لأجلها

البارت الثالث عشر

Omeera

لا زلت أؤمـنُ أن للحياة جهةً أخرى جميلة لم نذهب إليها بعد ، ويوجدُ الكثير من الفرص لم يحن وقت انتهازها

*_"بعد 15 يوم"_*

خلال ال 15 يوم دي قدرت اسدد ديوني ل فريال و عُمر و ادي جزو ل خالتو ، وأهم شي بديت أأثث بيتي "أأثث بمعنى أجيب أثاث" ..والاحلى إنو جنب الظلط الشغالة فيو في مركز بيع مخفض ، و ده الشي الوفر لي قروشي ، اشتريت منو ملابس ومستلزمات ل تاليا و اشتريت عِدة للمطبخ و دخلت صندوق مع نسوان الحي بتاعهم عشان أشتري مكيف وتلاجة وكده ، يعني شوية شوية بديت أستقر و وضعي اتصلح ..المهم قاعدة مع فريال في حوش بيتهم وبنقطع في الخدار عشان زي الساعة 3 صباحاً أقوم اطبخ طوالي زي كل يوم يعني ، شوية الباب دقة ..فريال قامت فتحت لقيناها خالتو حليمة أم أسامة ..سلمت علينا وقعدت ..وقالت لي أنتي بتعرفي تطبخي صاح؟ ..قلت ليها ايوة ..قالت لي أنتي عارفة إنو بكرة عرس أسامة ولدي ..قلت ليها ااي ..قالت لي بصراحة ي بتي الطباخة الاتفقنا معاها عيانة وم قدرت تجي ، والباقين قالو م فاضيين ف دايرنك أنتي تجي وتطبخي أكل المناسبة ..عدلت قعدتي وقلت ليها لكن ي خالتي أنا م حصل طبخت كمية كبيرة كده ..قالت لي أسامة و أحمد الاتنين قالو لي إنو أكلك طاعم وسمح وبتعرفي تطبخي ، وم تعايني للكمية اطبخي زي م بتعرفي بس ..قلت ليها ي خالتي أنا م حصل طبخت ل مناسبة وخايفة اطبخ ويطلع م سمح ..قالت لي أنتي اتفاءلي وإن شاء الله بطلع سمح ..اتنهدت وبقيت أفكر م عارفة أوافق ولا لأ ، عاينت ل فريال ..قالت لي جربي م خسرانة شي ..قلت ليها طيب ..قامت وقفت وقالت لي طيب قومي ارح ..قلت ليها هسي؟! ..قالت لي ااي ، عشان اوريك تطبخي شنو والأكلة الم بتعرفيها اوريك طريقتا ..قلت ل فريال ارح ..قالت لي و جدي؟ و الغدا؟ ..قلت ليها اصلا أنا عملتو جاهز خلي عُمر يختو بس ..قالت لي طيب ..قمنا لبسنا عبايتنا وأنا شلت تاليا وهي شالت الشنطة وطلعنا ، لقينا عُمر قاعد قدام الدكان لمن شافنا ..قال لينا ماشين وين؟ ..فريال مشت ليو واتكلمت معاه ، هز راسو ..وقال ليها تمام ..حتى جات ومشينا ، طبعا معروف إنو بيت ناس أسامة م بعيد ، وبسبب الناس والزحمة قعدونا في بيت الجيران ، عندهم عريشة كبييرة رصو لي فيها العدة و سريرين وكرسيين ..قلت ل خالتو حليمة وينهم الحاجات؟ ..قالت لي النسوان بنضفو وبقطعو ليك في الخدار ، و بعد يخلصو بجيبو ليك هنا وأما البهارات ف هديل جنبك ..هزيت راسي وسكت ..قالت لي طيب دايرنك تكتري من السلطات بكل انواعا ، بتعرفيها؟ ..هزيت راسي ..قالت لي طيب ، وعصيدة وشعرية و فول للفطور ، والغدا سلطات وضلع ومُلاحات على كيفك ..هزيت راسي ..قالت لي طيب بس كده ، أنا ح أجيب كم مرا يشتغلو معاك ..قلت ليها طيب .. ومشت ، قعدت في السرير جنب فريال وقلت ليها حاسة إني م كان لازم أوافق ..قالت لي اتفاءلي ، أنتي ما شاء الله طباخة شااطرة وأنا متأكدة ح تعملي ليهم أكل ياكلو اصابعهم وراه ..قلت ليها إن شاء الله ..قعدنا اتونسنا مسافة لحدي بعد المغرب ، حتى النسوان جابو الحدار و جو ، بدو يطبخو معاي ، لكن بصراحة ماف شي عجبني من طبخيهم وأي واحدة عاملة فيها ولا شيف "منال العالم" و ده الشي الرفع كثافتي للآخر ..