شـقّ الـغَـمـام

..(١٠)..

..(١٠)..
لاحول ولاقوة الا بالله العلي العظيم
-
بذاك الوادي المحظور تواجد اي إنسي فيه من كثر الشائعات والتحذيرات والفقدان لاشخاص مروا بها اهل الديرة ذاك الوادي الخالي ماعدا ذاك الحوش المهجور والخيمة المجاورة له نزلت من السيارة وسط سواد يلفها بالكامل
عزيز بضيق/ياجدة
مبروكة بدون التفات له/ماني بقاطعتها ياعزيز تريح
عزيز/ياجدة الحداد على ميت مايجوز وحرام وثم هو ولدك كيف تحدين عليه!!
مبروكة بغيظ/كم مرة وانا اعلمك ذا نذرٍ نذرته احد على ولدي ثلاث ايام من كل شهر مالك بي كبني ياعزيز عنك مالك شغل
عزيز ناظر الظلام حولهم ماعدا نور الحوش الخارجي/مير ياجدة
مبروكة قاطعته/تيسر ياولد زايد تيسر
عزيز وقف بتردد
مبروكة/علامك/ضربت الباب بطرف عكازها/امش
عزيز/بكرة جايك افطر معك
مبروكة/خلص امور اهل الديرة سمعت لاتجيني بس
عزيز/ايه ايه هين/حرك ومشى/
مبروكة تقدمت بخطواتها للخيمة
سهم تقدم ناحيتها من الجهة الخلفية للحوش بخطوات سريعة وقف قبالها بانفاس سريعة/حياك الله ياسحاب
سحاب وقفت على باب الخيمة وسط حدة ملامحها/علمني وش صار عليهم
سهم/على وصول مير يهدد
سحاب ميلت فمها بابتسامة/كبّه ينفخ ريشه مرد ريشه يتنتف ويعود يمنا
سهم رفع عينه عنها وناظر لقدامه من وصل لاذنه سمع صوت السيارات/هذا هم ياسحاب
سحاب التفت بجسمها واعتدلت بوقفتها ومسحت بيدها على طرحتها ترتبها/كبّه يبرق ويرعد ياسهم كبّه على راحته لاتوجس حرف
//وقفت ثلاث سيارات دودج رياضية مختلفة الوانها نزلوا ركاب السيارتين الامامية والخلفية والتفوا حول السيارة الوسطى//
رئيس الحرس انحنى وفتح له الباب
نزل من السيارة بمظهر عادي ثوب وشماغ لكن كل مافيه ينطق هيبة اتجه لهم بخطوات ثابتة هادية
سهم واقف وراها انحنى/هذا هو جاينا
سحاب ابتسمت/حياك الله ياابو مظفر ياهلا ومرحبا
ابو مظفر وقف قبالها/الله يسلمك ياام زايد مير التراحيب
سحاب قاطعته/هاذي هي التراحيب بيننا عمر ماضرتنا على كثر الخطا
ابو مظفر قطب جبينه للحظة سريعة وبددها
سحاب/حياك الله حياك ياشيخ حياك
........................................
<<بيت بـيّـن>>
جالس قبال البيت بمسافة معطي قفاه للبيت بفروة غطت هيئته الصغيرة بنظارته السودا متلثم بشماغه ومنزل لثمته شي بسيط عن فمه حتى يتقهوى بدون اي التفاته للبيت التفت عن طرف ليساره يناظره بغيظ/علامك لاحقني تموت بدوني
نواف بجاكيته الاكبر من مقاسه متكي بجنبه يتقهوى تكلم بدون يلتفت له/مرسول مرسول تعبت وانا اعلمك يامال اللي بس
سلمان بغيظ/والله مااكذب منك من ذا اللي مرسلك علي
نواف/عساك ماصدقتني اي والله علامك علي تقل سارقٍ حلالك وموزعه
سلمان رفع شماغه غطى فمه والتفت يناظره/تبيني اصدق ذا الفرة
نواف/ماهو منك من نظارتك بهالليل ايه صدقها هالفرة مثل ماانت يرسلك بـيّـن انا بعد لي مراسيلي/التفت لورا/
سلمان ضربه على ظهره وبعصبية/ياحمار لاتلتفت لاتلتفت
محارب وقف وراهم انحنى ومسكهم من قفاهم وشدهم لفوق وبابتسامة/ماشاء الله ماشاء الله مستكنين وطاقين الكيف هنيا
سلمان رفع يديه ليد محارب اللي ماسكه فيها/مرسول مرسول يامحارب
مُحارب التفت لنواف/وانت؟
نواف رفع راسه يناظره بابتسامة/لاقلت مثله تصدقني
محارب تركهم وضربهم بيديه على قفا روسهم/بأعد لثلاثة ماتحركتوا قدامي للبيت بيصير شي كل اهل الديرة يدرون به
//سلمان ونواف فزوا وجروا مبتعدين//
محارب بنرفزة/نعنبوا ذا الوجيه ماافلحتوا غير بالكذب قطعة
........................................
ببنطلون اسود وتيشيرت اسود وجزمة رياضية متلثم بغترته البيضاء بوسط الظلام الدامس اللي يلف كل ماحوله بليلة غاب عنها البدر وزينت السما نجومها المضوية لحدودها متمدد على بطنه اعلى هالجبل المطل على هالوادي وبين يديه المنظار الليلي يعايره على المسافة يناظر السيارات اللي توقفت عند الخيمة مسك كشافه المفتوح على نوره الخافت بين اسنانه وقلب بدفتره الصغير وسط تقطيبة جبينه
رازي بلبسه المماثل للي جنبه مختلف عنه بلبسه بكاب اسود وكمامة سودا ناظره بغيظ/نسيب سحاب العين علي
بـيّـن مشغول بدفتره وبدون يناظره/اسكت عني مثل ماسكت عنك وانت جايب هالعلة معك
ديوان الجالس على مسافة بسيطة منهم ملتزم الصمت
رازي/اهب ياما اخونك صدقتك الا شعرة
بـيّـن/الله يقطعها ذا الشعرة
رازي/الا الله يعزها ويطولها ولى كان فاتتني هالجلسة وبعدين اعتق ديوان علامك عليه
بـيّـن اتسعت عيونه/هاذي هي
رازي قرب منه يناظر معه بالدفتر اتسعت عيونه/وش ذا/بدأ يحسب/
ديوان ميل نفسه يحاول يناظر الدفتر
بـيّـن قفله وسط ناظرته الحادة له
ديوان صد بوجهه
رازي بصدمته/قبل سنة ونص!!
بـيّـن ميل فمه بابتسامة/اكيد انه الراس الكبير دام سحاب وقفت له برا الخيمة/قطب جبينه بتفكير/
رازي بتفكيره/ياولد من مبطي معلمّك البلا بالحوش
بـيّـن/هو البلا بالحوش قاضين مير الخيمة راس البلا مايمر شي الا  بعد مايطلع من هالخيمة/اتسعت عيونه بصدمة وبفجعة/رازي
ديوان رفع عصاته المحتضنها من جلس معهم وسددها لراس رازي بكل قوته
رازي الغير متوقع لتصرف ديوان استقبل الضربة بدون مقاومة فقد وعيه بلحظتها
بـيّـن فز واقف ودف ديوان عن رازي
ديوان تعثر بخطواته وتراجع لورا بدون سيطرة واخيرا بعد كم خطوة قدر يتزن رفع راسه واتسعت عيونه بصدمة
بـيّـن مسكه من تيشيرته وسدد لكمات متتالية بجنون لديوان
ديوان يقاومه واخيرا قدر يلكمه ويبعده عنه
بـيّـن ارتمى وتدحرج عالجبل لمسافة بسيطة
ديوان فز ومسكه يثبته
بـيّـن رفع عينه وسط ألمه وسحب يده بقوة من يد ديوان
ديوان شد على يد بـيّـن/خذ خويك وامش
بـيّـن قطب جبينه بحدة
ديوان/هالمرة جمالة الخوة وبعدها مابه لا خوة ولاغيرها/ترك يد بـيّـن وبدا يطلع الجبل انحنى واخذ دفتر بـيّـن
بـيّـن وقف وجرى له بصراخ/هييييهههه
ديوان التفت وخرج مسدس الربع من جيبه موجهه لرازي اللي عند رجوله
بـيّـن وقف وسط رجفة سرت بعظامه
ديوان/لاتحدّني اسوي شي حتى الندم ماينفع معه
بـيّـن تراجع خطوة لورا
ديوان نزل من الجبل من جهة الحوش
بـيّـن اسرع بخطواته لرازي رفع راسه بييساره وبيمينه يصحيه/رازي رازي/اتسعت عيونه من حس بلل بيده بلع ريقه/ولد رازي
رازي ماابدى اي رد فعل
بـيّـن شاله على ظهره وبدأ ينزل الجبل من الجهة المعاكسة لهالحوش وسط انفاس متسارعة من خوفه
رازي همس/بـيّـن
بـيّـن وقف وارتخى جسمه المتصلب براحة/انت طيب ياولد
رازي بندم/هو خان ولا حنّا عدنا الخطأ ولاتعلمنا
بـيّـن كتم لومه لرازي وبغبنة/خل اشوفك اول طيب وعقبها يصير خير/مشى/
رازي دفن وجهه بكتف بـيّـن يكبح دموعه وبرجفة صوته/سامحني يابـيّـن سامحني ضيعت تعبك سامحني
بـيّـن رفعه لفوق يجبره يبعد وجهه عن كتفه
رازي ابعد وجهه عن كتف بـيّـن من حركته
بـيّـن بحدة/لاتحني راسك سمعت
رازي عض شفته بغبنته
بـيّـن زفر/فدا يارازي فدا
رازي بقهر من نفسه/ثلاث سنين راحت بكل تعبها
بـيّـن/هيه ولد يارازي
رازي بلع ريقه/وش تبي
بـيّـن بابتسامة/ماابطى السيل الا من كبره
رازي بصوت اهتز للحظة/بالحيل ابطى يابـيّـن
بـيّـن/ماعليك ماراح الا الردي مايروح حقك وانا معك
رازي ابتسم/خابرك كفو/انحنى مميل جسمه سانده على ظهر بـيّـن/خلني انام شوي احس الدنيا للحين تدور
بـيّـن بغرور/الظاهر اني لك العون والمركى والكتف اللي تسمع بها ياولد
رازي بابتسامة من غروره/اجل انا تتمة هالبيت
بـيّـن وصل الارض اخذ نفس بصوت مسموع وبابتسامة/ايه ياسبحة يميني بالمجالس تريح لاني بأشوتك بعد شوي ياثقلك ثقلاه قطعت حيلي
رازي مغمض عيونه وبهمس/اذكر الله لاتذبحني يالمركى بثقل عينك
.........................
