شـقّ الـغَـمـام

..(٩)..

..(٩)..
لاحول ولاقوة الا بالله العلي العظيم
-
طاهر/استهدي بالله علامك الامور مشورة ماهي إجبار اشاورك انا ذالحين شبيتي علي مرةٍ وحدة
غيمة اخذت نفس تكتم غيظها/ماابيه ياجد
طاهر تنهد/ابشري ابشري مير اسمعيني ثم بكيفك
غيمة/سم ياجد
طاهر/الصحيح ياغيمة بالاول نويت ارده مااعطي بناتي لرجال معه ورعان
غيمة ناظرته باهتمام لرأي جدها اللي ماتوقعته
طاهر/ياغيمة الرجال يقول سماه تبي الغيم حتى تمطر ارضه
غيمة اختنقت بعبرتها
طاهر/هاه ياغيمة ودك تسقين ارضه ولا تشحّين؟
غيمة/علّمه أن غيمة ماتمطر الروضة(ارض غرقت من ماء المطر)
طاهر هز راسه/زين زين على راحتك وانا جدك على راحتك
غيمة وقفت/تبي شي ياجد
طاهر/الله معك الله معك
غيمة خرجت من بيت جدها وقفت تناظرهم
غصنة تناظر نور/من شفتك اقول تشبهين احد اعرفه احس تشبهين جدي شوي
حمدة/تشبه عمك عياش ماغير العيون اخذتها من هذيك الجنية
سلام تنحنحت
غصنة باحراج/جدة ترا الجنية أمها
نور ناظرت جدتها بزعل/ياجدة تراها أمي
حمدة عن طرف/كان ماأعجبك اجل بتتعبين يابنت الجنية
نور/بنت زينة مثل مااني بنت عياش ياجدة
حمدة صدت بوجهها/مير الله يكرم السامعين عن بعض الطواري
نور سكتت بعدم رضا عاللي تسمعه
حمدة طاحت عينها على غيمة/يالساكتة انتي
غيمة/سمي ياجدة
حمدة/صحيح بتشدّين يم اليهودي
غيمة/ايه بأروح عند بـيّـن
حمدة ميلت فمها/زانت بعينك العيشة يمّه
غيمة/ليت بعض القلوب مثل قلب اليهودي كان حنا بخير ذالحين/مشت/
حمدة اتسعت عيونها/عودّي ياغيمة عودّي ايه قوا راسك هاه عودّي/بقهر/اهبي الله اكبر عليك اهبي
غيمة دخلت للبيت بخطوات سريعة لبست عبايتها وجلست تقفل شنطتها
منيرة/استسمحي من جدتك قبل تروحين
غيمة ماردت
منيرة بفضول لردها/وش قال جدك
غيمة/لا يمه ذا ردي على جدي لا
منيرة بصدمة/وليه!!
غيمة وقفت/انا رايحة لبين يمه
منيرة/بالاول علميني ليش رديتي رازي
غيمة/النصيب يمه النصيب تبين شي قبل امشي
منيرة ناظرتها لثواني بصمت/لاتروحين لحالك خلي اخوانك يودونك
غصنة دخلت تناظرها
غيمة ناظرتها
غصنة صدت بمكابر وكملت طريقها للمطبخ
غيمة خرجت بخطوات سريعة
غصنة جرت لامها/من جدك يمه بتخلينها تروح
منيرة/اختك لها كم يوم ماش ماهي مضبوطة خليها تروح لبيّن كم يوم وترجع
غصنة/يمه وش رايك اروح مـ
منيرة قاطعتها/روحي يم جدتك الله يستر عليك روحي يالله
.........................................
<<بيت عايض>>
//ملتفين الصغار حول السفرة الممدودة عالارض//
عايض يناظرهم/احتروا امكم لاتاكلين ياعيال
خالد ياكل اخوانه
خلود نزلت الصينية فيها الكاسات وترمس الحليب جلست
عايض قطب جبينه/وين أمك
خلود/امي افطرت بدري
عايض باستغراب/متى؟
خلود بهمس/تعشت من يدين خواتك
خالد الصامت ناظر ابوه بملامح محتدة
عايض/وش تتخاوتون(يهمسون)به انتم الاثنين/وقف/افطروا انتم/مشى/
خلود بقهر/ايه مثل دايم مابه جديد
خالد/افطري افطري بس
خلود ناظرته/وش سويت انت حجزت للقدرات
خالد من بين اسنانه/نقصي صوتك
خلود/هاه وش سويت
خالد بهمس/حجزت بروح مع نواف وسلمان
خلود/عماتي لايدرون بس
خالد/من وين يدرون انتي بس اسكتي
غالية بالمطبخ تغسل الصحون
عايض دخل ناظر قفاها زفر بتأنيب ضمير تقدم لها وقف وراها وقبّل راسها واحتضنها من وراها محاوط خصرها بيديه/ياغاليتي
غالية ناظرت يديه المحاوطة لخصرها نزلت يديها وفكت يديه عن خصرها
عايض شد عليها وبرجى/غالية لاتزعلين علي
غالية فكت يديه بقوة وناظرته/وش بتقول هالمرة ياعايض
عايض/اخطيت وحقك علي ياغالية سامحيني
غالية بقهر/والمرة الجاية لاقالوا لك شفناها مع رجل ببيتك
عايض اتسعت عيونه
غالية/بتصـ
عايض غطى فمها بيديها/اقص لسان من يقوله ياغالية اقصه من قاعته
غالية دفت يده/عايض الى متى علمني الى متى
عايض سكت
غالية برجفة صوتها تعاتبه/وش زينك معي ومع عيالنا داخل هالبيت علامك تطلع من عالباب وتصير واحد مااعرفه
عايض بضيقة/غالية أنا
غالية قاطعته/تسمع للناس وتخرب بيتنا ليه؟انت تدري انك تسمع لهم بلحظتها ثم تندم ليه ترخي اذنك لكل احد انا اخذتك انت مااخذت الناس معك ياعايض
عايض/بس هذولا خواتي ياغالية
غالية/علمني انا قلت لك اقطعهم؟ولا قلت اطردهم!!ليه حياتنا كان يعطي رايه بها ياعايض ليه
عايض/بس يشهد الله اني احبك ياغالية احبك
غالية/وعشانك تحبني تعمل بس هاللون ياعايض
عايض سكت بندم
غالية/عايض كل مرة اذكر طيب الليالي بيننا لكن بيجي ذاك اليوم اللي ماعاد بيبقى لطيب الليالي ذكرى
عايض احتضنها بخوف/لا ياغالية لا تكفين ماطلعت من ذي الدنيا بغيرك لاتسوينها بي تكفين
غالية دفته بغيظها
عايض تراجع عنها
غالية/انت اللي تكفى تكفى حافظ على هالبيت حافظ على مابقى لي من كرامة تكفى/مشت وتركته/
.............................................
<<بيت منور>>
ظاهر جالس بالمجلس لوحده ينتظر من فترة رفع يساره يناظر ساعته زفر بملل
ضاري دخل بالقهوة بين يديه
ظاهر ابتسم/حي الله ذا الزول ياحيّه علامك ياابوي ابطيت
ضاري/اجهز لنا القهوة بابا
ظاهر تغيرت ملامحه للحظة من عدم الاهتمام بوجوده/دامك تجهز القهوة قل يبه ماهو بابا
ضاري صب القهوة لابوه ومد الفنجال/سم يبه
ظاهر تغير من وجهه من ذاق القهوة بلعها ثم مد يساره سحب يد ضاري وقبل كفه/عسى هاليمين ماتعرف الا كل خير ياعيني وين امك ياابوك؟
ضاري سكت بتردد
ظاهر/ضاري
ضاري/داخل مع خوالي وخالاتي يتقهوون مع جدتي
ظاهر/رح ناداها
ضاري/كل شوي تطردني بابا
جابر(ولد خالته٩سنوات)/ضاري تعال نلعب
ضاري/لا
ظاهر/رح رح العب ياضاري
ضاري هز راسه بلا
جابر بعدم اهتمام/خالتي تقول تعال عشان ابوك يطفش ويمشي
ظاهر شد على قبضته بغيظ/ضاري رح لأمك وقل لها ابوي يقول خمس دقايق وانتي عنده ولا بيدخل هو عندك
ضاري وقف ومشى بسرعة لامه
وداد بعد دقايق دخلت بعبايتها ولافة الطرحة ومتلثمة وقفت على مسافة منه وبنرفزة/وش هالاسلوب اللي تكلمني فيه قدام اهلي!!
