شـقّ الـغَـمـام

(٨)

..(٨)..
استغفر الله العظيم الذي لااله الا هو الحي القيوم وأتوب اليه
-
<<بيت عايض>>
،،عبارة عن بيتين بينهم باب فاصل جزء لامه الجزء الثاني لعايض واهله وجزء امه احيانا اخوانه الثنتين وعيالهم يباتون عند امهم،،
غالية جالسة بالمقلط قبال عيالها التسع الصغار اللي الفارق بينهم متقارب جدا بين السنة والسنة وكم شهر وسط ازعاج لامتناهي من اصواتهم ولعبهم وهي مشغولة فيهم مابين تأكل هذا وتبدل للثاني وتضم اللي يبكي يشكي من اخوه
خلود(١٨سنة)دخلت وكتابها المقطوع بين يديها وبلمعة عيونها/يمه عمتي سعاد فتحت الباب القاطع وقلطت عيالها على بيتنا وفوقها قطعت كتابي تقول مو بقابلتك الجامعة لاتتعبين
خالد(١٧سنة)دخل/يمه عمتي سالمة اقتحمت الغرفة وجرتني تقول اذلف جهز السيارة
غالية زفرت/ذالحين يجي ابوكم
خلود عضت شفتها بقهر
خالد بغبنة/وابوي وش بيسوي بيشكيهم لجدتي اللي معهم علينا
غالية بنرفزة/خلاص هدا وانتم الكبار وش تبوني اسوي هاه وش
خلود بقهر/يمه
غالية تلبس عبايتها/خلود انا ماشفت اهلي لي شهر وهم عند اذني وعلى كثر البلاوي اللي صارت صابرة ومتحولة عشان اشوفهم
خالد/بس
غالية/خلود روحي غرفتي وذاكري
خالد/خذ اخوانك واحرسهم انا رايحة اسلم على امي وراجعة
خلود رمشت/وابوي؟
غالية/ابوك يعلمونه خواته اني طلعت مابيقصرون فيه/مشت/
خالد/يمه اوصلك
غالية/خلك مع اخوانك
خلود قفلت كتابها ناظرت اخوانها الصغار ثم ناظرت خالد بتردد
خالد ابتسم/اقدمي يابنت غالية
خلود فتحت الباب/العبوا برا يالله حبايبي يالله
.........................................
<<بيت الجد طاهر>>
مُحارب واقف على مسافة من البيت صاد عن الحريم وسط غيظ محتويه
غصنة واقفة عند جدتها/ياجدة تكفين محارب له عشر دقايق برا يحتري الفناجيل وفوقها الحريم قدامه عالباب رادتهن ذالحين يحسبه وحدة منا والله ان يذبحنا والله
منيرة اسرعت بخطواتها للباب بعد فترة انتظار طويلة بنظرها وجدا
حمدة تكلمت من ناظرت منيرة متجهة للباب/بنت ياغيمة فكي الباب
منيرة وقفت على مقربة من الباب
غصنة جرت للمطبخ حتى توصل الاغراض لمحارب
مضاوي عينها عالباب بابتسامة
حمدة/هه اشبعن نظر بنهرج بهاليوم دهر
غيمة فتحت الباب
ريوف تقدمت بغبنة لداخل البيت دفت الباب ودخلت اعطت غيمة قفاها وسحبت الباب منها وفتحته لاخره/حياك ياسحاب 
غيمة رمشت من حركتها ثم احتقن وجهها بالاحمر
اعتدال الواقفة جنب غيمة شدت على يد غيمة وهمست لها/كبيها سفيه كبيها عنك
سحاب خطت بيمينها لداخل البيت برفعة خشمها وكل ثقة مادخلت وحيدة دخلت ووراها جموع الديرة دخلت وهي واثقة بتهزهم او عالاقل يتوترون/السلام عليكم
حمدة عينها على سحاب/اهل الشمال يتلبسون اليمين
مضاوي ضحكت/من كثر مايعلمونها انها من اهل اليمين توهمته صحيح
سرور عينها على سحاب/الله اكبر عليش مااطول رقبتش عيت تنكسر من كثر الاكذاب اهبي
مضاوي/خليش من رقبتها ناظري خشمها حتى وهو تحت البرقع ياكبره كبراه
سرور/من سواد فعولها زين ماشقّ النقاب
حمدة/يوك عالنقاب الله يعينه على حموله
ام سطام ورا عمتها احتدت ملامحها من عدم الترحيب والتقت عينها بعين منيرة
منيرة صاحبة الملامح الهادية والوجه البشوش والخاطر الطيب لكل اللي حولها رفضت ملامحها اليوم تهدا واعترضت مشاعرها ترسم ابتسامتها على وجهها صدت بوجهها عن ام سطام واكتفت بالصمت
ام سطام اتسعت عيونها من هالاستقبال
سحاب وقفت
//وقف وراها الكل//
سحاب/يابني طاهر ماخبرنا ذي علومكم ماسمعنا تراحيب ولا تهلّي
حمدة الجالسة ولا كلفت نفسها توقف مررت نظرها على حريم الديرة اللي وراها//هلا ومرحبا باهل الديرة هلا باللي يوم كانوا لنا اهل هلا باللي كانوا امهاتهم وبناتهم خواتنا وبناتنا عسى الله يرحم من مات ويبيح الحي ويعفو عنه/ناظرت سحاب وام سطام/وبعض التراحيب اجدعها للكلب ولاتجدعها لبعض البشر والله انها فيهم ذنب كبير
ام سطام شدت على يدها بغبنة
سحاب ابتسمت/مسموحة ياام خلف مسموحة مير حنا لفينا اليوم نتعذر عن اللي صار لولدنا بـيّـن و
حمدة قاطعتها بضحكة/والله من كثر سواياكم بهالضعيف عجزت اعرف اي خيبة اتعذرين عنها
سحاب احتدت ملامحها
حمدة التفتت لمضاوي/مضاوي
مضاوي/سمي ياام خلف
حمدة/هي صحيح اتعذر يامضاوي كان إبليس راي عن ذنبه وقتها هي إتعذر وإتسمح
سرور بيأس من اعتذار سحاب/يالله حسن الخاتمة
مضاوي/صدقتي عز الله ان وراها بلا
ام سطام بحدة/حنا جايين من طيبنا ذا سلمكم لضيفانكم!!
نور تتأمل جدتها حمدة يالله وش كثر تغيرت والطبيعي تتغير اذا هي بنفسها تغيرت زادت تجاعيدها فوق تجاعيدها اللي تذكرها امتلت اعجاب وكبرت بعينها كيف ترد بدون تردد وبدون اي اهتمام لمكانة سحاب بالديرة اقتنعت اكثر بوجوب تواجدها بهالبيت هالبيت وان كان شبه منبوذ بهالديرة الا انها حست براحة عجيبة اول مادخلته افتقدتها من سنين 
حمدة/امحق طيب يعرفكم انتم شرق وهو غرب
ريوف بقهر/هيه انتي بالعجوز
ام سطام التفتت لها بحدة
حمدة ضحكت/اي والله اني عجوز صدقتي محدٍ ياخذ بقولي ماتشوفين مبروكة ساكتة
ام سطام/مبروكة هذاك اول الحين سحاب ياام خلف سحاب الديرة
حمدة/ويل حالي تقولين سحاب!!امحق الا غمام غمام الديرة غطاها وعمى عيون اهلها
ام سطام بحدة/استحي على وجهك ياام خلف
حمدة احتدت ملامحها لاول مرة من دخلوا/انطمي انتي بالاولة دخلتي هالبيت بلا حيا وانتي تدرين بشين سواياك باهله
ام سطام/انا
حمدة قاطعتها وعينها على سحاب/طسي عن بيتي
منيرة زفرت براحة
ام سطام قطبت جبينها
حمدة/مالكم عذر ولا نسمع منكم هرج وهالحيّة معكم 
ام سطام اتسعت عيونها/تطرديني
حمدة/واطرد اللي جابوك بعد اذلفي عن بيتي طسي برا
سحاب/اطلعي ياام سطام
ام سطام كانت متماسكة وتسمع لحمدة رغم صعوبة الموقف عليها انقلب وجهها للاسود من سمعت كلام سحاب وبلعثمة/أنـ.ا
سحاب/روحي بيتك ياام سطام
ام سطام غرقت عيونها دموع من الاهانة على مرأى الجميع كيف تطرد وهي طرف اساسي بهالمشكلة اسرعت بخطواتها مبتعدة
ريوف مشت ورا امها بخطوات سريعة
غيمة بيسارها الدلة وبيمينها الفناجيل مدت رجلها
ريوف تعثرت وطاحت رفعت راسها بنظرات كلها قهر
غيمة رجعت شعرها لورا وكملت طريقها لجدتها
ريوف وقفت وهي تتحلف تدفعهم الثمن غالي اسرعت بخطواتها الحق امها اللي ابتعدت وكثير
سحاب/ياام خلف
حمدة رفعت يدها تسكتها/اصبري اصبري وينك ياغيمة وينك
غيمة وقفت عندها وصبت لها قهوة/سمي ياجدة
منيرة ابتسمت
سحاب اللي عن يسارها يـقـيـن الصامتة ويمينها ام سطام اللي راحت وريوف اللي تركتها رجعت يدها لورا وسحبتها ليمينها همست/وش العلم
نور وجها لوجه قبال جدتها حمدة ابتسمت بحب همست/تتقهوى
سحاب عضت على شفتها بقهر من استفزازها
حمدة رفعت نظرها وطاحت على هالبنت المألوفة لها كثير جدا صاحبة البشرة الفاتحة واضح رشاقة الجسم رغم انه تغطيه العباية يعتلي راسها ذاك الشال المشؤوم على هالبيت العيون نفس عيونه اللي يميزها الحواجب الثخينة السودا ونفس الانف المسلول نفس الدم حتى وان ربت بينهم دمها فاضحها ماهي منهم غابت عنها سنين كبرت وتزوجت وتطلقت وهم ماشافوها انحرموا منها والاكيد هي انحرمت منهم زفرت بصوت وسط التماع عيونها من ذكرته/ايه جعلك بعد بعض الوجيه امحق وجيه
نور بلعت عبرتها من عرفت ان جدتها تتكلم معها
حمدة/ايه عسى الله يبيح عظامك ويوردها الجنة ياوليدي وحسبي على من كان السبب هو حسبي ونعم الوكيل/ارتشفت القهوة تبلع هالغصة/
سحاب/ياام خلف لفيناكم طمعانين بعفوكم عقب اللي صار تخبرين العيال اخطوا وهم فعلوا مافعلوا من حمية ولا كلهم عيال ديرة وحدة
حمدة/عاد العلم ذا بيد صاحب الامر انا مالي كلمة
غصنة كتمت ضحكتها
سلام عطتهم قفاها تكتم ضحكتها