<<مجلس الشعر>>
ظاهر متمدد ومعطيهم ظهره ووجهه لولده
ضاري متمدد بفراشه الملاصق لفراش ابوه
نواف يهمس لسلمان المتمدد جنبه/والسواة الحين هي لو وقفت على رازي امره بسيط مير انه بـيّـن معه
سلمان/كله منك ولا برايك ليه بـيّـن ماجابك تقعد محله
مُحارب المتمدد جنب سلمان زفر/اوووص وراي مشاوير بكرة خلوني أنام/عدل نومته على جنبه/
نواف همس/ماهو بوقت لومك وش نسوي اخلص علينا
سلمان جلس وبغبنة منه/الا الومك وانت اول ماناظرك جدي علمت بكل شي الله لايجعل ستري عندك يالنكبة
نواف جلس/وانا وش يدريني ان جدتي بتطرد جدي وبيرقد معنا تعرف جدي لو شم طرف علم ذبحنا ولا عليه
ظاهر فز جالس وبعصبية/وبعدين يعني وبعدين
نواف فراشه ملاصق لظاهر تمدد وتغطى كله بلحافه
سلمان قطب جبينه باستغراب من ظاهر الهادي عادةً التقت نظرته بنظرة ظاهر قشعر جسمه
ظاهر بحدة/علامك تناظرني بهاللون!!
سلمان بلع ريقه/سلامتك مابي شي
ظاهر/يالرمة انت وياه يومكم ماانتم بقد الفزعة وراه تطقون الصدور!!/ناظر نواف وسحب اللحاف عنه/وانت
نواف المتمدد ناظره/سم
ظاهر/فكنا لاعاد تفزع لاحد مير الله يكفي ولدي شر مواريثك
سلمان كتم ضحكته
ظاهر حذفه بالمخدة
سلمان مسك المخدة/سم
ظاهر/لاتستانس تراك ماانت بعيد عنه يامال الخياب
سلمان/ابشر
ظاهر/اخمد انت وياه وجزاكم بتلقونه الصبح على وش مستعجلين ان مارحتوا يمّه هو لفاكم اخمدوا وفكونا من الاذى خلونا نرقد/تمدد/
نواف ناظر مُحارب الصامت باستغراب وهمس/ماتبي تقول شي؟
مُحارب معطيهم قفاه/اقدا بكم وش اقول عقبه اخمدوا بس وفكونا لااسمع حس
نواف رفع نفسه والتفت يمينه ويساره يناظر ظاهر ومحارب ناظر سلمان بنظرات قلق
سلمان تمدد بسرعة واعطى نواف قفاه/من اصبح افلح
.................................
،،،خـيـمـة سـراي،،،
سحاب جالسة عالكرسي بصدر هالخيمة
سهم يناظر وجهه المرتسم عليه اثار معركته
ديوان واقف قبالها رمى الدفتر عند رجولها/علمّيهم يغيرون سياراتهم عرف ارقام بعضها
سهم اتسعت عيونه وانحنى ياخذ الدفتر يقلب فيه ناظر ديوان بوسط افكاره
سحاب ضحكت بصوت عالي/سهم علامك مالك حس!!
سهم بربكة ناظر الدفتر/صحيح ياسحاب وبالتواريخ بعد
سحاب ضحكت/ماهو بهين هالبيّن
ديوان/الا انتم اللي وصلت بكم الثقة حد السما تناسيتوا ان الخطا محسوب عليكم بمية!!
سحاب انحنت وسندت طرف فكها على عكازها/وثم ياديوان اخر أوامرك
ديوان/اطلع وادخل بكيفي ماتردوني عن شي
سحاب اعتدلت بجلستها وتنهدت بوسط ابتسامة/تشفع لك سواتك ابشر ياديوان ماطلبت شي
سهم التفت يناظرها بصدمة لموافقتها
سحاب/تبي تشوف وش داخل هاك الغرفة؟
ديوان شد على قبضته/ايه مير قبلها استلم التدقيق
سهم اتسعت عيونه/وش
سحاب قاطعته/هالشغلة ماهي بلك
ديوان ميل فمه بابتسامة جانبي/هو انتي عمرك جربتيني بشي!!
سهم يناظرهم بصدمة من سرعة كل شي يصير حوله 
سحاب ضحكت/بذي صدقت مير هي شغيلة صغيرة كان سويتها فعز الله اني مضيعة ذهبي بوسط بيتي
ديوان/وش ان هي؟
سحاب وقفت/بالاول جزاك مايضيع ابشر به ثم عقبها نشوف ودك بهالشغلية ولى ماتقواها/مشت/
ديوان مشى وراها
سهم يناظرهم مقفين تسارعت نبضاته بقلق من احتلال ديوان لمكانه شد على قبضته واسرع بخطواته وراهم
سحاب وقفت قبال الغرفة بعد دقايق من المشي دخلت يدها بجيبها خرجت المفتاح وبيدها الثانية مسكت القفل وتحسسته ثم فتحته 
ديوان يناظرها بكامل تركيزه بكل حركة تسويها
سهم قطب جبينه ماغاب عن عينه اهتمام ديوان
سحاب رفعت يدها تحسست اللوحة ودخلت الرقم السري بحكم العادة وبدون اهتمام لتواجدهم حتى يفتح الباب ومن طق صوت القفل/هاه تبي تشوف وش وراه لذالحين صامل؟
ديوان/هذا جزاي ولا به رجعة
سحاب بضحكة/استغفر الله استغفر الله قلتها من اول ابشر مير اني
ديوان قاطعها/اجل ماله داعي كثر النشدة اما عطى من طيب نفس ولى بلاها
سحاب تنهدت زين احتدت ملامحها وفتحت الباب/مير اللي بتشوفونه ذالحين ان طلع عنه حرف واحد توكدوا مابيرف الرمش بالدنيا عقب هالحرف اللي طلع
ديوان سرت رعشة بجسمه وتراجع خطوة لورا من المنظر
سهم ماكانت صدمته اقل من ديوان لكن كان افضل منه ووقف بثبات
سحاب ابتسمت/ولد ياسهم
سهم بلع ريقه وناظرها وباهتزاز صوته للحظة/سمي
سحاب التفتت له بثقة/صحيح انها تصيب معي كل مرة مير هالمرة غير عن كل مرة ونعم شامخ ماهزك أهونها
ديوان قطب جبينه وناظرها بتقزز مرتسم على ملامحه
سهم ابتسم/عساك ذخر لنا ياسحاب
ديوان زفر بضحكة خفيفة بسخرية من اللي يشوفه
سحاب التفتت لديوان/ديوان
ديوان احتدت نظرته للحظة ثم اخفاها
سحاب/الصحيح بالاول ماني بمتطمنة مير عقب تلاحقك للامور وزين فعلك ذالحين اقول حياك بيننا  ياديوان ياهلا ومرحبا
ديوان رسم ابتسامة على وجهه متجاهل وبقوة للغرفة واللي فيها تنهد/الله يسلمك ويكرمك
سحاب/عاد الله ييسر اموركم بكرة ان شاء الله كان احتجت شي ارسلت يمكم روحوا
ديوان مشى
سهم/تصبحين على خير ياسحاب
سحاب/زين زين قدامكم الخير كله
سهم خرج من البيت ووقف يناظره
ديوان منحني شبه جالس بجانب زاوية الحوش يرجع
سهم انفجر يضحك/رهيّف القلب طول عمره يظل رهيف القلب
........................................................
<<بيت بـيّـن>>
الجد طاهر جالس عند باب البيت مستند على عكازه بطرف دقنه بملامح مرتسم عليها الغضب وملتزم الصمت
غيمة وراه/ياجد ادخل
طاهر مارد
غيمة خرجت من البيت وطرحتها على راسها انحنت شبه جالسة قباله/ياجد انت لا اللي دخلت ولا انت اللي قفيت
طاهر زفر
غيمة/تعوذ من ابليس وادخل ماهو بحاصل الا كل خير مير انت ادخل
طاهر لانت ملامحه وتنهد ابعد العكاز عن دقنه/يابنت/سكت واحتدت ملامحه من وصل لاذنه صوت خطواتهم وكلامهم وقف/ادخلي داخل
رازي يمشي ومستند على بـيّـن/اااه رجولي توجعني
بـيّـن ناظره عن طرف وضغط على يده اللي ماسكها/الضربة براسك ياعسى ذا الراس
رازي قاطعه ومسك راسه/ااااه راسي يوجعني ذا اللي مثقل رجولي
بـيّـن/احمد ربك معاونك بالمشية هو انت احد يصبر على لسانك
رازي وقف وسحب يده من بين وبزعل/ايه ذي علومك وانا وجعان الله يكفيني شرك كان طحت بمصيبة
بـيّـن رمش يناظره/ولد علامك!!
