شـقّ الـغَـمـام

..(٣٧)..

..(٣٧)..
لاحول ولاقوة الا بالله العلي العظيم،،اللهم صل وسلم على نبينا محمد..
-
.
<< وادي سرّاي>>
عزيز واقف برا بيت الشعر بتافف/تراني مشغول ماني بمحتري احد
بارود/ادهل طيب حياك
عزيز تجاهل بارود
بارود/عزيز تراها جدتك قبل انها سحاب
عزيز ناظره بحدة/خابر انها جدتي مااحتاج احد يعلمني وثم وين ارضك ماعاد لك شوف
بارود/مثل ماعندك اشغال عندي اشغال
عزيز ارتفعت حواجبه من رده
سهم مر من قبالهم بدون رد متجه للحوش
عزيز/عجيب حتى السلام ماعاد يمر عقب ماكان به حب خشوم!!
سهم وقف وناظره باستحقار/حب الخشوم لراعين الجمايل
عزيز زفر بسخرية/المعذرة اخطيت بحقك
سهم عقد حواجبه
عزيز/انت بعدك مالحقت الخشوم حدك النعول/مشى/
سهم ضحك/افا انا ماوصلت للخشوم!!اجل صبي الوايت وين ياصل!!
عزيز التفت له يناظره/صبي الما مايعيبه شي مقامه عالي يظل الشريف ولد الشريف مقامه حب الخشوم ازين من/سكت بابتسامة اعتلت محياه/استغفر الله بس الله يعفي عنا وعن المسلمين/مشى/
بارود اسرع بخطواته/احتر جدتك من امس موصيتني وملزمة تحتريها هنيا
عزيز/علمها اجيها يم البيت
سهم يناظره بغبنة رفع صوته/اسرع اسرع إرد للعرب لاتبلش جدتك الضعيفة بسواياك/مشى مكمل طريقه للحوش/
عزيز زفر بسخرية/اسرع اسرع لاتزعل عليك جدتي الضعيفة ولا اقولك لاتشد حيلك هي زعلانة منك منين مالدّيت مير تريح/مشى/
سهم عض شفايفه بقهر وقفل باب الحوش بكل قوته
ديوان وقف على باب غرفة المراقبة باستغراب ناظره وتنهد بضيق ثم رجع لمكانه
سهم اسرع بخطواته باتجاهه وقف على باب غرفة المراقبة وبغبنته/ديوان شف لنا حل بهالعزيز
ديوان ناظره بدون اهتمام/هذا هو ياخذ جزاه!!
سهم صرخ/ديوان
ديوان/عزيز ماهو باي احد والسلام تراه حفيد سحاب ياسهم
سهم/صار مثل اي احد ذالحين
ديوان/لا تعجل ياسهم لاتغتر!!
سهم بغبنة/الا عزيز ياديوان الا هالعزيز
حبيس الغرفة/ياهيه انت ياللي برا
ديوان عقد حواجبه باستغراب/عسى ماشر ياعم
حبيس الغرفة/ماهو بانت يالخوي عوني هالمنتفخ اللي عندك
سهم عبس بوجهه وبحدة/خير
حبيس الغرفة/بهالدنيا كلن له مقامه اعرف مقامك ولاتكد عينك لاعمامك
سهم بسخرية/عجيب حتى المساجين صاروا يهددون
حبيس الغرفة/هالمسجون ماتجي ربع فعوله بين قومه مير هذاني علمتك ياولد عليان
سهم اتسعت عيونه والتفت لديوان يناظره
ديوان المذهول رفع اكتافه بمعنى ماادري عنه
سهم بغبنة/عليان اشرف وانقى منكم ياشيوخ بني سمار الخديعة ولظلم يسري بعروقكم سري الدم
حبيس الغرفة/كلن يلقى جزاته ماظلمت احد ولا اوقعت على مسلم أذية
سهم/كل ابوكم مثل بعضكم من راسكم الاول لحد اخركم ذالحين الشيخة مااخذتوها الا بالظلم
حبيس الغرفة ضحك/ايه يهالشيخة اللي اعمت عيون الخلق ثم ياوليد عليان الشيخة حتى ورث ماتلحقك تناطح شيوخك وشو له
سهم شد على قبضته بقهر
حبيس الغرفة/تدري عاد مايندرى يمكن تلحقك بيوم ماعلي منك ولا من هالشيخة عساها تنقطع مير اياني واياك ترفع اصبعك يم عيال فايز جميع والله بعالي سماه لانفض هالغبار عني واول فعلي تلة رقبة
