"اليقيـــن في الله"
.. لو الخطر على بُعد أمتار منـــك.. ثق أن الله قادر أن ينجيك منـــه.. لَا تَحْزَنْ إِنَّ اللَّهَ مَعَنَـــا
.
.
خلاص بينا وبين الموت شعره .. معش ندري ع حد وانا نجري ونجري وخلاص وقدامي بمسافه فتحي ماقدرتش حتى نلف نشوف منير ومحمد شن صار فيهم وقتها ماهمني غير ننجى وندعي ربي ينجيهم ومزال نسمعو ف صوت الرصاص ورانا لكن بدا يخف ... لفلي فتحي ويقول (هي ياراجل هاانت هانت )
قعدنا ساعه ولا ساعتين واحنا نجرو بين الشجر والجبال والوديان ... سبحان الله كيف عطانا طاقه لجري ولا هي الروح حق غالية
حسيت روحي فشلت ومعش نسمعو ف صوت الرصاص وقفت شوي ولفيت ورايا مافيش حد نهائي : الشباب وين
فتحي " وصوته بالسيف يطلع وهو داهش" : يارب يكونو بخير وماشدوهمش هي ياراجل
لفيتله والدمعه ف عيني : معقول قتلوهم
فتحي" سكت ماعرفش شن يقول : هي هي تعال قبل يلحقو فينا " مشى ومشيت وراه لين قابلتنا الطريق الرئيسية بدينا نمشو بالشوي معش عنا جهد حتى نبادلو كرعينا .... بالي كان مشغول ع محمد ومنير وشوي نلتفت ورايا ونتاكد لاحقنا حد ولا بدينا ف امان
فتحي " وقف وشافلي: كيف الراي تو وين بنعطو وجوهنا
فجاة ادركت اني بديت حر ونقدر نرجع لاهلي شبحتله ووقلت بشوي من الثوثر ومشاعر غريبه: زعمك عيالنا مزال عايشين
فتحي " تنهد: خيرك مش قالو القذافي كلهم قتلهم ويلي قعد عايش طلع برى ليبيا
حسيت بوجع عمري ماحسيته شن فايده طلعت عايش ومانشوفهمش
فتحي " تحرك يمشي: خلينا تو نكملو مشى لين ربك يفتحلنا طريق
مشينا مسافه لا بأس بها والشمس بدت فوقنا .. وقفت ولفيت لطريق
فتحي " وقف وشافلي: ماتعباش عليهم حتى كان نجو ماظنيش يلحقو فينا
شفتله وقلتله: غير اسمع كأن فيه صوت سيارة
فتحي" شاف لطريق : هي تعال نخطو بسرعه مرات هما يلاقونا
قعدت واقف ونسمع: باين حاجه كبيرة ياطانطا ي بوطي
فتحي : تي وبالك دبابه
ضحكت ومع اني مش خاطري فيه بكل لكن كان مكتوبلنا نشدونا وكان هربنا للمريخ لما يشدونا :شوف هاه بوطي " قعدنا واقفين نص الطريق نستنو فيه يقرب"
فتحي: والله الباين مايشبح فينا مامتناش م الرصاص بنموتو مرفوسين
ضحكت بصوت عالي: يا والله فتحي اسكت ياراجل تفاءل خير " مديت ايدي ونخيرله نبيه يوقف .. بدا يخفف ف السرعه .. وفجاة زحف للجيهه الثانية وانطلق يجري ..: تي هذاا خيره
فتحي " انفلق ضحك: هههههه خاف يحسابنا جنون شوف شوف اشكالنا تقول طالعين من مقبره
: تي ياراجل ف عز النهار الجنون يلي بيطلعو
فتحي: ههههه والله شبحتي فيه الا خاف ياعليك حاله من بيقبلنا بالمنظر هذا تي وحتى كان بنمشو لعيالنا بيختلو منا يحسابونا طلعنا من قبورنا
حسيت بوجع حاد والله كلامه حق من بيقبلنا تو ..خلاص فشلت مع بعضي ماعندي جهد حتى نتنفس .. مشيت قعمزت ع حاشيه الطريق وقعمز جنبي فتحي
فتحي: ياراجل كيف الحال والله شبحتي فيهم كانو حاطينا ف حدود الجزائر شن هذا صحراء وجبال حتى حس كلب ماينسمع يستر الله ومايليل علينا الليل وين بنعطو وجوهنا نقعدو وجبه دسمه لضباع
