شـقّ الـغَـمـام

(٤)

..(٤)..
الجزء الثاني
لاحول ولاقوة الا بالله
-
الجد طاهر/عين العقل ياسحاب
//ظاهر ومحارب ونواف وسلمان التفتوا لجدهم بصدمة وماكان سطام وسهم وبارود اقل صدمة منه//
بـيّـن التفت لجده شدة على قبضته بقهر واختنق بعبرته اللي توسطت حلقه وبلع ريقه ينزلها بالقوة
سطام ملتزم الصمت بهدوء متخذ وضعية الجمهور يحضر هالمخطط الكبير قدامه بتركيز
سحاب قطبت جبينها بشك منه
سهم يناظره بشك وعدم راحة من موقفه
الجد طاهر/الواضح ان السالفة انحاست وهي بسيطة
بـيّـن اتسعت عيونه
الجد طاهر/بارود وسهم نيتهم زينة وبـيّـن فهمهم غلط
بـيّـن نزل راسه وضحك بخفة
ظاهر بصوت حاد/ياجد!!
الجد طاهر التفت يناظره بحدة
بارود امتلى غرور وشد ظهره رفع راسه بثقة
سحاب/صدقت يـاأبـو عيّاش صد
الجد طاهر قاطعها/مير اللي صار مايرضاه الله ولا خلقه
سهم زفر بابتسامة من صدق احساسه
بـيّـن رفع راسه لجده بوجهه المصدوم
الجد طاهر/ماهي سلوم العرب تجازون راعي الجميلة بهاللون!!
سحاب شدت على قبضتها بغيظ
الجد طاهر/ولا هي بأي جميلة هاذي بنت الشيخ حفيدة سحاب
سحاب اخذت نفس/حق وواجب ماهي من طبعنا نجازي المعروف بالشينة ابشر باللي يرضيك
الجد طاهر/العمل بمثله مثل ماتلّوه واركبوه الموتر غصب ودارو به على عين القرية تمشي مواتركم على عيونهم لبيته وتستمحونه
ظاهر زفر بضحكة براحة ملت صدره رضا
مُحارب اتسعت ابتسامته وده يطير من مكانه من الفرح
نواف ارتفع من جلسته ووقف على ركبه من فرحته باللي يسمعه
سلمان المبتسم اللي ماكانت فرحته اقل منهم ابد مسكه من يده وجلسه
بـيّـن يناظر جده مو مصدق اللي يقوله يحاول يستوعب كلامه بس ماقدر هو يصدق الكلام او يصدق جده اللي يعرفه زين خاف يفرح باللي يسمعه وتستقبله الخيبة فضّل انه مايفرح والتفت يناظر بارود وسهم بابتسامة
بارود تبددت كل ملامح الثقة واثارها اول ماسمع كلام طاهر وارتسمت ملامح الخيبة والتوتر بوضوح على وجهه
الجد طاهر/هاذي سمعة وهذا حقه واقل مايقال بهالسالفة هذا شوري اللي ماياصل شي من زين شورك ولى ياسحاب القرية؟
سحاب امتلت قهر فاهمته وعارفته هدوءه هالسنين ماكان عبث هدوءه كان انتظار للحظة المناسبة فقط ابتسمت مجبرة/عين العقل ياابو عياش وين اروح انا عن اهل الراي السديد مثلك وشرواك معروف بني طاهر من سنين اهل الحكمة والراي والكرم
الجد طاهر ضحك بخفة/هذاك من سنين الحين حنا تحت بيرقكم
سحاب/ودام جزاء العمل بمثله مااظن يرضيك نترك الحقوق وتمتلي الصدور بأمور حنّا بغنى عنها
بـيّـن يناظرها بتوتر يخفيه وتبفكير وش ناوية عليه
الجد طاهر بعدم اعجاب/ايه صدقتي صدقتي
سحاب/واجب نحل الامور كلها ونبرد الصدور كان ياخذ حقه ونقفل السالفة ليوم الدين
الجد طاهر/حق ياسحاب حق وواجب
سحاب/مثل ماكسرت يد سهم تكسر يد الفاعل
مُحارب اتسعت عيونه
بـيّـن ارتفع صوته/هذا هو ضرب طرق وربي جازاه على فعوله
سحاب/طرق تهجّم بارود واخذ جزاه وقضينا
بـيّـن شد على قبضته بغيظ
سحاب/وذالحين سهم ضربه محارب والحق يقال سهم ياخذ حقه بالطريقة اللي ترضيه
الجد طاهر/تم
//العيال التفتوا لجدهم بتوتر مابين مصدق ومكذب ومابين اكيد جدي بيحلها ماهو بتاركها//
الجد طاهر/اللي يرضي سهم يبشر به
سهم/تكسر يده مثل ماكسرني
محارب احتدت ملامحه
نواف تغير وجهه لخوف
سلمان همس/وش ذا الكلام!!صاحين!!
