نعفس علي نفسي اتريح رمــــــــــــاد
وانقول حكم الله هكـــــــي راد
نعفس علي اللي حــــــــــــامي
و يموت حر الجمر تحت اقــــــــــــدامي
ونصبر ونعطي للكريم احكــــــــــــامي
صبر الحطب ع النار للبــــــــــــراد
و نلبس احزام الصبࢪ دايا كــــــــــــامي
و نࢪبط خيوط الأمل بالجــــــــــــواد
.
.
فاتو خمــــــــــــس ايــــــــــــام
وانا نحاول نبان قوي قدام وليد وخواتي واولهم امـــي
وليد خوي الصغير يلي حسيت روحي قدامه انا الصغير !!
متحمل مسؤولية اكبر من عمره
متحمل تعب امي ومرضها ويعاني فيها ومتحمل
ومسؤولية مرت عبدالمعز وصغاره الاربعه ف راسه
واختي مريم المطلقه
حتى كلامه يبان كلام واحد فايت الاربعين مش شاب كيف خاش ع العشرين
حسيت روحي قدامه عاجز مش قادر ندير شي هاهو مقعمز خمس ايام ومادرت شي حتى مش قادر نتحمل منظر امي وهي بهالحاله ونهرب من قدامها مش قادر نتحمل نشوفها هكا
ماندير ف شي غير نستقبل ف الافواج يلي تخش وتطلع عليا ف المربوعه يحمدولي ف السلامه
خاطري نقلهم تربحو مش وقتكم!
خلوني لاهي بمصايبي
خلوني نستوعب اني بين اهلي يلي مالقيتهمش كيف ماخليتهم !
وقفت وانا هالصداع يلي ملازمني زاد عليا من الدوشه واستأذنت باش نخش ناخد حبوب راس ... خشيت للحوش ونفس الشي الصالة معبية نسون جايين يحمدو ف السلامة
خشيت للكوجينة وقعدت نفتح ف الدواليب بالك نلقى حبوب ندكر ريهام امس جابتلي حبة من الكوجينه .. سمعت حس حد : وين الحبوب " قبلت للباب "
وردة" بربكة: اا اهلا معاذ كيف حالك
ارتبكت : اا بخير كيف حالك وحال الصغار
وردة" نزلت عيونها: الحمد لله
: تبي شي محتاجه شي انت ولا الصغار
شافتلي: لا لا وليد مش مقصر معانا صحيتي
وانا مازلت نشوفلها : كان احتجتو شي بلغيني بس مش اتحشمي بكل
سكتت شوي وتكلمت : الله يبارك فيك ماتقصروش والله زي خوتي حاسبتكم
لفيت عنها وغمضت عيوني واستغفرت ولفيت منزل عيوني وطلعت ..
معاذ فكك من الوهم والهم يلي بتعيش روحك فيه خلاص قلنالك بدت مرت خوك .. وهاهي ف كل لقاء ضروري اذكرت انت شن تو ..
ماتخليش الشيطان يخش لتفكيرك .. خطمت ع دار امي لمصكرة فتحتها وخشيت ولعت الضي لقيتها راقده ..
ديما ف هالوقت ترقد وف الليل تقعد نايضه مايجيهاش النوم ولا تهفت تقعد ماشيه حاية ف الحوش تقول كيف وحده ف عمرها ماتتعبش من الحركه !
قربت وقعمزت جنبها ونشوفلها
واضح من الفواجع يلي شافتهم مرضت مابعدها الحق
ماتولها اثنين شباب وبوي مريض فيه الخبيث واشبح كم من فواجع شافت