سهم احتدت ملامحه من هالتهديد
حبيس الغرفة/لاتكبني للردى طلبتك
سهم عض شفته بقهر وجر خطواته السريعة بغيظ خارج
حبيس الغرفة/ولد ياديوان
ديوان باستغراب من تصرفاته اليوم/سم ياعم
حبيس الغرفة/ياوليدي كبّ سحاب وجماعتها وفعولها عنك ماانت من اهلها
ديوان ضحك
حبيس الغرفة عقد حواجبه
ديوان/ياعم وعسى لذالحين تشوفني من ربعها عقب قولي
حبيس الغرفة ابتسم رغم ضيق صدره/ايه ديوان مير عسى الله يفرجها من عنده
ديوان/الفرج هذا هو يهرج معك
حبيس الغرفة/لا الفرج ماهو بانت وطاهر الفرج/رجف صوته من عبرته/قريب بيلفيني قريب
عزيز يسوق سيارته بغيظ/هين ياولد السروق هين ان مالزمتك فعلة ابوك مااني بعزيز هين/دخل يده بجيبه من اعتلى رنين جواله خرجه ناظر الاسم بنفور فتح الخط مجبر/نعم
ريوف بهمس/اسمعني مااقدر اطول باللي اقوله
عزيز عقد حواجبه باستغراب/خير
ريوف/انا اللي بأرد الشيخة لاهلها ياعزيز
............................................................
<<بيت مضاوي>>
غيمة تلف المجلس بالمبخرة بوسع ابتسامتها
رازي وقف على باب المجلس متكتف بابتسامة/الله يرزقنا ربع هالابتسامة وطيبة النفس
غيمة بدون تناظره باحراج من كلامه/بعد اليوم بيصير خير ان شاء الله
رازي دخل للمجلس بخطوات سريعة/صدق صدق عليك الله صدق
غيمة اعطته قفاها وثبتت المبخرة على رف الدلال بزاوية المجلس تخفف ابتسامتها الواسعة/نقول ان شاء الله
رازي مد يده ليدها ولفها عليه بابتسامته/عسى قلبك مايشوف غير الفرح طريقٍ له ياغيمتي/قبّل جبينها واحتضنها وسط تنهيدته/يعلم الله فرحتك توسطت قلبي ياغيمة يشهد الله
غيمة رفعت يديها مبادلته الحضن
رازي ابتسم من حس بيديها تطوق وسطه برضا
غيمة/مشكور يارازي مشكور
رازي قبّل راسها وابعد عنها مسافة وهي لازالت بين يديه/وش هالكلام انا كل خاطري اشوفك مرتاحة ومبسوطة
//اعتلى صوت دق الباب//
غيمة فزت من سمعت الصوت وتركته
رازي شد عليها بين يديه بعبوس/مسرع تخليتي!!
غيمة بلهفة/ابروح افتح له
رازي بابتسامة/طيب ولو انه ماهو بهو لو انه رجال غريب
غيمة/مير محد 
رازي قاطعها/انا بافتح ياغيمة احتريني لمى اناديك/مشى وتركها بدون نقاش اكثر/
//بعد دقايق//
غيمة ورا الباب الفاصل بين البيت والمجلس تنتظر بتوتر وبلهفة وبحماس اسرعت للمجلس من سمعت صوته
رازي داخل المجلس/غيمة جيبي ماء معك
غيمة وقفت على باب المجلس تناظره بانفاس متسارعة
بـيّـن جالس بملامح جامدة خالية من اي تعبير بين يديه السبحة وعيونه عليها
رازي بمحاولة منه يكسر تجاهل بـيّـن/حياك ياغيمة حياك
غيمة مشت باتجاههم
بـيّـن مارفع نظره ولاتحرك بجلسته
غيمة وقفت عنده واجتمعت دموعها بمحاجر عيونها قتلها جفاه وبخله حتى بابسط المشاعر تتمنى لو نظرة عادية منه بدون لوم وعتاب فاهمة وموقنة بكبر غلطتها وبرجفة صوتها/السلام عليكم
