طلعت موزة وسكرت الباب وراها وبعد شوي اندق الباب.
سلامة مبتسمة: روضان دخلن.
انفتح الباب واختفت الابتسامة عن ويه سلامة.
ميرة مبتسمة: السلام عليكم.
سلامة: وعليكم السلام.
تقربت ميرة وسلمت على سلامة.
ميرة: شحالج سلامة.
سلامة: الحمدلله بخير.
ميرة وابتسامة كبيرة على ويها: مبرووك سلامي.
سلامة بهدوء: الله يبارك فيج وعقبالج إن شاءالله.
ابتسمت ميرة وسكتن فترة.
ميرة: انتي طبعا مستغربة انا ليش ياييتنج؟ - طالعتها سلامة بدون ما تقول شي –
أنا ياييه أعتذرلج وأتمنى لو ننسى كل اللي صار من بينا ,
لأنج انتي قلتيها مره انج ما بتلوميني ولا انا بلومج على اللي بسوييه خليفة ,, سلامة أنا آسفة على كل شي سويته.
سلامة ابتسمت: وأنا بعد آسفة على كل شي سويته حقج.
ميرة: انتي ما سويتي شي أنا اللي كنت اسببلج المشاكل.
وقامت ميرة بتطلع.
سلامة: بتروحين؟.
ميرة مبتسمة: هيه أنا ياييه بس عشان أسلم عليج وباركلج.
سلامة: بشوفج باجر إن شاء الله.
ميرة نزلت عيونها ورفعتهن مرة ثانية: مااعتقد.
وطلعت برع.
سلامة بهدوء: والله وطلعتي أحسن عني يا ميرة , والله يوفقج إن شاء الله فحياتج
وبعد شوي دخلن قوم روضة و ربشن سلامة وبعد ماروحن الحريم, قعدو فحجرة سلامة يغنن ويرقصن ويسولفن وياها وعلى الساعة 12 كلهم روحو بيوتهم عشان يرقدون ولأن باجرالعرس , وعرس الرياييل والحريم بيكون فيوم واحد بس عرس الرياييل بيكون على الغدى.
ويوم الخميس الساعة ست الصبح.
سلامة: موزة موزة موزان.
موزة: مممممممممممم.
سلامة: راقدة.
موزة: لا واعيه أكيد راقدة شو تبين؟.
سلامة: مب قادرة ارقد.
موزة: سلامي عن الصدعه رقدي لين الساعة 11 انتي عروس.
سلامة: والعروس لازم اتم راقدة.
موزة: انتي امس لين الساعة 4 واعيه رقدي شوفيج؟.
سلامة: مب رايمه ارقد.
موزة: اوووووووف سلامي صدعتيني حرام عليج رقدي على الاقل لين الساعة ثمان بعدين نشي.
