لأجلها

البارت الخامس عشر

Omeera

لحظة الإدراك؛ بأنني قطعت شوطًا طويلًا من الإصلاح؛ فتغيّرت، وبأنّني ما عُدت على ما اعتدتهُ من نفسك، وأن ما ظننتَ دوام حاله علي قد تبدّلَ وتغيّر، وأن النضجَ نال من روحِي فأزهرَ به ، ومن عقلِي فازدانَ به، هذه اللحظة بالذات لا تقدّر بثمن

اليوم التاني صحيت بدري وخليتا نايمة ، قمت اتوضيت صليت الصبح و طلعت من الغرفة وخليت الباب شبه فاتح عشان لو صحت تلحقني ..دخلت المطبخ لقيت في ورقة ملصقة في التلاجة فيها الأكل العايزنو لمدة أسبوع ، فتحت التلاجة لقيت أي شي في وم محتاجة حاجة من برة ..بديت طبيخ ، أول شي بأكل الليلة و واصلت في الباقي ، زي الساعة سبعة كده تاليا جاتني نعسانة وبتفرك عيونا ، شلتها و مشيت الغرفة حممتها وغيرت ليها ملابسا وجيت قعدتها في مصطبة المطبخ ، عملت الشاي و شربتها و واصلت ، زي الساعة عشرة كده حتى ناس بيتهم صحو ..جورجينا جاتني المطبخ وقالت لي مالك صحيتي بدري كده؟ ..قلت ليها اصلا بصحى زي الوقت ده ..قالت لي بدري شديد ، هنا كلهم بصحو يا 10 يا 11 ، ماف زول بصحى بدري ..قلت ليها أنا اتعودت م بقدر أغير عادتي ..قالت لي خليني أساعدك ..قلت ليها لا لا م مشكلة ..قالت لي لا لا خليني أساعدك .. أنا طبعا م بحب زول يدّخل في شغلي لكن م عايزة احرجها ..قلت ليها طيب بس غسلي لي العدة ، و موضوع الطبيخ ده خلي علي ..قالت لي تمام ..وبقت تغسل في العدة ..تاليا قالت لي ماما ندليني "نزليني" ..قلت ليها ماشة وين؟ ..قالت لي هنا ..عاينت مكان بتأشر لقيت دبدوبها وقع ، وأنا بحمر في البطاطس م بقدر اخليو عشان م يحرق ..قلت ليها اصبري اخلص ال في يدي و انزلك .. وأنا متلفتة منها بقت تحاول تنزل براها والمصطبة عالية ، فجأة سمعت صوت جواد قال خلي بالك! ..اتلفت بخلعة لقيتو شايلها ، عاينت ليو ..قال لي قربت تقع ..شلتها منو وقلت ليها يعني م قدرتي تصبري ثانيتين ، أنا م قلت ليك بنزلك مالك م بتسمعي الكلام!! تاني اوعك تعملي حركة زي دي سامعة! ..صرت لي وشها ..قلت ليها سامعة ي تاليا!! ..عملت فيها زعلانة و رقدت في كتفي وبقت تبكي ..جورجينا قالت لي ليه بتتنهري فيها ، دي طفلة! ..قلت ليها من هسي خليها تتعلم ، عشان لو كبرت بالطبع ده م بتخليو ..قالت لي حراام علييك ..وشالتا مني و رفعت الدبدوب وطلعت بيها برة ..عاينت ل جواد وقلت ليو شكراً ..قال لي العفو ، وبالمناسبة طبخك حلو ..قلت ليو عارفة ..سكت وطلع ، م كنت عايزة اديهو أي مجال عشان يدخل حياتي ، كفاية العندي ..بعد دقيقتين كده جات جورجينا ادتني تاليا وقالت لي بتبكي ابت تسكت ..قلت ليها م بتعرفك ..وشلتها منها وختيتا في المصطبة وقلت ليها المرة دي م تنزلي فاهمة! ..هزت راسا وقعدت بقت تلعب ، بوستها في راسا ومشيت واصلت شغلي ، م كنت عايزاها تنزل وتمشي تلعب برة تتلاقى مع أخوات جواد ديل ويضربوها تاني والمرة دي أنا ما ح أسكت اكييد ..انتهيت من شغلي مع الضهر ، قمت صليت وختيت الفطور ، فطرنا أنا و تاليا و جورجينا ..بعداك دخلت الغرفة نمت ، بالمسا كده الباب دقة ..قلت ليو اتفضل ..