رازي/ايه ايه علامي توك جاحدني يالجحود
بـيّـن هز راسه ومشى/مافيك الا العافية يومك تزعل على كل طاري
رازي مشى وراه بسرعة/بـيّـن والله راسي يوجعني
بـيّـن وقف يناظر جده
رازي وقف يناظر الجد
طاهر بحدة وعينه على بـيّـن/ليت راسك يوجعك مثله كان تقرّون بالبيت ليته بس ليت
رازي اسرع بخطواته للجد طاهر وقف عنده رفع نفسه حتى يقبل راسه
طاهر ابعده عنه وبحدة/طسّ عني سلامك ماابيه
رازي تراجع بخطواته وبوجهه العابس/ليه بس ياجد
بـيّـن مد يده يمسك رازي وعينه على جده بعدم اهتمام
طاهر ناظره بحدة/ماني قايل اصبر علامك مطيور!!
بـيّـن رفع اكتافه/صبرنا سنين وماشفنا الا الاجبار على كل شي عايفينه
طاهر بغبنة مرر نظره عليهم/ماطلعنا لذالحين من عياش وخلف ومثنى/صرخ/ناوين خلف ومثنى ثانين
بـيّـن/وفيه بعد خلف ومثنى ينوبون كان طارت الطيور وودعت
طاهر صرخ بحدة/بـيّـن
بـيّـن دخل يديه بجيوبه وصد بوجهه
رازي مسك يد طاهر/جد ياجد عدت على خير فليقة ماهي فلقة كاملة حتى
طاهر دف يده/اعقب تبيها تجيب أجلك يالمريض!!
رازي/ياجد علامك زعلت
طاهر ناظرهم ورفع عكازه يحركه بتهديد/والله وبالله ان قلتوا هه اني لاأسلمكم لها بيدي ولا فقعت قلبي بهاللون
بـيّـن خرج يديه من جيوبه من لمح قلق جده الفعلي
رازي ضمه/توبة ياجد توبة
طاهر يحاول يبعده بكل الطرق بدون فايدة/ابعد عني طسّ ياورع يامال الغنيمة طسّ
رازي مستمر بضمه ويقبل راسه/توبة توبة ياجد
طاهر دفه بكل قوته
رازي ابتعد عنه
طاهر بغيظ/وعمى
بـيّـن ابتسم
طاهر/غثيتني يامال الغثا وجع/مشى بخطوات سريعة/
رازي ناظر بـيّـن/سبحان الله من خلّف مامات
طاهر تبدد غيظه وارتسم مكانه الضيق ماقدر يفاتحه للحين برد غيمة
.
.............................
   بـعـد شــهــر 
..........................
<<بيت طاهر>>
//تزين البيت بالعقود وغطت الزوليات الارض واحتلت المباخر صاحبة الحجم الكبير اركان البيت وارتسمت ملامح الفرح على هالبيت اللي خيم عليه الحزن سنين//
غصنة خرجت من بيتهم تهمهم بابتسامة واسعة اسرعت بخطواتها وهي تناظر جدتها بمكانها المعتاد
حمدة اعتلت زغاريدها من شافت غصنة خارجة من البيت
سلام خرجت من بيتهم
حمدة غنت وسط تصفيقها/قوموا شوفوا ياحضور قوموا شوفوا ياحضور
غصنة وقفت عندها تلفح بشعرها
سلام وقفت جنبها تشاركها
حمدة/وسط الملعب^^^^ قوموا شوفوا ياحضور
نواف ورا الباب/ياجدة ليه ماادخل ليه طيب ودي ارقص معهم ترا العرس عرس اخواني
سلمان وقف عنده ومسكه من ياقته يسحبه/ورانا شغل خل الرقص لاهله يا/سكت/
نواف دف يده/كملها كملها
بـيّـن عاصب شماغه حول راسه واقف بحوض الددسن ينزل قدور الطبخ وبحدة/هيه انت وياه وين يدينكم هاه اعجلوا علي
//سلمان ونواف اسرعوا بخطواتهم يساعدونه//
طاهر وقف على بيت الشعر يناظره من مسافة رفع صوته/ولد يابـيّـن
بـيّـن وقف والتفت ناحية الصوت
طاهر/ذبحت عمرك تريح تراك العريس العمال شوي يجون ويسوون كل شي تريح ياولد
بـيّـن التفت يكمل شغله بدون رد لجده
.
حمدة ناظرت غصنة/وينها امك
غصنة تغير وجهها/صحيتها تقول تبي تنام
حمدة تنهدت ووقفت مشت لبيت منيرة دقت الباب
غيمة المارة متجهة للمطبخ وقفت/حياك جدة
حمدة دخلت للبيت/امك نايمة لذالحين
غيمة هزت راسها بايه
حمدة فتحت الباب ودخلت/بنت يامنيرة
منيرة متمددة عالارض ماتحركت
حمدة جلست جنبها/يامنيرة هاللي بوسط قلبك تراه زار قلبي من سنين وانا عمتك
منيرة انتثرت دموعها اللي تقاومها من ليلة البارح وبللت وسادتها
حمدة زفرت/قدني شربت واكلت من بني سمّار الويلات
منيرة برجفة صوتها/عساني اشبع ياعمة منهم مير عيالي
حمدة قاطعتها/دام ابوك دق صدره امرحي يابنته!!
منيرة جلست وناظرتها/اخاف ينعاد اللي مضى
حمدة/كبيه ينعاد هالمرة انا بوقف قبل طاهر اكلهم بسنوني وانا بنت ابوي
منيرة برجى/ياعمة
حمدة/اوجعك وتوجعيني مير ماارضى عليك الملامة يابنيتي
منيرة بكت
حمدة ضمتها وبصوت اهتز/افرحي واستانسي وارقصي الليلة وزفيهم هالليلة كم احتريتها من سنين لاتهججينها بكثر الهواجيس يامنيرة
منيرة هدت بحضن عمتها
حمدة غنت لها/ياام العريس تهنيتي بلغتي ماتمنيتي
منيرة ضحكت
حمدة مسحت على ظهرها/قومي شبي البخور ولايبرد لك حيل الليلة ليلة ظاهر و بـيّـن قومي يامنيرة قومي
....................................
<<بيت مضاوي>>
مضاوي تفطر غيمة تنهدت بضيق/وش هالحالة ذي متى يطخ هالولد ياربي متى/ناظرت غيمة/روحي لابوك صحيه علميه اليوم عرس خويه روحي
غيمة فزت وجرت لغرفة ابوها وبصوتها العالي/بابا
رازي متمدد عالارض بغرفته قطب جبينه بانزعاج وغمض عيونه بكل مافيه من وصله صوتها
غيمة مدت يدها للباب فتحته ومافتح حركته مرة واثنين وثلاث بدون فايدة ثم بدت تضرب عالباب بازعاج له/بابا بابا بابا
رازي غطى راسه بمخدته وعض شفته بغبنة من ازعاجها
غيمة مستمرة بدون ملل/بابا بابا بابا
مضاوي حكت اذنها بضيق لكن واست نفسها بصوت مسموع اتمنى يوصله/الا ماعليه تستاهل ذا حقك قم
رازي وقف واسرع بخطواته وفتح الباب وصرخ/خلااااص خلااااص
غيمة فزت من صراخه وبكت بصوت
مضاوي سحبت عكازها بسرعة مستندة عليه حتى توقف/عساك ماتربح يارازي كانت روعت الضعيفة عساك ماتربح
رازي مسك راسه للحظة بادراك لفعله انحنى شبه جالس موازي لمستواها احتضن وجهها بين كفيه يمسح دموعها/اسف يابابا اسف/ضمها لحضنه وقبل راسها/اسف ياعيني
مضاوي وقفت عنده تناظره/خاف الله بنفسك اول ثم اللي حولك يارازي
رازي وقف وبنته بحضنه ساكت
مضاوي تأملته عظام وجنتيه البارز من أثر نحفه هالاته الصارخة بسوادها القاتم تحت عيونه نومه الطويل ودوامه اللي يسحبه بـيّـن له غصب كل صباح تنهدت/ياولدي ماعلى الله مستحيل
رازي رفع عينه يناظرها
مضاوي/كانها لك والله لو عيت مليون مرة ان ييسرها ربك بأسهل الطرق وتجيك
رازي بلع ريقه يكبح غصة حسرته على أمنيته المستحيلة
مضاوي/وكانها صادة والله لو يجرونها لك جر ماتنول منها شعرة/مدت يدها تلامس كتفه/مير ارضى واقنع بأمر الله وخل الامور تمشي مثل ماهي مكتوبة
رازي جر خطواته بثقل يحس ضاقت به الدنيا بعد كلامها يدري ان اللي تقوله صحيح مليون بالمية لكن ماقدر ابدا ماقدر يتقبل نهايته مع غيمة عجز يستوعب هالحقيقة اللي عصفت به للمرة الثانية وشتته
مضاوي/يارازي ترا الليلة عرس بـيّـن
رازي وقف وسط اتساع عيونه كيف نسى هالمناسبة المهمة بحياة اهم الاشخاص عنده نزل غيمة عالارض وقبل جبينها/بابا البسي فستان العروسة وزيني شعرك عشان نروح زواج عمو
مضاوي اتسعت عيونها بورطة/ولد
رازي مشى/شويات وتجي ولاء جدة/خرج/
غيمة جرت لجدتها ومسكت يدها تنط/جدة جدة فستان فستان
مضاوي/وقرادة جدة ياعيني وقرادتي
رازي مسرع بخطواته باتجاه بيت طاهر وقف على مسافة من بيت الشعر وناظره وبوسط انفاسه السريعة/ياولد
بـيّـن جنب الوايت بين يديه اللي يرش الموية بالمكان حوله حتى يبرد شوي ثم تقدم للعمال قباله وانحنى شبه جالس عندهم يساعدهم التفت للصوت بابتسامة ووقفت يتفحصه بنظره مخفي قلقه/اهب ياوجهك توك تجي!!
