لأجلها

البارت الاول

Omeera

#اقتباس

فسحة خارج الواقع ، رحلة عبر خفقات القلب ..
لمسة حنان ..
في عالم يقسو يوماً بعد يوم ..
لا شيء أبقى من الحب ♡

كنت قاعدة سرحانة وبفكر في الحصل لي الفترة الفاتت ، للان م قادرة استوعب إنو كيف وصلت للنقطة دي وكيف كنت غبية كده! ، أنا وقعت نفسي في مشكلة ما ح اطلع منها ، خلاص كل حاجة انتهت ، شرفي و سُمعتي وكرامتي وحتى اعتزازي كله انتهى ، قطع تفكيري صوت بكاها المزعج جنبي ، المصيبة الخربت حياتي والدمرت كل أحلامي ، الكائنة الأول م اتخلقت م جابت لي غير المشاكل وحالياً عمرها أقل من شهر ، عاينت ليها بشمئزاز وأنا قرفانة حتى إني ألمسها لو بمرادي اكسر ليها رقبتها و ارتاح منها ..وبصراحة الموضوع ده بقى بجي في بالي كتير الايامات دي ..زفرت بضيق واخدتها في حضني طوالي سكتت ، وحسستني بالإحساس الكريه البحس بيهو كل م المسها ، الإحساس البخليني م أقدر أأذيها حتى لو عايزة ، الإحساس الوصلني ل هنا أصلا ، "الحب" 🖤...

*_"قبل سنة"_*

كنت واقفة قدام بوابة الجامعة وبعاين ل تلفوني كل شوية ، الزمن اتأخر والشمس سخنت والمفروض كان يجي قبل ساعات لكن ك عادتو اتأخر ..زهجت و اتحركت خطوتين عايزة امشي سمعتو بناديني ، فرحت لكن م بينت وعملت فيها زعلانة ، جا وقف جنبي وهو مدنقر بياخد انفاسو ..قلت ليو م بدري علييك الله كان تجي بكرة م أحسن! ..رفع راسو وقال لي عسلي يااخ مشتاقين ♡..قلت ليو م مشتااقين ولا أي شي ، على أساس نتلاقى 10 وأنت جايني واحدة!! ليه راكب سلاحفة أنت!! والله لو كنت بتحبى كان وصلت!! ..قام وقف وابتسم وقال لي بحبك وبحبك أكتر وأنتي زعلانة عشان كده بتأخر ، بس عشان أشوف الملامح الحلوة دي♡..فصلني الكلب لكن اتماسكت 😂..قلت ليو م حنكتني ي مازن اصلو م اتحنكت ..ومشيت وبقى ماشي ب وراي قال لي ي أم تاليا ماشة وين ، استني 😂..قلت ليو م تناديني كده! ..قال لي بناديك مش أم بتي! ..قلت ليو أتقدم لي أول بعداك لو سميتها بلحة م عندي مشكلة! ..وقف ضحك مسافة ولحقني وقال لي اسم رهيب أنتي عاارفة ويبقى أسمك ام بلحة ، أم بلحة جات ، أم بلحة مشت ، أم بلحة ودت بلحة الروضة ، حبيبي ي أم بلحة 😂💔..خرب لي أم الزعلة و ضحكت وتاني رجعت كملت زعلتي ..اتلفت وقلت ليو أنت مجنون على فكرة! ..قال لي مجنون بيك وفيك ♡..قلت ليو مازن الله كم م تحنكني! ..قال لي الله واحد وربنا شاهد إني متيم بيك عديل ومستعد أعمل أي شي بس م تزعلي مني لأنو م عندي أغلى من ضحكتك ♡..م رديت و واصلت مشي وأنا بتبسم ..قال لي هيي ها أنتي جاارية كده مالك ساكييك القدر يعني! أمشي على مهلك أنا جاي جاري من المحطة بسبب عدم الموصلات وم بقدر أمشي أكتر من كده ولو وقعت م عندك حل غير تشيليني! ..وقفت واتلفت عليو وقلت ليو دي منو التيشلك دي! ..قال لي أنتي طبعا ، م أنا فارس أحلامك ، يرضيك فارس أحلامك يترمي في الشارع! ..قلت ليو عادي يرضيني! ..