لأجلها

البارت الثاني و الثلاثون

Omeera

ستقتلُني مزاجيتي يوماً ما ، سأقع يوماً وأنا أتأرجح بينَ التّعاسة والسّعادة ، بين الاكتراث واللّامُبالاة ، الشُّعور واللّاشُعور ، سأتلاشى في المُنتصف الباهِت!

اليوم التاني قضينا اليوم كله في البيت مع الضيوف ، تجهيزات لبكرة و كده لأنو بكرة عرس سحر ، بعد خلصنا و أي شي ، اليوم التاني من الصباح مشينا سيرة ، لكن أنا م قعدت معاهم كتير ، بس باركت لأم العروس و طلعت مع تاليا رجعنا البيت لأني مصدعة ..دخلت غرفتي كده تلفوني رنة ، اخدتو و عاينت لقيتا رزان ..قلت ليها الو؟ ..قالت لي ميرا أنتي في البيت ..قلت ليها أيوة ..قالت لي طيب جاياك ..قلت ليها تمام ..قفلت الخط و قمت عملت القهوة و المكسرات وقعدت ..شوية كده الجرس رنة ، تاليا مشت فتحتو و جو داخلين سوا ..رزان سلمت علي و قعدت و تاليا دخلت غرفتها و قفلت الباب ..رزان قالت لي اهاا بقيتي كيف؟ ..لمست الشاش الفي راسي وقلت ليها أحسن بس مصدعة ..قالت لي والله ي أنتي أنا لمن شوفت الضربة الضربتك ليها العربية كنت قايلاك موتي! ..قلت ليها أنا زاتي اتخلعت وم فهمت أي شي ولا عارفة الضربني شنو ، بس حسيت بحاجة نفضتني و رمتني في الظلط .. أخدت قهوتها من الطربيزة و قالت لي الله ستر ، لو كان موتي ، مازن عذاب ضمير ساي كان لحقك ..قلت ليها مازن؟! ..قالت لي ااي م هو الضربك! ..عدلت قعدتي وقلت ليها مازن هو الضربني؟! ..اخدت رشفة من القهوة و هزت راسا وقالت لي ااي ..قلت ليها طيب ليه م كلمتيني! ..قالت لي قايلاك عارفة! ..قلت ليها برري م عارفة! ، م اتوقعت يكون هو! ..قالت لي هو زاتو ، و أظن هو اتخلع أكتر من خلعتي ..سكتت و نزلت عيوني بقيت أفكر ، لو جينا للجد مازن م عندو دخل في الحادث ، مايا هي الدفرتني قدام العربية وأنا ظهرت فجأة قدامو ، عشان كده م بقدر ألومو في حاجة ..رزان قالت لي أنتي عارفة! ، أنا للان مستغربة كيف طلعتي من الحادث سليمة؟ ..عاينت ليها وقلت ليها ربنا عوضني بالعافية في البدن و م عايزة أقول حاجة غير الحمدلله عدت على خير ..قالت لي الحمدلله فعلاً ..قلت ليها صحي حمودي بقى كيف ، و مالك م جبتي هو و وعد معاك؟ ..قالت لي كوويس الحمدلله ، طبعاً متأثرين بالحادث لكن هسي أحسن ..قلت ليها تاليا برضو ملاحظة ليها متغيرة شوية ، و بتتخلع بالليل ..قالت لي ااي بكون اتخلعو بس يومين و برجعوا تمام ..قلت ليها إن شاء الله ، هسي خليتيهم مع منو؟ ..قالت لي أبوهم قاعد ، خليتهم معاه ..قلت ليها اممم ..و سكت ، رجعت أشرب قهوتي ..لاحظت ل سكوتي وقالت لي مالك؟ ..قلت ليها رايك شنو في مازن ك أب ل تاليا؟ ..قبل م تتكلم جاني صوت تاليا قالت لي م عايزة!! ..اتلفت لقيتا واقفة ..قلت ليها أنا م قلت ليك م تتصنتي! ..جات وقفت قدامي وقالت لي أنا م اتصنت أنا كنت ماشة أشرب موية!!! ..قلت ليها أمشي غرفتك!! ..