شـقّ الـغَـمـام

..(٢٩)..

..(٢٩)..
سبحان الله وبحمده سبحان الله الغظيم،،اللهم صل وسلم على نبينا محمد
-
مبروكة التفتت لورا بحدة/بنت ريوف
ريوف قشعر جسمها بصدمة من جدتهااخرجت من جيوبها علب الموية اللي كانت متجهة بها من الاساس من المطبخ للغرفة لولا فضولها اندفعت للداخل بتصنع العثرة /يمه
ام سطام وقفت واتجهت لها سحبتها من يدها بكل قوتها وبحدة/تتسمعين ياقليلة الخاتمة
ريوف بزعل/يمه علامك علي وش اتسمع اخذت موية من المطبخ وجيت اشوف من عندكم وعثرت ماسمعت شي وثم اذا سمعت كلها سوالف لاتودي ولاتجيب
ام سطام ناظرتها بحدة بشك
ريوف/الا كان به شي ماتبوني اسمعه
ام سطام مشت ساحبتها معها وخرجت من الغرفة ودفتها بالحوش/يالله قدام عيني على الغرفة واقفلي الباب يالله
ريوف/ماسلمت على جدتي
ام سطام/وصل سلامك امشي يالله اذلفي
ريوف جرت خطواتها بغيظ دخلت الغرفة وقفلت الباب وراها بكل قوتها مصدرة صوت عالي  تبددت ملامح الغيظ وارتسم الفزع على وجهها جثت عالارض برعب من اللي سمعته/ياويل قلبي عليك ياابوي لو دريت ياويل قلبي
ام سطام دخلت وجلست
سطام ناظر جدته بعقدة حواجبه
مبروكة ملتزمة الصمت
سطام/هاه ياام زايد علامك ساكتة/احتدت نظرته/ماعلمتيني ابوي من اي لحية؟
ام سطام شدت على يديها برجفة وبصمتها طول هالسنين مجبرة ،هالصمت كان اساسه خوفها من عمتها على كثر ثقتها بها الا انها تخاف منها فوق مايتخيله احد ماتجرأت تسألها قبل ذيك المرة ابد بخوف من ردة فعلها لكن هالمرة بتجاوب وغصب هالمرة مو زينة اللي ودها تعرف وين قطعة قلبها المفقودة هالمرة سطام الرابي على يدين منصور سطام المصر مايتنازل عن اصراره ابد يتعامل بهدوء وصبر وتحمل مابتقدر عليه مبروكة مابتقدر تمتنع عن جوابه لانه وصل لنهاية حدود صبره
مبروكة احتدت نظرتها/اعقب يالخسيس وش هالنشدة اللي مااخس منها  اعقب ياولد منصور اعقب!!
سطام بحدته/اجل نشدتي خسيسة!!لا بالله الحق لو انه امشي وادق باب بيوت بني سمّار باب باب وانشدهم
مبروكة بنرفزة/تعقب وتخسى ياقليل الحيا والمروة تشكك بأمك وأبوك
سطام رفع صوته بقهر واشر على اذنه بيمينه/سمعتك بذي اللي بياكلها الدود سمعتك انتي وامي تتطلبك وين مكان بنتها
مبروكة/تعقبون وتخسون منصور ماله غير بنتين وولد
ام سطام بردت عظامها
مبروكة/يقين وسطام وريوف واللي ينطق حرف على عيال ولدي ذبحته على عيون الجميع
سطام ناظرها بتكذيب/واللي سمعته!!
مبروكة زفرت بابتسامة/كله خيالات عاشت بها زينة وانا جدتك
ام سطام رجف قلبها كل ماعاشته طول هالسنين كانت كذبة من مبروكة كذبة عيشتها بكآبة وكره لحياتها،عاقبتها هالعقاب القاسي لمجرد كسرت صورة منصور بعيون بني سمار كانت تقدر تقتص حقها من خلف بغير هالطريقة السيئة بعين مبروكة ذلت منصور ومبروكة ماترضى على عيالها ذرة وانتقامها كان بكسر فرحتها الكبيرة واكبر افراحها واعظمها بعينها يوم ولادة سطام وكان ولد هالفرحة ماتعادلها فرحة بحياتها كلها انتقمت منها اشد انتقام عذبتها بولدها وهالعقاب كان اكثر من مرضي لمبروكة وخاطرها ناظرتها زينة بدموع انهمرت بغزارة من كثر القهر كم عذبت سطام كم ابعدته عنها كم احرمته من احضانها كم اوجعته بأفعالها كم دعت عليه بالموت والامراض الى حد استجيبت دعوتها ومرض رجف قلبها وحست بوجع اجتاحها من ذكرت سطام المسكين ونظراته طول السنين اللي راحت،سطام الفرحة الكبيرة الموجعة لها التفتت له تناظره زادت دموعها بغبنة من ناظرت تهميشه لها
سطام يناظر جدته بدون اي اهتمام لامه
ام سطام ناظرتها بخيبة وسط دموعها/ليه ياعمة كل ذا ليه!!مارحم قلبك وليد منصور/صرخت/مااحب من الولد الا ولده
مبروكة التفتت لام سطام وبابتسامة رضا وانتصار/من يطأ على ظل عيالي اعزفّه الدنيا وغواليه وكل مافيها لو هو قطعة مني يازينة
ام سطام ناظرتها برعب منها لاول مرة تحس هالخوف منها فعلا كل مافات ماكان خوف حقيقي هالمرة وصلت لها حقيقة مبروكة المخيفة وأنانيتها ماترحم ابد ماترحم ولاتغفر على من يلمس لها طرف احتوتها رجفت رعب واختنق صوتها/ولد منصور تعذب من امه على حسك ورضيتي
مبروكة ابتسمت/عذابه بكفه وخيبة منصور منك بكفة يازينة ومنصور عندي يسوى الدنيا ومافيها
ام سطام ناظرتها بجمود
سطام نفض يديه من حس بقشعريرة سرت بجسمه وسط ضحكة خفيفة
ام سطام التفتت له تناظره
مبروكة قطبت جبينها
سطام بابتسامة/يعني انا ذقت حصيلة تحدي بينكن ساقته جدتي وصدقته امي!!
