لأجلها

البارت الرابع

Omeera

مُذُ اللقاء اللا مُخطط بيننا ، وأنا ضحيّةُ وجهك الروحاني

اليوم التاني من الصباح عملت مع أمي حرب عالمية التالتة عشان أمشي السوق براي ..قالت لي يعني شنو لو مشيتوا سوا!! ..قلت ليها بتك مدلعة وم بتنفع معاي ، هسي تقعد تعمل لي حركات في السوق وأنا م ناقصة!! ..مجتبى كان قاعد في البمبر وبشرب في الشاي ، بعد اخد رشفة قال لي حركات شنو!! ..قلت ليو حركات أنت م بتعرفا! ..أمي قالت لي يعني مُصرة تمشي براك! ..قلت ليها ااي ..مجتبى قال ليها أمي خليا تمشي ، تعتل براها ..قلت ليو ااي بس ..وطلعت خليتهم ، اتلاقيت مع رزان في السوق ، سلمت عليها و اتونسنا وشالت معاي الأكياس للبيت ..دخلت سلمت على أمي و مجتبى و مشت ..أنا دخلت المطبخ وبديت شغل ، عملت الكيك والبسبوسة والفشار و خلية النحل والعصير ، وطلعت الكبابي الجديدة وم خليت شي ، حتى الشاي بأنواعو عملتو "شاي أحمر ، و سعادة ، و عرديب ، ونعناع" ..آخر شي قليت البُن وسحنتو و جهزتو خليتو ، بعد م فطرنا بشوية ، أمي نادت مايا عشان تجي تعمل القهوة ..وأنا واقفة في المطبخ بغسل العدة وبراقبا ..اتلفتت عاينت لي وقالت لي مالك أنتي بتعايني لي زي ده! ..قلت ليها عشان أنتي بقيتي م مضمونة ، لازم اراقبك م تقومي تقعي لي و تدخليني في سين وجيم مع العائلة الكريمة ..ضحكت وقالت لي اطمني للان م حاسة بأي شي ..قلت ليها والمخلوق بتاعك؟ ..قالت لي ممكن تنادي بأسم محترم!! ..قلت ليها أكتر من كده! ، مالو م مخلوق؟!! ..قالت لي قولي طفل ، جنين ، بيبي ، أي شي لكن م تشبكيني كائن ومخلوق لأنو بتنرفزيني والله!! ..قلت ليها م بقدر أقول واحد من الأسماء ديل ..قالت لي ليه إن شاء الله؟!! ..قلت ليها م عاارفة بس م بقدر ..قالت لي تمام ..وسكتنا ، هي عملت القهوة ومشت ودتها ، وأنا دخلت الغرفة ، م كملت دقيقتين جاتني جوة وهي مكتومة وم قادرة تتنفس ..قلت ليها كنت عاارفة!! كان قلبي حاسس من الصباح إنو في حاجة زي دي ح تحصل!! ، بخاخك وين!! ..قالت لي بصوت خافت م عاارفة ..قلت ليها عياانة ومهملة ..مشيت قلبت الدولاب وطلعت البخاخ الاحتياطي و اديتو ليها ، وفتحت المكيف وقعدتها قصادو ..وقلت ليها أحسن ..قالت لي لأ ، م قادرة اتنفس أنا ..هنا اتوترت لأنو دي أول مرة البخاخ م يدي مفعول ، فكرت شوية ومشيت المطبخ ، اخدت باقي الموية من السخان وسخنتها وختيت فيها نعناع وجبتو ليها عشان تشم البخار ، حتى شوية كده تنفسها اتصلح و رجعت طبيعية ، رقدت بتعب في رجليني ..وقالت لي كنت ح اروح فيها صاح؟ ..قلت ليها خوفتيني يااخ ، علييك الله شميتي البخور م تقولي لي! ..قالت لي والتيمان كمان ..قلت ليها أنتي عارفة حساسيتك الجديدة دي ، كان تجي راجعة تكلميني وأنا امشي اودي القهوة ماف شي بتاع تهور و مخاطرة ..