وقفت وقلت ليهم عاينو! أنا م بعرف كده! انتو امشوا وأنا بطبخ براي ..المرا الواحدة قالت لي دايرة تخجلينا قدام الضيوف ولا شنو! ..هنا فهمت إنها من أهل أسامة ..قلت ليها أنا م بعرف اطبخ كده ، ي أما تطبخو كله براكم ي أما اطبخو كله براي ، مع بعض م بنقدر! ..المرا التانية قالت ليها خليا هيي تفضح روحا نحنا مالنا ..وقامت مشت والباقيات لحقوهاا ..فريال جات وقفت جنبي وقالت لي اهاا اعمل ليك شنو؟ ..قلت ليها أمشي قولي ليهم عايزة اتنين سيرمس قهوة وكباية واحدة ..مسافة تجي جدعت طرحتي وعبايتي وبقيت أعاين للحِلل المرصوصين قدامي في النار ، شوية فريال جات ختت السيرمس ..قالت لي اهاا؟ ..قلت ليها اقعدي في السرير داك وامسكي تاليا وخلي الأكل علي ..قالت لي ده كله تعملي براك!؟ ..قلت ليها ااي ، عنادًا للمرا القالت لي ح تفضحينا ، الليلة أعمل ليها أكل اخليها بسببو تجي تبوس يدي وش وقفا ، تصبر لي! ..فريال مشت قعدت وشالت تاليا بقت تلعب معاها وأنا بديت شغل ، انزل حلة و أرفع حلة ، و ازيد ل ده ملح و ل ده بهارات و ادوق ده واخلي ده ، واعلى و اوطي في النار ساي ، بعد كم ساعة لمن اتلفت وراي ، لقيت فريال حاضنة تاليا ونايمين وأنا زاتي نعست ، مشيت صليت العشا وغسلت وشي ب موية باردة وجبت سيرمس القهوة ختيتو جنبي واشيل و اشرب لحدي م كملتو ، واستلمت التاني طوالي وأنا مواصلة ..م انتهيت إلا زي الساعة 6 صباحاً ومن الفرحة م حسيت بنعاس زاتو ، كنت فخورة بنفسي لأني عملتها براي ، كنت شوية متوترة لأنو الناس اذواق واحتمال م يعجبهم لكن الشي الطمني ، إني عملت كل البقدر عليو وبعد ده الباقي على ربنا ..لمن قعدت في الكرسي حسيت زي الكأني م قعدت من 100 سنة شدة م تعبانة ..شوية خالتي حليمة جات ، جابت الشاي والحاجات ..وقالت لي اهاا خلصتي؟ ..قلت ليها ااي ..قالت لي اجيب ناس يغرفو الأكل ولا.. ..قاطعتها بسرعة وقلت ليها لأ ، تاني ماف مرا تعتب هنا! ، بس بعدين نادي لي بنات يجهزو الصواني و كلمي الأولاد يجو يشيلو ..قالت لي تمام ..وطلعت ، زي الساعة 10 البنات جو جهزو الصواني وأنا رتبت الصحانة بنفسي واتأكدت من التقديم ، حتى نادو الأولاد جو وزعوهم ، والغدا نفس الشي ، والناس شغالين زيادات ، زيادات لحدي م خلص الأكل ، طوالي قمت اتنفضت ولبست عبايتي وشلت بتي وسوقت فريال وطلعنا ..مشينا بيتي غيرت ملابسي وصليت العصر واتخمدت في السرير ، ياداب حسيت بالتعب وجسمي كله بوجعني ومصدعة بسبب القهوة الكتيرة دي ..غايتو م فضل لي إلا أبكي من وجع الجسم ..بعد المغرب بشوية ..فريال قالت لي قومي ارح بيتنا ..قلت ليها م قادرة أمشي أي مكان ، شدة م تعبانة بحنس في نفسي عشان أقوم اصلي المغرب ..قالت لي حقك ، أنتي صحي أمس نومتي الساعة كم؟ ..قلت ليها لو نمت بتكون دي حالتي!؟ ..تاليا بقت مادة ليها يدينها وشغالة لي ماما ، ماما ..قلت ليها هيي ، ماما م فيها أي حيل خليك قاعدة مع فريال دي ..فريال ضحكت وقالت لي صحي تعبانة ، الليلة بتك م عايزاهاا ..قلت ليها و ربي بتكلم معاك بالغصب اصلا ، لساني زاتو واجعني ..بقت تضحك فيني ، شوية الباب دقة قامت مشت فتحتو ..