منيرة/حياكم الله تفضلوا
سحاب مدت يدها لنور
نور ناظرت يدها الممتدة بحيرة بين نارين تروح تسلم على جدتها حمدة أو تمسك جدتها سحاب رفعت عينها على جدتها حمدة
حمدة التقت عيونها بعيون نور اللي تنطق حيرة اشرت لها بمعنى خليك معهم
نور بلعت غصتها ومسكت يد جدتها سحاب واتجهت يمين
سحاب مشت وقفت من سمعتها
حمدة مدت عكازها/هيه يامبروكة جنبي جنبي
نور قطبت جبينها باستغراب
حمدة/لاتجلسين عن أيمنا(اليمين)خليك أيسرنا
مضاوي/أي بالله خوفك تعدم دروب الغانمين
سرور/ماعاد به دروب غانمين بهالديرة خبري بها على عهد بني طاهر
حمدة ضحكت/يوووه ياسرور الله يقطع شرك سبقتيني بها
سحاب ابتسمت بهدوء/مبروك مافعلتوا عساها زواجة الهنا
مضاوي/اي بالله وبعون الله زواجة الهنا يومك ماانتي بها
نور ناظرت جدتها سحاب بتوتر من صمتها الغريب
سحاب/مير كل هاللي حولكم يخبرون فوق إني سحاب أنا مبروكة وين مااقبلت وخطيت يحط معي الخير عسى الله يعوض عليكم
حمدة/الحمدلله مافاتنا غير الشر يالله لك الحمد
سحاب/دام العلم اللي لفينا عشانه ماله طاري يمكم نستاذنكم حنا
حمدة ميلت رأسها وتنهدت ماتشوف الباب/بنت ياغصنة شرعي الباب على وسعه حتى مايضيق عليهم
غصنة/مشرع ياجدة مشرع
سحاب/أكرمكم الله يابني طاهر
حمدة بلمز/اكرمهم من يوم دخلت هالبيت الحمدلله على نعمه
سحاب كتمت غيظها ومشت
//مشوا وراها حريم الديرة//
يقين ظلت بمكانها واقفة تناظرها
حمدة قطبت جبينها تناظرها عرفتها من الشال/خير يابنت منصور
يقين ماردت
حمدة/إيه أنتي اللي فزع لها بيّن سويد الوجه
يقين احتدت نظرتها وبنفسها/ماتغيرت ابد هالعجوز/تقدمت لعندهم وانحنت للطاولة الصغيرة اللي قبالهم شالتها وابتعدت عنهم مسافة بسيطة وجلست فوقها قبالها تناظرهم بابتسامة ناظرت غيمة ومدت يدها/
غيمة ناظرت جدتها
حمدة دققت النظر بوجهها بمحاولة تتذكر هالوجه
منيرة بحدة/وش تحترين قهوي الضيفة!!
غيمة أسرعت بخطواتها وصبت لها قهوة ومدتها
يقين أخذته وحطت رجل فوق رجل وبدت تتقهوى
حمدة اتسعت عيونها من ذكرتها/امحق وجه ذا الوجه اثاريه انتي!!
يـقـيـن ابتسمت والتفتت تنتظر بيت الجد طاهر اتسعت عيونها وهزت راسها من شافته مصبوغ باللون الابيض 
،
،
~~قـبـل١٥سـنـة~~
نور(١٥سنة)بدموعها اللي هلت منها بدون سيطرة واقفة قبالها
حمدة جالسة منزلة عيونها بالارض بهم/وش وراك يابنت عيّاش
نور برجفة صوتها/أمي تقول هالمرة آخر مرة أنا كبرت خلاص والبيت ذا كله رياجيل وتخاف/سكتت/
حمدة عضت على شفتها بغبنة وقفت ثم دفت نور قاصدة تبيها تكرها بلعت عبرتها
نور ارتمت عالارض بصدمة وسط دموعها
حمدة بحدة/وعلامك يابنت زينة واقفة بوسط هالنجاسة يابنت الطاهرة العفيفة
يقين(١١سنة)داخلة مع بيّن(١٣سنة)اللي اعتادت تلعب معه بكل مرة تزور نور أجدادها تستأذن مرات وتهرب من أمها مرات ثانية حتى يتقابلون وتروح بدون اهتمام بالعقاب اللي ينتظرها تلعب بسبحته بين يديها وهو يسولف عليها اتسعت عيونها من لمحت نور عالارض وجرت لها تاركته وراها وقفت بينهم دفت حمدة وبصراخ/يالعجوز طسي عن اختي
حمدة ماهزتها الدفة ولاتحركت ضربتها كف/قليلة الحيا تمدين يدك عاللي اكبر منك العيب ماهو عليك على من رباك
يقين بصراخ/لاتضربين اختي لاتضربينها
حمدة تنهدت براحة ناظرت نور وبنفسها/زين به احد يفزع يمك مايرضى عليك/ناظرت نور/امك اللي تقول هالبيت كله رجال/ناظرت يـقـيـن/هه شوفي ماسفعت(حجبت)بنتها
يـقـيـن احتدت ملامحها
حمدة ناظرتها/انتي ماتستحين ذا كبرك وتلعبين مع العيال ياعيب وش يقولون اهل الديرة وهم يشوفونك بهاللون
يقين وقفت وبشوفة نفس/مالأحد كلمة علي اسوي اللي ابيه انا بنت الشيخ منصور حفيدة سحاب اللي وطت روسكم يابني طاهر ولا عاد لكم ذكر بهالديرة غير الطواري الشينة
حمدة امتلت غيمة من كلامها ورفعت يدها تضربها
يقين تخصرت/اضربيني لانك ماتقوين تقولين ان اللي قلته كذب
حمدة شدت على قبضتها بغبنة/طسي يم اهلك لا أدفنك هينا/التفتت وطاحت عينها عليه اتجهت له بخطوات سريعة بحدة/ياليهودي وش جايبك يمي هاه هاه/بدا تضربه من قلبها/الله لايبارك فيك ولا في سواتك
يقين امتلى قلبها حقد على حمدة وهي تناظرها تضرب بـيّـن بدون رحمة انحنت لعكاز حمدة اخذته وجرت لها
نور جرت وراها/لا يايقين لا
يـقـيـن وقفت وراها ورفعت العكاز حتى تضربها
بـيّـن لمحها دف يدين جدته عنه ووقف بينهم ودف يقين بنظرات كره عميقة وواضحة صرخ/لاتلمسين جدتي يابنت سحاب لاتلمسينها
يـقـيـن تراجعت بصدمة من نظراته
بـيّـن/والله لاأكلك بسنوني كان ماقوتك يديني والله وانتم يابني سمّار حتى الجيف ارحم منكم
يـقـيـن عضت شفتها بقهر واتجهت للمطبخ الي عرفت البيت من كثر ماتروح مع نور اخذت الكبريت ووقفت قبال بيت الجد طاهر
حمدة اتسعت عيونها واسرعت بخطواتها/اعقبي
نور هزت راسها بلا رمشت لها بخطوات سريعة ماقدرت تجري من خوفها
بـيّـن جرى لها
يـقـيـن اشعلت عود الكبريت ورمته على محصول شجر القطن البسيطة كميته المتواجد بصالة بيت طاهر واشتعلت النار فيه بسرعة وتطاير بالبيت
بـيّـن وقف بصدمة يناظر النار الي اشتعلت بسرعة بالمكان
يـقـيـن ناظرتهم/ذا جزا من يتطاول بالهرج على بني سمّار/مشت ومسكت نور من يدها وخرجت من بيت طاهر للابد/
،
،
حمدة/اهبي ياقواة ذا العين وتقهوين بعد
يقين ساكتة بابتسامة
حمدة بعصبية/علامك ماتردين
سرور همست/مير سمعت انه ماعاد تهرج ياحول الله
حمدة ابتسمت/رحمة بالمسلمين من ذاك اللسان الله لايبلانا عقبال اليدين ان شاء الله
يقين خلصت فنجالها وقفت وناظرتها واشرت بيدها على عيونها ثم اشرت على حمدة بمعنى للحين أدور زلاتك واعيدها ابتسمت مشت وهي تلبس نقابها وخرجت من البيت
حمدة بغبنة/اهبي مااقواها
مضاوي/إيه أمها الجنية وجدتها راس الجن بتطلع على مين يعني
سرور بتفكير/مير ان هالبنية بها شيٍ مدري وشلون أقوله
حمدة/أنا اعلمك ذي خليفة راس الجن ذا اللي تشوفينه
مضاوي رفعت اعلى ثوبها ونقصت/عوذا عوذا
حمدة ابتسمت/مير هين أنا اكسر هالروس ماعادت مثل اول ذالحين حاجتهم عندنا
غصنة وقفت عندها بوسط انفاسها وجوالها بين يديها/ياجدة ياجدة خبر بمليون وين حتى المليون ماتسواه
حمدة/علامك يابنت
سلام دفتها بنفس حالتها/انا انا اعلمك ياجدة
غيمة فتحت جوالها شهقت/يمه
حمدة/ووجع يابنات طاهر ووجع علامكن
غيمة/سطام ولد الشيخ زوج بـيّـن اخته
منيرة انصعقت من الخبر واتضح على وجهها رجف قلبها بخوف من اللي يصير هي تحملت دخول سحاب وام سطام لهالبيت كيف بتتحمل فكرة بـيّـن يرتبط فيهم شدت على يدها واتجهت لبيتها
حمدة اتسعت عيونها ثم ضحكت بفرحة/عليك الله يابنت خلف تقولينه صادقة
غصنة/والله ياجدة نواف راسله علينا
سلام/وسلمان بعد
حمدة زغرطت وسط اتساع ابتسامتها/يوووك عليك يامبروكة طاح حظك مامن بركة/ضحكت/
منيرة مرت من قبالهم لابسة عبايتها متجهة لباب البيت
حمدة/على وين يامنيرة
منيرة برجفة صوت من كثر خوفها/بـيّـن مايناسبهم ياعمة ابد ابد
حمدة تبددت وناستها من وصلها رجفة صوتها/يامنيرة
منيرة/شفتي وش لحق عيالك كلهم من خلف لعياش لحامد مااقدر ياعمة مااقدر مالي قوة مثلك ياعمة مااقدر
حمدة بحدة/امسكي ارضك وكبّي الامور لاهلها ابوك يحلها يامنيرة ولا ابوك بعد مايقواهم مثلك
منيرة شدت على يدها بغبنة واتجهت لبيتها بخطوات سريعة وقفلت الباب وراها
غالية دخلت/السلام عليكم
غصنة جرت لها/عمة عمة بـيّـن بيتزوج
غالية اتسعت عيونها بفرحة/صادقة
حمدة استعادت وناستها اللي اختفت للحظة/ولا هي بأي جيزة يابنت طاهر بنت الشيخ،الشيخ منصور ماغيره/ضحكت ثم اختفت ابتسامتها/اصبرن لايكون الجنية اللي من شوي/اتسعت عيونها وبفزع/ويل حالي كانها هي ويلي
.