ام سطام ناظرته بحسرة وندم ياكثر مااجرمت بحقه لو تتعذر عمرها الباقي كله وشلون يغفر لها/سطام
سطام ناظرها بجمود للحظة وتجاهلها
ام سطام لاول مرة توجعها نظرة منه تأكدت من هالنظرة وين مكانها بقلبه بالاصح ماعاد بقى بقلبه ذرة رجى من وراها عضت شفتها العلوية وانهمرت دموعها
سطام ناظر جدته/يعني ذالحين انا ولد منصور بحق وحقيق وش اللي يثبت
ام سطام انعصر قلبها من سؤاله ناظرته بحزن احتواها على حالتها وحالته انعدمت الثقة وانعدم الامان بينهم ولاتلومه هي السبب بكل ماحصل بينهم
مبروكة بحدة/ناوين موتك ياورع!!
ام سطام ناظرتها بقهر
سطام/الحرص واجب!!
مبروكة/اعقب مااقوى عينك
سطام بابتسامة/لاتلوميني تخبرين ياجدة وراي جدة مثلك
مبروكة بحدة/تعقب اضرك
سطام ضحك/ضريتيني بأمي!!
مبروكة بحدة/مير ماارضى الضر لك على عيون الجميع
سطام هز راسه وبسخرية/يوووه ياكثر الضر مير انتي على حسب ماتشوفين المعذرة على حسب ماتحسين!!
مبروكة/وتالية العلم ياسطام
سطام/تاليته تعرفينه بكرة مع القوم 
مبروكة/وشو!!
سطام وقف/علاجي فات وقته
مبروكة/سطام
سطام باصرار/حتى سحاب مابتقدر تجبرني بكرة تعرفين العلم ياجدة
مبروكة رصت على اسنانه بقهر منه
سطام/البيت بيتك تصبحين على خير/مشى/
ام سطام فزت وراه
سطام خرج من الصالة متجه لغرفته وقف من حس بها وراه التفت لها
ام سطام وقفت وبنبرة ندم/سطام
سطام/تكفين خلينا مثل ماحنا قبل هالنبرة وهالنظرات تخوفني
ام سطام ناظرته بدموعها
سطام/كفكفي دموعك واشكري فعايل يديك هاذي هي طلعت رجال من تحتها/ابتسم/هذا هم اختاروني شيخٍ عليهم!!
ام سطام بدموعها/مير اني ماابي شيخ ابي ولدي
سطام زفر/ياكبرها يمه ياكبرها ذالحين صعبة صعبة بالحيل يمكن بعد سنين تلقينه الله العالم/لف عنها معطيها قفاه مبتعد/
ام سطام بكت بحسرة ثم التفت جارة خطواتها السريعك بغضب صرخت/ليه تعملين بي كذا ليه
مبروكة الواقفة مستندة على عكازها باستعداد للخروج والاتجاه لبيتها بعدم اهتمام/وصلك العلم
ام سطام صرخت/عمة!!
مبروكة رفعت صوتها/يامال العمى لايرتفع حسك لاأمحيك
ام سطام بقهر/الدنيا ماتدوم لاحد هاذي هي قلعت حبيب قلبك عزيز عن الشيخة بكرة تطير السحاب عن الديرة كل ابوها
مبروكة بحدة/زينة!!
ام سطام/يومها والله لاارقص وسط رجال بني طاهر واتغنى معهم من كثر الفرح والله/مشت عنها وتركتها/
مبروكة شدت عكازها بغبنة جرت خطواتها خارجة بغيظها
.
............................................................
    يـوم جـديـد
............................................................
.
يـقـيـن بعبايتها منزلة طرحتها على اكتافها ونقابها فوق الطبلون قدامها تسوق السيارة بملامح كلها غيظ
بـيّـن جالس يهمهم بصوت متكتف ارتفع للحظة وضرب بالمقعدة بقوة من اكلت بالسيارة نزلة قوية عالطريق الترابي التفت لها بوسع عيونه/ااااه!!
يـقـيـن عينها عالطريق/من وين ذالحين ألف؟
بـيّـن بملامح غيظ من سواقتها/لذالحين امشي الى مااعلمك توقفين
يقين بنفس العبوس من قلة نومها هاليومين ماردت
بـيّـن ناظرها بعدم رضا من ملامح وجهها الناطقة بمشاعرها بوضوح/علمتك ارقدي شغلتي ادور مكان الرحيل وش عليك مني
يـقـيـن/رجلي على رجلك ماني بكابتك
بـيّـن اتسعت عيونه/ذا كلي وماني مالي عيونك!!
