لأجلها

البارت التاني

Omeera

‏ كالمنزل الدافئ المُمتلئ بالحُب ، هو المنَزل الوحيد الذي يسّتقبلني دائماً ♡

لقيتو واقف وشايل تلفونو مركز فيو ولابس لي بدلة كبدية وحلاقة وعطر وحاجة كده في منتهى البسبوسة ♡..اتنحنحت قام رفع راسو عاين لي وابتسم وقال لي يخرب بيت دي سماحة! ، كنتِ دافنة الحلاوة دي كلها وين! ..قلت ليو يعني أول كنت م حلوة! ..قال لي النكدي نور عيوني ، أنتي حلوة في كل حالتك بس الليلة حلاوتك زايدة و رافعة لي مستوى السكري ♡..ضحكت وقلت ليو جد! ..خت يدو في قلبو وقال لي اوباا براحة على قلبي ..ضحكت تاني ، يااخ الإنسان ده شوفتو براها بتغير موودي خلو الونسة معاه ♡..مشى جاب كرسيين و طاولة صغيرة وكبايتين شاي لبن و زلابية وناعم ..وقال اجلسي آنستي الجميلة ♡..قعدت وقلت ليو لقيت زلابية وناعم وين زي الوقت ده! ..قال لي سرقت حق العروس 😂..ضحكت وقلت ليو كذااب والله ..قال لي و ربي ، انسحبت سرقت لي كم زلابية وناعم وجيت مارق ..قلت ليو ولشنو ده كله؟ ..قال لي عشان بتحبي وعشان اشوفك مبسوطة ، لأنو طول م أنتي مبسوطة أنا مبسوط ♡..قلت ليو عارف إني بحبك ، عارف ولا م عارف ♡..قال لي عارف ، لكن بحب اسمعا منك ..قلت ليو وأنا بحب أحسها أكتر ..قال لي طول م أنا حي وفيني نفس ، ح أحبك واحسسك بحبي لمن تقولي كفى ..قلت ليو حبك الحاجة الوحيدة الم ح اكتفي منها ♡..ضحك وقال لي تمام تمام ، اشربي الشاي ده عشان م يبرد اولاً ، وعشان م يقبضونا ونحنا سارقين الزلابية ثانياً 😂..اخدتو وشربت وبقيينا نتونس شوية وحكيت ليو عن أحلامي للمرة المية وهو بس بعاين لي وبتبسم ، مازن عمرو م حطم أحلامي ولا حتى بالهظار ، كان دايمًا الداعم الأول لي ، ومجرد م اكلموا عن كورس ولا حاجة اجابتو دايمًا بتكون "ليه لأ ، انتِ بتقدري ، فخور بيك أنا ، ربناا يوفقك كمان و كمان" ، كان بشجعني وبحفزني حتى على أصغر التفاصيل ، و ده الشي البخليني متحمسة وأنا بحكي ليو لأنو عارفة إنو ح يقيف جنبي ♡ ..بعد شوية غيرت الموضوع و قلت ليو أنت دي حفلة أختك مفروض تكون جنبها هسي ..قال لي صحباتها مستلمين مكاني ، وغير كده هي الحفلة شنو غير إنو الزول ينطرب ويغير موود ويمبسط ، وأنا بنطرب بصوتك وبكون مبسوط وأنا معاك ف أنتي حفلتي أما الجوة دي حقت أختي ..م قدرت ارد وبقيت اشرب الشاي بصمت وهو بعاين لي ..قلت ليو أنت قاصد توترني صاح! ..قال لي مالي أنا هسي 😂..قلت ليو م تعاين لي كده! ..قال لي عيونك سمحات وعليهم جمال تبارك الرحمن بس ، م قادر اتجاوز ياخ ..فصلت تاني ، وقضينا القعدة كلها كده ، نتونس شوية ونتغزل شوية لحدي م الحفلة قربت تنتهي ..قمت ودعتو و رجعت الصالة لقيت أمي و رزان ياداب قعدو ..قالت لي كنتي وين! ..قلت ليها مشيت الحمام وجيت ..رزان قالت لي براك! ..وضحكت ، قرصتها بتحت وقلت ليها لا لا معاي الجيران! .. أمي قالت لينا خلااص يا بنات نطلع بعد ده لأنو الزمن اتأخر ..قلت ليها تمام ..باركنا لأم مازن و رجعنا البيت ، مجرد م دخلت الغرفة رزان اتصلت لي وقالت لي احكي لي بالتفصيل الممل ..