لأجلها

البارت الثاني عشر

Omeera

كل ما أفعله هو أنَّني أقاوم، أقاوم الوقوع، أقاوم نظرة عابرة استقرت في داخلي، أقاوم رغبتي في القول، أقاوم حتى لا أبدو بعد ذلك وكأنِّي خسرت

اليوم التاني صحيت مع الأذان الأول ، شلت تاليا وختيتا جنب فريال في السرير ، ومشيت اتحممت و غيرت ملابسي ولبست عبايتي ، ومشيت ل عُمر صحيتو ، قام فتح الدكان و طلع لي الحاجات واستحمى ومشى المسجد .. أنا بعد جهزت أي شي ، دخلت جوة صليت و دعيت ربنا يسهلها علي وطلعت بديت ارمي في الطعمية ، عُمر رجع من المسجد وشايل معاه العيش ، خت لي ومشى دخل الدكان .. أنا قعدت رميت كده ، لحدي م مليت الصينية و وقفت ، كنت خايفة إنو ماف زول يشتري ، لأنو في كم واحدة بتبيع طعمية هنا ف ما أظن يخلو زباينهم ويجو يشترو مني ..كنت خايفة وشغالة أجر في الاسورة الهداني ليها مازن واتلفت ، شوية شوية الواطة فتحت ، والشفع جو مارين ماشين المدارس ، وكلهم بعاينو لي باستغراب وبمشو ، حتى اهاليهم بعاينو لي بعين كده غريبة و بدخلو الدكان بشترو من عُمر وبمشو ، كانو بتجاوزوني ولا كأني م موجودة ، حتى سلام الله مستخسرينو فيني ..حسيت باليأس من البداية وعرفت إنو ماف زول ح يشتري مني ، وكنت بجاهد نفسي ك العادة عشان م انهار واثق في ربنا وفي نفسي شوية واصبر ، واصلت قعدتي لحدي زي الساعة 9 كده ، جات المرا الجاتنا أمس أم أسامة دي ، سلمت علي ..وقالت لي ما شاء الله بديتي شغل ..قلت ليها ااي ..قالت لي كدي اديني ب 200 النجربها ..يااخ فرحت فرح ، تقول 200 مليار ..بسرعة اديتا و داقتا وقالت لي امم حلووة لكن زيدي الشمار ..قلت ليها حاضر ..ومشت ، بعديها جو بنتين ماشين المدرسة اشترو ب 300 و ولد شاب واحد اشترى سندوتش ب 300 بس ..شوية كده فريال جابت كرسي وشالت تاليا وقعدت جنبي وقالت لي اهاا لقيتي بعتي؟ ..قلت ليها ااي ، 800 ..قالت لي كوويس ، بداية لا بأس بها ..هزيت راسي وقلت ليها ااي الحمدلله ..وقعدنا مسافة ماف زول جا ، فريال دخلت جوة وجهزت الفطور لجدها و عُمر ، وفطرو هي وتاليا وجاتني راجعة قريب للضهر ..وقالت لي ادخلي بعد ده الشمس سخنت ..قلت ليها خليني اقعد شوية كمان إحتمال يجي زول ..قالت لي بعد ده ماف زباين ، ممكن تجربي العصر ..عُمر جا قال لي كلاما صاح ، ادخلي جوة بعد ده ..عاينت للصينية المليانة طعمية واتنهدت وقمت لملمت الحاجات و دخلت الصينية جوة ..بعد دخلت ، مشيت جريت شنطتي وعايزة أمشي ..فريال قالت لي ماشة وين؟ ..قلت ليها البيت ..قالت لي ميرا البيت داك حار وفاضي ، اقعدي هنا ..قلت ليها لأ م حلوة اقعد أكتر من كده ..قالت لي أنتي قعدتي يوم واحد بس! ..قلت ليها فريال خليني أمشي ..قالت لي وتاليا؟ ..عاينت ليها لقيتا نايمة ..قلت ليها بعد تصحى جيبيها لي ..وجريت الشنطة وطلعت ، شافني عُمر في الشارع ..قال لي ماشة وين؟ ..قلت ليو البيت ..قال لي ده م بيت؟ ..قلت ليو بيتي ..قال لي ده م بيتك؟ ..قلت ليو عُمر ، عايزة اقعد في بيتي ..هز راسو ومشى من غير م يتكلم ، جريت الشنطة و دخلت البيت وقعدت في الأرض وبقيت اتأمل الغرفة الفاضية مسافة وقعدت أبكي ، كنت محتاجة إني أبكي وهناك م بقدر قدامهم ، لكن هنا بقدر أنهار براحتي وأبكي قدرتي لحدي م اتفشى ..