شـقّ الـغَـمـام

(٣٣)

..(٣٣)..
لااله الا الله وحده لاشريك له..
استغفر الله العظيم واتوب اليه..
.
-
مبروكة شدت على عكازها المستندة عليه بغبنة/وش قلت؟!
سطام بحدة/عاهدت الله قبل القوم ماينوخذ حق مظلوم وراسي يشم الهوا لو هو اقرب قريب وعزيز ماهو من زين فعوله الاولة حتى تشفع له بشين فعوله من تالي
ريوف احتدت نظرتها وبنفسها/صدق نفسه ذا انه شيخ بني سمّار بحق!!
مبروكة/كانه علا صوتك زود على كبر راسك
سطام باصرار/دامه بالحق يعلى الصوت ويكبر الراس ولايقصه السيف ولايغشيه سحاب
مبروكة رجف قلبها نفس الكلام تكرر على مسامعها باختلاف القايل كيف قوى عوده بهالسرعة كان يسّلم ويرضى حتى لو بدت علامات الرفض بصوته وملامحه ماكان بهالقوة ابد والحين قوته اصبحت موجعة لها وموجعة لقلبها اللي بينجبر يختار من جديد بين احب الناس لقلبها
،
،
~~قـبـل٢٠ سـنـة~~
مبروكة(٤٥سنة)بقهر/مهبول انت تطلع من البيت على عيون الجميع بتفضحنا!!
فايز(٤٨سنة)بغبنته/مااشقاك طلعتي ذليتي من الفضيحة!!
مبروكة/فايز تعوذ من ابليس
فايز/صبرت سنين ولحقتني من وراك لوايم ماهي بلومةٍ وحدة فاض الروض يامبروكة فاض
مبروكة/مير وحيد امه ينر
فايز قاطعها/وعسى كل وحيد يسوي سواته نرحمه ونكبه عز الله ضاع كل شي!!
مبروكة/يافايز ماهو إتلّه بين العربان وتذلّه بهاللون الرحمة زينة
فايز بغبنة/وهو ليه مارحم اليتامى يومه عثى بهم على عيون الخلق!!
مبروكة اكتفت بسكوتها مستقبلة كامل انفجاره بهدوء عسى يغير رايه بترك البيت
فايز ضرب صدره بطرف اصبع يمينه بقهر/تكسرين كلمتي وشلون قويتي وسويتيها وشلون!!
مبروكة كبحت غيظها/ياابو زايد
فايز قاطعها/اسمعي يابنت مشرف القوم مايتسيدهم راسين
مبروكة احتدت ملامحها
فايز/انا صبرت وتحملت واجد رضيت يوم القوم اختاروني شيخٍ عليهم وانتي صرتي لهم سحاب مير ماظنيت بيوم يغدي بهاللون عزالله اني طاوعت وانا ماابي بني سمّار يتفارقون ودامها بهاللون انا عايف وبايع وقاضي يامبروكة
مبروكة/وش يرضيك ياابو زايد؟
فايز/اشاورك وتعلميني برايك كان اما تشورين بين الرجال وتمشي كلمتك فوق كلمتي وانا شيخهم معصي لا بالله ماارضاها لو انها على قص رقبتي!!
مبروكة تنهدت/صدقت يافايز القوم مايتسيدهم راسين و
فايز احتدت نظرته محد يعرفها اكثر منه قوية بأس ماتحسب لاحد حتى لو على نفسها قاطعها بنبرة عالية/زايد منصور
//زايد(٢٠سنة)ومنصور(١٩سنة)الحاضرين لهالنقاش الحاد اللي اصبح جزء من روتين حياتهم اليومي بالفترة الاخيرة ومنتظرين الانفجار الاخير بخوف//
زايد/سم يبه
فايز التفت يناظرهم/من الاول هالبيت ماهو ببيتي وتجملت وكثر الله خيري ماورا صبري صبر مير ماورا جميلي جميل عقب ماحصل اليوم
مبروكة قاطعت كلامه/كانك نويت الصد الله يستر عليك مير عيالي مالك شغل فيهم ماتاخذهم يافايز!!
