شـقّ الـغَـمـام

..(٢٥)..

..(٢٥)..
استغفر الله العظيم اتوب اليه
لاحول ولاقوة الا بالله
تفاعل لطفا❤️❤️
-
<<بـيـت الـشـيـخ>>
عزيز داخل للبيت يهمهم مبسوط وقف باستغراب من ناظرها جالسة بالصالة لهالوقت وقف عندها/السلام عليكم/انحنى مقبل لراسها/
مبروكة مدت يمينها ماسكته من اعلى ثوبه شدته لها بملامحها المحتدة/اعقب يالخسيس
عزيز المنحني شبه راكع بوضع غير مريح ناظرها بابتسامة/جت تشكيني
مبروكة عبست بوجهها من حست بصوته الوناسة/محارمك يامال السخط اهلك اعقب من ولد
عزيز/مابعد صارت محارمي
مبروكة دفته عنها/وشو!!
عزيز اعتدل بوقفته/لازم اكسر راسها حتى تذكر من هم بني سمّار
مبروكة/انهبلت ترسل شاهر!!شاهر ماغيره
عزيز بلمز/مير انتي تخبرين العلم كله ياجدة
مبروكة احتدت نظرتها/العلم كله من تحت راسك ماسدك بليتنا بهالشاهر الى من كبر راسه وصار يحفر يمّنا مابغينا نسد حلقه عنّا
عزيز بفضوله المكبوح من سنين/وش اللي سد حلقه ياجدة؟
مبروكة/فلوس
عزيز ناظرها بتكذيب/مير ياجدة المؤسسات ماغطت رواتب الديرة وشلون فوقهن شاهر!!
مبروكة/ذالحين علمني وش سويت ببنات منصور
عزيز حك اذنه/بنت منصور والثانية بنت عياش ولا نسيتي ياجدة
مبروكة بتشديد/عزيز!!
عزيز/ماسويت الا كل خير
مبروكة/وشاهر وينه من الخير ياعزيز
عزيز ضم كفوفها بين كفوفه/ياجدة هماك تبيني شيخ علامك تطامرين وراي وتنشدين
مبروكة سحبت كفوفها من كفوفه بتهديد/الا البنات لاتضرهن ياعزيز سمعت
عزيز بحدة/من تبرت من بني سمّار مايحق لها الكرامة
مبروكة/هاذي شغلتي مالك بهن كبّهن عنك سمعت
عزيز ناظرها بغيظه/انا الشيخ محد يردني عن الاي ابيه
مبروكة بحدة/وانا سحاب ظليلة الشيخ ياعزيز
عزيز عض شفته بقهر وقف/السحاب بدون شيخ وديرة يظل ارض جرباء ياجدة/مشى بخطوات سريعة بغضب/
مبروكة دخلت يدها بجيبها من اهتز جوالها خرجته وفتحته
سهم/سحاب شاهر عيّا عن توصيل البضاعة يبي ست اضعاف سعره هالمرة
مبروكة اتسعت عيونها/وشو!!
سهم بغبنة منه/مدري علامه شايش شاشوا به جن الارض والبحور كلها
مبروكة/سهم
سهم/سمي
مبروكة/شف لنا صرفة
سهم/بالبضاعة
مبروكة/لا
سهم احتدت نظرته
مبروكة/تصبح على خير/قفلت جوالها بضيقة/
سهم ميل فمه بعدم رضا من كلامها تنهد يجر خطواته بين هالزرع الكثيف وسط هالوادي المظلم متجه لسيارته وسط افكاره بهالموضوع
............................................................
.