بكيت قريب ساعة بعداك مسحت دموعي وقلت لا أنا اقوى من كده ، أنا اتجاوزت حاجات كتيرة م بتغلبني دي .. و قمت اتوضيت وصليت الضهر وطلعت ال 800 جنيه وبقيت أعاين ليها ومحتارة أعمل شنو عشان أحول ال 800 جنيه دي ل 800 مليون ..لازم اشتغل أكتر من شغل واحد عشان اسدد ديوني و أعمر بيتي و أربي بتي ، لكن أعمل شنو! ..في اللحظة دي اتذكرت حبوبة عشة الجاتنا أمس وكلاما عن إنها شغالة بتبيع أكل في الظلط وكده ..قمت لبست عبايتي ومشيت ليها ، اصلا هي جارتي حيطة بالحيطة ..دقيت الباب شوية كده جات فتحت لي هي زاتا ، فضلتني دخلت وبعد السلام ..قلت ليها يا خالة لو م عندك مانع أنا عايزة اشتغل معاك ..قالت لي وين؟ ..قلت ليها في محل الأكل ، يعني امشي ليك الزباين واغسل ليك العدة وكده ..قالت لي كوويس مالو ، أنا زاتي عايزة زول يساعدني ، بناتي كلهم عرستهن و زي م شايفة ساكنة براي زي عين الشيطان ، ف على الأقل تونسيني ..ابتسمت وقلت ليها طيب ..قالت لي طيب نبدا من بكرة تمام ..قلت ليها حاضر ..قالت لي طيب ي بتي نتفق على 2000 والزيادة على حسب الربح ..قلت ليها اووكيه ..قالت لي الركشة بتجيني الساعة 9 صباحاً خليك جاهزة ..قلت ليها تمام ..ومشيت بيت ناس فريال وكلمتهم كلهم ..واخدت تاليا و رجعت البيت و قعدت اجهز في شنطتها لبكرة ..فريال لحقتني و جات قعدت جنبي و قالت لي ح تسوقي تاليا معاك؟ ..قلت ليها ااي ..قالت لي ح تتعبك ، خليها هنا ..قلت ليها أنا م بقدر أقعد من غيرها ..قالت لي أنا ح اخلي بالي منها ..عاينت ليها وقلت ليها عاارفة ، لكن أنا م بقدر أكون بعيدة منها لساعات طويلة أنتي فاهماني؟ ..هزت لي راسا ، رجعت ارتب الشنطة ..عُمر دق باب الشارع و دخل وقف في باب الغرفة وقال لي ميرا ممكن طلب ..اتلفت عليو وقلت ليو اهاا ..قال لي دايرنك تظبطي لينا تقلية بكسرة ..قلت ليو عُمر م تتعود! بقروش تاني! ..ضحك وقال لي بديك قلبي ..قلت ليو قوم لف عليك الله قلبك اعمل بيو شنو أنا ..قال لي أنا عارف! ..فريال قالت ليو بتعرف شنو أنت بتعرف شنو! ..قال ليها بعرف إنك واحدة طيرة وهبلة ومخلية الماسورة مفتوحة في المطبخ ..قامت وقفت بسرعة وقالت لي نسيتا! ، قبيل كانت الموية قاطعة عشان كده ..عاينت ليو وقالت ليو إن شاء الله قفلتها؟! ..قال ليها م قفلتها مالي ومالا ..قالت ليو يلوي رقبتك دي بركة الله ، نفسي أشوفك بتعمل حاجة في البيت ده! ..وطلعت وهي بتجووط ومشت ..بعد قفلت باب الشارع عُمر قال لي قفلتها ..ضحكت وختيت شنطة تاليا تحت السرير وشلتها ومشيت مع عُمر بيتهم ..كملت باقي اليوم معاهم و رجعت نمت في بيتي مع بتي ، اليوم التاني زي الساعة 7 كده مشيت ل خالتو وقلت اساعدها لو محتاجة حاجة ..دقيت الباب جات فتحتو لي وسلمت عليها و دخلنا جوة ..عاينت ل تاليا وقالت لي سايقة بتك معاك؟ ..قلت ليها ااي ..قالت لي ليه؟! ..قلت ليها ساي ..قالت لي رجعيها ح تلهيك عن الشغل وكمان هناك خطر عليها ..قلت ليها ي خالتي أنا م بعرف أمشي مكان إلا وهي معاي ..قالت لي كده م كوويس ي بتي م تتعلقي في بتك كده! ..