وتوه محمد بيلف عشان يهزبهم ما يحس إلا بحد يدعمه بقو واختل توازن محمد وحاول محمد إن مايطيح فالشارع بس غصبن عنه طاح فالشارع ودعمته سيارة والشي الوحيد اللي سمعه صرخة الحرمة اللي كانت واقفة عداله.....
أماراعي السيارة ارتبك ما عرف شو يسوي لأن محمد ظهر فجأة جدامه وحاول ان ما يدعمه بس شو يسوي محمد ظهر جدامه فجأة ولا شعوريا راعي السيارة بسبب الصدمة لف السيارة بقوعشان يتفادى محمد لكن لف بعد فوات الأوان بعد ما دعم محمد وسيارة الريال دعمت الرصيف الثاني و السياير الثانية كانت موقفة لأن الإشارة غدت حمرا ومن بين السيايراللي شافو الموقف سيارة خليفة وغانم وياه.
غانم بصوت عالي: الله أكبر الله أكبر.
خليفة: لاإله إلا الله الله يرحمه الله يرحمه بس غانم اتصل بالشرطة والاسعاف بسرعة ما ظني هذا الريال بقى شي منه صاحي.
نزل خليفة وهو مايدري ان الريال هو ولد خالته نزل خليفة وشاف ناس متجمعين حولين محمد وناس متجمعين عند الريال اللي دعم محمد وانتبه خليفة على الحرمة المصرية تصارخ وتصيح بصوت عالي وحاضنه بنتها خليفة على باله ان الريال المدعوم ريلها والا ولدهاوتقرب يشوف الريال اذا بعده حي بس خليفة من شافه شهق من الصدمة وصرخ باسم محمد وربع عند محمد وحضنه وهو يزقر عليه والشباب يهدون خليفة , وبعدوه عن محمد وخليفة غلبنه دموعه ونزلن على ولد خالته وهو يزقره ورد يتقرب من محمد مرة ثانية.
خليفة: محمد محمد دخيلك رد علي فتح عيونك مــــحــــمــــد.
واحدمن الشباب: يا ريال استهدي بالله و قول لا إله إلا الله أخوك بعده حي بس فاقد الوعي.
خليفة يصارخ: ليش واقفين جيه اتصلوابالإسعاف.
أماغانم اتصل بالإسعاف والشرطة و تردد ينزل ما يحب هذي المواقف بس نزل.
غانمبتوتر: الله يستر الله يستر بس, وين خليفة ماشوفه؟.
مشى غانم ببطىء لمكان الحادث وسمع صوت خليفة.
خليفة يصارخ: ليش ما تتصلون بالإسعاف.
غانم ربع يشوف خليفة ليش يصارخ بنهيار.
غانم بخوف: خليفة شوفيك؟.
خليفة لف على غانم بحدة بدون ما يقول شي و دموعه ينزلن.
غانم يطالع عيون خليفة بصدمة: خليفة شو فيك؟.
خليفة نزل راسه ولف يطالع محمد وغانم راحن عيونه صوب محمد وشهق وطاح عدال خليفة مب مصدق.
غانم: محمد؟؟!! لااااااااا مستحيل – ومسك خليفة من جتوفه – قولي إن هذا مب محمد – وصرخ على خليفة – قولي إن هذا مب محمد.
خليفة: ...... .
غانم يطالع اللي حوليه بانهيار: وين الإسعاف؟ وين الشرطة؟؟ شو يسوون يبون يجتلون ولد عمي وينهم؟؟.
وتقرب غانم من محمد ومسك ايده ودموعه ينزلن بخوف.
غانم بصوت يرتجف: محمد قم يلا قم محمد افتح عيونك يلا بنروح البيت قم كلهم يتريونك يلاقوم.
الريال اللي رمس خليفة: يا خوي مب زين اللي تسويه تراه اخوك بعده حي والحين الإسعاف بيوصل وإن شاء الله بيقوم بالسلامة.
خليفة ما رمس مب قادر ينطق نزلن دموعه أكثر لأن شكل محمد ما يبشر بخير ومايدل على ان بيرجع مرة ثانية وغانم يحاول يوعي محمد , و وصلت الإسعاف والشرطة.
وموزة من انقطع الخط بينها وبين محمد وهي منهارة تتصلبه وكله يعطيها مغلق وترد تتصل بدون يأس تمت تتصل لمدة نص ساعة وعقب يأست واتصلت بسيف والخوف ذابحنها.
