شـقّ الـغَـمـام

..(٢٤)..

..(٢٤)..
استغفر الله العظيم وانوب إليه
تفاعل لطفا
-
............................................................
<<مجلس الشعر>>
بـيّـن وسط المجلس يقهوي الضيوف ماغاب عنه ذيك النظرات المتسلطة عليه حتى لو انشغلت عنه لحظات رجعت له تراقبه وكأنه تحت مجهر اتجه له وقف من ناظر المعترض طريقه
رازي واقف قباله بينهم مسافة بسيطة بابتسامة/وين الفناجيل؟
بـيّـن ببرود/بيدي اللي بتكسرها على راسك
رازي ابتسم تقدم له/يالله سوها
بـيّـن شد عالفناجيل اللي بيمينه بكل قوته يكبح نفسه عنه بشكل واضح للكل  
رازي ناظره بابتسامة مد يده ليد بـيّـن يسحب الفناجيل من يده وبهمس/بشويش بشويش لاتتعور
بـيّـن سحب يده بقوة ومر متجاوزه بخطوات سريعة لاينفذ كلامه فعلا
رازي التفت يناظره بابتسامة
طاهر يناظرهم بشك
نواف وقف عند رازي/علامكم شايشين من الصبح على بعضكم
رازي بابتسامة/والله لااطفشه بعمره الى مايجلدني ويرتاح
نواف/مهبول انت والله ان تعض الارض
رازي زفر بابتسامته وسحب من يد نواف الدلة/هات بس خلني اقهوي الضيوف
بـيّـن وقف قباله بصدره المشحون من نظراته له وزاد غضب من رازي مد يده بنظرات حادة/فنجالك
عسّاف رفع فنجاله وثبته بيد بـيّـن مغطي اعلاه بيده بابتسامة/سلمت خلاص عساها دايمة/ابتسم باحراج واشر به بيساره بمعنى اقرب/
بـيّـن انحنى شبه راكع باستغراب/سمّ
عسّاف/ودي اطيّر الحاجة
بـيّـن اعتدل وسط ابتسامة/حياك/مشى/
عسّاف وقف ومشى وراه
طاهر قطب جبينه من ناظر عساف يتبع بـيّـن
بـيّـن خارج من بيت الشعر متجه للمسجد القريب من بيت الشعر/بس ناخذ اللفة الحمامات بالمسجد من ورا/لف المسجد واختفى بيت الشعر عن عيونه قطب جبينه والتفت من سمع خطوات سريعة واضحة/
عسّاف جرى له بغبنة وسدد له لكمة على وجهه
بـيّـن استقبل اللكمة بعدم توقع منه تراجع بخطواته ورا ناظره وبرفعة صوته/صاحي/اتسعت عيونه ورفع يديه قبال وجهه يحمي نفسه/
عسّاف بلكمات متتالية بكل قوته وبدون رحمة من كثر قهره
بـيّـن يحس بعظام يديه تكسرت من كثر الضربات اللي استقبلتها نزل يديه لحظة توجيه عسّاف لكمة له صد هالضربة ومسك يده سحبه له بمحاولة يرفعه حتى يرميه بالارض
عسّاف تحرك بابتسامة مع سحبة بـيّـن له وعكس الموضوع ضده ورماه عالارض وجلس فوقه وانحنى ضاغط بيده على رقبة بـيّـن يخنقه
بـيّـن بمحاولات يائسة يحاول يحرك الجبل اللي جثى فوقه لكن بدون فايدة
عسّاف بنظرات حادة زاد معها ضغطه على بـيّـن ومن بين اسنانه بقهر وصل اقصاه/يامـ*** من اللي سمح لك تضيع تعب سنتين علي مين
بـيّـن المختنق تحته يسمع كلامه بدون تركيز كل اللي يبيه بهاللحظة يفك عمره من هالجثة اللي فوقه
طاهر وقف عندهم واستند على عكازه تنهد وبهدوء/عسّاف
عسّاف التف له وبحدة/نعم
طاهر ارتفع حاجبه للحظة من نبرته/به ضيوف بالمجلس ناوي تلمهم علينا!!
عسّاف تركه رفع نفسه مبتعد عن بـيّـن ثم وقف وناظر طاهر/من كثر سوالفك عنه ظنيته من اذكى ماخلق ربي/ناظر بـيّـن بقهر/لكن كل ماقلته لي سوالف لاتودي ولا تجيب
بـيّـن جلس عالارض يلقط انفاسه مرر نظره بين جده وعسّاف ثم ثبت نظره على عساف بحقد
طاهر بتحذير/امسك ارضك يابـيّـن
بـيّـن فتح ازارير ثوبه وسط نظراته الحاقدة لجده/تردني عن هالمهبول
عسّاف ضحك باتساع عيونه/انا المهبول انا!!/اسرع بخطواته لبــيّـن ناوي يبرد قلبه اللي بعده مابرد/
طاهر بحدة/عسّاف امسك ارضك انت الثاني 
عسّاف وقف والتفت له/وان مامسكتها ناوي تدعسني مرة ثانية!!