قلت ليها دي وحيدتي ي خالتي وم عندي غيرها وم بقدر افارقا لأي سبب من الأسباب ..قالت لي غاايتو انتو الجيل الجديد ده م بتسمعو الكلام نهائي ..قلت ليها لا لا العفو ي خالتي كلامك على عيني وراسي لكن برضو دي بتي وأنا بعرف بتعامل معاها ..قالت لي كوويس عاد أقول شنو ..وقامت جهزت حاجاتها وساعدتها وقعدنا انتظرنا الركشة ..بعد عشرة دقايق كده الركشة جات وكان نفس الولد الجابني هنا ، هو زاتو شكلو عرفني لأنو عاين لي كوويس حتى سلم علي و نزل يرفع الحِلل حقت خالتو ..بعد ركبنا الركشة خالتو قالت لي ده أسامة ولد حليمة ..قلت ليها ايواا ..والغريبة إني كنت مع عُمر يوم اخد الركشة لكن م ركزت إنو ده نفس الولد ..قلت ليو جزاك الله خير على العملتو لي ..قال لي شنو؟ ..قلت ليو أنا أخت عُمر ال بتها تعبت قبل يومين ..قال لي ايوااا اتذكرتك ، هسي بتك بقت كيف؟ ..قلت ليو كوويسة الحمدلله وهدي شايلاها في رجليني ..عاين ليها بالمراية وقال لي بتشبهك ..قلت ليو ااي ..بعداك بقى يتونس معاي لحدي م وصلنا ونزل لينا الحاجات ومشى ..و مجرد م قعدنا زي م قالت خالتو ، تاليا جننتنا جن ، تحبى تدخل تحت الكراسي وأنا جارية وراهاا ، وأي شي مدخلة يدها فيو وتمشي تشاغل الزباين اقبضها اجيبا ، وخالتو تحمر لينا ساي وشغالة "مششششيم مشششششيم" 😂..قالت لي اصلا راسك الناشف ده م بتسمعي الكلام ..و مشت جابت طرحة وجات ربطتها لي في ضهري وختت تاليا فيها والمهم م بعرف كيف ، ربطتها بطريقة م تخليها تقع ولا تتحرك لكن في نفس الوقت مرتاحة ..وقالت لي كده هسي بتنوم ..بقت تبكي ..قلت ليها قعد تبكي! ..قالت لي خليا تبكي وتسكت ، بتخافي عليها كده تقول أول طفلة تتولد ..قلت ليها بالنسبة لي ااي ..عاينت لي وقالت لي اشتغلي شغلك وأنتي ساكتة ..سكتت وبقيت أمشي الناس و اودي الأكل و اجيبو واغسل العدة وكده وفي خلال دقايق تاليا نامت ، وم صحت لحدي بعد الضهر بشوية أسامة جاا ، رفعنا الحاجات و خالتو فكت لي الطرحة دي و ركبنا اتحركنا على البيت ..في الطريق أسامة قال لي اهاا أول يوم كيف؟ ..خالتو قالت ليو حقارة البت دي لكن بتعرف تشتغل ..ضحك وقال ليها بنات الزمن ده كلهم كده ، هسي روان منجضاني نجاض ..قلت ليو روان منو؟ ..قال لي خطيبتي عرسنا بعد تلاتة شهور معزومة خليك جاهزة ..قلت ليو إن شاء الله بجي ..قال لي ااي إن شاء الله ..وصلنا البيت ونزلت معاهم الحاجات وساعدت خالتو غسلنا العدة و اتونسنا شوية و رجعت البيت ..م كملت خمسة دقايق فريال و عُمر جو داخلين ، فريال استلمت تاليا طوالي وبقت حاضناهاا ..وقالت ليها حيييا أنا أشتقت للجضوم دي ، أمك الحقارة دي ابت تخليك لي ..قلت ليها ولا بخليها ليك ..عُمر قال لي اهاا ، أول يوم كيف؟ ..قلت ليو الحمدلله ماشي حالو ..قال لي قدرتي تتأقلمي ..قلت ليو ااي ..عاين ل تاليا وقال لي م تعبتك؟ ..قلت ليو أكيد تعبتني ، لكن م مشكلة كله يهون عشانا ..قال لي ربنا يوفقك ..قلت ليو آمين يارب جمعا ..فريال قالت لي اهاا ادوك كم أول يوم؟ ..قلت ليها سبعة ألف ..عُمر قال لي كوويس شديد ..قلت ليو مبدئيا ااي ..فريال قالت لي فطرتي؟ ..قلت ليها ااي الحمدلله ..