شـقّ الـغَـمـام

..(٣١)..

..(٣١)..
لااله الا الله وحده لاشريك له،له الملك وله الحمد وهو على كل شي قدير
............................................................
عزيز بعد ماابتعدت جدته بيأس من استقباله لها جافاه النوم وابتعدت الراحة عن باله واحتله الضيق والقهر من كل مايمر فيه وقف متوسط هالبيت الصغير اللي ماكان الا شي يشبه الاستراحة بنته مبروكة له بمناسبة تخرجه من المتوسط مرر نظره بالبيت وأيقن ان حتى هالمكان مابيقدر يبني حتى ربعه مستقبلا وهو عاطل لا شهادة ولا شغل يعزّ نفسه وحتى اخر اماله الشيخة طارت من يده جر خطواته السريعة الغاضبة لخارج البيت يتزايد الغل في صدره من استذكر افعال قومه الجاحدين له ولأفضاله عليهم مشى بالديرة بدون وجهة عسى مابصدره يهدأ لو شوي يدري لو استمر هالشعور بيرجع لذاك العزيز اللي تتردد طواري افعاله الشينة بالمجلس وقف بملامح محتدة من انتهت خطواته قبال بيت ابو عايد يناظره بكل مافيه من حقد ابتسم بشر/اجل انا مااصلح للشيخة اجل اعلمك الليلة وش اللي اصلح له/لف عنه مبتعد/
............................................................
ديوان جالس ورا كمبيوتره بغرفة المراقبة بحوش وادي سرّاي يراسل عن بجواله بملامح ممتلية ضيق قطب جبينه باستغراب من سمع صوت الباب وقف ومد يده للعصا اللي جنبه اتجه للباب زفر براحة من ناظره ترك العصا بابتسامة وسط استغرابه من تواجده بهالوقت/حيك علا/سكت من انهالت عليه الضربات/
سهم بملامح وجهه الممتلية غضب سدد ضربات بعصاه بدون توقف بغبنة/يالخسيس يالخاين مافيك خير ولا بك رجى ياعبد بيّن ورازي تف عليك تف
ديوان امتلى غيظ من كلامه دفه عنه بكل قوته وصرخ/انخبلت!!صاب عقلك بلا!!
سهم رجع له ناوي يضربه
ديوان مسك يديه مثبته/علامك لافيني بشرك!!/صرخ/علامك!!
سهم دفه عنه يناظره بقهر منه/تراني خابر سواتك هاك الليلة
ديوان قطب جبينه
سهم/خابر انك سديت عن بـيّـن ليلة حريق المحمية
ديوان حافظ على ملامح وجهه/وش هالجور!!
سهم رفع صوته/حاولت تغطي عنه وتلعب بنا مير سكت عنك وقلت يعود عقله براسه ياكثر ماعطيتك فرص ياديوان ياما اكثرها وتاليتها تخون مير سواتك الليلة انهت كل الفرص ياديوان انهتها خلاص
ديوان/علامك انت وش صاير
سهم ضحك بغبنة/باقي تلعبها علي ياديوان!!
ديوان/والله مدري عن وش تهرج ياولد انطق وفكني كان خير ولا شر راضي به انطق
سهم/شاهر وينه ياديوان وينه
ديوان قطب جبينه/علمي به معك بعدها ماشفته
سهم ضحك بقهر/باقي تكذب بوجهي
ديوان/وربي شاهد علي ياسهم ماشفته ولا ادري به
سهم يناظره بتكذيب
ديوان نزل الخاتم اللي بخنصره مافارقه من سنين ورماه على سهم
سهم مد يديه ومسكه
ديوان/والله وحق راعي هالخاتم علي ماكذبت بحرف ماادري عنه ياسهم
سهم ناظر خاتم عمه ابو ديوان اللي بكف يمينه مافارق ديوان من يوم وفاته للحظة مارمى هالخاتم الا وهو صادق مانطق حرف كذب ناظره بوسط انفاسه السريعة/يعني ماتدري عنه
ديوان صرخ/اعلمك ماشفته من كنت معك وتنشدني عنه علامك انت وش صايبك!!