قلت ليها خلي الشمار يحرقك ابيت ..قالت لي عليييك الله!! ..قلت ليها أبكي عشان احكي ليك 😂..يااخ سبت لي سب لجدي الأخير وجاتني بالباب بليل داك لبعتني وخلتني حكيت ليها حتى ارتاحت ورجعت بيتهم ، اليوم التاني كان العرس فطور ، مشينا أنا و رزان قاعدين وبنتونس لحدي زي الساعة عشرة كده الاولاد بقو يطلعوا في الصواني ومن ضمنهم مازن ، كل ما يجي ماري بالطرابيزة الأنا قاعدة فيها بتبسم ، يا بغمز لي ، يا بقيف يتكلم معاي ، الناس كلهم لاحظو شدة م عملها واضحة وهو أصلا الموضوع م فرق معاه كتير و آخر همو كلام الناس ، لكن أنا كان بهمني في النقطة دي بالتحديد لأنو فيها كرامة أهلي و تربيتهم ، أنا بعترف إني بحب مازن و دي حاجة م بيدي لكن إني اتجاوز حدودي معاه ، لأ معليش ..م عندي كلام زي ده أنا عزة نفسي فوق كل شي ..اتوقعت بعد العرس ده الناس تبدا تتكلم فينا أنا و مازن لكن بالعكس م حصل ، يمكن ماف زول ركز أصلا وأنا الكنت خايفة بس ..الأيام البعديها جرت سرعة وعدت ، كملت الكورس واتخرجت كمان وم مصدقة إنو أمس كان تخريجي ، اتخلصت من حاجة اسمها جامعة وامتحانات وضغوطات وسهر وكلام فارغ وحتى رزان ارتاحت واتخرجت ، مازن تخريجو كان قبلي بأسبوع ومشيت حضرتو أكيد وفي الصف الأول كمان! ، وهديتو ساعة يد فضة بمناسبة النجاح ♡..المهم راقدة وبتخيل وبحلم إني نازلة من عربيتي و داخلة شركتي وبسلم على الموظفين وبشجعهم ، لمن حددت الرواتب الح اديها لكل موظف 😂🤍..قلت لنفسي يا ميرا ده م وقت الراحة ده وقت الشغل الجد جد بعد ده ، لازم افتش على مكان أعمل فيو الإمتياز ومنها لندن ، لندن ، لندن! ..وأنا بحلم وبتخيل وصلتني رسالة من مازن كاتب لي فيها "تعالي لي ورا دكان عبدو هسي" ..رسلت ليو "هسي م بقدر اطلع" ..رسل لي "ثواني بس و ارجعي" ..فكرت شوية ورسلت ليو "تمام لكن سرعة" ..ومشيت لبست عبايتي وأنا بفكر في شنو لمن مازن عايزني اجي سرعة كده ، طلعت برة لأمي وقلت ليها ماشة احول رصيد و طلعت ..مشيت ورا دكان عبدو لقيتو واقف ..قلت ليو في شنو خير! ..قال لي هدية التخرج ..عاينت ليو بخلعة ، كنت قايلة إنو في حاجة حاصلة يااخ حيلي برد ..قلت ليو خلعتني يااخ ، كنت قايلة في حاجة حاصلة! ..ضحك وم رد وطلع من جيبو اسوارة فضة على شكل مفتاح ولبسني ليها ..وقال لي الطبلة معاي ، و ده لأنو ماف بت قدرت تفتح قلبي غيرك ، وكمان ممكن تعتبري ضمان إني ما ح أكون لغيرك ♡..الزعلة طارت و قلت ليو م اتحرم منك أنا ♡..قال لي لااا حبيبي كده م خطر علي لكن ، سماحة رد وأخلاق لا كده كتيير ♡..ضحكت وم رديت ..خت يدو في صدرو وقال اححح براحة على قلبي ♡..قلت ليو ما ح تبطل الحركة دي! ..قال لي طول م أنتي بتضحكي ، لازم أمسك قلبي عشان م تسرقي ♡..قلت ليو م بقدر اسرقو لأنو حقي أصلا ..قال لي اجلنعم آنستي الجميلة ، دي حاجة م بختلفو فيها اتنين ، ويلا ب وشك على البيت تمام ..قلت ليو حاضر ..قال لي يحضر ليك الخير اللي هو أنا يعني 😂..