لأجلها

البارت الرابع عشر

Omeera

حدّق جيدًا وسوف ترى بأنني أضحك دمًا و دموعًا

المهم بعد ساعات طويلة وصلنا الخرطوم و وقفنا قدام بيت كده عمارة ، سمح غايتو م بكذب لكن م انبهرت ، بيت طابقين على نظام ڤلة تقريباً ..المهم حسام نزل و نزل لي شنطتي ومشى رن الجرس ، شوية جات بت فتحتو ، عااد عندهم شغالة معناها ناس راحات جد جد ..فضلتنا و دخلنا جوة وحسام قال ليها نادي جواد ..البت طلعت السلالم دقيقتين وجات قالت لينا جاي ..ومشت جابت لينا موية وعصير و دخلت المطبخ ، شوية كده جا نازل شاب ثلاثيني يمكن 32 ولا 33 كده رافع نخرتو أكتر مني وبعاين لي بقعر عينو زي الحاجة الكعبة ، من شوفتو م هضمتو وبقيت احمر ليو وهو يحمر لي لحدي م جا سلم على حسام و قعد ..قال لي أنتي الطباخة حقتنا؟ ..قلت ليو أنا م حقت زول ، أنا طباخة فقط! ..قال لي المفروض تقولي لي حاضر على أي حاجة اقولا ليك ..قلت ليو والفروضو منو؟! ..قال لي أنا ..قلت ليو على نفسك م علي ..قال لي كنت قايلك مسكينة ..قلت ليو كان كده صحح معلوماتك ، أنا م مسكينة! ..حسام قال لينا شنو يخوانا من البداية كده ، هدو شوية ..سكت ..جواد قال لي طيب عندنا قوانين معينة هنا ، ممنوع تدخلي أي مكان غير المطبخ وغرفتك دييك ..و أشر على غرفة وراي ..و واصل كلامو وقال لي أنا ح اكتب ليك كل مرة الأكلات المفروض تعمليها وح اجيب الخضار ، إن شاء الله بتكوني بتعرفي تعملي أكل غربي لأنو أخواتي م بياكلو إلا الأكل الغربي ..قلت ليو ببرود بعرف ..قال لي م عندك دخل في أي حاجة بتحصل برة المطبخ ، بس عليك بأكلك وأهم شي ترضي أخواتي ..قلت ليو أنا م برضي زول ، عجبهم كان بها م عجبهم بمشي بس ، وثم أنا كمان عندي قاعدة وشرط واحد شوفت بتي دي خط أحمر وم تقول م كلمتك ..قال لي تمام ، اتفقنا ..حسام قال لينا حلو طيب ، اهاا القروش كيف؟ ..قلت ليو براحتو ..قال لي 450 الف وح ازيدها لو عجبني الأكل ..450 الف!! اصلا الزول العندو قرش م بعرف يصرفو صاح ، لكن أنا مالي و مالو ..هزيت راسي وقلت ليو تمام ..حسام قال لينا طيب أنا ماشي ، لو حصلت أي حاجة رقمي عندك ي ميرا اتصلي لي ..قلت ليو طيب ..وقام مشى ، شوية جات بت طالعة يمكن عمرها 27 سنة ، شغالة تكورك وتجوط ، م عاارفاها ظهرت من وين ، شكلو وراي في صالة ولا حاجة ، المهم هي بتجوط وفي راجل كبير فهمت إنو أبوها ماشي وراهاا ..الراجل قال ليها ده منو البتتكلمي معاه ده؟! ..قالت ليو أنت مالك ومالي أتكلم مع العايزاه اياك تتحكم فيني!! ..قال ليها اتحكم فيك شنو أنا داير مصلحتك بس ..قالت ليو مالك ومالي قلت ليك م تسألني ، امشي شوف ليك شغلة غيري ..شوية جات بت تانية طالعة وبتشبه الاولى لكن أطول منها شوية ..قالت للراجل ي بابا للمرة المليون قلت ليك م تتحشر في حياتنا ، لو تصرفاتنا م عاجباك خلينا نمشي ل ماما ..الراجل بقى يحنسهم وقال ليهم م تمشوا خلاص ، اعملوا الدايرنو ..