يـقـيـن/الا والله فايض منها ومايوازيك احد مير انت لذالحين ماطبت
بـيّـن ميل فمه يناظر وجهها وبتأنيب ضمير/ليتك رقدتي ازين لك من ذا التعب
يقين نزلت نزلة بنفس السرعة
بـيّـن ضرب من جديد/عوذا يوم انك شايشة علامك جاية معي
يـقـيـن/ماني بشايشة صاكتني الشمس بوجهي
بـيّـن عقد حواجبه بتكذيب والشمس بجهته وهي جهتها بالظل
يـقـيـن مدت يدها للراديو/عسى نسمع شين زين
بـيّـن/اي والله شغليه بلكن تروح الشياطين حولنا
يقين التفتت له بغيظ/وش قصدك
بـيّـن رفع صوته/عينك عالطريق
يقين اسرعت بعناد
بـيّـن ارتفع وضرب بالمقعدة من نزلت نزلة
يقين استوت بالسيارة بالطريق التفتت له/ماعلمتني وش قصدك؟
بـيّـن/قصدي كل خير ماقصدي شي
يقين ضربت الراديو بيدها/وجع حتى هو مابه خير
بـيّـن اتسعت عيونه/وش قصدك
يقين بدون تناظره بملامح غيظها/قصدي واضح كل واحد مابه خير/التفتت له/علامك وش فيك علي
بـيّـن ناظر لقدام يتفادى الحرب اللي تغلي بينهم على نار هادية/مافيني شي
يقين/تعرف تغني؟
بـيّـن التفت لها عاقد حواجبه/ليه؟
يقين/دام الراديو خربان غن واطربنا بدل هالرجة اللي لعبت بنا
بـيّـن تكتف بتفكير وغنى من اعماق قلبه بصوت كله حب رغم نشازه وشذوذه عن اللحن كله أمل عسى يوصلها مقصده وتفهمه/يامـن يـراعـيـني بعينه وأراعيه بعيون قلبي كل مالاح زوله
يقين مسكت فرامل بكل قوتها فجأة
بـيّـن تقدم بجسمه ومد يدينه لقدام مثبت نفسه وبفزع/علامك
يقين التفتت له/انزل يالمجرم
بـيّـن اتسعت عيونه
يقين/لو يسمعك من قالها ذبح روحه اخلص علي انزل يالله
بـيّـن بنرفزة/اقول عاد تراها طالت وبالحيل تنزليني!!
يقين حركت/حقك علي
بـيّـن بملامحه الحادة يناظرها
يقين/انا الغلطانة بالاخير
بـيّـن ناظر لقدام اخذ نفس يكبح نفسه لاينفجر عليها
يقين فاهمة وعارفة قصده حبت تغيظه شوي وتلعب بجوه تبي توصله لاقصاه وتقيس كثر احتماله وصبره عليها
ابتسمت وضربت باطراف اصابعها عالدريكسون اللي بين يديها بطرب وبصوتها المبحوح غنت/يامـن يـراعـيـني بعينه وأراعيه
بـيّـن اتسعت عيونه واحتلت الابتسامة وجهه التفت يناظرها بعدم تصديق لجرأتها ماتوقع تجاريه وقبلها ماتوقع تغني قدامه ابد 
يقين غمزت له
بـيّـن يناظرها بذهول
يقين/بعيون قلبي كل مالاح زوله/ضحكت بخفة من ناظرت وجهه واتضح برجفة صوتها/يفز قلبي لاتبدت مواريه/ميلت راسها بخفة له وغمزت بقصد صريح جدا/واغض عنه الطرف والناس حوله
بـيّـن انتفض قلبه من تصريحها اخذ نفس وناظر لقدام بابتسامة واستمتاع بصوتها متجاهل لكل شي بهاللحظة
.
............................................................
<<مجلس الديرة>>
//المجلس مزدحم ببني سمار//
سهم جالس بعيد وكثير عن صدر المجلس هالمكان يرجعه ويصحيه لحقيقة وضعه ومكانته وكأنه ممنوع عليه ومكتوب ماتكون الشيخة من نصيبه ابد مهما وبذل ماهي مقدرة ابد شد على يديه بقهر
سطام جالس يمين المكان المخصص لجلوس الشيخ عادةً صدر المجلس تحديدًا/ارحبوا يياهلا ومرحبا بقومي يالله ان تحييهم
ابو عايد اشر على مكان جلوس الشيخ/علامك ياابو منصور مكانك خالي
سطام ابتسم/انا بمكاني الصحيح ذالحين
ابو عايد قطب جبينه باستغراب/ياابو منصور ماعلمتك سحاب بالعلم
سطام ابتسم/العلم دريت به وماني بقابل به
ابو عايد بصدمة من رفضه/وليش ياسطام مابعد عمك وابوك انسب للشيخة منك
سطام/ماعييت عن الشيخة ياابو عايد الا منى عيني اقوم بامور ربعي على احسن مايكون مير
ابو عايد قطب جبينه بشك/مير وشو
سطام/الرواتب اللي تاخذونها مالي قدرة عليها اقصاي اسعى باموركم على مقدرتي
ابو عايد سكت
سحاب/مير الرواتب عمرها مادفعها شيخ كل ابوها مني من سحاب الديرة اللي تمطر بخيرها عليهم
سطام ميل فمه بعدم رضا/مير سحاب الديرة غير وشيخها غير
سحاب احتدت نظرتها بغبنة
سطام/الشيخ يسعى لقومه ماخبرته يصرف عليهم
سحاب شدت على قبضتها بقهر
سطام/والشيخ يحكم بينهم وياخذ حقوقهم ويتفقد امورهم كان رضيتوا بي ابشروا بي اعاهد الله ثم اعاهدكم مايرقد منكم جايع وبيتي مليان وماينوخذ حق مظلوم وراسي يشم الهوا يابني سمّار
ابو عايد/يعني سحاب
سطام قاطعه بثقة/تتبعون الشيخ ولّا سحاب؟
ابو عايد سكت
سحاب شدت على قبضتها بقهر/بني سمّار يتبعون شيخهم عمرهم ماطلعوا عن كلمته
سطام التفت لابو عايد ومرر نظره عالمتواجدين/سمعتوا رايي وكل مابخاطري كان رضيتوا بي فأنا اقدمكم ماخذ برايكم على مايرضي الله
ابو عايد مرر نظره عالمتواجدين يستطلع اراءهم بنظرة سريعة ابتسم/اقدم ياشيخ وحنا وراك
//تعالت اصواتهم بعد سماع ابو عايد بالتأييد والموافقة لشيخته عليهم//
ابو عايد/حيك ياشيخ اجلس بمكانك
سطام وقف وناظر مكان ابوه بشي من الحنين تنهد وجلس مكانه بابتسامة/عسى الله يجعلني معين لكم
سهم شد على قبضته بغبنة بعيون تنطق نار وشرار من كثر قهره
سطام/لايردكم شي مالحقتوا علي بالمجلس بيتي تخبرونه حياكم الله
ابو شاهر دخل للمجلس بوجه مكتسيه السواد وبشر/سطام
سطام احتدت نظرته ثم ابتسم/حياك ياابو شاهر خياك عسى جبت مااتفقنا عليه
ابو شاهر بحدة/وينه ولدي ياسطام
سطام قطب جبينه باستغراب
سهم تهلل وجهه من وصول اول الكوارث للشيخ الجديد واتهام مباشر على عيون الجميع
سطام/استهدي بالله ياابو شاهر/بشوفة نفس/وثم دربي ودروب ولدك لو تنطبق السما عالارض ماالتقت!!