بـيّـن رغم غضبه عليها وكرهه لاستغفالهم وغلطهم بحقه اوجعته رجفة صوتها يدري قسى عليها بالحيل لكن هي المتسببة لنفسها بهالقسوة جرحته جرح كبير ماتوقعه منها بيوم اخذ نفس من حس الموضوع ينعاد ويتزايد الغيظ بقلبه وقف كاسر هالغيظ/وعليكم السلام والرحمة/مد يده بنظرات حادة/
غيمة ابتسمت من ناظرت كفه الممتد وامتلت فرح من لمحت بهالكف رجوع الامور لوضعها الصحيح بينهم مدت يده مصافحه له وقربت حتى تسلم عليه
بـيّـن ابعد نفسه عنها رافض لهالسلام القريب حتى اللحظة يحس كثير السلام عليهم وبالحيل
غيمة اختفت ابتسامتها وعاودتها الغصة تناظره بمحاجرها الغرقانة بصمت
بـيّـن/عساك مرتاحة معه
غيمة اوجعها سؤاله وكأن هالسؤال تأكيد لها بكبر غلطها بعينه التزمت الصمت
رازي وقف ومد له الفنجال بابتسامة/الحمدلله امورنا على احسن مايكون
بـيّـن ناظره بتهديد/غصبا عليك يكون على احسن مايكون عقب سواتك
رازي مد له الفنجال اكثر بتنهيدة/بـيّـن
بـيّـن/فنجالكم مشروب
غيمة بلعت غصتها وبرجفة صوت فضحت هالغصة/مجهزة لك كل
بـيّـن قاطعها/ماجيت افطر واسولف جيت اخذ حاجتي/ناظر رازي/وينها اخلص علي
رازي بابتسامة/ياابن الحلال بعد الفطور علامك مستعجل الله يهديك
بـيّـن ناظره بحدة رفع صوته/جدة ياجدة مضاوي
رازي اتسعت عيونه/تستفزه علي بجدتي!!
بـيّـن بغيظ/ايه استفزع بها اعطني حاجتي يارازي
رازي يناظره بنرفزة بصمت
بـيّـن/جدة مضاوي شوفي رازي اخذ غرضاني وماردها جدة ياجدة
رازي اخذ نفس/باعطيك اياها لكن بعد ماتفطر
بـيّـن/مفطر قبل ألفيكم
رازي بنرفزة ارتفع معها صوته/ماانت بطالع الا بعد ماتذوق كل ماسوت غيمة عشانك
غيمة احتضنت ذراعه تهديه وتمنعه بلطف عن اخوها همست/رازي
بـيّـن ناظرهم وبقهر ولوم/وش ضرك لو جيت من الباب
رازي هدا بعد هالسؤال الموجع وناظره بصمت
بـيّـن/وش احب على قلبي من شوفة اخوي واختي ببيت واحد!!
غيمة انسابت دموعها
بـيّـن/ودي ادخل مخك المصدي واشوف وش طرا عليك لاجيتني وقلت يابـيّـن ودي بغيمة
رازي بصوت اهتز/أنا
بـيّـن قاطعه/زعمك اعيي عليك وامنع ابعرف بس وش طرا عليك يارازي
رازي التزم الصمت
بـيّـن/النفس ماعادت هي النفس يارازي يكفيها جمالة سكوتها وصدها قدّر وكب عنك وسع الوجه!!
غيمة شدت على ذراع رازي
رازي ناظرها
غيمة بدموعها/اعطه حاجته يارازي اعطه/مشت خارجة من المجلس/
............................................................
.
سطام يسوق وسط استغرابه من تواجده معه بهالوقت وبدون اي داعي لوجوده من الاساس
حامد جالس بهدوء
سطام/ياعم وين تبي تروح
حامد/للمحكمة
سطام وقف بالسيارة بوسط الطريق  من صدمته باللي سمعه
حامد/لبق لبق لاتجيب اجلنا
سطام وقف على جنب الطريق بربكة طارد الفكرة اللي تبادرت لذهنه من لحظة سماعه لهالكلمة والتفت له/تبيني شاهد بس تراني مااشهد على شي مااعرفه
حامد/لا بالله لاشاهد ولا قاله الله
سطام عقد حواجبه
حامد/بغيتك تطلق وتسلمني صك الطلاق
سطام يناظره بعدم تصديق
حامد/خير البر عاجله
سطام/من اللي يطلق؟!