قال لي يعني بتعترفي إني فارس أحلامك ..و غمز لي ..قلت ليو أ ب د اً ، In your dreams ..قال لي عنيدة ، لكن برضو بحبك ..قلت ليو اووكيه ..قال لي يعني سامحتيني! ..قلت ليو أنت م اعتذرت أصلا!! ..قال لي بالجد م ركزت والله 😂..عرفتو بستهبل طوالي اتلفت عايزة أمشي ..قال لي طيب آسف آسف آسف ، حقك علي م كان لازم اتاخر ي ست الكل ، كان لازم أكون دقيق أكتر من كده واجي في المواعيد ..قلت ليو تمام ..قام جا مسك يدي وقال لي صافي ي لبن! ..قلت ليو قشطة ي أنا ..قال لي ااي كده اتغزلي فيني يااخ 😂💛..قلت ليو متين اتغزلت فيك أنا هسي ، بس بتحب تكبر كومك براك! ..قال لي ارح ارح الزمن ..مشينا توتي وقعدنا نتونس ، لأ هو الكان بتونس وبرغي أنا بس كنت بعاين ليو ، مع إنو علاقتنا م طولت وياداب لينا سنتين مع بعض إلا إنو بقى أقرب لي من أي إنسان في الدنيا ♡..كان وجودو لطيف ومع إني م حصل قلتها ليو لكن كنت بحبو وبحب وجودو جنبي دائماً ، كنت بتكلم معاه بكل ارياحية عمري م خفت إنو يفهمني غلط أو يزعل من طريقة كلامي ، بتذكر كان زعلان مني وكنت براضي فيو ففي نص النقاش زعلت منو وقعد يراضي فيني ساعتين حتى رضيت و رجع كمل زعلتو 😂💛..مازن بطبعو إنسان لطيف و وجودو بخفف علي أي هم كنت شايلة ، ومعاه بكون مطمنة لأقصى حد ♡..بتذكر اتلاقينا أول مرة في الجامعة قبل أربعة سنين ، كان صاحب صحبي البدرس معاي ، لكن هو IT ونحنا تجارة وتحديداً إدارة اعمال ، المهم مشيت أسلم على زميلي ف لقيتو معاه ، ومن أول لحظة شوفتو فيها حسيت بشعور غريب زي الكأنو الحواليني اختفوا وبقيت م شايفة غيرو قدامي ♡..وم عاارفة لكن تقريباً هو حس بنفس شعوري ، لأنو بعديها بكم يوم لقيته مرسل لي ادد في الفيس ، فرحت و ادردقت لكن م قبلت سرعة وتقلت شوية وقبلتو بعد كم يوم تاني 😂💛..اخدنا فترة بنتونس وبقيينا أصحاب وعرفت إنو رحلو جديد و ساكن معانا في نفس الحي ، وحكى لي كتير عن حياتو وناس بيتهم ، وكنت بستمع بحب ♡ في الأول كنت مفتكرة إني مكررشة فيو عادي يعني لحظة إعجاب لكن بعد مرور فترة طلع الموضوع أكبر من كده ، كنت وناسة وبضحك مع الكل حتى عندي أصحاب من كل التخصصات والسنين الدراسية ، لكن هو كان غيير كنت مجرد م اشوفو بتلخبط والكلام بطير مني وبتجهجه جهجهة شديدة خلاص لكن بتماسك عشان م يحس علي ويعرف ، لحدي م مرت سنتين من التلميحات وتعب و زهج مني ومن غبائي ، قام اعترف لي إنو بحبني وأنا م قصرت طوالي قلت ليو وأنا كمان "ااي خفيفة زي كيس النايلون 😂"..مرت سنتين من علاقتنا ومن برالمة معجبين ب بعض بقينا خريجين ولسه حب مازن زي م هو مع إني م اتوقعت علاقتنا دي تدوم أكتر من شهر ، لكن هو كان صابر وبالو طويل عشان كده اتحملني ، بس نقطة ضعفو إنو غيور لأقصى حد و دي أكتر حاجة بتكيفني ♡..طقطق لي وقال لي وصلتي وين ، المشترى ولا المريخ! ..قلت ليو بخلعة شنو؟!! ..قال لي عارف إنك سرحانة فيني ف م تتهربي! ..قلت ليو لا ابدًا م حصل ..