ابو شاهر بقهره/طلعه طلع ولدي لااشتكيك ياسطام
سطام/كان لك شي عندي ابشر مير ولدك مالي علم به ابد وان ماعجبك قولي رح سو مابدا لك
.
............................................................
<<بيت طاهر>>
ظاهر جالس قبال جدته يقهويها
حمدة ناظرته/علامك جاينا من الصبح ماهي عوايدك
غالية ابتسمت
ظاهر/يعني ماتبين شوفي ياجدة
حمدة/الا والله نبيه مير شوفك ماهو لله هالنوبة
ظاهر بوسع عيونه/استغفر الله ياجدة احسني الظن
حمدة/استغفر الله استغفر الله عوذا من ذنبك عوذا
ظاهر ابتسم من طاحت عينه عليها
نور متجهة لهم وبيدها صحن التمر انحنت شبه راكعة
ظاهر مد يده لها/هاتيه لاتسوين هاللون بتتوجعين
نور اجتاحتها حرارة من كثر احراجها اعتدلت بوقفتها ومدتها له
غالية تجنبت تناظرهم وثبتت نظرها على فنجالها
حمدة/الله اكبر ياظاهر اثاريك تعرف الوجع!!علامك كابّها تخيط وراك بخلان ماتشتري لها قبوع كسرت ظهرها يامال القَبعة ياظاهر
نور التفتت لجدتها بوسع عيونها/ياجدة انا سويتهن لك احب اخيطهن
حمدة ناظرتها/اوص انتي
نور سكتت بغيظ
حمدة ناظرته/عزتي ياخلف مابك ذرة من بخل وشلون جبت مثله!!
ظاهر/عيوني لها ياجدة ماوقفت على قبع عاد!!
نور ناظرت ظاهر برحمة من لسان جدتها
حمدة/ايه كلام بس والفعول مانشوف شي
ظاهر/وعد ياجدة بكرة الصبح والقبابيع مالية بيتك هاه رضيتي
حمدة/العمل ماهو على القبع ياولد خلف
نور ناظرت جدتها باستغراب
ظاهر/سمي ياجدة
حمدة بحدة/وش انتي مسوي ياولد خلف يومها تون البارح بفراشها هاه وش مسوي
نور اتسعت عيونها بذهول
ظاهر تغير وجهه وناظرها
حمدة بحدة/كبها لاتناظرها وناظرني وش انت مسوي بالضعيفة حتى الصياح ماتقدر تصيح هاه لايكبر راسك ياولد خلف تراني لذالحين حية من وطى لها على طريف كسرت راسه
ظاهر مارفع عينه عن نور بتفكير وش اللي وصلها لهالحالة وهو عاهدها ياخذ حقها ليه كل ذا الحزن والوجع يحتل قلبها بوجوده
نور بدفاع/جدة والله مافيه شي لاتظلمين ظاهر ياحدة
حمدة/والونين تالي الليل وشو له هاه
نور/يمكن وجع من نومتي الغلط ويمكن/سكتت/
ظاهر ناظرها باهتمام
حمدة/ويمكن وش
نور/يمكن تخيلين ياجدة
حمدة اتسعت عيونها/اهبي يانور اهبي
نور انكمشت على نفسها للحظة/جدة قلت يمكن
ظاهر/لاتهاوشينها جدة!!
