اتصلت بسلامة وخبرتها وعمتهم احتشرت ونازعت خليفة خليفة لين ما قال بس.
خليفة: انزين شو الفايدة خلاص اناحلفت.
العمه: صدق انك غلس.
خليفة: يلا قولي شوطلباتكم.
قالتله عن طلباتهم الساعة 9,30 اتعشو وقعدو يطالعون التلفزيون لين الساعة 10,30,.
موزة بدت تصيح, العمه: اعرف تبين ترقدين يلا قومي نسيرالحجرة برقدج سلامي قومي ويانا.
سلامة: انا ماريدارقد.
العمه: اباج تسولفين وياي.
سلامة: اوكي
العمه: وانتو الساعة 11,30 كل واحد فحجرته يسير يرقد.
خالد: انزين بس يوم بخلص الفلم بنسيرنرقد.
العمه: هو الحين بيخلص.
خالد: انزين انا بروح ارقد صراحةتعبان.
روضة: انا بروح اطالع فلم شاروخ فحجرةمحمد.
راحت سلامة مع عمتها
سلامة: الحين موزان كيف بترقد.
العمه: ليش؟.
سلامة: انا وانتي بنتم نهذرب وهي ما بتروم ترقد.
العمه: اصلا هي ما تحب ترقد الا على الصدعه لازم اشغل التلفزيون لين ما ترقد ما تشوفيني حطيت فحجرتي تلفزيون بس عشانها.
سلامة: صح عموه ما خبرتج عن الموقف اللي صارلي يوم الامتحانات.
العمه: لا ماخبرتيني
سلامة: كنت فاللجنه ومخلصة الامتحان وقمت اسلم الورقة وكانت بنت قبلي بتسلم وحده وراي عيل ما تخرطف وبغيت اطيح عويهي وقام الدكتورالمراقب بيمسكني بس الله ستر والبنت اللي وراي مسكتني مب الدكتور والا كنت بنفضح فالجامعه كلها وما بتكون سيرة عندهم الا عني يا القفطه يا عموه كان خاطري اتغشى واشرد بس شو بستفيد كل البنات اللي فالقاعة شافني.
العمه: هاهاهاهاهاهاها انتي وين ما تسيرين تتخرطفين.
سلامة: شسوي عموه
العمه: خبريني شو اخبار سيف ومريم.
سلامة: هذيلا ما تغيرو كل ما يتلاقون يتضاربون.
العمه: مريوم ترمسه فالتلفون.
سلامة: لا
العمه: ليش؟
سلامة: مريوم مب طايعه ترمسه وهومغتاظ.
العمه: عاد ليش؟.
سلامة: مادريبها
العمه: يمكن تتغلى.
سلامة: يمكن.
العمه: و محمد وموزة؟.
سلامة" هذيلا بروحهم فلم هندي.
العمه: الله يهنيهم ان شاءالله.
سلامة: ان شاءالله
العمه: وانتي ليش رفضتي خليفة؟
سلامة انصدمت ما توقعت عمتها بتسالها.
العمه: خبريني ليش ماوافقتي.
سلامة برتباك: شو فايدة هذا السؤال الحين.
العمه: اريد اعرف ليش ما وافقتي شو السبب انا صراحه ماشوف شي ينعاب فخليفة ريال ومن احسن الرياييل متمسك بدينه واخلاقه عالية وطيب والكل يمدح فيه شو تبين اكثر من جذا.
سلامة: اريد واحد يعملني معامله زينه ويحترمني.
العمه: وشو اللي خلاج تعتقدين ان خليفة ما بيحترمج ولابعاملج معامله زينه.
سلامة: عموه انا وايد مواقف صارتلي مع خليفة خلتني ارفضه.
العمه: مثل شو؟؟.
قالت سلامة لعمتها عن الموقف اللي صار بينها وبين خليفة فماليزيا.
سلامة: انتي شورايج هذا موقف من المواقف اللي صارتلي وياه.
العمه: معقوله خليفة يسوي جيه ماصدق.
سلامة: صعب تصدقين صح؟.
العمه: انزين انا اشوفج عادي ترمسينه يعني نسيتي اللي صارليش رفضتيه.
سلامة: عموه كل ما اسامحه يطلعلي بسالفة ثانية وموقف ثاني, مرة ييت عندهم البيت وامي نزلتني جدام الباب وعاد انتي تعرفين ما شاء الله المسافة بين الباب والفيلا وايد طويلة انا اتحجبت ومشيت وانا امشي غنيت شدراني ان حد فالبيت ما شفت سياير.
العمه: انزين وشواستوى.
