مسلسل حته منى.
٤٣: الحـلقـه الثالثـة والأربـعـون .
#الكـاتبه_الصغيره_آيـه_يحيى_الأميـر.
زغاريط تملى بيت صفـوان زيـدان والفرحه على وشوش الجميع.
لحظه...
باب الأوضه يتفتح والبنات يخرجوا.
حسناء جميله و صدّيِقه يطلوا الزغاريط.
لولولولولولولولوى..
إبراهيم يقف بفرحه ولهفه وفى إيده الورد الأحمر المغلف اللون البيچ وعليه إسم ريـم.
ريـم تدخل الصالون وهى باصه فى الأرض بخجل..
تسلم على كل الموجودين ما عدا إبراهيم اللى واقف بينتظرها بحب ولهفه وخالها عاصم يقولها : تعالى أقعدى هنا جنبى.
تقعد ريـم بين خالها عاصم وعمها ناصـف.
يقهقه مـروان إبن عاصم : هو العريس هيفضل واقف كتير.
إبراهيم متنح...
يسحبه مـروان من إيـده ويقول لأبوه : لا موأخذه كدا يا حاج عاصم. أقعد جنب عروستك يا هيما.
ماجد يصفر بتشجيع : قومى يا عروسه سلمى على عريسك.
ريـم تقف بخجل...
إبراهيم فرحته متتوصفش ولكن بيتعامل بحدود قدملها الورد : مبـروك يا ريـم.
تحمحم ريـم بخجل : شكراً.
رامى بغيـره : إنتِ هتفضلى واقفه يا حبيبتى أقعدى أقعدى. ويروح يقعد جنبها ويقعدها.
مروان يبتسم بمكر وبخفوت : هو أنا كنت مقوم أبويا يا ننوس عين أمك عشان تقعد مكانه.
رامى : عيب أمى تسمعك تقول علينا إيه دلوقتى عاصم معرفش يربى.
كل ده وإبراهيم بيبص لـ رامى بغيظ ويرجع يقعد مكانه.
فى الصاله...
تطلع آمال من شنطه بلاستكيه من اللون الأبيض الصافى وعليها قلوب حمرا و كلمة LOVE.
تطلع علبـه قطيفه مربعه بنى.
تفتحها وتفرج الذهب اللى فيها لكل اللى قاعدين. نهاد بإستفهام : جبتيه إمتا ده؟.
آمال بفرحه : ياختى الواد كان واقع لشوشته فضل يحوش ويرتب لحد ما إشتراهم من حوالى سنه وإتقدملها بس نجيـب أخوكى رفض.
سهير بنقوره : طب وكان إيه اللى غير رأيه.
ترد رحاب بإبتسامه : النصيب غلاب يا أم خالد وبعدين دول لايقين على بعض خالص ربنا يهنيهم ويحفظهم.
كلهم : يـااارب.
سهير بغيظ تبص لـ زهـره : مش بالمظاهر يا رحاب ياختى. بكره تقلبه عليكى يا آمال وهتقولى سهير قالت أدى دقنى أهى.
رحاب : بقلك ايه يا أم خالد هو إيه سبب إن خالد ومراته بقالهم أسبوع مبيجوش عندك.
سهير تصك على أسنانها بغيظ وكأنها صاحبة الحق : قلبتوه عليا.
تتدخل جميله فى الحوار : بذمتك يا مرات عمى إنتِ وعماتى لو بنتكم حماتها هانتها ينفع تقعد معاها تانى وبعدين خالد ماقطعكيش.. يومياً عندك بيتغدى بس فى بيته ومع مراته فيها ايه دى.
سهير بغل : إنتوا مشفتوش عمل فيا إيه يومها فضل يزعق ويقولى.
فلاش باكـ🎬...
خالد يدخل بيت أبوه بينهج بغضب وينادى بنبره عاليا وعصبيه : ماما يا ماما .
سهير تخرج من أوضتها بخوف : خير يإبنى مالك داخل عليا كدا بزعابيب أمشير.
خالد يصك على أسنانه بغضب : زهـره عملتلك إيه عشان تهنيها ومش أول مره يا ماما وبعديها بمزاجى.
سهير تلف راسها وتدعى الظلم وتبتدى تتصنع العياط : إبنى ورجلى حيلتى من الدنيا يكدب أمه و يصدق بنت نوال، يا ميلت بختك فى إبنك يا سهير.
خالد يعلى صوته بغضب : مامااا كلمه واحده زهـره مراتى كرامتها من كرامتى يا ماما وقيمتها عندك زي تمام وأنا خلاص عرفت قيمتى.
سهير تصرخ بغضب : قلبتك على أمك يا خالد خلاص بقت هى اللى فى القلب.
خالد بتنهيده طويله : ماما لو سمحتى ملكيش دعوه بـ زهـره مش ذنبها إنى رفضت بنت أختك.
سهير بغيظ : بنت أختك!! حتى أسلوبك يا خالد فى الكلام إتغير.
خالد يلوح بكفيه : الفضل كله يرجع ليكى ويمشى ويسيبها.
وهى تفضل تندب بصوت عالى وعياط مصتنع : روحلها يا خالد روحلها راضيها وسيب أمك الغلبانه تعيط على ميلت بختها.
نرجع باكـ🎬...
تتابع سهير بعياط مصتنع : وهان عليه عادى أمه اللى مقهوره من العياط.