ظاهر/تراك مسلمة يامسلمة وين السلام
وداد/انت جاي مو للسلام قل وش تبي
ظاهر/الصدق اني جاي للسلام
وداد/وسلامك عفناه ياظاهر
ظاهر ارتفع حاجبه من ردها/ذالحين عفناه!!وين راحت احتريك ياظاهر لاتنام الى من اسلم عليك
وداد/ايه بس كانت بدايات وامحق بدايات
ظاهر/بدايات وش ياوداد بدايات حب ولا
وداد قاطعته/ايه ايه هي ذي اللي بتقولها صح عليك بدايات اوهام
ظاهر سحب انفاسه لصدره بملامحه المحتدة
وداد/عشت بوهم الحب واخذتك عناد غصب عن اهلي كلهم ظنيت بأعيش معك فوق السحب مادريت انك بتستهل وتغرقني معك
ظاهر ميل فمه بابتسامة جانبية/ماعمر الدنيا صفت هاذي هي ماصفت لاحد حتى
وداد قاطعته/وعاد ليتني فوق الغرق لقيت ناسك سند الا فوق همك همهم من اكبرهم جدك ثم جدتك ثم امك واخرهم اختك العلّة ايه ايه ماننسى اللي جالس فوق العرش وفايز عليهم كل ابوهم اخوك الراعي اللي حتى الرعي وتعبه مارباه مير المنحوس منحوس الله بلاني بكم وواجب علي الصبر الله يكتبه اجر
ظاهر يكبح نفسه عنها لايذبحها نطق بغيظ/انتي ياهيه
وداد اتسعت عيونها/ياهيه!!
ظاهر/حتى الهيه كثيرة عليك تبينها حساب ابشري بي انزل لعندك واخليها حساب
وداد ناظرته بقهر من اسلوبه معها
ظاهر/انا اللي رفعتك فوق فوق بالحيل لين يخيل لك محدٍ يوصل مقامك
وداد/وهذا الصحيح وغصبا عليك
ظاهر ضحك بسخرية/هيه يابنت منور محد دق بابكم غيري لو ماخطت يميني بابكم مالفى يمكم الخير ابدا
وداد عضت طرف شفتها بغبنة
ظاهر/اخوانك محد عزهم ورفعهم غير خيري ولا انتوا وين والعسكرية وين
وداد احتدت نظرتها بقهر ماتقدر ترد وهاذي حقيقة
ظاهر/وخواتك لولا/ابتسم ومد يمينه لاعلى ثوبه من جهة صدره يرفعه وينزله بحركة سريعة تعبير عن التطير/خلني ساكت لايبتليني الله بخواتي واعرضهن على اخوياي بالحيلة
وداد صرخت وجرت له انحنت محركة يدها باتجاهه
ظاهر الجالس مد يده ومسك يدها ولفها ورا ظهرها وجلسها ببساطة شديدة
وداد ظهرها له وبغبنة مو قادرة حتى تناظره وبصراخ/حيلتك على مرة ياقليل المروّة هاه حيلتك علي
ظاهر دفها وترك يدها/عاد بالاخير مايلحقك لوم كل الملامة تلحقني
وداد التفت تناظره وتمسح على يمينها بيسارها من ألمها وسط لمعة عيونها
ظاهر/انا اللي ارخصت نفسي واهلي لوحدة ظنيتها تستاهل ولا هي من مبطي ماتسوى التالية من الغنم
وداد سحبت صحن التمر القزاز اللي طاحت عينها عليه ووجهته له
ظاهر مسك يدها وضغط عليها حتى تركت الصحن وطاح منها ثم ابتسم بتحدي/خشمك اللي رافعته اكسره لك مثل مارفعته 
وداد بقهر/لولا ستري عليك كان
ظاهر/وش هو سترك!!اني مجنون!!هذا انتي ماخليتي جحر بالديرة ماعلمتيه وين هو سترك اللي تقولينه!!
وداد احتدت نظرتها وبمحاولة يائسة تقهره/مين بتقبل فيك وكلهم يدرون بجنونك الله يعافينا ولايبتلينا
ظاهر دفها عنه بقوة هالمرة ووقف/هالمجنون بياخذ سيدة قومها وعينك تشوف
وداد ضحكت بسخرية/سيدة قومها لايكون من بنات سحاب
ظاهر ابتسم/بتحضرين عرسي وتشوفين
وداد ناظرته بقهر وبكره لنفسها من قلة حيلتها لكسره
ظاهر بصق اسفل رجله ناحيتها/صدق ان بعض الابتلاء عقوبة/ابتسم/مير نحمد الله ونشكره هالعقوبة شالت الغمّة عن عيوني وشفنا الحقيقة كل ابوها
وداد انسابت دموعها من قسوة كلامه/أنا غمّة!!
ظاهر زفر/ضاري مايربى بهالبيت اللي يسخط
وداد ناظرته بقهر/الا السخط انتم يابني طاهر
ظاهر ببرود/تالية السلام اللي جيت عشانه يابنت منور انتي طالق/مشى/
وداد رغم امنيتها بهالكلمة من مدة طويلة الا انها كسرت بداخلها شي عميق تمنت تسمعها منه بهدوءه مثل عادته ماتوقعت تجر هالكلمة معها جروح فوق جرحها بهاللحظة رفعت يديها مبعثرة شعرها وفتحت ازارير عبايتها شدت اعلى بلوزتها قطعتها اخذت الصحن ورمته بالجدار قدام ظاهر وتكسر
ظاهر وقف باستغراب ثم التفت بوسع عيونه
وداد صرخت بكل مافيها/الحقوني بيذبحني المجنون بيذبحني
ظاهر قشعر جسمه من طريقة صراخها الهستيرية يناظرها بصدمة من تمثيلها
وداد وقفت قباله بابتسامة وظهرها لباب المجلس همست/الحين بتبدأ غمتك ونشوف وين يربى ضاري ياولد خلف
//اخوانها الخمس دخلوا المجلس بخطواتهم السريعة ونفوسهم المشحونة ضده//
وداد بصراخ/الحقوا علي بيذبحني تكفون يااخواني تكفون/ثبتت نظرها عليهم تشفي غليلها منه بعد اهانتها التفتت من حست بوجوده ناظرته/اطلع برا
ضاري بدموع منسابة يناظر ابوه اللي يدافع عن نفسه بينهم بخوف عليه
وداد انحنت مسكت يده وتخرج فيه وبحدة لمقاطعته لذة اللحظة/امش برا
ضاري سحب يده منها وبرجفة صوته ناظرها/لا انا مع ابوي مااقعد معك انتي واخوانك
وداد رجف قلبها من اللي قاله
ضاري سحب يده منها وجرى لخواله بصراخه/فكوا ابوي فكووووه
.....................................................
<<بيت الشيخ>>
،،غرفة مبروكة،،
مبروكة حانية راسها بين يديها بصداع مزمن ماخف حتى اللحظة بتردد لاول مرة من هالقرار اعتادت تختار وتقرر بنفسها بدون فروض وقيود هالمرة القيد كبير وقوي جدا عليها واللي مرعبها اكثر هدوءه اللي مايطمن ابد هالطلب بسيط مايستاهل عنوته وحتى تهديده لها
،
،
//البارح وتحديدا بعد طرد نور بساعتين//
مبروكة جالسة بعبايتها قباله/خير ياابو عياش وش هالعلم اللي ماقدرت تحتري الصبح ولفيت بهالليل حتى تقوله
طاهر الجالس قبالها بنهاية المجلس جلسة الشيوخ وهو فعليا شيخ ولد شيخ ولد شيخ دم الشيوخ يجري بدمه من عمر طويل معتدل بقامته شاد ظهره فارد اكتافه فارض هيبته اللي يخفيها عمد بتغييره لطريقة جلوسه ولبسه وكل حركات جسده هالمرة فرضها وأبرزها متملك المكان وهو يناطح سحاب راس براس بني طاهر ضد بني سمّار النضال الازلي للفخذين مــن ذات القبيلة اللي انتهى بعقد السلام بينهم وماكسر سلامهم الممتد لسنين طويلة الا هو طاهر بنفسه كسره بعناده ورفضه ولازال مقتنع باللي سواه رغم مامرت فيه عايلته بابتسامته/أبد ياسحاب سبقني خيرك قلت ألفيك بخيري
مبروكة قطبت جبينها بشك
طاهر/مااحتريت الصبح من فرحتي بجية نور لفيت يمك ابيك تممين باقي الفرحة
مبروكة زفرت/عسى الافراح دايمة ابشر ياابو عياش
طاهر/انا لفيت ابي القرب منكم يابني سمّار
مبروكة باستغراب/مير البنت طلعت من يمنا ولفت يمكم
طاهر/لا بنيتنا ما لأحد عليها كلمة
مبروكة احتدت ملامحها/مير ولدكم عيّا عنها وهي عطية ياابو عياش
طاهر/ولدنا عيّا من طناخة وطناخته مقدورٍ عليها
مبروكة/مير اللي اوله عوف ماله تالي
طاهر بلمز/هذا انتي عشتي وانتي عايفة وتاليه تبارك الله وش زينه
مبروكة كشرت بوجهها بغيظ
طاهر/بيشبون ببعضهم بالاول ثم يركدون لاتشيلين همهم هم اخبر بأمورهم
مبروكة/وبنيتنا يلحقها الغثا!!