جا جواد داخل و مد لي القروش ، اخدتها منو و دخلتها في الشنطة ..قال لي ما ح تحسبيها؟ ..قلت ليو لا لا ..قال لي إحتمال ناقصة ..قلت ليو بينك وبين ربك أنا م عندي دخل ..ابتسم وقال لي تمام ..وطلع ، م عارفة مالو فجأة بقى مسكين والعجب اخواتو الليلة خير شر م جوني المطبخ ، حاجة غريبة! ..اتجاهلت الموضوع و رقدت نمت لأنو بكرة إن شاء الله ح اصحى بدري عشان أسافر مع حسام بورسودان .. وفعلاً اليوم التاني بعد صلاة الصبح مباشرة قمت اتجهزت وجهزت تاليا و منها حسام اتصل لي وكلمني إنو برة ..لبست عبايتي وشلت شنطتي ، اصلا كانت شنطة ضهر بس فيها ملابس ل تاليا ومستلزماتها وكده ..وشلت بتي وطلعت من الغرفة لقيت جواد في وشي ..قال لي جيبي الشنطة اشيلها ليك ..قلت ليو لأ شكراً ..قال لي فيها كنز علي بابا يعني جيبيها ساي ..وشالا مني ، طلعنا برة سلم على حسام وخت الشنطة في العربية ..و جاني بالشباك قال لي اشوفك الأسبوع الجاي ..قلت ليو إن شاء الله ..واتحركنا مشينا ..حسام قال لي شكلكم اتصاحبتو ..قلت ليو لأ م اتصاحبنا ..قال لي خلي بالك جواد بتاع بنات ..قلت ليو آخر همي ..قال لي المهم كلمتك ..عاينت ليو بطرف عيني وقلت ليو بتكلمني ليه اصلا ..قال لي لمصلحتك ..عاينت قدامي وقلت ليو انتو الرجال الله يهديكم بس ..قال لي كيف يعني؟ ..م رديت واتكلت في الكرسي وغمضت عيوني ..قال لي يعني م بتثقي فيني ..رديت ليو وأنا مغمضة و قلت ليو أنا اصلا م بثق في زول بسرعة ..قال لي ايواا ..وسكت عمل فيها زعلان ، وم اتكلم تاني لحدي م وصلنا ، وأنا اصلا أنوم و اصحى ، من استراحة ل استراحة لحدي م فتحت عيوني لقيتنا جنب الباب ..شلت تاليا و نزلت ، وحسام نزل لي الشنطة ..دقيت الباب فتحتو فريال وشغالة تكورك وتنطط زي التقول مشيت لي 100 سنة م بس يومين ..حسام ضحك وقال لي مع السلامة ..قلت ليو الله يسلمك ، وتوصل بالسلامة ..قال لي آمين يارب ..ومشى ..أنا مشيت بيتي وفريال شالت السنطة ولحقتني ، و وراها عم بابكر و عُمر ، دخلت لقيتو نضيف فريال خلت بالا منو كويس ، مشيت ختيت تاليا وقعدت في السرير ..فريال شالت تاليا ومشت جابت لي موية وقعدت جنبي ، م كنت حاسة ب رجليني شدة م الطريق طويل ، م بتذكر إني حسيت بالتعب ده في المشية ، لكن الرجعة دي مُهلكة عديل ..عمي بابكر سلم علي وطلع طوالي ..عُمر قال لي اهاا لقيتيهم كيف؟ ..فريال قالت ااي أنا من قبيل عايزة اسأل السؤال ده ..حكيت ليهم الحصل بالتفصيل ..فريال قالت لي عجبني والله ، مرا والرجال ورا ..وعاينت ل عُمر وقالت ليو أنا م قلت ليك م تخاف عليها ، ساي كنت متوتر وموترني معاك ..قلت ليو كنت خايف علي ..قال لي ااي والله ، أنتي زي أختي و أعز وكنت خايف عليك في البيت الغريب داك ..من ناحية الأخوة عُمر أحسن من مجتبى أخوي ولد أمي و أبوي بمئة مرة ..ابتسمت وقلت ليو م تخاف علي ، بقدر أدافع عن نفسي ..بعداك اتذكرت القروش ، وطلعتها حسبت 200 ألف اديتا ل عُمر وقلت ليو كده خلصنا ..قال لي بكرة من الصباح ح نمشي نشتري الأرض ..فريال قالت ليو مالك بتتشافق اصبر ، شوية ..