ضحك وقال لي عارفة إنو وشك اتلون وبقى زي التفاحة ، نفسي أكلك يااخ 😂..قلت ليو ي سعران ي جعان ، قوم وديني بيتنا ..وبقيت انق و ده كله طبعًا عشان م يعرف إني بفكر فيو ..عاين لي مسافة وأنا واقفة وبجوط وقال لي وبريدك ي شذى النوار وي فرح العريس السار ♡..فصلت وسكت ..قال لي حبيبي أنا ، بحب فصلتك دي يااخ 😂..طواالي اتخارجت قام لحقني و وصلني قريب للبيت ومشى ..أول م دخلت لقيت أمي قاعدة في السرير وبتخيط في جلبابة ، اتذكرت موضوع الكورس أصلا كان اتصلت ل مازن عايزة اكلموا نسيت ، كده بكون ده الكورس السابع لي في إدارة الأعمال ، وكده بكون عندي شهادات كافية من شهادات لغة انجليزية و كمبيوترات و تنمية بشرية و ده كله عشان بعد اعمل الامتياز امشي اقدم اوراقي لشركة معروفة في بريطانيا ، كلها باقي لي أقل من شهرين واتخرج وبعدها ي لندن جاك زول ..مشيت جدعت شنطتي وقعدت جنب أمي ..وقلت ليها ماما الغالية ، حُبي ، ست الكل وست الحبايب ..قالت لي هووي م عندي قروش ل كورسات ..قلت ليها يا أمي علييك الله كلها أربعين يوم بس وب 10 ألف بس اتخيلي! ..قالت لي م عندي! شوفي أبوك ..قلت ليها سمح لمن يبقى عندي دولارات ، دولار واحد م بديك! ..قالت لي أول شي لمي في الجنيه السوداني ده وبعداك تعالي اتكلمي ..قلت ليها سمح ي مرت أبوي🙂 ..قالت لي أمشي شوفي درب المطبخ ب وين ..قلت ليها ليه ي امي كل مرة أنا يعني وبتك دي بتعمل في شنو!! ..قالت لي البت عيانة م شايفاها!! ..قلت ليها بتك دي زاتا كرهتني السنة كلها عيانة عيانة!! ..قالت لي م بتي أكلها ميت م زيك أنتي ، تبلعي أي شي زي الحوت! ..قلت ليها أكلها ميت!!! ، أكتر من كده إلا تاكلني والله! ..قالت لي خمسة وخميسة ، الله أكبر علييك قتلتي لي بتي ..قلت ليها برضو أنا السحاارة! ، قولي عشان الحتالة حقتك مدلعاها بس ..قالت لي م تخافي الله ، خاتة نقرك مع بتي الصغيرة دي! ..قلت ليها صغيرة أنا والله عمرهاا خمسطاااااشر سنة قال صغيرة قال ..قالت لي ميرا!! ..و رفعت الشبشب ، طوالي انسحبت وأنا بنقنق ..و دي ياها معاناتي اليومية مع أختي مايا ، أنا وهي زي الشحمة والنار ، عمرها 15 سنة مدلعة دلع مباالغة ولسانا أطول من شارع بيتنا والاسوء إنو أمي "سارة" بتقيف معاها ، لكن أنا زاتي م هينة و عندي أبوي حبيبي "محمد" عصبي لكن حنين معاي أنا بالذات ، ومع إني كبرت وما شاءالله داخلة على ال 21 لسه بناديني بت أبوها ♡ ، وعندنا اخونا تالت أكبر واحد وأكبر مني بخمسة سنين اسمو مجتبى مسفوه ماف زول متذكرو لا أم لا أبو 😂..دخلت الغرفة وأنا بتكلم مع نفسي وبنبز في مايا ، لقيت حضرة جناب الآنسة راقدة وشايلة تلفونا ..قلت ليها رااقدة من الصباح كده م كان تقومي تغسلي العدة دي! ..قالت لي وأنتي شغلك شنو إن شاء الله! ..قلت ليها خدامة عندك أنا! ..قالت لي اااااي ، م عاارفة يعني! ..عايزة أمشي اضارب معاها ، بقت تصرخ وتنادي في أمي ..