بـيّـن ناظر سهم مد يمينه/اكسرها
سهم ابتسم
مُحارب وقف/وش عليك انت انا اللي ضربته!!
بـيّـن وعينه بعين سهم/كسرها حميّة عني
الجد طاهر/أبشر باللي يرضيك من الريال للمليون ياسهم
سحاب/انا عندي راي هيّن وبيرضينا جميع هذا اذا رضى صاحب الامر
سهم/مابعد كلمتك كلمة ياسحاب
بـيّـن نزل يده يناظره
سحاب/يوم محارب كسر يد سهم حمية عن بـيّـن وجب على بـيّـن يفديه من حر ماله
بـيّـن احتدت نظرته
مُحارب اتسعت عيونه ورجف قلبه من سمع هالكلام
ظاهر وقف/وانا ولي أمر اخواني وأولى من جدي ومن بـيّـن نفسه كل ماتبي امر وابشر به ماتطلبه من بـيّـن تطالبني به
بارود بسخرية/ماقبلناها من الصاحي نقبلها من المجنون!!
ظاهر احتدت نظرته
بـيّـن شد على قبضته بقهر/تم
سهم ابتسم برضا
الجد طاهر اعتلت ملامح الغيظ وجهه لاول مرة من بداية الجلسة بهالمجلس
محارب صرخ بغبنة/إتمم على وش هاه على وش
ظاهر مسكه من يده يرجعه وراه
محارب بصراخه/انا اللي ضربت وانا اللي تكسر يدي بين ماله شغل ماله شغل
ظاهر دف محارب وعينه على نواف وسلمان ومن بين اسنانه/روحوا البيت
نواف وسلمان مسكوا محارب وسحبوه وهو يدفهم عنه وسط صراخه
بـيّـن لف ومشى
بارود/هيه على وين
بـيّـن وقف بدون يلتفت له/حلالي كله فدا لشعرة من اخوي كيف لو يده اعطيك عيوني لو ترضيك ولاتضره!!الحين جاي وانا عند كلمتي
ظاهر مشى خطوة
الجد طاهر مد يده ومسك يد ظاهر وشد عليه بصمت
ظاهر وقف والتفت يناظر جده وميز ملامح الغيظ المكبوت على وجه جده عض شفته ووقف يناظرهم
//بعد نص ساعة انتظار//
بـيّـن وقف بسيارته وبحوضها نعجاته الثلاث وناقته قبال المجلس ثم نزل ووقف وسط المجلس تفضل حياك على حقك
سهم ابتسم
سحاب من ورا الباب برضا وابتسامة ردت من اعتبارها لو هو الشي البسيط/ها ياسهم رضيت بالحق
سهم/وصل
سحاب/المهم رضيت؟
سهم مشى خارج من المجلس باتجاه السيارة وتفحص الحلال بعيونه هز راسه وهو مميل فمه بتفكير ثم رجع للمجلس
سحاب/بارود عود خويك؟
سهم نطق وهو يوقف قريب من الباب وعينه على بـيّـن/رضيت ياسحاب وكلن يسمع تذبح الحين على عيون الجميع وترمى للكلاب الفدا مايوكل
بـيّـن شد على يديه بغبنة
سحاب/رضيتوا وسلمتوا؟
سهم بابتسامة/رضيت
الجد طاهر/رضينا
سحاب/لازم نسمعها من بـيّـن رضيت يابـيّـن؟
بـيّـن/رضيت
بارود بوناسة/ولد يافالح شف شغلك لو ايديني طيبة عاونتك
فالح فز واقف ورفع طرف ثوبه ويثنيه حول وسطه/ابشر ياحميد عاوني
سهم مشى ووقف عندهم
بـيّـن اتجه لسيارته وفتح باب الحوض لهم
//بدوا يسحبون الحلال ويذبحونه تحت انظار الجميع//
بـيّـن يناظرهم وهم يذبحون حلاله بسرعة فظيعة اسرع من سرعته بجمع مبلغهم وتعبه فيه خانته مشاعره وزفر بصوت وصل للي حوله
ظاهر وقف جنب بـيّـن وحط يده من ورا رقبة بـيّـن وهمس/ابشر بالعوض وانا اخوك ابشر
بـيّـن مارد
بارود اول ماانتهى فالح من الذبح همس لسطام بابتسامة/حي الضيوف على عشاهم حيهم
سطام مارد
سهم/تفضلوا حياكم عالعشا تفضلوا/ناظر بـيّـن وظاهر والجد طاهر/حياكم تفضلوا
بـيّـن ركب سيارته ومشى بدون رد
الجد طاهر/تعشينا نظر وسمع ياسهم تعشينا مشينا ياظاهر/مشى/
...............