طاهر/بنيتكم تحوفها الكرامة والأمان وعقب المحبة العمل على وليدنا وش يلحقه منكم يابني سمّار
مبروكة سكتت بغيظها
طاهر/مير بكرة لا لفيت اخطب وهو معي ابي اسمع تم ولا ابي اسمع تعييب ابدًا
مبروكة رمشت من صيغة الامر/وشلون!!
طاهر وقف ومشى باتجاهها ودخل يده بجيبه وخرج سبحة خرزها باللون الابيض تنتهي طرفها بخرز من الفضة محفور عليها حرف مميز يغطي اغلب خرزها اللون الاحمر وقف على مسافة منها ورمى السبحة لعندها
مبروكة مدت يدها السبحة اللي ضربت بطرف رجلها واحتدت ملامحها من تحسست الحرف المحفور على الفضة وكيف ماتعرفه وهي حفرته بنفسها قطبت جبينها باستغراب من تحسست حبات الخرز المتغير ملمسها
طاهر ابتسم من صمتها/دم
مبروكة سرت رعشة بعظامها من صدمتها
طاهر بابتسامة/دام خبرتي راعيها وسالفته ماله داعي يطول الهرج/لف بيمشي ثم وقف/وتراني عيّنت معها خاتم
مبروكة شدت على قبضتها بقهر
طاهر/مير اللي هول بي هو اشلون ماتفطن انه طاحت منه غرضانه/ابتسم/ماينلام ياكبر العملة وياشينها لاصارت من قريب
مبروكة وقفت غصتها وسط حلقها بلعتها وباستدراك للوضع/ياابو عياش مايصلح اللي تقوله وش هالعلوم ترمي التهايم على غير وجهة!!
طاهر ضحك/ياكبرها يامبروكة بحقي ياكبرها كبراه!!محدٍ يبخصني كثرك مااقول العلم والا وانا ابخص واحدٍ به
مبروكة بطرف عناد/البنت أمرها عند اخوها
طاهر/واموركم مالي بها اخطب وسط المجلس وبين الرجال على سلوم العرب واللي نسمعه ياهلا ومرحبا وتم وابشروا
مبروكة/وغيره ياابو عياش
طاهر/ابد سلامتك امورنا على احسن مايكون ياسحاب الديرة
مبروكة ميلت فمها بقهر من سخريته
طاهر مشى/عاد تصبحين على خير مير انه ماعاد به ليل طلع الصبح اشرقت شمسه وطيرت السحب معها
،
،
مبروكة بتفكيرها بينها وبين نفسها/وش هالشمس اللي يعرفها هالطاهر وش وراه الله اكبر عليه/بكره/حسيبك الله كان فوق قهرك لي من سنين ناوين تقهرني من جديد عسى الله لايمدد لك عمر ياطاهر اهب مااقواك اهب/قطبت جبينها من وصلها صوت صراخ ريوف وقفت وخرجت من غرفتها مستندة على عكازها/
يـقـيـن بغيظ وعبايتها على اكتافها تدف ريوف عنها بتخرج
ريوف توقفها/مريضة انتي مريضة من الليل خرجت اكيد عند سطام
يـقـيـن تناظرها بحقد وبصوتها المبحوح/بديت اشك انك اختي
ريوف اتسعت عيونها من سمعت صوتها اللي بدا يرجع لوضعه الطبيعي بخفة
يقين/انقلعي عن وجهي احسن لك اليوم
مبروكة وقفت وراها/علامك شايشة يابنت منصور
يقين التفتت وبابتسامة/جدة ياهلا ومرحبا بجدة تنشديني علامي أبدًا سمعت انك/بغيظ ارتسم على ملامحها مبدد الابتسامة/طردتي نور توالي الليل!!
مبروكة/والله بيتي وأعمل مااريد
يقين ضحكت/ورا ماطردتيني معها خابرة اني واقفة بزورك من تالي
مبروكة بعدم اهتمام/لاتستعجلين على رزقك تجهزي قريب قريب ان شاء الله
يقين بابتسامة/الله يرحم يوم كنا نون العين وهدبها!!
مبروكة/كنتي نون عينه وهو لك الهدب مير وش فايدة النون لا غدا يجرح الهدب ويوذيه نعمي العين ونتريح
يقين/مير محد توذى غير النون والهدب هين مقدورٍ عليه يجي مكانه هدب يازنه ويازن اهله ولايسوى بكفته ذرة
مبروكة بابتسامة/زين ماقلتي يابنت منصور
يـقـيـن قطبت جبينها بشك
مبروكة/هاه هذا هو الهدب اللي تقولينه اختاره اخوك ورماك عليه وسط الرجال من سواد فعولك
يقين شحب وجهها من صدمتها
ريوف تغير وجهها 
مبروكة/وليته قبل الا عاف/انفجرت تضحك/حتى الراعي اللي مايسوى عاف/استمرت تضحك/
يـقـيـن تباطأت انفاسها من قوة صدمتها وبهمس وسط عيونها اللي التمعت/كذب سطام مايسويها كذب
مبروكة
سطام دخل للبيت قفل الباب وراه قطب جبينه يناظر جدته تضحك
مبروكة باستمتاع/هاه الطيب عند ذكره انشديه كان زليت بكلمة
سطام يناظرهم بعدم فهم
يـقـيـن ناظرته وخانتها دموعها وانسابت ناظرته بلوم/ليه ليه ياسطام ليه
سطام بصدمة من دموعها/وش فيك وش صاير
يـقـيـن جرت له وضربته على صدره بقهر وسط صراخ تجرحت معه حنجرتها بدون رحمة ومراعاة لوضعها/ليش ليش تبيعني ليش ياسطام ليش
سطام مسك يديها/يقين يقين
يـقـيـن بانهيارها/وش سويت حتى تذلني ياسطام ليش ليش
سطام صرخ/خليتها خطبة هي من سوتك عطية بينهم
يقين وقفت عن ضربه وناظرته بدموعها
سطام بانفعالها/تلاحقت السالفة وخليتها خطبة/رفع نظره بحقد لجدته/مير صار اللي تبيه وصرتي عطية
يـقـيـن التفتت لجدتها بدموعها/وين بتوصلين لوين
مبروكة/بشروني عسى تعلمتوا الدرس ياعيال منصور
ريوف قشعر جسمها وظلت تناظر جدتها بصدمة
مبروكة/حتى تتعلمون ياعيال منصور ماتكسرون كلمة لسحاب انا من رفعكم وانا من انزلكم للقاع
سطام شد على قبضته بقهر 
مبروكة زفرت/العلم ذالحين البارح خطبك طاهر لبيّن وبيخطب على عين الجماعة اليوم/احتدت نظرتها/وانا اعطيت ومالكم كلمة
يـقـيـن بدون اهتمام للي قالته/لو ابوي بيننا رضى ياجدة باللي تسوينه؟
مبروكة شدت على عكازها بوجع تخفيه عنهم
سطام بحدة/هالمرة ماتغصبينها ياجدة
مبروكة بحدة/عافك على عين الجميع/رفعت صوتها/عااااااااف عااااااااف وش فهمتوا يامال الذهاب هاه وش
يقين انخطف وجهها وهي تناست الموضوع هوت عالارض من سوء موقفها حتى لو دافعت عن نفسها كالعادة هالموضوع كبير بحقها كبير وكثير الموضوع موضوع شرف لو تحلف بالاديان كلها محد بيصدق لها كلمة اسود وجهها كل ماتعمقت بتفكيرها والتزمت الصمت وسط ضياعها بدوامة افكارها
سطام بانفعال/وخير ياطير هو عيّا باقي ترمين اختي عليه كان رضيتي انا ماارضى
مبروكة/اترك النعرة عنك وخل اختك تتيسر برزقتها لاتبلاها فوق بلاها
سطام صرخ/اختي كان ماشالتها الارض تشيلها عيوني محد له كلمة عليها
ام سطام وقفت عندهم وبحدة/انا لي كلمة ياسطام
سطام احتدت نظرته/مالاحد كلمة علينا حتى انتي يمه
ام سطام/اعقب من ولدماأثمر فيك التعب 
سطام ناظرها بغيظه
ام سطام/مالك كلمة على خواتك وانا حية تسمع
سطام طنشها وناظر يقين الجالسة/قومي معي مشينا برا هالضيم مشينا
ام سطام/يقين
يـقـيـن رفعت نظرها لامها
ام سطام/احفظي كرامة ابوك
يقين اتسعت عيونها من رجف قلبها من سمعت طاري ابوها فكرت بنفسها ونست سمعت ابوها واللي بيلحقه
ام سطام/ومابقى منها/شدت على
وارضي باللي انكتب عليك يابنت منصور
سطام انحنى بقهر ومسك يسارها بيمينه وسحبها
يـقـيـن وقفت من سحبته ومشت وراه
سطام بغيظ/محد له كلمة علينا محد/فتح الباب وذكرها/نور يالله يانور
يقين سحبت يدها منه بدموعها/كل شي الا ابوي ياسطام كله الا ابوي اموت ولاتلحقه كلمة ياسطام
سطام بقهر/محد بيقول شي محد بيقدر يايقين/مسك يدها وسحبها/
يـقـيـن مدت يمينها ومسكت يمينه توقفه
سطام وقف والتفت يناظرها
يـقـيـن هزت راسها بانكسار هالكسرة ثاني كسرة بعد كسرتها بفجعتها بأبوها/لا لا مااقدر ياسطام مااقدر سامحني يااخوي سامحني/سحبت يدها من يده/
سطام عض شفته بقهر منها صرخ/نووورررر يالله
يـقـيـن اتسعت عيونها من ذكرتها/نور ياسطام نور
........................................................