<<بيت سلام وسلمان>>
سلام بوجهه مرتسم عليه الضيق من صداعها المتواصل هاليومين زادت ضيقتها وهي عارفة لصاحبة هالضربات المتتالية عالباب فتحته وسط كلامها/غصنة ارحميني فوق صداعي انتي
غصنة دخلت بخطواتها السريعة وبوجه واضح عليه الربكة والفزع/البسي عباتك بسرعة
سلام بهدوئها المعتاد/خير وش فيه
غصنة دفعتها من اكتافها لداخل البيت بخفة/امشي البسي بسرعة جدتي قومت الدنيا محد يقدر عليها غيرك امشي
سلام اتسعت عيونها اسرعت بخطواتها لغرفتها/علامها جدتي ضعيفة ماتسوي شي حدّها كلام
غصنة مشت لداخل البيت بتأنيب ضمير/طال لساني شوي وقبعت بين يقين وجدتي ورمت يمين وتعرفين جدتي
سلام مرت من عندها وهي لابسة عبايتها وطرحتها وتربط نقابها متجهة لهم/يعني تدرين جدتي مع بـيّـن نار تظلمينهم الاثنين ليه الله بهديك بس
غصنة وراها/مو وقت نصايحك سلام تكفين
سلام وقفت بمنتصف الحوش باستغراب والتفتت لها/وينهم
غصنة مشت قدامها/برا البيت كله ياسلام
//برا باب البيت الرئيسي//
حمدة جالسة فوق كرسي الصلاة مستندة بيدها على عكازها  بملامحها المحتدة صادة بوجهها عن طاهر
طاهر الواقف على مسافة منها مستند على عكازه يناظرها بصمت
غالية قبلت راسها/يمه ادخلي مايصلح هالكلام
حمدة ابعدتها عنها بدفعها وبحدة/اعقبي مابقى غير البزران يعلموني الصح من الخطأ!!كان ودك تعلمين احد علمي روحك وانتي طاشّة بزرانك عسى الله يرد يم عقلك
غالية زفرت بضيق وسط صمتها
حامد برجى/ياأميمتي تكفين ادخلي طالبك
حمدة ناظرته بغيظ/هذا بدال انك تفزع معي وتاخذ لي بيت!!
منيرة بهدوءها/عمة امرحي الليلة بخير وابشري باللي يرضيك لاصبحنا
حمدة ناظرتها/ايه يامنيرة وانتي وش عليك ماضرك شي ماهو انتي اللي طالتك الكلمة وسط الجماعة!!
منيرة/ياعمة ماهي بزينة تطلعين بهالليل من بيتك!!
حمدة/ماهو ببيتي وهو دخلوه ناسٍ غصبًا عليّ
سلام تقدمت لها ضمتها/جدة
حمدة اخذت نفس/سلام
سلام/ياعيون سلام
حمدة/هالنوبة خليك بعيدة
سلام/مااقدر ياجدة تخبريني لازم اصبح وامسي عليك كيف تكبيني وراك!!
حمدة/ماعليه إتعودين كلها كم يوم وتروحين يم رجلك
سلام عبست بوجهها بزعل وضمتها/ماعلي منهم ياجدة عليك منك
حمدة رفعت يدها عن عكازها ملامسه بها ليدين سلام المحاوطتها/ياسلام كبي جدتك تاخذ حقها لاتوجعين قلبي بك
سلام تركت جدتها احترام لرغبتها
طاهر الصامت من لحظة شوفته لعياله متجمعين حول امهم نطق اخيرا/حمدة
حمدة صدت بوجهها بدون رد
طاهر/افا تسفهيني قدام عيالنا
حمدة ناظرته بغيظ/هماك ياطاهر تسفهني من مبطي وساكتة وذالحين زعلت!!
طاهر اتسعت عيونه/افا اعقب كان سفهت حبيّبتي نوبة!!
حمدة/اجل اعلمك ترا عاقبٍ من كثرها!!
طاهر تنهد/سمي ياحمدة امري طاهر
حمدة/ماني براضية من الاول ياطاهر وهاه كملت الليلة ينقال لي سـفيـه!!تالية عمري  ينقال لي سـفيـه ياكبرها كبراه ياطاهر وشلون ترضاها بحقي وشلون!!