،،عـنـد الـرجـال،،
بـيّـن الجالس بالمجلس المزدحم بأهل الديرة مشغول البال باللي حصل من شوي كيف رموه واختاروا حياته بدون أي رأي منه رفع عينه ناظر جده
طاهر بقمة سعادته كل شي على احسن مايكون هالمرة بتكون الضربة موجعة لسحاب بعينه
رازي همس له/هاه يانسيب الشيخ وش رأيك توسط لي عندهم
بـيّـن بدون نفس/ومن متى يهمك رأي احد بهالديرة
رازي ضحك بخفة/إيه صح نسيت
بـيّـن/رازي
رازي التفت له/ياعيونه
بـيّـن ناظره بتكشيرة على وجهه عبرت عن مشاعره بهالكلمة طرد هالشعور وبجدية/رازي
رازي قطب جبينه
بـيّـن/يالنقوة
رازي ابتسم/وانا عند الهقوة لو هي نارٍ انا معك اقدم ماعليك من احد
بـيّـن ناظر جده واتساع ابتسامته الراضية ثم ناظر سطام/ياولد الشيخ
عزيز الجالس بعالم اخر ممتلي صدره هم وضيقة وحزن كان يبي يبعدها عن سالفة العطايا لكن ماتوقع تكون نفس النتيجة باختلاف المسمى ناظره من وصله صوته
طاهر تسارعت نبضات قلبه والتفت يناظره بحدة
بـيّـن بدون اهتمام بنظرات جده/ياولد الشيخ
//الكل سكت يناظره//
سطام ناظره/سم سم
بـيّـن/مافزعنا ندور جزا لفعولنا النفوس تموت والطيب يبقى ياسطام
سطام/ونعم الفعل وانعم براعيه ياولد العم
بـيّـن/مير تالية العلم 
سطام قاطعه/تالية العلم عندي ياولد العم
بـيّـن ناظره باستغراب
سطام/اني بشور عليك شور/ناظر طاهر/وهو بعيني طلب ماهو بشور الود ودي ماتردونه ابد
طاهر قطب جبينه
سطام/نسب الشيخ معكم يابني طاهر يبقى مثل ماهو مايتبدل
طاهر ابتسم برضا
سطام/مير اللي يناسبكم/اشر على نفسه/أنا
بـيّـن ارتسمت الصدمة على ملامحه
طاهر رغم تكدر خاطره الا انه احتفظ بابتسامته/ونعم والله ونعم
عزيز اتسعت ابتسامته برضا
سطام/طالبك ياعم طاهر انا نويت اكمل نص ديني وجيتكم الليلة طالبٍ كريمتكم بكر العم خلف الله يرحمه وابشروا كل ماتبون تم وحاضر على ماتريدون
رازي رجف قلبه من فهم من اللي يقصدها وارتسمت الصدمة على ملامحه
طاهر اختفت ابتسامته وظل يناظره بصدمة
سهم شد على يده بغبنة يناظر الفوضى اللي تصير عكس رغبة سحاب اخذ نفس وفضل الصمت
بـيّـن يناظره بتقطيبة جبينه يستوعب كلامه طلع منها لكن تورطت اخته مكانه وش هالمنطق الغريب/وش تقول انت؟!!
سطام الكاره للي يقوله بهاللحظة لكن كانت اخر حلوله حتى ينقذ اخته/اقول انا طالبٍ يد كريمتكم على سنة الله ورسوله
بـيّـن بحدة/بعيدة عن خشمك
سطام رمش بصدمة من رده
طاهر ضحك
//توجهت الانظار له//
طاهر/اللي يبي يقوله بـيّـن ان البنية محيرّة من مبطي
رازي فتح ازارير ثوبه ارتخى بجسمه ووضح بطريقة جلسته ماعاد يتحمل صدمات اكثر
سطام/ماسمعنا بهالطاري ابد ياابو عياش
طاهر التفت لرازي/هذاك هو العرّيس
رازي ناظره بضياع/هاه
طاهر ناظر سطام/انشده كانك مكذب
سطام زفر براحة رغم قلقه المستمر بخصوص اخته/محشوم ياعم محشوم
رازي ارتسمت اعرض ابتسامة على وجهه من مدة طويلة
بـيّـن بلامبالاة/ودك ترد الطيب بزواجك منا وش هالعلم اللي ماله وجهة!!
طاهر/مير انه ولد الشيخ ماينرد يابـيّـن
سطام ناظره بتوتر مخفيه
طاهر/ابشر نص دينك عندنا مثل مابغيت ياسطام بنية حامد ماابعدت بعيد
بـيّـن ناظر جده بوسع عيونه باعتراض/ياجد!!
سطام اتسعت ابتسامته ماكان يطلبه من سنين اخيرا اعطاه الرضا وقبل به
طاهر ناظره بحدة
بـيّـن شد على قبضته بقهر وعدم رضا عاللي يصير
سطام/والله ونعم بالعم حامد وزين ذكره
طاهر التفت لسطام بابتسامة/وانا ماعندي مشكلة ابد ابد الا زين من نناسبه مير ابوها حي لذالحين اخطبها منه وفالكم التوفيق
سطام هز راسه بموافقة/على خير ان شاء الله على خير
طاهر/يالله ان تحييهم ياهلا ومرحبا
//اعتلت الاصوات بالرد عليه//
سهم وقف/ياابو عياش
عزيز اتسعت عيونه
طاهر/ياهلا
سهم ناظر بـيّـن/سحاب عطت صاحب الفعل الجزل العطية وهو بكيفه يسوي مايبي
طاهر احتدت نظرته رغم انه يبيها تصير لكن السالفة صارت بالاجبار
سطام وقف وصرخ وهجم على سهم/اعقب!!
//وصارت مضاربة وسط المجلس//
................................................