،
،
~~قـبـل ٣ سنوات~~
عساف ورا مكتبه عيونه عاللاب بتركيز
محمد وقف قباله/ابو عاصي به شايب اشغل الشباب اليوم سادس يوم يصبح عليهم يقول يبي اكبر راس يبي يقدم عنده بلاغ ورفض يقوله يبي عقيد يقدم له بلاغه
عساف ناظره بحدة/خبل انت!!
محمد/اكيد ماني مدخله حتى عالمقدم لكن هذا هو من يصبح الى مايمسي وحتى لا طردناه ينتظر عند الباب مايتحرك
عسّاف ميل فمه/دخله علي يامحمد خلنا نشوف وش وراه/لحظات من وصله صوت الجندي وقف ورسم ابتسامة مجاملة بالقوة على وجهه وهو يكره المجاملات وبالحيل/
طاهر دخل مستند على عكازه بثوبه وشماغه الاحمر يجر خطواته بهيبة ووقار/السلام عليكم
عسّاف تحرك من مكتبه
محمد/تفضل ياعم/اشر على عساف/الرائد عسّاف
طاهر وقف واحتدت ملامحه/علمتك ابي عقيد ماابي صغير القوم
عسّاف اختفت ابتسامته واحتدت ملامحه/صغير القوم ذيب  ناطح روس عجز عنها كبار قومه وطرحها
طاهر ناظره بتفكير بنفس ملامحه/وكان عجزت عن اللي باعلمك به وش اسوي بك
عسّاف ابتسم/ادعسني ومسموح
طاهر ناظر الجندي/تراك شاهد
محمد ناظر عساف بتردد
عسّاف ناظر الجندي بتاكيد/تراك شاهد
محمد/ابشروا
طاهر ناظر الجندي/اطلع
محمد ناظره بذهول
عسّاف/اطلع يامحمد اطلع
محمد خرج
عسّاف/ارتاح ياعم
طاهر جلس تنهد/انا مدري من وين أبدا الصحيح
عسّاف/ابدأ من وين مايزين لك هاه ياعم تفضل اسمعك
طاهر/كان علمتك دياري مصب فساد لعب بعيالنا وفاض صبّه لعيال المسلمين تصدقني
عسّاف اجتاحه حماس شد قبضته يكبحه حتى مايخيب حماسه ويكتئب كعادته كل مرة محتفظ بملامحه الباردة/وشلون دريت ياابو/سكت/
طاهر احتدت ملامحه/عياش ابو عياش 
عسّاف/ياابو عياش نصيت اكبر راس لازم يكون معك شي يثبت كلامك
طاهر دخل يده بجيبه وخرج كيس شفاف داخله لفافات تشبه الدخان باللون الاخضر
عسّاف شد على قبضته من لمح اللي بين يديه
طاهر مد الكيس/هاك ذي عينتها بيدين الورعان قدام الابتدائية
عسّاف اخذها ناظرها بتركيز نطق وعينه عالكيس/بس هذا ماهو بدليل
طاهر بغيظ/تعال يم الديرة وتفطّن بتعرف ان هالديرة ماهي مثل الديار
عسّاف رفع نظره لطاهر/مايصير تتبلى المسلمين/رفع الكيس بين اصابع يمينه/هي توزع بينهم فعلا لكن مايعني ان وجودها بحد ذاته بديرتك
طاهر وقف بغضب مد يده يبي ياخذ كيسته
عسّاف رجع الكيس وراه/لا ياعم لا اتركه عندي احسن لك/بابتسامة/لايبتلونك
طاهر ناظره بغضب مد يده/رد علي غرضاني
عسّاف دخل الكيس بجيبه/اترك رقمك عند محمد وبنتواصل معك قريب ان شاء الله
طاهر شد على قبضته بغبنة وجر خطواته السريعة خارج
محمد دخل/هاه بشر
عسّاف/الحقه خذ رقمه
محمد اسرع ورا طاهر وبصوت اعتلى المكان/ياعم ياعم
عساف وقف واتجه لدرج مكتبه سحبه مخرج كيس محتفظ فيه من فترة طويلة قاربت الثمان شهور بعد يأسه من وصول اي معلومة له عن هالنبات الغريب المشابه للحشيش جدا باختلاف بسيط يكاد لايذكر رغم نفس خصائصه حتى ان تأثيره اقوى وانتهت السبل به بدون اي خيط يدله على مكان التصنيع وحتى الموزع ماحصل من وراه اي معلومة رفع تليفون مكتبه وبابتسامة/هلا ابو فارس الموضوع اللي طلبه العقيد قبل مدة وصلتنا معلومة مهمة
.
