يوم الخميــــــــــــس يوم الزفة
التجهيزات بدت والاستعداد لهذا اليوم يلي بيكون فيه زفة الغوالي اختي وصاحبي فرحتى ماتنوصفش نحس ان ماحد فرح زي فرحتي هذه .. من قال بنطلعو من هذاك الحبس ونعيشو حياتنا طبيعية علما تخايلنا ماكان ف مخيلتنا الا كيف نموتو تصفيات ولا امراض ولا من جروحنا ..
شخص عاش عشر سنين ف ظلم و ضلام اكيد بتكون فرحته عظيمة ف هذا اليوم .. وفرحتي بفتحي اضعااف مضاعفه عن فرحتي بمريم
صح هي اختي ونبيلها الخير لكن فتحي زي ماقلت اغلى من روحي فاكيد بنفرح بيه ...
شبه كل ساعة يا انا نتصل ياهو يتصل وكنت متمنى نكون معاه زي ماهو متمني لكن مانقدرش نسيب اهلي بروحهم وحتى عيب قدام الناس ماشي لصاحبه ومسيب اخته .. ومدام معاه الشباب منير ويونس وعبدالرحمن وايوب ومحمد وخوه اوس وهشام يطمن انهم بيحسسوه انه عنده عائله واصحاب ومش بروحه
وحتى ام منير وبناتها قعدو مع اخته حتى عزمتهم امي اعتذرو وقالو مانبوش نخلوها بروحها
بعد العصر اتصلت برنا تطلعلي ووقفت بعيد عن باب الحوش لان عارف عماتي وخالاتي وبناتهم وزوجة سالم وبنتها متواجدات ف الحوش
رنا: نعم
معاذ : اسمعي بعدين بتزحم رد بالك رد بالك وافتحي عيونك انت وخواتك راه حد يدير شي
رنا" باستغراب: شن يدير؟
معاذ: قصدي يبخو شي ولا يحطو شي عارفة ف الزحايم شن يديرو يلي مايخافوش ربي
رنا: لا كون هاني منظمين كل شي ومش مخليين حد يقرب جيهه مريم
معاذ: مش بس مريم ركزو ع اي حد مشكوك فيه او بينكم وبينه عداوة حتى كان قدييمه او حتى تعرفوها مش مزبوطه حطو عيونكم عليها مانبوش الشي يلي صار يتكرر وبعد اتم الحوسه تو نضمو كل شي ونفتشو مانبيش اي تغافل
رنا: ان شاء الله ان شاء الله
معاذ: كان غير سمعو رايي مانبيها هالعزومه كلها مفروض الا الاقارب المقربين بس
رنا: عندك حق هو والله ماكثرنا عماتي وخالاتي وبناتهم يلي ف الحوش ونساوين عمامي وبناتهم وشوي جاراتنا يلي هنا حتى يلي ف طرابلس ماعزمناهمش وبنت صاحبك وامها بس
معاذ: اشوي ع اساس وهاهي من امس زاحمه
رنا: ههه مزال لو بدير عرس بوي حالف اكل يعزمهم
معاذ: ياوالله حاله هو ع خاطر هالعفن يلي يحطو فيه ف كل زحمه تصير هو ف مرض وحطوه لبال ف فرح
رنا: حسبي الله ونعم الوكيل وربي يكفينا شرهم
معاذ: امين .."ترددت نسالها" اا امم
رنا: خيرك تبي شيء
معاذ" باحراج : مرت صاحبي الله يرحمه وبنتها مرتاحين ؟ راكم تحشمونا معاهم