بمكان اخر يبعد عن الديرة مايقرب الخمسين كيلو وادي يختلف عن باقي الديرة وادي تحده الجبال من جميع الجهات ماعدا جهة واحدة مفتوحة اشبه بالممر لهالوادي خالي من الشجر والبشر يتوسطه بيت قديم كبير نسبيا حوش مغطّى غير مسموح للهواء والشمس تدخله وبنهاية هالحوش غرفة بحمامها مقفولة بالاقفال الخارجية غير الرمز السري اللي عالباب وبجانبها غرفة صغيرة بحمامها داخلها شاشات المراقبة وكمبيوترين خاصة بالامور الالية وخارج هالبيت بيت شعر صغير وقف على باب الحوش رفع راسه يناظر كمية الكاميرات اللي تغطي المكان من الداخل تماثل عددها خارج المكان
زفر ناظر المحمية الشفافة قباله اللي ابتدت من بداية الحوش وانتهت لنهايته بالجهة المقابلة مجهزة بافضل ادوات الري وافضل معدات التهوية وافضل التجهيزات للزرع بداخلها حتى ينمو على اكمل وجه وهالمحمية هي الفاصل بينه وبين الغرف اللي بنهاية الحوش دخل للمحمية بلبسه العازل باللون الابيض نظارات المعامل الشفافة تغطي عيونه وكمامته على وجهه وبين يديه كمبيوتره تلفت يناظر الزرع وهو يمشي وسطه انحنى شبه جالس وفتح كمبيوتره اخذ نفس باستعداد شغل البرنامج اللي بكمبيوتره وخلال ثواني اصبح يلف المكان ظلام دامس وعلى شاشة الكمبيوتر ابتدأ العد التنازلي فتح كشافه وجرى بكل سرعته خرج من المحمية وقف قبال هالغرفة المقفولة نزل كمامته ومسك كشافه بين اسنانه فتح لبسه من جزاءه العلوي خرج شنطة صغيرة مخبيها داخل لبسه يحاول يفتح قفل هالغرفة اتسعت ابتسامته من فتحه وقف حتى يفتح الرمز السري شحب وجهه من تبدد الظلام وحل مكانه النور وشاشته باقي تعد بالعد التنازلي رفع راسه وناظر الكاميرا اللي صورته بوضوح
...............................................................
<<بيت عايض>>
غالية دخلت للبيت مشت مارة من وسط حوش اهل زوجها مضطرة حتى توصل لبيتها اللي يفصل بينهم جدار ينتصفه باب بيتها وقف من سمعت صوتها
سعاد/ابوك ياذا الوجه تاركة البزارين وتدوج بانصاص الليالي
غالية ناظرتها بصمت
سالمة بحدة/تعالي تعالي وشوفوا عيالك الجن وش سووا ببيت امي شوفي
غالية ماغاب عن عينها منظر الحوش المبعثر ببقايا الاكل والاكياس اشبه مايكون بالمزبلة/والله عيالي مايسوونها وان كان عاثوا بالدنيا هنيا مايوصلونها لذي المواصيل
سعاد بصراخ/قصدك حنا وسخين تعقبين وتخسين
غالية ابتسمت/انا ماقلت شي الحمدلله
سالمة/البيت بيت اخوي حنا الداخلين وانتي الطالعة مالك كلمة علينا
ام عايض خرجت من غرفتها على اصواتهم/علامكن تالي الليل هاه
سعاد/ناظري يمه مرت ولدك اللي طايرتن بها هه شوفي وش تقول
ام عايض تنهدت/علامك ياغالية
سالمة اتسعت عيونها/يمه تسالينها ليه!!
ام عايض/انتم تيسرن لبيوتكن يالله تيسرن ولا وحدة تقعد عندي يالله
سعاد بقهر/يمه
غالية/لا ياعمة مايروحون الى ماينظفون هاللي مسوينه عيالهن
سعاد/هذا اللي ناقص انظف وراك انتي وهيشك(عيالها)
سالمة/تعقب
غالية/عيالي يعرفون ان ذا بيت جدتهم ومايسوونها ابد واللي على راسه بطحة يتحسسها/لفت بتمشي وقفت من شافته/
عايض ضربها كف على وجهها
ام عايض اتسعت عيونها بصدمة
سعاد ابتسمت برضا
سالمة تكتفت/كفو والله اخوي كفو
غالية التفتت لهم بوجهها الاحمر تناظرهم بقهر
ام عايض عضت طرف شفتها بقهر من بناتها اسرعت بخطواتها ووقف جنب بناتها وضربتهم على اكتافهم/ياعلكن ماتربحن اهبن الله اكبر عليكن اهبن
سعاد مسكت يد امها وسحبتها للغرفة تمشي معها/يمه يمه ابشري ابشري باللي تبين ابشري
عايض/ليش تدوجين بهالليل
غالية من بين اسنانها/علمتك الصبح انا بروح لاهلي اسلم عليهم 
عايض سكت شوي ثم ناظر سالمة
سالمة اشرت له براسها
عايض/حتى لو قلت لك روحي بالصبح تنشديني بالليل مرة ثانية انا ماعندي حريم يدوجون بالليل
غالية التفتت لسالمة بابتسامة/هذا هو يدوجون بالليل قدام عيونك
سالمة اتسعت عيونها/تعقبين وتخسين
عايض/يالله خلي عيالك ينظفون اللي سووه
غالية/عيالي نايمين وانا تعبانة انت وخواتك نظفوا بيت امك احنا مالنا شغل/مشت ودخلت بيتها وقفلت الباب وراها/
سالمة ناظرته بقهر وبحدة/مافيك خير ماتعرف تسنع مرتك
عايض/انتي وعيالك نظفوه ياسالمة غالية صادقة عيالي مايسوونها
سالمة صرخت/ياحمار
عايض تراجع خطوة لورا ثم مشى لبيته وتركها
سالمة صرخت/سعاد ياسسعاد تعالي شوفي لنا صرفة تعالي
.........................................................
،،مجلس الديرة،،
مبروكة متربعة بصدر المجلس بوجه مكتسي السواد من الغيظ اللي زاد غيظها من عرفت بفعل سطام
عزيز جالس قبالها عن يمينه سطام ويساره سهم وبارود
سهم بوجه يقارب تختفي ملامحه من كثر الكدمات وثوبه المختفية معالمه العلوية من قوة المعركة اللي خاضها
سطام بوجهه المغطيته جروح بسيطة وثوبه المخلوعة ازاريره شاد على قبضتيه بوسط انفاسه المهتاجة ماهدا للحين
مبروكة/وش اللي صاير ياشيخ عزيز
سطام بغبنة /وهي بقى فيها شيوخ تساومون على اختي وليته احد منا إلا حيّ الله واحدٍ تكرمنا عليه
سهم احتدت ملامحه/مااخذنا منك شي ياولد منصور
سطام اللي مو طايقه ابد فز من مكانه وهجم عليه
عزيز وقف ومسكه يمنعه عن سهم
سطام بجنونه/اقطع واخص انت تحمد ربك مادفنتك بمكانك ياسويد الوجه
مبروكة وقفت وبحدة/مغيرك احد سويد وجه بهالمكان
سطام ناظرها/ليه تظنين اني ماادري انك ورا السالفة
مبروكة زفرت بضيقتها/انت حتى يوم كبيتك تروح بكيفك ألحقتني بأذاك!!استح على وجهك مابك حيا انت
سطام بغبنته/اجل الزينة سواتك/صرخ/ترمين اختي على الرجال
مبروكة بحدة/من زين فعل اختك يومك مغتاظ هاللون هدا جزاتي بغيت استرها
سطام/تسترينها بهالفعلة!!وقبل ذا كله اختي عفيفة طاهرة غصبن عن خشومكم جميع واللي ينطق حرف قصيت لسانه من قاعته
مبروكة/هذا قولك والله وحده يعلم بالحقيقة
سطام اتسعت عيونه بصدمة منها ثم ميل فمه بابتسامة خفيفة/انا ليه للحين انصدم منك والله لو ماشفت ابوي يبر فيك ويناديك يمه حلفت أيمان مغلظة انك عدوة متربصة ماانتي بجدتنا
مبروكة/انت سمعت وشفت بعينك الرجال عيّا عن خطبتك وش ورا هالعلم!!
سطام وقف عند وجهها وصرخ من قلبه شاد على قبضته/بـــسسس!!!
مبروكة رفعت عصاها وضربته على راسه بخفة
سطام يناظرها بحرقة قلبه المقهور والمرتسمة على ملامحه
مبروكة/ياهيه لاتظن عفوي عنك واجب تراه جمالة ياولد منصور
سطام دف عصاها/خواتي انا وليهن ومحد له كلمة عليهن حتى انتي ياجدة
مبروكة بتحدي/كان فيك خير ادخل وانشدهن واللي فيها خير تروح معك
سطام ناظرها بغبنة يعرف جدته زين ويعرف ماتحدته عبث وبقهره/انا بأكبهن الحين بهالبيت مير ماهو بخوف يعلم الله كابهن أدور لنا مكان يضمنا ويعزنا عن العيشة بهالبيت رايح الحين مير اني معّود يشهد الله معود ولاعودت مالك كلمة لا علي ولا على خواتي/مشى/
عزيز وقف ولف بيمشي
مبروكة/عزيز
عزيز لف بيمشي
مبروكة/عزيز
عزيز وقف
مبروكة/مالك نصيب ببنت منصور ابشر وانا سحاب باللي تسواها وتسوى اهلها
عزيز ناظرها بصمت وش يقول ووش يترك كيف يقاومها وهو بدون اي رأي او سلطة بهالمكان لف عنها ومشى يجر خطواته مبتعد
بارود اسرع بخطواته يلحقه/عزيز عزيز اصبر
مبروكة/ولد ياسهم
سهم/سمي ياسحاب
مبروكة ابتسمت/كفو ماسويت وابشر بـ
سهم قاطعه/امرك ياسحاب مااحتاج لامدح ولا جزا
مبروكة/لاعاد تناديني سحاب انا من اليوم جدتك
سهم ناظرها بابتسامة
مبروكة/مثلك مثل عزيز ياولدي
سهم ابتسم برضا عن اللي يسمعه
مبروكة/رح تريح وانا جدتك رح
سهم اهتز جواله مع رنينه بذيك النغمة الخاصة انخطف وجهه ودخل يده بجيبه فتح جواله وقطب جبينه من شاف الفيديو
مبروكة اهتزت ساعتها الملتفة حول معصمها احتدت ملامحها وبجدية/وش العلم ياسهم
سهم بربكة/لا ياسحاب مابه شي تريحي
مبروكة/هاذي الغرفة اللي موصيتك عليها هذا اول الوصايا!!