قالت لي طيب تعالي نومي بهناك ومنها نتغدا سوا ..قلت ليها لأ بنوم هنا وبجيك العصر ..قالت لي طيب ..و ادتني تاليا وطلعت ..عُمر قال لي ربنا يسهلها علييك م تستعجلي أي شي بتحلا براحة براحة ..قلت ليو إن شاء الله ..وقام طلع ..عاينت ل تاليا وقلت ليها أنا و أنتي حالياً م لينا غير بعض ف لازم نسند بعض تمام ..قالت لي ما ..ضحكت و قلت ليها ح اعتبرها موافقة ..وقمت عشان احممها ..باقي الأيام مرت عادي وفهمت طريقة الشغل وحتى طريقة ربطة الطرحة البربط بيها تاليا ، اتعلمت من خالتو حاجات كتيرة يمكن م كنت بعرفا من أول ، واتعلمت منها طبخات جديدة وجربتها ل ناس فريال وعجبتهم ، كان الطبخ الشي الوحيد البريح بالي وبخفف زعلي لكن برضو الشغل مع خالتو م كان بكفي ، كان بس بأكلني وحتى لو جاهدت و وفرت ياداب بطلع قروش الإيجار ..كنت بحاول اضغط على نفسي واقلل المصروف وبخلي تاليا مع فريال عشان تفطرها لكن أنا بمشي بعد الفطور وبقول فطرت ، لأنو هم ساعدوني بما فيو الكفاية م حبيت اتقل عليهم أكتر من كده ..المهم مرّ شهرين ونص ، تاليا كملت السنة وشهر وخلصت ليها جرعات التطعيم ، وعشان اطمن أكتر بمشي للدكتور كل شهر يديها الڤايتمينات وكده ..المهم الليلة برضو و زي كل يوم جهزت ومشيت ل خالتو عشان نمشي الشغل ، دقيت الباب م فتحت ، قمت فتحتو و دخلت لقيتا راقدة وشكلها عيانة ، سلمت عليها وقعدت جنبها ..وقلت ليها مالك ي خالتو؟ ..قالت لي حاسة شوية ، أنتي أمشي براك الليلة ..قلت ليها لو تعبانة أكلم أسامة يودينا المستشفى ..قالت لي لا لا م شديد ، لكن هاك اتصلي لي لرقم مسجل ب أمل ..و مدت لي التلفون ، اخدتو منها وطلعت الرقم واتصلت ، و بعد كم جرس كده ردت ، قمت اديتو ليها ..قالت ليها ااي ي أمل ، الحمدلله لكن حاسة شوية ، والله م عارفة فتور عجيب ، كوويس ..وقفلت و قالت لي خلاص بتي جاية ..قلت ليها خلاص بنتظرها ..قالت لي ساكنة قريب هسي بتجي ، أنتي أمشي ..قلت ليها لأ ..وصلحت قعدتي ..قالت لي راسك ناشف كيف! ..قلت ليها أعمل شنو دي أنا كده ..وقعدت وبقينا نتونس لحدي م أسامة جا ، سلم علينا وقال لينا م ماشين ولا شنو؟ ..قلت ليو أنا بمشي بعد بت خالتو تجي ..سكت كده البت جات داخلة ..سلمت علينا وأنا قمت وقفت والبت قعدت مكاني ..وقالت ليها مالك ي أمي؟ لو تعبانة شديد نمشي المستشفى ..قالت ليها لأ م شديد ..قالت ليها أنا قلت ليك م تشتغلي الشغل ده ، خلاص خلي أنا شغالة وبصرف عليك ..قالت ليها أنا لو قعدت ي بتي جسمي بتكسر أخير اشتغل ..قالت ليها لأ ماف شغل ، من الليلة أنا بس الح اصرف عليك وما ح اخليك تحتاجي شي ..قالت ليها لكن صعبة ليك تمشي وتجي كل يوم وأنتي عندك بيت و راجل وعيال ..قالت ليها يعني شنو؟!! أهم منك هم؟!! ، أنتي ح تجي تسكني معاي ..قالت ليها بسرعة لا لا ي بتي م نقوم نضايق الراجل ساي ..قالت ليها وم نضايقو ، هو أمو لمن تجي حلال ، أمي أنا حراام!! ، أمي عايني أنا واثقة إنو ما ح يعترض لكن لو اعترض بخلي ليو بيتو ونجي أنا و الأولاد نسكن معاك .. أنا اتدخلت وقلت ليها كلاما صاح ي خالتو ، هو زاتو لو بحس أنتي أم مرتو وح يحترمك ولو م شالك البيت يشيلك فوق راسو ..