قلت ليها لأ ، الراجل شغال ينط لينا ساي وقال في ناس كتار عايزنها وبتاع ..عُمر قال لي ح تمشي معاي على فكرة ..قلت ليو بكرة الصباح أنا عندي شغل ، خلي نمشي المسا بعد أرجع من محل الأكل ..قال لي تمام ..قلت ليو والمواد وكده ..قال لي عندي واحد صحبي شلت منو والحساب كله رملة على اسمنت على طوب وأي شي ، مليار و200 ..قلت ليو بالتشطيبات ولا بدون؟ ..قال لي بدون ..قلت ليو غاالي ..قال لي اصلا هو في شي رخيص ، لكن إن شاء الله من هنا لنهاية السنة دي بكون مطعمنا ابتنى ..فريال قالت ليو يعني بعد 8 شهور؟! ..قال ليها إن شاء الله ..قلت ليو تمام ، أنت عندك كم؟ ..قال لي بعد ندفع قروش الأرض بفضل لي 700 ألف..قلت ليو و قروشك المركونة ..قال لي حقت العرس! ..قلت ليو عرس شنو عروسة مافي! ، ادفع للتاجر وجيب الحاجات ونتحاسب بعدين ..قال لي بكون داير منك 600 ألف ..اديتو ال 100 ألف ..و قلت ليو 500 الف بس ، وح ادفعا ليك بالتقسيط ..فريال قالت لي والترخيص و أوراق المطعم ده ..قلت ليها بعد نشتري المواد بنمشي نطلعو ..عاينت لقيت عُمر بعاين لي ..قلت ليو عُمر م تعاين لي زي ده ، قلت ليك برجعها ليك! ..قال لي دي قروش العرس يااخ!! ..قلت ليو لحدي م تلقى العروسة الله كريم ، هسي خلينا في المهم! ..حمر لي مسافة وقال لي هسي لو عجبتني واحدة أتقدم ليها بشنو؟!! ..قلت ليو عُمر!! ، لا إله إلا الله ..قال لي محمد رسول الله ..قلت ليو أنا براي تعبانة وجاية من سفر ، أخير ليك تقوم تقطع وشك ده قبل م اتنفسن فيك اخليك تجري حفيان! ..زفر بغضب وقام مشى ، وبعد وصل باب الغرفة ..قال لي كوويس ، لكن بكرة م تنسي نمشي نشتري الأرض ..قلت ليو إن شاء الله ..وطلع ..عاينت ل تاليا وقلت ليها ي ماما عايزة تحضري طيور الجنة؟ ..قالت لي ااي ..عاينت ل فريال وقلت يلاا قومي اتخارجي وشيليها معاك ..وقفت و قالت لي أنتي لمن تكوني منفسنة أخير الزول م يتكلم معاك زاتو! ..قلت ليها ااي بكون أحسن ..قلبت لي عيونا وطلعت ، حتى أنا رقدت نمت ..صحيت نص الليل ، قعدت وبقيت اتلفت م عارفة الساعة كم لكن شايفة الغرفة مضلمة شديد ، عايزة أتحرك ضربت حاجة برجلي ، خوفت وم عرفت أعمل شنو تلفوني واقع وين م عاارفة ، وعلى حسب م حاسة أنا نايمة بالعباية وم بتذكر إنو كان في زول معاي في البيت طيب ده شنو الضربتو ده! ، مديت يدي براحة لمستو لقيتو ضهر إنسان ، لمست زيادة من البداية للنهاية ، لقيتا تاليا من حجمها الصغير ده عرفتها ، زفرت بارتياح و قمت بقيت اهبش بيدي لحدي م وصلت النور و ولعتو ، عاينت لقيت الباب مقفول و فريال نايمة في السرير التاني و تاليا نايمة معاي في سريري ..مشيت فتشت تلفوني لقيتو قاعد تحت المخدة ، عاينت للساعة لقيت الساعة ياداب 10 مسا ، قمت اخدت ملابس مشيت اتحممت و اتوضيت صليت العشا بس لأنو المغرب صليتو قبل م نصل بورسودان بنص الساعة ..بعداك قعدت لا شغلة لا عملة وفي نفس الوقت م نعسانة ، عاينت شوفت ملابسي الوسخانة وملابس تاليا ، قمت اخدتهم كلهم وقعدت في الحوش غسلتهم و شريتهم ، و دخلت جوة قريب للساعة 12 ونص ..