قالت لي المرة الجاية ..قلت ليها هسي كيف أحسن؟ ..قالت لي أحسن ..قلت ليها تمام ، اخدي ليك غفوة مسافة أشوف الحجات ديل ..م ردت ، عاينت ليها لقيتا نايمة ..قمت خليتا ، بقيت ماشة وجاية مع ضيوف أمي ديل لحدي المغرب كده ، النسوان كلهم مشو بيوتهم إلا واحدة اسمها خالتو زهرة ، و دي بيتا أبعد بيت و أمي اصرت إنو أنا و مايا نقدمها ..قلت ليها طيب بمشي براي ..قالت لي لأ ، أنا شايفاك الايامات دي ، قايمة لي بجن جديد ، أي شي براي براي براي ، ماف حاجة اسمها براي تمشوا سوا بس!! ..مايا قالت ليها ي أمي أنا تعباانة ياخ م بقدر ..قالت ليها تعبانة عملتي شنو من الصباح نايمة ، اطلعي برة شوفي الدنيا دي ماشة ويين ..هنا المرا ادخلت وي ريتها م ادخلت ..قالت لأمي خليهم بمشي براي ..بس هنا أمي حلفت ستين يمين إنو نمشي معاها ، دخلنا جوة لبسنا عبايتنا ، واخدت بخاخ مايا لأني عارفة إنو ما ح تقدر تستحمل ..طلعنا وأنا ماسكة يدها وماشين وكل شوية تقيف ، لحدي م وصلنا نص المسافة قامت قعدت في المصطبة ..وقالت لي وهي بتاخد انفاسها بالعافية لأ ، أنا م بقدر أمشي أكتر من كده! ..قلت ليها قومي شوية قربنا ..قالت لي وهي بتقطع في الكلام لأ ، أنا م قادرة عدييل ..م ضغطت عليها لأنو فعلاً مشت كتير والمسافة بعيدة ، قعدت جنبها وختيت راسا في كتفي ..خالتو مشت بعيد حتى انتبهت إنو نحنا م وراهاا ..وقفت وقالت لينا مالكم وقفتو! ..قلت ليها مايا لوت رجلها وم قادرة تمشي ..قالت لي خلااص ارجعوا البيت أنا زاتي وصلت خلاص ، تسلمو ..قلت ليها طيب الله يسلمك ..ومشت ، بقت المشكلة في الرجعة ، مايا قالت عدييل م متحركة من مكانا ده ، هي اصلا مدلعة وجا موضوع الحمل ده خربا زيادة ، قعدت وبقيت اتلفت لحدي م جات ركشة وقفت جنبنا ، عاينت لقيتو مُهاب أخو مازن الصغير ..قال لي مرت اخووي اخباارك ..قلت ليو علييك الله شيل مكرفون و زعني في الحلة بتكورك كده مالك! ..ضحك وقال لي مالك م مرت اخوي ..قلت ليو مرتو لكن ماف داعي الحلة كلها تعرف! ..قال لي انسي ، هسي مالك قاعدة هنا ، و دي مالا م بتتكلم ..قلت ليو لوت رجلها وأنت عارف مايا و دلعها ..قال لي ااي والله ، طيب اركبو خليني اوصلكم ..طوالي قمت وقفت ، أصلا لو م قال كنت ح اركب برضو و مازن يدفع 😂..سندت مايا و ركبتها وصلنا للبيت ، شكرتو و دخلنا جوة ..امي قالت لي سامعة صوت ركشة ، جيتو بركشة ولا شنو؟! ..قلت ليها ااي لأنو بتك لوت رجلها وقعدت تتبكى لي في الشارع إلا مُهاب جابنا ..قالت لي اهاا ..واتلفتت عليها و قالت ليها شيلي البرهم حقي امسحي رجلك عشان م تورم ..مايا هزت راسا وم اتكلمت ..دخلنا الغرفة هي صلت و طوالي نامت ، وأنا اتونست مع مازن في الشبكة للساعة 9 كده ونمت ..بليل سمعت صوت شهقاتها البقت م غريبة علي ، لأنو فترة الأربعة شهور الفاتو ديل كلها كنت بسمعها ..