كنت شايفة الحزن في عيونو ، والانكسار في طريقة كلامو ، بناتو حقارات وم يستاهلو ، عرفو نقطة ضعفو وبستغلو بيها ، لكن هو بعد ده كله عايزهم برضو ، أنا م غاظني اسلوبهم المستفز زي م غاظني اخوهم ، بدل يمشي يسكت اخواتو قااعد بعاين ليهم وهم بتنهرو وبسيؤ في أبوهم وبقلو ادبهم فيو ، ياداب فهمت ليه قال لي م عندك شغلة بأي حاجة بتحصل برة المطبخ ، لأنو عارف اخواتو ، بالجد أنا في حياتي شوفت ناس كده اعوذ بالله وناس تانين يتختو في الجر يبرا ، صاح الناس أصناف ..بقيت احمر للبنات قامت واحدة فيهم شافتني ، وجات وقفت ..وقالت لجواد "Who is this idiot you brought here? "من هذه المعتوهة التي احضرتها الى هنا؟" ..بتتكلم بالإنجليزي على أساس أنا م أفهم ..قال ليها  Shut up and don't embarrass the girl! "اصمتي ولا تحرجي الفتاة!" ..قالت ليو ببرود Calm down, this idiot villager doesn't understand a word I'm saying, then why did you bring her here "أهدأ هذه القروية البلهاء لا تفهم كلمة مما اقول ، وثم لماذا احضرتها الى هنا؟" ..يا شييخة والله قربت اضحك لكن بلعتها وعاينت ليو ..عاين لي وقال لي بتسألني أنتي منو؟ ..قلت في قلبي لو م بعرف انجليزي نهائي ح أفهم انها بتنبزني ..هزيت ليو راسي وسكت ..اتلفت عاين ليها وقال ليها دي الطباخة الجديدة ..عاينت لي باشمئزاز وقالت ليو دي؟ ..قال ليها ااي ..قالت ليو You are unreasonable! "انت غير معقول!" ..وعاينت لي وقالت لي خلي يترجم ليك! ..ومشت ، عاينت ليو ..قال لي قالت ليك نورتي ..ابتسمت ليو ابتسامة صفرا و هزيت راسي ..قال لي طيب قومي اعملي لينا حاجة ندوق أكلك ..قلت ليو تمام ..وجريت شنطتي دخلتها الغرفة ، واتحممت وغيرت ملابسي و نوّمت تاليا وخليت الباب شوية فاتح عشان لو بكت اسمعها ، حتى دخلت المطبخ ..كان مطبخهم قدر حوش بيتي الفي بورسودان ، هسي هم عاملينو كبير كده ليه؟!! ، يعني المسافة من البوتجاز للدولاب دي براهاا عايزة موصلات! ..وقفت نقنقت حبة وفتشت الدولاب كله والتلاجة وحفظت مكان أي شي ممكن أحتاج ليو ..وقفت مسافة وم عرفت اطبخ شنو ، في النهاية قررت ارتجل واعمل على كيفي ..جهزت الحاجات و واقفة بقطع في البصل بمزاج جواد جا داخل ، عاينت ليو بطرف عيني لقيتو بتبسم براه ، فهمت نيتو م سليمة ، زفرت بهدوء و واصلت شغلي ..جا وقف جنبي وعاين لي مسافة وقال لي هسي أنتي م صغيرة على إنك تشتغلي شغل زي ده؟ ..رديت ليو من غير م أعاين ليو وقلت ليو الشغل عندو عمر معين يعني؟ ..قرب يدو من يدي و قال لي لا ، لكن القدرك بكونو عايشين حياتهم وبستمتعو بيها مش بدفنوها في المطبخ ..وقفت تقطيع واتلفت عليو وقلت ليو ما كل الناس اتولدو وفي خشمهم ملعقة من دهب ، لازم تتعب عشان تعرف قيمة العندك ..قرب يدو من وشي وقفتها بالسكين ..قال لي بس في حاجة في وشك ..قلت ليو تاني يدك دي لو قربت من وشي ح اقطعها وم تقول م كلمتك ..و رجعت ورا وقلت ليو خلي بيناتنا مسافة خطوتين ..قرب مني تاني واتكل في مصطبة المطبخ وقال لي ولو م خليت بيناتنا مسافة ..