قالت لي م ماشة ، أنتي ليه عايزة الراجل ده يقعد معانا!! هو الضربك بالعربية!! ..قلت ليها لأ ، م هو! ..قالت لي لأ هو!! ، هو بكرهك و بكرهني هو عايز يقتلك بس!! ..ختيت الكباية وقلت ليها بهدوء تاليا أمشي غرفتك وبنتفاهم بعدين تمام؟ ..قالت لي لأ م بنتفاهم ، الراجل ده م بدخل بيتنا!! ..قمت وقفت و قلت ليها تاليا أنا بفكر في مصلحتك! ..قالت لي أنتي م بتفكري في مصلحتي ، أنتي عايزة تعرسي لأنك بتحبيو!! ..في اللحظة دي م عارفة كيف رفعت يدي و ضربتها كف خلاها تفقد توازنها ..رزان جات مسكتني و قالت لي ميرا دي طفلة خليها ..قلت ليها تاليا!! ، اوعك تتجاوزي حدودك معاي! ..ختت يدها في خدها و بقت تبكي بحرقة وقالت لي أنتي ضربتيني!! ، تضربيني ليه!! ، أنا م عملت ليك حاجة عشان تضربيني!! ، أنتي م أمي زاتو تضربيني ليه!! ..قلت ليها أنا م أمك!! ..قالت لي ااي انتي م أمي!! ، أنا أمي مايا و هي أحسن منك لأنها م حصل ضربتني!! ..هنا انفعلت وقلت ليها مايا أحسن مني!!! ، هسي مايا بقت ليك أحسن مني!!! ، طيب قاعدة معااي لشنو! أمشي لأمك مايا ، أمشي خلي تحبك زيي!! ..قالت لي مااشة!! ..قلت ليها ااي أمشي!! ..قالت لي اصلاا ماشة!! ..و طلعت من الشقة و رزعت الباب وراها ، قعدت في الكنبة و مسكت راسي و جسمي كله برجف ..رزان قالت لي تقعدي شنو!! قومي ارح نلحقها! ..م رديت ليها و دموعي بقو جارين ، الخايفة منو حصل ، في النهاية تاليا اختارت مايا و م اختارتني ، هي زاتا مشت زي م كلهم مشوا ، معناها المشكلة فيني أنا م فيهم ، أنا السبب ، أكيد فيني حاجة لأنو كل مرة اتعلق في إنسان بمشي ، معناها المشكلة فيني أنا بس!! ، أنا م كويسة زي م متخيلة نفسي! ..في اللحظة دي سمعت اسمي بصوت عالي ، رفعت راسي مخلوعة لقيت رزان لسه واقفة ..قلت ليها رزان تاليا مشت و خلتني!! ..قالت لي ميرا دي شافعة وم فاهمة شي ، أنتي كيف تختي راسك مع راسا ، ده غير إنو هي م بتعرف الشوارع ، يعني لو ضاعت ح تفرحي؟!! ..هنا ياداب استوعبت الحصل و قمت وقفت بسرعة ..و قلت ليها لأ ، أنا لازم أرجع بتي! ..قالت لي طيب البسي سرعة ارح ..مشيت جريت عبايتي و لبستها وأنا ماشة ، رزان فتحت الباب عايزين نطلع ، لقيناها قاعدة في سلالم الباب ..وقفنا و بقينا نعاين ليها و هي اتلفتت عاينت لينا وعيونا مليانين دموع ..رزان قالت ليها حبيبتي تاليا ، تعالي خشي جوة ، عايني ماما خايفة عليك كيف؟ ..عاينت ليها و عاينت لي و قامت دخلت جوة ، ياداب قلبي قعد و زفرت بارتياح و مسحت دموعي ، دخلنا جوة ..و بعد قعدنا رزان قالت لي والله حكاية إنو كل مرة بتك تزعل تخلي البيت دي عوجة ..قلت ليها عندها شوية تهور و عناد زيي كده ..قالت لي عايني ، بيتكم كله كده ، أنا خايفة على أولادي يطلعوا زيكم! ، لكن لو جينا للحق م كان تضربيها ، لأنو مايا لعبت ليها ب راسا عشان كده هي كرهت مازن ..قلت ليها كيف يعني؟ ..