وجات داخلة معاها خالتو حليمة و المرا الحقارة ديك ، طبعا استغربو لأنو الغرفة كلها م فيها غير سرير واحد بس ياهو الجابو لي عُمر ومكيف ومروحة سقف وخلاص .. أنا لمن شوفتهم قمت وفضلتهم ، وفرشت المصلاية حقتي وقعدت في الأرض و فريال مشت تجيب ليهم موية ..خالتو حليمة قالت لي ي بتي مالك مشيتي قبل م تشيلي قروشك؟! ..م رديت ، اصلا م فكرت في الموضوع ده ..قالت لي اهاا كم؟ ..قلت ليها والله ي خالتي البتجيبي كله كويس ، ولو م اديتيني زاتو م مشكلة لأنو أسامة زي أخوي الكبير وهو زاتو م قصر معاي ..قالت لي لا لا والله ، ولدي بختو ب أخت زيك رفعتي ليو راسو قدام الناس ، الليلة العرس كله م فيو غير سيرتك أنتي و أكلك ..ابتسمت وعاينت ل قريبتهم دي و لويت ليها خشمي ..رجعت عاينت ل خالتو وقلت ليها يعني عجبهم!؟ ..قالت لي شديد وهسي كم مرا بتسألني و دايرين رقم تلفونك عشان يتفقوا معاك ..قلت ليها م عندي تلفون حالياً ، العايزاني خلي تجي البيت ..المرا قالت لي شِن البيت هو سرير م فيو! ..قلت ليها S what  يعني بكرة اشتري بدل السرير عشرة ، بغلبني يعني؟! ..خالتو حليمة قالت للمرا اسكتي مالك ومالا! ..قالت ليها البت رافعة نخرتها في السما مع إنو شي م عندها ..قلت ليها وم ارفعها حارقك شنو أنتي؟! ، لو م عاجبك بيتي هدااك الباب بتعرفي ولا اوصفو ليك! ..ومنها فريال جات شايلة تاليا وشايلة الموية ، لقت المرا طالعة ونافخة وشها ، جات ادت ل خالتو حليمة الموية وقعدت جنبها ..خالتو حليمة مدت لي القروش وقالت لي دي 450 ألف ، حاجة بسيطة بس ..أنا وفريال الاتنين عاينا لبعض و رجعنا عاينا ليها ، م كنت قايلة إنو طباخين المناسبات بياخدو قروش كتيرة كده ، تراهم غنيانين! ..اخدت القروش وقلت ليها شكراً ..قالت لي بالعكس شكراً ليك ، رفعتي لي راسي و راس ولدي قدام الناس ، ربنا يفتحها عليك ويديك لحدي م يرضيك وأكتر .. طبعاً بحب دعوات الناس شديد ، بالذات لمن يدعو لي بحاجة حلوة ، بحس نفسي مرتاحة من جوة وانو ربنا راضي علي ♡..ابتسمت وقلت ليها آمين يارب جمعا ..قالت لي معلييش على كلام عمتي ، امسحيها لي في وشي ..قلت ليها لا لا ي خالتو م مشكلة ، خلاص ..قالت لي طيب ، أقوم أمشي أنا ..قلت ليها طيب ، و مبرووك ل أسامة كمان إن شاء الله بيت مال وعيال ♡..قالت لي آمين وعقبالكم ..فريال قالت ليها آمين وأنا سكت ، لأنو خلاص العرس طلع من بالي ، بعد الشوفتو مع مهند والألم الحسيت بيو بعد خليت مازن ، م أظن افكر اعرس أي إنسان تاني ..بعد خالتو مشت ، فريال جات واقعة فيني وحضنتني وقالت لي تعزميني لااااازم ..زحيت منها و اديتا ال 50 ألف ..وقلت ليها أمشي اعزمي نفسك ، أنا أول شي لازم اعمّر البيت ده ..قالت لي طيب ، ح تشتري شنو؟ ..قلت ليها أول شي ، مكيف عشان ارجع ل عُمر مكيفو ..قالت لي طيب ، بكرة إن شاء الله نمشي السوق نجيبو ونجي ..قلت ليها تمام ..شوية جا عُمر داخل قال لي الليلة الأكل تمام ماف كلاام ، شغال أقول للناس إنو ديل اخواتي عملو زول صدقني ماف ..فريال قالت ليو ليه قال! ..قال ليها قالو انتو صغار و ده أكل زول طبّاخ ، شييف عديل ..قلت ليو خليهم بطريقتهم ..