جريت السكينة في ضهر يدو وضربتها في المصطبة ، وهو من الخلعة جر يدو بسرعة لقاها بتنزف ..حمر لي ..قلت ليو المرة جاية ح تتجر في رقبتك ..ضحك وقال لي تمام ..وطلع ، اصلا الزيو إلا يوروهم العين الحمرا حتى يتعدلو ، شوية جا أبوهم داخل ..قال لي السلام عليكم ..قلت ليو وعليكم السلام ي أستاذ اتفضل ..قال لي مافي داعي للرسميات ممكن تناديني عمي عادي ..قلت ليو حاضر ي عمي ، عايز حاجة؟ ..قال لي بس كباية شاي لو ممكن ..قلت ليو حاضر ، دقايق وتكون عندك ..شغلت السخان و واصلت تقطيع ، وبعداك حمرت البصل و اديت العم الشاي ، قام جر كرسي وقعد ..وقال لي أنتي من وين؟ ..قلت ليو بورسودان ..قال لي ما شاء الله والله ، بورسودان حلوة شديد خصوصي في الوقت ده ..قلت ليو ااي ..اخد رشفة من الشاي و قال لي تسلم يدك الشاي حلو ، تاني تعملي لي أنتي بس ..قلت ليو طوالي م عندك مشكلة ..شوية جات بتو داخلة ..عاينت لي وقالت لي هييي أنتي اعملي لي قهوة! ..رديت من غير م اتلفت و قلت ليها لأ ..جات مسكتني من يدي بقوة ولفتتني عليها وقالت لي أنتي قايلة نفسك منو!! أنتي خدامة عندي أنا!! لمن أقول ليك حاجة تقولي حاضر فاهمة!! ..قلت ليها حيلك حيلك! دي منو الخدامة عندك!! ، والخدامة الانتي مسحتقراها دي ، أنتي المحتاجة ليها م هي محتاجة ليك تمام ، وأنا طباخة هنا واخوك بلسانو قال جايبني للأكل م للقهوة فهمتي ولا أعيد ليك! ..ابوها قال ليها جيهان! فكي البت ..قالت ليو أنت مالك!! ..فكيت يدي منها وقلت ليها لو م عايزة تحترميني م مشكلة ، لكن احترمي أبوك على الأقل ..قالت لي على آخر الزمن جاية خدامة تعلمني أتعامل مع أبوي كيف! ..قلت ليها أكبر دليل على أنو اخلاقها أحسن منك! ..قالت لي أنتي.. ..وطلعت ..عاينت لأبوهم وقلت ليو آسفة لكن أولادك حتة تربية م عندهم! ..قال لي هم بس مدلعين عشان اتربو في بلاد برة ..قلت ليو ده م دلع ، دي قلة أدب ، وحاجة تانية ي عمي م تخليهم يقللو من قدرك ويذلوك ، أنت أبوهم وهم لازم يحترموك لأنو هم اغبياء وم فاهمين إنو الزمن لو لف و دار ما ح يلقو سند غيرك! ..قال لي تقولي شنو ي بتي ، أمهم كرهتهم فيني وقاعدين لي على الهبشة لو عليت صوتي بس ، بقولو دايرين يمشوا ، وأنا اتحرمت منهم سنين طويلة بسبب الشغل و م داير اتحرم منهم تاني ..أنا مستغربة يعني هم لقو أبو حنين زي ده ومتمسك فيهم بيدينو و رجلينو وبعد ده م محترمنو ولا مقدرنو ، أبوهم ذكرني بأبوي والله ، هسي يا ربي بكون مشتاق لي ولا بكون كرهني وم عايز يتذكرني؟ ، معقولة م خليت فراغ في قلبو ، طيب م ندم ولا شوية؟ ..اتنهدت وعاينت للعم لقيتو بشرب الشاي وبرجف من الزعل لكن كاتمها ..بالجد ماف زول حياتو كاملة ، ربنا بشيل منك شي وبديك شي ، أبو جواد لقى الجاه والقروش لكن م لقى اولادو ، وأنا اتحرمت من أهلي و لقيت عُمر وفريال وتاليا لكن هل ح يقدرو يعوضو مكان أهلي؟ م أظن ..شوية سمعت صوت تاليا بتبكي ..أبو جواد قال لي سامع صوت طفلة؟ ..طفيت البوتجاز سرعة ، وطلعت لقيتا لافة وبتفتش علي وبتبكي ، ومجرد م شافتني جاتني جارية ..