.لقسام على قيس انيانا
جابت سمح الزول احذانا❤️
.
.
بعد حوالي خمس ايام جت الموافقة اخيرا من خلال النسون وبلغونا باش نتفضلو الرجالا ونتمو امور الخطبة رسميا
كنت فرحااان وعندي شعور غريب خايف ولا مش عارف نوصف شعوري ..
مشو بوي ومعز وفتحي وعمي عمران بيتمو رسمي ويديرو الفضانية ..
وتموها وبدت رسمي خطيبتي [هيام سالم ]
وجو خواتي يباركولي وانا كنت متحشم ونرد عليهم بصعوبة شعور غريب ماتوقعتش ف يوم م الايام نطلع من غياهب وظلمات ودهاليس الحبس لنور الحرية ونتزوج وندير عويلة !
سبحان من كتبلنا نصيب ف حياتنا نعيشوها من جديد
بعد روحو قعمزو ف المربوعة وانا طالعت بعد اشرت لفتحي يجيني وطلعت برى
فتحي" حضني : مبارك مبارك ياغالي واخيرا بتودع العزوبية
معاذ: ههه الله يبارك
فتحي" بعد عني : فرحتلك الحق
معاذ: منور ياغالي
فتحي: وتي روحك بوك قال شهر واكثر منا لا
معاذ" انخلعت: شن شهر وين بنسكن
فتحي: ف شقتك ف طرابلس خيرك مش طلعو منها المستأجرين
معاذ: ماهو فيه من سال عنها ويبيها
فتحي: تي فوتهم وخودها انت اقعد فيها لين تبني
معاذ:، اا مش عارف
فتحي: خيرك خايف هههه
معاذ: مش خايف مش عارف مزال نحس فيه
فتحي: واك قلنالك شيباني انت خيرك شن مزال ف عمرك
معاذ: شن تفاول
فتحي: ههه اي اشقى بروحك وتزوج بالك تجدد شبابك
معاذ" تنهدت: ان شاء الله خير
فتحي: ما ادورش ياغالي ربك يسهلها
معاذ: ياراجل نحس ان مزال عندي عقد مش عارف كيف نتخلص منهم
فتحي: ههه هاهو خوك عندي عقد وتزوجت وهاهي اختك مزال صابرة وتعاني مني منها النوم يلي مانرتاحش فيه وهاهو كيف تأقلمت وبديت نرقد لكن الروشن مفتوح و ضي السهارة والع بحدايا ومتحمله المسكينه وماتنوضش فيها بصوت عالي ولا كان تقربع شي بقوة ننخلع وخليتها تحبش حبش حتى ف مشيتها
معاذ: هههه واك مسكينه اختي بتسببلها عقد اخرى
فتحي: هههه الله غالب عندها خبرة من خوها وتاقلمت بسرعة
معاذ: ههه وانا كيف الراي البنت بتنغش فيا معناها
فتحي: ههه ربي يعينها ع ما ابتلاها
معاذ" ابتسمت: تعرف نفكر نمشي لدكتور نفسي
فتحي: هبلت!!
معاذ: رسمي نتكلم راه عقدي اكبر من عقدك ناسي شن شفت ف حبس خالد وكيف عشت ف حاجات ماحد عارف بيهم مانبيش حتى بيني وبين نفسي نركز عليهم لكن ياودي ماظنيش نرتاح ولا نريح بنت الناس معايا .. لما كنت ف الحبس نحلم بالحرية وتو احلامي كلها ع الحبس