حكت لي الحصل في المستشفى ، حسيت بالذنب لأني ضربتها ، هي م عايزة مازن عشان خايفة علي بس م أكتر ..قلت ليها أنتي عارفة ي رزان ، دي أول مرة في حياتي اضربا ، أكيد بتكون زعلت مني! ..قالت لي م تلومي نفسك ، أمشي اتكلمي معاها بس ، شافعة ح تنسى بسرعة ..قلت ليها بتمنى تنسى بسرعة ..و على كده سكتنا ، اليوم كله م شوفت تاليا طلعت من غرفتها لأي سبب من الأسباب ، لا أكلت لا شربت ، كنت بعاين ل باب غرفتها كل شوية منتظراها تطلع لكن م طلعت ..قريب للمغرب رزان رجعت بيتها و الضيوف جو انشغلت معاهم ، شي عشا و شي شاي و ونسة و مواضيع ، لحدي زي الساعة 10 مسا ناموا ، عشان بكرة بدري مسافرين بورسودان ..بعد نضفت المطبخ و طفيت الأنوار ، مشيت غرفتي لقيت تاليا م جات ، في العادة بجي بلقاها راقدة و شايلة التلفون لكن المرة دي م جات ، قعدت في طرف السرير و انتظرتها لحدي الساعة 11:30 م جات ..الغرفة بقت لي كيف كيف من غيرها ، وم قدرت أقعد فيها ..قمت طلعت و مشيت فتحت باب غرفتها شوية و عاينت جوة م لقيتا ..فتحت الباب زي الناس و دخلت فتشتها م لقيتا ، فتشت كل الغرف و المطبخ و البيت كله م لقيتا ..طلعت الحوش برضو مافيشة ، وأنا بتلفت بالصدفة رفعت راسي و شوفتها قاعدة في السطوح ..جريت دخلت جوة و فتحت باب السطوح و طلعت ليها فوق ..فتحت الباب براحة و قلت ليها مالا بتي الحلوة قاعدة براها؟ ..و مشيت قعدت جنبها م ردت لي واتلفتت بالاتجاه التاني ..قلت ليها معقولة للان زعلانة من ماما! ، طيب أنا آسفة ..ردت لي من غير م تتلفت علي و قالت لي أنا م زعلانة منك ..قلت ليها طيب من شنو؟ ..عاينت لي وقالت لي أنتي بقيتي تكرهيني صاح؟ ..قلت ليها و ليه أكرهك؟ ..قالت لي عشان أنا عملت زي م مايا عملت في حبوبة و جدو ، عليت صوتي عليك و خليتك تبكي كتير أكيد بقيتي تكرهيني ..مسكت يدها و قلت ليها ي ماما أنا مستحيل أكرهك عشان حاجة زي دي ، لأنك م زي مايا ، مش أنتي قلتي إنك بتي أنا و بتشبهيني؟ ..هزت لي راسا ..قلت ليها بس خلاص ، ماف داعي تزعلي و مايا زاتا أهلها م بكرهوها بس زعلانين منها و أكيد بعد كم يوم ح يسامحوها و ينسوا الحصل ..قالت لي أنا آسفة لأني زعلتك ولأني قلت ليك كلام م حلو ..قلت ليها أنا م زعلانة منك ي سُكرتي ، و أنا آسفة لأني مديت يدي عليك ..قالت لي يعني م زعلانة مني؟ ..هزيت راسي و قلت ليها ماف أم بتزعل من بتها ♡..ابتسمت و حضنتني وقالت لي أنتي أحسن ماما في الكون كله و بحبك أكتر من النجوم ♡..قلت ليها وأنا بحبك ي روحي ، و صاح أنتي قبيل مالك كنتي قاعدة قدام الباب ..فكتني وقالت لي لأني م عايزة أمشي ده بيتنا! ..قلت ليها طيب ليه م رجعتي جوة؟ ..قالت لي الباب اتقفل ..قلت ليها طيب ليه م رنيتي الجرس؟ أو دقيتي الباب؟ ..قالت لي م بحصلو! و بعدين أنا عندي كربياء و كرامة و م بدخل إلا تحنسوني ..ضحكت وقلت ليها كبرياء قصدك! ..قالت لي ااي عندي كبرياء ، كيف يعني ادخل بعد م طلعت من غير تحنيس! ..