غالية ضحكت بخفة
حمدة مررت نظرها بينهم/ووجعوه كلن نافخ ريشه يحامي عن الثاني/رفعت عكازها ودفت بطرفه ركبة ظاهر/قم قم خذ مرتك واذلفوا عن وجهي قوموا يالله
نور/جدة
ظاهر ماصدق طردتهم وقف
نور ناظرته
ظاهر/يالله نور جدتي زعلت علينا لاتغثينها
حمدة ناظرته بتقطيبة جبينها
ظاهر/ياالله نور
نور وقفت وانحنت مقبلة راس حمدة
حمدة اخذت نفس
ظاهر تقدم لها مد يده ومسك يدها يسحبها وراه/امشي يالله /خرج وخرجت معه/
حمدة/يالله العوض حتى نست تلبس عباتها مشت وراه كذيا
غالية/يمه خليهم براحتهم محد شكى شي
حمدة/غويلية سنعي امورك بالاول ثم انصحيني
غالية/يمه يمكن صدق إتخيلين
حمدة/يامال الخيال طسي عن وجهي روحي يم اختك طسي
ظاهر مسرع بخطواته ويده بيدها فتح باب بيته ودخل ودخلها وراه وقفل الباب ترك يدها وناظرها بخوف/علامك به شي يوجعك
نور هزت راسها بلا وسط وجهها الشاحب من خطت بالبيت/مافيني شي جدتي يورّا لها
ظاهر ماظر وجهها الشاحب بشك/نور اصدقيني بك شي
نور ابتسمت/مافيني شي ارتاح
ظاهر ميل فمه بشك تنهد من سمع جوابها/زين/مشى لداخل البيت/
نور شدت على قبضتها بعدم احتمال وبرجفة صوتها/ماعاد اقدر اتحمل اكثر من كذا ياظاهر
ظاهر التف لها وانصدم من ملامحها وردة فعلها القوية همس/بسم الله وش فيك
نور بقهر/ليه ياظاهر ليه تسوي بي كذا ليه
ظاهر بعدم فهم للي يصير/وش سويت علامك!!
نور بدموع ملت محاجرها تقاوم انسكابها/ليه ترخصني بعيون الكل واللي مايسوى قبلهم جميع ليه
ظاهر تقدم لها مسك يديها/لااله الا الله يابنت استهدي بالله وعلميني وش فيك
نور سحبت يديها من يديه بقوة
ظاهر اهتزت مشاعره بوجع للحظة
نور بانفجار/وش فيني!!طليقتك تتوسط بيتي وتتشمت بقدري عندك ليه تعطيها مجال تتشمت فيني ليه
ظاهر احتدت ملامحه/وداد جت هنيا!!
نور بغبنة/حتى غرفة النوم ماكلفت روحك تغيرها لهالدرجة انا رخيصة بعينك ياظاهر!!
ظاهر مد كفوفه محتضن كفوفها/نور
نور انهمرت دموعها سحبت كفوفها
ظاهر شد على كفوفها/نور تخبرين وشلون حصل زواجنا وشلون بيطري علي هالموضوع بكبره تذكرين ميف كان وضعي ووضعك كل واحد منا كاره للثاني
نور سحبت كفوفها بالقوة منه/ماني بمجبورة اسمع تبريراتك اقل حقوقي اعيش ببيتي كل مافيه يخصني ما لاحد غيري اثر فيه 
ظاهر/ابشري وتامرين امر انا المخطي وغابت عني حقك علي انا اسف يانور انا اسف
نور بغبنة من اسفه الصادق/اللي يقهر ياظاهر اني ادري والله ادري بمكاني بقلبك لكن هي كسرت كل مافيني ياظاهر شككتني بمكاني عندك حتى عطرها بمكانه ماتحرك ياظاهر ماتحرك
ظاهر مد يده ليدها سحبها خارج بها من هالبيت
نور مشت وراه
ظاهر وقف برا بيته واشر بيده/ذا ماهو ببيتك ذا اللي تبين تقولينه صح؟
نور هزت راسها بايه وسط دموعها
ظاهر/اصبري دقيقة/دخل للبيت/
نور واقفة تنتظره
ظاهر خرج بيده شنطة ملابسها
نور ناظرته بوسع عيونها
ظاهر/امشي هالبيت وعد ماتدخلينه الا وهو خالص تحت عينك وعلى هواك
نور ناظرته بطيف دموعها
ظاهر مد يديه لخدودها ماسح لدموعها واثارها على خدودها/هاه يرضيك هالقول؟
نور ناظرته بصمتها
ظاهر مد يده ليدها واحتضنها/مشينا
نور برجفة صوتها/وين بنروح؟
ظاهر مد يده ليدها وشد عليها ومشى بها للسيارة/مايهم وين نروح المهم إنا سوا و بخير
نور وقفت باستدراك/لحظة عبايتي عند جدتي/ابتسمت/باجيبها واجي
ظاهر بابتسامة/لاتبطين علي احتريك بالسيارة
نور مشت بخطوات سريعة
ظاهر اختفت ابتسامته خرج جواله بملامح محتدة  وارسل رسالة
.
............................................................
<<شقة محارب>>
محارب رمى نفسه عالسرير بتعب من الطريق تمدد على ظهره وتنهد بصوت
ولاء الخارجة من دورة المياه تمسح يديها بالمنديل ناظرته/محارب لاتنام ترا كلها ساعتين عالصلاة بعدين ماتقوم
محارب تمدد على جنبه يناظرها/ساعتين عسل عالقلب
ولاء/بس انت ماتصحى صل وبعدها نام
محارب/يعني؟
ولاء جلست على كرسيها قبال مراية تسريحتها تحط كريماتها/اكيد
محارب تمدد على بطنه وعينه بجواله
ولاء قطبت جبينها من ناظرت اهتمامه الغريب بالجوال وبهدوء/وش تشوف
محارب قام من السرير واتجه لها انحنى مقرب لها جواله/شوفي 
ولاء وقفت وجلسته عالكرسي مكانها/اجلس
محارب مد يده لها وسحبه له جلسها على رجوله وعينه على جواله
ولاء تصنعت الراحة رغم خجلها من حركته
محارب باهتمام يقلب بصور الدراجات النارية/بالله كيف وش رايك
ولاء تناظر بشي مو من اهتماماتها ابد/ايه دراجة عادي!!
محارب ناظرها بشي من الزعل/هذا نفس لاسألتيني عن الحمرة وقلت كحل
ولاء ضحكت بخفة/وصل جرحك!!