رقدت وبقيت اتقلب برضو م قدرت انوم ، تاني قمت دخلت المطبخ ، لقيت عُمر جاب الخدار لبكرة ، قعدت وبقيت اقطع واطبخ ، اصلا بقيت زي الخفاش م بعرف أنوم بالليل و جسمي اتعود على الشغل والتعب والسهر حتى النوم غلبو ..واصلت طبيخ لحدي م انتهيت منها الأذان الأول أذن ، قعدت في الحوش سرحانة وبحاول اتخيل حاجات إيجابية زي مثلاً إنو المطعم نجح وسافرت بلاد برة وحققت حلمي وبقيت إنسانة مستقلة ، ابتسمت لمجرد التفكير في الموضوع و دعيت إنو المرة دي إن شاء الله العايزة يحصل ، فجأة سمعت صوت تاليا بتناديني ، اتلفت لقيتا طالعة من الغرفة بتبكي ..قلت ليها أنا هنا ..شافتني جات وقفت جنبي ، شلتها رقدتها في حضني وبقيينا نعاين للنجوم سوا ..قالت لي ماما دي ثنو؟ ..قلت ليها نجمة حلوة زيك ♡..قالت لي ندمة دي ثنو؟ ..فكرت شوية وقلت ليها نجمة دي ، نور للسما عشان الضلام يختفي ..قالت لي اهاا ..قلت ليها حلوة صاح؟ ..هزت راسا وبقت تعاين ليها ، في اليوم تحديداً كانت السما صافية و النجوم كبيرة لدرجة حسستني إنو ماف نقطة ضوء في بورسودان ، الجو كان بارد وسمح و لمعان النجوم زادو حلاوة ، هنا اتذكرت كلام مازن لمن قال لي إنو لازم استمتع باللحظة ، و دي لحظة من اللحظات التستاهل إنو استمتع بيها حتى لو هو م جنبي ، م مشكلة في يد تاني بقدر أمسكها و قلب تاني بقدر اساركو لحظتي المميزة ♡..عاينت ليها لقيتا نامت ، بتنوم بسرعة غريبة ولا كأنها كانت صاحية 😂..ضحكت فيها وقمت شلتها دخلتها الغرفة و اتوضيت صليت حتى ياداب نعست و نمت في المُصلاية ..اليوم التاني صحيت زي الساعة 8 صباحاً لقيت فريال صاحية وحممت تاليا وبشربو الشاي ، قمت غسلت وشي و اتسوكت وشربت الشاي واتجهزت عشان أمشي الشغل ، والمرة دي فريال مشت معاي ومسكت تاليا وأنا كملت شغلي ، رجعنا بعد الضهر بشوية ، صلينا كده عُمر جا داخل ..قال لينا يلاا ..فريال رقدت في السرير وقالت لي الله معاكم! ..قلت ليها مالك م ماشة معانا؟ ..قالت لي بري! أنتي اتعودتي على التعب لكن أنا م بقدر ، جسمي رقيق وحساس ..ضحكت وقلت ليها اهاا ي إليسا ، خلاص مدام قاعدة خلي تاليا معاك عشان الشمس حارة ..قالت لي تمام ..عُمر قال ليها والغدا ي أستاذة ..فريال قالت ليو مكرونة بس وبعملها بعدين والموضوع منتهي ..قلت ليها ممكن ..عُمر قال ليها مشيتي معاها مرة واحدة بس جاية واقعة زي الجثثة ، هي البتمشي كل يوم تقول شنو؟ ..قلت ليو أنا زاتي تعبانة على فكرة لكن ضاغطة على نفسي ساي ..قال لي الجابرك شنو قال! ..قلت ليو من طلب العُلا سهر الليالي وثم أنا متحمسة ومتفاءلة شديد للمطعم ده وحاسة إنو ح يكون خير علينا ..قال لي إن شاء الله ، طيب اررح ..وطلعنا مشينا ل سيد الأرض ، ومشينا مع بعض شوفنا الأرض وعجبني موقعها لأنها قريبة من الكورنيش ، وبقدر اسمع صوت الأمواج من مكاني ده ..وقفت في نص الأرض وعاينت حواليني ، كنت حاسة بالفخر والفرحة زي الكأني ملكت العالم ، مش قطعة أرض 500 متر ..عُمر وقف جنبي وقال لي اهاا حلوة؟ ..قلت ليو جداً ..قال لي ارح للمحامي طيب ، أنا كلمتو من أمس و هو مجهز الأوراق من أول بس نمشي نوقع ..