سهم بغبنة/خوفي غدر بنا وفزع يم مبروكة ولّا ابو مظفر
ديوان/وانت وش عليك
سهم ناظره
ديوان/مااخذ منك شي ولا شفته ماعليك منه الا ازين لنا ماهو هذا راي سحاب تبي له تصريفة
سهم ناظره باعجاب للحظة من صحة كلامه لكن تمنى يكون شاهر موزعه واموره بتمشي على هواه ناظره بتركيز من سمعه
ديوان/دام راح جعله مايعود شف لك واحدٍ صاحي تعلمه على يديك وعلى ماتحب
سهم ميل فمه بتفكير وشبه اقتناع من راي ديوان
ديوان ناظره/هاه رضيت ذالحين واستوثقت ولا باقي شكه من يمي!!
سهم تقدم له بندم احتضنه/حقك علي مير سواتك مع بـيّـن
ديوان قاطعه/ماسويت هاللون الا حتى ماتطردني مبروكة!!
سهم فكه يناظره
ديوان/اجل تبيها تطردني وتقعد بروحك معها
سهم احتضنه بابتسامة/تسلم ياديوان تسلم ياولد عمي
ديوان ضمه بملامح خالطها الحزن وبنفسه/سامحني ياسهم سامحني
.
............................................................
//صحوا اهل الديرة بمنتصف الليلة على كارثة حلت بالديرة صحت على اصوات الاستنجاد والهلع اللي احتواهم من اشتعال النار ابتدت ببيت ابو عايد والليلة ماكانت ليلة ساكنة كانت ليلة يلفها الهوا الي ساعد لهب النار يتطاير للبيوت المجاورة واشتعلت فيها النار بسرعة مخيفة تعاون اهل الديرة على اخماد النار بكل مافيهم قبل تحرق بيوتهم كلها بغمضة عين بهالسرعة المخيفة يكفيها التهام اربع بيوت بكل مافيها باقل من ربع ساعة//
سطام وقف بالوايت الخاص به حق شغله وسط صراخه على الرجال/هذا الوايت طفوها
رازي جرى للوايت سحب اللي وفتح الموية باتجاه البيوت بمحاولة منه يطفي النار
سطام جرى لمجلس الديرة يجيب الوايت الخاص بالمجلس واتجه للحريق عسى يقدرون يسيطرون عليها الليلة
//بعد نصف ساعة اخيرا طفوا النيران بعد مااجتاحت بعض البيوت وتسببت بالرعب لاهلها وتشريدهم من بيوتهم بهالليل//
عزيز وقف قباله بوسط تنفاسه السريعة/الحمدلله عالسلامة ياابو عايد سلمت الحمدلله عالسلامة
ابو عايد الجالس عالارض يناظر البيوت محترقة بهم مميل راسه وسانده على يده من كثر مصيبته بهالليلة البداية من بيته وتسبب على باقي بيوت اهل الديرة التزم الصمت ولارد عليه
سطام وقف جنب عزيز بوسط انفاسه السريعة ناظر ابو عايد/الحمدلله عالسلامة ياابو عايد
ابو عايد نطق بهم وعينه لازالت عالبيوت/وين اعيّن السلامة وانا عملت هاللون بالمسلمين!!
سطام بحزم/وش هالقول ماهو انت من تسبب بها
ابو عايد/مير انها قامت من يم بيتي ياشيخ
سطام/ابد النار ماقامت من داخل بيتك ياابو عايد النار رميت يمه رمي/أشر عالكيبل/هذا أولها /سكت وكتم الكلام بخاطره للحظة وهو يدري بصاحب هالافعال القديمة التفت يناظره بحدة ثم قطب جبينه بغيظ من لمح طيف ابتسامة وقدر يخفيه/
رازي المتكتف يسمع النقاش ميل فمه بتفكير فك تكتيفته/ياشيخ كان العلم به كيبل/حك حاجبه بطرف اصبع يمينه/الصحيح/رفع عينه لعزيز/انا شفت عزيز عند الكيبل الليلة
//اتجهت الانظار لعزيز//
عزيز انخطف وجهه يناظر رازي بذهوله
رازي/الشهادة لله ماشفت وش يسوي مير تخبرون سوالف الكيابل المبطية
،
،
بارود(١٥سنة)يتلفت يمين ويسار بمراقبة متكي بكتفه عالجدار بهمس/مابه احد
عزيز(١٥سنة)منحني قبال الكيبل المفتوح يناظره بتفكير/راجو سافر الصبح صحيح؟
بارود/ايه سلمت عليه قبل يمشي
عزيز ابتسم/هاه تعال
بارود جرى له بحماس
عزيز ماظره بنفس حماسه/هاه نبدا؟
بارود هز راسه بايه
عزيز وصل الاسلاك بطريقة عكسية ثم يده للمفتاح وناظر بارود بابتسامة/مستعد؟
بارود بحماس/اعجل ياولد
عزيز حرك المفتاح معلن عن توصيل الكهربا وجرى مبتعد
بارود سبقه بالحري وسط ضحكات اتتلت منه بسعادة
//انفجر الكيبل وغطى صوت انفجاره المكان وتطاير الشرار والنار معلن عن اندلاع النيران بهالكيبل وماجاوره//
عزيز  يناظر فعله باستمتاع وسط انفجاره بضحكات من اعماق قلبه
..