فايز/جحوش وش كبرهم وتحامين عنهم كلن عقله براسه ماتحكمينهم يامبروكة!!
مبروكة شدت على طرف طرحتها بتوتر تخفيه وبحدة/ولد يازايد
زايد/سمي يمه
مبروكة/افصل بالحق واختار من ذالحين
زايد المشابه لابوه قول وفعل وحتى ملامح وصفات كيف تسأله هالسؤال وهي تدري بحقيقة رايه بفعلها ماقدر ينطق خاف عليها من الجرح جرح ابوهم اهون على قلبها من جرح عيالها شد على قبضته بتوتر من صعوبة الموقف عليه
منصور/اخطيتي يمه وبني ادم خطاي
فايز ابتسم برضا
مبروكة رجف قلبها من رده/وشو!!
منصور/يمه سحاب تشاور ماتفصل بالحكم اللي يحكم الشيخ
مبروكة بغبنة وقهر اتضح برجفة صوتها/ماشاء الله يامنصور ماشاء الله كبرت وكبر راسك يالورع!!
منصور شد على قبضته يحب امه ويدري بزعلها شين لكن لازم يبين لها خطاها قبل يكون بصف ابوه من الاساس/دامه بالحق يعلى الصوت ويكبر الراس ولايقصه السيف ولايغشيه سحاب
مبروكة انعصر قلبها كيف قطعة من قلبها توقف بوجهها بهالطريقة كم تعبت وربت ومارضت احد يمس ظله حتى ترضى احد يمس شعره منه كيف قابله بهالجحود والصد/قل انك ودك مع ابوك وقضينا؟
منصور صح توقعه امه فهمت حكمه بالموضوع غلط تنهد مايبي زعلها تقدم لها/يمه
مبروكة رفعت يدها توقفه/وصلني علمك طس معه باللي مايحفظك يالجحود
منصور رجف قلبه من دعوتها/يمه
مبروكة بغبنة وسط رجفة صوتها من عبرتها ووجع قلبها/ولد يازايد وش قولك
زايد ناظر ابوه
فايز تنهد من فهم نظراته يكفيها الليلة صدمتها بمنصور هز راسه بايه ناظر منصور وبحدة/ولد يامنصور مشينا مالنا ماطى بهالديرة مشينا/مشى/
منصور واقف بمكانه يناظر امه بوجع مايقوى قلبه يتركها وهي زعلانة عليه
مبروكة بغبنة/اصبر اسمع العلم قبل تمشي
فايز وقف والتفت لها
مبروكة/سحاب الديرة خيمت قبل شيخها
فايز احتدت نظرته
مبروكة/لاتظن تخيروك عبث كله بمشورة من سحاب يافايز
فايز بقهر منها/وهذا هو فايز كبّ الديرة وسحابها وباعها بتراب مثل ماباعوها بني طاهر من اول 
مبروكة بقهر من لمزه/وسحاب امطرت الديرة خير عقب ماانجلت غمتها
فايز ضحك/خابرك عميا نظر ماهو بعميا بصيرة
مبروكة صرخت/الشيخ اللي مابه خير يحل محله شيخ اخير منه
فايز/تعقبين وتخسين ماعرفتوا الخير الا من وراي
مبروكة/لولا الشيخة ماعينت الخير وانت ماعرفت الشيخة الا من وراي
فايز/اشبعي بها هالشيخة فوق شين عماك شين نفسك ويلاه!!