،،بالليل،،
عسّاف يسوق سيارته بعد ماأنهى دوامه وقف على جنب الطريق قاطعه للجهة الثانية قاصد للمغسلة يبي ياخذ ملابسه قطب جبينه من حس بنور قوي يغطي الشارع الشبه فاضي بهالوقت التفت واتسعت عيونه من نتظر هالسيارة المتجهة له وعرف بنية السواق اللي ماهدت سرعته ابد شد على قبضته وجرى للسيارة بجنون نط من قرب منها واقف عالكبوت وكمل طريق صعوده للسيارة لكن خانته جزمته متسببة بانزلاقه وطيحته من السيارة ضرب جسمه بالارض بقوة ودعست كفرات السيارة على يساره صرخ بالم للحظة وفقد وعيه من ضربة راسه
.
،،المستشفى،،
عساف المتمدد عالسرير بثوبه المتلون بلون اسود من طيحته عالاسفلت ولون دمه ممزق اعلاه وممزقة فانيلته الداخليه صحى بألم محتوي جسمه بالكامل رفع يده الموصولة بالمغذي لامس راسه غمض عيونه من حس بالشاش يلفه رفع راسه بخفة رغم المه يتفقد جسمه ووضعه احتدت نظرته من طاحت عيونه عليه 
طاهر جالس عن طرف السرير عند رجوله مستند بطرف دقنه على عكازه بابتسامة/الحمدلله عالسلامة ياالذيب 
عساف رص على اسنانه بقهر
طاهر اعتدل بجلسته ساند ظهره على الكرسي براحة/مايحق لك لا الشكوى ولا الحق
عساف ارتفع حاجبه وسط حدة ملامحه
طاهر بابتسامة/خويك شاهد على دعسك بالتراضي
،
،
طاهر بابتسامة/واسويها مرة ثالثة بعد
عسّاف ناظره/علمني هالثور وشلون طلع من نسلك!!
طاهر زفر بضحكة خفيفة
بـيّـن وقف
عسّاف مسك راسه بندم/وانا مهبول قلت ابيه يكون بفريقي للعقيد!!
طاهر ضحك/يعجبك ولد خلف ياعسّاف لاتستعجل على رزقك اصبر
............................................................
<<بيت سطام>>
سطام يناظرهم بمشاعر مختلطة مابين فزع من اللي عرفه ولوم من تجاهل وجوده واهميته لسنين ومابين رحمة لاخواته واللي مروا فيه وقهر من تسلط الرجال عليهم وهالشعور كان الغالب
نور شادة على يديها بتوتر تخفيه منتظرة انفجاره باقل الاحوال
ام سطام تناظرهم بصدمة كيف صار كل ذا بدون اي خبر عندها
ريوف بغبنة/انتن الغلطانات سكتن له وكبر راسه كان رضيتوا راسه من البداية حتى لو ان فيها قصاص البادي اظلم
يقين ناظرتها بحدة/ريوف ماقلنا السالفة ذالحين حتى نسمع لوم قلناها لان سطام هالمرة لازم يدري تساهل ووقف على باب البيت بلا خوف ناويها شر وواثق ما يمّه احد
ريوف/وليه ننتظره يعيدها!!/ناظرت نور/وين الفيديو  الاي شغلتيه بوجهه خل نوقفه عند حده هالمريض وجع يوجعه
يقين تنهدت/تحسبينها بهالبساطة
سطام بحدة ارتفع معها صوته/خلاص اسكتوا خلاااص
//ناظروه باستغراب لصوته اللي ارتفع لاول مرة//
نور اخذت نفس بملامح هادية تناظره باستغراب من هدوءه حتى اللحظة
سطام ناظر نور/قولي لزوجك بترقدين هنيا الليلة وبكرة يصبح عندنا يفطر
نور رجف قلبها رغم هدوءها/النوم مقدور عليه
سطام قاطعها بحدة /والفطور مقدور عليه بعد
نور سكتت/ابشر ان شاء الله
يقين وقفت
سطام ناظرها/اجلسي حتى انتي مثلها
ريوف بتوتر/صدق اجلسي يقين مالك داعي تمشين
يقين/بـيّـن قبل تشرق الشمس بيروح يدور مكان حتى يرحل به بعد كم يوم والجوال مايعترف به لازم اروح يم البيت
ريوف ناظرت امها/يمه قولي لها
ام سطام وقفت/بكيفها مير لاصار بك شي لاتصيحين على روسنا/مشت خارجة/