محارب يقلب بالصور/ذاك اليوم شفت واحد واقف عند الجامعة وعرفت حبي الحقيقي
ولاء التفتت تناظره بوسع عيونه
محارب/ماهو الطيران ذا الدراجات/تنهد بحسرة/ليتني اقدر اشتري واحد
ولاء/لايكون ناوي تترك الدراسة!!
محارب ناظرها بوسع عيونه/سلامات!!
ولاء/ذا قولك!!
محارب/صح اني وقعت لكن وقعتي الاولى أشد
ولاء تكتفت بغيرة/ايه واقع للطيران
محارب هز راسه بايه/مهما وقعت مافيه مثل طعم ذيك الوقعة
ولاء/والله!!
محارب حس بشي غريب من نبرتها/اي والله!!انا ماوقعت لغيرهن ابد
ولاء قامت بزعل/قم بس رح جيب الاغراض البيت فاضي خل اجهز لنا اكل/وقفت من ذكرت كلامه(قولي لي انا مااعرف علامك الا اذا قلتي لي)التفتت له/محارب
محارب اللي ماانتبه وعينه بجواله اخذت عقله الدراجات النارية/هممم
ولاء تكتفت/محارب ناظرني
محارب رفع عينه لها
ولاء باحراج تخفيه/يعني وقع قلبك لدراجات وانا وش وضعي!!
محارب عقد حواجبه/هاه!!
ولاء/تراني غرت
محارب ضحك/تغارين من وش !!جمادات!!/ضحك/
ولاء بوسع عيونه/محارب!!
محارب وقف واتجه لها مسك يدها/الوقعة الاولى قبل ذا كله
ولاء قطبت جبينها باستغراب
محارب/كنت اخر سنة بالثانوية شايل دلال القهوة العصر متجهة للبيت وادعي يارب قليلة الحيا اللي يرن صوت خلخالها ماجت اليوم يالله تقطعها عن خواتي
ولاء عبست بوجهها/قليلة الحيا!!
محارب/واستقبلتني على باب المطبخ برنة خلخالها اللي اختفى صوته بعد وقفتها بثواني من قابلتني بشعرها الملفلف الطويل وعيونها الكحيلة اللي التقت بعيني ومتسعة من كبر صدمتها
ولاء تنتظره بذهول/انا قابلتني!!
محارب/لابسة قميص من قمصان غيمة لونه اسود تمنيت لبستي غيره ماابي السواد يعرف لك درب
ولاء ناظرته بخجل/كيف تذكر شي مااذكره!!
محارب/من يومها وخلخالك اتمنى لي سلطة وانزعه ماابي احد يسمعه غيري
ولاء سكتت ماعرفت ترد
محارب/لاتغارين ابد كل وقعة بعدك اقواها الا وقعتك ذباحة
ولاء تسارعت نبضات قلبها من كثر خجلها وفرحتها بهالكلام
محارب قبل جبينها ناظرها بحب نادرا يظهره/ارفعي علومك يابنت مثنى وقعتك سبقت كل الوقايع
ولاء بابتسامة/وليه ماارفعها بعد كل ذا الحب!!/دفته/اغراض البيت سعادة الطيار تراني ميتة جوع
محارب ابتسم واستعد/امرك سيدي يخسى الجوع
ولاء ضحكت
محارب مشى وخرج من البيت
ولاء اتجهت للمطبخ تجهز اي شي سريع على مايوصل محارب بالاغراض قطبت جبينها من جرس الباب/معقولة نسي مفتاحه/وقفت ورا الباب تناظر من العين السحرية من وراه رجف قلبها من عرفتها/
رؤيا بعبايتها/افتحي ضروري
ولاء من ورا الباب/وش تبين؟
رؤيا رفعت الشماغ
ولاء قطبت جبينها
رؤيا/صراحة محارب نسي شماغه ذاك اليوم وقت كان عندنا وساعدنا وحبيت ارجعه واشكره بس مو حلوة بحقي قلت اعطيك وتشكرينه بدالي
ولاء رجف قلبها كل شي وقف فيها من فكرة تواجده مع هالخبيثة
رؤيا دقت عالباب/اتركه لك على يد الباب تمام؟
ولاء ماردت
رؤيا ثبتته على مقبض الباب ولفت راجعة لبيتهم
ولاء ناظرتها الى مادخلت بيتهم فتحت الباب وسحبت الشماغ بسرعة برجفة يديها تناظره تبي تتاكد هو شماغه او لا غرقت عيونها دموع/تكذب تبي تقهرني بس هالخبيثة تبي تقهرك ياولاء اصحي اصحي
............................................................
<<مكان عزيز وشلته>>
مبروكة واقفة على الباب من فترة تضرب عليه بطرف عكازها
عزيز بغرفته نايم صحى بالصوت غمض عيونه متجاهل هالطرق
مبروكة ضربت عليه بقرة اكبر بنرفزة
عزيز فز من فرشه بخطوات كلها غضب فتح الباب بصراخ/خير وش تبـ/سكت من ناظرها ابتسم/هلا والله هلا باللي باعتني ياهلا
مبروكة/عساك بتوقفني في ذا
عزيز/ليه هو باقي حقوق بيننا
مبروكة بحدة/عزيز
عزيز صرخ بقهر/باقي تلوميني وانتي وقفتي معهم علي وش بقى اكثر وش ناوية علي به فوق ذا كله وشو
مبروكة بحدة/عساك بتقعد بالبيت مثل الحريم لا زعلن!!
عزيز ناظرها بقهر
مبروكة بسخرية/يوك يازايد ماجبت رجال وراك يوك
عزيز بحدة/رجال اصبن عنكم كل ابوكم!!
مبروكة/ويومك رجال علامك مندس بالبيت!!
عزيز ناظرها بغبنة
مبروكة/شد اكتافك لاترخها وامش وراسك مرفوع مااخطيت وشو له التدسس!!