فتحت عيني الواحدة وقلت ليها مالك المرة دي! ..قالت لي رجليني بوجعوني! ..قلت ليها مالم؟ ..قالت لي واجعني شديد تعالي شوفيهم ..قمت وأنا بتثاءب ومشيت شوفت رجليها لقيتم فعلاً وارمين وشديد كمان ..قلت ليها بسم الله ده شنو!! ..قالت لي م عاارفة و ضهري زاتو واجعني ..و زادت في البكا ..قلت ليها طيب اصبري اجيب برهم أمي ..مشيت براحة جبتو وجيت ، وعملت ليها مسج ل رجلينا وعملت ليها مساج ل ضهرها ، وبقيت شغاالة كده للصباح نمت؟!! وقسماً بالله ، لأ للصباح هي بتبكي وأنا خايفة يجو يشوفو حالتا دي ويعملوا لينا كاارثة في البيت ..بس المهم قبل م ناس البيت يصحوا بساعة كده هي نامت ، وأنا اصلاا شغالة يوم السبت فقمت لبست ومشيت الشغل ..زي الضهر كده اتصلت ليها واطمنت إنو ماف زول عرف حاجة وكملت دوامي و رجعت البيت ..عد شهر و زيادة و مايا انتهت من الإمتحانات ونتيجتها طلعت حلوة و ده الشي الخلا ناس البيت يوافقو على طلبنا إنو نقضي الاجازة في الخرطوم الرياض وكنا ماشين بكرة ..مشيت ل مازن شارع النيل و اتونسنا و ودعتو وأثناء م نحنا راجعين في الطريق شوفنا مجموعة بتاعة كلااب ، براحة ادسيت ورا مازن وهو زاتو مشى بالجنبة بعييد منهم ..وقال لي هسي علييك الله اولادنا لمن يقولو ليك ماما مررينا من الكلب ده ح تودي وشك وين! ..قلت ليو ماما هينة ، المشكلة في بابا كبير بشنبو وبخاف من الكلاب! ..ضحك وقال لي إلا ننادي الجيران يمررونا نحنا و اولادنا 😂..قلت ليو كُر علينا 😂..قال لي ااي والله ، كُر علينا 😂..في اللحظة دي الكلب نبح ، مازن جرا خلاني لا إحساس لا ضمير ، بعد لحقتو فضلت انبز فيو لحدي م وصلت بيتنا وهو بس بضحك ، قلبو ميت خلاص 😂..بعد دخلت بشوية جاتني رزان ..دخلنا الغرفة وقعدنا أنا وهي و مايا في سرير واحد وبقيينا نتكلم ..رزان قالت لي أنتي متأكدة إنو عمتكم دي ما ح تفضحكم؟!! ..قلت ليها لأ م أظن هي زاتا زولة منفتحة زيادة عن اللزوم ، وبتحب مايا زيادة عن اللزوم لأنو سموها عليها وهي سمتها مايا ..قالت لي هي أرملة صاح! ..قلت ليها ااي ، راجلها اتوفى قبل كم سنة وعندها ولد واحد ومغترب ..مايا قالت ليها وساكنة في شقة براها لأنو م بتحب زول يدخل في طلعاتها ولا حتى اعمامي ..رزان قالت ليها هي شغالة؟! ..قلت ليها ااي شغالة استاذة في مدرسة خاصة ..قالت لينا لأ ، كان كده كوويس ..قلت ليها ااي لكن ح أشتاق ل أم درمان يااخ ..قالت لي و أم درمان زاتا ح تشتاق ليك ، بعد الموضوع ده ينتهي على خير رايك شنو نظبط طلعة مع بعض ..قلت ليها تمام ، اصلا محتاجة لحاجات زي دي لأنو الفترة دي كانت صعبة بكلو ..مايا قالت لينا أنا زاتي ح أمشي معاكم ..قلت ليها ااي تستاهلي والله ..وقعدنا نتونس كده لحدي م رزان مشت بيتهم ، وأنا جهزت شنطنا واليوم التاني ركبنا ترحال مشينا الرياض ..