يقين ناظرت سطام/تكفى سطام والله اصبح عندك معه تكفى
سطام وقف/اصبري اروح معك
يقين جرت لمسافة والتفتت تناظرهم/اروح لحالي بيت عمي قريّب لو تعرضني احد صرخت شوي وهم كلهم حولي
سطام ناظرها بغيظ/يقين
يقين وقفت تناظره/سطام انت ذالحين لازم تتفاهم مع نور وانا لازم اروح لبيتي
سطام ناظرها بملامح محتدة
يقين تكتفت/تبيني اجلس
سطام/انتظري رجلك يجي ماتروحين لحالك
يقين ناظرته بغيظ
سطام/لاتحديني عالغلط يايقين
يقين اسرعت بخطواتها لغرفتها هي ونور بعد وصول امها وريوف واحتلالهم لغرفتها
سطام التفت يناظر ريوف/روحي نامي
ريوف عبست بوجهها واسرعت بخطواتها مبتعدة
سطام ناظر نور
نور الملتزمة الصمت من بداية الموضوع يقين صاحبة الكلام والشرح وقفت/سطام
سطام بحدة/حتى لو اني ولد العشر تعلميني باللي يصير معك وش انا دلة اكلها الصدا لاقووا يرمونها ولاقووا يقهوون بها!!
نور عضت شفتها السفلية صدرها مليان كلام ودفاع وحجج ماتبي تناقشه بخوف عليه مجبرة نفسها عالصمت
سطام تقدم لها بخطوات سريعة
نور احتدت نظرتها لو فكر يمد يده مابترضى هالمرة مايحق لاحد يحكم عليها ابد سكتت سنين ملتزمة الحلم حتى على حساب نفسها لكن خلاص يكفي ماتحملت
سطام فتح يديه واحتواها بحضنه
نور اتسعت عيونها بذهول من فعله
سطام بعتاب وسط قهره/ليه طيب ليه الليالي الصعيبة رفيقتك المخدة ليه
نور غرقت عيونها دموع كيف ظنت بسطام هالظن وهي تعرفه وتعرف طيب قلبه حتى لا زعل مايقدر يطول بزعله هذا سطام طيب القلب لاهله اقشر على غيره كيف احتفظت بهالموضوع الخطير لنفسها حتى لو كان ابن العشرين الطايش يظل سطام الاخ الحنون 
سطام/ليه احرمتي كتوفي من دموع قهرك ليه ماكبيتيها تنتثر علي واستقبلها بحب
نور انهلت دموعها بحزن على نفسها وعليه
سطام/ليه ابطيتي على نفسك وقهرتيها ليه ماكبيتيني اخذ حقك ليه احرمتيني اكون السند وانا دايم اتغنى بهالكلمة قدامكن ليه
نور بهمس/سطام
سطام فكها من حضنه مثبت يديه على اكتافها/بكرة ان شاء الله قولي مابدا لك ماعليك من احد وانا حي يانور
نور هزت واسها بايه
سطام بغبنة/وهالرمّة انا اعرف له زين هين
يقين المتسللة من وراه بخفة مستغلة انشغاله بنور خرجت من البيت بهدوء جرت من خرجت من الباب بكل مافيها من سرعة وقفت على باب البيت المحبوب المكروه بنفس اللحظة دقت عالباب بلا تردد
سارة(عاملة هندية)فتحت الباب ناظرتها باستغراب
يقين/وين عمة
سارة ناظرتها باستغراب/ماما فيه نوم
يقين دفتها ودخلت بدون استئذان/روحي قولي لها بنت منصور تحتريك
مبروكة الخارجة من دورة المياه متجهة لغرفتها سمعتها/خير يابنت منصور وش اللي جايبك بهالليول
يقين وقفت تناظرها بغبنة/علميني منصور ولدك تكفين اقطعي شكي وعلميني الصحيح
مبروكة احتدت ملامحها/اقطعي واخسي ياقليلة الحيا ولد بطني تسع شهور شلته تجحديني به نعنبوا ذا الوجه
يقين بغبنة اخذت نفس/يعني لحمك ودمك حنا
مبروكة بملامحها المحتدة/اخلصي وش ورا هالطواري الشينة ياشينة
يقين/يعني صدق اني من بني سمّار
مبروكة بعصبية/علامك يابنت
يقين زفرت بتاكيد لنفسها باتخاذ هالقرار/زين علامه شيخك يبتلينا
مبروكة بسخرية/يبتليكم!!مير زوجك هو البلا بعينه وعلمه!!
