شـقّ الـغَـمـام

النهاية

النهاية
سبحان الله عدد ماخلق وملء ماخلق..
لاحول ولاقوة الا بالله عدد كل شي وملء كل شي..
الحمدلله عدد مافي السماوات والارض وملء مافي السماوات والارض..
-
............................................................
         بـعـد ٤ شـهـور
............................................................
      <<صباح يوم جديد>>
............................................................
.
عساف نزل من المنصة وعينه تدور عليه ماقدر ياخذ راحته معه وقت التكريم وده يبغله انه مارحمه من بعد دورته ورشح اسمه وارسله مباشرة للخارج بدون حتى اخذ رايه واجبره يدرس هالتخصص لشهور وهو يدري بصعوبته وصعوبة اللغة عليه الا لانه يبي يضمه تحت ادارته وشروط ادارته صعبة بالحيل وتجاوزها اخيرا مثل ماتوقع عقد حواجبه بملل وهو يدور عليه
محمد وقف عنده/لاتتعب مشى اول اخذ شهادته
عساف اتسعت عيونه/وشو!!
محمد بتردد/وقال/سكت يناظر عساف/
عساف عقد حواجبه/وش قايل الثور
محمد/يقول علّم عساف اللي ذوقني اياه والله ان يذوقه اول مااشوفه والله لاتوطى ببطنه واخذ حقي كامل
عساف اتسعت عيونه وبعصبية/انهبل ذا ولا عشانه صار خويي يتمادى علي!!
محمد بصوت منخفض/مقيولة البس يحب خناقه
عساف بحدة/الظاهر انه لعب بعقلك وصرت تنسى من اللي واقف قدامه وتكلمه
محمد استعد بتحية عسكرية/سيدي
عساف جر خطواته بغيظ
محمد مشى وراه
عساف بغبنة/محمد شف اخر موزعين مطلوبين وارم جمع المعلومات عليه اول مايداوم
محمد/بس توه جديد مابعد اخذ عالشغل
عساف وقف يناظره بحدة
محمد/حاضر سيدي
عساف ابتسم بشر/هين تدوام عندي واعلمك من هو المقدم عساف هين
............................................................
<<السجن>>
،،غرفة الزيارة،،
منصور جالس جنبها محتضن كفها بين يديه
سطام جالس قبالها وبتردد/جدة مابه محامي قبل القضية
مبروكة منزلة راسها بملامح مرتسم عليها الهم كبرت فوق كبر سنها بهالشهور سنين زادت معها تجاعيدها بوضوح
سطام بانتظار لردها تنهد من ماوصله ردها/يقولون هالقضية خسرانة لاتدفع وتخسر اقبل وارضى حتى اللي قبل ياجدة يقول مافيه امل
مبروكة صدت عن سطام وميلت راسها جهة منصور/وينه زايد؟
منصور سكتت
مبروكة التفت كلها لمنصور هلت دموعها/يامنصور علّم اخوك يجيني يسدني ماعمل بي لايحرمني شوفته يامنصور تكفى
منصور رق قلبه لامه احتضنها يكبح عبرته/عسى الله يهديه يمه ادعي الله يهديه ويحنن قلبه
مبروكة ببكى/يامنصور رضيت بحكم الله مير خوفي لاغبت يبكي ندم على سواته ماابي له وجع القلب يسده وجعه يامنصور يسده
.
............................................................
              الـعـصـر
............................................................
.
مضاوي جالسة ورا السايق تغني وعينها عالطريق/قم وارفع الصوت يامحيا..خل البعيدين يوحونه..واللي على صاحبي عيّا..تسعين جني يلطونه..
حمدة الجالسة جنبها بنرفزة من برودها/عساهم يلطونك معه اسكتي عنا/ناظرت السواقة بنرفزة/عسى الله يكفينا شرك اي والله انا سلمت بالروحة يالله طلبتك اعود بيتي سالمة يارب
سرور الجالسة قدام مكان الراكب بغيظ التفتت لها/بتسكتين والا انزلك في ذا الخلا
حمدة/تكفين نزلني مردني بالخلا قطعةٍ وحدة ولاشلل قطاعين في ذا السيارة
اعتدال تعلمت السواقة من اسبوع مثبتة يديها عالدريكسون ومقدمة نفسها لقدام بتركيز عالطريق الترابي/جدة حمدة لاتخافين معك سواقة يتمنونها الملوك ولا حصلت لهم
حمدة/تكفين روحي يمهم مانبي منهم عطية بس روحي عنا
سرور بغيظها/الله اكبر عليك ياحمدة ذا جزانا مطلعينكم قيلة
حمدة/واشيب حالي لو دريت القيلة هاللون ماطلعت معكم
غيمة الصغيرة الجالسة ع مسند اليد بين سرور و اعتدال غطت اذانيها بيديها بانزعاج وصرخت/خلاااااص خلااااص
اعتدال/ماالومك على ذا الصراخ  انا خايفة ادخل في طلحة على ذا الهوشة اللي عند راسي
مضاوي تنهدت/عاد من اليوم مستانسات علامكم تاليها تنكدتوا 
سرور/وحمدة يملا عينها شي
حمدة/اي والله مليانة مير الروح مابعدها ياسرور
مضاوي طفشت منهم وتجاهلتهم غنت/يامشغل البال في نومي تخيلي..دايم نديم الشقى ماغبت عن باله
حمدة بقهر منها/بنت يااعتدال وقفي خلينا ننزلها ويجيها اللي مشغلها عساه ماعاد وقفي
غيمة الصغيرة التفتت لحمدة وبتهديد/جدة تنزلين جدة مضاوي تنزلون كلكم ونروح ونخليكم انا واعتدال
حمدة بوسع عيونها/بنت عيب!!
مضاوي ضحكت/بعدي بنيتي بعدي
حمدة/تضحكين بدل تهاوشيتها ومستانسة على وش هذا هي بتكبك معنا
مضاوي بابتسامة/يازين الخوي اللي مايكب خويه
حمدة كشت بيدها عليها/امحق خوي الله يعين قليبي بس/ناظرت اعتدال/بنت عديّلة تحرصي سمعتي تحرصي زين
............................................................