استقبلتنا عمتي من الباب ، ومن سلمت على مايا قالت ليها مالك أنتي عيانة؟ ..قلت ليها خلينا ندخل أول ي عمتي وبعداك ..دخلنا الشنط وقعدنا في الكنبة ..عمتي قالت لي اهاا في شنو!! حاسة في شي م يااهو!! ..قمت حكيت ليها بالتفصيل الممل بالحصل ..قالت ل مايا م اتوقعتها منك كنت قايلاك بت واعية أكتر من كده!! ..قالت ليها غلطة ي عمتي ..قالت ليها اصلا خلااص الفاات مات ، هسي قلتي لي أنتي في الكم؟! ..قلت ليها باقي ليها اسبوع وتدخل التاسع ..قالت لي انتو شكلكم مخططين من أول ..قلت ليها لأ ، لكن فكرنا إنو كده احسن ..قالت لي خلاص بعد تلد نكلم أمك و أبوك وهم يتصرفوا ..مايا قالت ليها تمام ..مر الأسبوع ومشينا المقابلة وعملت ليها الفحوصات ..بعد طلعت ومشينا للدكتورة ..قالت لي البيبي كوويس ، لكن م بقدر أقول نفس الشي عن بتك ..هي قايلاني امها ..قلت ليها ليه مالا!؟ ..قالت لي حوضها ضيق و رحما ضعيف و دمها بسيط وديل تلاتة حاجات خطيرين شديد ..قلت ليها كيف ده كله مع بعض ، أنا كنت حريصة على ادويتها واكلها فكيف حالتا اتدهورت كده!! ..قالت لي ي مدام بتك صغيرة لسه م ناضجة ، وعلى العليها حجمها أصغر يعني أنا أول لمن شوفتها اتخلعت وكنت قايلة عمرها 12!! لكن شكله وراثة عندكم! ..وعاينت لي من فوق ل تحت ..قلت ليها ااي ..قالت لي لمصلحتها أحسن تولد بعملية لأنو لو ولدت طبيعي ، ح تحصل ليها مضاعفات خطيرة ويمكن م تطلع منها! ..قلت ليها بصوت مبحوح كيف يعني م تطلع منها!! ..قالت لي فهمتي كلامي كوويس ، ممكن تخسر حياتها ..دموعي بقو جارين وعاينت ل مايا ، شوفتها قاعدة برة وشايلة تلفونا ..الدكتورة قالت لي أنا م كلمتها عشان م تتحبط ، خليها م عاارفة أحسن ..هزيت راسي ومسحت دموعي وقلت ليها تمام ..قالت لي م تبكي ، ربنا كريم وإن شاء الله ح تكون كوويسة بس انتو خليكم جاهزين لأي شي ..قلت ليها حاضر ..وطلعت مشيت سوقت مايا و رجعنا البيت ، الدكتورة زرعت فيني الشك والخوف ، كنت خايفة تحصل ليها حاجة في الولادة دي ، أساساً ده كله بسببي وأنا الاصريت على إنها تجيب الطفل ده ، يمكن لو كان اجهضتوا من أول كان أحسن و أأمن ليها ، إحساس الندم والخوف بقى ملازمني لمدة تلاتة أيام ، وفي كل ثانية تمر خوفي بزيد إنو تحصل ل مايا حاجة بسببي ، بقيت قاعدة على أعصابي ومنتظرة أسمع صرختها في أي لحظة ..في اليوم الخامس وبعد رقدنا زي الساعة 10 كده ، جات دقت لي باب الغرفة ..قلت ليها ادخلي ي مايا ..جات دخلت وقعدت جنبي في السرير ..قلت ليها مالك!؟ ..قالت لي م قادرة أنوم ..قلت ليها ليه؟ ..قالت لي بطني واجعاني ..قلت ليها نمشي المستشفى! ..قالت لي لأ بسيط زي حق أول امس ..قلت ليها طيب ..