<<بيت بـيّـن>>
بـيّـن بثوبه الاسود وغترته البيضا الملفوفة ببعثرة حول راسه يلف ببيته الصغير بمبخرته الصغيرة بااعرض ابتسامة ارتسمت على وجهه من فترة بسفرة توسطت صالة بيته الصغيرة المفتوحة على غرفة نومه ومطبخه ومطلة بنفس الوقت على باب بيته أسرع بخطواته لبرا البيت من سمع صوت سيارة خرج من البيت انحنى عن يمين الباب ينزل المبخرة اعتدل بوقفته ودخل يمينه بجيبه خرج سبحته ورفعها وثنى يساره ورا ظهره يتمايل ويحرك يمينه بسبحته غنى/يامرحبا ياحلوها طلّة...بالغالية يوم هي جت عند مغليها..هي راعية مجلسٍ من جاه ماملّه..
مُحارب وقف بالسيارة بابتسامة
غيمة نزلت بابتسامة واسرعت بخطواتها له
بـيّـن رفع صوته/أختي ومن حقي إني افتخر فيها..غاصت بحور الشعر وبيوتها جزلة..
غيمة ارتمت بحضنه
بـيّـن ضمها بضحكة ومسح على ظهرها لاول مرة من سنين احد اخواته يزورون بيته/الهامة اللي عسى ربي يخليها
غيمة بللت عيونها ثوب بـيّـن
بـيّـن بضحكة/افا افا غيمتي امطرت/فكها من حضنه ومسح دموعها/ياعين بـيّـن عساها ماتنزل الا من فرح/مسك كف يساعدها بيمينه يدخلها بيته اعظم القصور بعينه/حياك حياك وانا اخوك
مُحارب تنهد من طال التجاهل بحقه وسحب شنطة غيمة من حوض السيارة نزلها ومشى لهم
غيمة دخلت وراه وكفها بكفة تفحصت بعينها بيته الصغير البسيط بدون كلافة ناظرت ملابسه الملعقة على حبل باحد جدران الغرفة بدون دولاب يضمها ابتسمت فعلا البيت معبّر عن شخصية بـيّـن العجول بملابسه دائما من حقه بيته مايضم دولاب
بـيّـن باحراج بسيط/حياك الله على قل الكلافة
غيمة انتبهت للسفرة اللي عليها حلا مغلف وشوي شوكلاة منوعة بصحن صغير وصحن يضم تمر وترمس القهوة امتلى قلبها فرح من حفاوة استقباله وهي تدري بظروفه رفعت نفسها وقبّلت راسه/الله يحييك ويخليك لي يااخوي
مُحارب دخل وجلس/الله يحييني ويسلمك
بـيّـن ابتسم/متى جيت
مُحارب سحب الترمس يصب لنفسه وبزعل/ابد طحت من السما
بـيّـن ياستمتاع يغيظه/المعذرة غطاك الغيم وانا اخوك
مُحارب قفل الترمس ورفع فنجاله له
بـيّـن انحنى وسحبه من بين يديه ومده لغيمة
مُحارب ارتفعت حواجبه من حركة بـيّـن
بـيّـن/حياك الله ياحيها
غيمة جلست/الله يسلمك
بـيّـن جلس بينها وبين مُحارب
مُحارب مد يده للتمر واخذ حبة والتقت عينه بعين بـيّـن
بـيّـن ناظره
مُحارب مد يده لغيمة/سمي
غيمة اخذتها بابتسامة
بـيّـن مد يمينه ومسح على ظهر مُحارب بابتسامة
مُحارب ناظره بغيظ/اخلصي ياغيمة ذوقي من كل شي تراه يحرم علي الى من تمدين يدك قبلي
غيمة بضحكة/غصبا عليك اختك الكبيرة
مُحارب اتسعت عيونه والتفت يناظره/ترا مابيني وبينك شي خلي عنك
بـيّـن هز راسه بايه وهو يمد يده للتمر واكل حبة/مير انها صدقت/ناظره/وينه فنجالي ياورع
غيمة ابتسمت
مُحارب/انا ولد ابوي
بـيّـن مد يده/ياولد ابوي وينه فنجالي
مُحارب يصب الفنجال بغيظ
بـيّـن/يوه ياغيمة هالورع بيعرس قبلنا
غيمة بسخرية/الصيوح اللي يبي أمي ويفقدها قبلنا كلنا
مُحارب مد الفنجال بغيظ/ماني بصيوح
بـيّـن اخذ الفنجال/كبر ونسى انه اصغرنا
مُحارب بغيظه/مانسيت انتم اللي تنسون اني كبرت
بـيّـن هز راسه/ذا وش بيسوي اذا عيت حرمته لاتسوي اللي يبيه
غيمة بضحكة/بيصيح
بـيّـن انفجر يضحك
مُحارب وقف وزعل منهم/هيه انت وهي خلاص ترا زودوتها وقهوة معكم ماابي/مشى/
بـيّـن وقف لحقه يمشي وراه/شفت انك كبرت بس بدل انك صيوح صرت زعول/ضحك/
مُحارب اللي صار برا البيت وقف التفت له مسكه من وسطه ورفعه ورماه بالارض
غيمة تناظرهم قبالها شهقت بفجعة/يمه
بـيّـن زفر بألم/اااه اااه
مُحارب/ماني بصيوح ولاني بزعول/مشى خطوة ووقف/جدي يحتريك امش معي/مشى وقف ثم تراجع بخطواته لورا/
طرق مكشر عن انيابه ثم نبح
بـيّـن اشر لطرق
طرق جرى لمحارب
محارب جرى بصراخ/الله لايوفقك يابـيّـن قلّه يكبني
طرق يجري وراه
بـيّـن عالارض بألم/هين أعلمك انا من هو الصيوح والزعول
محارب/تكفى يابـيّـن تكفى
..................................................
<<بيت مضاوي>>
مضاوي تتقهوى بوسط الحوش
ولاء قبالها بكوب قهوتها
غيمة جالسة بينهم تاكل من كيسها الشفاف المحتوي على انواع من الشبسات والشوكلاة
مضاوي نزلت فنجالها بغيظ/علمني الرجال عن هالبلا اللي تلطينه
ولاء/اكبر همه هاللي الطه ياجدة
مضاوي زفرت/علميه عن كل شي من بدايتها علميه عن خوالك وطباعهم تراهم ماهم بمثلي ولا مثل اهل جدك
ولاء زفرت/جدة وش فيك تراني تربيتك وش بيفرق خوالي عن عمامي برأيه هو تزوجني او تزوج اهلي!!