<<بيت مضاوي>>
غيمة ببروز بطنها الخفيف المعلن عن حملها(٤شهور)بوضوح واقفة قباله تقفل ازارير ثوبه بابتسامة
رازي يناظرها بابتسامة
غيمة/تحمل الوجع هالنوبة ماهو تهج وتكب علاجك
رازي بابتسامة/ابشري
غيمة ناظرته بتهديد/ترا باروح معك واربطك انا ونواف وخليهم يسوون العلاج لك غصب سمعت
رازي حك اذنه اليسرى باصبع يساره/ماسمعت
غيمة مدت يمينها لاذنه اليمنى وشدته
رازي/اه اه
غيمة/ماهو بكثر وجع يدك
رازي/غيمتي
غيمة تنهدت وتركته ثم انحنت مدت يده ليمينه ورفعتها
رازي صد بتجاهل لاصابع يمينه المنحني كل اصبع بمستوى مختلف
غيمة شدت على كفه/تراني احتري ضمة هالكف يارازي
رازي ناظرها من سمع كلامها
غيمة/ماودك يمينك تلاعب خدوده لا لفى؟
رازي نزل نظره على بطنها بصمت
غيمة لامست يمينه بطنها بابتسامة/بـيّـن شف ابوك يتغلى علينا
رازي سحب يمينه منها ولامس خدها بظهر يمينه/لا والله مااتغلى وكيف اتغلى على احب الخلق لقلبي
غيمة رفعت كفها وغيرت وضع كفه ولامست اطرافه على خدها واحتضنت يمينه بين خذها وكفها رفعت نظرها له/اشتقت لباطن هالكف يارازي
رازي ابتسم بشحوب ارتسم هالمرة على وجهه
غيمة/لايدخل قلبك اليأس توك بالبداية وحتى لو مافاد على قولة ذاك الاجرب
رازي ضحك بخفة/دكتور تراه
غيمة/يعقب بعيدة عن خشمه الا اجرب الدكتور مايقول هاللون
رازي ناظرها بابتسامة
غيمة/المهم حتى لو ماعودت مثل اول المهم عندي انك طيب وبخير/مدت يديها حاوطته وضمته لها/مااحب اشوفك كذا
رازي بادلها الحضن/كيف يعني
غيمة سكتت
رازي مد كف يساره ماسك معصم يمينه بقوة مثبتها ودار فيها
غيمة شهقت وشدت عليه/رازي رازي
رازي اخذ فيها لفة وحدة ونزلها بابتسامة/ لخاطر بـيّـن وقفت
غيمة بوجهها المخطوف/خوفي من سواياك بـيّـن يجي قبل وقته
رازي ضحك وقبل جبينها/حياه وحي عينه ياكثر الشوق والله ياكثره
............................................................
<<بيت عايض>>
عايض دخل للبيت بتعب
خلود جرت له من سمعت صوت الباب ووقفت جنبه مقبلة راسه/حياك الله يبه
عايض اخذ بحضنه مقبل جبينها مشى معها ولازال محتضنها/يسلمك ياعين ابوك/جلس بالصالة بتعب ونزل شماغه/
خلود جلست جنبه
غالية اتجهت لهم من سمعت اصواتهم وبيدها كاسة موية بابتسامة/حياك الله ياعايض/مدت له الموية/
عايض اخذ منها الموية/سلمتي سلمتي
غالية/ها بشر
عايض/لقيت شقة زوينة بس تقل صغيرة شوي
غالية/ماعليه صغيرة وتضفنا اهم شي عمتي بغرفة لحالها عن لجاجة البزارين
عايض/خليها ترضى بالاول
غالية/ماعليك بترضى ان شاء الله
خلود/يبه كيف الجامعة كبيرة بالحيل مثل الصور
غالية/وابوك وش دراه يدور بيت لاهي مادرا عن الجامعة وثم بالله عليك خل يقبلونك اول الله يستر علينا من ذا الطيرة اللي بنا
خلود/متاكدة يمه بيطلع اسم بالقبول متاكدة
غالية تنهدت/امين الله يجعلك من المقبولين بالسماء والارض وانا امك
عايض بابتسامة/مير من ذا الحين اعلمك مقبولة بنيتي وقاضين هماك تشوفين ادور لنا بيت
غالية/البيت هين العمل هالمصاريف
عايض/بسيطة بسيطة مابه خلاف ان شاء الله بسيطة
خلود غرقت عيونها دموع من كبر التضحية بعينها ابوها بينقل لمدينة جامعتها تارك وراه ديرته وكل ماتعود عليه لخاطرها اقدم عالخطوة ومستعد يشتغل اي شغلة مايهمه اهم شي يكحل عينه بشوفتها دكتورة وقفت على ركبها قبلت جبينه ثم ضمته بانهمار دموعها/الله يخليك لنا يبه 
عايض ابتسم/ويخليكم لي جميع مير هاه الدميعات ماابي اشوفهن الا يوم تخرجك والشهادة بيدك وانا ابوك
غالية تنهدت/الله يوسع لك في رزقك ولايضيع لنا تعب ياعايض
خلود تركت ابوها واحتضنت كفه بين يديها بابتسامة
عايض/وينه خويلد
غالية/طلع مع نواف وسلمان
عايض/من متى؟
خلود/طلع خالد من الصبح
عايض/الله من الدجة اي والله
غالية/كبهم مادجوا وجاروا على خلق الله بحالهم ماسووا شي غلط!!
عايض/خوفي يتعرض لهم احد
غالية/كبهم كيف يصيرون رجال خلهم ينضربون ويضربون
عايض ناظرها/غالية
غالية/مااشتد ظاهر و بـيّـن الا من كثر ضرب ابوي لهم كبهم عنك
............................................................