يقين/لا ابد ماعنيت بـيّـن عنيت روحي وسطام ونور
مبروكة احتدت نظرتها/لاتبتلين الخلق بأكذابك
يقين/علميني وشو له شاهر يعود للديرة بعد هالسنين
مبروكة تغير وجهها
يقين ابتسمت/هذا اللي بغيت اشوفه
مبروكة قطبت جبينها
يقين/عزيز ورا ابوي وهو نفسه ورا سالفة نور وانتي تدرين بها ياجدة
مبروكة بحدة/انطمي يايقين
يقين ابتسمت/المعذرة عنيت ياام زايد ياسحاب الديرة 
مبروكة بحدة ملامحها/كبي عنك التهايم وتعيشين براحة
يقين بابتسامة/مااتحسر الا على ايام مضت خابت بها ظنوني
مبروكة/تحسري بالحيل دام اللي معك ضحك عليك وصدقتيه وجحدتي اهلك!!
يقين ابتسمت/اهل!!يكرمون اهلي عنكم
مبروكة بحدة/وشو
يقين بتاكيد/يكرمون عنكم اهلي
مبروكة/لذالحين راكبة راسك وجاحدة
يقين/من اللي راكب راسه منا وجاحد!!
مبروكة بحدة رفعت عكازها/بنت احشمي عمرك
يقين/لله الامر فوق عمى البصر عمى البصيرة
مبروكة اهتزت من كبر كلمتها بحقها
يقين لفت عنها مبتعدة بنظرات حاقدة احتلت ملامحها
مبروكة/ورب العزة يايقين ان تندبين حظك على هالكلام
يقين كملت طريقها بعدم اهتمام لكلامها
............................................................
<<بيت طاهر>>
//العزيمة كانت للرجال فقط اما بخصوص الحريم فهم جمعتهم المعتادة//
حمدة تناظرها بابتسامة عريضة ورضا احتلها لاقصاها/ياتبارك الرحمن لااله الا الله الله يحفظ هالزول ويديمه
ولاء جالسة قبالها منفذة لاوامر جدتها فستان ابيض مخصر عليها طويل باكمام طويلة وقصة مربعة من الظهر والصدر شعرها الطويل ستريت عكس طبيعته المعتادة كيرلي بذهبها الكثير المغطيها اللي لمعته تضرب عين من يجلس باخر الحوش ترسم ابتسامة على محياها كل مالتقت عينها بعين جدتها الامرة لها بالتبسم
غصنة همست لاعتدال/ولاء صادت جو جدتي بقوة
اعتدال همست بضحكة/اسكتي تلاقين جدتي تندب حظها وين عيونها عنها قبل ياخذها محارب
مضاوي ناظرت ولاء بابتسامة رضا عن قرارها واشرت لها بنظراتها عالكيس
ولاء قامت بتنهيدة مكبوتة داخلها فتحت الكيس خرجت صحن مرتب به التمر المحشي مدته لحمدة/سمي ياجدة حلّي
غصنة اتسعت عيونه/يوه يوه خلاص رسميا كسبت جدتي
حمدة اتسعت عيونها بوناسة/عسى الله يزيدك حلى ويعمي عيون محارب قولي امين
منيرة/بسم الله على ولدي عمة علامك
حمدة ناظرتها بغيظ/عن غيرها ماهو بيعميه عمى مرة وحدة عاد مااشينك وانتي تظلميني!!
منيرة ميلت فمها بزعل
ولاء ناظرت منيرة بشي من الندم كونها تسببت بهالموقف بينهم
مضاوي مررت نظرها بين سرور وحمدة/عاد ذوقنه من جت من ديارها هذيك وهي بالمطبخ تطبخ وتنفخ تدقها ايمان ماتذوقون ازين منه بالديرة كل ابوها
ولاء نزلت راسها وزفرت من تعزيز جدتها المبالغ فيه
غصنة اتسعت عيونها/جدة مضاوي تراه تمر محشي والله لو انه قدر عزيمة وش هالوقت كله!!
مضاوي ناظرتها بغيظ
منيرة ناظرتها بحدة
غصنة زمت شفايفها بندم عاللي قالته من اخترقتها نظراتهم
حمدة/اقول انطمي وش عرفك بالفن حدك قدر العزيمة كبّي الفن لاهله/ناظرت ولاء/يازين الفن واهله قربي الصحن يمي يابنية
غصنة/جدة يعني اذا سويته بتطيرين بي هاللون!!