مبروكة هلت دموعها بقهر منه
منصور واقف يناظر امه يكره هالمنظر بين امه وابوه والليلة فاض الكيل وتطاولوا بالالفاظ بحق بعضهم تقدم لها ومسك يدها
مبروكة عرفت يده ولمستها سحبت يدها منه بقوة/طس عن وجهي
فايز يجر خطواته السريعة خارج من البيت وقف وبحدة/ولد منصور مشينا
منصور ناظر زايد للحظة ثم لحق ابوه بخطوات سريعة
مبروكة بحدة/ولد يازايد
زايد/سمي يمه
مبروكة/من الليلة شيخ بني سمّار زايد ولد مبروكة
زايد اتسعت عيونه بصدمة/بس يمه
مبروكة قاطعته/مابها بس لمّ بني سمّار ذالحين سمعت
،
،
مبروكة برجفة قلبها وغصة توسطت حلقها ليه الشيخة بكل مرة تضرها بدل ماتكون شي يسعدها ويسعد عيالها/صدقت ماكذبت المنطوق منطوق منصور ياولده
ام سطام بلعت ريقها بخوف من مبروكة
سطام/المخطي ياخذ جزاه مابها محسوبية كان ودك الصلح ياجدة مثلك مثل بني سمّار تعرض بالمجلس على عيون القوم
مبروكة بذهول/تبي سحاب تطلب العفو بوسط المجلس!!
سطام بابتسامة/حتى سحاب يمشي عليها مايمشي على قومها دام الشيخة بيدي الظلم مايمر من تحتها على خير
............................................................
.
ظاهر يسوق السيارة بصمت وسط شروده الواضح كثير
نور الملاحظة لانقلاب نفسيته الشاسع بعد الرسالة اللي وصلته حتى وقت طلب يرجعون الديرة ماناقشته ووافقت على طلبه بهدوء التفتت تناظره/ظاهر
ظاهر مارد وسط تفكيره وشلون يتصرف بهالمصيبة يدري بهالوداد ماهي سهلة اي كلمة تفلت منه بدون حساب بتجيب اخرها ولا يهمها
نور مدت يدها ليده وضمتها/ظاهر
ظاهر التفت للحظة ثم ناظر الطريق بطيف ابتسامة/هلا
نور/ودك بصينية يحبها قلبك عشى الليلة ونطلع على شبة نار بعد ماتخلص شغلك
ظاهر/مدري اخاف شغلي يبطي وتروح لذة الصينية
نور/مو مشكلة حتى لو بالبيت وايه اكيد ضاري معنا
ظاهر/وش رايك الليلة تباتين عند اهلك
نور قطبت جبينها وسحبت يدها/عادي ارفض العشا ماتستاهل الطردة ذي!!
ظاهر مد يده ليدها وضمها/افا ماعاش من يطردك!!
نور بزعل/اجل؟!!
ظاهر/بـيّـن يقول يقين بتبات عند اهلها قلت اعلمك تستانسين/بابتسامة/مادريت ماتقوين فراقي هالكثر
نور/صدق يـقـيـن بتروح؟!
ظاهر شد على يدها/وجبت الصينية مافيها كلام
نور برجى/تكفى ظاهر بس الليلة تكفى
ظاهر هز راسه بلا/ابدا
نور/وعد الصينية والشبة بكرة تكفى تكفى ظاهر
ظاهر/ماعاش من يرد تكفى منك ماعاش
نور رفعت نفسها وقبلت خده/حبيبي تسلم لي
ظاهر اضفت هالحركة سعادة لقلبه لكن همه غطى نشوتها واحجمها
نور ميلت راسها واسندته على كفوفهم المتلاصقة تهمهم براحة
ظاهر وقف عند بيت طاهر بعد ماوصل نور تنهد بضيق ونزل من السيارة ناظره بابتسامة
بـيّـن قباله بمسافة بابتسامة/الضو الاخضر صدق؟
ظاهر باستعباط/وشو؟
بـيّـن/البعير البعير؟
،
،
~~قبل ٨سنوات~~
..قبل المغرب بلحظات..