طاهر/لا والله ماارضاها يعقب ويخسى ماالسفيه الا من يغلط على عين طاهر
حمدة بحدة من زعلها/وين يعقب ويخسى وانت قلطتهم في بيتي بدون رضاي وعطيتهم الخيط والمخيط غصب تكبر روسهم وتنتفخ علي
طاهر مشى من قبالها بخطوات سريعة
غصنة الواقفة عالباب تراجعت بخطواتها لورا
طاهر مر من جنبها لداخل البيت
حمدة كبحت ابتسامتها برضا
منيرة اسرعت بخطواتها وراه/يبه تعوذ من ابليس اسمع السالفة اول وبتعذر الخطا من الاثنين
طاهر بدون يناظرها/روحي لبيتك يامنيرة
منيرة وقفت تناظره بضيقة/يايبه
طاهر التفت لها قاطعها بحدة/كل شي يهون الا مهانة الكبار يتعودونها/وقف عند الباب رافع عكازه ضارب به عالباب بقوة/
بـيّـن الغارق بنومته عالكنبة بتعب فزّ من الصوت بفزع وجلس يمسح وجهه/بسم الله الرحمن الرحيم
يقين داخل الغرفة اذنها على جوالها برجى/تكفى سطام
سطام بغبنة/وليه داقة وتعلميني هاه!!انتي سويتيها وخلصتي
يقين/والله اني في بيتي طيبة وبخير سامحني هالمرة تكفى ياسطام/قطبت جبينها من صوت الباب/
سطام/بكرة اتفاهم معك نامي ذالحين بس نامي/قفل بوجهها بدون انتظار لجوابها/
يقين ناظرت جوالها بملامح زعل/كل من يعصب علي وش سويت!!/ميلت فمها من وصلها صوته/
طاهر ضرب عالباب رفع صوته/ولد يابـيّـن ولد
بـيّـن قطب جبينه من صوت جده وقف جار خطواته للباب
يقين خرجت من غرفة النوم/بـيّـن
بـيّـن وقف التفت لها بملامح كاسيها النوم وسط تقطيبة جبينه
يقين تكتفت/صحصح معي بالله ترا السالفة كبيرة حبتين
بـيّـن صحصح فعلا من سمع كلامها يدري ماقالت كبيرة الا وهي كبيرة دخله التوتر للحظة ناظرها/وشو
يقين شتت نظرها بالمكان/لعلي زليت بالكلام واخطيت على جدتك
بـيّـن زفر براحة توقع الاسوأ/الى وين وصلت هالزلة
يقين ناظرته همست/سـفـيـه
بـيّـن ناظرها بذهول/هاه!!
طاهر ضرب عالباب بكل قوته/ولد اطلع انت واهلك اطلع
يقين احتدت نظرتها من سمعت كلام طاهر ناظرته/انا
بـيّـن بغيظ يكتمه/البسي عباتك اعجلي علينا
يـقـيـن/بس
بـيّـن رفع صوته مقاطعها/قلت اعجلي!!
يقين جرت خطواتها بسرعة للغرفة
بـيّـن رجع طريقه للكنبة سحب شماغه نسفها ببعثرة هلى راسه ووقف عند الباب ينتظرها وسط ضربات جده المتتالية عالباب
يـقـيـن خرجت لابسة عبايتها تجر خطواتها ببطء
بـيّـن مشى لها بخطوات سريعة مد يمينه ليسارها ساحبها وراه وبحدة/مشينا
يقين جرت خطواتها بغيظ وراه
بـيّـن ترك يدها وفتح الباب وخرج
يقين خرجت وراه وظلت ورا ظهره
طاهر ثبت عكازه عالارض مستند عليه يناظرهم بحدة/ولد يابـيّـن ابعد عني
بـيّـن ثبت مكانه رجع يمينه لورا ومسك يسارها يتأكد من تغطيتها بجسمه
يقين احتضنت كفه بكفها متخبية وراه
بـيّـن/ياجد اترك علوم الحريم للحريم
طاهر/كل من بهالبيت عيالي وتحت ذراي اقومهم لاأرعيت الخطا وانا محد يردني عن عيالي سمعت
يقين رجف قلبها من كلمته مارجف خوف ابد لكن رجف كون طاهر اعتبرها من عياله رغم انها من بني سمّار وماهو أي سمّار نسل سحاب من تسببت لهالعايلة بالكثير والكثير من المصايب خرجت من ورا بـيّـن وكفها ملازمة لكفه
بـيّـن التفت لها بوسع عيونه
يـقـيـن /سم ياجد
طاهر/الصغير لاأخطأ بحق الكبير وش يسوي 
يقين/ياجد هي من بدت
طاهر رفع صوته/يقين
بـيّـن احتدت نظرته لجده ورجعها وراه
طاهر ارتفع حاجبه من فعل بـيّـن
بـيّـن/هاه ياجد ناوي ترفع عصاك عليها!!