رازي اسرع بخطواته وهو يرفع ثوبه يربطه حول وسطه/خابرن العريس يتزبرق
بـيّـن ضحك/ذول العرسان ماهو بالراعي
رازي وقف عنده واخذ الصحون اللي بين يديه ووقفه ودفه لقدام/مير حتى الراعي عريس!!
بـيّـن اتسعت عيونه/ولد!!
رازي/امش بس امش الملامة علي ولى من البارح مسنعك امش يالله امش
بـيّـن دفه/صاحي انت!!
رازي انحنى وسحب لي الوايت اللي جنبه ورشه
بـيّـن شهق
رازي قفل الموية
بـيّـن صرخ/نعنبوا ذا الوجه
رازي/ياوجهك اذلف وخلص امورك/رفع اللي/ولا اسنعك في ذا؟!
..................................................
.
مُحارب بسيارته الواقفة قبال العمارة المستاجر لاحد شققها بالمحافظة القريبة من الديرة  يدق بطرف اصبعه عالدريكسون ويسرق نظرات لساعته بين كل فترة والثانية مد يده حتى يشغل السيارة من طاحت عينه عليها تمشي باتجاهه من مدخل العمارة قطب جبينه من وصله صوت خلخالها نزل للسيارة واسرع بخطواته لها ووقف قبالها
ولاء بعبايتها ونقابها رفعت عينها له بتوتر من قربه لهالدرجة
مُحارب انحنى شبه جالس عند رجولها
ولاء تراجعت بخطواتها لورا بوسع عيونها وسط حرارة اجتاحتها
مُحارب مد يمينه لورا رجلها اليسرى يوقفها
ولاء وقفت وسط رعشة مرت بجسمها من لمسها
مُحارب مد يديه لخلخالها وفتحه
ولاء قطبت جبينها باستغراب من تصرفه
مُحارب ارتفع واعتدل بوقفته
ولاء مدت يمينها ليمينه ومسكت خلخالها وسط تقطيبة جبينها/اعطيني اياه
مُحارب ناظرها بهدوء ماتعود احد يرادده لابفعل ولابكلام سحب الخلخال
ولاء ماتركت يده بعنادها وحركت يدها مع سحبته بخوف عالخلخال لاينقطع
مُحارب مسك كفه بكفه يتوسطهم الخلخال ومشى
ولاء مشت معه
مُحارب/فوق انه مايجوز تلبسينه وهو يرن بالمكان بذا الصوت تراني ماني براضي تلبسينه برا حدود بيتي
ولاء وقفت ووقفته معها/بس ترا يجوز
مُحارب فتح باب السيارة لها بمحاولة منه يبدد غيظه باي شي وحرك يده للسيارة مجبرها تتحرك معه
ولاء وقفت بعناد ومادخلت للسيارة/قلت لك يجوز
مُحارب/يجوز لاصار مايلفت مير انتي كل من مرّ التفت من صوته
ولاء حاولت تسحبه من يده
مُحارب شد على يدها حتى ماتاخذه
ولاء توجعت
مُحارب/اركبي
ولاء ناظرته بلمعة عيونها
مُحارب باستعجال/يالله
ولاء برجفة صوتها/بس هو حق أمي
مُحارب رمش من فهم سبب لبسها الدايم له بكل وقت ترك يدها وتركه بيدها
ولاء ناظرت خلخالها بدموعها وشدت عليه بكفها
مُحارب همس/ولاء
ولاء ناظرت محارب بدموعها الواضحة
مُحارب توتر وشتت نظره عنها وبنفسه/مسرع صاحت لو هي غصنة اكلتني ماسكتت
ولاء دخلت السيارة بهدوء
مُحارب قفل الباب واتجه لمكانه
...................................................
<<بيت الشيخ>>
،،غرفة مبروكة،،
مبروكة جلست على سريرها بضيق مرتسم على ملامحها/خير علامك اليوم بعد وش صاير
ام سطام بلمعة عيونها من القهر/وشلون عيال خلف ياخذون بناتي وشلون
مبروكة تنهدت/يازينك ماتعبتي من هالسالفة كم لنا نهرج فيها
ام سطام باصرار/ماني موافقة ابد ماني موافقة
مبروكة بمحاولة يائسة اخيرة حتى تتقبل زواج بناتها من هالرجال/وليهم وافق مالي ولا لك كلمة يازينة
ام سطام بحدة/يعقب ماهو بوليهم وانتي تدرين
مبروكة احتدت نظرتها
ام سطام مشت لعندها وجلست قبالها مسكت يدها/تكفين يمه تكفين علميهم سطام ماهو ولدي ماهو بوليهم تكفين لايزوجون نور ويقين لعيال خلف تكفين
مبروكة زمت شفايفها تكبح غيظها وسحبت يدها/سطام وليهم اعجبك ولى مااعجبك يازينة والبنات بياخذون عيال خلف من فوق خشمك مير ارضي واسكتي
ام سطام وقفت وبصراخ وسط دموعها/علميني وينه ولدي اقلها علميني يمه وين
مبروكة قاطعتها بحدة/ماني بأمك يازينة
ام سطام تغير وجهها
مبروكة/انا عمتك رحمتك وربيتك وطلعتي خوانة من يلعب معي يتحمل مايجيه
ام سطام سحبت كفها وقبلته/تكفين ياعمة تكفين وين ولدي وينه تكفين
مبروكة سحبت يدها بقوة وصدت بوجهها عنها/ومن قال انه ورعك ولد
ام سطام شحب وجهها من تذكرت دعوت حمدة عليها بليلة زواجها من منصور(ياعل سليلك كله بنيت تحفين ورا الاشناب ولا لك قدرة عليه)هلت دموعها بدون توقف
مبروكة التفتت لها بابتسامة/رحمة بوليدي عزيته بولد ولا انتي ماتستاهلينه وحتى سطام يازينه وياما أرحمه وياكثره عليك
ام سطام تناظرها بصدمتها ماتوقعت بيوم سرها المدفون ولدها يكون بالاصل بنت مو ولد والادهى والامر ماتعرف لها طريق كل ذا تحت يد سحاب ولو اموت ماتوصله بدون اذنها
مبروكة/طسّي عن وجهي كانك ماانتي بحاضرة اكرمينا بغيابك مانبي وجع راس اطلعي برا فكينا من الاذية
ام سطام جرت خطواتها بذهول وخيبة من هالخبر الثقيل على قلبها خرجت من الغرفة ووقفت قشعر جسمها من ناظرته قبالها
سطام بابتسامة/ادري يمه زعلانة علي مير مبروك زواج نور ويقين يمه مبروك
ام سطام ناظرت ابتسامته بتفكير هالولد ولدها بالرضاعة لو كل العالم جحدوا ذا ولدها يظل لها سند بهالدنيا بكت بحرقة على نفسها ودمار احلامها بولدها المفقود البعيد عن حضنها من سنين
سطام انصدم وتقدم لها احتضن كفها بين كفوفه/يمه عسى ماشر علامك
ام سطام لاول مرة تلاحظ وسع كفوفه وصغر كفها بين كفوفه كيف احتواها واجتاحه خوف من لمح دموعها دفت يديه عنها بسخط على نفسها كيف فكرت فيه وتقبلته/ماابي لك شوف طسّ عن عيني طس/مشت/
سطام ناظرها تبتعد ثم لف خارج من البيت شد على قبضة يديه اللي خانته ورجفت بوضوح بعد ثباتها قبال أمه وسط سرعت نبضات قلبه الجنونية وشحوب وجهه استند براسه عالباب بضعف يستجمع شتاته بعد هالصاعقة اللي ضربته ضرب براسه عالباب ضربات متتالية لعله يصفى ذهنه هالوقت مو وقت انهياره ابد اليوم فرحة خواته نور ويقين امتلت عيونه دموع من همس لنفسه باستيعاب لوضعه الجديد(خواتي بالرضاعة بالرضاعة ياسطام رضاعة)
..............................
.
مُحارب وقف بالسيارة عند باب البيت
ولاء متكتفة ومتلزمة الصمت بعد اللي صار بينهم صادة عنه بزعل ملا صدرها منه واحتفظت بكل شي لنفسها فتحت الباب حتى تنزل
محارب مد يده ليدها يوقفها
ولاء التفتت له بنظرات نطقت بمكنون صدرها
محارب شال يده عن يدها من لمح نظراتها بادلها ذات النظرة وبنفسه/خير!!
ولاء بدون نفس/تفضل بغيت شي؟
مُحارب اخذ نفس يكتم غيظه دخل يساره بجيبه خرج ظرف ومد يمينه ليمينها وقربها منه بدون يناظرها ثم حط الظرف بيمينها وضم يمينها حول الظرف بيمينه
ولاء باستغراب/وش ذا
محارب ترك يدها/اعطيه جدتي مضاوي
ولاء مدته له/الحمدلله ماعلينا عازة
محارب ارتفع صوته من حكمها عليه بتسرع/من قال الحين انه لعازة!!