بـيّـن(٢٠سنة)بثوبه الكحلي متلثم بغترته وسير شنطته الظهر على كتفه الايمن يجر خطواته بهدوء وقف خلف مجلس الديرة نزل شنطته فتحها وخرج جيك مليان بالبنزين وبدا يرش الجدران والمكان حوله انحنى شبه جالس وخرج الولاعة ميل فمه بابتسامة والتفت يناظر الشمس ينتظرها تغرب وبنفسه/اسرعي غيبي الليلة دوري اضوي ديرتهم/اختفت اخر خيوط الشمس وحل مكانه الليل المظلم ابتسم من سمع اصواتهم تعج داخل المجلس معلنة اجتماعهم الليلي كالعادة ابتسم وفتح الولاعة واشتعلت نارها كتم صرخت وجعه وضم يده لصدره/
ظاهر(٢٣سنة)ركل الولاعة مع يد بـيّـن بنفس اللحظة وبوسط انفاسه السريعة همس/يالبعير
بـيّـن ناظره بحقد ومد يديه عالارض يتحسس حوله يدور عالولاعة
ظاهر عض شفته بقهر ثم يده ليد بـيّـن يسحبه
بـيّـن سحب يده بكل قوته منه
ظاهر احتدت ملامحه مد يده لياقة ثوبه الخلفية وسحبه
بـيّـن تحرك معه ودف يده عنه صرخ/كبني عنك!!
ظاهر اتسعت عيونه من رفعه لصوته وهالشي بيورطهم اكيد بالمشاكل رفع يده وضربه كف لاول مرة من وفاة ابوهم عمره مارفعها بوجه بـيّـن حتى لو تمادى معه بالكلام
بـيّـن ناظره بذهول من فعله 
ظاهر مد يده ليد بـيّـن وسحبه معه يجري
بـيّـن جرى وراه بهدوء وعدم تصديق وبمنتصف طريقهم سحب يده بقوة وبصراخ/تضربني انا،انا ياظاهر!!
ظاهر بحدة/ايه اضربك لاصار تداري الخطا بخطا انا افتح عيونك واصحيك يابـيّـن
بـيّـن بقهر/مااخطيت هم المخطين وشبعوا خطا على حسابي والله مااسكت طال سكوتي وطالت اياديهم عليّ
ظاهر بحدة/ماهو بغايب عن عيني مير لاأحرقتهم وش فرقت عنهم الا انت اخس كان راحوا بها خلق منهم
بـيّـن/خلهم عساهم بحريقة
ظاهر دفه
بـيّـن تراجع بخطواته لورا بوسط نظرات حقده
ظاهر/لا ماانت بمثلهم انت مظلوم وهم الظالمين وشلون تساوي نفسك بهم اوعى واصحى بعمرك يابـيّـن
بـيّـن بانفعاله/ماعاد بي عقل احرقوني انقطع قلبي من سواياهم وجدي يشوف وساكت
ظاهر/خلك بعير صحيح ترقبهم واعرف فعولهم واحفظهم ثم لاغفلوا ابرك عليهم البركة الموجعة
بـيّـن بصراخ وسط غبنته/متى متى
ظاهر مد يده سحبه يحتضنه عسى يهدا قلبه/لاعطيتك الضو الاخضر يالبعير ابرك وقتها
،
،
ظاهر بابتسامة/بكيفك ذالحين شيخهم منّا ابرك بركتك ولا عليك
بـيّـن جرى له وضمه/لاتلومني بعدين
ظاهر بابتسامة/اهم شي تفك روحك من جدي واللوم مامن ملامة وانا اخوك
بـيّـن تركه وجرى بحماس
ظاهر/وين؟
بـيّـن/اشوف من اللي ابرك عليه اول
ظاهر ضحك بخفة/الله يستر عليك بس/تنهد بضيق من رجع تفكيره لنفس الموضوع/
.
............................................................
     بـعـد  شـهـر
............................................................