عزيز بقهر/ليه تقهريني ياجدة ليه تاخذين الشيخة مني ليه
مبروكة/فعايل يديك ياللي ماتطيع وش اعمل بك هاه وش!!
عزيز بلوم/انتي سحاب وشلون قووك وشلون!!
مبروكة تنهدت/عزيز
عزيز/ماتنرقع ابد كل مالفيتها عجزت اصدق توقفين معهم علي ياجدة علي انا
مبروكة/اسمع كلامي لو مرة وحدة اصبر وانا جدتك اصبر
عزيز/سمعت لك واخذوا الشيخة اصبر واسمع لك وياخذون عمري مير هين وانا ولد ابوي مثل ماقويت على بني طاهر اقوى بني سمار واعلمهم من هو عزيز هين/قفل الباب بوجهها/
مبروكة ضربت عالباب/ولد عزيز ولد
عزيز ابتعد بخطواته السريعة لغرفته رامي نفسه على فراشه
مبروكة/الله يكفيني شرك من ولد الاه يكفيني شرك
............................................................
يقين جالسة فوق كبوت السيارة ماسكة مظلتها الشيفون اللي بالاساس مخصصة للتصوير فقط مثبتة فوقها شماغ بـيّـن تستظل تحتها من اشهة الشمس وعينها عالجبل اللي تسلقه بـيّـن واختفى وراه من فترة تهز رجلها بقلق بانتظاره تحسه تأخر وكثير رفعت جوالها ناظرت شاشته المكان خالي من الارسال وهالشي طبيعي بالنسبة لمكان تواجدهم تنهدت بضيق وتلفتت حولها بتوتر/والله لو الدنيا ربيع وشلون بيروح بالحلال ورا هالضلع/فزت جالسة من لمحت زوله يمشي من بعيد من جانب احد الجبال المجاورة للجبل اللي تسلقه تنهدت براحة ونزلت من السيارة ركبت وحركت باتجاهه وقفت عنده بالسيارة ونزلت له وبعصبية/علامك انت تطلع هالضلعان لحالك ماتخاف!!
بـيّـن ناظرها باستغراب/وليش اخاف!!راعي وذي شغلتي!!
يقين انخطف وجهها من استوعبت كلامه
بـيّـن ناظرها باستغراب/يقين؟
يقين ناظرته بتردد ودها تصرخ برفض(عساك بتبقى طول عمرك راعي!!)لكن كيف تسأله وهي تدري بسبب وظيفته ونفيه تنهدت مدت له علبة المويه بين يدها/هاك
بـيّـن رفع يده/افتحيها لي
يقين ميلت فمها من استغلاله فتحتها ومدتها/عساك بعد ماتقوى تشرب!!
بـيّـن ابتسم/قيميني اقدر ولا لا؟
يقين ثبتت العلبة عالكبوت/بتشرب هاذي هي/مشت وتركته متجهة لمكانها/
بـيّـن ابتسم/عوذا نار وشرار مابك صبر
يقين وقفت وناظرته/وين اصبر ويهدا قلبي وانت مقلقني
بـيّـن ناظرها للحظات باستيعاب
يقين اسرعت بخطواتها ورمبت السيارة بدون تناظره/بتركب ولا امشي واكبك
............................................................
<<بيت منور>>
وداد تدور بالغرفة من وناستها تنتظره بعد ماقرات رسالته(كل ماجمعنا بيوم مستحيل يحتله غيرك)مهما كان حجم قهرها ومكابرها الا انه باقي تحبه وكيف ماتحبه وهو اول رجل دخل بحياتها واحسن معاملتها وغرقها حب فكرة غيرها ياخذ مكانها ويحتل كل هالحب والدلع اوجعتها واثارت غيرتها تحت قناع الكره والانتقام فز قلبها من سمعت صوتها وقفت على الشباك تناظر سيارته
ظاهر وقف بسيارته ووراه شاحنة محملة بكل اثاث البيت نزل يوقفها/هينا ياصديق
صاحب الشاحنة وقف وبدأوا العمال ينزلون الاغراض
وداد قطبت جبينها من هالشاحنة المحملة بالاغراض
ظاهر/نزل كله هينا يامعلم لاتترك شي وراك/فتح باب سيارته الخلفي ونزل الكومدينة وثبت العطر فوقها وصوره ثم ارسل الصورة لها/
وداد فتحت جوالها من وصلتها رسالة منه فتحت الصورة واتسعت عيونها رجف قلبها واهتزت يديها من قرأت رسالته تحت الصورة(احتليتيه ومليتيه ظلام ويأس وحزن وضيق وحلّت مكانك وكانت اسم على مسمى نور نورت حياتي وأحييتني بعد احتلالك الممرض)هلت دموعها بألم من جرحه لها بهالطريقة
ظاهر رفع صوته/اشبعي فيه هذا هو كله لك حلال عليك ماابي منه شي/ركب سيارته وحرك مبتعد/
وداد تناظر الجوال قرأت الرسالة مرة واثنين وثلاث كيف نساها بهالسرعة وباعها بأي حق يعيش بعدها متهني ومبسوط ولايحس بفقدها ولا يحزن وهو يموت على الارض اللي تطاها من تكون هالنور حتى تعيشها ببشاعة هالشعور عضت شفتها بغبنة مسحت دموعها بكل مافيها من كبرياء/هين ياظاهر هين/ارسلت له رسالة وقفلت جوالها ورمته على سريرها جرت خطواتها خارجة/بناااات من تبي تغير اثاثها؟
............................................................
          الـلـيـل
............................................................