و بقيت قاعدة جنبها وأنا شايلة قلبي في يدي ، قريب تلاتة ساعات وهي قاعدة نفس قعدتها ، لحدي م لاحظت ليها بقت تشد على الملاية بيدينها ..قلت ليها مايا نمشي المستشفى! ..هزت راسا ب لأ و رقدت في كتفي ..جسمها بقى بارد زي التلج وفي نفس اللحظة معرقة لدرجة ملابسها كلها اتبلت ، شوية بقت تتململ وتتأفف ..قلت ليها مايا نمشي المستشفى! ..هزت راسا ب ااي ..قمت مشيت دقيت ل عمتي باب غرفتها ، فتحتو ..قلت ليها عمتي مايا بتتوجع خلينا نوديها المستشفى ..قالت لي كدي أشوف ..ومشينا الغرفة ، لقيت مايا ماسكة بطنها وبتبكي ، عمتي عاينت ليها من فوق ل تحت ..وقالت لي لسه ..قلت ليها كيف يعني لسه أنتي م شايفة حالتا!!؟ ..قالت لي وجع الولادة ده أنا دوقتو وبعرفو ، أختك دي لسه ، بكون الجنين بتحرك ولا حاجة بس لكن م ولادة ..وطلعت مشت ، عاينت ل مايا لقيت تنفسها بقى صعب ، جريت جبت ليها البخاخ و اديتو ليها ..قعدت جنبها ختت راسا في حضني وهي بتبكي ..بقيت امشي يدي على بطنها وقلت ليها م تخافي ي أنا ده وجع مؤقت شوية و بروح تمام ..م ردت ..بقيت أمشي على بطنها وأنا خايفة أكتر منها لكن م عايزاها تحس وتخاف زيادة ، بقيت م قادرة اطمنها وكلام الدكتورة م عايز يفارق راسي ..فجأة عاينت لي وقالت لي وهي بتتنهد ميرا! ..قلت ليها جنبك ..قالت لي أنا م حاسة نفسي ح اعيش! ..هنا حسيت جسمي اتشلا وقلبي وقف ورجع اشتغل ..قلت ليها ليه بتقولي كده! ..قالت لي الوجع م قادرة اتحملوا ي ميرا ، الألم م قعد يخف قعد يزيد وأنا م قادرة اتحملوا أكتر من كده! ..جسمي بقى يرجف و دموعي قدر م حاولت امسكهم م قدرت ..قلت ليها عايني لي ، أنتي ح تتحلي بالسلامة إن شاء الله و ترجعي معاي البيت تمام ..صرخت وقالت لي أنا م حاسة بكده! أنا م حاسة بكده!  ..وبقت تصرخ وقالت لي ميرا بطني ي ميرا!! بموت أنا بموت!! ..م عرفت أقول شنو بس بعاين ليها ومخي من الخلعة صدع ..قالت لي وهي بتصرخ ميرا بطني! ميرا بطني! أنا م عايزة أموت ي ميرا م عايزة أموت! ..قلت ليها اصبري هسي بجي ..فكيتها ومشيت دقيت ل عمتي وأنا سامعة صرخاتا من مكاني ده ..عمتي فتحت الباب ببرود وقالت لي ايوة .. قلت ليها عمتي اررح ناخد مايا المستشفى هسي ..قالت لي أنا م قلت ليكم لسه مالكم مستعجلين! ..قلت ليها عمتي أنتي م سامعة صرخاتا دي ولا منتظراها تموت يعني!! ..قالت لي ميرا ، مايا صغيرة و مدلعة وجبانة وأنتي عارفة ، بدل م تصبريها تقومي تبكي معاها ، أختك كوويسة بس خاايفة!! ..ومنها هي بقت تناديني وقالت لي ميرا علييك الله تعالي أنا خايفة ، أنا م عايزة أموت براي ميرا علييك الله تعالي ..قلت ل عمتي انتي لو م عايزة توديها أنا بوديها ..و دخلت الغرفة شلت المفتاح ورجعت ل مايا ، لقيتا من الوجع م قادرة تتنفس ، لبستها أقرب عباية و اديتا البخاخ و حاولت اسندها عشان تقوم بقت تصرخ أكتر ، فكيتا ..