<<بيت مضاوي>>
غيمة واقفة قباله بالمبخرة قباله تمرر المبخرة بملامح جامدة
غيمة الصغيرة محتضنة رجل ابوها بيمينها ورجل غيمة بيسارها رافعة راسها تناظرهم/وانا متى متى؟
رازي مد يده فوق يدها وضمها هي والمبخرة وسحبها له غيمة تحركت من سحبته بوسع عيونها ومن بين اسنانها/وش اتفاقنا؟!!
رازي رفع شماغه يتبخر/اتفاقك باطل ارجعي واقري الفتاوى
غيمة ناظرته بحدة
رازي ناظر نظراتها همس/ويل قلبي من الرصاص المتلاحق تكفين تراك من مبطي صايبتني في مقتل
غيمة سحبت يدها بقوة وطاحت الفحمة من المبخرة اتسعت عيونها وانحنت بجسمها بخوف على غيمة الصغيرة وسحبتها تبعدها عن الفحمة اللي استقرت جنبها ونست المبخرة اللي بيدها وطاح باقي الفحم
رازي مد يده ومسك الجمرة للحظات ورماها بعيد عنهم
غيمة الصغيرة انتبهت لابوها واعتلى صوت بكاها/بابا
غيمة اعتدلت وناظرت ملامح وجهه المتغيرة بعدم فهم
رازي انحنى وشال بنته/ياعيون بابا مافيني شي
غيمة ناظرت المبخرة الفاضية واتسعت عيونها وناظرته وسط نبضات قلبها السريعة بخوف
رازي يمسح على راس غيمة الصغيرة/ياعيني ليش البكى بابا قوي
غيمة مدت يدها ليساره وسحبتها بخوف تناظر باطنها
رازي ناظرها يكبح ابتسامته/مافيني شي
غيمة تركت يساره الطيبة وسحبت غيمة من حضنه وانحنت تنزلها عالارض وعينها بعين غيمة/بس اشوف بابا غيمتي تمام؟
غيمة الصغيرة هزت راسها بايه وسط دموعها
غيمة اعتدلت بوقفتها ناظرته ومدت يدها له
رازي ينسف شماغه يتحاشى نظراتها/مافيني شي عدت سلامات
غيمة ميلت فمها ومدت يدها ملاصقة لصدره باصرار
رازي نزل يمينه بيمينها بهدوء
غيمة مدت يسارها ليمينه واحتضنت يمينه بين كفوفها غرقت عيونها دموع بلعت غصتها وهمست/انتظر بأجيب لك الكريم لاتمشي/مشت/
رازي مشى وراها مد يديه محاوطها واحتضنها من الخلف سند راسه على كتفها/غيمة لمتى الجفا وانا ادري قلبك يتمنى يمطرني ووده بعد؟
غيمة بلعت ريقها/صعبة صعبة وبالحيل يارازي
رازي/مابه صعب واحنا على سنة الله ورسوله هذاني انتظر ياغيمة ارفقي يكفي عناد
غيمة/مانسيت نظرات بـيّـن لذالحين يارازي مانسيت الوجع اللي بعيونه
رازي/تداويه الايام ويداويه من يشيل اسمه ولّا؟
غيمة ابتسمت من تحويله للموضوع/رازي
رازي دفن وجهه بكتفها وتكلم بسرعة/ياغيمة لو تجفين تراني راضي اتبعك وين ماتروحين مااتركك الى ماترضين
مضاوي وقفت قبالهم/يالله صباح خير
غيمة فكت يديه عنها باحراج
غيمة الصغيرة احتضنت رجل ابوها بابتسامة تناظر جدتها
مضاوي/ماني معلمتكم خذوا لكم بيت بلحالكم وفكوني
غيمة اسرعت بخطواتها للمطبخ
غيمة الصغيرة/كيف ننكبك جدة
رازي ضحك
مضاوي/اي والله نكبوني وانا جدتك
رازي دخل يديه بجيوبه وبابتسامته/جدة تعودي على هالشوفات وتطلبي الله مامن فكّة
مضاوي احمر وجهها/عوذا ماتستحي انت!!