حامد ناظره بصمت
سطام/ياعم ابغض الحلال عند الله الطلاق
حامد رفع يده بوجهه يسكته/خل حديثك لروحك طلق وفكنا
سطام ارتفع حاجبه من اسلوبه/بس سلام
حامد قاطعه/ماتعرف مصلحتها
سطام ارتاح صدره من فهم عدم علمها بشي/هالامور بيني وبين مرتي لاهي شكت يمكم ولا انا شكيت منها!!
حامد/هيه انت
سطام عبس بوجهه
حامد/قلت دامه شيخ بيحكم عقله اجيه من الباب يفك عمره من المشاكل والوجه من الوجه ابيض
سطام/وعشاني شيخ الكلمة اللي تقال يمي واللي اقولها احسب حسابها مليون مرة
حامد ناظره بغيظ/وشلون يعني
سطام/اللي تبيه بيني وبينها كان طلبت الطلاق هاك الوقت يصير خير
حامد/سلام مابتشوف الخير وهي متوسطتكم
سطام/هي تحت ظلي مايلحقها يلحقني ولا احد له كلمة عليها
حامد يناظره بحدة/ماانت ناوي ترسيها على بر ياولد!!
سطام/هي راسية بامان الله مير الله يكفينا شر كل ذي شر
حامد اتسعت عيونه/انا شيطان!!
سطام/استغفر الله وش هالكلام!!كود تشوف انك شر ياعم هذا شي ثاني ولا انا مااشوف الا بياضٍ في بياض
حامد فتح الباب
سطام مد يده ليد حامد يوقفه/تعوذ من ابليس ياعم وشلون تنزل بهالخلا وبهالشموس
حامد سحب يده بقوة/عشنا تحت الشموس وبنقضي تحتها ماضرتنا مثل ماضريتونا يابني سمار/نزل وقفل الباب بكل قوته/
سطام مد يده للباب ينزل القزاز اعتدل/ياعم ادحر الشر واركب
حامد بغيظه/الشر والشرير ممشاك وملفاك
سطام تنهد/اجل فمان الله/حرك وتركه/
............................................................
<<بيت سرور>>
سرور تتقهوى بروقان من ناظرت ملامح وجهه المحتدة
سهم يناظرها بغيظه
سرور نزلت فنجالها/اشوف كثرت جياتك يمنا
سهم بغبنته/ورا مازوجتي هالغثيث للبنت؟ليه تردين مبروكة
سرور/البنت عندها ابو للحين حي ودامه غاثك ماتدانيه تطش بنت اخوك بحلقه ليه!!
سهم يناظرها بغيظه
سرور/ايه ماعليك ملامة وانت بعتنا لعيونها مير بعيدة عن خشمك والله اعتدال ماتطلع من جناحي لسويدين الوجيه شرواك وانا بنت ابوي
سهم/انا سويد وجه
سرور/حق ويشهد الله عليه سويد وجه من طلعت من تحتي ياولد عليان لتحت مبروكة اللي ماتخاف الله
سهم صرخ/ابي نناطح السحاب لمتى وحنا تحته
سرور/نبقى تحته الى مايفرجها الله دامه راضي علينا وش نبي بالناس
سهم/تقولينه يمه وانتي ماشفتي عيونهم يمك وش قايلة ولا حتى
سرور قاطعته/مير اكلنا وشربنا من عيونهم وسواياهم الى ماشبعنا مانقص منا لا يد ولا رجل وستر الله علينا دايم
سهم برجفة صوته/ياكثر الشماتة يمه بحقي وين مارحت ووش ماسويت مالقى بوجهي الا الشماتة
سرور بمواساة/قدر ربي ومكتوب وواجب عليك تصبر وترضى الشمس مردها تشرق وتطير الليل
سهم/ابطت عيت مااشرقت علي ابدا مااشرقت،مااشرقت الا يوم ناطحت الروس وصرت منهم هذا هي مشرقة تعبت وانا اعلمك مير يمه ماتسمعين لي
سرور/شمس الظالم ماابيها لو ان اشراقها يحيي مامات راضية بالابتلاء ماورا الصبر الا الفرج
سهم صرخ/يمه
سرور/وصمّة
سهم/معجبك منين مارحنا وجينا ياعيال السروق ماكفاك القطعية سنين!!