،،بصالون في المحافظة،،
وداد بمريلة باللون الاخضر وبيدها المكنسة تلف حول الموظفات والزباين تكنس الشعر المتساقط عالارض
موظفة تشتغل بشعر زبونة التفتت لها/روحي المستودع جيبي لي فرش وسبري
وداد ناظرتها بصمت
موظفة ثانية/وجيبي لون رقم٥:٢
وداد مشت بدون ترد
الموظفة الاولى ارتفع حاجبها/ماردت حتى
الموظفة الثانية/اتركيها اهم شي تسوي شغلها وكافة عنا شرها
وداد دخلت للمستودع اخذت كم علبة من السبري واتجهت لمكان الصبغات مدت يدها حتى تاخذ اللون المطلوب سحبته واختل توازن كراتين الصبغات وتسابقت للوقوع عالارض ناظرتها وانحنت شبه جالسة تجمعها دخلت يدها بجيب المريلة تخرج جوالها فتحته وتلقائيا فتحت الرسايل تقرأ الحكم الصادر بحقها وعينها تتجه مباشرة للرقم المكتوب(غرامة٨٠,٠٠٠ريال)احتقن وجهها باللون الاحمر من كبر الهم وثقله بصدرها رن جوالها فتحت الخط بصمت
نوار بعصبية/متى ترجعين بنتك بس تصيح عجزت عنها ماتسكت مرة
ام وداد تكلم نوار/ياشينة بزر بزر بيصيح اجب تبينه ساكت
وداد كبحت غصتها/توه الدوام باقي اربع ساعات
نوار/وبعدين يعني وش اسوي معها طيب
وداد/بحاول استأذن
نوار/لاتحاولين استاذني وخلصيني/قفلت/
وداد نزلت راسها بين رجولها المثنية وانفجرت تبكي بأسى على حالها
.
............................................................
.
محارب خارج من المستشفى يجر خطواته بخفة غريبة عليه فقدها من شهور مع الجبيرة الثقيلة المصاحبة له في كل تنقلاته وبدون عكاز يستند عليه تنهد براحة من استشعر نعمة المشي بهالطريقة وبينه وبين نفسه/الحمدلله يارب الحمدلله/عقد حواجبه باستغراب/كل ذا تجيب السيارة ابطت بالحيل/وقف من ناظر السيارة/
ولاء وقفت بالسيارة  قبال مدخل المستشفى نزلت من السيارة بين يديها باقة الورد واسرعت بخطواتها له
محارب اتسعت ابتسامته
ولاء وقفت قباله ومدت له الورد/الحمدلله عالسلامة حبيبي
محارب باتسامته/الله يسلمك
ولاء مدت يدها له محاوطة رقبته محتضنته
محارب بادلها الحضن للحظة ثم تركها بسرعة
ولاء ابتسمت من عاداته اللي مستحيل تتغير
محارب حاوط رقبتها بيمينه مستند عليها
ولاء رجعت يدها ورا ظهره تسنده ومشت معه/ترا خلاص تقدر تمشي ماعاد فيه ذاك الدلع
محارب/ليت الجبيرة ابطت
ولاء بزعل/بسم الله عليك بس/فتحت له الباب/تمتع باخر لحظات الدلع
محارب دخل للسيارة وجلس دخل يمينه وترك يساره بالخارج
ولاء ناظرته/دخل رجلك بسرعة ورانا سيارة
محارب/ساعديني توجعني
ولاء ناظرته بعبوس تحت نقابها
محارب/اخر لحظات الدلع؟
ولاء تنهدت وانحنت رافعة رجله ودخلتها
محارب قرب منها مقبل خدها من فوق النقاب
ولاء ناظرته بوسع عيونها ماتوقعت فعله
محارب/الله يخليك لي ولايحرمني منك
//اعتلى صوت بوري السيارة اللي وراهم بازعاج//
محارب بابتسامة/يالله يالله بسرعة الا كان تبيني ارجع المستشفى من جديد
............................................................
.
نواف حايس المكان حول شبتهم بحفره يدور صحن المندي اللي دفنه بملامح كلها تدل على ورطته
خالد واقف عنده/طيب علمني وين دفنته؟
نواف بورطته/اظن هنيا
سلمان واقف جنب خالد ناظره/يعني انا معلمك باخذ لي غطّة(غفوة)احرس نواف ماتخبر علومه
خالد ناظر سلمان/الواحد مايغط بدون مايدري
سلمان/ايه مايغط وخويه نواف
خالد تجاهل النقاش معه وناظر نواف/ماحطيت علامة طيب
نواف/الا حطيت بس نسيت ولعبت بالكورة
خالد/امسينا وانت مالقيته
سلمان مشى للسيارة خرج الصامولي والجبنة/والله اني دريت من زين الفطور اليوم اكيد بننبلش بشي/جلس جنب شبة النار/
خالد جلس جنبه/سو لي معك وانا بازين الشاهي
سلمان ناظر نواف/تعال بس تعال كبه عليك العوض تعال
نواف التفت لهم/ماعلي من المندي ابي الصحن حق جدتي حمدة والله ان نصير مندي بداله
سلمان فز تارك الاكل وراه/الله لايبارك بعدوك مالقيت الا صحن جدتي تدفنه وين دفنته يامال العقل يانواف
خالد يجهز الشاهي بلامبالاة/حنا مدفونين مدفونين من غير شر تعالوا ناكل احسن من إنا نندفن على جوع تعالوا بس
.
............................................................
