Magic Hides My Man

Part 4

Unicode

အရက်ခွက်ကို မသောက်သေးဘဲ ရေခဲပျော်တဲ့အထိ လက်ထဲမှာ လှည့်နေရင်း ဖေဖေ့ရဲ့ သစ္စာတော်ခံနှစ်ယောက်ကို လှည့်ကြည့်လိုက်တော့ နှစ်ယောက်လုံးက ပုံမှန်အတိုင်းပဲ ထိုင်စောင့်နေကြဆဲ။ Club ထဲလာပြီး တစ်ယောက်တည်း အရက်ထိုင်သောက်နေရတာတော့ မဟုတ်သေးဘူး လို့တွေးရင်း ဒေါသဖြစ်လာပေမယ့်၊ ဘယ်သူနဲ့မှလည်း မတွေ့ချင်။ ဖေဖေ့ကို ‌အလျှော့ပေးပြီး အိမ်လည်း ပြန်မသွားချင်သေး။

လက်ထဲက နာရီကို ငုံ့ကြည့်ပြီး ကားထွက်မောင်းဖို့ စဉ်းစားလိုက်သည်။ ကားထွက်မောင်းတာမှ လိုက်ချင်လည်း လိုက်ခဲ့ကြပေါ့။ သူငယ်ချင်းသုံးယောက်ထဲမှာ ဗညားထွဋ်ခေါင်တစ်ယောက်သာ ဒီလိုပြဿနာတွေ ကြုံနေရတာ ဖြစ်သည်။ ပြည့်စုံမင်းရော၊ ဇေယျာဖြိုးရော နှစ်ယောက်လုံးကို သူတို့အိမ်တွေက လူကြီးအနေနဲ့ သတ်မှတ်ထားပြီး ဒီလောက်ထိ စည်းကမ်းတွေ၊ ထိန်းချုပ်တာတွေ လိုက်မလုပ်ကြပါ။

ငယ်ငယ်တည်းကနေ အခု အသက်နှစ်ဆယ်ကျော်လာတဲ့ အရွယ်အထိ၊ ဗညားထွဋ်ခေါင်တို့ သုံးယောက်လုံးက ဆိုးလည်း အတူတူ၊ သောင်းကျန်းလည်း အတူတူ၊ ပြဿနာတက်လည်း အတူတူကို ဖေဖေကတော့ ဗညားထွဋ်ခေါင် တစ်ယောက်သာ ပြဿနာအမြဲရှာနေတယ်ဟု ဘာလို့ထင်နေသလဲတော့ မသိပါ။

မြန်မာနိုင်ငံရဲ့ ထိပ်တန်းစာရင်း၀င် သူဌေးကြီး ဦးထွဋ်ခေါင်ရဲ့သား ဖြစ်နေခြင်းတစ်ခုကပဲ ဗညားထွဋ်ခေါင်ကို ဒီလို အသက်ရှူကြပ်စရာ မွန်းကြပ်မှုတွေ ပေးနေခြင်း ဖြစ်မည်။ မန္တလေးမြို့က ရပ်ကွက်တစ်ခုကို ဖျက်သိမ်းပြီး ဟိုတယ်ကြီးတစ်ခုအဖြစ် အသက်သွင်းခဲ့တုန်းက ဖေဖေ့နာမည်ဟာ
မီဒီယာတွေမှာ ဟိုဟိုဒီဒီ ပါလာခဲ့ဖူးသည်။ ခရိုနီဆိုတဲ့ အသုံးအနှုန်းကို ဖေဖေ့နာမည်နဲ့ တွဲပြီးပြောကြတဲ့အခါ ဗညားထွဋ်ခေါင် မခံမရပ်နိုင် ဖြစ်‌နေချိန် ဖေဖေကဝောာ့အေးအေးလူလူပင်။

လပိုင်းလောက်ကြာတော့ မန္တလေးမြို့ပေါ်မှာ ကျန်းမာရေးစင်တာအကြီးကြီးတစ်ခုကို ဖေဖေ့နာမည်နဲ့ တည်ဆောက်ပေးခဲ့သည်။ ထိုအချိန်မှာ ဝေဖန်ခဲ့တဲ့ မီဒီယာတွေဆီကနေပဲ ဖေဖေ့နာမည်ကို ကောင်းသောပြောခြင်းနဲ့ ပြောကြပြန်လေသည်။ မြန်မာနိုင်ငံရဲ့စီးပွားရေးလောကမှာ ဖေဖေ့နာမည်နဲ့အရှိန်အဝါဟာ အတော်လေးကြီးမားသည်။ တချို့သတင်းတွေမှာလည်း ဖေဖေက မြန်မာနိုင်ငံတစ်၀က်လောက်ကိုပင် ၀ယ်နိုင်သည် ဆိုသော စကားတွေ ကြားရသည်။