البت هزت راسا بايجاب وقالت لأمها ارح ..قمنا ساعدناها قعدت ، والبت مشت اخدت ليها ملابسها ..قلت للبت بيتكم وين ، عشان أجيب ل خالتو قروشا ..أسامة قال لي أنا بعرف البيت أنا بوديك ..قلت ليو طيب ..ومشى وداهم أول ، حتى جا راجع وداني أنا محل الشغل ، كان الموضوع صعب من غير خالتو لأنو أنا واحدة بس ، والليلة من دون الأيام تاليا ابت تنوم بس بتفرفر في ضهري ، لكن برضو قدرت اشتغل وابيع الأكل كله كمان وقعدت انتظرت أسامة لحدي م جا ..وقال لي اهاا كيف؟ ..قلت ليو كوويس شديد الحمدلله ، خلصت الأكل كله ..قال لي ما شاء الله والله إنجاز ..وسكتنا ، شوية كده ..قال لي الايامات الجاية أخوي أحمد ح يسوقك لأني مشغول مع العرس وكده ..قلت ليو كوويس ، عرسك الجمعة الجاية صاح؟ ..قال لي لأ ، البعديها ..قلت ليو كوويس ربنا يتممو على خير ..وسكتنا على كده لحدي م وصلنا بيت خالتو ..دقيت الباب ، فتحت لي بتها زاتا ..دخلت سلمت عليهم وسألتها من صحتها وقلت ليها كيف هسي؟ ..قالت لي الحمدلله كويسة ..قلت ليها ده حقك ..و مديت ليها القروش ، قامت قعدت واخدتها مني وحسبتو وطلعت 30 ألف ، ختتها بالجنبة ، و رجعت لي باقي القروش ..طبعا استغربت أنا كنت قايلاها ح تديني العشرين ..قلت ليها ده شنو؟ ..قالت لي ده حقك ، أنتي التعبتي واشتغلتي أنا بس اشتريت الحاجات ..قلت ليها أنتي برضو تعبتي فيهم وعملتيهم ..قالت لي ااي عملتهم و اخدت حقي ، وأنتي البعتي ده حقك وحاجة تانية من الليلة ح تشتغلي براك لأنو زي م شوفتي بتي اصرت وخليت الشغل ..قلت ليها كيف يعني براي؟ ..قالت لي عدييل ، ح تشتري وتطبخي وتبيعي ..م عرفت أفرح ولا أزعل ، م قدرت احدد شعوري لكن كنت متحمسة بس ، اخدت منها القروش ..وقلت ليها شكراً ..قالت لي ربنا يوفقك ي بتي ويفتحها عليك محل م تقبلي ..قلت ليها آمين جمعا ..عايزة أمشي اتذكرت الحِلل حقنها ..قلت ليها و عِدتك؟ ..قالت لي خليهم معاك ، لكن حافظي عليهم ..هزيت راسي و ودعتهم وطلعت وأنا مبسوطة ركبت الركشة ..أسامة قال لي مالك قال؟ ..قلت ليو كل خير ..ضحك وم اتكلم و رجعني البيت ، ونزل العدة في بيتي ومشى ..وك العادة جو عُمر و فريال داخلين ..قالو لي اهاا كيف اليوم معاك ..قلت ليهم زي الفل ..و طلعت القروش اديت ل فريال عشرة ألف و ل عُمر عشرة ألف ..وقلت ل فريال كده باقي ليك 20 الف ..وعاينت ل عُمر وقلت ليو وأنت باقي ليك 40 ألف ..عُمر قال لي مالك مستعجلة ، بعد م تلقي ادفعي ..قلت ليو خليني بدفع كده أنا ..قال لي خير ..فريال قالت لي لقيتي القروش دي وين و دي شنو الحِلل البرة دي؟! ..عُمر قال لي صحي دي شنو العِدة البرة دي ..حكيت ليهم بالحصل بالتفصيل ..فريال قالت لي يعني هسي بقى عندك شغل براك؟ ..قلت ليها ااي ..قالت لي عايزة اشتغل معاك! ..قلت ليها طواالي ..عُمر قال لي أنا ح أجيب ليكم الخُدار ، بعرف تجار في السوق خدارهم سمح ..قلت ليو تمام ، بعد العصر نمشي سوا لو سوقكم فاتح ..عُمر قال لي ااي فاتح ..قلت ليهم طيب بسم الله بدينا خطوة جديدة ...

اكثَر ما أُجيد فعله ‏كوني امرأة عنيدة دائمًا ‏أنني أتخطى ‏مهما بدوت عالِقة ..

يتبع ..