بقيت أضحك ..قالت لي م تضحكي جادة أنا! ..قلت ليها أنتي ترربيتي جد جد! ..ضحكت وقالت لي عشان لمن أقول ليك كده تصدقي ..ضحكت وقلت ليها قومي ، خليني أعمل ليك أكلة حلوة و مميزة زيك ♡..قالت لي أنتي عرفتي كيف أنا جعانة! ..شلتها و وقفت وقلت ليها لأنك جزء مني و بحس بيك زي م بحس بنفسي ♡ ..رقدت في كتفي ، ابتسمت بعد م اطمنت إنو بتي ح تفضل معاي و قريبة من قلبي ..مشيت المطبخ ، عملت الأكل و أكلنا سوا حتى رجعنا الغرفة ..تاني يوم من الصباح الضيوف سافروا و البيت رجع فاضي ، زي العصر كده كنت قاعدة في غرفتي و برتب في الشنطة عشان نحنا ح نسافر بورسودان بكرة ..شوية تاليا جابت لي التلفون وقالت لي ده عُمر ..و قعدت جنبي ، كان متصل فيديو كول ..قلت ليو العرريس! كيفك ..ضحك وقال لي مضغوط ضغطة شينة الحمدلله بس ، أنتي كيفك ..قلت ليو الحمدلله كويسة ..قال لي راسك ده فيو لصقة ولا أنا بتهيأ لي؟! ..قبل م أتكلم تاليا قالت ليو ده الراجل الاسمو مازن ضرب ماما بالعربية! ..عاينت ليها ..قالت لي دي الحقيقة! ..عُمر قال لي صاح الكلام ده؟ ..قلت ليو حاجة بالشكل ده ..قال لي م تلفي و تدوري اتكلمي عديل ..عاينت ل تاليا ، كنت مترددة أتكلم قداما لأني م عارفة تأثير الموضوع عليها شنو ، إنو أمها الحقيقة كانت ح تقتل أمها الربتها عينك عينك كده ..اتنهدت و قلت ليو أنا اتعترت و وقعت قدام عربيتو و هو م قدر يقيف و ضربني ، لكن الضربة جات خفيفة ..قال لي ميرا موضوع مازن ده نحنا لازم نتكلم فيو! ..قلت ليو عُمر أنت ركز في عرسك هسي ، و بعد ترجع من شهر العسل نتكلم زي م عايز ..قال لي تمام ، أكيد ح نتكلم لأنو الموضوع زاد عن حدو ..و قفل الخط قبل م ارد ..عاينت ل تاليا وقلت ليها عيب ي ماما تدخلي في كلام الناس الكبار ..قالت لي أنا كلمتو لأني عارفة انك ما ح تكلمي ، ماما أنتي ليه بتحبي الزول ده! ..قلت ليها عشان حنون و بعرف غلطوا ..قالت لي حنون؟! ..قلت ليها أنا الوقعت قدام عربيتو ، و هو ضربني من غير قصد لكن م مشى خلاني ، هو جابني المستشفى و أنتظر لحدي م اتأكد إني كويسة ..قالت لي برضو بكرهو لأنو هو الضربك! ، ماما هو بأذيكِ! وأنا بكره الزول ال بأذيك ..عاينت ليها و اتنهدت وقلت ليها طيب ، ح نخلي بعيد مننا تمام؟ ..هزت راسا و أخدت تلفونا و طلعت ..شوية تلفوني بقى يرن ، اخدتو و عاينت لقيتو جواد ، م عارفة اتذكرني من وين الليلة ، آخر مرة أتكلم معاي كان قبل عرس فريال ..رديت قلت ليو الو؟ ..و مسكت التلفون بكتفي و رجعت أرتب في الشنطة ..قال لي ميرا كيفك؟ ..قلت ليو تمام الحمدلله وأنت؟ ..قال لي الحمدلله ، سافرتي بورسودان ولا لسه؟ ..قلت ليو لسه ..قال لي ح تسافري متين؟ ..قلت ليو بكرة إن شاء الله ..قال لي طيب ، ممكن نمشي سوا؟ ..خليت الترتيب و مسكت تلفوني ..و قلت ليو آسفة لكن أنا متعودة أسافر براي ..قال لي الطريق طويل و البلد م مضمونة ، أخير يكون معاك راجل ..