ولاء ناظرته بغيظ
مُحارب اخذ نفس يكتم غيظه/ماامدى ناخذ لها شي بكرة مروحين يم المدينة ولا نسيتي
ولاء بنرفزة/واعطيها اياه كذا كان قلت لي وحنا بالشقة
مُحارب قاطعها/جدتي بتقبله زي العسل مالها بهالعلوم
ولاء عضت على شفتها تكتم كلامها بصدرها
مُحارب/انزلي تراي متاخر بالحيل
ولاء نزلت وقفلت الباب بقوة
مُحارب فز قلبه من قفلة الباب وسيارته جديدة ضرب بوري
ولاء فزت بفجعة والتفتت له بوسع عيونها
مُحارب رفع صوته/الصبح محركين سمعتي/مشى/
ولاء ناظرته يبتعد اخذت نفس/ذا البداية/لفت للبيت دخلت يدها بشنطتها تخرج مفتاحها/الله يعين بس
......................................
<<بيت عايض>>
غالية بقبضتيها المتلونة بلون الحنا وفستان باللون السماوي الفاتح محتشم تماما وعلى اكتافها طرحة من الشيفون على اكتافها سادلة شعرها الطويل لنهاية ظهرها بكحلة وروج وردي هادي بيدها عبايتها تمشي باتجاه للباب وقفت من سمعت صوتها والتفتت لها
سعاد صاحية من بدري بانتظارها/على وين ان شاء الله
غالية ميلت فمها تناظرها
سعاد/لايكون عشان عيال اخوانك اخذوا بنات الشيخ انتفش ريشك
غالية ارتفعت حواجبها
سعاد/مردكم بني طاهر لا رحتوا ولا جيتوا
غالية ابتسمت/والله من حرّ ماجاك تقولينه
سعاد احتدت نظرته/وشو
غالية تنهدت/وثم رجلي داري وراضي/مشت متجاهلتها/
سعاد تكتفت واسرعت بخطواتها بغبنة/هين ياغويلية هين
.............................................
<<بيت منور>>
وداد متمددة على سريرها ومتغطية
نوار وقفت عندها/خلاص عاد وش ذا الحزن كله تطلقتي منه مثل ماتمنيتي وابرك الساعات
وداد/كبيني نوار كبيني
نوار تنهدت/اقول الحمدلله اللي فكك من اشكاله قومي ارقصي على فرقاه وزفي له بدل العروس اربع
وداد فزت جالسة وبدموع وسط قهر احتواها/كيف سواها كيف ذا مبيت النية من مبطي!!
نوار تكتفت وسط تنهيدة
وداد/اجل بليلة طلاقي خطب!!ذا حتى ماكلف نفسه
نوار قاطعتها/وداد انتي تبينه للحين؟
وداد قطبت جبينها/نعم!!
نوار/طيب وش مزعلك هذا انتي سويتي اللي براسك وهو سوا اللي براسه
وداد بحرقة قلبها/بنفس الليلة بنفس الليلة يانوار
نوار/قلعة تقلعه هو واهله وش علينا منهم افتكيتي منه وخلصنا خليها تاخذ المجنون وتعرف ان الله حق
وداد/اااه يانوار ااه اللي قاهرني ضاري بداه علي وفوقها راح يحضر عرس ابوه
نوار/اصبري كم يوم وبيشوف سحبة ابوه مع العروس ويعود لك اصبري
وداد/ياخوفي يانوار ياخوفي بس
نوار/تعوذي من الشيطان وقومي نتقهوى قومي
وداد تمددت وتغطت/ماابي لا قهوة ولا شي كبوني لحالي كبوني
.
<<بيت سطام>>
ريوف بعبايتها وطرحتها على اكتافها فتحت الباب بقوة وناظرتهم
يـقـيـن متمددة بقواتها نايمة
نور جالسة على فراشها وساندة ظهرها عالجدار تقلب بجوالها
ريوف/ياخسارة جيتي والله
نور رفعت عيونها لريوف/طيب سلمي اول وبعدين تخسري براحتك
ريوف/وش فيكم انتم وش ذا البرود!!ترا كلها ساعتين وتوصل الهيرستايل والارتست
يـقـيـن مغمضة عيونها وبهمس/اهرجي زين
ريوف كشرت بوجهها/ماسمعت
نور قفلت جوالها وناظرت يـقـيـن/تقصد الكوفيرات
ريوف/ذي والله من كثر شماتتي باهل الديرة تكفون لااحد يسمعكم
نور/سطام رجع معك؟
ريوف/قابلته على باب البيت هناك
نور وقفت ثم ناظرت يـقـيـن/قومي خلاص يكفيك نوم
يـقـيـن ماردت
نور/يقين ترا حركاتك ذي ماهي مأخرة شي بالمرة
ريوف رفعت طرحتها على راسها/انا بأجيب جدتي
يقين فزت جالسة ورمت مخدتها على ريوف بنظرات حادة
ريوف مسكت المخدة بابتسامة/صحيتي
يـقـيـن بتهديد ببحة/ان شاء الله مت مالها شغل بشي هالادمية فهمتي
نور بحدة/اعوذ بالله من فمك استغفري ربك
ريوف ارتفع حاجبها ورمت المخدة على يقين/ذالحين جدتي صارت ادمية والسلام بعينك
يـقـيـن اخذت نفس من حست بألم وسط نظراتها الحادة لريوف
نور ناظرتها وبنرفزة/ريوف جايتنا ليش ذالحين تبين تشبينها وبس
ريوف/الله يسامحك بس تراكم خواتي
نور/اجل انثبري بالصالة واسكتي عنا كانك صادقة
ريوف تكتفت وبغيظ/تراني جيت عشان نتضبط سوا مو تطردوني وتقعدون لحالكم مثل دايم
نور/لا مسكتي لسانك وفكرتي قبل تنطقين ابشري مكانك دايم موجود
ريوف/بكيفكم قلعة اصلا انا الغلطانة اللي احجز لكم معي
نور/حبيبتي تعبناك معنا لكن شكرا مايحتاج
ريوف اتسعت عيونها للحظة ثم تكلمت بصوت عالي كله عصبية/احسن عساكم لاتكشختوا محد بيندم غيركم واصلا ماله داعي تتكشخون سبحانه العادل اعطاكم على نفس شاكلتكم مالت الا مالت عليكم/مشت/
نور هزت راسها بيأس منها
يـقـيـن ترددت جملة ريوف ببالها(سبحانه العادل اعطاكم على نفس شاكلتكم)انفجرت تضحك
نور التفتت لها بوسع عيونها/بسم الله!!/ابتسمت لضحكها/ضحكيني معك
يـقـيـن انقبلت ضحكتها لشهقات وسط انهمار دموعها الغزيرة
نور فزت لها ضمتها بخوف/بسم الله عليك وش فيك بسم الله
يقين ضمتها وسط بكاها بحرقة وقهر اي قوة واي حيل يقص الألسنة عنها غير هالحل هي راضية فيه لكن كل السبل تقودها ذليلة لهالحل المكروه لقلبها اكتسى وجهها السواد خيّم بسماها غمام كل من شافه حسدها يتمنى هالسحاب مادروا ان هالسحاب سبب مصيبتها دفنت وجهها بحضن نور عسى قلبها العاجز يلقى السكينة دعت بنفسها/يارب أزل هالغمة وريحني يارب
.......................................