مشيت خليتو وأنا بضحك ، دخلت الغرفة رقدت وبقيت اتأمل في الاسوارة ، جات مايا داخلة ، وعلى غير العادة م سألتني زاتو طوالي مشت رقدت في سريرها وقبلت على الحيطة ، استغربت وقمت مشيت قعدت جنبها ..وقلت ليها مالك يختي لا سلام لا كلام ..عاينت لي ورجعت عاينت للحيطة تاني وم ردت ..قلت ليها مالك أنتي؟ ..قالت لي ممكن تحضنيني؟ ..حيرتني بسؤالا ، من متين الحب ده بيناتنا كمان! ، خوفت تكون مخططة ليها لحركة خسيسة ولا حاجة لكن برضو قلت اجاريها وأعرف عايزة تصل لشنو ..هزيت راسي ب ااي ، قامت حضنتني و رقدت في كتفي مسافة بعداك فكتني و رجعت رقدت تاني ، واتكرر الموقف كذا مرة خلال التلات اسابيع الفاتو ، كم يوم بتكون عادية ياها مايا البعرفا وفجأة تنقلب مسكينة زي الكديسة ، لمن شكيت فيها ي عندها انفصام في الشخصية يا هم توأم وبلعبو بي ، ماف حاجة غير كده! ..الليلة برضو قاعدة في الغرفة وبجهز نفسي عشان بكرة ح يكون أول يوم لي ك موظفة في مؤسسة حكومية عشان اقضي الامتياز ..قاعدة وبكوي عبايتي في أمان الله ، جات مايا داخلة بتبكي ومشت قعدت في سريرها ، اكيد الشمار حرقني ، كويت ملابسي سرعة سرعة ، ومشيت قعدت جنبها وقلت ليها مالك؟ ..قامت قعدت في رجليني وحضنتني ، و دي بقت لي حاجة عادية تقريباً ..قلت ليها مالك أنتي في شنو؟! ..م ردت ..قلت ليها شكلك عيانة ، أمشي انادي أمي؟!! ..قالت لي بسرعة لأ ، م تنادي أمي ، أمي لو عرفت بتقتلني ..قلت ليها ليه إن شاء الله عملتي شنو كمان ، م تكون رسبتي في الإمتحانات بعد تعب أمي ده كله!! .."والله أنا دي بريئة عديل" ..هزت راسا ب لأ ..قلت ليها طيب ، عملتي شنو! ..سكتت ..قلت ليها قولي ي مايا ، لأنو أنا راسي بقى يودي و يجيب و ده م في صالحك والله! ..قامت وقفت قدامي وبقت تبكي بحرقة وقالت لي ميرا أنا حامل! ..قلت ليها نعم يا ماما؟!!!! ..م قدرت استوعب ، ماشة وجاية في الغرفة قريب نص الساعة وكل دقيقة اسأل مايا القاعدة في السرير قدامي وبتبكي نفس السؤال ..مايا أنتي متأكدة؟ طيب كيف ومتين و أبو منو؟! ، مايا أنتي جادة!! ، مايا بالجد ولا ده هظار؟!! ..في النهاية زهجت وقالت لي هسي شكلي ده شكل زول بهظر!! ..قلت ليها وم شكل واحدة حامل برضو!! ، مايا أنتي غبية!! أنتي مستوعبة العملتي في نفسك!! أنتي كيف سلمتي نفسك لواحد غريب!! ..قالت لي هو م غريب أنا بحبو! ..قلت ليها هو أنتي بتعرفي الحب بالله! أنتي شافعة من الواطة م قمتي حب شنو ليك!! ولمعلوماتك البحبك بالجد م بعمل فيك كده!! كان بلعب بيك ي هبلة ي غبية!! ..قالت لي م أنا م كنت عاارفة يااخ! ..قلت ليها بالجد!! ده كل الح تبرري بيهو موقفك!! م كنت عاارفة قال ، هو الشنو الم بتعرفي!! يعني افتكرتي إنو بعد العملتو ح يعرسك!! طلعتي اغبى من م اتوقعتك!! هسي ح تعملي شنو في المخلوق ده ح تمشي وين!! ، أنتي خربتي حياتك ي مايا!! حياتك وقفت وانتهت هنا خلاص!!! ..بقت تبكي بحرقة لمن بترجف وأنا من الزعل م قادرة اراضيها ولا اتفاهم معاها ، الموضوع صعب وم قادرة استوعبو ، كيف مايا أختي الصغيرة حبت وحملت من واحد غريب! قدر م حاولت أفهم م قدرت!! ..