رازي ضيق عيونه/جدة وش طرا لك؟اشتقتي للذي مضى؟/انفجر يضحك/
مضاوي جرت خطواتها باتجاهها ورفعت عكازها/ياسويد الوجه شين المنطوق انا اعلمك ياللي ماتستحي
غيمة وقفت قبالهم تناظرهم باستغراب وبيدها الكريم
رازي جرى ووقف ورا غيمة
غيمة التفتت تناظره باستغراب
رازي بضحكة/جدة ابو سعود يدور له عروس وتراه نشيط وماعنده مرة
مضاوي امتلت غيظ/اعقب تعال والله ان تجي تعال
رازي سحب الكريم من يدين غيمة وقبّل خدها
غيمة اتسعت عيونها من فعله تحت عيون جدته
رازي انحنى وقبّل غيمة الصغيرة على خدها جرى/فمان الله ياغيوم سماي
مضاوي وقفت بوسط انفاسها/اهب من ولد مابه حيا
رازي رجع طريقه من وراها وقبل راسها
مضاوي فزت بخوف/بسم الله
رازي جرى/مع السلامة جدة
مضاوي بفجعتها/الله لايبارك بعدوك من ولد اي والله
.
............................................................
<<بيت سطام>>
سطام واقف قبال مراية التسريحة يناظر انعكاسها مر على زواجهم اسبوع ولازالت بعيدة عنه يحس ببعدها اللفظي قبل الجسدي تتجنبه بكل مافيها ماينكر تأدي واجبتها كاملة يحس بنفور غريب من ناحيتها عجز يفهمه ويستوعبه كل مافيه من حماس وحب هبط لادنى مستوياته من ثاني يوم معها وكأنها آلة تؤدي واجباتها فقط
سلام واقفة قبال الدولاب بفستان باللون الاخضر رافعة شعرها كعكعة وبطوق ناعم ثبتت غرتها بمكياج يومي هادي ترتب الملابس بدون تناظره/جهزت لك سناكات خفيفة بالشنطة اللي قدامك لاتنساها خذها معك
سطام نزل نظره للشنطة الصغيرة اللي قباله ثم التفت كله واستند على التسريحة يناظرها
سلام حست بنظراته والتفتت تناظره باستغراب/محتاج شي؟
سطام/انتي محتاجة شي بما اني رايح للمحافظة
سلام/لا مشكور
سطام/طيب تحبين الورد؟
سلام/لا
سطام/الذهب؟
سلام/لا
سطام بوسع عيونه من صدودها المستمر/ورق العنب؟
سلام/مااطيق ريحته اصلا الله يكرم النعمة
سطام اعتدل بوقفته وسط تنهيدته/طيب احد قالك ان الاخضر حلو عليك؟
سلام احتفظت بملامحها الجامدة رغم خجلها الاي فضحها باحمرار وجناتها/ايه جدتي
سطام سحب شنطتها اللي مجهزتها له وجر خطواته تجاهها
سلام بلعت ريقها بتوتر وخوف واضح بعيونها جدا
سطام وقف قبالها/الاصفر هو الفارق عليك عن كل بنات جيلك
سلام رمشت ووضح خجلها على ملامحها هالمرة
سطام ابتسم من ماظر خجلها وانحنى بجسمه شي بسيط
سلام غمضت عيونها وسط رجفتها
سطام مافاتته ابدا رجفتها ولا ملامح خوفها قبّل جبينها واعتدل بوقفته يناظرها
سلام فتحت عين بعد ترددها ثم فتحت عيونها بعد ماناظرت نظرات الغريبة عليها
سطام بملامح خيبة مرتسمة على وجهه من نفورها منه رفع الشنطة بابتسامة/سلمت يمناك فمان الله/خرج/