مضاوي/ياولى ترا محارب حار ماهو مثل اخوانه
ولاء/وانا حارة مثله يقول حرف ارد عشر ارتاحي ياجدة
مضاوي مسكت راسها/ويل حالي الجيزة ماهي من لسانه اطول يابنت
ولاء تنهدت/ياجدة وش فيك تفكرين عني اتركي كل شي لوقته
مضاوي/وجع راسي كان ذي علومك صحيح
ولاء نزلت كوبها بغيظ/مايسوى علي ذا القهوة والله خلاص ماابي اتقهوى خلاص
رازي وقف عندهم متلثم بطرحة جدته وبين يديه الطشت دق ويغني/سليم سليم وش اسوي بمحبوبي..تلقى الخلا واعطى المفاتيح عبدالله
غيمة نطت من مكانها تاركة اكلها وترقص عند ابوها
رازي تحمس مع غيمة/عاشت عاشت غيمتي عاشت
ولاء ضحكت ثم زغرطت/عاش اخوي عاش
مضاوي هزت راسها/الله يخلف عليك بالصغيرة بخير ذا ابوك الله يخلف
رازي رمى الطشت فتح الطرحة مسك راسه مثبتة وبدا يلفح مع غيمة
ولاء وقفت وصفرت ثم انحنت للطشت تدق/ايوه ايوه عاشوا عيال مثنى عاشوا
مضاوي ضحكت وصفقت/زينكم الله يحفظكم
رازي شال غيمة يدور فيها
غيمة غطت ضحكتها المكان
مضاوي بفزع/ياولد ذبحت الورع ياولد يالمهبول
رازي وقف وعينه بعين غيمة/لااوصيك بعرسي لاتجلسين سمعتي
مضاوي قطبت جبينها
ولاء وقفت دق بوسع عيونها وسط ابتسامة/قل والله
رازي نزل غيمة ورفع يمينه رجع طرف الطرحة ورا اذنه اليمنى وغطى فمه بيساره بدلع/انا اللي انخطبت
ولاء قطبت جبينها باستغراب
مضاوي شهقت/والخيبة يارازي والخيبة
رازي ثنى يديه حول وسطه/ليه يعني مااستاهل!!انا الف من تتمناني
ولاء انفجرت تضحك
مضاوي بوجهها المتغير/يامال الخياب ياولد مثنى وهالعلوم يامال الخيبة
رازي/ليه ياجدة رحت اليوم وخطبت صدق عاد
مضاوي قطبت جبينها بتكذيب/ايه ومن هي المقرودة اللي خطبتك
ولاء تضحك
رازي بدلع يغيظ جدته قصد/لا ياجدة استحي
مضاوي ارتفع ضغطها ورمته بالفنجال
رازي نط عنه/جدة تراني رازي
مضاوي/والخيبة ياللي يخطبنك الحريم
ولاء تناظر باستمتاع وسط ضحكاتها
رازي بدلع/جدو تاهر خطبني البارح بالمجلس
مضاوي بشهقة مسكت راسها بوسع عيونها/يمه وقبال الرجال يمه
رازي/خطبني لغيمة وانا ماقلت لا قلت استحي ياجدو استحي لاتحرجني تكفى
ولاء انفجرت تضحك
مضاوي تغطت بطرحتها/ويل كبدي والمرارة وصلت فمي ول يارازي ول تالي عميري اتدسس ويل حالي ويلاه
رازي بجدية/جدة البارح صارت علوم وجدي طاهر قال اني خطيبها حتى يفكها عن الرجال
مضاوي فكت الطرحة عن طرف تناظره/يعني فزعت لهم؟
رازي تقدم لها وانحنى يقبل راسها/اعذريني ياجدة اليوم رحت له وخطبتها بدون اعلمك
مضاوي ابتسمت/ونعم وسبع انعام بولد مثنى كفو كفو ولدي
رازي شد اكتافه بثقة وبابتسامة/اعجبك ياجدة اعجبك انا 
مضاوي ضربته على كتفه بنرفزة/والخيبة روعتني
رازي نط/ومبارك العرس الاثنين
ولاء دقت بالطشت/ليلة ربيع عين وقمرا
رازي زغرط
مضاوي تغطت/وافضحي فضحاه وافضحي
........................................................
<<مجلس الشعر>>
بـيّـن بغيظ قبال جده/وأنا عييت ياجد ومااعود بشي قلته
طاهر/هالمرة بتعود
بـيّـن/لا ياجد لا
طاهر بنرفزة/وانت ماتنقطع لا من فمك ماتنقطع
بـيّـن/يكفي ماتجرعت منها يكفي تلحقني حتى ببيتي تلحقني
طاهر غير وسيلة الاجبار مع بـيّـن وبرجى/طيع جدك هالمرة طيعني تكفى نخيتك ياولد خلف تكفى
بـيّـن انصدم من جده يناظره بصمت
طاهر/هالمرة بس
بـيّـن/هالمرة عمر ياجد عمر
طاهر ميل فمه بابتسامة/هالمرة تستاهل وهالعمر يستاهل وانا جدك
بـيّـن سكت بتردد هل يصدق جده ويثق فيه مثل المرات السابقة وتكون نتايج ثقته الخيبة مثل كل مرة او يرفض ويكمل خطته بدون رجوعه لجده اخذ نفس/سامحني ياجد لكن لا هالعمر اعيشه مرة ماضيعه وانا اعيش بقلق من كثر العيون حولي
طاهر بحدة/بتاخذها ورجلك فوق رقبتك ياولد خلف
بـيّـن احتدت نظرته/ماهو بالغصب
طاهر/هالمرة غصب يابـيّـن غصب
بـيّـن ارتفع صوته/مشيت على هواك سنين و
طاهر زفر/وهالمرة اخر هواي وانا جدك اخره
بـيّـن سكت بحيرة من اسلوب جده الغريب بهالليلة
ظاهر دخل بوجهه الممتلي كدمات وثوبه الواضح عليه اثار معركته شايل ولده
ضاري متعلق برقبة ابوه ورجليه ملتفة حول وسط ابوه
طاهر اتسعت عيونه بصدمة
بـيّـن وقف بخوف/علامك
ظاهر بحدة/زوجني ياجد زوجني الليلة زوجني من بنات سحاب لو موتي على يديهم زوجني منهم زوجني
.....................................
<<بيت ظاهر>>
غصنة جالسة قبال حمدة وان يسارها سلام انحنت لجهتها وهمست/تعوضي الله وانا اختك تعوضيه
سلام مقطبة جبينها بغيرة تناظرهم
نور جالسة قبال جدتها بابتسامة
حمدة تحني نور وسط صوتها الممتلي سرور/واقلبي اللي اقول انه على ملّه..واعيني اللي تقول ان نومها جالي..الصدمة اللي تجي من جيز خلق الله..تصدم جدار الثقة وتموت طوالي
غصنة ناظرت سلام والتقت نظراتهم ببعض وانفجرت تضحك
سلام بزعل/غير البلا جات من خل على خلّه..اليا تذكرتها ويلي على حالي
نور التفتت لهم تناظرهم
حمدة التفتت لهم بغيظ/علامكن يابنيت طاهر هاه علامكن
غصنة/والله ياجدة من يمي ماعلي خلاف مير اتعوض الله بسلام
حمدة/اهبن الله اكبر عليكن كم لكن وانتن تنهلن مني يالحسدان
سلام بغيرة/سولفي علينا ياجدة ماهو دايم تغتاظين تقولين محد يجلس معي هاه هذا حنا
نور بعباطة ميلت راسها لجدتها/جدة رجعي شعري ورا اذني طفشني
غصنة فتحت فمها بصدمة
سلام اتسعت عيونها
حمدة كتمت ضحكتها والتفتت لنور ارجع شعرها ورا اذنها/تبارك الرحمن وازين الشعر وراعيته/احتضنت وجه نور وقبلت خدها ثم ناظرتها بابتسامة/ويل حالي عسى الله لايمنعنا شوف هالوجه يالله
سلام احمّر وجهها وكتمت عبرتها تناظر الارض
غصنة رمشت من انتبهت لملامح سلام ضربت بطرف اصبعها ركبة سلام
سلام ناظرتها
غصنة بابتسامة/اقول ياجدة دريتي بالعلوم
حمدة ناظرتها بفضول/خير ماوراك الا علوم شينة يابنت خلف
غصنة هزت راسها بلا/الا ماازين من علومي مير انك ياجدة علي ماش
حمدة/اعجلي هاتي العلم
غصنة بابتسامة/ظاهر بيعرس
حمدة اتسعت ابتسامتها/عليك الله!!