سهم/شكله طير ولا جراد داخل بالحوش
مبروكة بشر واضح/علّم طيرك وجرادك ان تكررت ماهو بأبخه بمبيد الا اصب فوقه قاز واحرق الحوش باللي فيه/مشت باتجاه البيت بخطوات تجرها بثقل من خيبات الليلة المتتالية عليها دخلت للبيت/بنت يانور نور
ريوف وقفت عندها/سمي ياجدة
مبروكة صرخت/نور
نور وقفت عندها/نعم
مبروكة/خذي قشك واطلعي برا بيتي
نور تفاجأت/هاه
مبروكة صرخت/اطلعي برا ذالحين برا
.............................................................
<<بيت بـيّـن>>
رازي يشرب كاسة الشاهي المنتشر ريحة نعناعه بوضوح بابتسامة عريضة ومن كثر الفرح تفلت منه ضحكات خفيفة بكل فترة والثانية
بـيّـن ناظره بتكشيرة/علامك متشقق
رازي هز راسه بلا وسط ابتسامته العريضة/مابي شي
بـيّـن ناظره بشك/المهم ترا جدي بس بغى يفك غيمة منهم العـ
رازي قاطعه بكحته من شرق بسبب كلامه
بـيّـن اتسعت عيونه/ولد علامك
رازي بكحته/وانت من شكى لك هاه
بـيّـن ارتفعت حواجبه/وشو
رازي/السالفة بيني وبين جدي وش عليك 
بـيّـن رمش باستيعاب
رازي ناظر كاسته يتحاشى نظراته/صدق هاذي الصدفة اللي ماجت على بال الايام كنت ناويها والله ساقها لي وانا ماني بتاركها تمر مرور الكرام
بـيّـن/صاحي انت
رازي/اصحى منك بعد/ناظره وبجدية/بـيّـن 
بـيّـن قطب جبينه يناظره
رازي/لي سلطة على كل شي بالحياة/اشر على قلبه/إلا ذا مالي سلطة عليه عجزت عنه
بـيّـن/ولد عز الله انك ماانت بصاحي تبيني ادفنك
رازي ضحك بخفة/ادفني ماعلي منك الصعب من سنين هان بعيني الليلة/وقف وبيده ابريقه وكاسته يناظر السما ونجومها/انا أبعدت ودرت ولفيت مير القلب مايبي غيرها بديل/ناظره/عاد فهمتني يابـيّـن
بـيّـن ناظره بصمت بحيرة من اعترافه الغير متوقع هالاعتراف كان موجه لبيّن الصديق يصارحه بنيته اللي ماتوقعها بيوم ولا خطر بباله مثل هالاعتراف الخطير كيف يتصرف معه والموضوع بنظر رازي رسمي بكل ماتعنيه الكلمة تنهد من لمس فرحته الصادقة كل مافيه ينطق بصدقه وصدق نيته صد بوجهه/اجل سنعها وخلّها على بينة
رازي اتسعت ابتسامته من سمع القبول منه اتجه له بخطواته واحتضنه وبفرحة/بـيّـن
بـيّـن دفه عنه بقوة/اعقب
رازي ضمه وباستعباطه/اتركني اتركني ريحة الغالين
بـيّـن اتسعت عيونه ولكمه على جنبه
رازي تراجع لورا ماسك جنبه يتوجع/اااه مقبولة مقبولة منك الشكوى لله
بـيّـن مشى بخطوات سريعة باتجاهه
رازي جرى مبتعد عنه/خلاص خلاص
بـيّـن وقف وبحدة/لاعاد توطوط عندي سمعت
رازي وقف/وليه
بـيّـن/ماعادني لحالي اهلي معي
رازي مشى بتكذيب/ايه ايه/التفت له ويمشي لورا/وش بتسوي بسالفتك
بـيّـن تنهد بضيق عن الموضوع اللي نساه للحظات/فكنا من الطاري تكفى
رازي هز راسه ولف مكمل طريقه/تصبح على خير يانسيب الشيخ
بـيّـن كشر بوجهه/ووجعوه يارازي ووجعوه
................................................
سهم وقف بسيارته بهالوادي المحظور على غير اتفاقهم المعتاد نزل منها بملامحه المحتدة قفل الباب وراه بكل قوته دخل يده بجيبه خرج مفتاحه وفتح باب الحوش دخل ومشى بخطوات سريعة متجاهل قفل باب الحوش متجاوز المحمية بدون اي لبس عازل متجه لغرفة المراقبة دخل ولكمه على وجهه بكل قوته
ديوان الجالس على كرسيه ارتمى عالارض ماتوقع هالفعل من سهم
سهم حرك يده اللي اوجعته مابردت بعد الضرب مع سطام وكملت الحين بلكمه لديوان ناظره صرخ بقهره/ونهايتها ياديوان ونهايتها
ديوان وقف ناظر وجهه المتغير زفر ببرود/خير
سهم اتسعت عينه الوحيدة السليمة من الاصابة/ذا اللي عندك تقوله!!خير!!
ديوان تكتف ورفع اكتافه للحظة/لقافة بغيت اعرف وش داخلها وشو له ذا الخوف كله
سهم صرخ/ديوان
ديوان ناظره بحدة/لاترفع صوتك اسمعك
سهم بحدة/كل شي تلقف فيه الا هالغرفة هذا الشي الوحيد اللي مالنا دخل فيه لا من قريب ولا من بعيد
ديوان هز راسه وسحب كرسيه يجلس عليه وعينه عالشاشة/اوكيه
سهم بغبنة/اوكيه!!اوكيه ذا اللي قدرت تقوله
ديوان/ابشر على ذا الخشم هاه رضيت
سهم زفر وبهدوء/ديوان انا مالي غيرك وانت مالك غيرك لايغرك الحنين لايام انتهت انت اليوم ولد هالمكان
ديوان الكاره لهالمكان بكل مافيه امتلى صدره غيظ وتأجج كره من سمع(ولد هالمكان)احتفظ لنفسه بهالشعور وحافظ على ملامحه بدون اي تاثير والتزم الصمت
سهم/من هينا بنبدأ انا وانت من هينا بنكسر كل شي يوقف بوجيهنا
ديوان شال نظراته من على سهم واكتفى يناظر الشاشات بصمت
سهم مد يده ومسك كتف ديوان يمسح عليه/اعذرني ياديوان اعذرني والله قهرتني
ديوان هز راسه بدون يناظره/حصل خير
سهم/بكرة،بكرة ان شاء الله تفهم نظرتي وتتشكرني واذكرك
ديوان تكى بطرف كوعه عالطاولة اللي فوقها الشاشات قباله وسند طرف دقنه على كفه يخفي ضغطه على شفايفه من كثر غيظه اللي فلت منه واتضح بهالحركة
سهم/خلص شغلك بدري الليلة ورح البيت لاتقعد هنيا
ديوان هز راسه/ان شاء الله ان شاء الله
..............................................
سطام وقف بسيارته قبال احد بيوت الديرة المهجورة من سنين حتى الكهربا ماوصلته تركوها اصحابها بدون تفكير للرجعة ابد لهالديرة نزل من سيارته وبيده كشاف التخييم وقف قبال البيت يناظره يلفه الظلام ماينوره غير نور سيارته نزل ثوبه ورماه فوق السيارة بدون اهتمام دف الباب بخفة وانفتح/السلام عليكم/خطى بيمينه/بسم الله
............................................