يوم جديد
..
بارود واقف يراقب/هاه اعجل علينا قبل يلفي المذن
عزيز واقف عند كيبل المسجد/علامك علي ترانا بنص الليل وش بيجيبه ذالحين!!/ابتسم من خلص شغله التفت يناظر بارود/ولد تولم
بارود التفت يناظره بابتسامة
عزيز وصل الاسلاك ثم رفع المفتاح وجرى
بارود وراه يكتم صوت ضحكاته
عزيز وقف والتفت يناظر عمله المتقن بعينه يحب منظر هالشرار المتطاير بعد الانفجار وصوته العالي وقف يتأمله للحظات وقاطع تأمله الممتع يد لامست كتفه
المؤذن بغبنة/قضبتك ياللي ماتخاف الله قضبتك
،
،
ابو عايد ناظر عزيز بذهول/ياللي ماتخاف الله!!
عزيز بوسع عيونه/تعقب وتخسى تتهمني انا على شي سويته يوم اني ورع لعب ورعان تحاسبني عليه ذالحين!!
رازي بابتسامة/علامك شبيت علي انا قلت ماشفت وش تسوي عنده مير علامك ماصديت قولي بشوفك عنده
عزيز بغبنة/لاني من الاساس رجلي ماخطت يم الديرة الليلة
سطام ناظره بحدة/مير انت اول من علّمنا بالعلم ياعزيز
عزيز بقهر/حتى انت علي ياسطام!!
سطام ناظره باصرار على رايه
عزيز/زين كانكم صادقين انه انا ليه فزعت معكم ورا عاونتكم هاه!!دامني من سوا هالسواة ازين لي اشوفكم وانتم تلعب بكم النيران!!
سطام تجاهله ومرر نظره عالمتواجدين/من شاف عزيز وشهد على فعله هو بوجهي عليه الامان تحت راية شيخ بني سمّار مايلحقه لايم لامن قريب ولا من بعيد
عزيز بوسع عيونه/تف عليك ياسطام ياللي مابك خير تف!!
سطام رفع صوته/يابني سمّار ماتاخذني حمية عيال العم عليكم انتم عيال عمي واهلي كل ابوهم من شافه يشهد وابشروا بحقكم منه
عزيز تكتف بابتسامة انتصار من خيم الصمت عالمكان
عمر الواقف بعيد نطق بعد تردد اجتاحه لفترة طويلة واجبره يلتزم الصمت/عزيز هو من تسبب بها
عزيز رجف قلبه وتسارعت انفاسه التفت يناظره وثبت عينه عليه  بذهول
رازي ابتسم بانتصار مجبر نفسه عالهدوء وداخله يرقص بحماس وسعادة بهاللحظة
عمر يتكلم بسرعة قبل يتراجع عن قراره/شفته وهو يفتح الكيبل وشفته وهو يوزع الجريد(سعف النخل)ثم يوقف ويحتري شي ثم دريت بسواته يوم دوا صوته بالمكان منفجر وشبت النار تاكل بعضها
سطام ابتسم/بيض الله وجهك ياعمر وكثر من امثالك بالحق
عزيز ناظر عمر بحدة/ليه تكذب علي
سطام وقف بين عمر وعزيز مقاطع لنظراتهم يناظر عزيز بحدة/عزيز
عزيز بحدة/اسمعك!!
سطام/انت من تسبب بهالحريق
عزيز صرخ/كذب
سطام/انت حتى ماانكرت سواد وجهك وقوفك عند الكيبل وهذا اول مايقال!!
عزيز/احترم نفسك!!