طاهر بحدة/وشو
بـيّـن/تراني مااخذتها من بيت اهلها حتى تنرفع بوجهها يد او تنمد عليها عصا!!
طاهر اتسعت عيونه
بـيّـن/علوم الحريم بين الحريم ياجد/مشى يسحبها وراه بخطواته السريعة/
طاهر احتدت نظرته
بـيّـن وقف قبال جدته مبعد عمه اللي قدامه عن وجهه بيساره بخفه
حامد مشى مبتعد من لمح يقين
بـيّـن قدم يقين اللي كفها بكفه لقدام
يقين تقدمت لعندها بقهر
حمدة رفعت نظرها وبحدة/خير جاية يمي تكملين الباقي
يقين/العذر والسموحة ياجدة
حمدة ارتفعت حواحبها
يقين تقدمت لها وانحنت حتى تقبلها
حمدة دفتها بعيد
يقين تراجعت بخطواتها لورا
حمدة بحدة/تعقبين مابقى الا هي تسلمين علي!!
يقين شدت على قبضتها 
حمدة بغيظها/ماترد هالحبحبة رداك ولاترفع مقامي يابنت سمّار
يقين توسطت عبرتها حلقها من اجتاحها احساس الاهانة لاقصاه
حمدة/مير الحب يطلع على بذره
بـيّـن سحب يقين وراه/ياجدة هذا العذر وانتي المعروف عنك خيرك سابق لذكرك
حمدة/صحيح خيري سبوق مير للي يستاهل ماهو لاهل الردى
يقين نزلت راسها تخفي طيف دموعها الفاضحة لها كيف هي واقفة بصمت حتى اللحظة ماتدري كل اللي تعرفه انها تاركة له المجال بالدفاع عنها وهذا واجب عليه بهاللحظة
بـيّـن/جدة بعض الهروج موكول خيرها ماله داعي نلوك بها من جديد
حمدة ناظرته بغيظ/ايه هرجي منوكل خيره تشحطتك بنت زينة وقضت هذا انت تتبعها وتذل عليها من الكلمة
بـيّـن احتدت نظرته
حمدة/ايه امها قوت اعمامك وابوك وشلون ماتقواك انت يالهيّن اللين!!
يـقـيـن عضت شفتها بقهر
بـيّـن بابتسامة/يازين منطوقك ياجدة صحيح عينك ترا الخافي سبوق تخبرين الامور قبلنا كلنا
حمدة احتدت نظرتها بشك
بـيّـن/اي بالله صدقتي قوتني
يقين رفعت نظرها له بذهول
بـيّـن/قوت بزين فعولها ومنطوقها حشمتني وعزت قدري مارمت علي بيوم كلمة تكدر خاطري
حمدة اتسعت عيونها/وشو!!
بـيّـن/من عرفتها وانا مسفهل وزينة ايامي
حمدة/خلف الله عليك هذا اول دمار زينة واكيد انه اول دمارك معوض خير/زفرت/يوك عليك مامن خير ورا بني سمّار وحريمهم
يقين غرقت عيونها دموع
بـيّـن تنهد/ذالحين وش اللي يطيب خاطرك ويرضيه عنا ياجدة
حمدة/تذلفون عن هالبيت مالكم محل به
بـيّـن/مير حنّا نزلنا ضيوف وهذا حنّا مروحين يم بيتنا
حمدة عبست بوجهها من كلامه
بـيّـن/اكرمكم الله يابني طاهر /مشى وكفه بكف يقين يسحبها معه/اكرمكم الله 
طاهر الواقف ملتزم الصمت يراقب الوضع بدون تدخل بنفسه/اهب مااكذبك علوم حريم وفز قلبك لوتينه/تنحنح/يالله ادخلوا داخل يالله
منيرة المراقبة كعادتها هالمرة مانزل دمعها ابد الا ارتاح خاطرها وبرد قلبها من ناظرت بـيّـن وكلامه هالمرة رحل لكن ماهو بمثل اللي قبلها رحل ومعه سند يستند عليه راح وهي متطمنة بوجود احد معه يخاف عليه ويهتم فيه تنهدت بابتسامة ناظرت غصنة/امشي يابنت
غصنة ناظرت جدتها بهدوء وسط دموعها اللي تكبحها من فترة تقدمت لجدتها
حمدة نتظرتها وبحدة/علامك انتي بعد
غصنة سكتت للحظات وبصوت اختنق من عبرتها/ولاشي/جرت خطواتها السريعة ورا امها/
طاهر وقف عند حمدة بعد ابتعاد الكل/هاه ياام خلف برد قليبك
حمدة/وين يبرد وهي سرت بالغنايم
طاهر/لااله الا الله ياحمدة
حمدة/محمد رسول الله علامك
طاهر/البنية تعذرت وركبتي راسك غلطتي عليها وسكتت وان دل على شي فهو من طيب اصلها درت بخطاها وعذرت خطاك
حمدة بحدة/طاهر من هي المخطيك ذالحين هاه
طاهر ناظرها للحظات بتفكير وسط صمته/حمدة تراها كبيرة وكبيرة بالحيل
حمدة بشوفة نفس/الكبير يدنى لي!!