نور تجر شنطتها بهالليل وجوالها على اذنها بيأس منه من كثر اتصالها فيه ولايرد عليها وقفت قبال باب بيتهم تناظره اخذت نفس ودقت الباب مرتين بهدوء
نواف يجري داخل لخيمة الشعر وارتمى عالفراش بينهم
مُحارب المتمدد جلس/ووجع يانواف وجع
نواف يأشر عالباب بوجهه المخطوف
سلمان جلس باستغراب/وش فيك
نواف برعب/جـجـنية عند الباب
سلمان ناظر خوفه بلع ريقه بتوتر يعرف نواف زين وهالشي مو احد مقالبه ابد
مُحارب تمدد بدون اهتمام وغطى عيونه بيده/ياكبر كذبتك كبراه اخمدوا امسوا يامال العافية امسوا
نواف/وربي مااكذب سواد عند باب البيت وربي
سلمان مد يده ومسك يد محارب/محارب
محارب رفع يده يناظره
سلمان بتوتر/مايكذب يامحارب مايكذب
مُحارب مرر نظره بينهم/اقطع اشناب توها تخط/فز من تمدده واقف ناظرهم وبسخرية/وين شفتها ذا الجنية
نواف/عند الباب
مُحارب مشى
سلمان وقف وجرى وراه
نواف لحقهم/لاتكبوني
نور التفتت حولها وتوترت من الظلام والهدوء اللي يغطي المكان قشعر جسمها من وصل لمسامعها صوت خطوات ماقدرت تلتفت وتتاكد بنفسها زفرت براحة من وصلها صوته
مُحارب واقف ويديه بداخل جيوب ثوبه ووراه نواف وسلمان/من متى الجن معهم شناط
نور التفتت تناظرهم
مُحارب باستغراب من وجودها/يابنت الناس غلطانة بالبيت علميني وين اهلك وابشري
نور/ماني بغلطانة مير ودي تنادي لي جدي طاهر
مُحارب قطب جبينه للحظة ثم اتسعت عيونه من عرف من تكون/حياك الله يابنت العم حياك
نور ابتعدت عن الباب
مُحارب اتجه للباب وفتح لها الباب/حياك حياك كبّي الشنطة عنك يشيلونها الشباب/دخل قبلها واتجه لبيت جده وقف عند الباب بتفكير يدق او يفتحه ويدخله فضل يفتحه/ادخلي داخل اكيد جدتي بالصالة نايمة حياك حياك
نور/مشكور ماقصرت
مُحارب مشى راجع ناظرهم واقفين عالباب بفضول/ووجعوه واقفين دخلوا الشنطة اعقب انت وياه مابكم خير
سلمان شال الشنطة ووصلها لباب بيت الجد
نواف وقف عند مُحارب/مين مين علمني
مُحارب ارتفعت حواجبه من غباءه/الجنية اللي خرشتك
سلمان وقف عندهم هز راسه/الحمدلله والشكر يعني ماعرفت
مُحارب ناظره باهتمام
سلمان/اكيد وحدة مضيعة يالثور
نواف/مضيعة ويدخلها عند جدتي انت الثور والله ماهو بأنا
سلمان/جدتي تخبر كل الخليقة اكيد تعلمها هاه شفت انك الثور
مُحارب/والله اثنينكم ثيران انا الغلطان واقف اسمع لكم/اسرع بخطواته مبتعد عنهم/
نور دخلت لبيت الجد بنبضات قلبها السريعة نزلت نقابها وطرحتها على اكتافها وقفت عالمدخل من ناظرت جدتها نايمة بالصالة احتارت تصحيها من النوم او تنتظر بمكانها الى مايصحون الصباح
حمدة صحت من سمعت فتح الباب وحسن باحد يدخل للبيت جلست وهي تعدل طرحتها/من اللي جا خير عسى ماشر/رفعت عينها بعد ماعدلت طرحتها/ولّعي اللمبة
نور قطع حيرتها صوت الجدة حمدة لمست الجدار تدور على الازرار
حمدة بنرفزة/علامك يمينك
نور فتحت النور
حمدة التقت عينها بعين نور رجف قلبها تناظرها تتوسط بيتها وبرجفة صوتها/ارحبي تراحيب المطر ياهلا ثم هلا ثم مليون هلا ومرحبا/فتحت يديها/هلا بريحة عياش وعين عياش وباقي عياش بهالدنيا
نور اسرعت بخطواتها وارتمت بحضن جدتها
حمدة مسحت على راسها بوسط دموعها اللي ماقدرت تكبحها/ياهلا بنور عياش ياهلا بنوري ياهلا ومرحبا
نور بدموعها/طردتني ياجدة طردتني بالليل
حمدة/ابرك الساعات وازينها/باست راسها/ازين ماسوت
نور ضحكت بخفة/احتريت هالطردة من مبطي ياجدة مير ماجت عالكيف
حمدة ضحكت مسحت على اكتافها/بعدي بنت عياش بعدي صبرتي على الظلم وطلعتي من بينهم حية الحمدلله عالسلامة يانور الحمدلله على سلامتك
نور تركت حضنها تناظرها بلمعة عيونها
حمدة ضمت كفوف نور بين كفوفها/وانا جدتك الردي ردي ماعليه حسايف الحمدلله اللي نجاك منهم
طاهر خرج من غرفة نومهم كعادته يحاول يصالح حمدة العنيدة وقف يناظر السواد باستغراب/يالله صباح خير/قطب جبينه باستغراب من الهيئة ماهي من حفيداته/عسى ماشر ياحمدة
نور وقفت والتفتت له بابتسامة/صبحت بالخير ياجد
طاهر بشك من اللي توقعه/هو صحيح اللي اشوفه ياحمدة ولا عيوني بهن بلا
حمدة/الا صحيح ياطاهر صحيح قرت عينك ببنت عياش قرت ياطاهر
طاهر بابتسامته العريضة فتح يديه/ياهلا ومرحبا ياهلا ياهلا ومليون هلا مرحبا حي الله نور ياحياها الله
نور بمكانها ماتحركت ناحيته امتلت عيونها دموع بخجل من اللي سوته/مااستاهل ياجد ترحيبك مااستاهله/هلت دموعها/
،
،
~~قـبـل ١٠سنوات~~
،،مجلس الديرة،،
طاهر جالس بملامح مرتسم فيها الغيظ/البنت ماتزوجونها ذا لو مابقى على وجه الارض غيره
منصور تنهد/ياعم طاهر الولد مايعيبه شي
طاهر بحدة/عشانه ولد شيخ تقولون مايعيبه شي صحيح مايعيب ابوه شي مير هو محدن يدري عن خباياه
منصور/ياعم نور ماهي مثل بناتي الا هي وحدة من بناتي ويشهد الله غلاها من غلا اخوانها ياعم انا رحت بنفسي وسألت عنه بدوامه والحي اللي هو ساكن به وحتى المسجد والامام كل ابوهم يشهدون ان به خير ماشافوا منه شي ابد
طاهر/اسمع يامنصور كبيتها تربى وسطكم واحرمتونا من شوفها وسكت مير تطشونها على واحد ماتعرفون عنه شي لا والف لا مايتم هالعلم ابد لو انه على قص رقبتي
منصور سكت بياس من اقناعه
مبروكة من ورا الباب/مير ياابو عياش تربى عند امها وبين محارمها ازين من انها تربى وسط بيتك اللي كل ابوه شباب عسى الله يحفظهم ويصلحهم وثم هذا هو البيت قدامك وراك ماطقيت بابه ولفيت يمها محنا ظلومين نقطع الدم عن بعضه
طاهر احتدت ملامحه بغيظ منها ماابتعد الا مخافة تتعرض لنور
مبروكة/ياابو عياش اهرجك ذالحين وانا مبروكة جدة نور ماني بسحاب
طاهر/اجل اسمعي العلم ياام زايد نور ماتزوجينها ذا الاجرب ابد
مبروكة/علمني بشي يردنا عنه
طاهر/الصالح يبين على وجهه ياام زايد
مبروكة ضحكت/على ذا الكلام محدن مزوج احد ابد
طاهر/ماياخذها ابد ماياخذها
مبروكة/اجل ياطاهر وش قولك اذا انك شفتها وسمعت رايها بنفسك
طاهر/وبترضين برايها؟
مبروكة/انا مااغصب احد ابد على شي كلن عقله معه ياطاهر مير انت لاسمعت رايها ترضى به
طاهر/كبيني اشوفها وبعده يصير خير
مبروكة/ابشر ذالحين اللي يمك ابشر
،،بعد عشر دقايق،،
نور(٢٠سنة)دخلت بتوتر بكامل حجابها للمجلس اللي مايتواجد فيه الا عمها منصور وجدها طاهر
طاهر وقف من شاف ذاك السواد مقبل عليه رجف قلبه بشوق لذيك اليتيمة اللي مالها حيلة بأمورها يسوقون حياتها على كيفهم وهي ملتزمة الصمت تلبي امرهم امتلى حزن من صافحت يديها يدينه وحس بفرق الملمس بين كفوفها وكفوف باقي حفيداته امتلى صدره حزن فوق حزنه المخفي كبريائه اللي كان سبب تدهور حالة عايلته ووصولها  لهالحد ماتكسر ولا ضعف بيوم لكن ضعف بهاللحظة تحديدا من حس بقساوة الزمن على بنت ولده وتجلى بملمس كفوفها بوضوح توسطت عبرته حلقه وخنقته بلع ريقه وضغط على كفه بـيّـن كفوفه/وشلونك يانور وشلونك يابنيتي
نور همست للجد اللي اصبح بمكانة الغريب من كثر القطاعة/بخير الحمدلله
منصور/نور يابنتي سلمي على جدك علامك تخامسينه(تصافحه)سلمي
نور قربت منه ورفعت نفسها وقبلت راسه
طاهر/سلمتي سلمتي ياعيني
نور سحبت كفها
طاهر شد على كفها محتضنة/علومك يابنتي وكيف امورك كيف الدنيا معك
نور ناظرته بصمت بنظرات عميقة بحيرة من سؤاله كيف بعد كل هالسنين ينطق هالسؤال بسهولة كيف الدنيا معها هاذي هي وافقت على اول واحد بدون تردد ابي السلامة من هالبيت اللي يماثل الجحيم بعينها
طاهر/وانا جدك سمعت انا وافقتي على ذا الخطّيب مير انه مايصلح
نور احتدت نظرتها من كلامه
طاهر/يابنتي الرجال مخابر ماهم بمناظر عمره ماقلط ضيف ابوه يقلط وهو جالس حتى الضعوف مايرحمهم اللي مايرحم ضعيف مابه خير وانا جدك
نور ناظرته بقهر بعد كل ذا السنين جاي يمنعها من ابسط حقوقها بأي حق يمنعها من الزواج وهو اللي ماسأل عنها بيوم ماكلف عمره يمر ويحط عند الباب لو هو مؤونة بسيطة لها عشان خاطر ولده المتوفي والحين جا يتدخل بحياتها مثلهم يمنعها بالزواج لكن هم ارحم مامنعوها تركوها هالمرة براحتها حتى امها المتسلطة قالت لها بكيفك وهاذي اول مرة تحس بالحرية
طاهر/يابنتي ماعليك من كثر الهروج
نور قاطعته/انا وافقت عليه محد اجبرني
طاهر انصدم/مير
نور سحبت يدها وبقهرها/انا ابيه واخترته من بين كل الخطاب مازان بعيني الا هو وماابي الا هو ذا اختياري محد غصبني عليه ولااحد يتدخل بشي انا ابيه ويردني عنه
طاهر يناظرها برجى/يانور
نور تجاهلته وناظرت منصور/متى العقد ياعم
طاهر تنهد بيأس
مبروكة بابتسامة من رد نور/هاه ياابو عياش سمعت العلم يشهد الله ماتدخلنا ابد هي تبيه وانت سمعتها بنفسك
طاهر ناظر نور/لافات الفوت ماينفع الصوت يابنيتي
نور شدت على يدها تهدي نفسها
طاهر تنهد/مير عسى الله يهني سعيد بسعيدة دام ربيتوها وتخيرتوا عريسها مالنا لزمة بحياتها/ناظرها/مبروك عسى الله يوفقك وانا جدك مبروك
منصور وقف يلحقه/ياعم طاهر تعوذ من ابليس وش هالكلام عم طاهر
نور امتلت عيونها دموع ماودها تزعل جدها لكن هي زعلانة منهم وكثير كيف تركوها كل هالسنين ولااهتموا بوجودها كيف ذاك الحب اللي تلمحه بعيونهم وقت زيارتها لهم تبخر بلحظة انقطاعها عنهم وكانهم شي اشبه بالحلم اختفوا من لحظة صحت من نومها التفت من سمعت صوتها اللي مرتسم فيه الفرح
مبروكة بابتسامة/مبروك يانور مبروك ياعيني مبروك
نور استغربت من(عيني)ماتعودت هالحفاوة منها لكن اعذرتها اكيد من فرحتها بالزواج/الله يبارك فيك ياجدة
،
،
طاهر تقدم لها واحتضنها/الله يلوم اللي يلومك وانا جدك كل ماتسوين حلال يشهد الله حلال
نور بدموعها/طلع نذل وخسيس ياجد/بحرقة قلبها/ماورا خسته خسة ياجد قهرني
طاهر بغبنة/الله يقهر عمره ويقهرهم معه اللي مافيهم خير وفكوك منه
نور/مافكتني منهم غير يقين ياجد وهذا هي لحقها مالحقني ذالحين
حمدة كفكفت دموعها/يفرجها الله يفرجها
طاهر مسح على ظهرها/لاتبكين لفيتي دارك بين اهلك مايلحقك ظلم ولا عنا حياك الله يانور حياك الله
..........................................