سيف:هلا الموز.
موزةبخوف: سيف وين محمد؟
سيف:محمد؟!! محمد فالحلاق.
موزة: لا محمد طلع من الحلاق.
سيف:طلع!! يعني فالبيت يتسبح.
موزة: أنت وين مب وياه؟.
سيف:لا أنا مب وياه أنا فالبيت.
موزة: سيف , محمد مب فالبيت أنا كنت أرمسه وهو طالع من الحلاق بس فجأة انقطع الخط وكل ما اتصل يعطيني مغلق.
سيف:يمكن فضت البطارية؟ اتصلتي على تلفون السيارة؟.
موزة: هيه اتصلت مايرد.
سيف:خلاص الموز انا بتصلبه وبرد عليج.
موزة: سيف من يرد عليك اتصلبي لا تنسى أرجوك.
سيف:ما بنسى.
موزة: سيف انا متروعة عليه قلبي يقولي إن محمد صار فيه شي إن محمد ....
سيف:شو هذي الخرابيط الموز لا تخافين انا بتصلبه وبخليه يتصلبج وهو قالي إن بعد صلاةالمغرب بيخطف علي انتي لا تخافين ولا تحاتين وايد انزين.
موزة: انزين.
سكرت عنه وهي ميته خوف على محمد وقلبها يقولها محمد ما بيرجع مرة ثانية وقامت بسرعة تتوضأ و صلت وقعدت تقرأ قرآن عشان ترتاح وسمعت أذان المغرب صلت وراحت توقف عند الدريشة وشافت عبدالله أخوها يرمس سيف وسيف منفعل وخطف يربع وركب سيارته بسرعة وطلع برع البيت وأما عبدالله فدخل البيت و موزة شلت تلفونها واتصلت بسيف وكان رقم سيف مشغول وردت تتصل وهي بعدها واقفة جدام الدريشة وصاح تلفون سيف بس ما يرد عليها وردت تتصل مرة ثانية وثالثة ورابعة وبعد مارد عليها وشافت أبوها وعبدالله طالعين وركبوسيارة أبوها وراحو نزلت موزة تحت بسرعة وشافت أمها وأسما فالصالة.
موزة: أمي أبوي وعبدالله وين رايحين؟.
ام عبدالله: مادري والله ما خبروني اخوج دخل ابوج الحجرة وبعدين طلعو بدون ما يقولون شي.
موزة قعدت عدال امها وبكل ترجي وتوسل: والله أمي تخبريني محمد شوفيه شي صارله؟؟.
ام عبدالله: بسم الله عليه ليش تفاولين على الريال.
موزةصاحت: أنا متأكدة إن محمد فيه شي بس انتو ما تبون تخبروني حرام عليكم رحموني.
وراحت حجرتها.
ام عبدالله: لا البنت ينت وقعدت.
وأسما قاعدة وقلبها ناغزنها مب مطمن طلعت رايحه بيتها عشان تتصل بريلها.
أماسيف فأول ما سكرت عنه موزة اتصل بمحمد نفس القصة التلفون مغلق وتلفون السيارةمايرد عليه.
سيف بعصبية: أكرهه من يروح الحلاق لازم يسكر التلفون صدق ان غبي بس ........ بس موزة قالت ان محمد طلع من الحلاق وهي كانت ترمسه عيل ليش مايرد علي؟؟ وليش مسكر تلفونه؟؟والله يا محمد بتندم على هاي الحركة السخيفة.
وتم سيف على حاله لين مارد من المسيد وشاف عبدالله داخل البيت وشكله متروع.
سيف:عبدالله شفيك؟.
عبدالله: ما شي وين أبوي؟.
سيف:ابوي دخل قبلي داخل.
وكان عبدالله بيدخل بس سيف مسكه.
سيف:شفيك شو مستوي؟؟.
عبدالله تنهد بتعب لأن المهمة اللي عليه واايد صعبه ومب عارف شويسوي.
عبدالله: اسمع سيف انت ريال وأباك تسمعني زين بدون ماتنفعل.
سيف:عبدالله تكلم تراك روعتني.
عبدالله: قبل ربع ساعة اتصلبي خليفة ومن صوته مبين ان تعبان ... وسألته شوفيك ليش تعبان؟؟ قالي ان هو فالمستشفى.