غصنة/اي والله من متى اكذب استغفرك ياربي
حمدة زغرطت بفرح/يالله لك الحمد الحمدلله مابغى يجي هاليوم ابشري ابشري وانا ام خلف ابشري بحقك
نور قطبت جبينها باستغراب تدري انه متزوج لكن فضلت الاستماع
غصنة/هاه هذا طرف من العلم بس ياجدة
حمدة/هاتي ماوراك كله علامك تقصديني
غصنة/وش تعطيني
حمدة رفعت عكازها
غصنة فزت واقفة
حمدة بنرفزة/اعطيك بذي يامال العافية ياغصنة
غصنة/هاه والله مااعلمك
حمدة/ماجا منك يجي من غيرك هذا هم شوي ويلفون
غصنة تكتفت/والله ماني معلمتك بالعلم الا عشان اشوف فرحتك ياجدة
حمدة قطبت جبينها بشك
غصنة/اليهودي بيخطب بنت الشيخ
حمدة ابتسمت وبحماس/يعني طخ اللي براسه عليك الله صحيح ياغصنة
نور اتسعت عيونها بعد ماربطت الاحداث
غصنة/والله
نور بصدمة تناظرهم/بـيّـن بياخذ يـقـيـن!!
سلام تكتفت وبنرفزة/ليه لايكون بـيّـن ماهو مالي عيونكم!!
نور سكتت بتفكير وسط عدم تصديقها للخبر
حمدة اتسعت عيونها من سلام/بنت علامك على اختك!!شوشي على اختها واهلها اختك ماتشوشين عليها
سلام سكتت بغيظ
غصنة/اصبري ياجدة مابعد قضيت
حمدة/قطعة ياغصنة ماتلفين مرة وحدة الفي بالعلم كله اخلصي علينا
غصنة مدت يدها عالبيت المهجور قبالهم وبكذب/جدي بيحطهم بهذاك البيت
حمدة اتسعت عيونها
منيرة سحبت غصنة من يدها بقوة ولفتها عليها وبحدة/من اللي بيلفي في ذا
غصنة بربكة من أمها/محد
سلام ناظرت جدتها/بـيّـن وعروسته ياعمة
حمدة بغيظ استندت على عكازها وبصوتها العالي/يامال العمى يعقب يلفي اليهودي والجنية بيت عياش يعقبون
منيرة بحدة/ماياخذها ماياخذها وانا بنت ابوي
نور توترت من كلام منيرة
طاهر دخل للبيت وبهدوءه/علامكن شايشات/قطب جبينه من نظرات حمدة ومنيرة/عوذا من ذا العوينات عوذا
حمدة/من اللي بياخذ بيت عياش ياطاهر هاه من!!
منيرة/يبه بـيّـن ماياخذ من هالناس مايقربهم ابد
طاهر رفع يده بوجيههم يسكتهم والتفت لنور/روحي وانا جدك يم المجلس سطام يحتريك
نور وقفت بابتسامة اخفتها/ان شاء الله/دخلت لبيت الجد طاهر/
حمدة/علامك ياطهر تخوره من تالي
طاهر رفع يده يسكتها بنظراته الحادة/اصبري يامرة
منيرة تفرك يديها بغليان منتظرة نهاية ابوها اللي يسكتهم
نور خرجت من البيت بعبايتها اسرعت بخطواتها وهي تلف طرحتها وخرجت
منيرة بعصبية/وش هالعلم يبه وش هالعلم الشين
طاهر ناظر غصنة وسلام
غصنة انحنت ومسكت يد سلام تقومها/مشينا نرقص داخل سلام امشي/سحبتها/
سلام قامت رمشت وراها
غصنة اسرعت بخطواتها لبيتهم مبتعدة
طاهر مرر نظره بينهم وشد على عكازه يكتم غيظه/خير علامكن وش هالأباليس المرتكبتكن ولافية يمي
حمدة بغبنة/صحيح بتحطهم ببيت عياش
منيرة بحدة/ماهو بمعرس ياعمة تريحي
طاهر ناظر منيرة/مير والله الولد باغيها/ناظر حمدة/والمحل محلي احط فيه من أحط محد له كلمة علي
حمدة بحدة/طاهر
طاهر اشر لها بيده/بالهون بالهون ياام خلف
حمدة احتدت نظرتها/ام عياش ذالحين ياطاهر
طاهر/البيت بيت ثم ابو عياش يسوي اللي براسه/ناظر منيرة/محدٍ يرده
حمدة بحدة/ذا قولك؟
طاهر ناظرها بثقة/انتي أخبر الناس بي ماثنيت كلمة ابد
حمدة مشت لبيتها بملامحها المحتدة
منيرة برجفة صوتها وسط لمعة عيونها/تكفى يبه لاتطش بـيّـن يمهم ماكفانا خلف وعياش ماكفاه ماحصل له
طاهر تقدم لها واحتضن كفيها بين كفيه/ياعين طاهر ماطشيته الا وانا وعارف انه كفو
منيرة هزت راسها بلا/ماورا ابوه يايبه ماوراه
طاهر/من خلّف مامات والولد مايحيد عن ابوه يامنيرة
منيرة سحبت كفوفها من كيفه وشدت على كفوفه برجى/تكفى يبه لاتوجعني تكفى
طاهر/ياعين طاهر انا دونه يشهد الله دونه اوجعك بي ولا اوجعك به
منيرة بكت/يابيه خلف مات
طاهر/مامات يامنيرة كان كفت يديني هذا هو يطش روحه بكل مافيه
منيرة بلوم/وتزيده يايبه تزيده
طاهر ابتسم/اركده اركده يابنية
منيرة تناظره بدموعها بعدم تصديق
طاهر/عسى اللي براسه يركد ويكبني على راحتي أعمل ماتشوفه عيني
منيرة/يايبه
طاهر قاطعها مغير وضعية كفوفه ورجع احتضن كفوفها/منيرة
منيرة ناظرته بصمتها
طاهر/تعرفين طاهر ولا ماتعرفينه؟
منيرة هزت راسها وبرجفة صوتها/اعرفه اعرفه وبالحيل
طاهر بتطمين/ترا طاهر جد بـيّـن يامنيرة جدة
منيرة ناظرته بهدوء
طاهر/وتراني جد لظاهر يامنيرة
منيرة ناظرته بشك
طاهر بابتسامة/خطبت لظاهر يامنيرة خطبنا له هالمرة صحيح
.
نور متجهة للمجلس وقفت من مر بسيارته من قدامها كانت لمحة عابرة لكن مامرت عليها مرور الكرام تفحصته بقلق على اختها من كثر الاشاعات اللي تسمعها عنه مجرد شخص عادي حنطي  البشرة ملامحه تنطق بالبشاشة رغم الحدة المرتسمة عليه مر بدون اي اهتمام لاي شخص حوله وكأنه المالك الوحيد لكل ماحوله
بـيّـن ناسف غترته برفعة ضغطه المرتسم على ملامحه بحدة وسط افكاره اللي عزلته عن كل ماحوله ضاغط عالبنزين بكل قوته بدون شعور مسك فرامل بفجعة زلزلته
ظاهر واقف بمنتصف الطريق الترابي الواضحة اثاره عالارض ويمينه بيمين ضاري
بـيّـن بوجهه المفجوع ناظره صرخ من فجعته بغيظ/علامك يامال الجن علامك
ظاهر التفت يناظره ببرود/خذني معك
نور قشعر جسمها من الموقف اللي حصل قدام عينها اسرعت بخطواتها مبتعدة من شافته ينزل وبنفسها/يمه مو صاحين مو صاحين
بـيّـن نزل من السيارة بعصبية وده يجلده من فجعته ثنى يديه الراجفة حول وسطه يخفيها ناظر ضاري/رح البيت
ضاري هز راسه بلا
بـيّـن ناظر ظاهر بصمت
ظاهر/رح ياضاري
ضاري رفع راسه يناظر ابوه
ظاهر ناظره بملامح باردة على غير العادة/رح لامي انا وعمك طالعين مشوار ومعودين
بـيّـن عطاه ظهره ورفع يديه يفك غترته متجه للسيارة فتح الباب ورمى الغترة عالكرسي جنبه
ضاري ترك يد ابوه بتردد
ظاهر انحنى شبه جالس يناظره/ذا عمك عمك بـيّـن ياضاري عمك اللي سمّاك ماهو بمسوي شي
ضاري التمعت عيونه/مير انه
ظاهر قاطعه/ذا اخوي بـيّـن اخوي ياضاري/بأمر/رح يم أمي ولاتطلع من البيت ابد/تركه واتجه للسيارة/
ضاري وقف بمكانه يناظرهم
ظاهر فتح باب السيارة من جهة السواق
بـيّـن ارتفع حاجبه يناظره
ظاهر/قم بأسوق
بـيّـن بوسع عيونه/سيارتي!!