أمي قالت لي ميراا!! روقي ساي قبل م اصلك! ..حمرت ل مايا لقيتا بتتبسم لي "أصلا أي واحدة اسمها مايا خسيسة 🙂" ..مسكت خشمها ولبعتها زيين واتفشيت ومشيت المطبخ ، بعد ثواني أمي جات جاطت شوية ومشت ، م فرق معاي الموضوع أهم شي إني اخدت حقي من الشافعة الخسيسة دي ..بعد خلصت مشيت اخدت شيتاتي وبقيت اقرا ، لحدي بعد المغرب كده الباب دقة ، أمي و مايا برة وأنا جوة ، أمي من الغرفة نادتني عشان افتح الباب مع إنو هم جنبو ، شوفتو العنصرية دي كيف! ..مشيت فتحتو بزهج لقيتو مازن ، اتلفت وراي لقيت أمي مركزة مع تلفونا ، ومايا مع كتابها ، اتلفت في الشارع ماف زول ، الشارع فاضي ..رجعت عاينت ليو وقلت ليو أنت الجابك شنو زي الوقت ده! ..قال لي جيت اشوف أمك واتقدم ليك ..قلت ليو أنت جنيت! ..قال لي من م شوفتك ♡..قلت ليو ده م وقتك هسي ، عايز شنو؟! ..قال لي أمك يااخ ، عشان أتقدم ليك! ..قلت ليو مازن يااخ ، عايز شنو!! ..قال لي أنتي! ..وطوالي دق الباب و دخل ، بعد م سلم على أمي قال ليها أنا مازن ولد فاطمة جارتكم ..قالت ليو م عرفتها ..قال ليها الساكنة في الشارع الوراكم طوالي ..قالت ليو اااا ، أم مها ..قال ليها ااي ..قالت ليو نورت والله ، أنا قعد امشي بيتكم لكن م حصل شوفتك ..قال ليها ااي أنا اغلبية الزمن مافي مع الشغل والجامعة وكده ، المهم جيتك لخير ..هنا أنا طواالي نطت عيوني وفتحت خشمي ، ااي أنا فعلاً عايزة اعرسو وأي شي ، لكن م هسي بعد احقق أحلامي ، ولمن كنت بجيب ليو سيرة العرس ، كان بس عشان اغيظو م اكتر ، م اتوقعتوا يبقى جادي ويجي ..أمي قالت ليو اهاا ..قال ليها عرس أختي مها الأربع الجاي والحنة يوم التلات وحنة العروس يوم الاتنين ..قالت ليو مبروك ليها والله ، ربنا يتمم ليها على خير وعقبالك كمان ..قال ليها آمين يارب ..وعاين لي عملت رايحة ..قال ليها يلاا مشيت ، سلمي على الحاج لمن يجي وكلمي ..قالت ليو إن شاء الله ..قام مشى ، وبعد طلع قال تعالوا اقفلوا الباب ..عرفتها حجة عشان يشوفني ، ابتسمت لآخر ضرس واتجدعت مشيت خطوتين ..أمي وقفتني و قالت لي خلي مايا تقفلوا ..قلت ليها أي شي في البيت بعملوا أنا وقفت على قفلة الباب! بمشي براي! ..قالت لي اجي!! ..قلت ليها اااي اجي ونص ، بمشي براي!! ..ومشيت عايزة اقفلوا لقيتو واقف ..قال لي منتظرك أنا ح تجي صاح؟ ..قلت ليهو بغرور بفكر ..قال لي جادي معاك أنا ..قلت ليو أكيد ح اجي ، معقولة م اجي ، بعمل أي شي عشان اشوف الغمازات الحلوة دي! ..وجضمتو ..ضحك وقال لي غيرانة عشان م عندك زيهم ..قلت ليو عندي أنت بحالك ♡..قال لي احاا ، براحة على قلبي ♡..قلت ليو أمشي اتأخرت على الصلاة ..قال لي صااح والله ، ده كله بسببك ، سمعتيني كلمتين حلوين خليتيني نسيت نفسي ، اااي أنتي ، ولا كلمة ..وجرى طوالي ، لأنو عارف ح اردح ليو ، قفلت الباب وأنا بتبسم اتلفت لقيت مايا واقفة وراي زي الشبح ..قلت ليها خير إن شاء الله ..