زفرت بضيق وقلت ليو دي م أول مرة أسافر فيها ، شكراً لاهتمامك! ..قال لي اممم طيب ، نتلاقى هناك ..قلت ليو إن شاء الله ، مع السلامة ..و قفلت الخط زي التقول أنا المتصلة ، و رجعت كملت الفي يدي ..اليوم التاني صلينا الفجر و طلعنا ، وصلنا المسا و نزلت في بيتي برضو و اتفاجأت ب فريال قاعدة مع البنات و بتونسوا ..سلمت عليها و الليل كلو قضينا كلام ، سألتني من أخباري و كده ، و حكيت ليها بالحصل في غيابها كله و ك العادة قعدت تسب ل مايا لحدي م نعست و نمت خليتا بتتكلم ..اليوم التاني كان العرس ومن الصباح واقفين على حيلنا و شغالين ماشين و جاين ، م لقينا ارتحنا إلا بعد العصر لأنو الناس كلها مشت تتجهز ل حفلة الزفاف ..مشينا أنا و فريال و مهند و جواد المطعم حقنا و خليت تاليا مع أخت فريال و أولادها ..في نص ونستنا كده اتصلت لي رزان ، قمت طلعت برة و رديت ليها ..قلت ليها اهليين ..قالت لي اهاا العرس كيف! ..قلت ليها سمح والله ، لكن حيلي اتهدا من التعب! ..قالت لي م تنسي الصور! ..قلت ليها م منشطة هسي ، بعد شوية كده لمن أنشط برسلهم ليك ..قالت لي تمام ..و سكتت شوية وقالت لي ميرا ، أنتي بتعرفي واحد اسمو جواد محمد؟ ..قلت ليها ااي بعرفو مالو؟ ..قالت لي جا هو و أبو قبل كم يوم و اتقدمو ليك ..قلت ليها شنو!! ..قالت لي أنا زاتي م كنت عارفة إلا كلمني مجتبى قبيل ..قلت ليها و أبوي قال شنو؟ ..قالت لي أبوك قال ، الرأي رايك و الانتي عايزة ح يحصل ، لكن عمتي عجبها و متحمسة للموضوع ..قلت ليها اممم ..قالت لي م تكوني زعلتي؟ ..قلت ليها لا لا البزعلني شنو ، لكن بس.. ، ولا أقول ليك أنسي ..قالت لي طيب ، سلمي على تاليا ..قلت ليها بصل إن شاء الله و أنتي سلمي على الأولاد ..قالت لي الله يسلمك ..وقفلت الخط ، رجعت قعدت معاهم وأنا بعاين ل جواد ..كيف قدر يصل لأهلي ، و كمان بعين قوية أتقدم لي ، ليه م أتكلم معاي أنا و سألني عن رايي ولا عشان متاكد إني ما ح اوافق عليو ..فريال عاينت لي وقالت لي مالك ساكتة كده؟ ..قلت ليها ولا شي ..و أنا لسه بعاين ليو لمن هو أتحسس و نزل عيونو ..عاينت ل فريال وقلت ليها أنا ماشة اتجهز للحفلة ..قالت لي تمام ، نتلاقى هناك ..قلت ليها تمام ..جواد قال لي خليني اوصلك ..قلت ليو تمام ..رفع حاجبو باستغراب و مشى قدامي .. أنا مشيت ل أسامة كلمتو يجيب لي معاه عربيتي الصالة و لحقت جواد ..ركبنا و اتحركنا على البيت ، و لاحظت ل سرعة العربية بطيئة زيادة عن اللزوم ، عاينت ل جواد ..وقلت ليو مالك ماشي براحة كده؟ ..قال لي عشان الطريق يطول ، و تقعدي معاي فترة طويلة ..م رديت و اتكلت في الكرسي ..عاين لي و رجع عاين قدامو و قال لي كلامي م عجبك ولا شنو؟ ..م رديت ، و هو كمان سكت ..وصلنا البيت و قبل م انزل وقفني ، عاينت ليو ..قال لي ميرا بصراحة أنا اتقدمت ليك و عايزك بالحلال ، عايز اعمّر بيتي معاك و أكمل بيك نص ديني ♡..