سلام عبست بوجهها باستغراب من ملامحه وبنفسه/علامه اليوم لايكون تعبان
سطام خرج من الغرفة بضيق وبنفسه/البنت مغصوبة عليك ياسطام مابها شك مغصوبة
ام سطام/سطام
سطام التفت وتبددت ملامح ضيقته وبجدية/سمي
ام سطام مدت له كيس التمر/هاك لاتنساه
سطام اخذه منها/مشكور
ام سطام انتبهت للشنطة بيده وميلت فمها بانزعاج
سطام/تبون شي ناقصكم شي؟
ام سطام/لا عساك سالم مامن حاجة
سطام مشى/فمان الله
ام سطام مشت للمطبخ بخطوات كلها غيظ
ريوف متكتفة تناظره بنظرات حادة وقهر ماشالت عينها عنه حتى خرج
سلام واقفة على باب غرفتهم تناظر ريوف باستغراب
ريوف فكت تكتيفتها والتقت نظراتها بنظرات سلام وبحدة/خير
سلام تنهدت/سلامتك/مشت باتجاه للمطبخ/
ريوف مشت بخطوات سريعة للغرفة وضربت الباب بكل قوتها
سلام التفتت تناظرها وبنفسها/اعوذ بالله لو مو اخته قلت ناوية تذبحه/هزت راسها وكملت طريقها/
............................................................
<<بيت ظافر>>
رؤيا دخلت للبيت تجري وتركت الباب وراها مفتوح
ظافر دخل قفل الباب وراه بصراخه/والله لو تهربين لاخر الارض مايمنعني عنك مخلوق/اتجه للمطبخ/
رؤيا دخلت وقفلت الباب وناظرت امها
ام ظافر/وش صار بالمحكمة
رؤيا ارتمت بحضن امها بعيون تضم دمعها/حلفوني يمه اليمين الغموس
ام ظافر شهقت/ياضيق الدنيا بنا الليلة قلتي الصدق قلتيه يارؤيا؟
رؤيا انهمر دموعها هزت راسه بايه/خفت من الله يمه خفت
ام ظافر/مايضيع عند الله مايضيع يابنتي
//ناظروا الباب//
ظافر يفتح كيلون الباب بالسكروب وبجنونه/والله اليوم اخر ايام عمرك تشهدي
رؤيا امتلت رعب ناظرت امها/يمه
ام ظافر ضمتها بكل مافيها/انا قبلك
ظافر فتح الكيلون وبدا يضرب الباب بكل حيله وبكل ضربة يدب الرعب ويتزايد بقلب رؤيا وامها وانفتح الباب اخيرا جرى لامه وسحب رؤيا من بين يدين امه
ام ظافر ماسكة رؤيا بكل قوتها
رؤيا ضامة امها بكل مافيها/يمه
ام ظافر صرخت/اتركها ياالخسيس ياللي ماتخاف ربك الله لايوفقك لادنيا ولا اخرة
ظافر ضرب امه صرخ/انتي انطمي مالك شغل/سحب رؤيا بكل قوته/
رؤيا تركت امها ماتحملت امها تنضرب
ام ظافر تحاول بعجزها تدافع عن بنتها لكن بدون فايدة
ظافر سحبها من شعرها وخرج من الغرفة ورماها بكل قوته عالارض وبدا يركلها بدون رحمة وبقهره منها/انا تكذبيني!!ليتك اكتفيتي  بكذبتك تكذبيني انا وبلاغي انا يارؤيا انا
رؤيا تأن بألم من ضرباته صرخت/وعدني
ظافر وقف ركله وناظرها بوسط انفاسه/باقي فيك حيل تكذبين
رؤيا بصوتها الراجف من وجعها/وعدني يتزوجني كان شهدت ضدك
ظافر قطب جبينه
رؤيا صرخت بدموعها/محارب وعدني بالزواج ياظافر وعدني
#شقّ_الغَمام