ظاهر ركب ودفه
بـيّـن ماتحرك يناظره
ظاهر يدفه/اعجل علي
بـيّـن زفر ورفع رجوله تارك نعوله عند الدواسات وانحنى شبه واقف وتحرك من مكان السواق للراكب بتافف واضح  جلس وتكتف بغيظ بدون يناظره
ظاهر اعتدل بجلسته مكان السواق بثوبه المقطع اللي مابدله مد يده لغترة بيّن يسحبها
بـيّـن الجالس فوق غترته التفت من حس بسحبتها
ظاهر بجموده/قم
بين/تراها غترتي
ظاهر ارتفعت حواجبه
بـيّـن زفر ورفع نفسه
ظاهر سحبها وعصبها حول راسه
بـيّـن قطب جبينه بشك
ظاهر حرك بالسيارة بسرعة
بـيّـن كبح ابتسامته بحيرة هل فعلا اللي جنبه ظاهر اخوه اللي يعرفه قبل سنين او هو اخوه اللي تزوج وداد وتغير عليه رفع رجوله يتربع بدون لايناظره
ظاهر يسوق بسرعة جنونية متسبب بالفوضى والحركة اللاارادية لكل مابداخل السيارة
بـيّـن المتربع محافظ على توازنه مع كل لفة للسيارة يلتف معها بهدوء وسط تكتيفته
ظاهر بغبنة/تقول اني مجنون!!
بـيّـن/صدقت
ظاهر/تقول ان محد بيقبل بي
بـيّـن هز راسه بموافقة لكلامها/وانت مجنون صدقت
ظاهر التفت يناظره صرخ/انا مجنون
بـيّـن/تراك تسوق يالمجنون
ظاهر ناظر لقدام
بين/مجنون صحيح ياظاهر مير مجنون على حق هو اللي يعرف اشكالها يبقى به عقل
ظاهر ابتسم من تعزيزه
بـيّـن/مير اجر وانا اخوك اجر لها ولك
ظاهر اختفت ابتسامته واحتدت ملامحه
بين بجدية/هي صبرت عليك وعلى اوهامك/التفت له/الحق يقال هي صحيح الكل يشكيها مير تحملتك وانا اخوك وزادتك فوق بلاك بلا وانت ماتسمع لنا وتتعالج
ظاهر بحدة/ماني مجنون
بين/اخوي ظاهر اللي اعرفه مجنون
ظاهر وقف وبصراخ/ماني بمجنون
بين/تعقب ظاهر اخوي مجنون وهول بي زين عقلي للحين مكانه
ظاهر قطب جبينه
بـيّـن زفر/مير اخوي ظاهر اللي قدامي الحين مريض ويحتاج علاجه بدون إهمال
ظاهر سكت
بـيّـن/انت حطيت رجلك على اول الدرج وجلست وش الفايدة لازم ترقى الدرج حتى تاصل للي تبيه/فك تربيعته واعتدل بجلسته يناظر قباله/ولا انت مجنون من مبطي هي مادرت ولا به احد يرضى بك مهبولة من ترضى فيك
ظاهر ناظره/ذا شورك؟
بـيّـن رفع اكتافه/انا مااشور على احد
ظاهر حرك السيارة بسرعة
بـيّـن تراجع وضرب ظهره ورا بالسيارة والتفت له بوسع عيونه/علامك!!
ظاهر/نويت ابدأ علاجي على شورك وأبي قطرة لعيوني 
بـيّـن قطب جبينه/صاحي انت!!
ظاهر وقف عند بيت منور ناظر بـيّـن/كسرت اثنين وثلاث تعاونوا علي
بـيّـن ابتسم يكبح حماسه/وثم؟
ظاهر أشر على عينه الواضح عليها اثار الضرب/أبي قطرة تبرد على قلبي بالباقين
بـيّـن انحنى يسحب سيكتونه رفيقه الثاني بعد طرق وبابتسامة بينفس عن غضبه ويرضي اخوه بنفس الوقت/الله يصلحك ورا ماعلمتني اعزم محارب ورازي يموتون بذا العلوم
ظاهر مسك فوهة السيكتون بيده وبوسع عيونه/هيه!!
بـيّـن ابعد يد ظاهر وعكسه حتى يستخدمه للضرب/افا بس افا/ابتسم/يازين ظنونك المرة الجاية ان شاء الله/نزل بحماس/
ظاهر نزل وطلع فوق التندة وصرخ/يابنت منور لفاكم الراعي رحبي به رحبوا بالضيف ياعيال منور
.
نور دخلت للمجلس بخطوات سريعة وارتسمت ابتسامتها من طاحت عينها عليه
سطام جالس بضيق مرتسم على وجهه يحس بثباته اهتز بعد اللي صار لنور ولا عرف عنها بذيك اللحظة كيف اخته تنطرد ويتكرر نفس الوضع باختلاف المسببات الاولى يـقـيـن والحين نور ياترى وش بيصير لريوف العنيدة اذا مرت بمشكلة وهو اخر من درى ياترى بكل مرة تسلم الجرة او بتنكسر وينكسر معها تنهد بضيق ثم وقف من شافها وقفت على باب المجلس وبصوت واضح فيه الضيق همس/هلا ومرحبا ياهلا
نور سلمت عليه بابتسامة تشع بوضوح جلست
سطام الجالس قبالها ناظر الراحة المرتسمة على ملامحها وانعكست ابتسامتها على ملامحه وبادلها الابتسامة بشي من الحزن وبتنهيدة/سامحي قليل الحيلة اللي مابه خير
نور تغير وجهها بزعل/انت اكبر حيلتي واكثرها بهالدنيا ماارضى عليك ولا ارضى لك تنتقص من نفسك انا ارتكيت عليك يوم الكل تخلى كنت لي نعم الاخ ونعم السند ياسطام عسى الله يبقيك لي ياسطام
سطام امتلى صدره سعة بعد الضيقة اللي كان عايشها من كثر افكاره ولومه لنفسه ناظرها بصمت وسط ابتسامته
نور رمشت من طال الصمت وطالت نظراته/وش فيك
سطام/مايحق لي اقول شي والوجه ينطق سرور
نور بابتسامتها/يحق لسطام ولايحق لغيره امرني ياعيني امرني
سطام/المرة الجاية ان شاء الله المرة الجاية
نور قطبت جبينها/يعني مابتقول ابد ماحولك مراح
سطام هز راسه بلا/ابد
نور تنهدت/على راحتك اقول سطام وش سالفة يقين
سطام تغير وجهه للحظة/كبّي يقين عنك ذالحين انا ابي اسمع منك
نور قطبت جبينها باستغراب/عساه خير
سطام/طاهر جدك خطبك من شوي
نور رمشت بعدم استيعاب
سطام/خطبك لظاهر ولد خلف المتزوج
نور ارتسمت الصدمة على ملامحها/هاه
سطام/جدك خطب أردّه يانور؟
.
..................................
         الـلـيـل
................................
<<بيت طاهر>>
طاهر داخل لبيته مستند على عكازه وقف عند باب بيته فتح الباب قطب جبينه مافتح معه دخل يده بجيبه خرج مفتاحه وجرب يفتحه ومافتح
نور من ورا الباب/ياجد جدتي غيرت الكيلون(مقبض الباب)
طاهر زفر/عيب ياحمدة تطرديني وانا شايب
حمدة من ورا الباب/وتكسرني وانا عجوز!!
طاهر هز راسه/هالشيبات
حمدة قاطعته/تشوف لهن مكان بعيد عني/مشت/
طاهر/ياحمدة
نور باحراج/راحت ياجد
طاهر تنهد ومشى خارج من البيت باتجاه بيت الشعر
.......................................
<<بيت بـيّـن>>
رازي وقف عند الباب يدقه ويطرب غنى/عريسنا يابدر بادي دامت لياليك السرور عريسنا
بـيّـن فتح الباب بقوة
رازي ناظر وجه بـيّـن وانفجر يضحك
بـيّـن بوجه مغطيه به اثرين لكدمات واضحة من ضربات قوية
رازي بسخرية/حي عينه المجلود حيه
بـيّـن عالباب/تبي تصير مجلود انت بعد؟
رازي تكتف/وراك ماعزمتني
بـيّـن خرج/خابر مابك خير
رازي بعدم اهتمام لكلامه هز كتفه يتراجع لورا بخطواته ويطق اصابعه وبابتسامة وبنفس اللحن/عريسنا أسمر معصب مجلود على عين الحضور
بـيّـن قفل الباب وجرى وراه
رازي يجري/ولد بـيّـن ياولد جيت اعلمك بسالفة
بـيّـن يجري وراه مسكه من قفاه بياقة ثوبه
رازي صرخ/علم علم ياولد علم
بـيّـن حركه يمين ويسار/اخلص علي
رازي/وش رايك نروح يم سرّاي
بـيّـن بعدم اهتمام/ماني بفاضي لعلومك ذي
رازي اتسعت عيونه/علامك!!