فريال قالت ليو نحنا بقينا فيمص يااخ وهسي ميرا دي حاجزنها بالدور ..قال لي ما شاء الله والله ، عبرتي وانتصرتي ..رقدت وقلت ليو اممم ..قال لي هو شنو ال امممم ، م عاجبك يعني! ..قلت ليو م قادرة أفكر ، كل الحاسة بيو هسي إني نعسانة وتعبانة عايزة أنوم ، قومو خارجوني ..فريال قالت لي طاردانا عدييل ..هزيت ليها راسي وم اتكلمت ..عُمر قال ل فريال طيب قومي ارح خلي البت تنوم ..قالت ليو طيب ..وشالت تاليا وطلعو ، قعدت دقيقتين قمت صليت ولحقتهم ، مستحيل ابيت في البيت الفاضي دي براي! ..اليوم التاني مشينا السوق جبنا المكيف ، و عُمر جاب الكهربائي ركبو لينا وبعد شغلو ب دقايق بس الجو بقى بارد و رهييب ..عُمر قال كده أفهم إنو استغنيتو عن مكيفي ..فريال قالت ليو ااي خلااص ، لقينا حقنا 😂..قال ليها لا لا زطط ، تتهنوا ..قلت ليو اصلا متهنين ولا علينا 😂..عمل فيها زعلان وشال مكيفو وطلع ، أنا و فريال رقدنا في السرير وختينا تاليا في النص ..قالت لي اهاا ح تخلي الشغل؟ ..قلت ليها ياتو شغل؟ ..قالت لي حق الأكل ..قلت ليها لأ ..قالت لي م خلاص بقيتي شيف مناسبات ، عايزة بمحل الأكل شنو؟ ..قلت ليها ده شغلي الأول عايزة اواصل فيو ، وأيام الجمعة والاربع مناسبات ..قالت لي كده م ضغطي على نفسك شوية؟ ..قلت ليها م مشكلة بقدر اجازفا ، أنتي عارفة كدي قومي نادي لي عُمر ده! ..قالت لي لشنو؟ ..قلت ليها جاتني فكرة في راسي وإن شاء الله تنجح ..قالت لي فكرة شنو! ..قلت ليها أمشي نادي عُمر أول! ..قامت مشت نادتو وجو مع بعض ..عُمر قعد في السرير وقال لي اهاا مالك؟ ..قلت ليو ارح نعمل مطعم! ..قال لي مطعم؟ ..قلت ليو ااي مطعم ، أنا بطبخ و فريال الحسابات وأنت الويتر ..قال لي اشمعنى أنا الويتر! ..فريال قالت ليو عشان أنا قارية محاسبة و ده تخصصي ..قال لي ابيت م راضي أنا ..قلت ليو ح اخليك تصمم المطعم على كيفك ..عاين لي مسافة وقال لي جد؟!! ..قلت ليو على كيفك ي عُمر الفي راسك كله مفذو في الواقع ..ابتسم وقال لي وافقت ..قلت ليو طيب لازم نكثف شغلنا ونشتري لينا قطعة أرض عشان نبنيها ..قال لي أنا عندي صحبي سمساري ، ح يشوف لينا واحدة ..قلت ليو تمام ، بعد ده لو لقيتو جنيه لمو عشان نشتري الأرض ..قالو لي تمام ..م عارفة ليه ، لكن كنت متفاءلة بالفكرة دي وحاسة إنها ح تنجح وإن شاء الله تنجح ..بعد كم يوم كده ، جات مرا قالت عايزاني اطبخ لعرس بتها في حي تاني ، بعيد شوية من هنا ..كلمت عُمر و عمي بابكر وسوقت فريال ومشينا ، وك العادة فريال بس عليها تمسك تاليا ، أما الطبيخ ف ده مسؤليتي أنا لأني م بحب زول يشاركني في الطبخ ، اليوم التاني خلصنا و اخدنا قروشنا و رجعنا البيت ..و استمر الحال كده ، كل جُمعة عندي عرس ، يعني كل خميس أنا بايتة برة ، وفي نفس الوقت كنت لسه مواصلة في شغل الأكل ، وقلة أدب مني ساي رجعت لمشروع الطعمية بالعصر ، لكن المرة دي كنت مقتنعة و رضيانة ، و شوية شوية الناس عرفوني وبقو يجو يشترو مني ، وبقيت معروفة عند ناس الحي باعتباري الطباخة حقتهم ، لو قلت إني في يوم من الايام اتخيلت إني أصل هنا أبقى كذابة ، لكن بعترف إني حبيت الحياة هنا وحبيت مهنتي الجديدة وشغفي الجديد ♡...