،،،،،الـمـسـتـشـفـى،،،،،،
يـقـيـن عينها على امها بعدم استيعاب للي قالته
ريوف بصدمة/يعني ماعاد تتكلم
ام سطام بعصبية/فالك ماقبلناه/ناظرت يـقـيـن/بعد شهر موعدك اهم شي ماتتعبين حبالك الصوتية الى ماترجع امورك زينة
يـقـيـن ناظرتها بهمس صعب سمعه/اكيد بعد شهر؟/لامست بيدها الشاش الملتف حول رقبتها بخفة من ألمها/
ام سطام/لاتتكلمين وش اقولك انا
يـقـيـن ناظرت امها بقلقها
ام سطام/لاتخافين وكلي امورك لله وبوديك لدكتور بالمدينة نتاكد من امورك لاتخافين/التفتت/ريو/سكتت وهي تناظر حولها مافيه احد غيرها هي ويقين/
.......................
<<عند عزيز>>
عزيز خارج من دورة المياه يمشي بخطوات بطيئة ويده على جرحه المنتصف ببطنه جلس عالسرير بشويش وسط انفاس يسحبها بقوة حتى يهدي ألمه رفع عينه الباب من سمع صوت الدق عليه/حياك تفضل
ريوف دخلت/السلام عليكم
عزيز بضيق وصد بوجهه/وعليكم السلام والرحمة
ريوف/جيت اشوف محتاج شي دام تركناك لحالك
عزيز بحدة/مااحتاج روحي لعمتي
ريوف انصدمت من نبرته وزحف صوتها/زين/لفت خارجة ووقفت/بس بغيت أعلمك إن يـقـيـن ماعاد تتكلم
عزيز انصعق من اللي سمعه وارتسم اثر الخبر على وجهه
ريوف فتحت الباب بتخرج
عزيز فز واقف ونسى جرحه/وشلون يعني؟
ريوف التفتت له انصدمت من وجهه المخطوف اوجعها قلبها تتمنى تلمح نصف هالاهتمام منه راضية بأقل القليل حتى لو هي نظرة فقط بلعت ريقها تكبح خنقة العبرة اللي اجتاحتها/كلام الدكتور ماعاد تتكلم/خرجت/
عزيز جلس عالسرير بصدمة مسك راسه بين يديه/عزتي لك يايقين وا عزتي لك
......................
،،مكان جمعتهم المعتاد غرفة صغيرة بمطبخ وحمام وحوش بانيته ام زايد لعزيز وشلته،،
سهم واقف قباله بعصبيته/وش كنت تسوي وين عقلك هاه وينه؟
بارود باحراج/وانا وش يدريني عن هالبلوى من مبطي علّم عزيز ان هالكيمرة ماهي بشغالة بس عشان يذّلون الحرامية ومايقربون الحلال
سهم/الله اكبر وتصدقه!!
بارود/عزيز وصاني كل يوم أمر اشوف شغالة وتكشف العرب مير انه صادق ماهي بشغالة
سهم بسخرية وغبنة/سبحان الله واشتغلت ذالحين!!بسالفتنا اشتغلت!!
بارود/اصلا من اول اروح على عماي مااعرف لها وعلمت عزيز قال معليك بس نخوفه لايشغلها
سهم صد وكتم غيظه لاينفجر فيه
بارود/خلاص عاد ياسهم لاتهاوشني حلتها سحاب
سهم التفت له/اوص يابارود اوص لاأعرف فيك
ديوان وقف على مسافة منهم/السلام عليكم
سهم التفت له وبانجليزي/finally!!