قامت قالت بصوت خافت ميرا أنا م حاسة برجولي ..م عرفت أعمل شنو ، شوية كده اتذكرت الكرسي المتحرك حق راجل خالتي الله يرحمو ..جريت دخلت غرفة عمتي وفتشت الكرسي وطلعتو ، ومشيت قعدتها فيو ، كويس إنو شقتها في الطابق الارضي وإلا كنا اتورطنا جد جد ..سندتها و ركبتها العربية ومن الخوف نسيت السواقة ، نسيت بشغلوا العربية كيف كأنو م عندي رخصة ، والمشكلة إني ماخدة الرخصة من بدري ، وكمان مع صرخات مايا راسي جاط نهائي ونسيت أي شي ..شوية عمتي جات ، قمت زحيت ليها وساقت هي لحدي م وصلنا المستشفى وجابو النقالة ، و دخلوهاا .. أنا وعمتي بقيينا واقفين جنب الباب وبنسمع لصوت بكاها وصرخاتا وقلوبنا بتتقطع ..شوية كده الدكتورة جاتنا جارية وقالت لينا البت دي وضعها خطير ، أكيد دكتورتها كلمتكم ، انتوا ليه أتاخرتو كده هسي البت دي لو ماتت الح يتحمل المسؤؤلية منو!! ..حمرت ل عمتي ، نزلت راسا و دموعا جارين ..رجعت عاينت للدكتورة وقلت ليها نحنا آسفين أنتي بس حاولي انقذيها!! ..قالت لي عاايني هسي ماف زمن ، هاكم دي ورقة مكتوب فيها الحاجات المحتاجين ليها كلها ، العملية القيصرية دي لاازم تتعمل هسي ، ومحتاجين دم شوفو متبرعين ..قلت ليها أنا بتبرع! ..قالت لي تمام ، وينا شنطة البيبي؟ ..نحنا اصلا الطفل ده ولا متذكرينو ولا خاتين ليو إعتبار بس حاجة منتظرنها تطلع من جسم اختي وخلاص ..عمتي قالت ليها نسيناها ..قالت ليها طيب امشي جيبيهم من الصيدلية سرعة لأنو محتاجين ليهم!! ..قلت ليها دكتورة اختي ح تقوم بالسلامة صاح! ..قالت لي م بقدر أأكد ليكِ ، انتو بس كترو من الدعوات ..و رجعت جوة ، أنا مشيت مع عمتي اشترت حاجات البيبي ، لكن حاجات العملية اغلبيتهم م لقيناهم عشان كده عمتي ركبت العربية ومشت تفتش صيدليات تانية .. أنا وديت حاجات البيبي للدكتورة لقيتا واقفة قدام غرفة العمليات الفيها مايا ..قالت لي وينهم حاجات العملية!! ..قلت ليها عمتي جايباهم ..سمعت صرخات مايا بتزيد وبتنادي ل أمي ..ومنها جات الممرضة طالعة من الغرفة وقالت ليها ي دكتورة المريضة كسر فيها نزيف ..الدكتورة عاينت لي وقالت لي اتحركي امشي اتبرعي سرعة نحنا محتاجين للدم ده هسي يااخ!!! ..الممرضة مسكتني من يدي جرتني ودتني الغرفة ، ومع إني بخاف من الحقن وبعمل درامات في كل مرة بنطعن فيها ، المرة دي م كنت حاسة بيها اصلا ، كان بالي كله مع مايا وشغالة ادعي واستغفر لحدي م غفيت ..صحيت مخلووعة ولقيت جنبي في عصير ، يااخ مايا!! ..قمت جارية طلعت ، لمن قربت على غرفة العمليات بقيت م سامعة صوت اختي بيناتهم ، رجليني بقو م شايلني وجاراهم في الأرض جر ..مشيت وقفت قدام الغرفة ، وأنا بحاول اواسي في نفسي ، إنو يمكن بعملو ليها في العملية عشان كده سكتت ..شوية جات عمتي وقفت وهي شايلة الحاجات ..