عاينت ليها مساافة وقلت ليها عاايني ، نحنا لازم نكلم أمي بموضوعك ده ، ح تجوط في البداية لكن ح تسامحك ، وهي بطريقتها تكلم أبوي وبعداك يتصرفو فيك وفي المخلوق بتاعك! ..قالت لي بسرعة لأ ، ما ح تكلمي زول ، أمي لو عرفت بتقتلني وأبوي.. ..وسكتت وبقت تبكي ..قلت ليها من أول لو فكرتي كده م كان عملتي العملتي! ..قالت لي علييك الله ي ميرا م تكلمي أمي علييك الله ، م تكلمي زول م تكلميهم يااخ!! ..وبقت تحنسني وأنا بحمر ليها لحدي م أنفها بقى ينزف من الخوف ، مشيت جبت منديل و اديتو ليها ، و وقفت عاينت ليها مساافة ومشيت فتحت الباب ..قامت وقفت بخلعة وقالت لي ماشة وين! ..قلت ليها ماشة أنادي رزان ..قالت لشنو!؟ ..قلت ليها أكيد عشان تفكر معاي في النهاية راسين احسن من راس واحد ..قالت لي قصدك تلاتة! ..قلت ليها أنتي م محسوبة لأنو لو عندك مخ م كان عملتي كده! ..وطلعت خليتا ، مشيت وقفت في السرير وناديت رزان طوالي جات ..قلت ليها عاايني تعالي لي هسي ناو ..قالت لي في شنو؟ مازن اتقدم ليك!! ..قلت ليها يا ريت ، في مصيبة تعالي سرعة! ..قالت لي تمام جاية ..نزلت من السرير وقعدت فيو ، وبقيت ماسكة راسي وبفكر ، للان م قادرة استوعب الحصل ، يعني عمري م فكرت إنو تحصل حاجة زي دي في بيتنا ، ياخ بالجد مايا دي واحدة غبية وم بتعرف تتصرف! ..سمعت فتحة الباب ، رفعت راسي لقيتا أمي طالعة ..قلت ليها ماشة وين؟ ..قالت لي ناس التومة ديل قالو عندهم قريبهم مات في البلد ماشة اعزيهم ..قلت ليها ايواا ، الله معاك ..قالت لي الله مع الجميع ..وطلعت كده جات رزان داخلة ، شكلهم اتلاقو في الباب ..جاتني جارية وقالت لي مالك في شنو؟!! ..قلت ليها تعالي ..ومسكتها من يدها دخلنا الغرفة لقينا مايا لسه بتبكي ..أنا قفلت الباب وقعدت في السرير التاني و رزان قعدت جنبها ..وقالت ليها مالك؟ ..وعاينت لي وقالت لي مالا؟ ..قلت ليها الآنسة حامل ..قامت وقفت وعاينت لي بصدمة وقالت لي كذابة والله!! ..قلت ليها ابدًا ..رجعت عاينت ل مايا وقالت ليها بالجد!! ..هزت راسا ب اي ..قالت ليها كيف!؟ ومن منو!! ..قلت ليها ده السؤال ال من قبيل بسألا ليو م عايزة ترد! ..قالت ليها مايا ، كلمينا عشان نقدر نساعدك ، ده منو؟ ..قالت ليها مسافر! ..قلت ليها وحملتي كيف ي ماما ب البلوتوث ولا الواي فاي! ..الاتنين حمرو لي سكت ..رزان قالت ليها كيف يعني مسافر؟ ..قالت ليها وهي بتتنهد مجرد م عرف سافر! ..قالت ليها طيب وهسي ناوية تعملي شنو؟ ..قالت ليها بفكر اجهض ..قالت ليها ااي احسن حل ..طبعا خلعوني الاتنين ديل ..قلت ليهم انتوا مجانين ولا مخكم ده م تمام!! ، وأنتي ي رزان على أساس الواعية وجبتك عشان توعيها تقومي تزيدي الطين بلة! ، إجهاض شنو ليهاا! ..قالت لي ميرا ده أحسن حل ، هي م عايزة زول يعرف عشان كده تجهض بس ..قلت ليها أنتي م فكرتي في الأعراض الجانبية للموضوع ده!! ، ده غير إنو دي جريمة وح تتحاسبو عليها دنيا وآخرة!! ، المخلوق ده روح زيي زيكم وأنا ما ح ارضى ولا اسمح ليكم اصلا تعملوا البتفكرو فيو ده! ، ويا مايا لو سمعتك بتقولي كلمة إجهاض بالغلط سااي بمشي بكلم أبوي اخلي يتصرف معاك! ..