عقيله فرج قال :
إكســــــــــــرن خاطري ليَّــــــــــــام
و ابريــــــــــــت غير ماني لوّلــــــــــــي .. !
#ع_الفاهق
الحمد لله ع كل حال
..
فتحي: شنهو لقيت
ابتسمت: منير نقدرو نثبتو براءته كان عيناله محامي شاطر
فرج: وين بتلقى محامي كويس يشد قضيته
فتحي: وعلاش محامي ومحاكم وقصه طويله نقدرو نثبتو انه كان مفقود وكان محبوس معانا
معاذ: اولا كيف تبي نتبثو وهو مفقود قلت مش شهيد. . ومرات يقولك مدامه مفقود هو مغير اسمه وبدا تاجر مخدرات ولا كان هاج برى ليبيا.. وثانيا كيف بنتبثو هالشي وهو اصلا كان صغير ف السن وتو شاب والشكل تغير .. وثالثا من بيصدقنا وهي لبلاد خاشه بعضها ومافيش قانون .. ومدامه حاطينه ف حبس ومتهمينه بالتهريب والقتل ف من بالساهل نطلعوه ولازم محامي شاطر يفهم ويقدر يفكه من الحبوس
فرج: وبه من بيساعدنا
معاذ: يونس ولد سالم الله يرحمه
فرج: ولد سالم؟؟؟ قصدك اكبر اولاده !
معاذ: اي ماشاء الله بدا شاب كبير وخريج قانون ويشتغل محامي
فرج: ماشاء الله ماشاء الله قصدك كبر
فتحي: حتى انا انصدمت فيه كنا ديما متخايلينهم صغار مزال لين لقيتهم قدامي شباب طول وعرض بوهم بوهم ماخلو منه حاجه
معاذ: اي ماشاء الله وانا عجبني الحق يونس تحسه كيف فاهم وقعد هلبا يسال فيا كيف ثبتت اني حي بعد ماكنت مكتوب متوفي
فرج: زعمه يقدر يساعد منير
معاذ: ممكن صح هو صغير ف السن لكن اكيد يقدر يساعد او اقل شي يشوفلنا محامي يوثق فيه ويقدر يصدق قضيه منير ويستلمها
فتحي: يارب
معاذ: خلاص غدوة نكلم الافندي هشام يعطيني رقمه ونشوفه
فرج: ان شاء الله خير
سهرنا الليل شوي واتجهنا لحوش فرج يلي كان قريب من حوش اهله ومزال مش كامل كله جابلنا فرج حصيرة وفراشات ودفاية وقعدنا نهدرزو
جا وقت النوم وجابلنا بطاطين
فتحي: مافيهاش كيف نرقدو برى ؟؟
فرج: علاش بترقد برى. هو الجو سحنتي!!
فتحي: هكا نبي نتمتع باجواء الشتاء
فرج: هاهو فاتح الروشن تمتع ع راحتك
معاذ: عادي ترقد داخل مايصيرلك شي !
فرج: تي خيركم شن بيصير فهموني؟ راه لتو فيه هلبا حاجات من يوم طلعت مافاهمهم شن الناس بدت ترقد برى ف الشتاء ولا شن