<<بيت سطام>>
ريوف بالمطبخ خرجت المعجنات من الفرن ثم اتجهت للقدر اللي فوقه شالته وقلبته فوق الصحن اللي مجهزته وتناثرت حبات ورق العنب فوقه وتصاعد بخاره الساخن
سلام جالسة عالارض تغلف حبات الكوكيز اللي قبالها وترتبها بالبوكسات وثم ترتب البوكسات بكيس كبير/المندوب هالمرة غير لنا شهرين معه وواضح انه ولد حلال يترزق الله ماهو مثل اللي قبله
ريوف التفتت لها وبغبنة/ايه عرف مير انا تعبت معهم كل شوي واحد يسحب عمره صابني خوف عيّا يفك مني والطلبات كثيرة بالحيل ماغير اتفزز بنومي خايفة يسحب علينا
سلام/ماهو بساحب هذا هو راجع من المحافظة ضارب مشوار عشان كم بوكس مااشتكى ولا عيّا وبعدين ماشفنا مثله يجي مثل مانبي ولو طلبناه باي وقت جا ماشاء الله عليه نفسه سمحة
ريوف/تجهزي الليلة ترا ورانا كرف سلامي
سلام بابتسامة/ابشري بي تدرين اني معك
ريوف بحماس/عندنا طلب بوفيه بكرة ان شتء الله
سلام ناظرتها بوسع عيونها/صدق
ريوف باباتسامتها/بنطلع السخانات اخيرا/اختفت ابتسامتها/من اصبحت وانا اهوجس به اخاف يحترق الاكل او يعيي علينا المندوب
سلام/يابنت تفاولي خير ترا القدر موكل بالنطق
ريوف بتطير/بسم الله بسم الله علينا الله ييسـ/سكتت من ناظرتها/
ام سطام داخلة للمطبخ متجاهلتهم اتجهت للثلاجة فتحتها واخذت لها موية مشت خارجة ثم التفتت لهم ناظرت سلام/انتي قومي سنعي بيتك وكبي عنك هالاشغال اللي بلا سنع
سلام كملت شغلها بدون رد
ام سطام اتسعت عيونها وبعصبية/بعد تسفهيني!!
ريوف/يمه انتي تبيني هذاني قدامك سلام مالها شغل
ام سطام ناظرتها/الله يالدنيا ياريوف صدق ياوسع وجهك لولا وقفت سطام ماطلع لك حس
ريوف برجفة صوتها/يمه رزقتي مااكبها هي حيلتي وماصفى لي بهالدنيا
ام سطام/مير وين تلقين التوفيق وانتي ترادديني وتعانديني ياريوف/مشت/
سلام ناظرتها/ريوف
ريوف بوجهها الاحمر قفلت المكالمة اللي اعتلى صوت رنة جوالها باستقبالها انحنت لكيس البوكسات اخذته واخذت الكيكة اللي بطرف المطبخ بشويش/المندوب برا
سلام تنهدت وبنفسها/الله يهديك ياعمة الله يهديك
ريوف تلبس عبايتها تبلع غصتها تعبت مع امها اللي ماتقبلت حتى اللحظة اللي صار لها مع عزيز ولازالت تلومها عاللي صار وتتهمها بكونها السبب لبست نقابها وخرجت من البيت
ماجد واقف بسيارته جنب البيت خرج من السيارة من انفتح الباب مشى ووقف قبالها صاد
ريوف حطت الاغراض على شنطة السيارة برجفة صوت/انتبه عالكيكة واللوكشينات ارسلها لك واتس
ماجد بدون يلتفت لها/عسى ماخلاف استاذة ريوف
ريوف اعتادت مناداته لها بهالطريقة تجاهلت سؤاله/لاتتاخر وصلها بالموعد/دخلت للبيت نزلت عبايتها واتجهت للمطبخ دخلت/
سلام ناظرت وجهها المتغير
ريوف سحبت صحون ورق العنب تصفه
سلام بسخرية/استاذة ريوف كم صحن اجهز
ريوف عبست بوجهها/يع سلام تكفين
سلام ضحكت
ريوف/انا مدري وش يحس فيه عالاقل اللي قبله ارحم ينادوني اختي/تنهدت/اشتغلي بالله اشتغلي
ماجد ركب سيارته بعد مارتب البوكسات وتاكد من سلامتها من اي عقبة ممكن تواجهه بالطريق اعتلى رنين جواله ابتسم من ناظر اسمها/نعم
بيان بسخرية/استاذ ماجد اين انت/انفجرت تضحك/
ماجد عبس بوجهه وبغيظه/بيان
بيان/هاه يااستاذ بشر قلت لها ان ابوي بيذبحك ارسلك تشرف عالعمال ورقدت عندهم
ماجد/وش اسوي العمال اللي
بيان قاطعته/لاتعذرب على راسي ماتمشي علي تراني اعرفك وفر تصريفاتك لابوي
ماجد/كنت باقولها اني باترك التوصيل
بيان باستغراب/كنت؟!
ماجد/بس حسيت فيها شي
بيان/تكفى ياصاحب الاحساس كلم البنت تشوف غيرك حتى ترجع قبل يروح لك ابوي ويشرف عليك بالمستشفى
ماجد تنهد/والله يابيان
بيان قاطعته/كلم اخوها وفكنا
ماجد بلعثمة/من قال احبها من جاب سيزة الزواج اصلا
بيان بضحكة/خلك مندوب طول عمرك اجل/قفلت بوجهه وهي تضحك/الله يصلحك بس
............................................................
<<بيت طاهر>>
،،بيت الشعر،،
ديوان جالس قبالهم والدلة عنده/هاه ياجد متى نروح نسوي تحاليلنا 
طاهر يتقهوى بعدم اهتمام/مابعد وافقت البنية
ديوان اتسعت عيونه/وكلامنا ذاك الليلة
طاهر/كلام الليل يمحيه النهار
ديوان يناظره بصمت مذهول من اللي يسمعه
طاهر/قهو عمك قهوه
ديوان مد يده لزايد بملامحه المذهولة
زايد مد فنجاله
ضحك بخفة ثم ناظر طاهر/ياعم لاتقطع قلب خويي
طاهر ابتسم/مزوح مزوح يازايد
ديوان تنفس براحة
طاهر/بكرة ان شاء الله مرنا
ديوان/نروح سوا!!