        يـوم جـديـد
..........................................
,,بيت الشعر,,
طاهر جالس قباله يتقهوى
رازي نزل فنجاله/ياجد
طاهر قاطعه/ياولدي اذا انك جاي عشان اللي صار البارح
رازي قاطعه/ياجد انا جاي اليوم اخطب غيمة على سنة الله ورسوله
طاهر تنهد/يارازي
رازي/ياجد النية مبيتة مبطي مير يوم لاحت جيت على وجهها ياجد سما رازي تطلب الغيم تمطر ارضها
طاهر/مير ياولدي
رازي/ادري معي بزر وهي عزبة مير يشهد الله القلب مايبي غيرها وطن له لاتردني ياجد تكفى
طاهر زفر/عسى الله يكتب اللي فيه الخير الله يكتبه وخويك وش نوى عليه؟
رازي/يقول مايبي الطاري
طاهر سكت بتفكير
رازي/ياجد
......................................................
<<بيت الشيخ>>
يـقـيـن جالسة على سريرها وبين يديها صندوق خشبي متوسط حجمه محفور بزاويته اليسرى السفلية اسمها كان هالصندوق هدية من ابوها فتحته وخرجت ذهبها من الاساور والسلاسل اللي بداخله لبرا وحركت قاعدته بزر جانبي مخفي وخرجتها ناظرت السبحة المخفية بذا المكان من سنين كانت نست وجودها من الاساس رجعت ذكراها من موقف البارح خرجتها تتاملها سبحة خرزاتها باللون الكحلي تتخللها بعض الخرزات باللون الكحلي المطعّم باللون الفضي ابتسمت وهي تمررها بين يديها باسترجاع لذيك الذكريات
،
،
//عند المحطة اللي تبعد عن الديرة مايقارب٧٠كيلو//
منصور وقف بسيارته الغمارتين عند مضخات البنزين فتح التانكي وناظر عامل المحطة/عب بنزين يامحمد
يـقـيـن(١١سنة)بعبايتها المفتوحة ازاريرها والطرحة على اكتافها بشعرها الاسود الطويل لمنتصف ظهرها فتحت باب السيارة ونزلت تجري للبقالة بدون انتظاره من شافت ذاك الونيت واقف عند البقالة
منصور بابتسامة/بنت يابنت اصبري
سطام(١٠سنين)/يبه اروح
منصور/رح ياعيني رح مير اشتر ولاتاكل شي يثور عليك السكر سمعت
سطام نزل يجري بوسع ابتسامته
منصور رفع صوته/سمعت
سطام دخل البقالة بدون يرد
منصور نزل من السيارة يمدد جسمه ثم اتجه للبقالة
يقين وقفت وراهم بهدوء تناظرهم
بـيّـن واقف يناظر رف البسكوت بصمت
غيمة(٨سنوات)منحنية تجمع بكيستها من الرف بانواع مختلفة رفعت راسها تناظره بابتسامة/خذيت لك بـيّـن
بـيّـن بضيق/كبيها جدي يقوم علينا
يقين احتدت ملامحها بغيظ من اللي سمعته
غيمة/معليك بأقول لمحارب
بـيّـن/هذا هو مُحارب بين يديه ياخذ له مايبي كبينه بس ولا مابيخليك تاخذين شي
غيمة مشت بدون اهتمام لكلامه/كلهن لي
بـيّـن/غيمة غيمة/مشى خطوة/
يـقـيـن وقفت جنبه/قولي وش تبي معليك من احد
بـيّـن التفت يناظرها من فوق لتحت
يـقـيـن تكتفت/علامك تناظرني هاللون
بـيّـن/وين اللي قالت بتتسفع عني!!
يقين كشرت بوجهها ولفت الطرحة/تسفعت ها تريحت
بـيّـن هز راسه بطرف ابتسامة/التسفع لك وش علي منك وثم عيب عليك تهرجين واحد غريب عنك وانت متسفعة
يـقـيـن امتلت غيظ منه/احسن تستاهل عسى محد يشري لك شي/مشت/
بـيّـن ضحك باستمتاع لغيظها السريع
سطام وقف قباله يناظره بحدة
بـيّـن ارتفع حاجبه/علامك ياولد منصور
سطام/وش تبي من اختي
بـيّـن اخذ بسكوت من الرف ومده له/قلت لها ابي ذا زوين وعيّت
سطام بحقد/تكذب امي تقول بني طاهر كذوبين خوانين
بـيّـن انحنى لمستواه/دامنا كذوبين وخوانين علامنا يوم لقيناك بالبر ماكبيناك للذيابة
سطام/لان ابوي الشيخ تخافون منه
بـيّـن/اسمع ياسطام انت رجال والرجال مايمشي ورا الحريم لك عيون تشوف بهن واذانيك تسمع بها وقبل ذا كله عقلك يحكم الامور
سطام/مير انه
بـيّـن ضربه بالبسكوت اللي بيده على صدره وبابتسامة/اثقل خلك رجل/مشى/
سطام يناظره بقهر
منصور وقف وراه وحط يده على راس سطام
سطام رفع راسه لابوه يناظره/يبه
منصور بابتسامة/والله انه كفو
سطام اتسعت عيونه
منصور/لاكبرت وانا ابوك خلك معه نعم الخوي ونعم الثقل هو
طاهر عند المحاسب يناظر اغراض غيمة على طاولة المحاسب باستغراب/ذا كله لويش
غيمة/ظاهر بالبيت يذاكر جبت له معي
طاهر/مايريد ذا البلاوي
يـقـيـن وقفت عند المحاسب متكتفة تناظرهم
غيمة/ومحارب شريت له
طاهر/محارب معه كيسته/لمح عدد كثير من نفس البسكوت الممتلي مكسرات احتدت ملامحه دف الاغراض بيده لجهة المحاسب وطاحت عنده/
المحاسب تراجع بخطواته لورا حتى مايدعس البسكوت
طاهر بحدة/هاه حتى اني مالش شين دام هاذي علومش
غيمة غرقت عيونها دموع
طاهر بحدة للمحاسب/يالله حاسب وفكنا
يـقـيـن بغيظ/ياجد طاهر
طاهر ناظرها بحدته
يـقـيـن/يقولون بني طاهر من اول اهل كرم يعرفونهم القاصي والداني
طاهر قطب جبينه
يقين/مير اني عرفت ذالحين وراه طاريهم انقطع
طاهر مد يده لها بيمسكها ثم وقف يسمع كلامها
يقين/علامك اغتظت من الصحيح هذا انت تعمل باهل بيتك هاللون والكريم كريم على اهله با
منصور قاطع كلامها بتغطية فمها بيمينه وسحبها وراه/العذر والسموحة ياعم طاهر مير تخبر البزران من تالي ملسّن
طاهر يناظرهم بغيظ/مير يامنصور مااعرقت فيها ابد يلوح بها ذاك العرق
يـقـيـن دفت يده/ماازين مني الا عروقي يالشايب موجعتك هالعروق لذالحين إتلوى منها
منصور رفع يده بيضربها
يقين جرت مبتعدة
منصور ناظر طاهر باحراج/ياعم
طاهر ترك كل اغراض البيت اللي جاي عشانها ومشى وبيمينه شايل محارب مر من جنب منصور ودفه بجسمه مكمل طريقه
منصور تراجع وسط زفرته وتحمله
يـقـيـن واقفة عن حوض سيارة طاهر تناظر بـيّـن الجالس
بـيّـن جالس بحوض السيارة ناظر يديها/مامعك شي غريبة يابنت منصور
يـقـيـن تكتفت/بنت منصور لها اسم تعبت وانا اعلمك يـقـيـن يـقـيـن ورا ماتناديني باسمي مثل نور و سلام
بـيّـن/اخلصي وش تبين
يـقـيـن ناظرت طاهر الخارج من البقالة بغيظ بابتسامة/ماابي شي/مشت/
طاهر وقف عند سيارته وناظر بـيّـن وبحدة/وش مقعدك هنيا
بـيّـن باستغراب من سواله وردة فعله وهذا وضعه المعتاد بعد السالفة اللي صارت/هذا مكاني دايم
طاهر بحدة/ادخل بالغمارة وكب الهرج عني ادخل