شلتها وقلت ليها م تخافي أنا هنا ..رقدت في حضني وسكتت ..دخلت المطبخ ختيتا في المصطبة و ولعت البوتجاز .. أبو جواد قال لي دي بتك؟ ..قلت ليو ااي ..قال لي ما شاء الله بتشبهك ..طبعا الكلمة دي اتكررت كتير جداً ، و ده شي حتى أنا لاحظت ليو إنو كل م تاليا تكبر بتشبهني مع إني م بشبه مايا ، وغير العيون ماف وجه شبه بيناتنا ، وأحياناً بحس عندها حركات ل مازن ، غمازتها ونظراتها و حتى صرة وشها ، لكن تاني بستغفر وبقول يمكن عشان مشتاقة ليو شايفة ملامحو في تاليا وبتجاهل الموضوع ..أبو جواد قال لي يا بتي ..عاينت ليو بخلعة وقلت ليو هاا؟! ..قال لي أسمها منو؟ ..قلت ليو تاليا ..قال لي اسم حلوو وعمرها كم هسي ..قلت ليو سنتين وتلاتة شهور تقريباً ..قال لي ما شاء الله ربنا يزيد ويبارك ..قلت ليو آمين جمعا ، صحي ي عمي أنت أسمك منو؟ ..قال لي محمد ..حسيت بطعنة في قلبي لأنو اسمو زي اسم أبوي ..زفرت وابتسمت وقلت ليو خير الأسماء ..ابتسم وقال لي ااي الحمدلله ..بعداك اديت ل تاليا موية وأكلتها وكملت شغلي وطفيت النار ، وبقيت واقفة جنب تاليا وبتكلم مع عمي محمد ..فجأة جات البت القبيل داخلة وجارة أخوها من يدو ..عاينت ليهم باستغراب ..قامو جو وقفو قدامي والبت قالت ل جواد قول ليها تعمل لي قهوة! .. أنا نسيت الموضوع زاتو ، هي لسه معلقة فيو بالله ..جواد قال لي ميرا ، قهوة! ..ربعت يديني وقلت ليو لمن جبتني هنا ، اتفقنا على قهوة ولا حاجة؟ ..قال لي لأ ..عاينت لأختو و قلت ليها معناها لأ ..بقت تهز في يدو زي الطفلة الصغيرة وشغالة ليو جواد قول ليها تعمل لي قهوة هسي ده!! ..عاين لي ، رفعت ليو حاجبي الواحد ومديت يدي على السكين مسكتها ..عاين ل يدو محل خدش السكينة و رجع عاين لأختو وقال ليها خلي جورجينا تعملها ليك ..قالت ليو لأ ، بس هي!! ..قال ليهاا جيهاان م تكرهيني ، قالت ابيت اجبرها يعني!!؟ الله! ..وقام طلع ، وهي حمرت لي مسافة وطلعت وراه ..عم محمد قال لي غريبة مالو هادي كده ، هو فيني أنا بتنهر عشان اخواتو ..فكيت السكين وشلت بتي وقلت ليو شوفت يا عمي أولادك ديل كلهم جبانين ساي ولو لقو ليهم زول يأدبهم بمشو زي الساعة ..قال لي إن شاء الله يلقو ..قلت ليو إن شاء الله بلقو ..وطلعت من المطبخ ، مشيت اتوضيت وصليت المغرب ، وشلت مصحفي الصغير وبقيت اقرا سورة المُلك ..شوية سمعت صرخة ل تاليا خلت قلبي يطير من محله ، ختيت المصحف في الطرابيزة وبقيت اتلفت م شوفتها في الغرفة ، عاينت ل باب الغرفة لقيتو فاتح مع إني متأكدة إني قفلتو وهي م بتحصلو ..طلعت برة كده ، لقيتا جاية علي وماسكة خدها وبتبكي ..شلتها وقلت ليها مالك ، ضربك منو؟ ..قالت لي ديك ..وأشرت لي على الصالة ، مشيت دخلت لقيت اختو بتاعة القهوة القبيل قاعدة ..قلت ليها اديني سبب مقنع خلاك تضربيها ..مع إني متأكدة إنو هي الفتحت الباب بعد دخلت الحمام عشان تطلعا وتضربا ، بس بسبب موضوع القهوة ، لكن م عايزة أعمل مشاكل من أول يوم ..