طاهر/ايه بسيارة وحدة وشو له الخساير
ديوان مد يده بابتسامة/فنجالك ياجد
طاهر/بنيتي ماشافتك زين كود تشوفك وتهون
ديوان نشف دمه/هاه
زايد ضحك/علامك ارتعت ياولد
طاهر ابتسم باستمتاع لتعذيب ديوان
زايد ناظر طاهر/ياعم روف به روف
//زايد و طاهر ناظروا المار من قبال بيت الشعر يجري//
ديوان التفت وراه يناظر اللي يناظرونه وابتسم
طاهر ابتسم/ايه راحت علينا ولا التعزر كان بذا المتعدي اللي ماحشمنا وسلم
زايد بابتسامة/القلب ياعم
طاهر/زايد العروس عندي بس تراني احتريك
زايد سكت مارد
طاهر/وثم من قريب البنية وامها سوا مرة وحدة
ديوان يسمع بترقب
طاهر/الزين والله زواج بنيتي من وليد خويي
زايد ابتسم/ماعاد به وليد غزا الشيب راسي
طاهر/عاد اللي يسمعك يقول بزوجك اصغر ورع لعيالي
زايد سكت بتفكير
طاهر/ماني بغاصبك كان ودك علم ديوان يمرك ولاشفتك عرفت
.
منيرة خارجة من بيتها ناظرت الحوش الخالي التفتت له
ضاري فتح باب بيتهم بيخرج ناظر جدته وابتسم/سمي ياجدة بغيتي شي
منيرة/وين الناس مابه احد
ضاري خرج وبيده جواله/جدي ببيت الشعر وعنده عم زايد وديوان
منيرة ناظرته لابس ثوبه/بيمرك احد؟
نور خرجت من وراه/لا ياعمة بأمشي معه لبيت جدانه
ضاري بابتسامة/استاذنت ابوي مشتاق لدُنى
منيرة/نور انتي اجلسي مايصلح تمشين واجد توك
نور احتصنت ضاري من ورا ابتسمت/مااقدر اخليه يروح لحاله ياعمة بس اوصله واروح اسلم على امي وعمي مرة وحدة
منيرة تنهدت/الله يهديك ماتسمعين ابد
ضاري تقدم وقبل راسها/فمان الله جدة/مشى/
نور وراه قبلت راس عمتها/مع السلامة عمة/مشت/
منيرة/استودعتكم الله/مشت وراهم/نور انتبهي على نفسك
نور/ان شاء الله عمة
منيرة مشت وراهم وقفلت باب البيت الرئيسي والتفتت راجعة للبيت وطاحت عينها عليهم شهقت
غصنة الجالسة فوق الرويّع اللي ورا البيت وقبالها القهوة واغراضها
يقين جالسة جنبها متكية عالمسند تتقهوى ببروز بطنها الخفيف جدا وعينها على بيوت الديرة وبيت طاهر وراهم/ايه لو قعدنا هالقعدة قبل كم شهر وش كان صار
غصنة/ابد اهداف متحركة طال عمرك
يقين ابتسمت/ايه ذالحين محد يقول عينك براسك
غصنة ناظرتها بعقدة حواجبه/على اساس من اول تسمعينها
يقين غرقت عيونها دموع والتفتت لها/وش قصدك يعني ماني من بني طاهر
غصنة المتأزمة مع يقين الباكية بكل لحظة من حملت تكلمت بسرعة/الا انتي على راسهم واولهم تسبقينا بمجالسنا وترحبين بضيوفنا
يقين انفجرت تضحك/مادريت ان دموعي تخوف
غصنة ناظرتها بغيظ/ماعاد اعرف صدقك من كذبك والله
يقين تنهدت/حتى انا تعبت من نفسي
غصنة التفتت لورا تناظر البيت رافعة صوتها من وصلها صوت امها/نــعــم
يقين التفتت لورا تناظر عمتها اللي بوسط الحوش وضربت غصنة على كتفها بخفة/بنت قصري صوتك الرجّال بالمجلس
غصنة بعدم اهتمام/ويعني!!
يقين/سلامات غصنة
منيرة بوسع عيونها/وش مطلعكن فوق!!
غصنة رفعت صوتها/يقين تقول خاطرها تكيف عالرويع
يقين اتسعت عيونها والتفتت لها/متى قلته
غصنة/اوص امي مابتهاوشك مثل ماتهاوشني
منيرة/ووجع ياغصنة تطاوعينها
غصنة رافعة صوتها/يمه اخاف امنعها ويصير شي لورع بـيّـن
يقين تناظرها بيأس/الله يعينه المسكين بيقول وش هالميكرفون اللي اخذته وتورطت به
غصنة/اقول عاد يحمد ربه هالديوان انه لقى وحدة مثلي
منيرة بعصبية/مير اني تسببتي به يوم طاوعتيها وطلعتن يامال الصلاح اسمعي لاتنزل ذالحين خليها ترتاح شوي ثم انزلن سمعتي
غصنة/ابشري يمه ابشري/ناظرت يقين/شفتي عشانك ماقالت شي/ناظرت جوالها اللي ضوت شاشته وقفلت المكالمة ثم ضوت من جديد فتحت الخط/نعم
يقين فز قلبها وصلها صوته والتفتت تناظرها
بـيّـن بنرفزة/ليش ماتردين اول مادقيت
غصنة/نعم رديت ذالحين
بـيّـن/يقين عندك؟وينها عن جوالها
غصنة التفتت لها/جنبي تتقهوى
يقين سمعت كلامه ماتوقعت يتصل
بـيّـن باستغراب/وين؟
غصنة/فوق الرويع
بـيّـن/زين اهم شي انها بخير/استوعب كلامها/وشو فوق الرويع!!
غصنة/وحام مرتك وش دخلني!!