سيف:ليش شو فيه خليفة؟؟ و شو يسوي فالمستشفى؟؟.
عبدالله: لا مب خليفة – سكت شوي وكمل –محمد.
سيف:محمد!! محمد فالمستشفى؟؟ ليش؟.
عبدالله: محمد مسوي حادث.
سيف بانفعال: شــــــــو ؟؟!!؟؟,,, متى ووين ؟؟ وهو فأي مستشفى؟؟.
عبدالله: توام.
سيف ربع وركب سيارته واتصل بخليفة يسأله عن محمد وعبدالله دخل داخل وشاف أمه وابوه وأسما.
عبدالله: السلام عليكم.
الكل: وعليكم السلام.
عبدالله: ابويه بغيتك فسالفة.
بوعبدالله: خير عبدالله؟؟
عبدالله: انسير داخل بخبرك كل شي.
قام بوعبدالله مع ابوه وخبره عن محمد وهم الحين يبون يخبرون بومحمد عن ولده وراحو بوعبدالله وعبدالله عند بوغانم عشان يخبر اخوه عن محمد.
وسيف اول ما وصل المستشفى خطف يربع وشاف خليفة وغانم وسألهم.
سيف:وين محمد؟؟ شو أخباره الحين؟؟.
غانم بهدوء: ما ندري الله يستر.
سيف بعصبية: كيف يعني ما تدرون؟؟.
خليفة معصب: ما ندري يعني ماندري دخلوه غرفة العمليات ولين الحين ما ظهروه ومحد قالنا شي.
وسيف انتبه انهم ما كانو بروحهم كانو وياهم شباب مايعرفهم.
سيف:شو استوى؟ كيف محمد سوى الحادث؟.
وخبرو سيف عن الحادث وان الريال االي دعم محمد مب غلطان محمد طلع جدامه فجأة والسبب البتان اللي كانو يضاربون و واحد منهم طاح على محمد وهو السبب ان محمد طاح فالشارع وبعد 20 دقيقة وصلو بومحمد وبوغانم وبوعبدالله و عبدالله,, وبومحمد سأل عن ولده والخوف مبين فعيونه وخبروه عن الحادث وإن محمد بعده فغرفة العمليات.
أمافبيت بومحمد,, ام محمد قاعدة فالصالة وهي حاسة بولدها وروضة قاعدة وياها أطالع التلفزيون.
ام محمد: رويض صدعتي راسي بندي التلفزيون.
روضة: شفيج اماي اليوم والعه.
ونزلت سلامة: هلا أمي شحالج؟.
ام محمد: مب بخير.
سلامة: ليش؟؟ شوفيج أمي؟.
ام محمد: ما فيني شي بس سكتي عني.
روضة: مادري شوفيها صارلها ساعة وهي مضيجة.
ونزل خالد.
سلامة: يا سلام يا سلام شو هذي الكشخة كلها.
خالد بخقة: أدري اني حليو.
ام محمد: وين ساير بكل هذي الكشخة.
خالد: بروح مع محمد عرس ربيعه.
ام محمد: سلامة اتصلي بمحمد شوفيه وين هو؟.
سلامة: انتي ليش ما تتصليبه؟.
ام محمد: اقولج اتصليبه لا تصدعين راسي انتي الثانية.
سلامة: ان شاء الله بس لا تعصبين.
اتصلت سلامة بأخوها وتلفونه مغلق.
سلامة: تلفونه مغلق.
ام محمد: شعنه مبند تلفونه انا صارلي ساعة اتصل و يعطيني كله مغلق.
سلامة: امايه لا تحاتين محمد فالحلاق وانتو تعرفونه من يروح الحلاق يبند تلفونه.
ام محمد: الحلاق لين هذا الوقت حشى هو طالع من الساعة خمس والحين الساعة 7,30 في حد ياخذ ساعتين ونص عشان يتحلق.
بدا الخوف يصيبهم.
سلامة بعناد: محمد فالحلاق والحين بيي هو قال إن بيي من يخلص يتحلق لاتخافين امايه يمكن تلاقى مع واحد من ربعه.
ام محمد: يمكن, وين ابوكم؟.
روضة: شفته طالع مع عمي منصور وريل خالتي.
ام محمد: وين رايحين..
روضة: شدراني.