حمدة/زيني القهوة ثم تعلمي تزينين غيرها
غصنة عبست بوجهها/توك تعوذين من الظلم تظلميني ليه ياام خلف
حمدة بنرفزة/قطعة ياغصين متى ظلمتك
ولاء ارتفعت حواجبه بندم ليتها نامت بالبيت ولا حضرت
غصنة/هاه ذالحين على عيونهم كلهم شاهدين/التفتت لاعتدال/سمعتيها يااعتدال
اعتدال بلعت ريقها بورطة
حمدة/ايه قال من يشهد لك يا أبا الحصين قال ذنبي
غصنة طارت عيونها/انا حصني ياجدة!!
حمدة تقهوت برواق/انشدي امك
غصنة ناظرت امها
منيرة نزلت عينها للفنجال بتجاهل لكل مايدور حولها
غصنة بقهر/والله لاأعلم جدي
حمدة بدون اهتمام/علميه
غصنة بابتسامة/ليه اعلم جدي والله لااعلم اخوي بـيّـن
حمدة احتدت ملامحها/تهبين تهدديني انا!!تهدديني باليهودي!!مابقى الا هو تحتمين به واخاف منه تعقبين يابنت خلف تعقبين
غصنة سحبت نفسها لورا باستعداد للي بتقوله/علامك ياام خلف ششتي ماتقولين ماتظلمين اطلق من يحلها بيننا من ذاق الظلم مليون بالمية بيعدل/وقفت وتراجعت لورا
منيرة اتسعت عيونها وناظرت حمدة
حمدة سحبت عكازها بسرعة وحذفته عليها
غصنة نطت بابتسامة/علامك ياجدة زعلتي!!
حمدة بغبنة منها/الله يضيق على بني سمّار مثل ماضيقتي صدري ياسويدة الوجه
غصنة تخصرت حانية نفسها لقدام شوي/والله مفارقني السواد من بين اخواني هذاني مزيونة كل من شافني ناداني ياحمدة
حمدة ناظرتها بقهر كيف تسبها وهي شبهت نفسها بها
غصنة/سبحان الله من كثر الشبهة حتى الطبايع اخذتها منك
حمدة/اقطعي واخسي يامال الرزق طسي عن وجهي
منيرة ابتسمت من سمعت(يامال الرزق)فهمت اعجبها رد غصنة لدرجة ماقدرت تدعي عليها كعادتها
يقين دخلت للبيت بخطواتها الثقيلة بعد مواجهة جدتها عبست بوجهها من شافت اللمة بضيقة خلق مالها نغس تجادل احد بهالليلة
حمدة تبدد زعلها واحتلت الابتسامة محياها من شافتها داخلة للبيت وبقصد تغيظها/بنت ياولاء قومي قومي خليني اغرق عيوني بالزين قومي
ولاء قطبت جبينها باستغراب من طلبها
حمدة/علامك يابنت قومي اعجلي علي وامشي الى ذاك/اشرت للزواية المقابلة/
ولاء/بس
مضاوي قاطعتها/قومي وانتي ساكتة
ولاء قامت واتجهت للمكان حسب طلبهم تغير وجهها من ناظرت يقين وفهمت مقصدهم
يقين احتدت نظراتها من مررتها على ولاء بتأمل وصلها مقصد حمدة بوضوح نزلت نقابها وطرحتها فتحت ازارير عبايتها ونزلتها ببنطلونها الجينز وبلوزتها البسيطة رفعت يديها فاتحة لربطة شعرها تاركة شعرها ينسدل وبثقة/الزين زين لو يلبس خيشة/ناظرت ولاء/صح ياولاء
ولاء بلعت ريقها تكره المقارنات وسوالف السلفات وهذا هو اول المواقف وكان بدون رغبتها
يقين اتجهت للجلسة وجلست قبال حمدة ناظرت اعتدال/قهوة حبيبتي
حمدة احتدت ملامحها
مضاوي تناظرها بصدمة من فعلها
يقين اخذت الفنجال من اعتدال/تسلمين/ناظرت حمدة بابتسامة/ويل حالي اخبر رصت العيال قبال الباب لاطلعت من المدرسة يتمنون اناظرهم ويلمحون زين عيوني وقليبي عليهم لو شافوا الزين كله
حمدة بغبنة/علامك مرتزة قبالي قومي عن مكان مرة حفيدي
يقين بعناد/وانا مرت حفيدك اللي اكبر منه يحق لي القرب اكثر منها
حمدة/اهبي الله اكبر عليك ماابي قربك ولا قربه هاليهودي
يقين/استغفر الله ياجدة تراك طلعتي من الدين تنادينه اليهودي وهو مسلم هذاني علمتك
حمدة/تعقبين مابقى غيرك يعلمني ديني
يقين بحدة/ايه اعلم ليه مااعلم دام اللي قبالي سفيه
حمدة بغبنة صرخت/اقطعي واخسي تعقبين نعنبوا ذا الوجه وحلاياه انت سفيه!!مالسفيه الا انتي اهبي طسي عن وجهي ياقليلة الحيا ياللي ماتربيتي طسي عن عيني
يقين نزلت فنجالها ومررت نظرها عليهم/قهوة وجمعة دايمة عليكم/وقفت ومشت لبيتها/
حمدة بتهديد/هين هين والله مايصبح عليك الصبح هنيا لا انتي ولا اليهودي هين وانا بنت ابوي هين
............................................................