بـيّـن قفل بوجهها
غصنة ناظرت جوالها بملامح غيظ ثم ناظرت يقين/زوجك ذا الله يعينك عليه
يقين ابتسمت/لاتزعلين عليه عصب عشان مارديت
غصنة/الله يعينك وبس
يقين ناظرت السيارة الجاية من بعيد وباستغراب/بيجينا احد الليلة؟
غصنة/ماظنتي محد يجي اصلا
يقين عقدت حواجبها بشك سحبت جوال غصنة من يدها/دقيقة بس
غصنة ميلت فمها من حركتها
يقين فتحت عالكاميرا وسوت زوم وصورت ناظرت الصورة رمت الجوال بحضن غصنة ونزلت تجري مع طريق شيه سالك انتصف الرويع
غصنة اتسعت عيونها وقفت/يقين يامجنونة لايصير لك شي والله تذبحني امي
بـيّـن بلبسه العسكري بنطلونه الجيشي البيج وبسطار بنفس اللون وتيشيرت نص كم باللون الاسود وقف بسيارته قريب من بيت الشعر ونزل منها يجري تارك بابه مفتوح وتاركها شغالة مر متجاوز بيت الشعر بدون ينتبه للمتواجدين بمشاعر لهفة وشوق اجتاحت قلبه وحركت جسمه وحدّت من رؤيته وحتى انتباهه اصبح كل تفكيره محصور فيها وعينه عليها
يقين نزلت من الرويع بانفاسها السريعة ولامست الارض وجرت باتجاهه
بـيّـن اتسعت ابتسامته من ناظر زولها هالمرة بوضوح اسرع وبصوت عالي/يابنت شوي شوي
يقين امتلت عيونها دموع من سمعت(يابنت)كم اشتاقت لهالكلمة وكم اشتاقت لهالصوت كم اشتاقت لهالوجه هلّ دمعها بعدم قدرة على منعه فعلا غلبها الشوق واصبح مكانه خالي انهكتها كثر الافكار من صده لها وتفكيرها وش نهايتهم لا رجع وهالشي أثر عليها بوضوح كانت تبكي من فقده وخوفها بنفس الوقت بأي مكان وقدام اي أحد وتكفكف هالدموع وترمي عذرها عالحمل وهرموناته وقفت بمكانها من حست برجولها ثقلت ماتقدر تجري له اكثر تبددت الفرحة واحتوتها الضيقة من ذكرت صده قبل يسافر هلت دموعها بضيق وبخوف من صده لكن هالابتسامة وهالفرحة منعتها عن كل هالظنون خارت قوتها فعلا وكل قوة تبقت لها بهاللحظة ساعدتها على رفع يديها وفردتها قدامه طالبته يجي لعندها يهدي شوقها وخوفها المفضوح لعيونه
بـيّـن تجاوز بيت طاهر وسط انفاسه السريعة وصل لعندها وقف قدامها واستعد بالتحية العسكرية
يقين تقدمت له بخطوات بطيئة وسط دموعها
بـيّـن ارتمى بين ذيك اليدين اللي كانت ولازالت موطنه هاليدين اللي احتلته بأصعب لحظاته وكانت رفيقة دربه ضمها لصدره يهدي مشاعره المماثلة لمشاعرها بدون اي اختلاف ضمها لحضنه بفرح من قرأ رسالتها تبشره بحملهز من اول يوم دخل فيه للدورة العسكرية فقدها فعلا واسترجع كل ذكرياته بكل ليلة تمر عليه بشوق وحنين وحب رافعها عن الارض وشاد عليها بكل مافيه دافن وجهه بكتفها يروي فيض مشاعره ويهدي قلبه المتسارعة نبضاته حد الجنون
يقين المحاوطة رقبته بيديها ومبادلته الحضن بدموع منسابة بدون اي كلمة شدت عليه بين يديها بعدم تصديق لوجوده
بـيّـن تنهد تنهيدة عميقة من اعماق قلبه من حس بشدة يديها عليه/يـوه يـايـقـيـن يـوه
يقين برجفة صوتها/الخمس والاربعين يوم صارت اربع شهور يابـيّـن كيف قويت كيف
بـيّـن يمشي بها وهي بين يديه/ماهي باربع شهور الا دهر يايقين هذاني غديت شايب عقب فرقاك
يقين شدته اكثر
بـيّـن كح/يابنت منصور كان ماقضت علي العسكرية بتقضين علي ذالحين
يقين تركته تناظره بدموعها
بـيّـن ابتسم بحب ورفع نقابه بيساره ومد يمينه لوجهها يمسح دموعها/ويلي يقيني تهل دموعها والله انها سكاكين بوسط قلبي/مد يمينه ليمينها مقربها له اكثر وقبّل جبينها/ عساها ماتهل الا من فرح
يقين ابتسمت وسط دموعها بصمت
بـيّـن انحنى مثبت يمينه تحت ركبها ويساره ورا ظهرها وشالها
يقين مدت يديها ورا رقبته بابتسامة غرور
بـيّـن اعتدل بوقفته ناظر ابتسامتها المغرورة ضحك
يقين بابتسامة عريضة/هاه وش يضحكك
بـيّـن تنهد/والله اشتقت لهالابتسامة بالذات/قرب وجهه منها/
يقين نزلت نقابها على وجهها بتغلي
بين ميّل راسه يناظرها عن طرف بعبوس وجهه/دام ذي سواتك من اولها/رفعها حتى يثبتها صح/تمسكي زين اجل
يقين عقدت حواجبها بشك
بـيّـن جرى فيها
يقين شدت بيديها على رقبته بخوف/بـيّـن شوي شوي علي
بـيّـن ضحك متجاوز بيت طاهر/واللي تركض قبل شوي لا مابك خلاف ماشاء الله
يقين/عمتي،عمتي ماسلمت عليها يابـيّـن
غصنة فوق الرويع فاتحة جوالها تصور هاللحظات بابتسامة اتسعت على وجهها/اخس يابـيّـن ماانت بهين/وقفت التصوير من ناظرته يدخل البيت وقفت الفيديو وارسلته لبـيّـن عالخاص وارسلت له(كم تدفع؟)/
.
............................................................
<<السجن>>
ظافر بالزنزانة يضرب الجدران وكل ماتطيح عينه عليه وسط صراخه المعتاد واعتادوا عليه الحراس لدرجة اللامبالاة/مظلووووم فكوني انا مظلوووم كله من هالرؤيا وحبيبها محارب اتفقوا علي فكوووني
.