قالت لي لأ ، طيب آسفة ما ح اجهضوا ولا أي شي ..رزان قالت لي طيب ح تعمل شنو!؟ ..قلت ليها تلد بس ..قالت لي ميرا البت دي صغيرة جسمها م بتحمل ..قلت ليها تتحمل غصبًا عنها ، وتعتبرو عقاب على العملتوا!! ..مايا قالت لي م مشكلة بتحملو لكن بعداك البحصل شنو! ..قلت ليها نكلم أمي وأبوي وهم بقررو ..رزان قالت لي صعبة يااخ تختوهم أمام الأمر الواقع كده ..قلت ليها م عندنا حل حالياً غير كده ..قالت لي طيب ح تلد وين؟! ..قلت ليها م عاارفة والله ..مايا سكتت مسافة وقالت لي خلينا نمشي بيت عمتو مريم ..قلت ليها ال في الرياض؟ ..قالت لي ااي ..قلت ليها ممكن اصلا ارملة وساكنة براها وعلى العليها بتريدك زيادة عن اللزوم يمكن تتفهم موقفك ..قالت لي ااي ممكن ..رزان قالت لي والمدرسة؟ ..قلت ليها باقي ليها خمسة شهور ..رزان عاينت ل مايا وقالت ليها أنتي عندك كم؟ ..قالت ليها م عاارفة ..قالت ليها هسي أنتي متأكدة إنك حامل ، م يكون عشان استفرغتي مرتين و دوختي صدقتي أمور المسلسلات وقلتي إنك حامل ، احتمال ملاريا! ..قالت ليها م مشيت المدرسة الليلة ، مشيت فحصت واتأكدت ثم أنا م غبية للدرجة دي! ..قلت ليها وأغبى من كده كمان ، بعد العملتي ده مفروض م تتكلمي اصلا!! ..رجعت تبكي تاني ..رزان قالت لي خلاص يا ميرا م تزيدي عليها ، هسي خلينا في المهم ح نعرف شهورها كيف؟ ..قلت ليها أنا بوديها المستشفى بعد يومين وبنعرف ، لحدي الزمن داك حاولي اتماسكي م تقعدي تتبكي لي اليوم كله عشان أنا م فيني حيل اطبطب! ..م ردت لي ..رزان قالت لي طيب بعد تشوفو دكتور ونتأكد ح نتصرف ..قلت ليها تمام ..رزان قعدت جنب مايا وقالت ليها م تخافي ح نتصرف ، بس أنتي إن شاء الله تكوني اتعلمتي من غلطك وتوبتي ..هزت راسا ب اي ..قلت ليها كوويس اتأدبتي ، بكرة أمشي اعمليها تاني سمح! ..رجعت تبكي تاني و رزان بقت تحمر لي ..قلت ليها مالك! ..قالت لي لو م عندك كلام سمح تقولي اقفلي خمشك ده أحسن! ..قلت ليها سكت! ..بقت تحنس فيها وتطمنها وأنا بس بعاين ليهم ، لحدي م فجأة مايا قامت وجات قعدت في رجليني وادست في حضني ..رزان قالت ليها مالك؟ ..رديت ليها أنا وقلت ليها م عاارفة يااخ كرهتني الفترة الفاتت دي كلها! ..سكتت مسافة وقالت لي اتخيلي بتتوحم بيك!! ..قلت ليها أحسن تتوحم بي أنا من الخايب بتاعها ..قالت لي الكلب بريد خناقو ، بس الجملة دي بتنطبق على مايا حالياً ..قلت ليها فعلاً ، كانت بتكرهني هسي م قادرة تتنفس من غيري ، غااايتو سبحان مغير الاحوال من حال إلى حال ..رزان قالت لي سبحان الله ، المهم أنا ح امشي واشوفكم بكرة إن شاء الله ..قلت ليها خير ي زولة ..رزان طلعت وخلتنا قاعدين في نفس قعدتنا دي لحدي م مايا نامت ، صحيتها و رقدتها في سريرها وبقيت أعاين ليها ، هسي ده شنو الورطت نفسها فيو ، لا بتقدر تتحملوا ولا بتقدر تتحمل مسؤوليته غاايتو ربنا يستر ....

أسوء جريمة قد ترتكبها الأنثى في حق نفسها ، هو أن تقع في حب أحد أشباه الرجال ..

يتبع ..