طاهر/ماتليتهم من البيت الا عشانك لاتكبيني اتحسر على هالسواة/مشى/ادخلي بيتك واخزي ابليس/دخل للبيت/
بـيّـن مسرع بخطواته للسيارة
يقين تجر خطواتها وراه رفعت راسها تناظره بدموع ملت محاجرها كيف هي تخلت عن بني سمّار وليه تحسّ بهاللحظة تخلّى عن بني طاهر كيف استانست بضم طاهر لها تحت جناحه بعد مفارق جدتها بنفس الليلة وكيف انكسرت هالوناسة من كلام حمدة بنفس الوقت أوجعها قلبها من هالشعور منبوذة من كل اتجاه ناظرته وصححت لنفسها صاروا اثنين منبوذين من كل اتجاه ضاقت عليها الارض بهاللحظة تمنت ماغلطت بالكلام وورطته معها عالاقل هو محروم ليه ينقطع منهم كليا بسببها
بـيّـن ترك كفها من كفه
يقين اتسعت عيونها من حست بانفلات كفها وشدت على كفه بخوف
بـيّـن ناظرها باستغراب/اركبي السيارة
يقين ناظرت السيارة تركت كفه
بـيّـن ركب السيارة والتفت لها بعد ماركبت ناظرها للحظات  صد عنها شغل السيارة وحرك بعد صمت خيم على جوهم لفترة قطب جبينه من سمع صوت شهقاتها والتفت لها
يـقـيـن تكبح شهقاتها وانفلتت منها غصب انفجرت تبكي بصوت من تاكدت بوصول صوت شهقاتها له ومعرفته ببكاها
بـيّـن ناظرها بفزع وسط صمته
يقين صادة عنه ببكاها وبرجى/لاتقول يمي شي كبني الليلة تكفى/كملت بكاها/
بـيّـن مد يده للراديو رافع صوت القران لاعلى شي مكمل طريقه بصمت
.
............................................................
     يـوم جـديـد
............................................................
<<بيت بـيّـن>>
بـيّـن صحى من نومه التفت يناظرها
يقين معطيته قفاها متغطية كلها بهدوء
بـيّـن قرب منها وميل راسه يتاكد من نومها تنهد براحة من ناظرها نايمة خرج من البيت بعد ماارسل ليقين رسالة بيسرح بالابل اليوم واحتمال كبير يتاخر قطب جبينه من ناظر زريبة الابل(خاصة باهل الديرك ومسؤول عنها)خالية اسرع بخطواته يلف بيته بتوتر رافع صوته/طرق/صفّر/طرق ولد وينك/وقف بذهول وانخطفت ملامحه من ناظر طرق يتدلى بحبل متصلة نهايته بالشجرة جر خطواته بخوف وقف عنده يناظره بتكذيب رجف قلبه من تأكد هذا هو طرق احتدت نظرته من ناظر وسم بني سمّار وجنبه وسم الشيخ برسالة واضحة له لف عنه يجري بغبنته ركب سيارته وحرك بسرعة جنونية/
............................................................