بـيّـن ضرب رازي على راسه
رازي/اااه
بـيّـن/طسّ وارقد فكنا من علومك ذي
رازي فك يد بـيّـن عنه بالقوة والتفت يناظره بشك/اقوله من جدك!!
بـيّـن تنهد/ذالحين انا نسيب سحاب العين علي لازم اهجد ذا اليومين فكني شرك
رازي ناظر بصمت بتفكير تنهد/يعني صامل
بـيّـن عطاه قفاه ومشى لبيته/ابو الصواميل كلها/وقف ثم التفت له/انا ماني قايل لاعاد توطوط عندي
رازي ارتفعت حواجبه/وخير ياطير!!
بـيّـن/الطير اللي يطير بك ويرجدك بالارض
رازي/اعوذ بالله من فمك
بـيّـن/معلمك عندي اهلي
رازي/صادق انت
بـيّـن/وليه اكذب عليك
رازي/مااخبر احد سواها من اول/ابتسم باعجاب/والله ماانت بهين استغلال الفرص من اولها
بـيّـن جرى باتجاهه/طرق
رازي جرى/يااااوك لحقني هو وخويه ياااااوكك نعنبوا حيكم يالاثنين
.............................................
<<بيت الشيخ>>
يقين قافلة بغرفتها على نفسها بانهيار من فظاعة وضعها بعينها كيف تضحي بها جدتها بهالطريقة كيف شككت بسمعتها وشرفها كيف ماراعت قرابتهم كيف ماخافت ربها قذفتها وهي تدري بطهارتها واستحالة حدوث هالشي كيف تخلصت منها بكل سهولة بدون اي اعتبار لها ولمكانتها عندها كيف تصيدت الفرص حتى تكسرها باتقان وبدون اي ندم كل هذا في سبيل ذاك الحفيد المبجل بعينها رفعت عينها للباب من وصلها صوته احتدت نظرتها فوق قهرها منه تجرأ ودخل لبيتهم بدون أي اعتبار لحرمته فزت من سريرها فتحت دولابها لبست فروة ابوها مدت يدها لمكان الشال الخالي كعادتها بلعت غصتها وسحبت طرحتها ولفتها على راسها وتلثمت تلفتت حولها تدور عن اي شي تاخذ حقها منه لكن للاسف مافيه شي تقدر تسويه هالمرة ناظرت يديها بقلة حيلة استجمعت شجاعتها وفتحت الباب
عزيز تراجع بخطواته لورا من فتحت الباب
يـقـيـن بحدة ودون رحمة لحنجرتها اللي كل ماتشافت شوي تراجعت مبتعدة اكثر عن الشفاء نطقت ببحتها/ماهي بغريبة عليك قلة المروة إتختل(يتسلل)بالليل والناس نيام
عزيز/يابنت العم
يـقـيـن قاطعته بقهر/انت خليت بها عم اي عم تقصد اخاف ان لك اعمام ماادري بهم
عزيز شد على قبضته يستجمع شجاعته/يابنت منصور
،
،
~ليلة اختفاء يقين~
يـقـيـن شايلة صينية العشا تجر خطواتها بملل متجهة لمكان الشلة المعتاد نزلت الصينية عالارض كشرت بوجهها من سمعت صوت ضحكته همست لنفسها/تقلعت ضروسك على ذا الضحكة/وقفت بتقطيبة جبينها من سمعت كلام الطرف الاخر باهتمام/
سهم/ياسرع الايام ياولد مرت ست سنين وعمك للحين على حاله
عزيز تبددت ضحكته وجمدت ملامحه
سهم/بشر عساه ان شاء الله احسن
بارود يتقهوى/للحين على حاله مير ازين انه على حاله
عزيز بحدة/بيطيب ان شاء الله و
سهم قاطعه/ووش بتقول وقتها
بارود/ياعم حديتك حتى ماتعلّم جدتي انك دريت باللي ماتبيك تدري عنه
يـقـيـن سرت رجفة بجسمها من فجعتها
عزيز بنرفزة/مادريت ان حدتي له بتقلب السيارة
سهم ارتشف من كاسته/ولا دريت انك بتبرد عظامك وتهج وتكبه
بارود/زين مانزل من السيارة ومشى عنه ولا كان به علوم
سهم التفت له بوسع عيونه/من قاله!!
عزيز شد على قبضته بقهر
بارود بصدمة/نزل!!ويل حالي وشلون الشرطة ماشافوا اثره/هز راسه/ايه نسيت جدتك سحاب
يـقـيـن هوى قلبها بفجعة جدتها تدري بفعلته والأمر غطت عليه انسابت دموعها قهر على ابوها
سهم بندم/ايه ماازينها لو ان الراعي اللي لقاه لحاله كان ضبطت عالكيف
بارود هز راسه/مير شايبه الشكوى لله ماجت عالكيف
سهم وبارود التقت نظراتهم وضحكوا
عزيز اللي أكله الندم بعد اللي سواه بعمه ذاك اليوم وللان يلوم نفسه على جبنه بذيك اللحظة وقف يناظرهم بحدة شاد على قبضتيه
سهم ارتفع حاجبه باستغراب/علامك!!
//التفتوا يناظرون الباب//
عزيز كتم غيظه/انا بأفتحه/اسرع بخطواته وفتح الباب انخطف وجهه يناظرها/
يـقـيـن بعيونها تلتمع من دمعها وسط احتداد نظرتها  وتتوسط السكين كفوفها الموجهة بثبات لقدامها بصوت اهتز للحظة من عبرتها بحقد/ذبحت أبوي وتبكي عليه!!/وجهت السكين باعلى صدره وغرزتها بدون اي تردد
عزيز شهق من صدمته
يـقـيـن عدلت وضعية كفوفها وحركت السكين لاسفل بجسم عزيز بدون رحمة
عزيز مسك يديها يوقفها وسط ألمه/يقين
يـقـيـن صرخت/موووت
عزيز دفها بعيد عنه وطاح عالارض
يقين تقدمت خطوة باتجاهه وقفت تناظرهم
//سهم وبارود جروا باتجاهه//
سهم رفعه لحضنه
عزيز يأن بألم
بارود جلس جنبه بفجعة مرتسمة على ملامحه
سهم رفع عينه ليقين الواقفة بثقة وبدون اي خوف من اللي سوته
يـقـيـن دخلها الخوف من فهمت الشر بنظراته تراجعت بخطواتها لورا ثم هربت
سهم من بين اسنانه/امسكها لاتهج
بارود بصدمته
سهم صرخ/بارود
،
،
يقين بانفعال/لاتطريه على لسانك لاتطريه
عزيز استرسل بدون اهتمام لاتفعالها /مالفيت لهنيا الا حتى اتوكد منك كان ماتبينه ابشري بي يشهد الله مالي نية غير طيبة خاطرك
يـقـيـن ضحكت بسخرية/طيبة خاطري!!/بحدة/أحيا بجحيم الراعي ولا جنتك ياولد زايد وصلك العلم!!/قفلت باب غرفتها بوجهه/
عزيز اكتسى وجهه السواد وتجدد صدره بالخيبات فقد الامل هالمرة فعليا انطوت صفحة حبه مع يقين قبل تبتدي حتى انحكم عليهم بالفشل من ذيك الليلة تسكرت كل الابواب بوجهه لف يجر خطواته منهزم وقف بمنتصف الحوش من شافها قبله التزم الصمت ومر من جنبها
مبروكة مسكته من يده وقفته ولفته عليها
عزيز ناظرها بملامح اليأس المعتلية وجهه
مبروكة سددت له كف بكل قوتها
عزيز ارتسمت الصدمة على ملامحه
مبروكة بغيظ/تذكر هالخيبات ياولد زايد واحفظهن زين
عزيز ناظرها
مبروكة تنهدت/وثم كان خاطرك مايبي الا هي حتى وان اخذها الراعي ابشر ياولد زايد تاخذها طرق ابشر
..........................................
#شقّ_الغَمام