~~بمكان اخر من نفس النوع~~
سهم جالس بزنزانته بملامح يأس ارتسمت على وجهه وقف واتجه لباب الزنزانة/ياعسكري لو تكرمت
العسكري وقف عنده/خير
سهم/كيف تحطوني هينا تدري مين انا!!انا الاول بكل سنوات الدراسة حتى بالبعثة كيف تحطوني في ذا هاه
عسكري٢مار من عندهم معتاد على وضعه ناظر العسكري الجديد اشر بعيونه بمعنى روح وقف عنده
سهم ابتسم من عرفه/هاه بشر وش صار
عسكري٢/رفعنا اعتراض مثل ماطلب لكن ردوا الطلب
سهم صرخ/ليش
العسكري رفع يده وقفل اذنه بانزعاج
سهم يضرب الزنزانة بصراخ/اكيد تكيدون لي ليش ترودنه انا اخترعت نظام كامل متكامل لزراعة عشبة نادرة كيف ترضون لي ذا المكان طلعوني طلعوني من هينا طلعوووني
............................................................
         يوم جديد
............................................................
<<بيت ظاهر>>
نور نايمة بغرفة عالسرير بغرفة النوم تحركت مغيرة وضعية نومها بانزعاج من حركة البيبي قشعر جسمها من حست بيد تحاوطها من ورا تنهدت بابتسامة/كل مرة صاير اخف من اللي قبلها
ظاهر المتمدد جنبها على جنبه الايمن محاوطها بيساره غمض عيونه دافن وجهه بظهرها/انتي ثقلتي ماعاد تحسين بي
نور بعبوس/متأكد؟
ظاهر ابتسم من نبرتها عرف دخلها شي من الزعل/حتى لو ماعاد تحسين بي المهم انا احس بك واشوفك بكل ركن بحياتي
نور نزلت يدها ليده وابعدتها التفت له ونزلت يسارها تحت خدها مررت نظرها عليه بابتسامة 
ظاهر بلبسه العسكري مرتمي عالسرير جنبها
نور/ صل الفجر توه أذّن
ظاهر بصوت كله تعب/صليت
نور/طيب بدل قبل تنام
ظاهر /مااقدر متكسر من الخط لولا اني ابي السرير نمت بالصالة
نور ناظرته تتأمله هذا هو حصاد صبرها هذا هو العوض كان لها الكتف اللي تستند عليه بعد كل مامرت فيه كان قريب وبالحيل كان ولد العم اللي ماتوقعت بيوم يجمعهم سقف واحد وتكون بهالقرب منه
ظاهر المغمض عيونه قطع حبل افكارها/ادري اني كامل الزين مير خففي النظر ابيه يشبهك
نور ضحكت بخفة/وش افهم من هالتناقض
ظاهر ناظرها/انا من كثر مااحبك والله تمنيت ضاري منك
نور/وضاري ولدي حتى لو ماكان مني ياظاهر عسى الله يخليه ويصلحه لنا
ظاهر مد يده ليدها ك اللي تحت خدها وسحبها وثبتها تحت خده بابتسامة وغمض عيونه/ابي انام هدوء
نور/يعني ازعجتك؟
ظاهر فتح عيونه يناظرها/متغيرة يانور
نور/بعدك ماشفت شي
ظاهر غمض عيونه/مير يازينك كلك بتغيير وبدونه
نور ابتسمت من اجابته قربت منه قبلت جبينه/نوم العافية حبيبي
ظاهر همس بابتسامة/احتري هالندا من اول ماجيت ذالحين اقدر نام/استسلم للنوم تحت انظارها المتأملة بحب/
............................................................
<<بيت سطام>>
سطام واقف قبال التسريحة بثوبه وشماغه بيده عطره رفع عينه للمراية يناظر الباب اللي ينفتح بهدوء وخفة
سلام بفستان ناعم محتشم باللون الاصفر فتحت الباب بهدوء حتى ماتزعجه بنومه
سطام ابتسم من ناظرها
سلام فتحت الباب من ناظرت النور مفتوح دخلت الغرفة وقفلت الباب وراها/السلام عليكم
سطام ناظرها بابتسامة/وعليكم السلام والرحمة/التفت لها يناظرها مستند على طرف التسريحة مرر نظره عليها من شعرها المبلول الى فستانها الى صندلها اللي كل فردة غير ضحك بخفة/
سلام/الله يكثر هالتضاحيك
سطام بابتسامة/لابسة اصفر ودعوة حلوة مثل وجهك
سلام/الحلو اكيد
سطام كبح ضحكته/مافيها شك وجهك اجمل ماخلق ربي
سلام رجعت شعرها ورا اذنها بابتسامة ووقفت قباله
سطام اعتدل بوقفته/قولي وش وراك لاشفت الاصفر عرفت انك تمهدين هاه اسمعك
سلام انحنت للتسريحة سحبت عقاله من عالتسريحة ورمته عليه
سطام توجع من ضربتها ومسكه/اااه
سلام/ياشيخ انا في وجهك ياراعي الجمايل
سطام حرك يده بمعنى قولي
سلام وقفت جنبه ومسكت طرف شماغه تلعب فيه بين يديها/سطام بنكشت انا والبنات
سطام ميل فمه/من معكم
سلام/غصنة
سطام ماظرها بعبوس
سلام/وريوف بتطلع هاه شف لاتردني مسكينة كم لها ماطلعت تعبت وانا اقنعها
سطام سكت بتفكير
سلام تركت شماغه وتقدمت بخطواتها ودارت بفستانها قباله/بالله مو يجنن الفستان
سطام ضحك بخفة/ماازين من الفستان الا راعيته ووالله مااردك
سلام اتسعت ابتسامتها
سطام/مير انا اختار المكان/مشى/
سلام اختفت ابتسامتها مشت وراه/سطام وش ذا مااتفقنا على كذا
سطام وقف عند باب البيت والتفت لها/هذا امر الشيخ رضيتي به ولا اقعدي
سلام وقفت اول ماوقف تناظره بغيظها/رضيت رضيت ياشيخ
سطام/اجيب شي وانا راجع من الصلاة
سلام بابتسامة/سلامتك
سطام قبل جبينها/فمان الله/خرج/
............................................................