قالت لي بتلعب لي بحاجاتي ، لو م عايزاها تنضرب امسكيها عليك! ..حمرت ليها مسافة وقلت ليها تمام ..رجعت الغرفة وقعدت تاليا في رجليني وهي بتبكي بحرقة وتتنهد لدرجة خلت دموعي تنزل معاها ، مسحت دموعي و ضميتا و بوستها محل ضربتها ..نزلت من رجليني ومسكت يدي و قالت لي تومي تديا "قومي دقيها" ..بوست يدها و قلت ليها م بقدر ادقها لأنو دي كانت غلطتك ، أنا مش قلت ليك م تمشي مع زول غريب ..قالت لي هي ناتتني! "نادتني" ..جريتا وضميتا وقلت ليها تاني لو نادتك اوعك تمشي ، م بس هي ، أي زول في البيت ده لو ناداك اوعك تمشي ليو ولو عملت ليك حاجة من غير م تكوني غلطانة عضيها فاهمة ..طبعا ممغوصة منها شديد على العملتو في بتي ..هزت لي راسا وختت راسا في رجليني وقالت لي ماما م تحليا تدني "م تخليها تدقني" ..شلتها وقفتها في رجليني ومسحت ليها دموعا وقلت ليها م بس هي ، أنا ما ح أخلي زول في الدنيا يقرب منك طول م أنا حية ♡..وحضنتها رقدت في كتفي ..شوية باب الغرفة دقة ..قلت ليو اتفضل ..جا جواد داخل قال لي سخني الأكل عشان جورجينا تجهز السُفرة ..قلت ليو طيب ..قال لي بتكوني حلوة وأنتي هادية ..عاينت ليو وقلت ليو م تتغزل فيني أحسن لي وليك ..عمل لي في خشمو حركة السستة بمعنى قفلتو وطلع ..تاليا عاينت لي وقالت لي م تحليني بلاي "م تخليني براي" ..قلت ليها اصلا ما ح اخليك ..وشلتها ومشيت المطبخ ختيت الأكل في النار ، شوية جات الشغالة حقتهم ، سلمت علي واتعرفت عليها ، وفهمت منها أنها شغالة هنا ليها ستة سنين يعني قبل م ناس جواد يجو ، لأنو هم ليهم تلاتة شهور بس من جو ..قلت ليها يعني جو يقرو جامعة ولا حاجة؟ ..قالت لي لأ ، هم اتخرجو من زمان ، أستاذ جواد قرا هندسة وشغال في شركة بناء في الكويت و اخواتو واحدة قرت طب والتانية تمريض و اتخرجو زمان برضو ..قلت ليها و جو لشنو؟!! ..قالت لي م عاارفة فجأة كده جو ..في نص ونستنا كده جواد جا داخل ، ضرب الباب بيدو خلعنا كلنا ..قال لينا لسه!! اصلو شنو هو!! راس خروف؟!! ..تاليا اتخلعت وبقت ماسكة فيني وبتبكي و جورجينا نزلت راسا ..قلت ليو أنت بتتنهر في منو؟!! نحنا من دخلنا المطبخ ده م تمينا عشرة دقايق! آلات نحنا!! م ناس زيك!! ..قال لي شغالين بقروش مالكم شغالين مجان؟!! ..قلت ليو أمسك قروشك واطبخ لنفسك م تقعد تتنفسن فيني م ناقصاك أنا!! وبكرة من الصباح ح أمشي عشان م تفكر لحظة إنك ممكن تذلني بقروشك!! أنا م ضعيفة للدرجة دي!! ..و طلعت ، دخلت غرفتي قعدت في السرير بهدي تاليا ، وهي من الخلعة والخوف بقت ترجف وتبكي ، ضميتا مافي فايدة ، حاولت اتكلم معاها مافي فايدة ، لحدي م أنفها بقى ينزف ، في الأول خوفت وقمت وقفت على حيلي لكن اتذكرت إنو مايا عندها الحركة دي لمن تخاف شديد فشوية وح تبقى كويسة ..دخلتها الحمام غسلت ليها وشها ب موية باردة حتى شوية هدت ..بقيت شايلاها ولافة في الغرفة عشان انومها باب الغرفة دقة ..قلت ليو منو؟ ..قال لي أنا عمك محمد ..قلت ليو ادخل ..