တိမ်စိုင်တွေလို လေနှင်ရာမျောခဲ့ပေမယ့်....(Completed)

(၅၄)

Unicode.........

မွှေးရနံ့ပျံ့ပျံ့ရှိနေသည့် အိပ်ယာပေါ် သုံးလေးပတ်လောက်လှိမ့်နေမိပြီး ဋိတ်အုံးအိပ်နေကျ ခေါင်းအုံးလေးကို ရင်ဝယ်ပိုက်ကာ မျက်နှာတစ်ခုလုံးနစ်ဝင်မတတ် နမ်းရှိုက်လိုက်မိသည်။ဋိတ်၏သင်းပျံ့နေသော ကိုယ်သင်းရနံ့က စိတ်ကိုကြည်လင်သွားစေသလို တစ်ဆက်တည်းမှာပဲ ပျော်ရွှင်စေသည်။လူတစ်ယောက်ရဲ့ ကိုယ်သင်းနံ့လေးကအစ မြတ်နိုးနေမိရင် အဆုံးအစမဲ့ဆိုသည့်စကားက အပိုဆိုဖွယ်မရှိပြန်ပေ။

နောက်ပိုင်းတွေဘာတွေဖြစ်လာမလဲမသိပေမယ့် ရင့်အခုလက်ရှိအချိန်လေးကို တန်ဖိုးထားချင်သည်။ရင့်အသုံးမကျလို့ဖြစ်ခဲ့ရသည့် ကိစ္စကိုတာဝန်ယူချင်သည်။ဋိတ်ကို လေးလေးနက်နက်တောင်းပန်ပြီး အရင်ကရှိရင်းစွဲ ရင့်၏နေရာလေးကိုပြန်လိုချင်မိသည်။

ဋိတ်နဲ့သာပြန်အဆင်ပြေမယ်ဆို ဋိတ်ပတ်သတ်သမျှ လူတိုင်းအပေါ် ရင့်သင့်သင့်မြတ်မြတ်နေနိုင်အောင်ကြိုးစားရလိမ့်မည်။ကောင်းသုခစံနဲ့ ငြိမ်းချမ်းရေးယူပြီး ဋိတ်အပေါ်ကောင်းပေးဖို့တောင်းဆိုမည်။ကောင်းသုခစံနဲ့တည့်အောင်နေပြီး ဋိတ်စိတ်ဆိုးမည့်ကိစ္စရပ်များကို တကယ်မလုပ်တော့မည်မှာ အသေအချာ။

နေ့လယ်ပိုင်းကတည်းက ဋိတ်၏အခန်းထဲရောက်နေမိသည်ဖြစ်ပြီး အိပ်ယာထဲလှိမ့်လိုက်၊အိပ်နေလိုက်လုပ်နေလိုက်တာနှင့်ပဲ ညနေစောင်းသွားလိုက်တာ မြန်မြန်ဆန်ဆန်။ဋိတ်ဘယ်အချိန်ပြန်လာမလဲ ရင့်မသိပေမယ့် စောင့်နိုင်သ၍တော့စောင့်ရဦးမှာပါဘဲ။

ရင့်ကနှင်လွှတ်လိုက်တဲ့သူမလား။ဦးညွှတ်ရမည့်အချိန်မှာ ရင့်က ပိုဝပ်တွားနေရမှာပေါ့၊ရင့်မှမှန်တာမလုပ်မိပါဘဲ။

လှဲရတာကြာလာတော့ ကျောညောင်းလာသည်မလို့ ဋိတ်၏စာကြည့်စားပွဲနားသွားကာ ဟိုဟိုဒီဒီလျှောက်ကြည့်နေလိုက်သည်။ကျောင်းစာအုပ်အချို့ကို စီစီရီရီတင်ထားသည့် ဋိတ်သည် စည်းစနစ်ကျစွာ သူ့နေရာနှင့်သူ အစီအစဉ်ကျနေသည့် စာအုပ်တွေက သပ်သပ်ရပ်ရပ်။လိုတာရှိရှာနေစရာမလိုအောင် သေချာစာရင်းချ စာအုပ်စီတတ်ပုံက အတုယူဖွယ်။ကိုယ်နဲ့ရင်းနှီးနေတဲ့စာအုပ်တွေပေမယ့် ပျင်းပျင်းရှိနေတာမို့ လှန်ကြည့်နေမိသည့်အခါ စာရွက်အလွတ်အောက်ဖျားပိုင်းလေးတွေမှာ ခဲပန်းချီလေးတွေနေရာယူနေသည်။လက်တစ်ဖက်၊ဖော့ဖယောင်းလေးသဖွယ်သွယ်လျနေတဲ့ လက်ဆစ်လှလှလေးနဲ့လက်တစ်ဖက်က ခန့်မှန်းမလွဲ ရင့်၏လက်ကလေး။ဘယ်လက်ကလေးကိုဖြန့်ကာ ခဲပန်းချီလေးနဲ့ယှဉ်တွဲလိုက်တော့ ပုံစံတူချွတ်စွတ်။မတူတာကတော့ ရင့်၏လက်ကလေးမှာ ဋိတ်ပေးထားသည့် လက်စွပ်လေးက လက်ညိုးလေးမှာဝတ်ထားလျက်ရှိပြီး ဘောပွဲလောင်းတာနိုင်သည့်အမှတ်တရအနေနှင့် ရင့်ဝယ်လာသည့် နာရီအနက်‌ကလေးရှိနေလေသည်။ပုံထဲမှာတော့ ဘာအဆင်တန်ဆာမှမပါသည့်ရိုးရှင်းနေသည့် လက်ချောင်းလေးတွေပါဘဲ။တိုးဖွဖွပင်ရေရွတ်မိသည်အထိ ဋိတ်ကတော်လွန်းသည်။