سطام رفع صوته/عزيز بن زايد بن فايز السّمار
عزيز احتدت نظرته
سطام/اول الجزاء واوجبه تعوض اهل البيوت اللي اعدمتها
عزيز يناظره بقهر
سطام/وواجب عليك تعبي خزاناتهم شهرين باي وقت وبطاعة بدون حرف يطلع منك
عزيز بوسع عيونهم/اشتغل عندهم صبي!!
سطام/تحمد ربك سلموا المسلمين من اذيتك ولا كان به علم ثاني
عزيز/تعقب وتخسى اسمع لك كلمة يالورع
سطام بحدة/ياشيخ وبتسمع كلامي كله ولا أتلك يم الشرطة وهاذي ماتسرك ابد
عزيز شد على قبضته الراجفة وسط نظراته الناطقة غضب
سطام بتحدي/كان ماسويت كل ماقيل/اشر بيده عالمتواجدين/كلهم شهود على فعلتك الليلة ونتلاقى بالشرطة ياعزيز
.
............................................................
   يـوم  جـديـد
............................................................
<<الفندق>>
نور صحت من نومها جلست عالسرير والتفتت تناظر مكانه الخالي عقدت حواجبها باستغراب وقفت ولفت الشقة تدور عليه رجعت طريقها للغرفة وسحبت جوالها اللي احتل الكومدينة القريبة منها لاول مرة من سنين فتحته واتصلت عليه
ظاهر الواقف بملامح انزعاج من اشعة الشمس اللي تضرب بوجهه/هلا يانوري
نور/ظاهر وينك؟
ظاهر/شفتك نايمة قلت اتمشى بالمحافظة شوي مبطي عنها لو دريت بتصحين كان احتريتك
نور/عادي على راحتك مو مشكلة
ظاهر/وش تبين فطور
نور/على ذوقك انا عادي
ظاهر ابتسم/اجل صحصحي بنفطر احلى فطور اليوم
نور بابتسامة/يكثر خيرك ياابو ضاري
ظاهر قفل/بامان الله/اختفت ابتسامته نزل نظره للشنطة السيارة المفتوحة يناظره/زين باقي فيك روح/مد يده فتح اللزقة عن فمه وفتح علبة الموية يصبها عليه /
شاهر المكتسي وجهه السواد يناظره بتعب من قلة حيله
ظاهر/لاتخاف ماانت بميت
شاهر بصوت منخفض/انت من؟وش تبي مني؟وش سويت لك؟
ظاهر تكتف/لاعطيتني اللي ابيه بتعرف انا من اما وش سويت/احتدت ملامحه/يامبر ماسويت بحقي وحلال ذبحك في ذا البر محدن درا عنك حتى الكلاب تعافك ياعدين المروة
شاهر قطب جبينه بتفكير وبنفسه/اكيد اخو لاحد هالبنات اللي اعرفهن/وبتعب نطق/مالك شي عندي ماسويت شي
ظاهر مد يده وشده من ياقة ثوبه/ماسويت شي!!وين الجوال انطق وينه
شاهر ماظره باستغراب اتسعت عيونه من فهم اخيرا وش يبي/من انت وش تبي به
ظاهر لكمه على فمه
شاهر تكسرت اسنانه السفلية واعتلى صوت أنين ألمه
ظاهر بتهديد/المرة الجاية ماهي بواقفة على سنونك
شاهر برجفة الم وتعب وضعف/اجيبه لك اجيبه مير فكني شرك
ظاهر بغبنة/مابعد شفت من شري شي يالردي مابعد 
............................................................
<<شقة محارب>>
محارب بلبس دوامه واقف قبال المراية يقفل ازارير بلوزته الرسمية باللون الابيض ناظر انعكاسه ماغاب عن عينه تغير نفسيتها رغم سوالفها وضحكها معه بالامس فيه شي تغير لكن ماقدر يوصل له التفت لها/ولاء
ولاء الجالسة على طرف السرير بعبايتها المفتوحة وطرحتها على اكتافها ببنطلون بيج هاي ويست وبلوزة بيضا رافعة شعرها كعكة بكحلة وروج نود منحنية تربط حبال جزمتها السبورت الجديدة باللون الابيض نطقت بدون تناظره/هلا
محارب ناظرها بصمت
ولاء رفعت راسها باستغراب من سكوته والتقت عينها بعينه/وش فيك؟
محارب/انتي اللي علامك
ولاء اعتدلت بجلستها ارتفعت حواجبها باستغراب/مافيني شي!!