يـقـيـن ابتسمت وفتحت باب السيارة وركبت
منصور فتح الباب من جهة يـقـيـن
يـقـيـن قفلت الزر بخوف من ابوها
منصور تنرفز واتجه لبابه فتحه ورفع سطام
سطام دخل وجلس
منصور ركب وقفل الباب ومد يده من ورا سطام الجالس بينهم ومسكها من اذنها
يقين مسكت يده/اه اه يبه اوجعتني يبه
منصور/وتاليتها مع لسانك ذا وتاليتها
يـقـيـن غرقت عيونها دموع/يعني اسكت عن حقي
منصور تركها ونقطة ضعفه دموع عياله/يابنيتي لسانك حصنك رحتي يمّه ناويته تحسبين اني مااخبر علومك
يقين صدت بصمت
منصور/ماعاد به طلعات على راسك
يـقـيـن التفتت له بصدمة
منصور/من اليوم إتسفعين ماتعتبين الباب وانتي مالبستي الشيلة والنقاب والله والله مالبستيهن لاأعلقك من اذانك بحبل الغسيل بنص الديرة اخليهم يتفرجون عليك يابنت الشيخ
يقين تكتفت وبزعل/طيب طيب بس وينهن اغراضي
منصور حرك بالسيارة/جبتهن ماكبيتهن مثل راعيتهن
يقين التفتت له/عصير نور يبه
منصور ابتسم/مانسيته انسى غرضانك ولاانسى حق نور
~~عصر نفس اليوم ~~
غيمة تجري ودخلت لبيتهم/بـيّـن بـيّـن
بـيّـن قباله كتبه رفع راسه يناظرها/علامك
غيمة جلست وهمست باذنه/فيه حرمة برا تبيك
بـيّـن انصدم والتفت لها همست/هي قالت مااعلم احد غيرك
بـيّـن مشى بخطوات راجفة كله رعب تفكيره محصور بذيك الللي همست له بذيك الليلة يحتفظ بالسر اللي سبب شرخ كبير بعايلته وقف ورا باب البيت الكبير مد يده برجفته الواضحة قطب جبينه يناظر قفاها اللي قدامه بنت صغيرة اقصر منه بشي بسيط مكتنفة السواد بالكامل
يـقـيـن التفتت من سمعت صوت الباب اللي انفتح
بـيّـن رمش باستغراب/نعم
يـقـيـن/علامك ماعرفتني
بـيّـن قطب جبينه ومرر نظره عليها ضحك/يـقـيـن
يـقـيـن اتسعت عيونها/طلعت تعرف تقول اسمي
بـيّـن بضحكة/ماشاء الله ماشاء الله عساه اول الهداية
يـقـيـن فتحت النقاب ونزلته ومسكته بيدها ونزلت الطرحة على اكتافها/لولا حلف ابوي مالبسته وهذاني طلعت من البيت متغطية بريت بحلفه خلصنا
بـيّـن ضحك/وش تبين يابنت منصور
يـقـيـن مدت الكيس اللي بيدها له
بـيّـن ناظرها باستغراب
يـقـيـن/علامك خذه طاحت يدي
بـيّـن اخذ الكيس باستغراب وناظر داخله المليان بسكوت وشيبان وعصير ثم رفع نظره لها
يـقـيـن بملامح مرتسمة عليها الضيقة/غبني ذاك الشايب اليوم غبنة/ابتسمت/مير ماعليه لاأزعلوك انا ارضيك
بـيّـن كبح ابتسامته/تراه جدي لاتغلطين عليه
يقين تكتفت/مير اني قلت شايب وذا الصحيح والحمدلله رديت لساني عنه
بـيّـن دخل يده بجيبه ثوبه وخرج سبحته بخرزاتها اللي باللون الكحلي هدية نجاحه من ابوه والمرافقة له بكل مكان ومدها لها
يـقـيـن ناظرته
بـيّـن مدها لها/علامك طاحت يدي
يـقـيـن اخذتها
بـيّـن صد بوجهه/عذر لابغيتي تجين نلعب ونسولف
يـقـيـن تناظر خرزات السبحة الكبار بين يديها بابتسامة
بـيّـن/يابنت منصور
يـقـيـن ناظرته بتافف/توك قلته علامك ذالحين
بـيّـن/لاتسفعتي لاتجين وتعلميني تراه حرام قبل العيب والمنقود
يـقـيـن بضيقة/انا مالي خوي غيرك لاتسفعت من اهاوشه ويتحملني
بـيّـن تمتم بكلمات ماسمعتها
يـقـيـن احتدت ملامحها/وش قلت ماسمعتك
بـيّـن/عاد كل البنيت تسفعن ماظل غيرك تسفعي عيب خلاص
يـقـيـن بزعل/هين مردك تدورني تبي تسولف واطردك هين/مشت/
بـيّـن ناظرها بضحكة وهي تبتعد/طيب ردي لي السبحة
يـقـيـن اسرعت بخطواتها مبتعدة
بـيّـن ضحك/لاتضيع سمعتي لاتضيع يايقين لاتضيعينها
،
،
يـقـيـن تناظرها بابتسامة وهمست لنفسها/يووووه اذكرها كبيرة وشلون صارت بهالصغر/اختفت ابتسامتها شدت عليها بغبنة/كل اللي انا فيه من ورا راسه هين يالراعي هين
ريوف دخلت/يقين
يـقـيـن نزلت السبحة بسرعة للصندوق تناظرها
ريوف/جدتي تبيك لاتبطين عليها/لفت بتمشي ثم وقفت/الا صح مادريتي
يـقـيـن قطبت جبينها
ريوف/جدتي طردت نور امس
يـقـيـن فزت من السرير ورمت الصندوق وراها
ريوف ابتعدت عن طريقها بابتسامة/شوي شوي لاتنكسرين شوي شوي
.....................................
<<بيت منيرة>>
غيمة فاتحة شنطتها تجمع اغراضها
غصنة جالسة بزاوية الغرفة بين يدينها كتابها وقبالها كوب شاهي النعناع تتحاشى تناظرها متخذة وضع عدم الاهتمام
منيرة وقفت على باب غرفتهم/كلها اسبوع وترجعين سمعتي
غيمة/يمكن اكثر اذا اعجبني المكان يمه
غصنة اتسعت عيونها
منيرة/قومي روحي لجدك يبيك وعقبها كملي قومي
غيمة قطبت جبينها باستغراب/جدي وش يبي مني
منيرة بابتسامة/روحي وتعرفين
غيمة خرجت
منيرة اتجهت للمطبخ
غصنة وقفت عندها بفضول/يمه وش قايل لك جدي هاه هاه
منيرة دفتها/ماادري عنه
غصنة/علينا يمه الضحك شاقة الوجه شق
منيرة التفتت لها/علامك جالسة بالغرفة على غير العادة
غصنة كل حركاتها عناد بغيمة/ابد كنت اذاكر
منيرة هزت راسها بتكذيب/ايه ايه ذابحتك المذاكرة روحي شوفي جدتك من تتقهوى معه ثم تعالي واسالي جدك وش يبي
غصنة قطبت جبينها/ليه به ضيوف
منيرة ابتسمت/ولا هو اي ضيف يغطي عليك انتي وفوقك سلام
غصنة جرت خارجة بفضول وقفت بصدمة تناظرها
نور جالسة قبال جدتها وقفاها لبيت منيرة وظاهر بالجهة المقابلة تتقهوى
حمدة/هاه جت جت المبلوسة جت
نور التفتت وراها تناظرها ثم وقفت بابتسامة/اهلا
غصنة تناظرها بمكانها
حمدة بحدة/علامك سلمي على بنت عمك
غصنة تقدمت وسلمت عليها بهدوء
نور ظلت واقفة تناظرها
غصنة/ذالحين انتي حفيدة سحاب
حمدة سحبت العصا وضربتها على رجلها
غصنة نطت/اه اه اه
حمدة/قطعة يابنت خلف قطعة حفيدة حمدة حفيدة طاهر بنت عياش سمعتي
غصنة تتالم/سمعت ياجدة سمعت
،،داخل بيت طاهر،،
طاهر/اليوم جاك خطيب وانا جدك
غيمة/لا ياجد
طاهر/وشلون لا وانتي ماعرفتي من هو
غيمة/ماابي اتزوج ابد ابي اجلس عند امي وبين اخواني ماابي الجيزة ابد
طاهر تنهد/رازي ولد مثنى خطب ياغيمة
غيمة احتقن وجهها باللون الاحمر وانفجرت/لا ماابي ماابيه لو مابقى غير هالرازي على وجه الارض مااخذته مااخذته
#شقّ_الغَمام