سرور/ايه معجبتني وعلى كيفي ويازينها على قلبي ويازين هالندا راضين به
سهم ضرب برجله عالارض بغيظ/يمه
سرور بحدة/اسمع عاد اعتدال وراسي يشم الهوا مااخذها هالجني وتعقب انت وهو والمبلوسة اللي تحفى لرضاها والله بعيدة عن اشنابكم
سهم يناظرها بغيظ
سرور/مير/رفعت يديها للسما/يالله ان ترد عقله وتنور بصيرته وان مابه رجى ان تاخذه وتفكني والمسلمين من شره
سهم رجف قلبه من قوة الدعوة بحقه وسط اتساع عيونه/تدعين علي يمه!!
سرور ناظرته/ماورا هالمبلوسة عمتك الا الشر وانا اي والله ادعي عليك كان فيك شر عالمسلمين يكفيهم شرك كان مابك هداية
سهم/الا الله يهديك يمه وتفهمين
سرور/الله مهديني قبل لاتخلق ياسهم مير طس عن وجهي بيتي يحرم عليك وذي علومك مابك طب تف عليك الا تف اطلع طس طس
سهم خرج بخطوات سريعة
اعتدال وقفت عندها/جدة انا
سرور قاطعتها/وش رايك تروحين يم ابوك يااعتدال
اعتدال/تطشيني يم مرت ابوي ياجدة
سرور بضيقة/ماطشيتك من كره يابنية
اعتدال/لا ياجدة لا سهم مابيقدر يسوي شي
سرور/خوفي يقدر وانا جدتك ياخوفي منه
............................................................
         الـعـصـر
............................................................
.
محارب يسوق السيارة بصمت بدون يطالعها
ولاء متكتفة بصمت
محارب وقف عند باب العمارة ونزل من السيارة بخطوات سريعة تاركها وراه
ولاء نزلت بسرعة وجرت له تلحقه
محارب فتح باب الشقة
ولاء دخلت الشقة وقفلت الباب وراها
محارب ناظرها يكبح عصبيته/اجمعي اغراضك
ولاء/ليش؟
محارب صرخ/ولاء
ولاء فزت للحظة/طيب طيب بس ابي اعرف ليش
محارب/تروحين لاهلك
ولاء انخطف وجهها/هاه!!
محارب/على مااشوف لنا علة نقعد بها غير هالشقة
ولاء تنفست براحة
محارب ارتفعت حواجبه من ناظرها/ارتحتي!!
ولاء زمت شفايفها بصمت
محارب/اسبوع!!تأديبي اسبوع!!
ولاء بهمس/تحمد ربها وقفت على شعرها ماكسرت خشمها بعد قليلة الحيا
محارب/والله
ولاء تناظره بزمة شفتيفهت
محارب/كان كسرتي يديها ولا رجولها لا لا الاحسن تعمينها
ولاء/محارب خلاص عاد يكفيني الاسبوع لاتزيدني
محارب/يوك عليك ياكبر الهم وياكثره بوجهك
ولاء ابتسمت/ايه مبسوطة ومستانسة
محاوب تكتف يناظرها
ولاء/حتى لو انه بينكتب بملفي الحمدلله برد قلبي وخاطري
محارب ميل فمه يناظرها بصمته
ولاء/محارب هالسوسة تبي تدبس اخوها فينا وتسلم وفوق السلامة تبي تضمن/سكتت/
محارب عقد حواجبه/وش كملي
ولاء بعبوس/ولا شي
محارب/ذالحين مصدعتن بي بالخمس ثواني امسك اعصابك ولسانك وكل مافيك وتاليتها ذي فعولك!!
ولاء/مافيه مقارنة ابد!!
محارب/وشو!!
ولاء/انت على كل شي وانا ماانفجر الا بامور مصيرية
محارب/والمصيري وشو هالمرة!!
ولاء/انت!!
محارب فز من كلمتها يظن تلومه/وش دخلني انا علمتك ماجيتها ولا ادري عنها لا
ولاء قاطعته/تبيك انت يامحارب انت
محارب قشعر جسمه من كلامها
ولاء تكتفت/كله منك
محارب بوسع عيونه/وش سويت ذالحين!!
ولاء/ليش تطلب منها قلت الشناط مابه غير شناطها
محارب بانفجار/وانا وش يدريني نعنبوها هدية ونعنبوها طواري يوم اني فكرت بهالهدية
ولاء/كيف يعني مااستاهل الهدايا ولا الفرح!!
محارب/امشي امشي اجمعي اغراضك ولاخلصتي كلميني امشي/خرج وقفل الباب وراه بقوة/
ولاء اسرعت بخطواتها وبقهرها/حسبي الله عليك يارب ان سيور هالشنط تلتف على رقبتها وتخنقها وتفكنا يارب
............................................................