<<بيت بـيّـن>>
بـيّـن دخل للبيت بعد ماصلى الفجر جماعة ناظرها بابتسامة
يقين تسفط شرشف الصلاة والسجادة وترفعها عن الارض بعد ماانتهت من صلاتها واذكارها ورجعتهم بمكانها داخل ادراج التسريحة
بـيّـن بابتسامة/السلام عليكم
يقين ارتمت عالسرير بنوم/وعليكم السلام والرحمة
بـيّـن وقف جنب السرير ناظرها/قومي
يقين مغمضة/ليش
بـيّـن مد يده ليدها يسحبها/يالله قومي
يقين بعبوس/ابي انام
بـيّـن/اشتقت للفتة والدلة عالجمر لاتبطين علي احتريك
//بعد الفطور بمكانهم المعتاد تحت الشجرة//
يقين نزلت فنجالها وناظرته/هاه وش وراك علمني
بـيّـن يتقهوى وناظرها بابتسامة
يقين عقدت حواجبها/بـيّـن علمني ليش قلت لي اجمع اغراضي البارح
بـيّـن بابتسامة/خلاص تعينت
يقين/علمتني وباركت واستانسنا
بـيّـن ضحك/لاعب بك الحمل ماعادك فطينة مثل اول
يقين عقدت حواجبها بصداع/بـيّـن
بـيّـن وقف ومد يده لها وحركها بمعنى هاتي يدك
يقين تنهدت ومدت يده لها
بـيّـن ساعدها بالوقوف/يالله
يقين وقفت/وبعدين
بـيّـن خلل اصابع كفه الايسر بين اصابع كفها الايمن وضمه لصدره يمشي بابتسامة/أبرّ نذري
يقين عقدت حواجبها/اي نذر
بـيّـن بابتسامة/نذر اخذته على نفسي اول مانزلت هالخلا/وقف ورا بيته/
يقين شهقت بوسع عيونها من ناظرت  الشيول والتفتت له من فهمت نيته
بـيّـن ضحك/زين باقي من فطنتك شوي
يقين سحبت يدها من يده وجرت للشيول/انا انا اللي بأهدم هالضيق الكابس على قلبي من سكنته
بـيّـن جرى وراها/وشو وينه الضيق ماضاق الا بعدك
يقين وقفت والتفتت له بوسع عيونها
بـيّـن فتح باب الشيول وركبه مد يده لها بابتسامة/والاه مازان بعيني الا بعد ضيقتك
يقين تكتفت تناظره بغيظ
بـيّـن بابتسامة/وماعرفت حلاوة الضيقة الا معك
يقين حطت يدها بيده
بـيّـن ساعدها بالطلوع للشيول
يقين جلست فوق رجوله بعناد وحماس/محد يهدمه غيري
بـيّـن/كيف اسوق وانتي قدامي مااشوف
يقين/قم انا اسوق
بـيّـن/تراه ماهو بسيارة شيول شيول يختلف
يقين وقفت/يالله اهدم مرة وحدة وانا اراقبك منها توفي نذرك وانا اتعلم
بـيّـن ثبت يده على قير الشيول وتسارعت نبضات قلبه وسط تمرير نظره عالوادي حولهم ثم ناظر البيت يتأمل تفاصيله كم لحظة ظلم عاشها كم ليلة مرت عليه عاشها وحيد يلفه ظلام الليل ويسنده جدار هالبيت كان الرفيق له رفيق معاناة وشاهد عليها كم كرهه من اعماق قلبه البيت اللي المفترض يكون مكان راحة هالبيت كان بالنسبة له تذكير على كبر الظلم وكثره بحقه ياكثر مامرت ليالي يحلم فيها بتكسيره ومساواته بالارض واخيرا وصل اليوم الموعود اللي تحقق فيه حلمه اخيرا بيودع هالبيت المشؤوم وهالوادي الشين،رغم ظهور براءته قدام بني سمار وانتفى الظلم عنه الا ان الظلم بينرفع عنه فعلا لا كسر جدران هالبيت اللي ماكان الا سجن اختارته له مبروكة ونفته التمعت عيونه بطيف دمعة وبلع غصته
يقين مدت يسارها ملامسة ليده عالقير
بـيّـن ناظرها بابتسامة
يقين شدت على يده بتأكيد له بانتهاء فصول معاناته وصمته وابتدت حياته السعيدة من جديد وواجب عليه يعيشيها بكل تفاصيلها وبعتاب/شقيت الغمام وش بقى
بـيّـن ضحك/شقينا الغمام سوا
يقين اشرت بيمينها لقدام/اجل يالله اقدم/صرخت/يامال الذهاب يابيت الخيبة
بـيّـن ضحك وحرك القير وتقدم الشيول للبيت صرخ/يامال الذهاب
يقين صرخت بحماس/لاتوقف ابد
بـيّـن كسر جدار هالبيت نافض الظلم عنه بعد سنين طويلة من النفي صرخ/مع السلامة يااخر فلول الغمام مع السلامة
.
..الـنـهـايـة..
تمت بحمدالله ..
يوم الاحد بتاريخ١٤٤٥/٨/٢٩
.
............................................................
#شقّ_الغَمام
*اولا/كل عام وانتم بخير الله يبلغنا اياه ويعيننا على قيامه وصيامه ويتممه علينا ويتقبله منا ومنكم جميعا ضموني بين دعواتكم وجزاكم الله الف خير..
*اتمنى هالرواية كانت ممتعة لكم واحتلت مكانة بقلوبكم شكرا لكل لايك وكل كومنت انكتب🤍🤍..
*استودعكم الله الذي لاتضيع ودائعه..