<<بيت طاهر>>
بـيّـن وقف ورا باب البيت الرئيسي رفع يديه يفك شماغه المعصوب حول راسه رفع صوته/ياولد
منيرة بفستان بلون أحمر سادة ماعدا اكمامه الطويلة تزينت بفصوص كسرت لمعتها موديل الفستان البسيط على راسها طرحتها متكحلة بكحلها الاسود وروجها الاحمر زين شفاتها اسرعت للباب بابتسامة/ياهلا ومرحبا ياهلا حياك يايمه حياك
مُحارب وقف جنبه بابتسامة ورفع نفسه وقبل راسه
بـيّـن ابتسم والتفت له وسلم عليه/هلا ياهلا بالعريس ياهلا ومرحبا/ضمه/
مُحارب بابتسامة/خلاص ماني بعريس راح دوري الحين دورك
بـيّـن ضحك بخفة ودفه لقدامه بخفة/اللي يسمعك يقول لك سنين ترا كلها يومين
مُحارب تقدم من دفته وناظره بابتسامة/ايه بس بنت الشيخ وعندنا ماابي اتزوج ماابي
بـيّـن كتم اعتراضه بقلبه ورفع يده محاوط رقبة محارب وضمه له دخل للبيت بابتسامة/انا يوم نويتها مااخذت اي احد مااخذت الا اللي ترقى لمستواي
مُحارب/اووووه كبير كبير يابـيّـن
بـيّـن ضحك وتركه/عاد خلاص فكنا من هالسوالف/اسرع بخطواته لامه/
منيرة زغرطت بأعلى صوتها بوجه كاسيه الفرح
بـيّـن احتضنها
منيرة بابتسامة/مبروك يابـيّـن مبروك
بـيّـن بضحكة عكس داخله/مابعد عقدنا يمه اصبري
منيرة مسحت على ظهره بحب/بتعقد وبنرقص ونفرح فيك ياعيني
بـيّـن تركها/ايه ياام ظاهر لو داري بأشوف هالزين تزوجت من مبطي
منيرة ضحكت بحيا/الـ
غصنة تخصرت وقاطعتها/وش قصدك امي من يومها مزيونة عندك اعتراض
بـيّـن/لاإله إلا الله وصلت نبّاشة المشاكل وصلت
غيمة مرت من جنبها وضربت كتفها بكتف غصنة/تموت اذا ماناقرت/ابتسمت وهي تسلم على بـيّـن/مبروك مبروك يابـيّـن مبروك
غصنة تكتفت/يغلطون وبعده تزعلون عجيب امركم يابني طاهر
مُحارب مسكها من اذنها
غصنة/اه اه
محارب/خفي علي ياللي طالعة منها تراك من بني طاهر
حمدة خرجت من بيتها ووقفت على بابه مبتسمة بخطوات سريعة مستندة على عكازها واختفت ابتسامتها/ول عليكم
بـيّـن التفت لها وابتسم من سمع صوتها واسرع بخطواته لها
حمدة/احسب عندكم علم اثاريه اليهودي
بـيّـن وقف عندها وقبل راسها/ياعين اليهودي
حمدة تبعده عنها/طسّ عني
بـيّـن ماتركها/ياجدة الليلة عرسي دريتي
حمدة هدت بين يديه وبتقطيبة ملامحها/ايه دريت ياعرس الخياب يومـ/سكتت بندم من استوعبت كلامها له بيوم عرسه/
بـيّـن ضحك/والله اني داري انك مستانسة لو ترشيني بما النار
بـيّـن قطب جبينه من هدوءها وابعد راسه يناظرها وهو لازال محتضنها وبابتسامة/جدة علامك/ميل راسه اكثر وعينه بعينها همس/استحيتي مني ولا وشو
حمدة دفته بغيظ/ابعد عني
بـيّـن ضحك بخفة وتركها
حمدة عطته ظهرها وبعزة نفسها بعجل/عساه مبروك ياليهودي/وخطت لبيتها/
بـيّـن احتضنها يوقفها همس/جدة
حمدة بصوت اهتز/عساها زواجة السعد يابـيّـن عساه
بـيّـن اتسعت عيونه من سمع اسمه منها
حمدة بلعت ريقها تمنع عبرتها وابعدت يديه عنها/طسّ عني مبلشني ذا اليهودي حتى بيوم عرسه طسّ/دخلت لبيتها/
منيرة اخذت نفس تكبح فرط مشاعرها اللي تجر معها دموعها واسرعت بخطواتها لبيّن ومسكت يده
بـيّـن التفت لها
منيرة مشت تسحبه معها وقفت قبال بيت عياش القديم
بـيّـن احتدت ملامحه
غيمة ورا امها مدت لها المفتاح/يمه
منيرة اخذتها منها وحطته بيد بـيّـن
بـيّـن قطب جبينه/وش ذا
منيرة/مفتاح بيتك
بـيّـن سحب يده وبنرفزة/وليه وش فيه بيتي وش ناقصه هذا انا جددته كله بوية وفرش وحتى المغسلة غيرتها وش ناقصه بعد؟!
منيرة تنهدت/ياعيني ماناقصه شي مير انه صغير شوي
بـيّـن بزعل/لا مو بصغير وحنا اثنين يكفينا بالراحة وبعدين من رضت فيني تقبل بي مثل ماانا راعي منتف منفي وماانتهى حكمه للحين ولى الله يستر علينا وعليها
منيرة/طيب طيب خلاص مثل ماتبي لاتزعل وتضيق خاطرك
بـيّـن بصوته العالي بعصبية/وينه ثوبي هاتوه بنروح نعقد تاخرنا
غالية دخلت للبيت ابتسمت تناظرهم على مسافة منها زغرطت بفرح
بـيّـن التفت واختفت تعصيبته وارتسمت الابتسامة/عمة غالية/اسرع لها/
غالية اسرعت له بفرح/مبروك يابـيّـن مبروك
.
<<بيت الشعر>>
طاهر يكلم بجواله/عيب عليك الى متى/زفر/استح على وجهك كاب أهلك وهاج كم لك سنة ماسدك البعد ذاك كله/سكت يسمع الطرف الثاني ثم نطق بعصبية/شف عاد محد بيوقف جنبي غيرك احتريك وكانك ماجيت لاعاد تجي مرة ثانية ابد لابزين ولا بشين سمعت/قفل بوجهه/استغفر الله العظيم بس استغفر الله
............................................
<<بيت الشيخ>>
مبروكة بجوالها/تقوله صادق!!ماجاني اليوم
بارود/هذاني احتريه من الصبح بالمجلس ماجا
مبروكة وقفت ومشت خارجة من غرفتها بقلق/عساه خير مالفاك البارحة؟
بارود/ابدا تواجهنا عالعشا بالمجلس بعدها سريت ماعاد شفته
مبروكة وقفت على الباب الفاصل من حست بطرف شي غريب عليها قطبت جبينها باستغراب/ريوف ريوف/زفرت بضيق ونرفزة/مالكم خير اهبوا/انحنت وهي تتحس هالشي وباستغراب/فراش
عزيز نايم على فراشه قبال باب غرفته المحترقة على سجادة ممدها قبال غرفته بوجه شاحب رفع راسه يناظرها من صحى فيها همس/جدة
مبروكة اسرعت للصوت/عزيز!!
عزيز تصبب عرق من داهمه الالم من جديد اخذ نفس يحاول يهديه
مبروكة جلست جنبه وبخوف/علامك ياعيني وش مرقدك في ذا ورا ماانت براقد في بيتك هنا
عزيز بصوت هامس/مافيني شي ياجدة
مبروكة مدت يدها لامست جبهته/ماانت بمصخن علامك ياولد
عزيز بتصريف/بطني توجعني شوي واطيب ان شاء الله
مبروكة بتكذيب/قم بس قم بارود ذالحين يوديك
عزيز جلس على فراشه/لا مايحتاج ياجدة وثم سطام طلبني شاهد
مبروكة تغير وجهها وبنرفزة/وشو!!
عزيز بانفاس يسحبها بهدوء يخفي بها اوجاعه/سطام البارح جاني يقول اني محزمه يبي وقفتي معه لو ان الكل عيّا
مبروكة بغبنة/انهبل ذا يدري محد يرده دامه نوى واعطى الرجال كلمة مير انه توصل به يطلبك شاهد هاذي والله الخسة صحيح
عزيز تحامل على نفسه ووقف/وهو الصادق كان ماوقفت معه ذالحين متى آقف
مبروكة/وعساك بتروح له
عزيز/اجل!!
مبروكة بعصبية/عزيز لاتغبني تسدني سواة بني طاهر الليلة
عزيز زفر بصوت مسموع وسط صوت اهتز/ياجدة مالي حظ مالي فيها نصيب ماشفتي عيونها كيف تناظرني ياجدة عيونها تذبحني بكل لحظة تلتقي عيني بعينها
مبروكة وقفت/وعهد الله لاأطيب خاطرك ياعيني
عزيز/خاطري مردّه يرضى هاذي الدنيا اقفت بأبوي وتركتني وحيد
مبروكة سرت رجفة بجسمها واختنقت بغصتها/عزيز
عزيز مشى
مبروكة مدت يدها ليده توقفه
عزيز وقف صاد بوجهه
مبروكة برجفة صوتها/مانقصك شي وانت صغيّر حتى ينقصك وانت بهالطول
عزيز بانفاس سريعة مسموعة من قهره/ماطلبت شي بحياتي كلها ياجدة غيرها
مبروكة/وان راحت وش صار ياولد زايد
عزيز التفت لها بغبنة سحب يده وارتفع صوته/جدة
مبروكة احتدت ملامحها ونفس نبرته/هذا أمها طعّت وطخت واخرتها عودت لعمك
عزيز رجف صوته/مير اني ماني بعمي!!
مبروكة عضت شفتها بقهر حتى لو بررت وشرحت بهاللحظة مابيستوعب كلامها ابد وبثقة/اسمع ياولد زايد علمتك ان تاخذها حتى لو اخذها الراعي وأنا ماأخلف عهدٍ نطقته/مشت وتركته/
عزيز شحب وجهه ورفع يده ولامس بها اسفل صدره انحنى شبه جالس يكتم آهاته من ألم قلبه وألم هالوجع الغريب
..................................................