جريت نفس طويل و م اتكلمت ..قال لي أنا شوفت فيك الزوجة المناسبة لي ، و الكلام ده م من هسي ، من خمسة سنة تقريباً ، صورتك م بتفارق خيالي و كل م أغمض عيوني بشوفك ، ميرا أنا أدمنتك بكل معنى الكلمة ، شخصيتك القوية ، استقلالتك ، ضحكتك الم بتظهر إلا نادراً ..ابتسمت و نزلت عيوني ..قال لي ابتسمتي! ، معناها أنا ماشي كويس ، طبعاً أنا لي كم يوم بحاول أرتب الكلام في راسي عشان أعبر ليك عن مشاعري ، اهاا تختي يدك في يدي و نكمل باقي عمرنا سوا ♡..و مد لي يدو ..فكرت شوية وعاينت ل يدو مسافة ، و رجعت عاينت ليو وقلت ليو أنت زول كويس والله ، وأنا م عايزة اعشمك ي جواد و أكذب عليك أنا م بقدر أحبك ، لكن إذا أنت بقيت أب كويس ل بتي أنا ح أكون زوجة صالحة ليك ..قال لي يعني اعتبرك موافقة؟! ..قلت ليو إذا بتي وافقت أنا م عندي مشكلة ..مسح وشو و باين إنو مبسوط قال لي أنوم كيف أنا الليلة! ..قلت ليو جواد! ، لو م وافقت م تزعل تمام؟ ..قال لي تمام ، أنا ح أمشي اجهز و اجيك نطلع سوا ..هزيت راسي و نزلت خليتو ، دخلت البيت جهزت و جهّزت بتي و طلعنا لقينا واقف ، ركبنا معاه و مشينا الصالة ..مجرد م نزلت ، عيني وقعت في عين مازن ، واقف بعيد و مربع يدينو بعاين لينا ، لمن لقاني بعاين ليو أشر لي بمعنى اقيفي ..في اللحظة دي تاليا مسكت يدي وقالت لي ماما ارح! ..عاينت ليها وقلت ليها أنتي أمشي أنا بلحقك بعد شوية ..قالت لي ي ماما بخاف براي ..رجعت عاينت ل مازن ، أشر لي بمعنى جيبيها معاك ، هزيت ليو راسي ب لأ ..قام جا هو علينا ، تاليا من شافتو وشها أتغير 180 درجة و وقفت وراي ..مازن سلم على جواد و قال ليو أنت م خاشي جوة ولا شنو؟ ..قال ليو منتظرهم ..قال ليو ماف داعي هسي بجو ..جواد عايز يتكلم ..مازن قال ليو قلت ليك ما ح يتأخرو! .. وأنا واقفة بعاين ليهم ، اصلا بس فضول مني ساي عايزة أعرف مازن ح يقول لي شنو ..جواد عاين لي وقال لي ماشة ولا واقفة؟ ..قلت ليو واقفة ..تاليا بقت تجرني من فستاني بمعنى "ارح اتحركي" ، اتجاهلتها ، بعد م جواد مشى ..مازن قال لي بقيتي كيف؟ ..قلت ليو كويسة ..تاليا قالت ليو م ده كله بسببك! ..عاين ليها و قعد في الأرض وقال ليها أنا آسف م كان قصدي أأذي أمك أو اضربها ..رجعت ورا زيادة و قالت ليو لأ قاصد ، عشان أنت بتكره أمي و بتكرهني! ..قال ليها بالعكس أنا بحبك أنتي و أمك م بكرهكم! ..قالت ليو لأ بتكرهها!! ..قال ليها طيب عايزة شنو إثبات إني بحبك أنتي و أمك؟ ..قالت ليو اعتذر ل ماما ..قام وقف وقال لي أنا آسف ي ميرا ، آسف من قلبي والله ، م كنت قاصد اضربك ..قلت ليو م مشكلة ..عاين ل تاليا وقال ليها اهاا أي طلبات تانية؟ ..قالت ليو خليك بعيد من أمي! ..قعد قدامها وقال ليها آسف م بقدر أكون بعيد منها ..قالت ليو لشنو؟! ..قال ليها عشان أنا عايز أكون قريب منك أنتي ، و لازم أكون قريب من أمك عشان أكون قريب منك ..