بارود ناظرهم بصمت
ديوان زفر/كنت مشغول
سهم ناظر ساعته/ياكثر شغلك كثراااه اللي منعك عن زيارة ام زايد وزيارة عزيز بعد
ديوان شد على قبضته وبالانجليزي/my job need
سهم قاطعه/خل عنك الحجج ورح ذالحين
ديوان/أمرحوا الخلق من أصبح أفلح/مشى/
سهم/ديوان ولد
ديوان مشى مارد
سهم عض شفته بقهر منه
بارود/ذا ديوان ماعرفته!!حتى هرجه زين ماعاده مثل أول!!
سهم دخل الغرفة/انا بأنام مرني الصبح حتى نروح لعزيز نطلعه
بارود تنهد/على خير/مشى/
........................
<<بيت الشيخ>>
،،غرفة الجدة مبروكة،،
الجدة مبروكة جلست عند شنطتها الحديد تتحسسها بيديها حتى وصلت لمفتاحها وفتحتها قطبت جبينها من سمعت صوت الباب/من؟نور؟
سطام واقف على باب الغرفة مادخل/أنا
الجدة مبروكة معطيته قفاها/هلا هلا ياوليدي
سطام ضحك بخفة وتكتف/اليوم وليدك وبكرة الله العالم
الجدة مبروكة قطبت جبينها وتركت الشنطة والتفتت بجسمها كله له/وش عونك؟!!
سطام/كيف هانت عليك ياجدة كيف قوى قلبك يرمي هالكلام وعلى من على يقين ا
الجدة مبروكة قاطعته/وتظنه هين!!
سطام صرخ يكبح نفسه/والله لولا انك جدتي
الجدة مبروكة قاطعته/وش بتسوي بتقص لساني؟ولى تذبحني!!هذا انت وسطهم ولااطريت حرف!!
سطام عض على شفته بقهر
الجدة مبروكة/لولا اني ماقلت هاللون كان دروا باللي حصل لعزيز وحنّا يالله فكينا اعمارنا من التحقيق باقي نجيب الهرج ثم احمد ربك تنازل عزيز ولا صارت به علوم
سطام ضحك/ايه كله لعين عزيز ورحم الله يقين وحالها!!
الجدة مبروكة/رحمناها هذا انا ماذبحتها على سواتها بعزيز
سطام صرخ بقهر/جدة السالفة وراها
الجدة مبروكة بحدة قاطعته/السالفة واللي وراها مالك بها ومن بكرة تداوم بالمحلات مااشوفك الا تالي الليل لاجيت تدور فراشك/عطته ظهرها ومدت يديها تتحسس الاغراض/
سطام ناظر قفاها بغبنة من سنين وهالقفا بوجهه ماينسمع بها راي ولاتناخذ له كلمة بهالبيت وان عصى جابته على راسه بكل برود وبدون رحمة
الجدة مبروكة/رح ارقد وراك شغل بكرة وشف سكرك لاتمرض علينا ثم تلومني زينة
سطام ضحك بقهر/اخر من يلومك عليّ أمي/مشى دخل غرفته وسحب شنطته وفتحها وبدا يرمي ملابسه بدون ترتيب داخلها/
نور دخلت لغرفته قطبت جبينها تناظره/وش فيك؟
سطام بغضب/انا تعبت من هالناس خلاص تعبت
نور قفلت الباب وراها/وهاللي تسويه حل!!
سطام صرخ/مافكرت بيقين وهي أحب وحدة لها حتى اكثر من ريوف لو طحنا بيديها مابترحمنا
نور/وتتخلى عن اختك بهالبساطة
سطام/وانت بيدي شي اسويه!!
نور/اقلها وقوفك جنبها ذا يسوى كل شي بعينها والباقي عاذرتك
سطام/السالفة بين عزيز حبيب قلبها واخوياه
نور/هذا انت قلتها وتورط فيها الراعي المسكين
سطام شد على قبضته بقهر من نفسه/مالي وجه اقابله لمته يانور ظلمته وهو راعي معروف
نور مدت يدها واحتضنت كفه/تأكد راعي المعروف بيسامحك لانه يدري غرروا بك
سطام سحب يده وجلس على طرف سريره الحديد بتعب ونزل راسه بين يديه تنهد/تعبت ماعاد ادري من الصادق من الكذاب
نور تنهدت/انا باجهز لك اكلك وارتاح وبعدها يصير خير ان شاء الله
سطام سكت مارد
نور انحنت شبه جالسة عند رجوله وهمست/معقولة مالاحظت شي طول هالسنين ياسطام
سطام قطب جبينه
نور همست/هاذي فرصة وانا اختك افتح عيونك زين هالمرة لاتفوتك شعرة
......................