دخل وخلى الباب فاتح وقال لي مالك ي بتي دايرة تخلي البيت ..قلت ليو منو قال ليك؟ ..قال لي جورجينا ، لكن أنتي ليه دايرة تخلي؟ ..قلت ليو بصوت خافت بسبب ولدك و حركاتو ..قال لي مالو؟ ..قلت ليو جا ضرب الباب بيدو وخلع لي بتي لمن أنفها نزف ، و فوق ده قايل نفسو مشتريني بقروشو وبذلني قال! ..قال لي امسحيها لي في وشي ي بتي وم تمشي اقعدي ، أنتي يادوب ده أول يوم ، ختي الرحمان في قلبك و اصبري شوية ..عايزة انفعل اتذكرت تاليا نايمة في كتفي ..قلت ليو بصوت خافت أنا م مضطرة اصبر على الإهانة دي ي عمي!! ولا أنت زاتك ، ماف حاجة أغلى من احترامك لنفسك! ، مش بهددوك إنهم ح يمشو لأمهم خليهم يمشو وأنا متأكدة ح يجو راجعين! لأنو لو فعلا عايزين يقعدو معاها م كان جو!! ..م رد لي ..قلت ليو على كل أنا بكرة الصباح إن شاء الله ح أمشي ..قال لي ي بتي أنا في مقام أبوك ، اسمعي كلامي ومشيها المرة دي عشان خاطري أنا بس ..قلت ليو ي عمي كلمتي واحدة ح أمشي ..شوية جا جواد داخل ..قلت ليو الباب ده م شايفو؟! ..قال لي عشان لقيتو فاتح بس ..قلت ليو حتى لو! ..قال لي طيب آسف ..قلت ليو م خلاص دخلت ..قال لي م على الاستئذان على الحصل في المطبخ ..قلت ليو يعني م عايز تعتذر على الاستئذان؟ ..قال لي طيب أنا آسف لأني جوطت من غير سبب و آسف لأني دخلت بدون استئذان ..قلت ليو وأنا ح استفيد شنو من اعتذارك؟ ..قال لي ما ح تستفيدي شي ، لكن أبوي عايزك تقعدي ف اقعدي عشانو ..عم محمد قال ليو من متين بتحبني كده؟ ..ضحكت و رجعت صريت وشي ..جواد قال ليو ليه بتقول كده ي أبوي؟! ..قلت ليو بعد البتعملو فيو ده كله وبتسألو! ..قال لي عملت شنو؟! ..قلت ليو وكمان بتسأل؟ ، أبوك ده أنت لاقي في الشارع! ..عم محمد قال لي م مشكلة ..قلت ليو لا لا مشكلة هو م محترمك ح يحترمني أنا كيف؟ ..جواد قال ل عم محمد طيب أنا آسف ي أبوي ..قال ليو لا لا ي ولدي م مشكلة ..عاين لي وقال لي خلاص رضيتي ..م رديت ..قال لي أنا اعتذرت ليك لأنك عاجباني ♡..قلت ليو والمفروض أفرح يعني؟! ..قال لي م عاارف ..عم محمد قال لي م تشتغلي بيو ي بتي اقعدي ..سكت فكرت مسافة وقلت ليو طيب ي عمي ، لكن أولادك يكونو بعيدين مني خصوصاً بناتك ..قال لي تمام ..عاينت ل جواد وقلت ليو خليك أنت و أخواتك بعيدين مني تماماً ..قال لي تمام ..وابتسم ، م اشتغلت بيو ومشيت رقدت تاليا في السرير وقعدت جنبها ، قامو طلعو ..بصراحة لو م أبوهم أتكلم معاي كان مستحيل أغير رايي حتى لو اعتذر لي خمسة ألف مرة ..شوية كده سمعت تلفون برن ، قمت فتشت لقيتو في الشنطة ، اتعودت على القعاد من غير تلفون لمن نسيت إني اشتريت واحد ..اخدتو عاينت لقيتو عُمر ، رديت سلمت عليو و شاكلني لأني م اتصلت طمنتو إني وصلت ، واتكلمنا مسافة وسلمت على فريال وعمي بابكر وكلمتهم إنو تاليا نايمة و أول م تصحى ح اتصل ليهم يتكلمو معاها وقفلت ..