قالت ليو و ليه عايز تكون قريب مني ، عايز تخطفني صاح! ..ضحك وقال ليها أكيد لأ ، لكن أنتي طفلة لطيفة و ذكية عشان كده أنا عايز اصاحبك و ماف طريقة إلا اصاحب أمك أول ..قالت ليو م تصاحب أمي ولا تصاحبني زاتو ، خليك بعيد مننا لأنو طول م أنت بعيد ماما كويسة! ..اتنهد بيأس وقام وقف ..قلت ليو كلاما صاح ، طول م أنت بعيد أنا كويسة ..قال لي مُصرة م تسامحيني؟ ..قلت ليو أيوة ..حك راسو و قال لي تمام ..و مشى ، عاينت ل تاليا ..وقلت ليها يلا؟! ..هزت راسا و جرت قدامي دخلنا الصالة ، حضرنا الحفلة و بعد انتهت رجعنا البيت ..اليوم التاني طوالي الساكنين في الخرطوم و في الولايات التانية سافروا ، حتى فريال و الشباب ..بس أنا و بتي قعدنا مع عم بابكر "أبو عُمر" ..قعدنا قريب عشرة يوم حتى رجعنا الخرطوم ..بعد يومين من جيتنا ، كنا قاعدين في الصالة و بنلعب ليدو حق الورق و بنتشاكل لأنو أنا غشاشة 😂..شوية سمعنا دقة الباب ، تاليا قامت مشت تفتحوا و بعد دقيقتين كده جاتني ..وقالت لي ماما ديل ضيوف؟ ..قلت ليها ضيوف منو؟ ..قالت لي م بعرفهم لكن معاهم جدي ..هنا شوية اتوترت ، أبوي جاب معاه منو كمان ، م يكون جواد قال ليهم وافقت و جاب أبو يعمل خطوبة رسمية كمان! ..قلت ليها طيب وينهم؟ ..قالت لي قاعدين في الحوش ..قلت ليها تمام ، م تطلعي برة إلا اناديك سمعتي؟ ..قالت لي حاضر ..و دخلت غرفتها ، قمت لبست طرحتي و طلعت برة اتفاجأت ب اعمامي التلاتة و عمتي و أبوي ، من الخلعة وقفت مكاني و بقيت أعاين ليهم ..اعمامي ديل آخر مرة شوفتها فيهم متين م بتذكر ، قبل حمل مايا بكتير ..أما عمتي دي ف شوفتها يوم عرس مهند و اتجاهلتها ، لكن هسي الجابهم بيتي شنو ، أكيد م لخير ، متأكدة م لخير ..عمي آدم "و ده أصغرهم ، آخر العنقود يعني" قال لي تعالي ي بت م دايرة تسلمي على اعمامك ..عاينت ليو وم رديت ..مشيت قلت ليهم السلام عليكم ..و قعدت ..عمتي قالت لي ده شنو السلام البارد ده ، هسي عليك الله آخر مرة شوفتينا متين! ..قلت ليها خليني أتذكر ، تقريباً يوم طردتيني أنا و بتي من بيتك صاح! ..عمي مصطفى "و ده أصغر من أبوي طوالي" قال لي عايني ي بتي ، الحصل ده حصل و انتهى ، خلينا في الهسي ..قلت ليو و اللي هو؟ ..عمتي قالت لي بسرعة أختك تعبانة و رقدوها في المستشفى ..قلت ليها ببرود وأنا مالي؟ ، و ثم أنا م عندي أخوات! ..عمي أبو هريرة"و ده أكبر واحد" قال لي عايني ي بتي المشاكل ال بينك و بين أختك في جهة ، و حياة أختك في جهة تانية! ، اختك مابية الأكل و الشراب و قالت م بتدّخل حاجة في خشمها إلا تشوف بتها .. طبعاً كلمة أختك الاتكررت أكتر من مرة دي استفزتني ، و كمان عليها كلمة بتها و لو م محترمة أبوي القاعد ، كان مسحت بكرامتهم الأرض ..قلت ليو اممم و المطلوب شنو يعني؟ ..عمتي قالت لي كيف يعني المطلوب شنو ، تودي البت ل أمها! ..