<<بيت سطام>>
نور جالسة بالغرفة بوسط ضيقتها وهم استحلها بتفكير كيف تفاتحه بالموضوع اخذت نفس واتصلت عليه
ظاهر الواقف على روس الرجال يتعشون دخل يده بجيبه واحتل ثغره طيف ابتسامة للحظة واخفاه جر خطواته خارج من البيت فتح الخط/نعم
نور/السلام عليكم
ظاهر/وعليكم السلام والرحمة
نور/ظاهر سطام ماهو بعاجبني وضعه الليلة
ظاهر قطب جبينه من صوتها المتغير/عسى ماشر
نور/لا الحمدلله ماعليه ان شاء الله بس ودي ابقى معه الليلة هو يرتاح لي بالحيل
ظاهر/ارتاحي يابنت الحلال اخوك مابه استئذان قدامه العافية
نور/الله يعافيك وايه تعال بكرة افطر معنا
ظاهر ابتسم/ليه
نور توترت/لا بس يعني
ظاهر/هاه فيه شوق لي ولا انا بس اللي احسني مشتاق
نور ابتسمت للحظة/يعني شاك بشوقك لي ماانت متأكد!!
ظاهر/خليني اصبح واعرف انا مشتاق ولا ميت من الشوق
نور ضحكت بخفة/يعني الصباح تجاوبني
ظاهر ناظر ساعته/يوووه وقتها لي نص يوم ماشفتك
نور ابتسمت/يعني انتظرك عالفطور اكيد
ظاهر/اكيدين الا كان ماتبين افطر معك وبايعة الشوق
نور بنبرة زعل/ظاهر
ظاهر ابتسم من نبرتها اتسعت عيونه بصدمة من نفسه من وصل لباب بيت جده الكبير بدون شعور/يانور ظاهر صدق نورتيني بغيت اصفق الباب مادريت
نور ضحكت
ظاهر امتلى صدره راحة من سمع ضحكتها جر خطواته راجع لبيت الشعر/يابنت خلاص ترا الصبح بعيد بالحيل
نور بابتسامة/خلاص انتظرك عالفطور ان شاء الله تصبح على خير
ظاهر بابتسامته/الخير اشوفه بكرة لاشفتك
نور ضيقت عيونها/علامك اليوم
ظاهر وقف على باب مجلس الشعر ناظر الرجال بتقطيبة جبينه همس/من الوجيه اللي تسد النفس قدامي
نور ضحكت/استغفر الله
ظاهر/يالله عاد اشوفكم بكرة ان شاء الله/قفل/
نور تنهدت بابتسامة اللي مااستمرت الا ثواني واختفت بضيق بخوف من بكرة وتبدل الحال اللي بيصير بينهم كيف يوم زانت بينهم الامور وبدت شرارات الالفة والمحبة حتى تظهر هالنار مبدلة هالشرار للهب محرق عالمها الصغير اللي توه يخط بدايات سعادته تمددت مغطية نفسها تاركة نفسها تنهار الليلة حتى تستجمع شجاعتها لبكرة ومواجهته ............................................................
.