قالت لي ده كله بتقفلي الباب؟ ..قلت ليها أنتي مالك ، الدخلك شنو!! ..قالت لي دخلني الدخلك ، ده منو الواقفة معاه ده! ..قلت ليها وأنتي منو لمن بتسأليني أنا بعمل العايزاه حبيبة ..قالت لي اصبرري كما كلمت أمي ..قلت ليها مايا ، نطي من شباك حياتي وخليني في حالي!! ..قالت لي ينط فيك ضب شاحدة ربي ، امشي راسك المربع ده! ..وجرت دخلت الغرفة ، عاينت ل أمي لقيتا رجعت ل تلفونا ولا جايبة خبرنا ، لكن هسي لو فكرت أقرب على بتها الحاسة السادسة بتشتغل وبتخنقني عشان كده احسن اسكت اخليها ..في وقفتي دي الباب دقة فتحتو لقيتو مجتبى ..قلت ليو اخووي السمح ، المكسر بنات الحي كلهم ، نورت البيت ..قال لي شوفتي ولا ملينة حمرا م عندي ، وياداب عندي حق السجاير ..قلت ليو اصلا م منك فايدة ..قال لي احسن شي عشان م تستفيدي أنتي ..حمرت ليو مسافة وهو ماشي ولمن قرب ل أمي قلت ليهو بصوت عالي مجتبى اخوي علبة سجايرك وقعت ..طواالي أمي استلمتو وبقو يدو دروس في الأخلاق وهو شغال يحمر لي من بعيد وينبز فيني ، في النهاية علي وعلى اعدائي ..دخلت الغرفة وأنا منتظرة أبوي بفارغ الصبر لحدي م جا ، مشيت المجلس ومن الباب ..قلت ليو ابويا الغالي ، سندي ، ودرعي في الدنيا القاسية دي ، قدوتي وصحبي ويابا الماف منو اتنين ..قال لي بت أبوها السمحة ، الغالية ، ست البنات ، الحلوة ست الكل وفراشة حياتي و وصية الرسول ♡..عاينت ليو مسافة واتنهدت وقلت ليو غلبتني والله ..قال لي يا شييخة أنا استاذ في الحاجات دي ، لو م كده كان عرست أمك! ..قلت ليو فعلاً امي دي ناشفة ولو م أنت لسانك حلو م كان عرستها ..قال لي شوفتي كيف ، المهم هسي بعد المقدمة الطويلة دي كنتي دايرة شنو؟ ..قلت ليو Money ي حاج ..قال لي كم؟ ..قلت ليو 10 ألف ، في كورس فتحو قريب من جامعتنا عايزة اتسجل فيو ..قال لي شهادتو كيف ، موثوقة يعني؟ ..قلت ليو ااي وشديد كمان ، دي منظمة معروفة ولو بقيت شاطرة كمان يمكن يشغلوني عندهم ..قال لي كوويس والله ، ربنا يوفقك وترفعي راسنا ..قلت ليو إن شاء الله يا أبوي ، أنا ح اعمل حاجات تخليك تفتخر إنو أنا بتك ♡..قال لي إن شاء الله وأنا واثق فيك ، المهم أنا م عندي كاش هسي إلا بنكك ..قلت ليو خلااص بكرة إن شاء الله لمن تجي ، مش لحدي الزمن داك بتكون فكيتها ..قال لي ااي إن شاء الله ..قلت ليو خير طيب ..واتونست معاه شوية وطلعت وقفت في السرير وناديت بالحيطة وقلت يا رزان يا رزة! ..جاتني بعد كم دقيقة كده ، وهي زاتا واقفة في السرير وقالت لي ميروش خبرااتك ..قلت ليها تمام الحمدلله وانتي؟ ..قالت لي فل الفل الحمدلله ..قلت ليها عزموكم العرس؟ ..قالت لي حق مها؟! ..قلت ليها ااي ..قالت لي ااي مودة اختها جاتنا قبل شوية ..قلت ليها نحنا جانا مازن ..ضحكت وقالت لي ده اسمو الاستغلال المناسب للفرص ، مازن ده م بفوت فرصة عشان يشوفك ..قلت ليها ااي والله و ده البحببني فيهو أكتر! ..