<<بيت مضاوي>>
ولاء متربعة وقبالها غيمة
غيمة الفاردة يديها بحضن ولاء تراقبها بحماس نطقت باعتراض/اسفل اسفل
ولاء برفض/وش أصفره وفستانك ذهبي
غيمة/حلو ولاء حلو
ولاء ذابت من نطقها لاسمها/يمه يمه ابشري لو تبين ازرق ابشري
غيمة/وحطي لي أحمل
ولاء رفعت يديها لامست بها قلبها/يمه جعلني احمل بأحمل لعيونك ابشري ابشري
مضاوي بضحكة/علامك انهبلتي
ولاء رمت المناكير وضمت غيمة/كيف ماانهبل وذي قدامي
غيمة بزعل/ولاء مناتيتي(مناكيري)مناتيتي
ولاء تركتها وقبلت خدها/يمه يمه عسى محد يعرف الزين غيرك
مضاوي بزعل/عوذا وحنا
ولاء وعينها على يد غيمة تكمل مناكيرها/اتركيني ياجدة اتركيني بس
مضاوي بشك/بنت علامه وجهك يوم دخلتي
ولاء رفعت عينها لجدتها/الصلاة عالنبي فلقة قمر
مضاوي/عليه الصلاة والسلام ماقلنا شي
ولاء/ليه ياجدة تشوفين شي مااشوفه
مضاوي ميلت فمها وسكتت
ولاء/وش فيك ياجدة قولي لي
مضاوي تنهدت/عسى الله ييسر اموركم بس
ولاء وعينها على اصبع غيمة الأخير/جدة كيفه رازي
مضاوي/على حطت يدك مثل ماهو
ولاء تنهدت بضيق
مضاوي/بنت ولى
ولاء/ولاء ولاء
مضاوي/كلميها بينكم بلكن تسمع منك
ولاء رفعت يديها/مالي شغل جدة أنا موقعي حسّاس
مضاوي بنرفزة/مير إنها خويتك قبل الحِسْاس يمال ال/سكتت/
ولاء ناظرتها بعتاب/استغفر الله يارب لاعاد تكثرين جلسة مع جدة حمدة صرتي تدعين مثلها بدون تحسين جدة
مضاوي/استغفر الله العظيم بس
ولاء تنهدت/ياجدة وأنتي على بالك ماكلمتها
مضاوي ناظرتها بضيق
ولاء/عساها خيرة ياجدة عساها خيرة
مضاوي تنهدت/والنعم بالله والنعم بالله
غيمة فزت تجري للباب من سمعت صوته يغني
رازي فتح الباب يغني/ياسعود فات من الشهر خمس وعشرين
مضاوي ناظرت ولاء/هاه هاذي علومه عقب ماكان يقول/قلدت طريقته/أريد اسهر على صوتك
ولاء ابتسمت بحزن مابين ضحك على أسلوب جدتها وحزن لوضع اخوها
رازي دخل للبيت يتمايل بخفة بابتسامة من لمح غيمة/ماشفت/سكت ينتظر بنته تكملها/
غيمة تمايلت برقصتها اللي تعلمتها من أبوها وغنت/حلّي
رازي وقف جنبها يتمايل معها صرخ بابتسامة/أويلي
مضاوي فزت/بسم الله على قلبي
غيمة بطرب/حايف عليه
رازي شالها يتمايل فيها/اويل حالي
غيمة/من الحطل بين البساسين
ولاء ضحكت/الله يخلف عجزت أحزن والله
رازي عطاهم ظهره واختفت ابتسامته وخيم الحزن على ملامحه همس/فات العمر كله يارازي فات
...............................................
<<بيت عايض>>
غالية دخلت بيت ام عايض متجهة لبيتها بابتسامة بعد حضورها للغدا وجو الفرح منعكس على كل شي فيها كل مافيها ينطق فرح ناظرت سالمة وسعاد الفارشين فراشهم بمنتصف الحوش يتقهوون مرت من قبالهم بصمت
سعاد/ايه حتى السلام كثير علينا
سالمة/ايه انساب الشيوخ وين ينزلون لنا يابنت
سعاد/مير التكبّر معروفة نهايته
غالية وقفت والتفتت تناظرهم بابتسامة/عاد والله اني شرهت عليكن ورا مالفيتوا مع عمتي وتغديتوا وعينتوا من الله خير وسلمتوا على سحاب وقدمتوا معارضيكم عليها مع عربان الديرة وهي وسط بيتنا
سعاد احتدت نظرتها
سالمة وقفت وبعصبية/ليه وش حنا قدامك!!
غالية/الله يسامحك ابي لك الخير عاد انها حلفت يمين تممت لهم جميع بدون نظر ولاسمع  قلت اعلمكم كود تلحقونها كان لكم خاطر
سالمة ناظرته وبغيظ/هاه هاذي هي ترمينا بالشحادة بشر شفت بعينك سمعت علومها ولا حنا نكذب دايم عليها
غالية التفتت له بابتسامتها
عايض يناظرها بقهره وضربها كف بكل قوته
غالية التف وجهها من قوة ضربته وانتثر شعرها المسدول مغطي وجهها
سالمة زفرت بصوت مسموع براحة لصدرها الممتلي غيظ
غالية ناظرته بحدة
عايض بقهره/بكل مرة تلوميني والوم نفسي معك مير هالمرة شفت بعيني وسمعت بأذني كل مامضى كذبة وانا غاطس بوسط كذباتك
غالية ابعدت شعرها عن وجهها وزفرت بابتسامة
سعاد احتدت نظرتها
سالمة قطبت جبينها باستغراب من هالابتسامة
عايض قطب جبينه من ابتسامتها رغم عصبيته الواضحة
غالية بثبات وبدون يرف لها جفن/عذرتك ياعايض كثير صحيح؟
عايض بعصبيته/والعذر بغير اصل خبال 
غالية/عاتبتك ياعايض بيني وبينك صحيح؟
عايض بنفس نبرته/على عماي واصدقك!!
غالية ناظرته تلتمس له لو شعرة من الندم بعيونه لكن كل مافيه ينطق اصرار على موقفه هزت راسها/اخذتني ياعايض من عند ابوي عزيزة كريمة ماانقالت بحقي كلمة ولا انرفعت بوجهي يد مير انت ماانت بكفو ولا تستاهل اراعي الحب والعشرة بيننا
عايض اتسعت عيونه ورفع يده بيضربها بغبنة
غالية رفعت يدها وابعدت يده ودفته عنها/يسدك مارميت من شوي ورب البيت ترفعها بوجهي اني لاكسرها لك كان ماتعرف غالية
عايض رمش بصدمة
غالية ناظرته من فوق لتحت باحتقار لفت عنه ناظرت سالمة
سالمة تراجعت بخطواتها لورا بخوف منها وبلعثمة/خير علامك تناظرين وجع
غالية ابتسمت/بس ابارك لكم
سالمة قطبت جبينها
غالية/مبروك عليكم البيت وعايض وعياله معه
سالمة ارتسمت على ملامحها الصدمة من كلامها
غالية اشرت بيدها لسعاد بمع السلامة وبابتسامة/مبروك لك انتي بعد اشبعوا بأخوكم وعياله/مشت/
عايض بصراخ من زود عصبيته/غالية
غالية مااهتمت له ولا لصراخه وخرجت من البيت
..........................................
<<بيت طاهر>>
غصنة بيدها كيس وتجمع الزبايل من الارض تكتفت وناظرت اعتدال و غيمة اللي يساعدونها وباستغراب/غريبة
غيمة تنهدت/مالك شغل
غصنة طنشتها وناظرت اعتدال/محد من الروس لفى لا صغير ولا وسط ولا كبير تقولون مالهم بالعرس لا من قريب ولا من بعيد
اعتدال باستغراب/وش روسه!!
سلام تمر بينهم وبيديها موية توزعه عليهم وقفت عند اعتدال تناظرها/الصغير ريوف والوسط امها والكبير جدتها /ناظرت غصنة/عساهم اهم شي جدتي مستانسة
غصنة هزت راسها بلا/ماهو بكبر وناستها وهم فيه
اعتدال بموافقة/وربي صادقة حتى جدتي ماستانست ذيك الوناسة الصح
غيمة/لانهم ينتظرون بحماس وخاب انتظارهم الفرحة ماكانت بذاك الزود
غصنة ميلت راسها من ورا غيمة تناظرهم
//حمدة و مضاوي وسرور يتقهوون ويتهامسون//
سلام التفتت وراها تناظرهم
غصنة/هالجلسة ماتريح عنّي وراهم شي كبير هالعجز
اعتدال تنهدت/تدرون عاد ودي احضر جلستهم وهم شباب احس وناسة ماوراها
غصنة ابتسمت/الله احس كذا كذا شي يخليني اطير
سلام ميلت فمها/قصدك حش محد يطيرك الا هو
غيمة/الله يرحمنا ويغفر لنا ناقصين ذنوب فوق ذنوبنا كملوا بس كملوا
حمدة تهمس لمضاوي/هاه وينهن اعجلي
مضاوي سحبت كيستها المحتضنتها من اول ماوصلت وفتحتها/هاه شوفيهن بس لاتطلعينهن يشوفنهن البنات ويعلمن منيرة ثم تزعل
حمدة تناظر الكيس/يعني ولاء ماعلمت ذالحين
مضاوي/ولاء ماتطلع منها تطمني
سرور سحبت الكيس تناظره بابتسامة/عشتي يامضاوي عشتي
مضاوي بابتسامة/تعيشين ياسرور/ناظرت حمدة/اعطيك اياه
حمدة/لاااا خليهن معك ماحنا مستعجلين ماجت بالغدا اكيد توخر بالعشا
سرور بضحكة/من حر ماصابها
حمدة ضحكت/صدقتي صدقتي حلالاه من يتقهوى وهو يتفرج عليها
مضاوي/لا ازين ماجت ذالحين
//حمدة وسرور ناظرتها بفضول//
مضاوي/لا جت بالليل وصرنا راس براس ازين
//ضحكوا الثلاثة بحماس//
غصنة وقفت عندهم/جدة ضحكيني معكم
حمدة بابتسامة/بالليل بالليل تضحكين زين
...........................................
          الـمـغـرب
............................................
<<بيت ظاهر>>
غصنة بشعرها الويفي وكريم الاساس مغطي وجهها بدون باقي المكياج دخلت لبيته واتجهت لغرفة ضاري ناظرته بوسع عيونها
ظاهر نايم عالارض جنب سرير ضاري
غصنة/ياربي وش ذا البرود/انحنت تصحيه/ظاهر ظاهر
ظاهر بنومه/همممم
غصنة/قوم خلاص ذالحين يلفون حريم الديرة قوم
ظاهر/وش علي منهم
غصنة رمشت للحظة من كلامه/هيه ولد قم
طاهر وقف عالباب/ولد ياظاهر
ظاهر زفر بطفش وتغطى بمخدته
طاهر/الحقني احتريك لاتبطي علي/مشى/
ظاهر جلس ورمى المخدة لقدامه فز من ناظر وجهها الشاحب/علامك
غصنة/اخلص قم بيلفون المعازيم وانا باقي ماخلصت نفسي
ظاهر وقف/وينه ضاري
غصنة/جدتي تكفلت به وش عليك انت يجيك بالمجلس اخلص بس/مشت/
ظاهر خرج ملابسه تنهد بضيق من مسك بشته/عسى الله يزينها بس
.........................................