عاينت ل يدي شوفت الاسورة الهداني ليها مازن ، بوستها وقمت وقفت بقيت لافة في الغرفة ، م كنت قادرة أنوم ، فجأة كده اكتئبت والذكريات بقت تطاقش في راسي وكل م أتذكر شكلي وأنا قاعدة في الأرض لمن طردوني من البيت دموعي بتجري ، وكل المواقف المريت بيها ، مهند و جنونو ، نومي في كشك للتذاكر ، قعادي في الشارع في بورسودان ، نومي في بيت فاضي ، رفضي للشغل ، نظرات الناس لي وكلامهم ، صحباتي الانقطعت منهم و.. و مازن ..كانت كل ذكرى مؤذية بالنسبة لي أكتر من القبلها ، وبتوجع لي قلبي وبتكسرني أكتر من أول ، وبحس زي الكأنو الذكريات دي كلها قاعدة فوق كتفي و زي الرقعة في حياتي ، فضلت واقفة وبتذكر لحدي م تعبت وقعدت في الأرض جنب السرير وبقيت داسة وشي بين رجليني وببكي ، يمكن أنا قوية بالنهار وبعرف أدافع عن نفسي ، لكن بالليل مافي أضعف مني ..الحاجات المريت بيها ، ذكرياتها بتهاجمني كلها دفعة واحدة وبتذكرني إني مكروهة من أهلي الحبيتهم و إنو كل الأحلام البنيتها اتهدمت في لحظة بسبب غلطة م غلطتي أصلا ، يمكن لو كانت غلطتي م كان زعلت ، لكن المشكلة إني م عملت حاجة وبعد ده اتعاقبت وخسرت كل حاجة دفعة واحدة ..ختيت يدي في خشمي عشان م اطلع صوت و زدت في البكا ، فجأة حسيت بيد في راسي ، رفعت راسي بسرعة لقيت تاليا واقفة ..مسحت دموعي وقالت لي ماما بتبتي مالت "بتبكي مالك" ..نزلت راسي وانفجرت بكى ياداب ، حسيت بالذنب لأني معيشاها عيشة زي دي ، المفروض تكون عايشة حياة هادية و عادية وسط أهلها ومع صحباتها ، لكن بسببي بقت مضطرة تتنقل في بيوت الناس وتتحمل حقاراتهم وتصرفاتهم المزعجة ، تاليا اتحملت بسببي حاجات م مفروض تعيشها في السن ده ، حاسة إني ظلمتها وم قدرت أهتم بيها زي م وعدتها ..بقت تتكلم معاي ولمن م لقت رد ، قعدت جنبي و تاوقت راسا وهي مُصرة تشوف وشي وقالت لي ماما م تبتي معليث ، ماما مالت ..م قدرت اتماسك لأني كنت في قمة انهياري ..بقت تسألني كتيير م رديت ، قامت بقت تحاول ترفع راسي بالغصب ..رفعتو وقلت ليها بنهرة مالك ي تاليا!! في شنو!! ..خافت و رجعت ورا ، عاينت ليها مسافة وقلت ليها تعالي ..جات وقفت جنبي ..قلت ليها اقعدي ..قعدت ختيت راسي في رجلينا وشلت يدها ختيتا في راسي ، بقت تلعب بشعري ، هي فعلاً طفلة وم فاهمة حاجة لكن بوجودها كنت بحس بالأمان ، على الأقل بحس إني م براي في الدنيا دي وانو في زول واقف جنبي وبقدر اخت راسي في كتفو بدون خوف ♡..بقيينا قاعدين مسافة ..قامت قالت لي ماما تومي لاسك تتيل "قومي راسك تقيل" ..ضحكت و رفعت راسي وقلت ليها بالجد!؟؟ ..سكتت شوية ومدت رجلينا وقالت حلاث القدي "خلاص ارقدي" ..قلت ليها تتحملي عشاني؟ ..هزت راسا ..شلتها ختيتا في رجليني ، قامت مسحت لي دموعي وباستني في راسي و خدي ..قلت ليها تاليا أنا م عايزاك تمشي زيهم كويس ..قالت لي تويس ..وضحكت ، ضحكتها كانت بالنسبة لي زي العلاج ، والدواء الوحيد لقلبي ، ابتسمت وضميتا تاني حتى شلتها مشينا رقدنا نمنا ....

أعودُ مُرهقة مِن الحياة ، محطمة ، بائسة ، و مليئة بالذكريات السيئة ..يكفي أن تقول " ماما " ليزول كل هذا ♡

يتبع ...