<<مجلس الديرة>>
بـيّـن متوسط المجلس
ابو عايد بنرفزة من تواجده/طالت مواطيك وكثرت شكاويك علامك هالنوبة؟
بـيّـن/مير ماطالت يمك ولا شكيت عندك
ابو عايد احتدت نظرته
سطام ابتسم من رده/امر يابـيّـن وابشر كان الحق معك
بـيّـن ناظر ابو عايد/مثل ماانت خابر ياشيخ اهل هالديرة كل شي يصيبها ينطلونها براسي لفيت هالعصير حتى اعلمك مالي به
ابو عايد/وش تقصد حنا ظالمينك!!
بـيّـن ابتسم/مير مابها قول واقوالكم تسابق فعولكم
ابو عايد بوسع عيونه/تعقب وتخسى
سطام رفع صوته/بس ياابو عايد بس
بـيّـن ناظر سطام/ياشيخ بركة مسعود السبيل ماعوني بركة مزرعته
سطام/ايه
بـيّـن/وردت يمها اليوم وطرف جدار البركة مكسور/التفت يمينه ويساره/ياكود تحاذف علوم منّا ولا منّا
ابو عايد/هه هذا هو كل عصير مرتع عندنا ويتشكوى تقل عجيز وقبالها دلتها تدور المشاكل دوارة
سطام كتم ضحكته عالوصف
بـيّـن حك جبهته بطرف اصبعه/اي بالله عجوزٍ ترثع بكم رثع
//تعالت اصوات المتواجدين مابين لوم ومابين تحدي له//
سطام/يابين انت في مجلسي وبين قومي وتحت حكمي عذرت مرة وثنتين وثلاث مير الشي لازاد عن حده ينقلب ضده
بـيّـن بعدم اهتمام لكلامه بابتسامة/مير ياشيخ مانشدتني كان شفت احد حول البركة منا ولا منا
ابو عايد قطب جبينه بشك من سؤاله
سطام/ها يابـيّـن علمني شفت احد ولا شاك بأحد
بـيّـن/الصحيح انا ماشفته وهو يكسر البركة مير اني شفته وهو يركب الوايت ويحذف الفاس داخل الغمارة وهو مامعه لا حطب ولا شين يذكر
سطام عقد حواجبه/وذا من هو؟
بـيّـن كبح حماسه/عزيز
//بعد استدعاء عزيز وحضوره//
عزيز جالس بابتسامة قبال سطام وبينه وبين بـيّـن مسافة/خير مرسلين وراي وش تبون هالمرة بعد يابني سمّار
سطام/بركة مسعود ياعزيز
عزيز ارتفع حاجبه الايسر باستغراب/علامها!!
سطام/عبيت منها اليوم؟
عزيز/ايه
سطام/يوم وصلت البركة كيف حالها
عزيز/على ازين مايكون
سطام/بس عقبك ماهي بعلى زينها
عزيز ناظره بابتسامة/صحيح
سطام عقد حواجبه
بـيّـن ارتفعت حواجبه/يعني فعول يديك ماحصل بها؟!!
عزيز التفت يناظره بابتسامة/اي بالله
بـيّـن/وبرايك وش ينفع معك
عزيز بتحدي/مابينفع معي شي
بـيّـن ناظر ابو عايد/هاه يابني سمّار وش قولكم بولدكم؟ولا حيلتكم علي بس
ابو عايد/نأدبه ونعلمه على قدر الخطا ياخذ عقوبته
بـيّـن التفت لعزيز وبسخرية/ماظني يرضى بعقوبة هذا عزيز ولا؟
عزيز هز راسه بموافقة لكلامه/صحيح عزيز ماهي باي عقوبة تمشي عليه
سطام/معصي تمشي عليك مثلك مثل غيرك من بني سمار
عزيز/انت بالاول صر من بني سمار ثم اقضي بينهم
سطام احتدت ملامحه/وشو!!
عزيز وقف ومرر نظره عالمتواجدين وبصوته الجهوري/يابني سمار شيخكم اللي تتبعونه ماهو منكم كيف ترضون شيخته عليكم!!
ابو عايد/انت بك شي؟عقلك صايبه بلا!!وش هالهرج الماصخ
سطام وقف وبحدة/عزيز انت تدري وش معنى قولك!!
