسامة/الحمدلله بخير لكن ضروري يقعد تحت الملاحظة عندنا ٢٤ساعة وهاه تراه نايم الحين من المسكنات
عساف مد يده يصلفحه بابتسامة/مشكور يادكتور ماقصرت مشكور
جسار/العفو حق و واجب مانشكر على واجبنا عن اذنك/لف لتماضر ثنى يده حول وسطه ورفع لابكوته يلفه بيده بالسماء وهو يتمايل/هيه هيه تماضر هيه
عساف يناظره/خلف الله عالمستشفى كان ذا دكتورها/لف اسرع بخطواته/نغير المستشفى الحين نتطمن/مشى للاستقبال حتى يخرج بـيّـن على مسؤوليته ويتجه به لمستشفى المحافظة الكبير/
#شقّ_الغَمام