//بوسط هالخلا الخالي بشبة نار على مسافة من سيارتهم خلصوا من قهوتهم وعشاهم//
يقين وقفت تناظره باستغراب/عسى ذا المكان الاسطوري اللي تقول عنه؟!
بـيّـن يفرش الفراش بحوض السيارة/بتجي نومة لله أمرها
يقين عبست بوجهها/الله من وجع ظهر وانت الصادق
بـيّـن ناظرها بتحدي/كم عن كم؟
يقين تكتفت/مااحب التحديات ذي
بـيّـن/اقدحي يابنت منصور
يقين باقدام/هاه معك يالله وش بتحط؟
بـيّـن/اعتراف باعترافين للمهزوم
يقين ناظرته بتردد
بـيّـن وقف ينفض يديه ناسي غرزه وتوجع وبملامح المه/هاه وش قلتي؟
يقين/عن وش طيب؟
بـيّـن بوسع عيونه/النومة في ذا احلى نومة علامك!!
يقين/تم
بـيّـن انحنى شبه راكع مد يده لها
يقين/بنطيح كلنا
بـيّـن يناظرها اشر بيده بمعنى هاتي يدك بدون ينطق
يقين حطت رجلها على طرف الحوض ثم حطت كفها بكفه
بـيّـن شد على كفها وسحبها رافعها للحوض
يقين صرخت صرخة مكتومة وضح صوتها من طارت بالهوا من سحبته بعدم توازن
بـيّـن سحبها له بقوة وترك كفها واحتواها بين يديه واحتضنها بخوف من انها تطيح فعلا
يقين اتزنت بوقفتها ورفعت راسها له تناظره/خلاص وقفت زين
بـيّـن ناظرها للحظات وهي بين يديه بصمت
يقين بادلته نظراته بحيرة من نظراته اللي تقول كلام عجز ينطق به لسانه
بـيّـن تركها وناظر الفراش/يمين ولا يسار؟
يقين نطت
بـيّـن/اصبـ
يقين ضربت بالحوض الحديد من نطتها وسط نطقها/يمين اكيد/توجعت من ضربت بالحديد/أح
بـيّـن تنهد/عجلة الله لايبلانا عجول
يقين مسحت على رجولها بيديها بألم
بـيّـن جلس جنبها ومد يديه مسك رجولها/مديهن
يقين مددت رجولها
بـيّـن يمسج رجولها وعينه على رجولها/هاه كيف ذالحين خفّ
يقين/عادي شوي ويروح الالم
بـيّـن رفع عينها لها/يعني اوقف ماله داعي اللي اسويه؟!
يـقـيـن مدت يديها ليديه وابعدتها عن رجولها/ارتاح يكفيك تعب طلوع هالضلعان اليوم
بـيّـن جلس ورفع عيونها لها يناظرها
يـقـيـن تمددت باحراج وحيرة بنفس الوقت من نظراته نتظرت السما وسط تنهيدة اعتلى صوتها براحة اشرت بيدها جنبها/تعال وش تحتري
بـيّـن تمدد جنبها يناظر السما معها
يقين بابتسامة/يازين السما زيناه ياكثر النجوم تهبل مرة
بـيّـن ابتسم/يقين
يقين/هلا
بـيّـن/ماودك نكبّ الماضي واطلاله ونعيش حاضرنا ومستقبلنا؟
يقين التفتت له بذهول
بـيّـن التفت يناظرها وعيونه بعيونها منتظر جوابها
يقين/هذا احنا كبينا ونعيش الحاضر واحتري المستقبل معك
بـيّـن ابتسم/الماضي تجدد بهالعقد اللي خلاك جنبي بهالحوض زوج وزوجة ونناظر السما سوا مير انتي اقتنعتي به ورضيتي؟
يـقـيـن ابتسمت/انسداحة هالحوض معك احب لقلبي من انسداحة بقصر لحالي لو ماني بمقتنعة وراضية وشو له اجلس معك بهالحوض هاه
بـيّـن تمدد على جنبه يناظرها/تراني راعي يايقين
يقين تمددت على جنبها تناظره/وملك عليهم بعيني
بـيّـن/بكرة يمكن تضيق
يقين/ومابعد الضيق الا الفرج
بـيّـن/ترا لساني طويل مايحشم
يقين/صحيح للي مايستاهلون الحشيمة
بـيّـن/يشوش راسي على قل سنع
يقين/واشوش معك عاى قل سنع
بـيّـن/يمكن يوم اصيحك؟
يقين/بنفس اليوم تراضيني
بـيّـن/قلبي يمكن يصد؟
يقين/يخبر منين ماصد ماينتهي الا عندي
بـيّـن/يايقيني البـيّـن لا أظلمت بعيني
يقين ناظرت اعترافه بابتسامة
بـيّـن/انتي مثل القمر وسط هالنجوم ابتدا ليلي بك وينتهي هالليل بغيابك
يقين بزعل/والنهار تعيشه بدوني!!
بـيّـن ضحك/تحبين تضيقينها علي!!
يقين بابتسامة/انا القمر والشمس وكل النجوم حولك
بـيّـن مد كفوفه واحتضن كفوفها/هماك يقيني البـيّـن!!
يقين بابتسامة/ابطيت علي يابـيّـن ابطيت
بـيّـن/السيل ماابطى الا من كبره/فتح يديه لها/
يقين ارتمت بحضنه برضا وسعادة
بـيّـن ضمها بين يديه/ماعلمتك الليلة بتذوقين احلى نومة
يقين دفنت وجهها بحضنه وغمضت عيونها بابتسامة/احلى نومة بين يدين المهزوم
بين ضحك برضا وقبول لكلامها/انا وكوني كله راضين بالهزيمة لعيونك الليلة راضين
#شقّ_الغَمام