عزيز التفت له/اي بالله ادري وش اقول
سطام شد على قبضته يكبح اعصابه لايهجم عليه
عزيز/وامك تدري وجدتي بعد تدري ياوسع وجهك وسعاه انا لو محلك ماهو بس اهج من الديرة الا اهج من المملكة بكبرها
بـيّـن وقف/هيه هيه انت يالمريض تراك مضيع القبلة انا اللي تناطحني دايم ماهو ولد عمك
عزيز مد اصبع يده لسطام/هالولد مايندرى من ابوه
سطام تأكد بهاللحظة من اللي وصل الخبر لعزيز عض شفته السفلية بغبنة من كبر الخيانة بعينه/هذا الناقص اثبت لك النسب عشان ترضى
عزيز/مايتسيد بني سمار غير عيالهم وانت/مرر نظره من فوق لتحت/الله العالم
ابو فهد بحدة/انخبلت!!وشلون تطعن بعمتك عوذا منك الا عوذا!!
بـيّـن/وين شهودك؟
عزيز عقد حواجبه بغيظ
بـيّـن/اكيد ماترمي الرمي ذا الا وانت متأكد كان لا ياكبر مصابك!!
عزيز شد على قبضته/سحاب
بـيّـن عقد حواجبه بشك
ابو عايد/ولد يافالح رح يم سحاب وعلمها تلفي يمنا اعجل اعجل
بـيّـن تنهد بتشكيك/خوفي الطبخة مستوية وقاضية
ابو عايد عقد حواجبه من كلامه
عزيز بحدة/وش قصدك؟وثم انت وش دخلك بين بني سمار هاه وش عليك!!
بـيّـن/بذي صدقت وش لي ببني سمار مير اني جيت انفض ذنب السبيل عني ومروح/رفع يده/السلام عليكم يابني سمار/مشى خارج بابتسامة/
عزيز يناظر قفاه بكره/قطعة لذا الشكل الا قطعه
ابو عايد التفت للمتواجدين/يابني سمار الشهادة لله ماشفنا من سطام الا كل خير كـ
سطام قاطعه/من طيب اصلك ياعم من طيبه مير احتري شهوده وبعدها يصير خير
عزيز بابتسامة/كلنا نحتريه ماهو بس انت
سحاب وقفت ورا الباب من داخل بيتها/السلام عليكم يابني سمار علامكم عسى ماشر
ابو عايد/ياسحاب لفانا علم يـ
عزيز قاطعه/ياجدة سطام صحيح ماهو من بني سمار ولا؟/بنبضات قلبه المتسارعة من توتره وبنفسه/جدة تكفين كل اموري واقفة على طرف لسانك تكفين/
سطام يناظر الباب بملامح محتدة وبنفسه/عزيز ولا بني سمار ياجدة؟
سحاب شدت على عكازها بين يديها بقهر وحيرة بهالموقف ان نفت ضرت حفيدها سطام وان أكدت ضرت حفيدها المحبوب عزيز عضت شفتها بقهر من هالعزيز اللي بكل مرة يخطي وفعوله تضره وتضرها بنفس الوقت
عزيز دخل قلبه الخوف من صمتها شد على قبضته الراجفة رفع صوته وكله رجى يطلبها/سحاب اصدقي بني سمار سطام منهم؟
سحاب غمضت عيونها بحسرة/اي بالله منهم
عزيز شحب وجهه وبردت عظامه يناظر الباب وكله خيبة سحاب بحدة/سطام ولد منصور شيخ بني سمار ويخسي من يقول غيره قطعة من ذا الخسيس اللي يرمي رميته على شيوخه الا قطعة
سطام ميل شفايفه بضحكة سخرية وبنفسه/بني سمار وشيختهم احب ماعلى قلبك/التفت يناظر عزيز/عزتي لك ياولد العم ياعزتي لك/رفع صوته وبحدة/يقوله لحمي ودمي ياسحاب وش قولك وش جزاه هالمرة
عزيز مكتسي وجهه السواد وملتزم الصمت 
سحاب باستعطاف/مير انه ولد العم ياخذه الطيش مرات
سطام/وطيش عن طيش يفرق
سحاب/انت الكريم وهو يستاهل
سطام/ياكثر ماعذرنا وتشفعنا بلا فايدة
عزيز بجمود/وش حكمك
سطام ناظره/حكم من؟
عزيز شد على قبضته/وش حكمك ياشيخ
سطام/ترحل عن الديرة
............................................................
#شقّ_الغَمام