<<بيت الشعر>>
مُحارب متمدد على فراشه ومتغطي كله ونواف وسلمان عن يمينه ويساره
نواف جالس على فراشه جنبه/محارب
محارب بضيق/ابعدوا عني الليلة
سلمان جالس على فراشه/ماعليك ياابو خلف بكرة توظف وتعوضه
مُحارب بنفسه/ياحسرة وين الوظيفة وانا ناقع بهالديرة تحت رضاها/اخذ نفس/ابعدوا عني صدق تراها
نواف قاطعه وهو يتغطى/كلنا نبي نرقد
سلمان/اي والله تلفت اعصابي الليلة احس اني كبرت عشر سنين
مُحارب غرقت عيونه دموع بحسرة/تف عليك يامحارب تف ماتورّث غير المصايب تف/دفن وجهه بمخدته يكتم عبراته/
...................
<<عند بـيّـن>>
بـيّـن منحني شبه جالس قبال الزريبة ثاني يمينه وملامس بها راسه مكتسيه الحزن يناظر زريبته فاضية حلمه اللي تعب حتى يتحقق حلمه اللي كان طاير فيه من ايام تبخّر بغمضة عين ومابقى قدامه غير الزريبة اللي يلعب بها الهوا حتاحت صدره حرقة من هالمنظر اللي انقلب من قمة الفرح لقاه الكآبة ميل فمه بضيق والتفت لطرق اللي عن يمينه يناظره/ايه ياطرق صفينا اثنين مثل مابدينا الظاهر انه ماهو مكتوبٍ لي اكون صاحب حلال/ضحك بقهر/شكله صدق مكتوبٍ علي راعي حلال لأبد الآبدين
الجد طاهر وقف وراه/ابشر بالعوض
بـيّـن ارتفع حاجبه من وصله صوته وقف والتفت له
الجد طاهر/ولا تكدّر خاطرك 
بـيّـن/الحين صار خاطري يهمك!!
الجد طاهر/ماهو بس الخاطر انت كلك مني كيف ماتهمني!!
بـيّـن ضحك وفرد يديه/اسمعوا اسمعوا ياناس بـيّـن يهم طاهر!!وش صاير بالدنيا اليوم!!
الجد طاهر زفر/يابـيّـن
بـيّـن احتدت ملامحه وقاطعه بلوم/وين هالاهتمام يومك تصفقني قدام اللي يسوى واللي مايسوى هاه؟وين هالاهتمام يومك تهيني بكل مـجـلـس وتركتهم يتفرعنون على راسي بأمرك ولا لي كلمة بينهم
الجد طاهر استمع لانفجاره بهدوء
بـيّـن رفع يمينه ويضربها بيساره بغبنة وسط ارتجاف صوته/لولا ان هاليمين اخذت حقها بذاك اليوم وخلّت اللي مااعتبر يعتبر كان لذالحين انت تداري خاطري صحيح ياجد؟
الجد طاهر/مردك تعرف كل ماسويته لاجل خاطرك كل شي وله وقته
بـيّـن /عاد تدري ياجد دايم إخواني يلوموني ليه اسكت لجدتي بلاهم مادروا جدتي اللي ماتناديني غير ياليهودي ماتنطقها الا ببيتها ماترضى كلمة على هاليهودي وهي قلبها ممتلي عليه بالله علمني أي واحد يستحق الملامة أنت ولّى جدتي؟
الجد طاهر تنهد وهو يشوف حوارهم ماله اي نتيجة/ياوليدي
بـيّـن قاطعه وهو يكتم حرقة قلبه/تكفى لاعاد تداري خاطري وهالحلال ماعليه حسوفة دامه فدا لراس اخوي
الجد طاهر/لاترقد الليلة لحالك تعال يم البيت وارقد عند امك وبين اخوانك
بـيّـن/رقدت لحالي بأيام أشين من هاليوم ماضرني الرقاد لحالي طول هالسنين/مشى باتجاه بيته/
الجد طاهر تنهد/الله يصلحك الله يصلحك/مشى/
...................
<<يـوم جـديـد>>
...................