عاينت ليها وقلت ليها ابيت! ..قالت لي نعم؟ ..قلت ليها ال سمعتي ي عمتي ، أنا ما ح اودي بتي أي مكان لأي زول ..عمي آدم قال لي يعني بتكسري في كلام أخوي الكبير ، هووي ي بت أحسن ليك تحترمي نفسك و تقومي تلبسي و تسوقي البت دي و تطلعوا قدامي ، أنتي و أختك و بت الحراام دي زاتو كرهتونا كل يوم مشكلة جديدة و على شنو م بعرف!! ..قلت ليو أول حاجة م تقول ل بتي بت الحراام لأنو أمها هدي قدامك ، تاني حاجة أنت الاشتكى ليك منو!! و متين زاتو تعبت نفسك أنت ولا واحد من أخوانك و حاولتو تحلو المشكلة دي!! ، و تالت حاجة أنت هسي جاي تتنهر فيني و تجوط جوة بيتي قايل نفسك منو!! ..عمي أبو هريرة قال لي لمي لسانك قبل م أقوم ألمو أنا!! ..قلت ليو أنا قادرة ألم لساني بس انتوا م تستفزوني! ..عمي آدم قال لي لا لا والله شكلو عيشة الشوارع نستك التربية ، شكلك دايرة تربية من أول و جديد ..قلت ليو و منو ح يربيني ، أنت؟ ، أنت م قادر تربي أختك تربيني أنا! ..أبوي قال لي ميرا ، احترمي نفسك ..عمي آدم قام وقف وقال الليلة إلا يضربني بس ، و عمتي تحرش فيو زيادة و الأصوات علت ، و أبوي ماسكوا بتكلم معاه ، و اعمامي الاتنين ساكتين و بعاينوا لينا هم زاتهم شكلهم مؤيدين آدم و عايزنو يضربني ..كنت خايفة لدرجة إنو شفايفي برجفو ، لكن برضو ابيت أكسر نظري من عمي آدم و ده الشي الكان بستفزو زيادة ..نص ساعة و الناس ديل جايطين ، لحدي م فجأة الباب دقة و كلنا عاينا ليو ..في اللحظة دي عمي اتفلت من أبوي و جا مسكني من شعري ، بقيت أبكي و اصرخ و أحاول اتفك منو ..لحدي م مازن جا ، و هو و أبوي فكوني منو ، و وقفت ورا مازن ..أبوي ضربو كف وقال ليو أنت تقول ل بتي أنا م متربية!! ، أنت م بتنبز في بتي أنت بتنبزني أنا!! ..عمتي قالت ليو م صحي بتك م مربية م شايفة بترد لينا كيف!! ..طلعت من وراهو وقلت ليها و تاني برد ليك!! ، اصلا أنتي بس سبب الفتن! ..أبوي قال ليهم أنا من أول كلمتكم و قلت ليكم م تمشوا ، قلتو لي دايرين نحنسا و نقنعا ده تحنيسكم!!! ..عمي مصطفى قال ليو بتك قلة أدب و راسا ناشف و م بتجي إلا بالعين الحمرا ..قال ليو قوموا ، قوموا كلكم امشوا بيوتكم و بتي أنا م عندكم بيها شغلة! ..عمتي قالت ليو ديك برضو م بتك!! ..قال ليها كان أكلت ل رقبتا و كان م أكلت ل رقبتا هي الخسرانة ..قالت ليو يخسسي عليك تعمل في بتك كده! ..قال ليها يااخ اطلعي الله لا جاب باقيك!! ..اعمامي الكبار قاموا طلعوا أول ، حتى وراهم عمتي و عمي آدم ..أبوي قال لي أعفي لي ي بتي ، أنا الجبتهم ..مسحت دموعي وقلت ليو أقسم بالله ي أبوي لو م كانو اخوانك ، كان سجنتهم! ..قال لي تاني لو ختو عليك اسجنيهم وم تخليهم عشاني أنا ، أي زول ياكل نارو ..هزيت راسي ، قام ودعني و طلع ....

هذا العالم قاسي لدرجة أن المرء محروم ممن يُحب محروم ويحَاولُ الإعتياد ، حزين لأنّه ليس قَادر على الإعتياد

يتبع ...