قلت ليها أنتي كنتي وين! ..قالت لي في إبرة م لقيتا وفتشت الصيدليات كلها حتى لقيتا في صيدلية بعييدة من هنا ..طيب إذا عمتي ياداب جات ، ليه م سامعة صوت مايا! ..شوية الممرضة جات طالعة ..مسكتها وقلت ليها اختي كيف؟ ..قالت لي البقاء لله ، بقت في حق الله ..هنا انهرت وقعدت في الأرض ، وعمتي رمت الحاجات وبقت تبكي وتصرخ ..وأنا م قادرة أبكي حاسة الدموع واقفة في نص حلقي وم راضية تطلع ، نفسي كتم وبقيت بس أعاين لا سامعة لا شايفة! ، ده كله بسببي أنا ضغطت عليها وخليتها تتحمل فوق طاقتها ، وهسي ماتت! طيب أنا أقول لأمي وأبوي شنو!! كيف اخلعهم كده! ، أنا كيف ح اقدر اعيش مع ذنب زي ده! أنا قتلت أختي! ..شوية جات الدكتورة الاول لقيناها ..قالت لي انتو لسه هنا!! ..م رديت ليها ولا عاينت ليها اصلا ..عمتي قالت ليها جثمان بتنا وينو؟!! ..قالت ليها جثمان؟!! ، شكلو في لخبطة حاصلة بتكم كويسة وم عندها عوجة ..رفعت راسي وقلت ليها كويسة؟!! ..قالت لي مايا محمد ، مش بتكم!!؟ ، القاصرة الجبتوها دي! ..قلت ليها بسرعة ااي يااها ..قالت لي وديناها الغرفة العادية ..عمتي قالت ليها عملتو العملية يعني؟ ..قالت ليها لأ ، ولدت قبل م نعملها ، وحالياً حالتها مستقرة ..يااداب هنا دموعو جرو و بكيت بحرقة ، وبقيت م قادرة أقوم ..عمتي جات ضمتني وقالت لي حمدلله على سلامتها ..الدكتورة ابتسمت لينا وقالت اررح اوديكم ليها ..عمتي سندتني ومشينا الغرفة ، لقيناها راقدة وبتعاين للفراغ ، مشيت حضنتها ..وقلت ليها حمدلله على السلامة ي أنا ..قالت لي بصوت خافت الله يسلمك ..قلت ليها هسي كيف؟ ..قالت لي م تسأليني نهاائي ، أنا م حاسة بجسمي عدييل ..ضحكت وقلت ليها أهم شي إنك بخير ..قالت لي ياداب بقيت بخير بعد اتخلصت من الهم ده ..ضحكت وقمت خليت عمتي قعدت حمدلت ليها السلامة وبقت تتكلم معاها ..في اللحظة دي جات الممرضة داخلة شايلة البيبي ، أنا نسيتو عدييل ونسيت موضوعو ..جات قالت لي حمدلله على السلامة ..و مدتو لي ..قلت ليها أنا م بعرف اشيل أطفال ..قالت لي سهلة ..وختت لي يدي الواحدة تحت راسو والتانية في ضهرو ..وقالت لي مبروك عليكم البنوتة وتتربى في عزكم ..اخدتها منها وأنا برجف وقلبي بدق بسرعة غريبة ، كانت لينة وناعمة وبيضا زي ندفة التلج ، حسيت إني لو ضغطت عليها شوية زيادة ح تتكسر ، عشان كده كنت ماسكاها بمنتهى الرقة و الهدوء ♡..اتثاءبت واتمططت في يدي بطريقة مضحكة و رجعت نامت ، في اللحظة اتولدت جواي كمية بتاعة مشاعر ، نفس الإحساس الكان حسيت بيو قبل فترة ، يمكن شفقة أو حنية م متأكدة ، لكن الشي المتأكدة منو إني اتعلقت بالطفلة دي بطريقة غريبة وإني م عشت لحظة جميلة و لطيفة زي اللحظة دي ♡....

وجهكِ الطفولي يشبهُ لطفَ الكون وأنا أحبُّ ألطافَ الله الخفيّه ♡

يتبع