محارب تنهد/علمتك انا مااعرف علامك الى ماتعلميني
ولاء امتلت عيونها دموع
محارب قطب جبينه
ولاء/الا فيني يامحارب فيني شي كبير وبالحيل بالحيل/وقفت وسحبت شماغه من دولابها والتفتت له من مكانها ورمته عليه/
محارب مسك الشماغ بين يديه بوسع عيونه من حركتها
ولاء برجفة صوتها/وين كان شماغك يامحارب؟
محارب ناظرها بتفكير ثم اتسعت عيونه من ذكر ليلة سجنها ومساعدته لهالجيران/من جابه لك؟
ولاء/هي جابته ذيك ماغيرها/صرخت/اللي دخلت السجن بسببها وانت ذا كل همك يامحارب من جابه؟
محارب تنهد/ولاء ذيك الليلة امها تعبت وفزعت لهم
ولاء قاطعته بدموعها/عساها تموت وش عليك مايكفي سواتهم فيني ناوية عليك انت بعد
محارب رفع صوته/وهذا اللي سويته مير يوم حسيت المرة بتموت ماقوى قلبي مااساعدهم وشلون ربي يستجيب دعاي للي مشغلتني وانا اسمع المستنجد وماانجده وشلون
ولاء ناظرته بدموعها
محارب/طلبته مثل ماساعدت هالناس اللي ابغض خلقه على قلبي يرحم ضعف احب خلقه لقلبي ويجبرها بهالليلة الصعيبة علي وعليها
ولاء زادت دموعها/قهرتني يامحارب اغراضك بين يديها
محارب تقدم لها وضمها/الخبيث خبيث هماك عاونتيها وعاونت اخوها عليك وش ترجين منها
ولاء/هالمرة شماغ اخاف بكرة تسوي شي اكبر
محارب/تعقب انتي الاكبر والاعلى بعيني ماتاصل مواصيلك لو تمطر سماها علينا ذهب
ولاء حاوطته بيديها
محارب شد عليها بين يديه/الله يقهرها مثل ماقهرت حبيبتي وصيحتها بذا الصبح اهبي يامال الشياطين اللي تركبك وتفكنا شرك
ولاء ضحكت بخفة
محارب تركها بابتسامة يناظر ضحكتها/هاه انبسطتي عالدعا
ولاء/تذكرت جدتك بوسط الحوش وتستقبل الرايح والجاي بدعاويها
محارب ضحك ودخل يده بجيبه ومد لها منديل/ايه عاد جدتي مدرسة مانوصل شي قدامها
ولاء تمسح دموعها شهقت
محارب فز/علامك
ولاء مسكت يده وجرت/تاخرنا تاخرنا بالحيل
.
............................................................
.
يـقـيـن جالسة بالحوض لازال بقايا النوم محتلها، النومة اللي كانت بدايتها من ألذ مايمكن من جمال مشاعرها ورقتها كانت نهايتها وجع لظهرها مثل ماتوقعت
بـيّـن وقف عندها ينسف غترته ناظرها يكبح ضحكته المنتهية بابتسامة على وجهه من ملامحها/صباح الخير ياوجهٍ من اصبحت اصبّح عليه وانا مااعرف الا الخير من عقبه
يقين ناظرته بعبوس
بـيّـن/يازين اصبح عليّ لو بطرف بسمة تراها تضحك لي باقي اليوم كله!!
يقين ابتسمت بمجاملة/صباح النور هاه اصبحت ولّا باقي؟!
بـيّـن عبس بوجهه/ياشينها اي والله
يقين اتسعت عيونها فزت واقفة تخصرت وبزعل/وش الشين ان شاء الله هاه وشو؟!!
بـيّـن مد يديه لرفرف الونيت الخلفي مسكه بقوة ونط لداخل الونيت
يقين صرخت من حركته المفاجأة اللي تسببت باختلال لتوازنها
بـيّـن مابعد اعتدل بوقفته مد يمينه ليمينها ومسكها حتى ماتطيح
يقين اعتدلت بوقفتها بوجهها المخطوف
بـيّـن المنحني شبه جالس بابتسامة يناظر خوفها
يقين برجفة سرت بجسمها من خوفها/بـيّـن!!