<<بيت سطام>>
ريوف وقفت بفستانها الابيض توب ماسك على جزأها العلوي ومنفوش جزءه السفلي ومنتصف سلفها بكعبها الاحمر بشعرها المرفوع كله ومكياجها الثقيل بروجها الاحمر وقفت بمنتصف حوش البيت الصغير المفتوح سقفه ودارت حول نفسها قبالهم بابتسامة/هاه وش رايكم
نور بفستان زواجها اللي احتل مساحة كبيرة حولها بشعرها الويفي ومكياجها الناعم كسر نعومته روجها العنابي وبين يديها مسكتها باللون الابيض ناظرتها بابتسامة/قمر
ريوف ميلت فمها/ادري ماهي من قلبك
نور هزت راسها بياس منها
ريوف ناظرت يقين/هاه يـقـيـن انتي ام الذوق تكفين قولي لي وش رايك
يقين بفستان حرير قصته مربعة من عالصدر ماسك على اعلى جسمها ومنسدل من منتصف خصرها رافعه جيبون بنفخة خفيفة اسفله واكمام شيفون لتحت مرفقها مزينة باللؤلؤ وقبعة فرنسية غطى جزء منها مقدمة جبهتها بتسريحة ريترو جانبية ومكياج سموكي وروج أحمر بقفلزات شيفون باللون الابيض ومسكة صغيرة باللون الابيض ماردت عليها ولا ناظرتها
ريوف مررت نظرها من فوق لتحت ليقين/مع اني اظن الذوق خانك بأهم ليلة بحياتك
نور/ريوف!!
ريوف ناظرتها/لاني صادقة اجل ذي هيئة عروس
يـقـيـن مررت نظرها من فوق لتحت تكتفت وببحة/انتي ثالث العرايس اليوم ناقصك الطرحة بس تموتين عالعرس ولا حصل لك
نور اتسعت عيونها والتفتت لها/يقين
ريوف احتقن وجهها بالاحمر من غيظها ثم ابتسمت/مردي مارموني على واحدن مايسوى عشان يصكون حلوق الناس عني
يـقـيـن ناظرتها بحدة وتقدمت لها
نور وقفت بينهم/تعوذوا من ابليس
ريوف بزعلها/هي اللي بدت
نور/اسكتي واللي يسلمك الليلة بس اسكتي
سطام دخل بابتسامة/ايه ايه كذا اعرف ان خواتي بالبيت مو الايام اللي راحت مالكم حس
نور رفعت فستانها بيديها وتقدمت له ناظرته من فوق لتحت ودققت النظر بوجهه الشاحب/أكلت بس
سطام/والله حتى علاجي اخذته هاه ارتحتي
نور ميلت فمها بشك/مدري عنك
سطام تقدم لهم بابتسامة وسرت بجسمه قشعريرة من تأملهم واستوعب وضعهم فعليا اخواته عرايس اليوم رجف صوته ناظر نور تقدم لها وفتح يديه لها/مبروك يانور مبروك يامتكاي بهالدنيا
نور غرقت عيونها دموع وارتمت بحضنه
ريوف/لاتبكيها بعدين يخرب مكياجها
يـقـيـن ناظرتها بحدة
ريوف صدت من التقت نظراتهم ببعض
سطام ترك نور وناظر يـقـيـن بابتسامة/مبروك يامحزمي بهالدنيا مبروك
يقين اوجعها الندا هي قليلة حيلة وخصوصا بهاللحظة كيف صارت له محزم وهي لاحول ولاقوة نزلت راسها تكره لحظات ضعفها وهاذي اولها
سطام تقدم لها واحتضنها/والله انك محزم سطام واماري فيك الخلق
يـقـيـن بكت
ريوف بدون نفس/ترا بيخرب مكياجك قلت لك
سطام/والله انك محزم وفوق المليان اللي نسمع به بعد لاتهتزين يايقين ياشين هدوءك ياشينه والله
ريوف/اوه منكم انتوا اوفر دراما انا رايحة/مشت/
سطام تركها ومد يده يمسح دموعها بخفة بخوف يخرب مكياجها/لا ماشاء الله ماتغير مثل ماهو
ام سطام بعبايتها دخلت ويدها بيد مبروكة/ماشاء الله ماشاء الله ولا وحدة فكرت تجينا للبيت حنا اللي نجيكم هذا اللي ناقص
مبروكة/زينة
ام سطام سكتت وصدت
مبروكة/مبروك يابنات منصور مبروك
نور بهمس/الله يبارك فيك
يقين تكتفت وصدت
مبروكة/يالله نزفكن لبيوتكن يالله
يـقـيـن زفرت بضحكة ومدت يدها ليد لسطام واحتضنتها برفض لعرض مبروكة
ام سطام بوسع عيونها/بنت
سطام بحدة/محد له كلمة عليها تسوي ماتبي يكفيكم ماسويتوا
يـقـيـن ابتسمت
مبروكة/كبيها مابيرفعنا بيت الراعي الا بينقصنا شاننا
يـقـيـن احتدت نظرتها
مبروكة/ازين انها جت منها وطردت عنا الهروج يالله يانور
نور شدت على مسكتها بتوتر/انا بيوديني سطام لجدي طاهر متفقين معه
مبروكة احتدت نظرتها
ام سطام/ماشاء الله ماشاء الله والله وتفكن وتربطن من روسكم يابنات منصور
مبروكة/امشي يازينة امشي مير بكرة لاصكت فكين لااشوف وحدة منكن تشتكي عندي/مشت/
........................................
<<بيت مضاوي>>
ولاء جالسة عالارض بغرفتها ببجامتها وحولها حوسة اغراض شعرها ومكياجها بلفات شعرها اللي مافتحتها وبين يديها الباليت والفرشة تضبط مكياجها اللي كل شوي توقفه من طلبات جدتها وغيمة زفرت بطفش من ضوت شاشة جوالها من رسايله اللي ماوقفت من العصر ماتطلع الا معه خفت الشاشة ثم اعتلى رنينه مضوية الشاشة بسطوع ردت بنرفزة/طيب طيب حاضر مابأطلع الا معك والله
مُحارب قاطعها/انا عند الباب
ولاء بعدم توقع/نعم
مُحارب/علامك اقولك عند الباب
ولاء/مابعد خلصت
مُحارب/يعني احتريك برا ولا وش رايك!!
ولاء بربكة/لا لا مو قصدي الحين افتح لك دقايق/وقفت وخرجت من غرفتها ثم رجعت طريقها تناظر مرايتها كشرت بوجهها من ناظرت شعرها ومكياجها اللي مادمجته رن جوالها بيدها واعطته مشغول سحبت روجها النود ومررته على شفايفها بسرعة تخفف من لخبطة الالوان بوجهها تنهدت واسرعت بخطواتها له اخذت نفس وفتحت الباب باحراج
مُحارب دخل بثوبه وشماغه على كتفه وعقاله فوق طاقيته على راسه/السـ./وقف للحظة لاتذكر من طاحت عينه على شكلها وكمل/ـلام عليكم
ولاء بدون تناظره/وعليكم السلام والرحمة حياك للمجلس
مُحارب مشى باتجاه المجلس ووقف/ايه
ولاء وقفت ورجعت نفسها لورا لاخر لحظة حتى ماتضرب فيه مالت لورا بتطيح
مُحارب التفت لها ومد يده مسكها وباستغرابه/علامك
ولاء همست وعينها بعينه/عشان ماينعدم ثوبك
مُحارب/فدا الثوب وراعيه
ولاء حست بحرارة ملت جسمها ووصلت له اعتدلت بوقفتها و سحبت يدها منه مشتته نظراتها عنه/تسلم
مُحارب/وينه رازي بـيّـن يقول مايرد على جواله
ولاء/نايم بس الحين اصحيه ابشر
مُحارب دخل للمجلس وجلس/لاخلصتي جيبي عطري معك
ولاء/حاضر/مشت/
مُحارب سحب المسند وتمدد وسند راسه/ااااه
ولاء اسرعت بخطواتها لغرفة جدتها المفتوحة/جدة
مضاوي ناظرتها/بسم الله علينا
ولاء تنهدت/ماخلصت ياجدة بس ترا محارب بالمجلس روحي له على مااخلص
مضاوي/روحي وخلصي عنده رجلي ولا رجلك!!
ولاء بنبرة ترجي/جدة
مضاوي تنهدت/طيب امري لله
ولاء/ايه صحوا رازي بـيّـن يبيه
غيمة بفستانها الابيض فزت من عند جدتها وجرت لغرفة ابوها/بابا بابا
مضاوي/خليني اروح يم رجلك ولاتبطين علي/مشت/
ولاء دخلت لغرفتها وقفلت الباب وجلست بمكانها عالارض وسط اغراضها قطبت جبينها من دق الباب/ادخل
مُحارب فتح الباب
ولاء تغير وجهها من التقت عينه بعينها/كيف جيت لهينا
مُحارب باحراج/جدتك لزمت علي ارتاح عندك/دخل وقفل الباب/
..............................................
طاهر واقف على باب مجلس الشعر اللي تغطت الارض قباله بالزوليات وزينت المكان عقود اللمبات اللي اضوته ببداية هالليل اسرع بخطواته بابتسامة عريضة مرتسمة على محياه وبلهفة وشوق/ياهلا ياهلا ومرحبا حياك الله ياهلا تو مانورت الديرة
.
#شقّ_الغَمام