<<مـجـلـس الـديـرة>>
عزيز بابتسامة اعتلت وجهه/ياهلا ومرحبا ياحي الله ضيف بني طاهر
عسّاف بابتسامة احراج/لكن انا جاي لشيخ الديرة ماجيت افرق بين عيال الديرة
عزيز/ابشر وسم هلا بك امرني يا
عسّاف/عسّاف الـ
عزيز/حياك الله بين اهلك وربعك مير تخير هالاهل والربع زين
عسّاف تجاهل تحذيره/انا راعي حلال اشيل وانزل ودريت البارح من اهل الديرة ان هالديار محذورة وعلى علم الشيخ جيتك الحين وحلالي ينتظرني برا ودي انزل حلالي ونرتاح بهالشتاء عندكم
عزيز بابتسامة/حياك الله الارض للجميع ماحكرنا احد ولا منعناها ابد مير عندنا راعي اجرب تسبب علينا وصرنا حذرين بالحيل
عسّاف بابتسامة/يعني اسرح بالغنم مافيه شي يمنعنا
عزيز/حياك الله ياعسّاف انت واهلك وحلالك كل ابوه
عسّاف/ياشيخ عزيز
عزيز ناظره/سم
عسّاف/انا ضيف نزيل بهالديرة حالي حال نفسي ماودي بالمشاكل
عزيز قطب جبينه 
عسّاف/كان اهل الديرة بينهم شي وجب اعرفه قولي لي ولاتتركني ضايع بينهم واتسبب على نفسي بدون علم
عزيز ميل فمه بتفكير
عسّاف/امشي بينكم على وجهي ماهي بحلوة بحقي ابد
عزيز تنهد/راعين الجمايل
عسّاف قطب وجهه
عزيز/كان رديت جميلهم فك عمرك عنهم حتى ترتاح بهالدنيا ماهو بس بهالديرة
عسّاف بوسع عيونه/صدق!!
عزيز/من شايبهم الى الفازع يمّك سوادٍ في سواد
عسّاف كبح ابتسامته وبنفسه/راعي سوابق هالشايب/نطق/اعوذ بالله حتى الشايب!!وجهه ينطق سماحة
عزيز بغبنة/الموت الاحمر هالشايب تسبب على روحه واهله بس ماعليه رب ضرة نافعة لولا فعلته ماصارت الشيخة بيد عيال بني سمّار
عسّاف قطب بوجهه بهالمعلومة الجديدة عليه
عزيز/هو صحيح طاهر وسمّار الاولين عيال عم مير حتى العمومة ماشفعت له
عسّاف/يعني الشيخة من قريب صارت لكم
عزيز/فوق الاربعين بخمس 
عسّاف/ماشاء الله ماشاء الله الله يديمها عليكم
عزيز/عشان كذا اعلمك تنبه وتفطن ماكل من ضحك بوجهك يودك!!
عسّاف مد يده بابتسامة/ياشيخ
عزيز مد يده باستغراب
عسّاف شد على يده بحرارة/كثر الله خيرك ياشيخ كثر الله خيرك
عزيز بمزاجه الرايق من ليلة البارح متجاهل مايكدره ومستمع بهالروقان/ياحيّه ياحي ضيفنا الله يحييه
عسّاف وقف
عزيز/وين ياضيف!!
عسّاف/عاد استأذن وراي العمال ينتظرون مع الحلال
عزيز/تقهوى يارجال
عسّاف/عساها دايمة والله مستعجل
عزيز تنهد/مير الله يستر عليك
عسّاف خرج من المجلس احتدت نظرته من ناظر بـيّـن
بـيّـن بوجهه المكتسي سواد بخطوات يضرب بها عالارض بغضب متجه يبي شخص واحد يبي يعلقه مكان طرق بهاللحظة
عسّاف وقف قباله/هيه
بـيّـن مر من جنبه متجاوزه
عساف مسكه من ياقة ثوبه الخلفية ساحبه لورا ومن بين اسنانه بغبنة منه/ياهيه
بـيّـن مسك يد عسّاف ثناها ورا ظهره دفه لقدام بكل قوته وبحدة/طسّ عن وجهي لاأحطك مكانه ذالحين
#شقّ_الغَمام