بـيّـن ابتسم وسحبها له
يقين صرخت وطاحت عليه
بـيّـن توجع من طيحتها فوقه/اااه
يقين رفعت نفسها شوي لازالت فوقه تناظره بغيظ/احسن
بـيّـن ناظرها بزعل/علامك علي
يقين/هاه بشّر عسى ضلوعك سلمن!!
بـيّـن ابتسم/ليتك تدخلين وسطهن وتشوفين بعينك من المتربع داخلهن
يقين تظاهرت بالثبات رغم حرارة اجتاحت جسدها من خجلها وحس فيها بـيّـن/يعني من؟!اكيد قلبك!!
بـيّـن يناظرها بابتسامة وبتلاعب بالكلام/صحيح قلبي
يقين اعلن الخجل احتلاله لخدودها بالاحمرار ارتفعت بجسمها عنه مبتعدة
بـيّـن مد يده لها ومسكها
يقين التفتت تناظره
بـيّـن/مااشرقت الشمس ولا ظهر يقيني البيّن بسماي لذالحين
يقين ناظرته/صباح الخير يابـيّـن
بـيّـن جلس/ياصباح النور والاشراق وخبز التنور وكاسة الشاهي ودلة الكيف
يقين تكتفت بغيظ/الظاهر منقطع من الجوع
بـيّـن /الصحيح اي والله خابرك سنعة مدري علامك ابطيتي بالنومة
يقين/وين ابطيت هو رقدت اصلا!!
بين ناظرها عن طرف/اههه ياكبرها شخيرك صحى به الحلال  ومارقدتي
يقين اتسعت عيونها واحتواها الاحراج وبلعثمة/ممتتى شاخرت ماسويتها قبل حتى اسويها ذالحين
بـيّـن انفجر يضحك من لعثمتها/صادقة صادقة
يقين بغيظ/والله مااكذب!!
بـيّـن بضحكه/يابنت احلف انك صادقة علامك تكذبني
يقين بزعل/مدري عنك!!/نزلت من السيارة وناظرته/ودك نفطر هنيا ولّا في بيتنا؟
بـيّـن وقف/على هواك
يقين التفتت وناظرت الشبة والدلة اللي تفور والجمرية المغطاة فوق النار ثم التفتت شي بسيط تناظره عن طرف/على هواي اجل
//على الفطور//
بـيّـن/هاه وش لونها جمريتي
يقين بابتسامة رفعت كاسة الشاهي وارتشفت منها/تسلم يمناك ماذقت ازين منها الصحيح
بـيّـن/عساه بالعافية
يقين طردت التردد عنها رفعت عينها له/بـيّـن
بـيّـن اللي يفطر رفع عينه لها/سمي
يقين/وش ناوين عليه
بـيّـن اعتدل بجلسته وترك اكله يناظرها/ناوين مبروكة
يـقـيـن هزت راسها بصمت
بـيّـن/يقين
يـقـيـن ناظرته
بـيّـن/وش ناويتن عليه؟
يقين/اعاونك على مبروكة حتى يصفى لي عزيز
بـيّـن عقد حواجبه
يقين ناظرته وبقهر/ابيه ذليل مكسور ولاشبعت من شوفت ذلّه ارميه بالسجن مثل رمية الكلاب
بـيّـن ابتسم/اسهل القوم عزيز
يقين ناظرته باستغراب/مير مبروكة محزمه ومحزمه مليان بالحيل
بـيّـن ابتسم وسط صمته يناظرها مد يمينه لها
يقين مدت يمينها له بابتسامة
بـيّـن/هاه يابنت منصور اصملي
يقين صافحته بابتسامة/ماحطيت يدي بيدك الا وانا قدها
بـيّـن ابتسم من قولها/على بركة الله
يقين/على بركة الله وبه نستعين
بـيّـن يده بيدها ضحك بخفة ثم تنهد/تراني عجنت الجمرية بحليب خلفات
يقين انخطف وجهها
بـيّـن بضحكة/ماذقتي ازين منها
يقين فزت من داهمها الغثيان
بـيّـن بضحكة/يابنت امزح والله امزح عجنتها بماء عودي يابنت عودي
.
#شقّ_الغَمام
واخيرا راح اغيب حدود الاسبوع تقريبا عن الرواية لظروف وان شاء الله بعدها لنا عودة لها ولاحداثها ودمتم بحفظ الرحمن