لأجلها

البارت الثالث

Omeera

هناك شعورٌ غريبٌ بدأ يغلف قلبي بطريقة لطيفة!

*_"بعد يومين"_*

طلعت من الحمام ، لبست وجهزت وعاينت ل مايا ، لقيتا قاعدة وسرحانة بتعاين في الفراغ ..قلت ليها مايا! ..عاينت لي بخلعة وقالت لي همم ..قلت ليها زي م اتفقنا ، بعد اطلع أنا بنص ساعة ألحقيني وبنتلاقى في المظلة الجنب الظلط تمام! ..هزت راسا بكوويس وم ردت ..طلعت خليتا شربت الشاي مع ناس البيت وطلعت ، قعدت في المظلة قريب ساعة حتى جات تعبانة وم قادرة تاخد نفسها ، جات قعدت جنبي وبتتنفس بالجلالة ..قلت ليها مالك؟ ..قالت لي تعبت ..قلت ليها عشان مشيتي الخطوتين دي؟! ..قالت لي ااي ..قلت ليها غايتو ، عشنا وشوفنا ..قعدنا شوية كده الموصلات جات ، ركبنا ونزلنا في الموقف وكملنا الباقي ب رجلينا ، لمن وصلنا المستشفى قربت تقع ..مسكتها وقلت ليها أنتي كويسة؟ ..قالت لي مهبطة ..قلت ليها أنتي م شربتي الشاي صاح! ..قالت لي لأ ..قلت ليها يعني م عاارفة نفسك ولا ده دلع جديد كمان!! أنتي مفروض تاكلي حق اتنين عشان م تموتي لي في الشارع!! ..ضحكت وم ردت ..سندتها وقعدتها في كراسي الإنتظار وسجلت اسمها ..كويس إنو جينا بدري وإلا حجز زاتو م كنا ح نلقى ..انتظرنا ساعتين حتى نادو اسمها و دخلنا ، الدكتورة لمن شافتني ..قالت لي اتفضلي اقعدي ..قعدت مايا وأنا فضلت واقفة ..قالت ليها أنتي الحامل؟! ..قلت ليها ااي ..بس الدكتورة انفعلت و قالت لي متين ح تبطلوا زواج القاصرات ده يااخ!! ، البت دي طفلة!! كيف أبوها ضميرو سمح ليو يعرسها!! ، الجهل مصيبة والله! هسي ضيعتوا عمرهاا الله لا جاب باقيكم!! ..و واصلت نقتها وأنا بس بهز في راسي والله قربت اضحك لكن بلعتها ، هو جيل الزمن ده بجبرو على حاجة بالله ..عاينت ل مايا وقالت ليها هسي أنتي عمرك كم؟ ..قالت ليها 15 ..قالت ليها كماان 15 بس!! ..ورجعت تجوط وتنقنق وكتبت لينا فحوصات تعملها ، مشينا عملتها ليها وبعد طلعوا النتايج رجعنا ليها تاني ، المشكلة كانت إنها بتحمر لي أنا ، أنا الدخلني شنو م عاارفة! ..قالت لينا فحوصاتها كلها نضيفة ، خلينا نعمل ليها موجات صوتية ..ومشت دخلت ورا الستارة ..مايا عاينت لي وقالت لي ميرا ارح معاي ..قلت ليها م ماشة امشي براك ..قالت لي ميرا أنا خايفة علييك الله تعالي ..قلت ليها مايا اختيني ، دي مشاكلك تتحملي مسؤؤليتها براك! ..عيوونا رقرقو و شوية وح تبكي وقامت مشت ، بعد مشت حسيت بالندم ف لحقتها وقعدت في الكرسي جنبها ، مسكت يدها لقيتا زي التلج ومن الخوف مغمضة عيونا وأنا أصلا م عايزة أشوف أي شي ف بقيت اتلفت ، الدكتورة بقت تشرح وقالت كلام كتير م انتبهت ليو ، بعداك قالت و عايني ده البيبي ، وبحركة لا إرادية مني عاينت ، كنت مبهورة و مصدومة ومبسوطة في نفس الوقت كانو أنا الحامل م هي ، ظهر جواي شعور غريب ، فرح مختلط بالحماسة والخوف وحاجة غريبة كده لكن حلوة ، بقيت مركزة مع الدكتورة ومع كل حرف هي بتقولو وبتحكي عن الطفل ده ، وم قادرة ازح عيوني من الشاشة لحدي م خلصت ، وكتبت لينا أدوية وفيتامينات وطلعنا ..قبل م نتحرك قلت ليها هووي أمشي اكلي ليك حاجة عشان م تقعي لي! ..قالت لي م جعانة ..قلت ليها راحتك ..مشينا و وصلنا مكان الموصلات وركبنا ، العربية كانت فاضية وقاعدين في كراسي شكرًا "آخر شي يعني 😂" ، مايا قاعدة جنب الشباك وسرحانة برة وأنا بتراسل مع مازن ، لكن م قدرت احكي ليو بالحاصل ، ف عشان كده كنا بنتونس ونسة عادية يعني ..بعد العربية اتملت وعايزة تتحرك فجأة مايا نطت لمن خلعتني ..وقالت لي ميرا عايزة عصير برتقال هسي ده! ..قلت ليها واجيبوا ليك من وين أنا! ..قالت لي م بعرف بس عايزة هسي هسي! ..قلت ليها م بقدر يااخ اقعدي ساي ..بس طوالي ماسورة دموعا اشتغلت ..قلت ليها مالك أنتي دموعك دي بقت قريبة كده! ..م ردت لي و واصلت بكاها بصمت ، اتنهدت بغضب وطقطقت للكمساري قومنا خلق چت عشان ننزل نحنا ، وطبعًا جوطة زي الجوطة ومنو الاتحمل المسؤلية؟ أنا باعتباري الأكبر ، المهم نزلنا و مشينا أقرب كفتيريا واشتريت ليها عصير برتقال ، بقت شغالة تتبسم ساي ومبسووطة ، شخصية مايا اتغيرت 180 درجة في الأيام الفاتت ، بقت طفلة بريئة ولطيفة لدرجة إنو أحياناً بزعل عليها ، يعني هسي شافعة زيها يربوها ولا تربي ، كلام الدكتورة كان صاح ، زواج القاصرات غلط في غلط ، لأنو م يستاهلو يضيعو براءتهم دي في بيت راجل وتربية أولاد ..مايا رفعت عينا و ابتسمت لي ، ابتسمت ليها أنا كمان وقعدنا ساكتين لحدي م خلصت و ركبنا موصلات تاني مشينا محل شغلي ، كنت شغالة في مكتب للعلاقات العامة متدربة ومعاي كم بت وعندنا مكتب برانا و استراحة ..قعدت مايا في الاستراحة دي وجبت ليها أكل وخليتا ، طبعا ده لأنو ناس البيت قايلنها مشت المدرسة ، فقلت اخليها معاي عشان م يكشفونا ..بعد دوامي خلص طلعنا سوا و وصلتها للبيت وأنا دخلت بيت ناس رزان ، لقيت أمها وأختها رؤى بشربوا في القهوة في الحوش ، سلمت عليهم و دخلت الغرفة ل رزان طوالي لقيتا راقدة وبتحضر ، لمن شافتني قامت قعدت ، دخلت وجدعت شنطتي و رقدت في السرير جنبها ..وقلت ليها قومي ألحقيني ب موية سرعة!! ..قالت لي أول شي احكي لي الحصل شنو وعملتوا شنو؟!! ..رديت ليها بصوت خافت وقلت ليها طلع عندها تلاتة شهور اتخيلي بس ..قالت لي شتت ياا تلاتة شهور بحالهم!! ..قلت ليها تلاتة شهور وياداب جاية تكلمنا ، وأنتي و أفكارك الزي خلقتك دي ، قال إجهاض قال ..قالت لي م أنا فكرت بطريقة منطقية! ..قلت ليها ماف حاجة اسمها منطقية ، في حرام وحلال وصاح وغلط ، وحقكم ده بكله غلط وحرام ..قالت لي طيب آسفة ، اهاا عملتوا فحوصات وكده ..قلت ليها عملنا أي شي ، حتى الموجات الصوتية ..قالت لي وشوفتي البيبي! ..هنا اتذكرت شعوري الحسيت بيو قبيل وابتسمت وقلت ليها ااي شوفتو ..قالت لي ومالك مبسوطة كده! ..قلت ليها م عاارفة لكن حسيت بإحساس غريب لمن شوفتو ، حاجة كده م بتتوصف! ..قالت لي بكون اتخلعتي لأنك أول مرة تشوفي حاجات زي دي ..قلت ليها يمكن! ، هووي أنا ماشة البيت ، مايا دي بقت عايزة مراقبة لأنو تصرفاتا م طبيعية ..قالت لي كوويس ..قلت ليها أنتي ملاحظة إنك م جبتي لي موية! ..قالت لي ميرا! ، الزير جنب الباب ، اشربي واطلعي الشارع طوالي ..اتخيلوا عدم الاحترام بس ، لبعتها وقمت جريت طلعت ، لحقتني لجوة بيتنا بالبجامة لبعتني و رجعت ، لاايوقة خلااص وم بتخلي حقها😂..دخلت الغرفة لقيت مايا نايمة بملابس المدرسة ، فتحت شنطة المدرسة بتاعتها وطلعت العباية المشت بيها المستشفى و أوراق الفحوصات كلها دسيتا في الدولاب ، و رجعت ليها كراساتها وكتبا الشنطة حتى مشيت اتحممت وغيرت ملابسي و رقدت نمت ..صحيت بليل على صوت بكى خافت ، فتحت عيوني شوفتها قاعدة في نص السرير بتبكي وتتنهد ..اخدت تلفوني عاينت للساعة لقيت الساعة 3 إلا ربع ..رجعت التلفون وقلت ليها مالك؟! ..م ردت ..خليتا وغطيت وشي بالمخدة حاولت أنوم م قدرت بسبب صوتا المزعج ..قمت مشيت قعدت جنبها وقلت ليها مالك؟! في شنو؟! ..قالت لي ولا شي ..قلت ليها طيب بتبكي مالك ، في حاجة واجعاك؟ ..قالت لي ماف حاجة واجعاني ، بس حسيت نفسي مخنوقة وعايزة أبكي ..قلت ليها ايواااا ..وبقيينا قاعدين هي بتبكي وأنا بعاين ليها لحدي م عاينت لي بالنظرة دييك ..و قالت لي ميرا! ..قلت ليها ااي عاارفة عارفة ..وضميتا و واصلت بكاها لحدي م نامت ، بعد رقدتها عاينت ل وشها ، كانت ملامحة باهتة وتعبانة وباين إنو عيانة ، هسي في شنو بتاع ده كله ، جرت ورا الحب والكلام الفارغ وفي النهاية اتورطت وهو مشى ولا كأنو عامل شي! ، ولسه الجاي م معروف ويمكن يكون أسوء من كده ، ده غير المشكلة الح تحصل لمن يعرفوا ناس البيت و ردة فعلهم ، و أهم شي البيبي ده والح يحصل فيو! ، ربنا يهونها علييها بس لأنو الجاي م هيين ..وغطيتا ومشيت كملت نومتي ..