ايريدن ناس انضاف اقلــــــــــــوب
الجيره والصحبه والصــــــــــــوب👌
.
.
.
.
فاتو خمس ايام وبويا مزال ف العيادة كنا نتبادلو عليه انا وخوتي ..
انا ف النهار ووليد العشيه والليل يقعد معاه معز
وباقي وقتي ف الحوش مع امي يلي متغششه وحالتها بدت تسوء معش ترقد الليل كله
وواهقه وتبكي
وتقول تو بيموت بوكم حاساته معش بيطلع الا للقبر ..
كان كلامها يوجع فيا لكن نحاول نحاول نبان اني قوي قدامها ونصبر فيها وانا نبي من يصبرني
..
..
ومرات لما نضايق نمشي لفتحي نسهر معاه ويجينا منير ونكملو سهرنا بضحك ومواقف مرينا بيها ف الحبس
ونضحكو حتى ع مواقف الرعب يلي عشناها نضحكو ضحك مش طبيعي وكأنه بضحكنا هذا نزيلو ف الهم يلي متراكم ع قلوبنا ..
.
يوم يلي فتحنا فيه قلوبنا لبعض وحكينا شن يوجعنا
كان يوم مرهق جدا
حكى فتحي قصه خوه وكان الالم باين ف نبرة صوته قال انه مشتاق يضم خوه ويعبرله عن شوقه ليه.. وينسى يلي داره كله خاطره يتربو صغار خوه قدام عينه ..
لكن زوجته هي العائق .. لكن لما يذكر امه وكيف ماتت من الهم يقسى قلبه ...
لكن قال ان وجود اخته يلي بين فترة وفترة تزوره مع صغارها وراجلها هون عليه شوي
حكى منير عن خوته كيف كانو وكيف مصدوم فيهم كيف بدو
واحد قاتل
والثاني مجرم ومهرب حشيش وممنوعات وسلاح ..
وبوه يلي هرب وخلى صغاره يواجهو ف الهم بروحهم
لاول مرة منير يضعف ويبكي قدامنا بكى لما حكى عن امه ولقاءه بيها بعد طلع براءة حسيت بالم ينهج قلبي وهو يحكي كيف انها تدعي ع يلي كان السبب ف حبسته وماتدريش ان ولدها الثاني
جا دوري وحكيت حكيت يلي كان موجعني وكيف لقيت اهلي حالهم بين المرض والالم والهم وعن مرض بوي يلي ماقدرتش نكبته داخلي نبي نفضفض وتحكيه لحد يحس بيا ..
وبترت قصه خواتي وشن صار فيهم من مشاكل
بس ذكرت جزء يلي يتعلق بمريم بدون قصد مني لما جابتها سيرة ع خالد وكيف تلقيت العذاب ع ايديه ..
مالاحظتش غصب فتحي الا لما كملت وبدا يدعي ع خالد يلي ميت انه يموت ويقعد جيفه وياكلوه لكلاب .. ف نص حزنا ضحكت انا ومنير بقوة ههه
وهو تغير وجهه وانتبه ع روحه وغير السيرة بطريقته الرائعة ف تغيير الامور .. قعدت نشوفله وانا مبتسم وهالمرة من كل قلبي تمنيته يتزوج مريم لاني بديت واثق ان ماحد يساعد مريم ف طلوع من حالتها يلي سببهالها خالد الا فتحــــــــــــي
.
.
.
روحت للحوش بعد ماسهرت مع الشباب يلي بالسيف خلوني نروح يبوني نبات معاهم ف البلكونة يلي بدت كأنها جنة بالنسبة لينا ومانرتاحو بالنومه الا فيها زي مانرتاح الا ف مكاني برى م الحوش وتحت العنبة
..