هزيت راسي ومشينا ، وقعنا أنا و هو المشتريين يعني ، وسيد القطعة الأول "البائع" و أحمد أخو أسامة و صاحب عُمر تاني كده شهود ..وعُمر اداهو قروشو والراجل مشى ..بعد طلعنا قلت ليو مفروض نعمل كرامة صاح! ..قال لي بكرة إن شاء الله أنا بعمل ليكم بليلة ..ضحكت وقلت ليو أنت! ..قال لي ااي ، أنا شيف زييك على فكرة ..قلت ليو خير ي أبني ..وطلعنا رجعنا البيت ، كلمناهم وعم بابكر اشترى لينا بارد ك هدية 😂💛..وباقي بس نختار إسم للمطعم ، بعد م صلينا المغرب ، عملنا شاي لبن وقعدنا في الحوش ونادينا عُمر وعم بابكر عشان نفكر مع بعض كلنا ..عم بابكر قعد في السرير و عُمر قعد في الفرشة مع فريال وتاليا ، وأنا متربعة في السرير التاني وشايلة كبايتي ..فريال بقت تقترح لينا في أسماء كتييرة وأنا و عُمر نعاين لبعض بس ونعاين ليها ..قلت ليها عايني أنا خطر في بالي إسم ..عُمر قال لي وأخيراً جا الفرج ، اتحفينا! ..قلت ليو "الأحلام الضائعة" ..قال لي ليه اخترتي ده! ..عم بابكر قال لي ااي ليه ده؟! ..قلت ليو ده رايي انتو حرين تختارو العايزنو ، لكن الاسم حلو وبمثلنا نحنا التلاتة وبمثل حياتنا ولو م عاجبكم الإسم بالعربي اكتبو بالإنجليزي " The lost dreams ♡" ..عُمر قال لي مع إنو اسمك زي خلقتك لكن عجبني ..فريال قالت لي أنا برضو ..عم بابكر قال لي مدام عجبكم ما بقدر أقول شي غير الله يوفقكم ..قلت ل عُمر اهاا صممتو؟ ..قال لي ده كلاامك! ..وقام جرى جاب لي مية ورقة كشحهم لي في الفرشة ..نزلت قعدت تحت وفريال ولعت فلاش تلفونا ، وبقينا نختار في التصاميم وأي زول عجبو شي براو طبعا مع الإضافات من عندنا والتعليقات ..وعُمر بس يحمر لينا ، لحدي م زهج مننا وخطف الأوراق من يدي و يد فريال ..وقال لينا جيبوهم زاتو ، شبهكم ده م شبه تصميمات راقية زي دي ..وقام دخلهم جوة و جاب معاه ورقة و قلم و رسم لينا شكل المطعم بجوة ، الطابق الأرضي براه والطابق الأول براه ..وخت لينا الورق قدامنا وقال لينا يلا ارسمو ..أنا اخدت الطابق الأرضي و رسمت الإضافات و فريال اخدت الطابق الأول المخصص للأطفال والعوائل ، وبقيت ترسم الإضافات ، لحدي بعد ساعة كده انتهينا و رجعنا ليو الورق ، طبعاً م رسامين زيو لكن جازفناها ..عُمر عاين للتصاميم مسافة وقال لينا خير ، أنا ح اجازف ليكم المواد مسافة ديل يخلصو بناء ..قلنا ليو تمام ..وقام مشى ..عاينت ل فريال وقلت ليها رسمتي شنو؟! ..قالت لي ح تشوفي في الواقع قريب إن شاء الله ..قلت ليها إن شاء الله ..بعد كم يوم كده مشينا أنا و عُمر عملنا الأوراق واستلمناها بعد يومين وبقى أي شي جاهز وحتى المهندس بدا شغل ، وعشان هو بعرف صاحب ، صاحب عُمر قلل لينا المبلغ و دفعنا ليو نص وباقي نص ..يعني حالياً بس فضل لينا نشتري الأجهزة الكهربائية و ندفع باقي القروش للمهندس ، أما الحاجات البسيطة بسيطة زي السيراميك والدهان عُمر اشتراها جاهزة ♡..يعني المرة دي بالجد الباقي بيني وبين حلمي خطوة واحدة بس وإن شاء الله ح تتحقق ....

سنحيا بعد كُربتنا ربيعًا كأننا لم نذق بالأمس مُرًا ..

يتبع