بـيّـن دخل للبيت بخطوات يجرها بثقل من تعب وألم  تسبب فيه عساف له متجه لغرفة النوم يبي السرير يدور الراحة بعد هاليوم الطويل المتعب وقف والتفت يناظرها
يقين جالسة بالصالة متكتفة بوسط مشاعرها المضغوطة من الاحداث المتتالية عليها بدون راحة بـيّـن وسالفته وسؤاله المنتظر جوابه لنور ومشكلتها لنقاشها الاخير مع جدتها لغبنتها من عزيز المرتاح بفعوله بلا خوف ولاندم ولاحيا حنت راسه بخفة رافعة يمينها لراسها تضغط على جبهتها من داهمها الصداع جالسة تنتظره بملامح مرتسم عليها الضيقة
بـيّـن قطب جبينه غير وجهته اللي تبعد عنه بخطوات وتقدم لها باستغراب/علامك يابنت
يقين رفعت راسها تناظره/لي اسم
بـيّـن زفر من فهم تدور الزلة/علامك يايقين
يقين وقفت وبانفجار/متى نروح لبيتنا نجيب اغراضي مايصير طول اليوم وانا بهالخياس
بـيّـن بابتسامة يحاول يهديها/حتى الخياس تزينيه ويصير ازين الزين واغلاه
يقين اتجهت له وقفت وبينهم خطوتين وبنرفزة/يعني تبيني ألبس الخياس طول عمري
بـيّـن زفر يكتم غيظه/لاإله الا الله!!
يقين بنرفزتها/ألف!!
بـيّـن/وش يرضيك ذالحين وتفكين هالعقدة
يقين بوسع عيونها/انا عقدة!!
بـيّـن زم شفايفه نفذ صبره
يقين ناظرت ردة فعله/ايه ايه طلع اللي بقلبك طلعه عليّ كملها انت بعد
بـيّـن بانفعال/ايه قلبي مليان ومليان بالحيل يابنت منصور
يقين/وش سويت لك حتى يمتلي علي هالقد هاه
بـيّـن/هو انتي بس!!هي تحاذفت من كل جهة من وين ماوجهت وجهي صكتني وألزمتني الغرق بكيفها
يقين/هو انت الغرقان لحالك!!تلتفت حولك ناظر ترا العالم كلها غرقانة بهمومها!!
بـيّـن/وش علي من العالم عساهم يغرقون ولايلقون لهم مسلك نجاة
يقين بوسع عيونها/أناني صدق تبي الفرج لك لحالك!!
بـيّـن تقدم هالخطوتين مقرب منها/وانتي وش عليك من العالم لا غرقوا ادعي عليهم بكيفي وش عليك انتي هاه!!
يقين/يااخي حب لنفسك ماتحبه لاخيك وين تبي التوفيق وانت اناني
بـيّـن بعصبيته/خابرك زعلانة على ملابسك وشلون صارت هموم العالم همك ذالحين!!
يقين/كيفي حتى كيفي تحدوني فيه!!
بـيّـن/ونهايتها يابنت منصور
يقين/لي اسم ياولد خلف
بـيّـن/ماانتي ناوية ترسينها على بر!!
يقين/البر أرسي يمّه لاشفت الذهبان ماليته
بين قطب جبينه يناظرها/وش دخل الذهب!!
يقين/كل الحريم يغطيهن الذهبان وانا بنت الشيخ جالسة وسطهن ملطى(ماعليها شي)يحزن علي الكافر
بـيّـن ناظرها للحظات بصمت
يقين/علامك ساكت هاه
بـيّـن انفجر يضحك
يقين ناظرته بقهر/ليه تضحك ماقلت نكتة حتى تضحك
بـيّـن/مزعلتك الذهبان!!
يقين ناظرته بغيظ
بـيّـن بثقة/تباهي وشدي الراس انا اثقل من الذهب وازين منه وبتشوفين بعيونك كان ماكلوك من كثر الحسد
يقين قوست شفايفها من كلامه
بـيّـن انحنى منزل راسه لمستواها/علامك لايكون دخلك شك!!
يقين ناظرته بهدوء/مامن شك
بين ابتعد مستغل ردها/اجل خلاص وشو له الذهب
يقين جرت وراه/اهب تلعب علي
بـيّـن وقف على باب الغرفة والتفت لها بابتسامة
يقين وقفت تناظر ابتسامته بغيظها
بـيّـن/يعني الذهب ازين بعينك مني
يقين سكتت بتفكير تخاف ترد ويقلب الموضوع عليها
بـيّـن قرب وجهه منها/هاه من ازين هاه
يقين رجعت وجهها لورا/انا ازين منكم كلكم
بـيّـن ابتسم من كلامها
يقين انحنت كلها ومرت من جنبه وقفت على باب الغرفة/تراني زعلانة لذالحين ابي الذهبان مثلهن ورقاد بنفس الغرفة مافيه الا مااشوف هالذهبان/قفلت الباب بقوة بوجهه/
بـيّـن ضحك وسط تنهيدته جار خطواته لكنب الصالة رمى نفسه فوق الكنب بتعب ورفع يمينه يغطي بها عيونه/من اصبح افلح يالزعول
#شقّ_الغَمام