قالت لي خلااص م تكرفسي لي مشاعري ، قلبي الصغير لا يتحمل ..ضحكت وقلت ليها أمشي ي سنجلة ي بائسة ..قالت لي تقولي شنو بس ، لكن إن شاء الله ربنا يجمعني ب ود الحلال قريب ..قلت ليها آمين ، صحي أخبار جامعتك شنو؟ ..قالت لي بل بل بل بس ي صحبتي ، أنا الدخلني الصيدلة شنو م عاارفة! ..قلت ليها بوبااار 😂..قالت لي ااي والله ، لكن هانت قربت خلاص كلها شهرين واتخرج ..قلت ليها إن شاء الله ..قالت لي إن شاء الله ..قلت ليها اوكيه نتلاقى بكرة إن شاء الله ، يمكن اجيكم نشرب القهوة سوا ..قالت لي ظبووطة منتظراك! ..عايزة انزل وقفت وقلت ليها رزان! في رايك أنا ح اصل للعايزاه عندي إحساس غريب وحاسة إنو ح تحصل حاجة؟ ..قالت لي م تخافي ح تصلي إن شاء الله ، ربنا م بضيع تعب زول واتأكدي إنو أي شي ح يحصل ليك ح يكون خير ليك تمام ..قلت ليها تمام ..قالت لي طيب بااي ي مزة ..ونزلت مشت ، دايمًا لمن أكون متنشنة أو مترددة أو متحيرة بمشي ل رزان ، لأنها واعية وعندها بوزتيف انيرجي ، م حصل مرة مشيت ليها وم طمنتني ، أنا و رزان اتربينا مع بعض من صغار وهي أكبر مني بسنة واحدة ، كنا دايمًا مع بعض بيتنا بيتهم وبيتهم بيتنا ..المهم باقي الأيام م حصلت حاجة مهمة ، كنت خلاص نزلت الكورس وكان يومين في الأسبوع ومع إنو حصل تضارب مع أيام جامعتي لكن قدرت اتحكم فيها ، ده حلمي و ده الكنت بسعى ليو من زمان ، يعني أنا من كنت صغيرة وأنا راسمة طريقي ومحددة ، جاهدت وتعبت لحدي م وصلت هنا ، وحالياً أنا جاهزة وماف حاجة بتوقفني وبيني وبين حلمي خطوة واحدة أو ده الكنت متخيلة أنا ..المهم رجعت من الكورس لقيت مجتبى في الباب ، هو طالع وانا داخلة ..قال لي جاية من وين أنتي؟ ..قلت ليو من كورس الإدارة ..قال لي لسه بتتجاري ورا الكورسات دي ، أنا قلت ليك م عندنا بنات بسافرو إلا مع رجالهم! ..قلت ليو وأنا قلت ليك ح أسافر غصبًا عن الكل وح أشتغل وح أصرف بالدولار كمان! ..قال لي م أظن ..قلت ليو ظنونك م مهمة عندي ..قال لي كوويس نشوف ..قلت ليو نشوف ..و دخلت خليتو ، يااخ مجتبى ده بحب يكسر مجاديفي ، ليه م أسافر؟ البنات السافرو ديل احسن مني في شنو! أنا تعبت و وصلت هنا ومستحيل اقيف لا تقول لي كلام الناس ولا يحزنون لأنو ديل آخر همي ، ولانو ديل ما ح يحققو لي الأحلام الأنا بحلم بيها ليل ونهار! ..مشيت غرفتي طوالي وأنا مليانة من مجتبى لقيت مايا قاعدة ، اتشاكلنا واتضاربنا ك العادة وكل واحدة رقدت في سريرها بتحمر للتانية ، بليل كانت حنة العروس لكن أنا كنت تعبانة وم مشيت ، اليوم التاني مشيت الحنة الكبيرة مع أمي و رزان ، أما اختي المنفسنة دي خليناها في البيت ..المهم مشينا قعدنا في الكراسي وبس بنعاين ، شوية الحفلة سخنت والناس هاجت ، أمي قامت مشت ترقص و رزان لحقتها ، وأنا انسحبت براحة مشيت ورا الصالة عشان أشوف مازن .....

أنتَ الأسمَر الوحيد في حياتي و كلّ الذين سَيأتون من بعدك لا ألوان لهم ♡

يتبع ..