داخل القرية بسيارته الجيب اخر موديل وهو يضرب بطرف اصبعه الايمن على الدريكسون فاتح الشباك متكي بيده اليسرى على طرف الباب ويضرب باصبعه على الباب بلبس مريح تيشيرت أبيض وبنطلون رياضي زيتي ونظارته الشمسية السودا على عيونه ويهمهم وسط صوت الراديو على اذاعة القران اللي غطى هدوء السيارة هدا سرعته وقصر الصوت وهو مضطر يمر من وسط البيوت حتى يتجاوزها كلها ثم يتجه للجهة المقابلة للمكان اللي قاصده وقف وقطب جبينه من لمح نور السيارة اللي وراه تأشر
عمر وقف جنبه بسيارته وناظره/سلام عليكم
زفر بملل من ناظره/وعليكم السلام والرحمة هلا ياعمر
عمر بابتسامة/الحمدلله عالسلامة ويامرحبا يامرحبا وشلونك وش علومك من مبطي ماشفناك
بابتسامة مجاملة/وهذاني قدامك
عمر مرر نظره عالسيارة/تبارك الرحمن الله يبارك لك ويكفيك شر خلقه اردى ماركبت
ابتسم هالمرة من قلبه لانه يدري بطيبة قلب عمر رغم نقله للاخبار/جزاك الله خير عقبالك ان شاء الله من غير شر
عمر ضحك/الله يسمع منك مير ماظنتي
ابتسم بصمت
عمر/يالله عاد وراي اشغال
بنفس ابتسامته/بحفظ الله
عمر/ايه صحيح متى ناوي تمر خويك؟
قطب جبينه/ليه عسى ماخلاف؟
عمر/مير اني مريت من يمّه وكلبه ينابح وذليّت اجيه عقب البارح ويثور عليّ
حرك بسرعة جنونية بدون استفسار وش حصل البارح وبدون اهتمام لسرعته وسط البيوت
...........
<<بيت الجد طاهر>>
الجدة حمدة جالسة على فرشتها زغرطت بأعلى صوتها من طاح نظرها عليها
مضاوي وقفت وشاركتها الزغاريد/ياعساه مبروك ياحمدة ياعساه
الجدة حمدة وقفت واستقبلتها بالاحضان
مضاوي احتضنتها/يوه ياحمدة يوه نلتي وصبرتي نلتي
حمدة/هذا اول الخير باقي ماشفتي شي
غصنة وقفت عندهم وانحنت تنزل صينية القهوة/على وش مستانسة ياجدة تراهم اخذوا
حمدة قاطعتها/اسكتي عني لازم تنكدين يعني
سلام نزلت المبخرة/سمي ياجدة
مضاوي/ياغصين المهم يبرد القلب لو هو شوي
غصنة/إلا ضيقوا صدرونا عساهم بالضيقة مااستانسنا باللي صار ابد
حمدة تتبخر/طسي عن عيني طسي يالله
غصنة وقفت بتكشيرة
حمدة ناظرت مضاوي/والله لالبس الثوب الاحمر/غمزت لها/تخبرينه
مضاوي ضحكت/للحين عندك؟!!
حمدة/والله لاأشوي كبدها هالمبروكة وانا بنت ابوي
مضاوي/تراها ماتشوف
سلام كتمت ضحكتها
حمدة بوناسة/الجنية معها
غصنة تكتفت/ياجدة خابرته اليهودي علامك طايرة اكثر من اليهودي نفسه
حمدة سحبت عكازها من جنبها
غصنة تراجعت لورا مبتعدة 
حمدة/والله ماليهودي ذالحين غيرك انقلعي عن وجهي انقلعي!!
.................................
وقف بسيارته ورا بيت بـيّـن ونزل من سيارته يجري وترك الباب وراه مفتوح صرخ من وصل مسامعه صوت نباح طرق/طرق وينك ياطرق
طرق وقف عند جدار البيت قباله من عرف الصوت ونبح ثم رجع طريقه
جرى يلحقه وكل تفكيره فيه وقف واتسعت عيونه من شافه مرتمي عالارض
بـيّـن متمدد عالارض برا بيته بدون اي حركة
جلس عنده بخوف ورفعه لحضنه وضرب بيده على خد بـيّـن بخفة/ولد بـيّـن لاتروعني تكفى ولد يابـيّـن/قطب جبينه من حس بحرارته رفعه على ظهره وشاله جرى فيه لسيارته فتح باب الراكب جلسه بشويش وربط له الحزام قفل الباب وجلس مكانه ربط حزامه شغل سيارته والتفت وراه من سمع صوت بكاها ناظرها وقفل بـابـه/لاتبكين يابابا لاتبكين/حرك بسرعة باتجاه المستشفى/
...........................
#شقّ_الغَمام